[Pramāṇa](https://indike.org/pramana/) › [Indian literature](https://indike.org/pramana/in) › [Purāṇas](https://indike.org/pramana/in.purana) › [Vayupurana](https://indike.org/pramana/in.purana.vayu) › 1.7 # Vayupurana 1.7 Vāyupurāṇa 1.7 - **Language:** Sanskrit ### [1.7.1](https://indike.org/pramana/in.purana.vayu.1.7.1) ityeṣa prathamaḥ pādaḥ prakriyārthaḥ prakīrtitaḥ. śrutvā tu saṃhṛṣṭamanāḥ kāśyapeyaḥ sanātanaḥ ..1.. ### [1.7.2](https://indike.org/pramana/in.purana.vayu.1.7.2) sambodhya sūtaṃ vacasā papracchāthottarāṃ kathām. ataḥprabhṛti kalpajña pratisaṃdhiṃ pracakṣva naḥ ..2.. ### [1.7.3](https://indike.org/pramana/in.purana.vayu.1.7.3) samatītasya kalpasya varttamānasya cobhayoḥ. kalpayorantaraṃ yacca pratisaṃdhiryatastayoḥ. etadveditumicchāmaḥ atyantakuśalo hyasi ..3.. ### [1.7.4](https://indike.org/pramana/in.purana.vayu.1.7.4) ..lomaharṣaṇa uvāca.. ### [1.7.5](https://indike.org/pramana/in.purana.vayu.1.7.5) atra vo'haṃ pravakṣyāmi pratisaṃdhiñca yastayoḥ. samatītasya kalpasya varttamānasya cobhayoḥ ..4.. ### [1.7.6](https://indike.org/pramana/in.purana.vayu.1.7.6) manvantarāṇi kalpeṣu yeṣu yāni ca suvratāḥ. yaścāyaṃ varttate kalpo vārāhaḥ sāmprataḥ śubhaḥ ..5.. ### [1.7.7](https://indike.org/pramana/in.purana.vayu.1.7.7) asmāt kalpācca yaḥ kalpaḥ pūrvo'tītaḥ sanātanaḥ. tasya cāsya ca kalpasya madhyāvasthānnibodhata ..6.. ### [1.7.8](https://indike.org/pramana/in.purana.vayu.1.7.8) pratyāhṛte pūrvakalpe pratisaṃdhiṃ ca tatra vai. anyaḥ pravarttate kalpo janāllokāt punaḥ punaḥ ..7.. ### [1.7.9](https://indike.org/pramana/in.purana.vayu.1.7.9) vyucchinnāt pratisaṃdhestu kalpāt kalpaḥ parasparam. vyucchidyante kriyāḥsarvāḥ kalpānte sarvaśastadā. tasmāt kalpāttu kalpasya pratisaṃdhirnigadyate ..8.. ### [1.7.10](https://indike.org/pramana/in.purana.vayu.1.7.10) manvantarayugākhyānāmapyucchinnāśca sandhayaḥ. parasparāḥ pravarttante manvantarayugaiḥ saha ..9.. ### [1.7.11](https://indike.org/pramana/in.purana.vayu.1.7.11) uktā ye prakriyārthena pūrvakalpāḥ samāsataḥ. teṣāṃ parārddhakalpānāṃ pūrvo hyasmāttu yaḥ paraḥ. āsīt kalpo vyatīto vai parārddhena parastu saḥ ..10.. ### [1.7.12](https://indike.org/pramana/in.purana.vayu.1.7.12) anye bhaviṣyā ye kalpā aparārddhādguṇīkṛtāḥ. prathamaḥ sāmpratasteṣāṃ kalpo'yaṃ varttate dvijāḥ ..11.. ### [1.7.13](https://indike.org/pramana/in.purana.vayu.1.7.13) yasmin pūrvaḥ parārddhe tu dvitīye para ucyate. etāvān sthitikālaśca pratyāhārastataḥ smṛtaḥ ..12.. ### [1.7.14](https://indike.org/pramana/in.purana.vayu.1.7.14) asmāt kalpāttu yaḥ pūrvaṃ kalpo'tītaḥ sanātanaḥ. caturyugasahasrānte aho manvantaraiḥ purā ..13.. ### [1.7.15](https://indike.org/pramana/in.purana.vayu.1.7.15) kṣīṇe kalpe tadā tasmin dāhakāle hyupasthite. tasmin kalpe tadā devā āsanvaimānikāstu ye ..14.. ### [1.7.16](https://indike.org/pramana/in.purana.vayu.1.7.16) nakṣatragrahatārāstu candrasūryagrahāśca ye. aṣṭāviṃśatirevaitāḥ koṭyastu sukṛtātmanām ..15.. ### [1.7.17](https://indike.org/pramana/in.purana.vayu.1.7.17) manvantare tathaikasmin caturdaśasu vai tathā. trīṇi koṭiśatānyāsan koṭyādvinavatistathā. aṣṭādhikāḥ saptaśatāḥ sahasrāṇāṃ smṛtāḥ purā ..16.. ### [1.7.18](https://indike.org/pramana/in.purana.vayu.1.7.18) vaimānikānāṃ devānāṃ kalpe'tīte tu ye'bhavan. ekaikasmiṃstu kalpe vai devā vaimānikāḥ smṛtāḥ ..17.. ### [1.7.19](https://indike.org/pramana/in.purana.vayu.1.7.19) atha manvantareṣvāsaṃścaturdaśasu vai divi. devāśca pitaraścaiva munayo manavastathā ..18.. ### [1.7.20](https://indike.org/pramana/in.purana.vayu.1.7.20) teṣāmanucarā ye ca manuputrāstathaiva ca. varṇāśramibhirīḍyāśca tasmin kāle tu ye surāḥ. manvantareṣu yehyāsan devaloke divaukasaḥ ..19.. ### [1.7.21](https://indike.org/pramana/in.purana.vayu.1.7.21) te taiḥ saṃyojakaiḥ sārddhaṃ prāpte saṅkalane tathā. tulyaniṣṭhāstu te sarve prāpte hyābhūtasaṃplave ..20.. ### [1.7.22](https://indike.org/pramana/in.purana.vayu.1.7.22) tataste'vaśyabhāvitvād buddhvā paryāyamātmanaḥ. trailokyavāsino devāstasmin prāpte hyupaplave ..21.. ### [1.7.23](https://indike.org/pramana/in.purana.vayu.1.7.23) te'nautsukyaviṣādena tyaktvā sthānāni bhāvataḥ. maharllokāya saṃvignāstataste dadhire matim ..22.. ### [1.7.24](https://indike.org/pramana/in.purana.vayu.1.7.24) te yuktā upapadyante mahasisthaiḥ śarīrakaiḥ. viśuddhibahulāḥ sarve mānasīṃ siddhimāsthitāḥ ..23.. ### [1.7.25](https://indike.org/pramana/in.purana.vayu.1.7.25) taiḥ kalpa vāsibhiḥ sārddhaṃ mahānāsāditastu yaiḥ. brāhmaṇaiḥ kṣatriyairvaiśyaistadbhaktaiścāparairjjanaiḥ ..24.. ### [1.7.26](https://indike.org/pramana/in.purana.vayu.1.7.26) matvā tu te maharllokaṃ devasaṅghāścaturddaśa. tataste janalokāya so dvegā dadhire matim ..25.. ### [1.7.27](https://indike.org/pramana/in.purana.vayu.1.7.27) viśuddhibahulāḥ sarve mānasīṃ siddhimāsthitāḥ. taiḥ kalpavāsibhiḥ sāṃrddha mahānāsāditastu yaiḥ ..26.. ### [1.7.28](https://indike.org/pramana/in.purana.vayu.1.7.28) daśakṛtva ivāvṛttyā tasmādgacchanti svastapaḥ. tatra kalpān daśasthitvā satyaṃ gacchanti vai punaḥ. etena kramayogena yānti kalpanivāsinaḥ ..27.. ### [1.7.29](https://indike.org/pramana/in.purana.vayu.1.7.29) evaṃ devayugānāntu sahasrāṇi parasparāt. gatāni brahmalokaṃ vai aparāvarttinīṃ gatim ..28.. ### [1.7.30](https://indike.org/pramana/in.purana.vayu.1.7.30) ādhipatyaṃ vinā te vai aiśvaryeṇa tu tatsamāḥ. bhavanti brahmaṇastulyā rūpeṇa viṣayeṇa ca ..29.. ### [1.7.31](https://indike.org/pramana/in.purana.vayu.1.7.31) tatra te hyavatiṣṭhanti prītiyuktāḥ prasaṅgamāt. ānandaṃ brahmaṇaḥ prāpya mucyante brahmaṇā saha ..30.. ### [1.7.32](https://indike.org/pramana/in.purana.vayu.1.7.32) avaśyambhāvinā'rthena prākṛtenaiva te svayam. nānā tvenābhisambaddhāstadā tatkālabhāvinaḥ ..31.. ### [1.7.33](https://indike.org/pramana/in.purana.vayu.1.7.33) svarūpato buddhipūrvaṃ yathā bhavati jāgrataḥ. tatkālabhāvi teṣāṃ tu tathā jñānaṃ pravarttate ..32.. ### [1.7.34](https://indike.org/pramana/in.purana.vayu.1.7.34) pratyāhāre tu bhedānāṃ yeṣāṃ bhinnābhisūṣmaṇām. taiḥ sārddhaṃ pratisṛjyante kāryāṇi karaṇāni ca ..33.. ### [1.7.35](https://indike.org/pramana/in.purana.vayu.1.7.35) nānātvadarśanātteṣāṃ brahmalokanivāsinām. vinaṣṭasvādhikārāṇāṃ svena dharmeṇa tiṣṭhatām ..34.. ### [1.7.36](https://indike.org/pramana/in.purana.vayu.1.7.36) te tulyalakṣaṇāḥ siddhāḥ śuddhātmāno nirañjanāḥ. prakṛtau kāraṇātītāḥ svātmanyeva vyavasthitāḥ ..35.. ### [1.7.37](https://indike.org/pramana/in.purana.vayu.1.7.37) prakhyāpayitvā hyātmānaṃ prakṛtisteṣu sarvaśaḥ. puruṣāvyavahṛtatvena pratītā na pravarttate ..36.. ### [1.7.38](https://indike.org/pramana/in.purana.vayu.1.7.38) pravartite punaḥ sarge teṣāṃ vā kāraṇaṃ punaḥ. saṃyoge prākṛte teṣāṃ yuktānāṃ tattvadarśinām ..37.. ### [1.7.39](https://indike.org/pramana/in.purana.vayu.1.7.39) atrāpavargiṇāṃ teṣāmapunarmārgagāminām. abhāvaḥ punarutpattau śāntānāmarcciṣāmiva ..38.. ### [1.7.40](https://indike.org/pramana/in.purana.vayu.1.7.40) tatasteṣu gateṣūrddhvaṃ trailokyātsumahātmasu. taiḥ sārddhaṃ ye maharllokāttadā nāsāditā janāḥ. tacchiṣṭāśceha tiṣṭhanti kalpāddehamupāsate ..39.. ### [1.7.41](https://indike.org/pramana/in.purana.vayu.1.7.41) gandharvādyāḥ piśācāntā mānuṣā brāhmaṇādayaḥ. paśavaḥ pakṣiṇaścaiva sthāvarāḥ sasarīsṛpāḥ ..40.. ### [1.7.42](https://indike.org/pramana/in.purana.vayu.1.7.42) tiṣṭhatsu teṣu tatkālaṃ pṛthivītalavāsiṣu. sahasraṃ yattu raśmīnāṃ sūryasyeha vibhāsate. te saptaraśmayo bhūtvā hyekaiko jāyate raviḥ ..41.. ### [1.7.43](https://indike.org/pramana/in.purana.vayu.1.7.43) krameṇottiṣṭhamānāste trīn lokān pradahantyuta. jaṅgamāḥ sthāvarāḥ caiva nadīḥ saṃrvāśca parvatān. pūrve śuṣkā hyanāvṛṣṭyā sūryaistaiśca pradhūpitāḥ ..42.. ### [1.7.44](https://indike.org/pramana/in.purana.vayu.1.7.44) tadā te viviśuḥ sarve nirddagdhāḥ sūryaraśmibhiḥ. jaṅgamāḥ sthāvarāḥ sarve dharmādharmātmakāstu vai ..43.. ### [1.7.45](https://indike.org/pramana/in.purana.vayu.1.7.45) dagdhadehāstataste vai gatāḥ pāpayugātyaye. yonyā tayā hyanirmuktāḥ śubhapāpānubandhayā ..44.. ### [1.7.46](https://indike.org/pramana/in.purana.vayu.1.7.46) tataste hyupapadyante tulyarūpā jane janāḥ. viśuddhibahulāḥ sarve mānasīṃ siddhimāsthitāḥ ..45.. ### [1.7.47](https://indike.org/pramana/in.purana.vayu.1.7.47) uṣitvā rajanīṃ tatra brahmaṇo'vyaktajanmanaḥ. punaḥ sarge bhavantīha brahmaṇo mānasīprajāḥ ..46.. ### [1.7.48](https://indike.org/pramana/in.purana.vayu.1.7.48) tatasteṣu pravṛtteṣu jane trailokyavāsiṣu. nirdagdheṣu ca lokeṣu teṣu sūryaistu saptabhiḥ. vṛṣṭyā kṣitau plāvitāyāṃ viśīrṇeṣvālayeṣu ca ..47.. ### [1.7.49](https://indike.org/pramana/in.purana.vayu.1.7.49) samudrāścaiva meghāśca āpaḥ sarvāśca pārthivāḥ. vrajantyekārṇavatvaṃ hi salilākhyāstadāśritāḥ ..48.. ### [1.7.50](https://indike.org/pramana/in.purana.vayu.1.7.50) āgatāgatikaṃ tadvai yadā tu salilaṃ bahu. saṃchādyemāṃ sthitāṃ bhūmimarṇavākhyā tadā ca sā ..49.. ### [1.7.51](https://indike.org/pramana/in.purana.vayu.1.7.51) ābhāti yasmānnābhānti bhāsanto vyāptidīptiṣu. sarvataḥ samanuplāvya tāsāñcāmbho vibhāvyate ..50.. ### [1.7.52](https://indike.org/pramana/in.purana.vayu.1.7.52) tadambhastanute yasmāt sarvāṃ pṛthvīṃ samantataḥ. dhātustanotirvistāre tenāmbhastanavaḥ smṛtāḥ ..51.. ### [1.7.53](https://indike.org/pramana/in.purana.vayu.1.7.53) aramityeṣa śīghrantu nipātaḥ kavibhiḥ smṛtaḥ. ekārṇave bhavantyāpo na śīghrāstena te narāḥ ..52.. ### [1.7.54](https://indike.org/pramana/in.purana.vayu.1.7.54) tasmin yugasahasrānte saṃsthite brahmaṇo'hani. rājanyāṃ varttamānāyāntāvattat salilātmanā ..53.. ### [1.7.55](https://indike.org/pramana/in.purana.vayu.1.7.55) tatastu salile tasminnaṣṭe'gnau pṛthivītale. praśāntavāte'ndhakāre nirāloke samantataḥ ..54.. ### [1.7.56](https://indike.org/pramana/in.purana.vayu.1.7.56) yenaivādhiṣṭhitaṃ hīdaṃ brahmā sa puruṣaḥ prabhuḥ. vibhāgamasya lokasya punarvai kartumicchati ..55.. ### [1.7.57](https://indike.org/pramana/in.purana.vayu.1.7.57) ekārṇave tadā tasminnaṣṭe sthāvarajaṅgame. tadā sa bhavati brahmā sahasrākṣaḥ sahasrapāt ..56.. ### [1.7.58](https://indike.org/pramana/in.purana.vayu.1.7.58) sahasraśīrṣā puruṣo rukmavarṇo hyatīndriyaḥ. brahmā nārāyaṇākhyastu suṣvāpa salile tadā ..57.. ### [1.7.59](https://indike.org/pramana/in.purana.vayu.1.7.59) sattvodrekāt prabuddhastu śūnyaṃ lokamavekṣya ca. imañcodāharantyatra ślokaṃ nārāyaṇaṃ prati ..58.. ### [1.7.60](https://indike.org/pramana/in.purana.vayu.1.7.60) āpo nārākhyāstanava ityapānnāma śuśrumaḥ. āpūrya nābhiṃ tatrāste tena nārāyaṇaḥ smṛtaḥ ..59.. ### [1.7.61](https://indike.org/pramana/in.purana.vayu.1.7.61) sahasraśīrṣā sumanāḥ sahasrapāt sahasracakṣurvadanaḥ sahasrabhuk. sahasrabāhuḥ prathamaḥ prajā patistrayīpathe yaḥ puruṣo nirucyate ..60.. ### [1.7.62](https://indike.org/pramana/in.purana.vayu.1.7.62) ādityavarṇo bhuvanasya goptā eko hyapūrvaḥ prathamaṃ turāṣāṭ. hiraṇyagarbhaḥ puruṣo mahātmā sa paṭhyate vai tamasaḥparastāt ..61.. ### [1.7.63](https://indike.org/pramana/in.purana.vayu.1.7.63) kalpādau rajasodrikto brahmā bhūtvā'sṛjat prajāḥ. kalpānte tamasodrikto kālo bhūtvā'grasat punaḥ ..62.. ### [1.7.64](https://indike.org/pramana/in.purana.vayu.1.7.64) sa vai nārāyaṇā khyastu sattvodrikto'rṇave svapan. tridhā vibhajya cātmānaṃ trailokye samavarttata ..63.. ### [1.7.65](https://indike.org/pramana/in.purana.vayu.1.7.65) sṛjate grasate caiva vīkṣante ca tribhistu tān. ekārṇave tadā loke naṣṭe sthāvarajaṅgame ..64.. ### [1.7.66](https://indike.org/pramana/in.purana.vayu.1.7.66) caturyugasahasrānte sarvataḥ salilāvṛte. brahmā nārāyaṇākhyastu aprakāśārṇave svapan ..65.. ### [1.7.67](https://indike.org/pramana/in.purana.vayu.1.7.67) caturvidhāḥ prajā grastvā brāhmyāṃ rātryāṃ mahārṇave. paśyanti taṃ maharllokāt suptaṃ kālaṃ maharṣayaḥ ..66.. ### [1.7.68](https://indike.org/pramana/in.purana.vayu.1.7.68) bhṛgvādayo yathā sapta kalpe hyasmin maharṣayaḥ. tato vivarttamānaistairmahān parigataḥ paraḥ ..67.. ### [1.7.69](https://indike.org/pramana/in.purana.vayu.1.7.69) gatyarthād ṛṣayo dhātornnāmanirvṛttirāditaḥ. tasmādṛṣiparatvena mahāṃstasmānmaharṣayaḥ ..68.. ### [1.7.70](https://indike.org/pramana/in.purana.vayu.1.7.70) maharllokasthitairdṛṣṭaḥ kālaḥ suptastadā ca taiḥ. satyādyāḥ sapta yehyāsan kalpe'tīte maharṣayaḥ ..69.. ### [1.7.71](https://indike.org/pramana/in.purana.vayu.1.7.71) evaṃ brāhmīṣu rātrīṣu hyatī tāsu sahasraśaḥ. dṛṣṭavantastathā hyanye suptaṃ kālaṃ maharṣayaḥ ..70.. ### [1.7.72](https://indike.org/pramana/in.purana.vayu.1.7.72) kalpayāmāsa vai brahmā tasmāt kālo nirucyate ..71.. ### [1.7.73](https://indike.org/pramana/in.purana.vayu.1.7.73) sa sraṣṭā sarvabhūtānāṃ kalpādiṣu punaḥ punaḥ. vyaktāvyakto mahādevastasya sarvamidaṃ jagat ..72.. ### [1.7.74](https://indike.org/pramana/in.purana.vayu.1.7.74) ityeṣa pratisandhirvaḥ kīrttitaḥ kalpayordvayoḥ. sāmpratātītayormadhye prāgavasthā babhūva yā ..73.. ### [1.7.75](https://indike.org/pramana/in.purana.vayu.1.7.75) kīrttitā tu samāsena kalpe kalpe yathā tathā. sāmprataṃ te pravakṣyāmi kalpametaṃ nibodhata ..74.. ### [1.7.76](https://indike.org/pramana/in.purana.vayu.1.7.76) iti śrīmahāpurāṇe vāyuprokte pratisandhikīrttanaṃ nāma saptamo'dhyāyaḥ .. 7 .. ## Linked texts (6) - [Brahmāṇḍapurāṇa](https://indike.org/pramana/in.purana.brahmanda.1.6.6) — Vyāsa, Sanskrit - [Sāmbapurāṇa](https://indike.org/pramana/in.purana.upa.surya.samba.6.21) — Sanskrit - [Yogacintāmaṇi (Śivānanda Sarasvatī)](https://indike.org/pramana/in.darsana.yoga.yogacintamani-sivananda-sarasvati.2.6) — Śivānanda Sarasvatī 1650, Sanskrit - [Brahmavidyāvijaya](https://indike.org/pramana/in.darsana.visistadvaita.vadakalai.brahmavidyavijaya.1.p67) — Mahācārya 1509, Sanskrit - [Kṛtyakalpataru](https://indike.org/pramana/in.niti.dharma.nibandha.mahanibandha.krtyakalpataru.27.p309) — Lakṣmīdhara Bhaṭṭa, Sanskrit - [Śārṅgadharapaddhati](https://indike.org/pramana/in.lit.subhasita.subhasita.kosa.sarngadharapaddhati.180.42) — Śārṅgadhara, Sanskrit --- Source: [https://indike.org/pramana/in.purana.vayu.1.7](https://indike.org/pramana/in.purana.vayu.1.7) · Pramāṇa