[Pramāṇa](https://indike.org/pramana/) › [Indian literature](https://indike.org/pramana/in) › [Purāṇas](https://indike.org/pramana/in.purana) › [Vayupurana](https://indike.org/pramana/in.purana.vayu) › 2.11 # Vayupurana 2.11: adhyāyaḥ 11 Vāyupurāṇa 2.11 - **Language:** Sanskrit ### adhyāyaḥ 11 ### [2.11.1](https://indike.org/pramana/in.purana.vayu.2.11.1) ..sūta uvāca.. ### [2.11.2](https://indike.org/pramana/in.purana.vayu.2.11.2) sapta medhāvatāṃ śreṣṭhāḥ svarge pitṛgaṇāḥ smṛtāḥ. catvāro mūrtimantaśca trayasteṣāmamūrttayaḥ. teṣāṃ lokavisargantu kīrttayiṣye nibodhata .. 11.1 .. ### [2.11.3](https://indike.org/pramana/in.purana.vayu.2.11.3) yā vai duhitarasteṣāṃ dohitrāścaiva ye smṛtāḥ. dharmamūrttidharāsteṣāṃ ye trayaḥ paramā gaṇāḥ .. 11.2 .. ### [2.11.4](https://indike.org/pramana/in.purana.vayu.2.11.4) nāmāni lokasargañca teṣāṃ vakṣye samāsataḥ. lokā virajaso nāmnā yatra tiṣṭhanti bhāsvarāḥ .. 11.3 .. ### [2.11.5](https://indike.org/pramana/in.purana.vayu.2.11.5) amūrttayaḥ pitṛgaṇāḥ putrāste vai prajāpateḥ. virajasya dvijāḥ śreṣṭhā vairājā iti viśrutāḥ . eṣa vai prathamaḥ kalpo vairājānāṃ prakīrttitaḥ .. 11.4 .. ### [2.11.6](https://indike.org/pramana/in.purana.vayu.2.11.6) teṣāntu mānasī kanyā menā nāma mahāgireḥ. patnī himavataḥ śubhra yasyāṃ maināka ucyate .. 11.5 .. ### [2.11.7](https://indike.org/pramana/in.purana.vayu.2.11.7) jātaḥ sarvaiṣadhidharaḥ sarvaratnākarātmavān. parvataḥ pravaraḥ puṇyaḥ krauñcastasyātmajo'bhavat .. 11.6 .. ### [2.11.8](https://indike.org/pramana/in.purana.vayu.2.11.8) tisraḥ kanyāstu menāyāṃ janayāmāsa śailarāṭ. aparṇāmekaparṇāñca tṛtīyāmekapāṭalām .. 11.7 .. ### [2.11.9](https://indike.org/pramana/in.purana.vayu.2.11.9) āśrite dve hyaparṇā tu aniketā tapo'carat. nyagrodhamekaparṇī tu pāṭalāmekapāṭalā. śataṃ varṣasahasrāṇi duścaraṃ devadānavaiḥ ṣa.. 11.8 .. ### [2.11.10](https://indike.org/pramana/in.purana.vayu.2.11.10) āhāramekaparṇena ekaparṇī samācarat. pāṭalenaiva caikena vidadhyādekapāṭalā .. 11.9 .. ### [2.11.11](https://indike.org/pramana/in.purana.vayu.2.11.11) pūrṇe pūrṇe sahasre dve āhāraṃ vai prajakratuḥ . ekā tatra nirāhārā tāṃ mātā pratyabhāṣata .. 11.10 .. ### [2.11.12](https://indike.org/pramana/in.purana.vayu.2.11.12) niṣedhayantī hyumeti mātā srehena duḥkhitā. sā tathoktatayā devī mātrā duścaracāriṇī .. 11.11 .. ### [2.11.13](https://indike.org/pramana/in.purana.vayu.2.11.13) umeti sā mahābhāgā triṣu lokeṣu viśrutā . tatheti nāmnā tenāsau niruktā karmaṇā śubhā .. 11.12 .. ### [2.11.14](https://indike.org/pramana/in.purana.vayu.2.11.14) etattu trikumārīkaṃ jagatsyāsyati śāśvatam. etāsāṃ tapasā dṛptaṃ yāvadbhūmiddhariṣyati .. 11.13 .. ### [2.11.15](https://indike.org/pramana/in.purana.vayu.2.11.15) tapaḥśarīrāstāḥ sarvāstisro yogabalānvitāḥ. devyastāḥ sumahābhāgāḥ sarvvāśca sthirayauvanāḥ .. 11.14 .. ### [2.11.16](https://indike.org/pramana/in.purana.vayu.2.11.16) sarvāśca brahmavādinyaḥ sarvā ścaivorddhvaretasaḥ. umā tāsāṃ variṣṭhā ca śreṣṭhā ca varavarṇinī .. 11.15 .. ### [2.11.17](https://indike.org/pramana/in.purana.vayu.2.11.17) mahāyogabalopetā mahādevamupasthitā. dantakāṇvośanā tasyāḥ putro vai bhṛgunandanaḥ .. 11.16 .. ### [2.11.18](https://indike.org/pramana/in.purana.vayu.2.11.18) asitasyaikaparṇī tu patnī sādhvī dṛḍhavratā. dattā himavatā tasmai yogācāryāya dhīmate. devalaṃ suṣuve sā tu brahmiṣṭhaṃ mānasaṃ sutam .. 11.17 .. ### [2.11.19](https://indike.org/pramana/in.purana.vayu.2.11.19) yā caitāsāṃ kumārīṇāṃ tṛtīyā tvekapāṭalā. putraṃ śataśilākasya jaigīṣavyamupasthitā .. 11.18 .. ### [2.11.20](https://indike.org/pramana/in.purana.vayu.2.11.20) tasyāpi śaṅkhalikhitau smṛtau putrāvayonijau. ityetā vai mahābhāgāḥ kanyā himavataḥ śubhāḥ .. 11.19 .. ### [2.11.21](https://indike.org/pramana/in.purana.vayu.2.11.21) rudrāṇī sā tu pravarā svaguṇairatiricyate. anyonyaprītiranayorumāśaṅkarayoryathā .. 11.20 .. ### [2.11.22](https://indike.org/pramana/in.purana.vayu.2.11.22) śleṣaṃ saṃsaktayorjñātvā śaṅkitaḥ kila vṛtrahā. tābhyāṃ maithunasaktābhyāmapatyodbhavabhīruṇā. tayoḥ sakāśamindreṇa preṣito havyavāhanaḥ .. 11.21 .. ### [2.11.23](https://indike.org/pramana/in.purana.vayu.2.11.23) anayo rativighnañca tvamācara hutāśana. sarvatra gata eva tvaṃ na doṣo vidyate tadā .. 11.22 .. ### [2.11.24](https://indike.org/pramana/in.purana.vayu.2.11.24) ityevamukte tu tathā vahninā ca tathā kṛtam. umādehaṃ samutsṛjya śukraṃ bhūmau visarjitam .. 11.23 .. ### [2.11.25](https://indike.org/pramana/in.purana.vayu.2.11.25) tato ruṣitayā devyā śapto'gniḥ śāṃśapāyana. idaṃ coktavatī vahniṃ roṣagadghadayā girā .. 11.24 .. ### [2.11.26](https://indike.org/pramana/in.purana.vayu.2.11.26) yasmānmayyavitṛptāyāṃ rativighnaṃ hutāśana. kṛtavānasyakarttavyaṃ tasmāttvamasi durmate .. 11.25 .. ### [2.11.27](https://indike.org/pramana/in.purana.vayu.2.11.27) yadevaṃ vibhṛtaṃ garbhaṃ raudraṃ śukraṃ mahāprabham. garbhaṃ tvaṃ dhārayasvaivameṣā te daṇḍadhāraṇā .. 11.26 .. ### [2.11.28](https://indike.org/pramana/in.purana.vayu.2.11.28) sa śāparoṣādrudrāṇyā antargarbho hutāśanaḥ. bahūnvarṣagaṇān garbhaṃ dhārayāmāsa vai dvijāḥ .. 11.27 .. ### [2.11.29](https://indike.org/pramana/in.purana.vayu.2.11.29) sa gaṅgāmupagamyāha śrūyatāṃ sariduttame. sumahān parikhedo me garbhadhāraṇakāraṇāt .. 11.28 .. ### [2.11.30](https://indike.org/pramana/in.purana.vayu.2.11.30) maddhitārthamimaṃ garbhamato dhāraya nimnage. matprasādācca khedo vai mandastava bhaviṣyati .. 11.29 .. ### [2.11.31](https://indike.org/pramana/in.purana.vayu.2.11.31) tathetyuktvā tadā sā tu samprahṛṣṭa mahānadī. taṃ garbhaṃ dhārayāmāsa dahyamānena cetasā .. 11.30 .. ### [2.11.32](https://indike.org/pramana/in.purana.vayu.2.11.32) sāpi kṛcchreṇa mahatā khidyamānā mahānadī. kālaṃ prakṛṣṭaṃ sumahadgharbhadhāraṇatatparā .. 11.31 .. ### [2.11.33](https://indike.org/pramana/in.purana.vayu.2.11.33) tayā parigataṃ garbhaṃ kukṣau himavataḥ śubhe. śubhaṃ śaravaṇaṃ nāma citraṃ puṣpitapādapam. tatra taṃ vyasṛjadgarbhaṃ dīpyamānāmivānalam .. 11.32 .. ### [2.11.34](https://indike.org/pramana/in.purana.vayu.2.11.34) rudrāgnigaṅgātanayastatra jāto'ruṇaprabhaḥ . ādityaśatasaṅkāśo mahātejāḥ pratāpavān .. 11.33 .. ### [2.11.35](https://indike.org/pramana/in.purana.vayu.2.11.35) tasmiñjāte mahābhāge kumāre jāhnavīsute. vimānayānairākāśaṃ patatribhirivāvṛtam .. 11.34 .. ### [2.11.36](https://indike.org/pramana/in.purana.vayu.2.11.36) devadundubhayo nedurākāśe madhurasvarāḥ. mumucuḥ puṣpavarṣañca khacarāḥ siddhacāraṇāḥ .. 11.35 .. ### [2.11.37](https://indike.org/pramana/in.purana.vayu.2.11.37) jagurgandharvvamukhyāśca sarvvaśastatra tatra ha. yakṣā vidyādharāḥ siddhāḥ kinnarāścaiva sarvaśaḥ .. 11.36 .. ### [2.11.38](https://indike.org/pramana/in.purana.vayu.2.11.38) mahānāga sahasrāṇi pravarāśca patatriṇaḥ . upatasthurmahābhāgamāgneyaṃ śaṅkarātmajam. prabhāveṇa tadā tena daityadānavarākṣasāḥ .. 11.37 .. ### [2.11.39](https://indike.org/pramana/in.purana.vayu.2.11.39) saha saptarṣibhāryābhirādāve vāgnisambhavaḥ. abhiṣekaprayātābhirdṛṣṭo varjya tvarundhatīm .. 11.38 .. ### [2.11.40](https://indike.org/pramana/in.purana.vayu.2.11.40) tābhiḥ sa bālārkanibho raudraḥ parivṛtaḥ prabhuḥ . snihyamānābhiratyarthaṃ svakābhiriva mātṛbhiḥ .. 11.39 .. ### [2.11.41](https://indike.org/pramana/in.purana.vayu.2.11.41) yugapatsarvadevīrhi didṛkṣurjāhnavīsutaḥ. ṣapmukho vyasṛjacchrīmāṃstāsāṃ prītyā mahādyutiḥ .. 11.40 .. ### [2.11.42](https://indike.org/pramana/in.purana.vayu.2.11.42) śrīmān kamalapatrākṣastaruṇāditya sannibhaḥ. yena jātena lokānāmākṣepastejasā kṛtaḥ .. 11.41 .. ### [2.11.43](https://indike.org/pramana/in.purana.vayu.2.11.43) tena jātena mahatā devānāmasahiṣṇavaḥ. skanditā dānavagaṇāstasmātskandaḥ pratāpavān .. 11.42 .. ### [2.11.44](https://indike.org/pramana/in.purana.vayu.2.11.44) kṛttikābhistu yasmāt saṃvarddhitaḥ sa purātanaḥ. kārttikeya iti khyātastasmādasurasūdanaḥ .. 11.43 .. ### [2.11.45](https://indike.org/pramana/in.purana.vayu.2.11.45) jṛmbhatastasya daityārerjvālāmālākulāttadā. mukhādvinirgatā tasya svaśaktiraparājitā .. 11.44 .. ### [2.11.46](https://indike.org/pramana/in.purana.vayu.2.11.46) krīḍārthañcaiva skandasya viṣṇunā prabhaviṣṇunā. garuḍāditi sṛṣṭau hi pakṣiṇau hi prabhadrakau .. 11.45 .. ### [2.11.47](https://indike.org/pramana/in.purana.vayu.2.11.47) mayūraḥ kukkuṭaścaiva patākā caiva vāyunā. yasya dattā sarasvatyā mahāvīṇā mahāsvanā. ajaḥ svayambhuvā datto meṣo dattaśca śambhunā .. 11.46 .. ### [2.11.48](https://indike.org/pramana/in.purana.vayu.2.11.48) māyā viharaṇe viprā girau krauñce nipātite. tārake cāsuravare samudīrṇe nipātite .. 11.47 .. ### [2.11.49](https://indike.org/pramana/in.purana.vayu.2.11.49) sendropendrairmahābhāgairdevaraignisutaḥ prabhuḥ . senāpatyena daityārirabhiṣiktaḥ pratāpavān .. 11.48 .. ### [2.11.50](https://indike.org/pramana/in.purana.vayu.2.11.50) devasenāpatistvevaṃ paṭhyate naranāyakaḥ. devāriskandanaḥ skandaḥ sarvalokeśvaraḥ prabhuḥ .. 11.49 .. ### [2.11.51](https://indike.org/pramana/in.purana.vayu.2.11.51) pramathairvividhairdavaistathā bhūta gaṇairapi . mātṛbhirvividhābhiśca vināyakagaṇaistathā .. 11.50 .. ### [2.11.52](https://indike.org/pramana/in.purana.vayu.2.11.52) sā tvapaśyadvimānāni patantī sā divaścyutā . trasareṇupramāṇāni teṣvapaśyaccyutān pitṝn .. 11.51 .. ### [2.11.53](https://indike.org/pramana/in.purana.vayu.2.11.53) susūkṣmānaparityaktānagnīnagniṣvivāhitān. trāyadhvamityuvācātha patantī tānavākśirāḥ .. 11.52 .. ### [2.11.54](https://indike.org/pramana/in.purana.vayu.2.11.54) tairuktā sā tu mābhaiṣīrityuktādhiṣṭhitābhavat. tataḥ prāsādayatsā vai pitṝṃstān dīnayā girā .. 11.53 .. ### [2.11.55](https://indike.org/pramana/in.purana.vayu.2.11.55) ūcuste pitaraḥ kanyāṃ bhraṣṭaiśvaryāṃ vyatikramāt. bhraṣṭaiśvaryā svadoṣeṇa tapasi tvaṃ śucismite .. 11.54 .. ### [2.11.56](https://indike.org/pramana/in.purana.vayu.2.11.56) yaiḥ kriyante ca karmmāṇi śarīrairiha daivataiḥ . taireva tatkarmaphalaṃ prāpnuvantīha devatāḥ .. 11.55 .. ### [2.11.57](https://indike.org/pramana/in.purana.vayu.2.11.57) sadyaḥ phalanti karmāṇi devatve pretya mānuṣe. tasmādamāvasvapatyatvaṃ pretya prāpsyase phalam .. 11.56 .. ### [2.11.58](https://indike.org/pramana/in.purana.vayu.2.11.58) ityuktyā vai pitaraḥ punaste tu prasāditāḥ. dhyātvā prasādaṃ sañcakrustasyāste tvanukampayā .. 11.57 .. ### [2.11.59](https://indike.org/pramana/in.purana.vayu.2.11.59) avaśyambhāvinaṃ dṛṣṭvā hyarthamūcustataḥ surāḥ . somapāḥ pitaraḥ kanyāṃ rājñaścaiva hyamāvasoḥ .. 11.58 .. ### [2.11.60](https://indike.org/pramana/in.purana.vayu.2.11.60) utpannasya pṛthivyāṃ tu mānuṣatve mahātmanaḥ. kanyā bhūtvā tvimām̐llokānpunaḥ prāpsyasi svāniti .. 11.59 .. ### [2.11.61](https://indike.org/pramana/in.purana.vayu.2.11.61) aṣṭāviṃśe bhavitrī tvaṃ dvāpare matsyayonijā. asyaiva rājño duhitā adrikāyāṃ hyamāvasoḥ .. 11.60 .. ### [2.11.62](https://indike.org/pramana/in.purana.vayu.2.11.62) parāśarasya dāyādaṃ ṛṣestvaṃ janayiṣyasi. sa vedamekaṃ viprarṣiścaturdhā vai kariṣyati .. 11.61 .. ### [2.11.63](https://indike.org/pramana/in.purana.vayu.2.11.63) mahābhiṣasya putrau dvau śantanoḥ kīrttivarddhanau. vicitravīryyaṃ dharmajñaṃ tvamevotpādayiṣyasi .. 11.62 .. ### [2.11.64](https://indike.org/pramana/in.purana.vayu.2.11.64) citrāṅgadaṃ carājānaṃ tejobalaguṇānvitam. etānutpādya putraṃ svaṃ punarlokānavāpsyasi .. 11.63 .. ### [2.11.65](https://indike.org/pramana/in.purana.vayu.2.11.65) vyatikramātpitṝṇāṃ tvaṃ prāpsyase janma kutsitam. tasyaiva rājñastvaṃ kanyā adrikāyāṃ bhaviṣyasi .. 11.64 .. ### [2.11.66](https://indike.org/pramana/in.purana.vayu.2.11.66) kanyā bhūtvā tataśca tvamimān lokānavāpsyasi. evamuktā tu dāśeyī jātā satyavatī tu sā .. 11.65 .. ### [2.11.67](https://indike.org/pramana/in.purana.vayu.2.11.67) adrikāyāṃ sutā matsyāṃ sutā jātā hyamāvasoḥ. adri kāmatsyasambhūtā gaṅgāyāmanusaṅgame .. 11.66 .. ### [2.11.68](https://indike.org/pramana/in.purana.vayu.2.11.68) tasya rājño hi sā kanyā rājño vīryye sadaiva hi. virajā nāma te lokā divi rocanti te gaṇāḥ .. 11.67 .. ### [2.11.69](https://indike.org/pramana/in.purana.vayu.2.11.69) agniṣvāttāḥ smṛtāstatra pitaro bhāsvaraprabhāḥ . tāndānavagaṇā yakṣā rakṣogandharvvakinnarāḥ. bhūtasarpapiśācāśca bhāvayanti phalārthinaḥ .. 11.68 .. ### [2.11.70](https://indike.org/pramana/in.purana.vayu.2.11.70) ete putrāḥ samākhyātāḥ pulahasya prajāpateḥ. traya ete gaṇāḥ proktā dharmamūrtidharāḥ śubhāḥ .. 11.69 .. ### [2.11.71](https://indike.org/pramana/in.purana.vayu.2.11.71) eteṣāṃ mānasī kanyā pīvarī nāma viśrutā. yoginī yogapatnī ca yogamātā tathaiva ca .. 11.70 .. ### [2.11.72](https://indike.org/pramana/in.purana.vayu.2.11.72) bhavitā dvāparaṃ prāpya aṣṭāviṃśantu daivatam. parāśarakulodbhūtaḥ śuko nāma mahātapāḥ .. 11.71 .. ### [2.11.73](https://indike.org/pramana/in.purana.vayu.2.11.73) śrīmānyogī mahāyogī yogastasmāddvijottamaḥ. vyāsādaraṇyāṃ sambhūto vidhūma iva pāvakaḥ .. 11.72 .. ### [2.11.74](https://indike.org/pramana/in.purana.vayu.2.11.74) sa tasyāṃ pitṛkanyāyāṃ yogācāryānpariśrutān . kṛṣṇaṃ gauraṃ prabhuṃ śambhuṃ tathā bhūriśrutaṃ vavau .. 11.73 .. ### [2.11.75](https://indike.org/pramana/in.purana.vayu.2.11.75) kanyāṃ kīrttimatīñcaiva yoginīṃ yogamātaram . brahmadattasya jananī mahiṣī tvaṇuhasya tu .. 11.74 .. ### [2.11.76](https://indike.org/pramana/in.purana.vayu.2.11.76) etānutpādya dharmātmā putrānyogamavāpya ca. mahāyogatapāścaiva aparāvarttinīṃ gatim .. 11.75 .. ### [2.11.77](https://indike.org/pramana/in.purana.vayu.2.11.77) ādityakiraṇopetaṃ tvapunarbhāvamāsthitaḥ. sarvavyāpi vinirmukto bhaviṣyati mahāmuniḥ .. 11.76 .. ### [2.11.78](https://indike.org/pramana/in.purana.vayu.2.11.78) amūrttimantaḥ pitaro dharmamūrttidharāstu ye. traya ete gaṇāsteṣāṃ catvāro'nye nibodhata .. 11.77 .. ### [2.11.79](https://indike.org/pramana/in.purana.vayu.2.11.79) yānvakṣyāmi dvijaśreṣṭhā mūrttimanto mahāprabhāḥ. utpannāste svadhāyāstu kanyā hyagneḥ kaveḥ sutāḥ .. 11.78 .. ### [2.11.80](https://indike.org/pramana/in.purana.vayu.2.11.80) pitaro devalokeṣu jyotirbhāsiṣu bhāsvarāḥ. sarvakāmasamṛddheṣu dvijā stānbhāvayantyuta .. 11.79 .. ### [2.11.81](https://indike.org/pramana/in.purana.vayu.2.11.81) eteṣāṃ mānasī kanyā gaurnāma divi viśrutā. dattasenā kumāreṇa śukrasya mahiṣī priyā .. 11.80 .. ### [2.11.82](https://indike.org/pramana/in.purana.vayu.2.11.82) ekatriṃśacca vikhyātā bhṛgūṇāṃ kīrttivarddhanāḥ. marīcigarbhāste lokāḥ samāvṛtya divi sthitāḥ .. 11.81 .. ### [2.11.83](https://indike.org/pramana/in.purana.vayu.2.11.83) ete hyaṅgirasaḥ putrāḥ sādhyaiḥ saha vivarddhitāḥ. upahūtāḥ smṛtāste tu pitaro bhāsvarā divi. tānkṣatriyagaṇāndṛṣṭvā bhāvayanti phalārthinaḥ .. 11.82 .. ### [2.11.84](https://indike.org/pramana/in.purana.vayu.2.11.84) eteṣāṃ mānasī kanyā yaśodā nāma viśrutā. patnī sā viśvamahataḥ snuṣā vai viśvaśarmmiṇaḥ .. 11.83 .. ### [2.11.85](https://indike.org/pramana/in.purana.vayu.2.11.85) rājarṣerjananī devī khaṭvāṅgasya mahātmanaḥ. yasya yajñe purā gītā gāthā gītairmaharṣibhiḥ .. 11.84 .. ### [2.11.86](https://indike.org/pramana/in.purana.vayu.2.11.86) agnerjanma tathā dṛṣṭvā śāṇḍilyasya mahātmanaḥ. yajamānaṃ dilīpaṃ ye paśyanti susamāhitāḥ. satyavrataṃ mahātmānaṃ te svargajayino'marāḥ .. 11.85 .. ### [2.11.87](https://indike.org/pramana/in.purana.vayu.2.11.87) ājyapā nāma pitaraḥ kardamasya prajāpateḥ . samutpannasya pulahādutpannāstasya vai punaḥ .. 11.86 .. ### [2.11.88](https://indike.org/pramana/in.purana.vayu.2.11.88) lokeṣveteṣu varttante kāmageṣu vihaṅgamāḥ . etānvaiśyagaṇāḥ śrāddhe bhāvayanti phalārthinaḥ .. 11.87 .. ### [2.11.89](https://indike.org/pramana/in.purana.vayu.2.11.89) eteṣāṃ mānasī sanyā virajā nāma viśrutā . yayāterjananī sādhvī patnī sā nahuṣasya tu .. 11.88 .. ### [2.11.90](https://indike.org/pramana/in.purana.vayu.2.11.90) sukālā nāma pitaro vasiṣṭhasya prajāpateḥ . hiraṇyagarbhasya sutāḥ śūdrāstānbāvayantyuta .. 11.89 .. ### [2.11.91](https://indike.org/pramana/in.purana.vayu.2.11.91) mānasā nāma te lokā vahante yatra te divi. eteṣāṃ mānasī kanyā narmadā saritāṃ varā .. 11.90 .. ### [2.11.92](https://indike.org/pramana/in.purana.vayu.2.11.92) sā bhāvayati bhūtāni dakṣiṇāpathagāminī . jananī trasaddasyorhi purukutsaparigrahaḥ .. 11.91 .. ### [2.11.93](https://indike.org/pramana/in.purana.vayu.2.11.93) eteṣāmabhyupagamānmāturmanvantareśvaraḥ . manvanta rādau śrāddhāni pravarttayati sarvaśaḥ .. 11.92 .. ### [2.11.94](https://indike.org/pramana/in.purana.vayu.2.11.94) pidṝṇāmānupūrvyeṇa sarveṣāṃ dvijasattamāḥ . tasmādiha svadharmeṇa śrāddhaṃ deyantu śraddhayā .. 11.93 .. ### [2.11.95](https://indike.org/pramana/in.purana.vayu.2.11.95) sarveṣāṃ rājataiḥ pātrairapi vā rajatānvitaiḥ. dattaṃ svadhāṃ purodhāya tathā prīṇāti vai pitṝn .. 11.94 .. ### [2.11.96](https://indike.org/pramana/in.purana.vayu.2.11.96) somasyāpyāyanaṃ kṛtvā hyagnervaivasvatasya ca. uda gāyanañcāgnau ca aśvamedhaṃ tadāmuyāt .. 11.95 .. ### [2.11.97](https://indike.org/pramana/in.purana.vayu.2.11.97) pitṝn prīṇāti vai bhaktyā pitaraḥ prīṇayanti tam. pitaraḥ puṣṭikāmasya prajākāmasya vā punaḥ. puṣṭiṃ prajāṃ ca svargaṃ prayacchanti na saṃśayaḥ .. 11.96 .. ### [2.11.98](https://indike.org/pramana/in.purana.vayu.2.11.98) devakāryyādapi sadā pitṛkāryyaṃ viśiṣyate. devatābhyaḥ pitṝṇāṃ hi pūrvvamāpyāyanaṃ smṛtam .. 11.97 .. ### [2.11.99](https://indike.org/pramana/in.purana.vayu.2.11.99) na hi yogagatiḥ sūkṣmā pitṝṇāmapi tṛptayaḥ. tapasā hi prasiddhena dṛśyante māṃsacakṣuṣā .. 11.98 .. ### [2.11.100](https://indike.org/pramana/in.purana.vayu.2.11.100) ityete pitaraścaiva lokā duhitaraśca vai. dauhitrā yajamānāśca proktā ye bhāvayanti tān .. 11.99 .. ### [2.11.101](https://indike.org/pramana/in.purana.vayu.2.11.101) catvāro mūrttimantaśca trayasteṣāmamūrttayaḥ. tebhyaḥ śrāddhāni satkṛtya devāḥ kurvvanti yatnataḥ .. 11.100 .. ### [2.11.102](https://indike.org/pramana/in.purana.vayu.2.11.102) bhaktāḥ prāñjalayaḥ sarve sendrāstadghatamānasāḥ. viśve ca sikatāścaiva pṛśnijāḥ śrṛṅgiṇastathā .. 11.101 .. ### [2.11.103](https://indike.org/pramana/in.purana.vayu.2.11.103) kṛṣṇāḥ śvetāstvajāścaiva vidhivatpūjayantyuta. prajāstā vātaraśanā divākīrttyāstathaiva ca .. 11.102 .. ### [2.11.104](https://indike.org/pramana/in.purana.vayu.2.11.104) lekhāśca marutaścaiva brahmādyāśca divaukasaḥ. atribhṛgvaṅgirādyāśca ṛṣayaḥ sarvva eva ca .. 11.103 .. ### [2.11.105](https://indike.org/pramana/in.purana.vayu.2.11.105) yakṣā nāgāḥ suparṇāśca kinnarā rākṣasaiḥ saha. pitṝṃstvapūjayansarve nityameva phalārthinaḥ .. 11.104 .. ### [2.11.106](https://indike.org/pramana/in.purana.vayu.2.11.106) evamete mahātmānaḥ śrāddhe satkṛtya pūjitāḥ. sarvānkāmānprayacchanti śataśo'tha sahasraśaḥ .. 11.105 .. ### [2.11.107](https://indike.org/pramana/in.purana.vayu.2.11.107) hitvā trailokyasaṃsāraṃ jarāmṛtyubhayaṃ tathā. mokṣaṃ yogamayaiśvaryyaṃ prayacchanti pitāmahāḥ .. 11.106 .. ### [2.11.108](https://indike.org/pramana/in.purana.vayu.2.11.108) mokṣopāyamathaiśvaryyaṃ sūkṣmadehāśca devatāḥ. kṛtsnaṃ vairāgyamānantyaṃ prayacchanti pitāmahāḥ .. 11.107 .. ### [2.11.109](https://indike.org/pramana/in.purana.vayu.2.11.109) aiśvaryyaṃ vihitaṃ yogamaiśvaryyaṃ vittamuttamam. yogaiśvaryyadṛte mokṣaḥ kathañcinnopapadyate .. 11.108 .. ### [2.11.110](https://indike.org/pramana/in.purana.vayu.2.11.110) apakṣasyaiva gamanaṃ gagane pakṣiṇo yathā . variṣṭhaḥ sarvadharmmāṇāṃ mokṣo dharmmaḥ sanātanaḥ .. 11.109 .. ### [2.11.111](https://indike.org/pramana/in.purana.vayu.2.11.111) vimānānāṃ sahasrāṇi yuktānyapsarasāṃgaṇaiḥ. sarvakāmaprasiddhāni prayacchanti pitāmahāḥ .. 11.110 .. ### [2.11.112](https://indike.org/pramana/in.purana.vayu.2.11.112) prajñā puṣṭiḥ smṛtirmedhā rājyamārogyameva ca. pitṝṇāṃ hi prasādena prāpyate sumahātmanā .. 11.111 .. ### [2.11.113](https://indike.org/pramana/in.purana.vayu.2.11.113) muktāvaiḍhūryyavāsāṃsi vājināgāyutāni ca. koṭiśaścāpi ratnāni prayacchanti pitāmahāḥ .. 11.112 .. ### [2.11.114](https://indike.org/pramana/in.purana.vayu.2.11.114) haṃsabarhiṇayuktāni muktāvaiḍhūryyavanti ca. kiṅkiṇījālanaddhāni sadā puṣpaphalāni ca. prītyā nityaṃ prayacchanti manuṣyāṇāṃ pitāmahāḥ .. 11.113 .. ### [2.11.115](https://indike.org/pramana/in.purana.vayu.2.11.115) iti śrīmahāpurāṇe vāyuprokte śrāddhakalpo nāmaikādaśo'dhyāyaḥ .. 11 .. \* ## Linked texts (3) - [Brahmāṇḍapurāṇa](https://indike.org/pramana/in.purana.brahmanda.2.10.1) — Vyāsa, Sanskrit - [Padmapurāṇa](https://indike.org/pramana/in.purana.padma.1.9.22) — Vyāsa, Sanskrit - [Śrāddhacandrikā (Divākarabhaṭṭa)](https://indike.org/pramana/in.niti.dharma.sraddha.sraddhacandrika.1.p8) — Divākarabhaṭṭa 1655, Sanskrit --- Source: [https://indike.org/pramana/in.purana.vayu.2.11](https://indike.org/pramana/in.purana.vayu.2.11) · Pramāṇa