[Pramāṇa](https://indike.org/pramana/) › [Indian literature](https://indike.org/pramana/in) › [Purāṇas](https://indike.org/pramana/in.purana) › [Vayupurana](https://indike.org/pramana/in.purana.vayu) › 1.6 # Vayupurana 1.6 Vāyupurāṇa 1.6 - **Language:** Sanskrit ### [1.6.1](https://indike.org/pramana/in.purana.vayu.1.6.1) ..sūta uvāca.. ### [1.6.2](https://indike.org/pramana/in.purana.vayu.1.6.2) āpo hyagneḥ samabhavannaṣṭe'gnau pṛthivītale. sāntarālaikalīne'smānnaṣṭe sthāvarajaṅgame ..1.. ### [1.6.3](https://indike.org/pramana/in.purana.vayu.1.6.3) ekārṇave tadā tasmin na prājñāyata kiñcana. tadā sa bhagavān brahmā sahasrākṣaḥ sahasrapāt ..2.. ### [1.6.4](https://indike.org/pramana/in.purana.vayu.1.6.4) sahasraśīrṣā puruṣo rukmavarṇo'hyatīndriyaḥ. brahmā nārāyaṇākhyaḥ sa suṣvāpa salile tadā ..3.. ### [1.6.5](https://indike.org/pramana/in.purana.vayu.1.6.5) sattvodrekāt prabuddhastu śūnyaṃ lokamudīkṣya saḥ. imaṃ codāharantyatra ślokaṃ nārāyaṇaṃ prati ..4.. ### [1.6.6](https://indike.org/pramana/in.purana.vayu.1.6.6) āpo nārā vai tanava ityapāṃ nāma śuśrumaḥ. apsu śete ca yattasmāttena nārāyaṇaḥ smṛtaḥ ..5.. ### [1.6.7](https://indike.org/pramana/in.purana.vayu.1.6.7) tulyaṃ yugasahasrasya naiśaṃ kālamupāsya saḥ. śarvaryante prakurute brahmatvaṃ sargakāraṇāt ..6.. ### [1.6.8](https://indike.org/pramana/in.purana.vayu.1.6.8) brahmā tu salile tasmin vāyurbhūtvā tadācarat. niśāyāmiva khadyotaḥ prāvṛṭ‌kāle tatastataḥ ..7.. ### [1.6.9](https://indike.org/pramana/in.purana.vayu.1.6.9) tatastu salile tasmin vijñāyāntargatāṃ mahīm. anumānādasaṃmūḍho bhūmeruddharaṇaṃ prati ..8.. ### [1.6.10](https://indike.org/pramana/in.purana.vayu.1.6.10) akarot sa tanuṃ tvanyāṃ kalpādiṣu yathā purā. tato mahātmā manasā divyaṃ rūpamacintayat ..9.. ### [1.6.11](https://indike.org/pramana/in.purana.vayu.1.6.11) salilenāplutāṃ bhūmiṃ dṛṣṭvā sa tu samantataḥ. kinnu rūpaṃ mahat kṛtvā uddhareyamahaṃ mahīm ..10.. ### [1.6.12](https://indike.org/pramana/in.purana.vayu.1.6.12) jalakrīḍāsu ruciraṃ vārāhaṃ rūpamasmarat. adhṛṣyaṃ sarvvabhūtānāṃ vāṅmayaṃ dharmasaṃjñitam ..11.. ### [1.6.13](https://indike.org/pramana/in.purana.vayu.1.6.13) daśayojanavistīṃrṇa śatayojanamucchritam. nīlameghapratīkāśaṃ meghastanitaniḥsvanam ..12.. ### [1.6.14](https://indike.org/pramana/in.purana.vayu.1.6.14) mahāparvvatavarṣmāṇaṃ śvetaṃ tīkṣṇogradaṃṣṭriṇam. vidyudagniprakāśākṣamādityasamatejasam ..13.. ### [1.6.15](https://indike.org/pramana/in.purana.vayu.1.6.15) pīnavṛttāyataskandhaṃ siṃhavikrāntagāminam. pīnonnatakaṭīdeśaṃ suślakṣṇaṃ śubhalakṣaṇam ..14.. ### [1.6.16](https://indike.org/pramana/in.purana.vayu.1.6.16) rūpamāsthāya vipulaṃ vārāhamamitaṃ hariḥ. pṛthivyuddharaṇārthāya praviveśa rasātalam ..15.. ### [1.6.17](https://indike.org/pramana/in.purana.vayu.1.6.17) sa vedavādyupadraṣṭā kratuvakṣāścitīmukhaḥ. agnijihvo darbharomā brahmaśīrṣo mahātapāḥ ..16.. ### [1.6.18](https://indike.org/pramana/in.purana.vayu.1.6.18) ahorātrekṣaṇadharo vedāṅgaśrutibhūṣaṇaḥ. ājyanāsaḥ sruvatuṇḍaḥ sāmaghoṣasvano mahān ..17.. ### [1.6.19](https://indike.org/pramana/in.purana.vayu.1.6.19) satyadharmamayaḥ śrīmān dharmmavikramasaṃsthitaḥ. prāyaścittarato ghoraḥ paśujānurmahākṛti ..18.. ### [1.6.20](https://indike.org/pramana/in.purana.vayu.1.6.20) ūrddhvagātro homaliṅgaḥ sthānabījo mahauṣadhiḥ. vedyāntarātmā mantrasphigājyaspṛk somaśoṇitaḥ ..19..- pā.bhe. vedaskandho havirgandho havyakavyātivegavān. prāgvaṃśakāyo dyutimānnānādīkṣābhiranvitaḥ ..20.. ### [1.6.21](https://indike.org/pramana/in.purana.vayu.1.6.21) dakṣiṇāhṛdayo yogī mahāsatramayo vibhuḥ. upākarmeṣṭiruciraḥ pravargyavittabhūṣaṇaḥ ..21.. ### [1.6.22](https://indike.org/pramana/in.purana.vayu.1.6.22) nānācchandogatipatho guhyopaniṣadāsanaḥ. chāyāpatnīsahāyo vai maṇiśrṛṅga ivocchritaḥ. bhūtvā yajñavarāho vai apaḥ sa prāviśat prabhuḥ ..22.. ### [1.6.23](https://indike.org/pramana/in.purana.vayu.1.6.23) adbhiḥ saṃchāditāmurvīṃ sa tāmaśnan prajāpatiḥ. upagamyojjahārāśu apastāśca sa vinyasat ..23.. ### [1.6.24](https://indike.org/pramana/in.purana.vayu.1.6.24) sāmudrīrvai samudreṣu nādeyīśca nadīṣvatha. rasātalatale magnāṃ rasātalatale gatām. prabhurllokahitārthāya daṃṣṭrayābhyujjahāra gām ..24.. ### [1.6.25](https://indike.org/pramana/in.purana.vayu.1.6.25) tataḥ svasthānamānīya pṛthivīṃ pṛthivīkaraḥ. mumoca pūrvaṃ manasā dhārayitvā dharādharaḥ ..25.. ### [1.6.26](https://indike.org/pramana/in.purana.vayu.1.6.26) tasyopari jalaughasya mahatī nauriva sthitaḥ. caritatvācca devasya na mahī yāti viplavam ..26.. ### [1.6.27](https://indike.org/pramana/in.purana.vayu.1.6.27) tatoddhṛtya kṣitiṃ devo jagataḥ sthāpanecchayā. pṛthivyāḥ pravibhāgāya manaścakre'mbujekṣaṇaḥ. pṛthivīṃ tu samīkṛtya pṛthivyāṃ so'cinod girīn ..27.. ### [1.6.28](https://indike.org/pramana/in.purana.vayu.1.6.28) prāk sarve dahyamānāstu tadā saṃvarttakāgninā. tenāgninā viśīrṇāste parvatā bhuvi sarvaśaḥ ..28.. ### [1.6.29](https://indike.org/pramana/in.purana.vayu.1.6.29) śaityādekārṇave tasminvāyunāpastu saṃhṛtāḥ. niṣiktā yatra yatrāsaṃstatratatrācalo'bhavat ..29.. ### [1.6.30](https://indike.org/pramana/in.purana.vayu.1.6.30) skannācalatvādacalāḥ parvvabhiḥ parvvatāḥ smṛtāḥ. girayo'ntarnigīrṇatvāccayanācca śiloccayāḥ ..30.. ### [1.6.31](https://indike.org/pramana/in.purana.vayu.1.6.31) tatasteṣu viśīrṇeṣu lokodadhigiriṣvatha. viśvakarmmā vibhajate kalpādiṣu punaḥ punaḥ ..31.. ### [1.6.32](https://indike.org/pramana/in.purana.vayu.1.6.32) sasamudrāmimāṃ pṛthvīṃ saptadvīpāṃ saparvvatām. bhūrādyāṃ ścaturo lokān punaḥ so'tha prakalpayat. lokān prakalpayitvā ca prajāsargaṃ sasarjja ha ..32.. ### [1.6.33](https://indike.org/pramana/in.purana.vayu.1.6.33) brahmā svayambhūrbhagavān sisṛkṣurvividhāḥ prajāḥ. sasarjja sṛṣṭintadrūpāṃ kalpādiṣu yathā purā ..33.. ### [1.6.34](https://indike.org/pramana/in.purana.vayu.1.6.34) tasyābhidhyāyataḥ sargaṃ tadā vai buddhipūrvakam. pradhānasamakālaṃ vai prādurbhūtastamomayaḥ ..34.. ### [1.6.35](https://indike.org/pramana/in.purana.vayu.1.6.35) tamo moho mahāmohastāmisro hyandhasaṃjñitaḥ. avidyā pañcaparvvaiṣā prādurbhūtā mahātmanaḥ ..35.. ### [1.6.36](https://indike.org/pramana/in.purana.vayu.1.6.36) pa़ñcadhā cāśritaḥ sargo dhyāyataḥ so'bhimāninaḥ. sarvvatastamasā caiva dīpaḥ kumbhavadāvṛtaḥ. bahirantaḥ prakāśaśca śuddho niḥsaṃjña eva ca ..36.. ### [1.6.37](https://indike.org/pramana/in.purana.vayu.1.6.37) yasmāttaiḥ saṃvṛtā buddhirmukhyāni karaṇāni ca. tasmātte saṃvṛtātmāno nagā mukhyāḥ prakīrtitāḥ ..37.. ### [1.6.38](https://indike.org/pramana/in.purana.vayu.1.6.38) mukhyasarge tathābhūtaṃ brahmā dṛṣṭvā hyasādhakam. aprasannamanāḥ so'tha tato nyāso'bhyamanyata ..38.. ### [1.6.39](https://indike.org/pramana/in.purana.vayu.1.6.39) tasyābhidhyāyatastatra tiryyak sroto'bhyavarttata. yasmāttiryag vyavartteta tiryyaksrotastataḥ smṛtam ..39.. ### [1.6.40](https://indike.org/pramana/in.purana.vayu.1.6.40) tamobahutvātte sarvve hyajñānabahulāḥ smṛtāḥ. utpathagrāhiṇaścāpi te dhyānāddhyānamāninaḥ ..40.. ### [1.6.41](https://indike.org/pramana/in.purana.vayu.1.6.41) tiryyaksrotastu dṛṣṭvā vai dvitīyaṃ viśvamīśvaraḥ. ahaṃkṛtā ahaṃmanā aṣṭāviṃśadvidhātmakāḥ ..41.. ### [1.6.42](https://indike.org/pramana/in.purana.vayu.1.6.42) ekādaśendriyavidhā navadhā codayastathā. aṣṭau ca tārakādyāśca teṣāṃ śaktividhāḥ smṛtāḥ ..42.. ### [1.6.43](https://indike.org/pramana/in.purana.vayu.1.6.43) ataḥ prakāśāste sarvve āvṛtāśca bahiḥ punaḥ. yasmāttiryak pravartteta tiryyaksrotāḥ sa ucyate ..43.. ### [1.6.44](https://indike.org/pramana/in.purana.vayu.1.6.44) tiryaksrotāśca dṛṣṭvā vai dvitīyaṃ viśvamīśvaraḥ. abhiprāyamathoddhūtaṃ dṛṣṭvā sarvvantathābhidham. tasyābhidhyāyato nityaṃ sāttvikaḥ samavarttata ..44.. ### [1.6.45](https://indike.org/pramana/in.purana.vayu.1.6.45) ūrddhvasrotāstṛtīyastu sa caivorddhvavyavasthitaḥ. yasmādvyavarttatohddhvantu ūrddhvasrotāstataḥ smṛtaḥ ..45.. ### [1.6.46](https://indike.org/pramana/in.purana.vayu.1.6.46) te sukhaprītibahulā bahirantaśca saṃvṛtā. prakāśā bahirantaśca ūrddhvasrotodbhavāḥ smṛtāḥ ..46.. ### [1.6.47](https://indike.org/pramana/in.purana.vayu.1.6.47) tena vā tādayo jñeyāḥ sṛṣṭātmāno vyavasthitāḥ. ūrddhvasrotāstṛtīyo vai tena sargastu sa smṛtaḥ ..47.. ### [1.6.48](https://indike.org/pramana/in.purana.vayu.1.6.48) ūrddhvasrotaḥsu sṛṣṭeṣu deveṣu sa tadā prabhuḥ. prītimānabhavadbrahmā tato'nyaṃ so'bhyamanyata. sasarjja sargamanyaṃ sa sādhakaṃ prabhurīśvaraḥ ..48.. ### [1.6.49](https://indike.org/pramana/in.purana.vayu.1.6.49) athābhidhyāyatastasya satyābhidhyāyinastadā. prādurbbabhūva cāvyaktādarvvāk‌srotaḥ susādhakam. yasmādarvākvyavartteta tato'rvvāksrota ucyate ..49.. ### [1.6.50](https://indike.org/pramana/in.purana.vayu.1.6.50) te ca prakāśabahulāstamaḥ sattvarajodhikāḥ. tasmātte duḥkhabahulā bhūyo bhūyaśca kāriṇaḥ ..50.. ### [1.6.51](https://indike.org/pramana/in.purana.vayu.1.6.51) prakāśā bahirantaśca manuṣyāḥ sādhakāśca te. lakṣaṇaistārakādyaiste aṣṭadhā ca vyavasthitāḥ ..51.. ### [1.6.52](https://indike.org/pramana/in.purana.vayu.1.6.52) siddhātmāno manuṣyāste gandharvasahadharmmiṇaḥ. ityeṣa tejasaḥ sargo hyarvvāksrotāḥ prakīrttitaḥ ..52.. ### [1.6.53](https://indike.org/pramana/in.purana.vayu.1.6.53) pañcamo'nugrahaḥ sargaścaturddhā sa vyavasthitaḥ. viparyyayeṇa śaktyā ca tuṣṭyā siddhyā tathaiva ca. vivṛttaṃ varttamānañca te'rthaṃ jānanti tattvataḥ ..53.. ### [1.6.54](https://indike.org/pramana/in.purana.vayu.1.6.54) bhūtādikānāṃ sattvānāṃ ṣaṣṭhaḥ sargaḥ sa ucyate. viparyyayeṇa bhūtādiraśaktyā ca vyavasthitaḥ ..54.. ### [1.6.55](https://indike.org/pramana/in.purana.vayu.1.6.55) prathamo mahataḥ sargo vijñeyo mahatastu saḥ. tanmātrāṇāṃ dvitīyastu bhūtasargaḥ sa ucyate ..55.. ### [1.6.56](https://indike.org/pramana/in.purana.vayu.1.6.56) vaikārikastṛtīyastu sarga aindriya kaḥ smṛtaḥ. ityeṣa prākṛtaḥ sargaḥ sambhūto bhuddhipūrvakaḥ ..56.. ### [1.6.57](https://indike.org/pramana/in.purana.vayu.1.6.57) mukhyasargaścaturthastu mukhyā vai sthāvarāḥ smṛtāḥ. tiryyaksotāśca yaḥ sargastiryyagyoniḥ sa pañcamaḥ ..57.. ### [1.6.58](https://indike.org/pramana/in.purana.vayu.1.6.58) tathorddhvasrotasāṃ ṣaṣṭho devasargastu sa smṛtaḥ. tathārvāksrotasāṃ sargaḥ saptamaḥ sa tu mānuṣaḥ ..58.. ### [1.6.59](https://indike.org/pramana/in.purana.vayu.1.6.59) aṣṭamo'nugrahaḥ sargaḥ sāttvikastāmasastu saḥ. pañcaite vaikṛtāḥ sargāḥ prākṛtāstu trayaḥ smṛtāḥ ..59.. ### [1.6.60](https://indike.org/pramana/in.purana.vayu.1.6.60) prākṛto vaikṛtaścaiva kaumāro navamaḥ smṛtaḥ. prākṛtāstu trayaḥ sargāḥ kṛtāste buddhipūrvvakāḥ ..60.. ### [1.6.61](https://indike.org/pramana/in.purana.vayu.1.6.61) buddhipūrvvaṃ pravarttante ṣaṭsargā brahmaṇastu te. vistarānugrahaṃ sargaṃ kīrttyamānaṃ nibodhata ..61.. ### [1.6.62](https://indike.org/pramana/in.purana.vayu.1.6.62) caturddhāvāsthitaḥ so'tha sarvabhūteṣu kṛtsnaśaḥ. viparyayeṇa śaktyā ca tuṣṭyā siddhyā tathaiva ca ..62.. ### [1.6.63](https://indike.org/pramana/in.purana.vayu.1.6.63) sthāvareṣu viparyāsastiryagyoniṣu śaktitā. siddhātmāno manuṣyāstu tuṣṭirddeveṣu kṛtsnaśaḥ ..63.. ### [1.6.64](https://indike.org/pramana/in.purana.vayu.1.6.64) ityete prākṛtāścaiva vaikṛtāśca nava smṛtāḥ. sargāḥ parasparasyātha prakārā bahavaḥ smṛtāḥ ..64.. ### [1.6.65](https://indike.org/pramana/in.purana.vayu.1.6.65) agre sasarjja vai brahmā mānasānātmanaḥ samān. sanandanañca sanakaṃ vidvāṃsaṃ ca sanātanam ..65.. ### [1.6.66](https://indike.org/pramana/in.purana.vayu.1.6.66) vijñānena nivṛttāste vaivartena mahaujasaḥ. saṃbuddhāścaiva nānātvādapaviddhāstrayo'pite. asṛṣṭvaiva prajāsargaṃ pratisargaṃ gatāḥ punaḥ ..66.. ### [1.6.67](https://indike.org/pramana/in.purana.vayu.1.6.67) tadā teṣu vyatīteṣu tadānyān sādhakāṃśca tān. mānasānasṛjadbrahmā punaḥ sthānābhimāninaḥ. ābhūtasaṃplavāvasthānnāmatastānnibodhata ..67.. ### [1.6.68](https://indike.org/pramana/in.purana.vayu.1.6.68) āpo'gniḥ pṛthivī vāyurantarikṣaṃ diśastathā. svargaṃ divaḥ samudrāṃśca nadān śailān vanaspatīn ..68.. ### [1.6.69](https://indike.org/pramana/in.purana.vayu.1.6.69) oṣadhīnāṃ tathātmāno hyātmāno vṛkṣavīrudhām. lavāḥ kāṣṭhāḥ kalāścaiva muhūrttāḥ sandhirātryahāḥ ..69.. ### [1.6.70](https://indike.org/pramana/in.purana.vayu.1.6.70) arddhamāsāśca māsāśca ayanābdayugāni ca. sthānābhimāninaḥ sarve sthānākhyāścaiva te smṛtāḥ ..70.. ### [1.6.71](https://indike.org/pramana/in.purana.vayu.1.6.71) vakrādyasya brāhmaṇāḥ saṃprasūtāstadvakṣastaḥ kṣatriyāḥ pūrvabhāgaiḥ. vaiśyāścorvoryasya padbhyāñca śūdrāḥ sarve varṇā gātrataḥ saṃprasūtāḥ ..71.. ### [1.6.72](https://indike.org/pramana/in.purana.vayu.1.6.72) nārāyaṇaḥ paro'vyaktādaṇḍamavyaktasambhavam. aṇḍājjajñe punarbrahmā lokāstena kṛtāḥ svayam ..72.. ### [1.6.73](https://indike.org/pramana/in.purana.vayu.1.6.73) eṣa vaḥ kathitaḥ pādaḥ samāsānna tu vistarāt. anenādyena pādena purāṇaṃ saṃprakīrtitam ..73.. ### [1.6.74](https://indike.org/pramana/in.purana.vayu.1.6.74) iti śrīmahāpurāṇe vāyuprokte sṛṣṭiprakaraṇaṃ nāma ṣaṣṭho'dhyāyaḥ .. 6 .. ### [1.6.75](https://indike.org/pramana/in.purana.vayu.1.6.75) samāptaḥ prakriyāpādaḥ .. ## Linked texts (14) - [Brahmāṇḍapurāṇa](https://indike.org/pramana/in.purana.brahmanda.1.5.3) — Vyāsa, Sanskrit - [Kūrmapurāṇa](https://indike.org/pramana/in.purana.kurma.1.6.3) — Vyāsa, Sanskrit - [Critical edition (BORI)](https://indike.org/pramana/in.lit.mahabharata.harivamsa*crit.App.I.42.150) — Sanskrit - [Śivapurāṇa](https://indike.org/pramana/in.purana.siva.7.1.11.13.p32) — Vyāsa, Sanskrit - [Mārkaṇḍeyapurāṇa](https://indike.org/pramana/in.purana.markandeya.47.5) — Vyāsa, Sanskrit - [Viṣṇudharma](https://indike.org/pramana/in.purana.upa.vaisnava.visnudharma.1.66.43) — Sanskrit - [Viṣṇupurāṇa (critical edition)](https://indike.org/pramana/in.purana.visnu*crit.1.5.11) — Sanskrit - [Vaiṣṇava Dharmaśāstra](https://indike.org/pramana/in.niti.dharma.visnu.1.3) — Viṣṇu, Sanskrit - [Padmapurāṇa](https://indike.org/pramana/in.purana.padma.1.1.72-2) — Vyāsa, Sanskrit - [Varāhapurāṇa](https://indike.org/pramana/in.purana.varaha.2.34) — Vyāsa, Sanskrit - [Garuḍapurāṇa](https://indike.org/pramana/in.purana.garuda.1.4.18) — Vyāsa, Sanskrit - [Kūrmapurāṇa](https://indike.org/pramana/in.vernacular.tamil.kappiyam.kurmapurana.6.p1) — Ativīrarāma Pāṇṭiyar, Sanskrit - [Ṭoḍarānanda](https://indike.org/pramana/in.niti.dharma.nibandha.mahanibandha.todarananda.2.37) — Ṭoḍaramalla 1564, Sanskrit - [Brahmavidyāvijaya](https://indike.org/pramana/in.darsana.visistadvaita.vadakalai.brahmavidyavijaya.1.p66) — Mahācārya 1509, Sanskrit --- Source: [https://indike.org/pramana/in.purana.vayu.1.6](https://indike.org/pramana/in.purana.vayu.1.6) · Pramāṇa