[Pramāṇa](https://indike.org/pramana/) › [Indian literature](https://indike.org/pramana/in) › [Purāṇas](https://indike.org/pramana/in.purana) › [Vayupurana](https://indike.org/pramana/in.purana.vayu) › 2.13 # Vayupurana 2.13: adhyāyaḥ 13 Vāyupurāṇa 2.13 - **Language:** Sanskrit ### adhyāyaḥ 13 ### [2.13.1](https://indike.org/pramana/in.purana.vayu.2.13.1) bṛhaspatiruvāca.. ### [2.13.2](https://indike.org/pramana/in.purana.vayu.2.13.2) pālāśaṃ brahmavarcasyamaśvatthe rājyabhāvanā. sarvabhūtādhipatyaṃ ca plakṣe nityamudāhṛtam .. 13.1 .. ### [2.13.3](https://indike.org/pramana/in.purana.vayu.2.13.3) puṣṭikāmaṃ ca nyagrodhaṃ buddhiṃ prajñāṃ dhṛtiṃ smṛtim. rakṣoghnaṃ ca yaśasyaṃ ca kāśmaryyaṃ pātramucyate .. 13.2 .. ### [2.13.4](https://indike.org/pramana/in.purana.vayu.2.13.4) saubhāgyamuttamaṃ loke madhuke samudāhṛtam. phalgupātre ca kurvāṇaḥ sarvānkāmānavāpnuyāt .. 13.3 .. ### [2.13.5](https://indike.org/pramana/in.purana.vayu.2.13.5) parā dyutiratho karttuḥ prākāśyaṃ ca viśeṣataḥ . bilve lakṣmīstathā medhā nityamāyuṣyameva ca .. 13.4 .. ### [2.13.6](https://indike.org/pramana/in.purana.vayu.2.13.6) kṣetrārāmataḍāgeṣu sarvasasyeṣu caiva hi. varṣedajasraṃ parjanyo veṇupātreṣu kurvvataḥ .. 13.5 .. ### [2.13.7](https://indike.org/pramana/in.purana.vayu.2.13.7) eteṣveva supātreṣu ye caivāgrayaṇaṃ daduḥ. sakṛdapyatra yajñānāṃ sarveṣāṃ phalamucyate .. 13.6 .. ### [2.13.8](https://indike.org/pramana/in.purana.vayu.2.13.8) pitṛbhyo yastu mālyāni sugandhīni ca sarvaśaḥ . sadā dadyācchriyā yuktaḥ sa vibhāti divākaraḥ .. 13.7 .. ### [2.13.9](https://indike.org/pramana/in.purana.vayu.2.13.9) guggulādīṃstathā dhūpān pitṛbhyo yaḥ prayacchati. saṃyuktānmadhusarpirbhyāṃ so'śvamedhaphalaṃ labhet .. 13.8 .. ### [2.13.10](https://indike.org/pramana/in.purana.vayu.2.13.10) dhūpaṃ gandhaguṇopetaṃ kāntaṃ pitṛparāyaṇam. labhate strīṣvapatyāni iha cāmutra cobhayoḥ. dadyādeva pitṛbhyastu nityameva hyatandritaḥ .. 13.9 .. ### [2.13.11](https://indike.org/pramana/in.purana.vayu.2.13.11) dīpaṃ pitṛbhyaḥ prayataḥ sadā yastu prayacchati. sa loke'pratimaṃ cakṣuḥ sadā ca labhate śūbham .. 13.10 .. ### [2.13.12](https://indike.org/pramana/in.purana.vayu.2.13.12) tejasā yaśamā caiva kāntyā caiva balena ca. bhuvi prakāśo bhavati bhrājate ca triviṣṭape. apsarobhiḥ parivṛto vimānāgre sa modate .. 13.11 .. ### [2.13.13](https://indike.org/pramana/in.purana.vayu.2.13.13) gandhānpuṣpāṇi dhūpāṃśca dadyādājyādutīśca vai. phalamūlanamaskāraiḥ pidṝṇāṃ prayataḥ śuciḥ. pūrva kṛtvā dvijānpaśvātpūjayedannasampadā .. 13.12 .. ### [2.13.14](https://indike.org/pramana/in.purana.vayu.2.13.14) śrāddhakāle tu satataṃ vāyubhūtāḥ pitāmahāḥ. āviśanti dvijāndṛṣṭvā tasmādetadbravīmi te .. 13.13 .. ### [2.13.15](https://indike.org/pramana/in.purana.vayu.2.13.15) vastrairannaiḥ pradānaistairbhakṣyapeyaistathaiva ca. gobhiraśvaistathā grāmaiḥ pūjayitvā dvijottamān .. 13.14 .. ### [2.13.16](https://indike.org/pramana/in.purana.vayu.2.13.16) bhavanti pitaraḥ prītāḥ pūjiteṣu dvijātiṣu. tasmādannena vidhivat pūjayeddvijasattamān .. 13.15 .. ### [2.13.17](https://indike.org/pramana/in.purana.vayu.2.13.17) savyottarābhyāṃ pāṇibhyāṃ kuryyādullekhanaṃ dvijaḥ. prokṣaṇañca tathā kuryācchrāddhakarmmaṇyatandritaḥ .. 13.16 .. ### [2.13.18](https://indike.org/pramana/in.purana.vayu.2.13.18) darbhānpiṇḍāṃstathā bhakṣyānpuṣpāṇi vividhāni ca. gandhadānamalaṅkāramekaikaṃ nirvapedvudhaḥ .. 13.17 .. ### [2.13.19](https://indike.org/pramana/in.purana.vayu.2.13.19) poṣayitvā janaṃ samyagvaiśvaḥ syāduttaro dvijaḥ. abhyaṅga darbhapiñjālaistribhiḥ kuryādyathāvidhi .. 13.18 .. ### [2.13.20](https://indike.org/pramana/in.purana.vayu.2.13.20) apasavyaṃ pitṛbhyaśca dadyādannamanuttamam. tamuccāryyātha sarveṣāṃ vastrārthaṃ sūtrameva ca .. 13.19 .. ### [2.13.21](https://indike.org/pramana/in.purana.vayu.2.13.21) khaṇḍanaṃ poṣaṇaṃ caiva tathaivollekhanaṃ tathā. sakṛdeva hi devānāṃ pitṝṇāṃ tribhirucyate .. 13.20 .. ### [2.13.22](https://indike.org/pramana/in.purana.vayu.2.13.22) ekaṃ pavitraṃ hastena pitṝnsarvānsakṛtsakṛt. cailamantreṇa piṇḍebhyo dattvā darśanajaṃ hitam .. 13.21 .. ### [2.13.23](https://indike.org/pramana/in.purana.vayu.2.13.23) sadā sarpistilairyuktāṃ strīn piṇḍānnirvapedbhuvi. jānuṃ kṛtvā tathā savyaṃ bhūmau pitṛparāyaṇaḥ .. 13.22 .. ### [2.13.24](https://indike.org/pramana/in.purana.vayu.2.13.24) pitṝn pitāmahāṃścaiva tathaiva prapitāmahān. āhūya ca pitṝn prāñcān pitṛtīrthena yatnataḥ. piṇḍānparikṣipetsamyagapasavyamatandritaḥ .. 13.23 .. ### [2.13.25](https://indike.org/pramana/in.purana.vayu.2.13.25) annenādbhiśca puṣpaiśca bhakṣyaiścaiva pṛthagvidhaiḥ. pṛthag mātāmahānāntu kecidicchanti mānavāḥ .. 13.24 .. ### [2.13.26](https://indike.org/pramana/in.purana.vayu.2.13.26) trīn piṇḍānānupūrvvyeṇa sāṅguṣṭhānpuṣṭivarddhanān . jānvantarābhyāṃ yatnena piṇḍān dadyādyathākramam .. 13.25 .. ### [2.13.27](https://indike.org/pramana/in.purana.vayu.2.13.27) savyottarābhyāṃ pāṇibhyāṃ dharme mantre ca paryyayaḥ. namo vaḥ pitaraḥ sūkṣmaiḥ sadā hyevamatandritaḥ .. 13.26 .. ### [2.13.28](https://indike.org/pramana/in.purana.vayu.2.13.28) dakṣiṇasyāntu pāṇibhyāṃ prathamaṃ piṇḍamutsṛjet. namo vaḥ pitaraḥ saumyāḥ paṭhannityamatandritaḥ .. 13.27 .. ### [2.13.29](https://indike.org/pramana/in.purana.vayu.2.13.29) savyottarābhyāṃ pāṇibhyāṃ dharme sarvvamatandritaḥ. ulūkhalasya lekhāyā mudapātrācca sevanam .. 13.28 .. ### [2.13.30](https://indike.org/pramana/in.purana.vayu.2.13.30) kṣaumasūtraṃ navaṃ dadyācchoṇaṃ kārpāsikaṃ tathā. patrorṇaṃ pitṛsūtrañca kauśeyaṃ parivarjayet .. 13.29 .. ### [2.13.31](https://indike.org/pramana/in.purana.vayu.2.13.31) varjayettaddaśāṃ yajñe yadapyahatavastrajām. na prīṇanti tathaitāni dāturāpyāyato bhavet .. 13.30 .. ### [2.13.32](https://indike.org/pramana/in.purana.vayu.2.13.32) śreṣṭhamāhustrikakudamañjanaṃ nityameva ca. kṛṣṇebhyaśca tilebhyaśca yattailaṃ parirakṣitam .. 13.31 .. ### [2.13.33](https://indike.org/pramana/in.purana.vayu.2.13.33) candanāguruṇī cobhe tamālośīrapajhakam. dhūpaṃ ca guggulaśreṣṭhaṃ turuṣkaṃ dhūpameva ca .. 13.32 .. ### [2.13.34](https://indike.org/pramana/in.purana.vayu.2.13.34) śuklāḥ sumanasaḥ śreṣṭhāstathā pajhotpalāni ca. gandhavantyupapannāni yāni cānyāni kṛtsnaśaḥ .. 13.33 .. ### [2.13.35](https://indike.org/pramana/in.purana.vayu.2.13.35) javāsumanaso bhaṇḍīrūpakāmakuraṇḍakāḥ. puṣpāṇi varjanīyāni śrāddhakarmaṇi nityaśaḥ .. 13.34 .. ### [2.13.36](https://indike.org/pramana/in.purana.vayu.2.13.36) yāni gandhādapetāni upagandhīni yāni ca. varjanīyāni puṣpāṇi bhūtimanvicchatā tadā .. 13.35 .. ### [2.13.37](https://indike.org/pramana/in.purana.vayu.2.13.37) dvijātayastathānviṣṭhā niyatāḥ syurudaṅmukhāḥ. pūjayedyajamānastu vidhivaddakṣiṇāmukhaḥ .. 13.36 .. ### [2.13.38](https://indike.org/pramana/in.purana.vayu.2.13.38) teṣāmabhimukho dadyāddarbhānpiṇḍāṃśca yatnataḥ. anena vidhinā sākṣādarccayet svān pitāmahān .. 13.37 .. ### [2.13.39](https://indike.org/pramana/in.purana.vayu.2.13.39) haritā vai sapiñjalyāḥ puṣpasnigdhāḥ samāhitāḥ. ratnimātrapradānena pitṛtīrthena saṃsthitāḥ .. 13.38 .. ### [2.13.40](https://indike.org/pramana/in.purana.vayu.2.13.40) upamūle tathā nīlāḥ prastarādyakulodyamāḥ . tathā śmāmākanīvārā durvārāḥ samudāhṛtāḥ .. 13.39 .. ### [2.13.41](https://indike.org/pramana/in.purana.vayu.2.13.41) pūrvvaṃkīrttitavāñchreṣṭho babhūvātha prajāpatiḥ . tasya vālā nipatitā bhūmau cākāśamārgataḥ .. 13.40 .. ### [2.13.42](https://indike.org/pramana/in.purana.vayu.2.13.42) tasmānmedhyā samākāśāḥ śrāddhakarmaṇi pūjitāḥ . piṇḍanirvapaṇaṃ teṣu karttavyaṃ bhūtimicchatā .. 13.41 .. ### [2.13.43](https://indike.org/pramana/in.purana.vayu.2.13.43) prajāpuṣṭirdyutiḥ kīrttiḥ prajākāntisamanvitā. bhavanti rucirā nityaṃ vipāpmāno'ghavarjitāḥ .. 13.42 .. ### [2.13.44](https://indike.org/pramana/in.purana.vayu.2.13.44) sakṛdevāstareddarbhān piṇḍārthaṃ dakṣiṇāmukhaḥ. prāgdakṣiṇāgraniyato vidhiñcāpyanuvakṣyati .. 13.43 .. ### [2.13.45](https://indike.org/pramana/in.purana.vayu.2.13.45) na dīno vāpi vā kruddho na caivānyamanā naraḥ. ekāgramādhāya manaḥ śrāddhaṃ kuryyātsadā budhaḥ .. 13.44 .. ### [2.13.46](https://indike.org/pramana/in.purana.vayu.2.13.46) nihanmi sarvvaṃ yadamedhyavadbhaved hatāśca sarvve suradānavā mayā. rakṣāṃsi yakṣāśca piśācasaṅghā hatā mayā yātudhānāśca sarvve .. 13.45 .. ### [2.13.47](https://indike.org/pramana/in.purana.vayu.2.13.47) evaṃ pitre dṛṣṭamannaṃ hi yasya tasyāsurā varjayantīha sarvve. yasmindeśe paṭhyate eṣa mantrastaṃ vai deśaṃ rākṣasā varjayanti .. 13.46 .. ### [2.13.48](https://indike.org/pramana/in.purana.vayu.2.13.48) anena vidhinā nityaṃ śrāddhaṃ kuryyāddvijaḥ sadā. manasā kāṅkṣitaṃ yadyattattaddadyuḥ pitāmahāḥ .. 13.47 .. ### [2.13.49](https://indike.org/pramana/in.purana.vayu.2.13.49) pitaro hṛṣṭamanaso rakṣāṃsi vimanāṃsi ca. bhavantyeva kṛte śrāddhe nityameva prayatnataḥ .. 13.48 .. ### [2.13.50](https://indike.org/pramana/in.purana.vayu.2.13.50) śūdrāḥ śrāddhe kṣīravāśu balvajāstaravastathā. vāraṇāśca lavāścaiva lavavarṣāśca nityaśaḥ. evamādīnyathānyāni tṛṇāni parivarjayet .. 13.49 .. ### [2.13.51](https://indike.org/pramana/in.purana.vayu.2.13.51) añjanābhyañjanāgandhāmānupralayanaṃ tathā . kāśaiḥ punarbhavaiḥ kāryyaṃ sarvvameva phalaṃ bhavet .. 13.50 .. ### [2.13.52](https://indike.org/pramana/in.purana.vayu.2.13.52) kāśāḥ punarbhavā ye ca barhaṇā upabarhaṇāḥ. atha te pitaro devā devāśca pitaraḥ punaḥ .. 13.51 .. ### [2.13.53](https://indike.org/pramana/in.purana.vayu.2.13.53) puṣpagandhādidhūpānāmeṣa mantra udāhṛtaḥ. āhṛtya dakṣiṇāyāntu homārthe viprayatnataḥ .. 13.52 .. ### [2.13.54](https://indike.org/pramana/in.purana.vayu.2.13.54) somāya vai pitṛmate svadhā aṅgirase namaḥ. asvargyaṃ laukikaṃ vāpi juhuyātkarmmasiddhaye .. 13.53 .. ### [2.13.55](https://indike.org/pramana/in.purana.vayu.2.13.55) antarādhāya samidhaṃ tathā homo vidhīyate.. ### [2.13.56](https://indike.org/pramana/in.purana.vayu.2.13.56) samāhitena manasā prayatāgniḥ prayatnataḥ .. 13.54 .. ### [2.13.57](https://indike.org/pramana/in.purana.vayu.2.13.57) agnaye kavyavāhāya svadhā aṅgirase namaḥ. yamāya caivāṅgirase svadhā nama iti bruvan .. 13.55 .. ### [2.13.58](https://indike.org/pramana/in.purana.vayu.2.13.58) ityete vai homamantrā mantrāṇāmanu pūrvvaśaḥ. dakṣiṇāto'gnaye nityaṃ somāyāntaratastathā .. 13.56 .. ### [2.13.59](https://indike.org/pramana/in.purana.vayu.2.13.59) etayorantaraṃ nityaṃ juhuyādvai vivasvate. upacāraṃ svadhākāraṃ tathaivollekhanañca yat .. 13.57 .. ### [2.13.60](https://indike.org/pramana/in.purana.vayu.2.13.60) homajapye namaskāraḥ prokṣaṇañca viśeṣataḥ. añjanābhyañjane caiva piṇḍasaṃvapanaṃ tathā .. 13.58 .. ### [2.13.61](https://indike.org/pramana/in.purana.vayu.2.13.61) aśvamedhaphalenaiva tatsmṛtaṃ mantrapūrvvakam. kriyāḥ sarvvā yatho ddiṣṭāḥ prayatnena samācaret .. 13.59 .. ### [2.13.62](https://indike.org/pramana/in.purana.vayu.2.13.62) bahuhavyatvamevāgnau susamiddhe viśeṣataḥ. vidhūme lelihāne ca hotavyaṃ karmasiddhaye .. 13.60 .. ### [2.13.63](https://indike.org/pramana/in.purana.vayu.2.13.63) aprabuddhe sadhūme ca juhuyādyo hutāśane. yajamāno bhavedandhaḥ so'putra iti naḥ śrutam .. 13.61 .. ### [2.13.64](https://indike.org/pramana/in.purana.vayu.2.13.64) alpendhano vā rūkṣo vā visphuliṅgaśca sarvvaśaḥ . jvālā dhūmopasevyaśca sa tu vahnirna siddhaye .. 13.62 .. ### [2.13.65](https://indike.org/pramana/in.purana.vayu.2.13.65) durgandhaścaiva nīlaśca kṛṣṇaścaiva viśeṣataḥ. bhūmiṃ vigāhate yatra tatra vidyātparābhavam .. 13.63 .. ### [2.13.66](https://indike.org/pramana/in.purana.vayu.2.13.66) arciṣmān piṇḍitaśikhaḥ sarpiḥkāñcanasambhavaḥ. snigdhaḥ pradakṣiṇaścaiva vahniḥ syātkāryyasiddhaye .. 13.64 .. ### [2.13.67](https://indike.org/pramana/in.purana.vayu.2.13.67) naranārīgaṇebhyaśca pūjāṃ prāpnoti śāśvatīm. akṣayāḥ pūjitāstena bhavanti pitaro'vyayāḥ .. 13.65 .. ### [2.13.68](https://indike.org/pramana/in.purana.vayu.2.13.68) sthālyudumbarapātrāṇi phalāni samidhastathā. śrāddhe cātipavitrāṇi medhyānīti viśeṣataḥ .. 13.66 .. ### [2.13.69](https://indike.org/pramana/in.purana.vayu.2.13.69) pavitraṃ vā dvijaśreṣṭha śuddhaye janmakarmmasu. pātreṣu phalamuddiṣṭaṃ yanmayā śrāddhakarmaṇi .. 13.67 .. ### [2.13.70](https://indike.org/pramana/in.purana.vayu.2.13.70) tadeva kṛtsnaṃ vijñeyaṃ samitsu ca yathākramam. kṛtvā samāhitaṃ cittamagraye vai karomyaham .. 13.68 .. ### [2.13.71](https://indike.org/pramana/in.purana.vayu.2.13.71) anujñātaḥ kuruṣveti tathaiva dvijasattamaiḥ. patnīmādāya putrāṃśca juhuyāddhavyavāhanam .. 13.69 .. ### [2.13.72](https://indike.org/pramana/in.purana.vayu.2.13.72) samānaplakṣanyagrodhaplakṣāśvatthavikaṅkatāḥ. udumbarāstathā bilvacandanā yajñiyāśca te .. 13.70 .. ### [2.13.73](https://indike.org/pramana/in.purana.vayu.2.13.73) saralo devadāruśca śālaśca khadirastathā. samidarthaṃ praśastāḥ syurete vṛkṣā viśeṣataḥ .. 13.71 .. ### [2.13.74](https://indike.org/pramana/in.purana.vayu.2.13.74) grāmyāḥ kamṭakinaścaiva yajñiyā yena kena ca. pūjitāḥ samidarthe tu pitṝṇāṃ vacanaṃ tathā .. 13.72 .. ### [2.13.75](https://indike.org/pramana/in.purana.vayu.2.13.75) samidbhiḥ kalkaleyābhirjjuhuyādyo hutāśanam . phalaṃ yat karmaṇastasya tanme nigadataḥ śrṛṇu .. 13.73 .. ### [2.13.76](https://indike.org/pramana/in.purana.vayu.2.13.76) āyasaṃ sarvvakāmīyamaśvamedhaphalaṃ hi tat. śleṣmātako naktamālaḥ kapitthaḥ śālmalistathā .. 13.74 .. ### [2.13.77](https://indike.org/pramana/in.purana.vayu.2.13.77) nīpo vibhī takaścaiva vallībhiśca tathaiva ca. śakunānāṃ nivāsaśca varjayecca mahīruhān. ayajñīyāḥ smṛtā ye ca vṛkṣāṃścaiva tu varjayet .. 13.75 .. ### [2.13.78](https://indike.org/pramana/in.purana.vayu.2.13.78) svadheti caiva mantrānte pitṝṇāṃ vacanaṃ tathā. svāheti caiva devānāṃ yajñakarmaṇyudāhṛtam .. 13.76 .. ### [2.13.79](https://indike.org/pramana/in.purana.vayu.2.13.79) iti śrīmahāpurāṇe vāyuprokte śrāddhakalpo nāma trayodaśo'dhyāyaḥ .. 13 .. \* ## Linked texts (4) - [Brahmāṇḍapurāṇa](https://indike.org/pramana/in.purana.brahmanda.2.11.37) — Vyāsa, Sanskrit - [Vaiṣṇava Dharmaśāstra](https://indike.org/pramana/in.niti.dharma.visnu.21.8) — Viṣṇu, Sanskrit - [Śrāddhakaumudī](https://indike.org/pramana/in.niti.dharma.sraddha.mithila_bengal.sraddhakaumudi.5.p47) — Govindānanda 1500, Sanskrit - [Nṛsiṃhaprasāda](https://indike.org/pramana/in.niti.dharma.nibandha.mahanibandha.nrsimhaprasada.p184.4) — Dalapatirāja 1511, Sanskrit --- Source: [https://indike.org/pramana/in.purana.vayu.2.13](https://indike.org/pramana/in.purana.vayu.2.13) · Pramāṇa