[Pramāṇa](https://indike.org/pramana/) › [Indian literature](https://indike.org/pramana/in) › [Purāṇas](https://indike.org/pramana/in.purana) › [Vayupurana](https://indike.org/pramana/in.purana.vayu) › 2.15 # Vayupurana 2.15: adhyāyaḥ 15 Vāyupurāṇa 2.15 - **Language:** Sanskrit ### adhyāyaḥ 15 ### [2.15.1](https://indike.org/pramana/in.purana.vayu.2.15.1) ..bṛhaspatiruvāca.. ### [2.15.2](https://indike.org/pramana/in.purana.vayu.2.15.2) sakṛdabhyarcitāḥ prītā bhavanti pitaro'nyayāḥ. yogātmāno mahātmāno vipāpmāno mahaujasaḥ .. 15.1 .. ### [2.15.3](https://indike.org/pramana/in.purana.vayu.2.15.3) pretya ca svargalābhāya kāmaiśvaryaṃ suvistaram . yeṣāṃ cāpyanugṛhṇanti mokṣaprāptikrameṇa tu .. 15.2 .. ### [2.15.4](https://indike.org/pramana/in.purana.vayu.2.15.4) tāni vakṣyāmyahaṃ saumyāḥ sarāṃsi saritastathā. tīrthāni caiva puṇyāni deśāñjailāṃstathāśramān .. 15.3 .. ### [2.15.5](https://indike.org/pramana/in.purana.vayu.2.15.5) puṇyo yastriṣu lokeṣvamarakaṇṭakaparvataḥ. parvataḥ pravaraḥ puṇyaḥ siddhacāraṇasevitaḥ .. 15.4 .. ### [2.15.6](https://indike.org/pramana/in.purana.vayu.2.15.6) yatra varṣasahasrāṇi prayutānyarbudāni ca. tapaḥ suduścaraṃ tepe bhagavānaṅgirāḥ purā .. 15.5 .. ### [2.15.7](https://indike.org/pramana/in.purana.vayu.2.15.7) yatra mṛtyorgatirnāsti tathaivāsurarakṣasām. na bhayaṃ caiva vā'lakṣmīryāvadbhūmirdhariṣyati .. 15.6 .. ### [2.15.8](https://indike.org/pramana/in.purana.vayu.2.15.8) tejasā yaśasā caiva bhrājate sa nagottamaḥ. śrṛṅgamālyavato nityaṃ vahniḥ saṃvartako yathā .. 15.7 .. ### [2.15.9](https://indike.org/pramana/in.purana.vayu.2.15.9) mṛdavaśca sugandhāśca hemābhāḥ priyadarśanāḥ . śāntāḥ kuśā iti khyātāḥ pibandakṣiṇanarmadām .. 15.8 .. ### [2.15.10](https://indike.org/pramana/in.purana.vayu.2.15.10) dṛṣṭavān svargasopānaṃ bhagavānaṅgirāḥ purā. agnihotre mahātejāḥ prastarārthakuśottamān .. 15.9 .. ### [2.15.11](https://indike.org/pramana/in.purana.vayu.2.15.11) teṣu darbheṣu yaḥ piṇḍānamarakaṇṭakaparvate. dadyātsakṛdapi prājñastasya vakṣyāmi yatphalam .. 15.10 .. ### [2.15.12](https://indike.org/pramana/in.purana.vayu.2.15.12) tadbhavatyakṣayaṃ śrāddhaṃ pitṝṇāṃ prītivarddhanam . antarddhānaṃ ca gacchanti kṣetramāsādya tatsadā .. 15.11 .. ### [2.15.13](https://indike.org/pramana/in.purana.vayu.2.15.13) tatra jvālārasaḥ puṇyo dṛśyate'dyāpi sarvaśaḥ. saśalyānāṃ ca sattvānāṃ viśalyakaraṇī nadī .. 15.12 .. ### [2.15.14](https://indike.org/pramana/in.purana.vayu.2.15.14) prāgdakṣiṇā tu sāvarttā vāpī sā parvatottame. kaliṅgadeśapārśvārddhe pitṝṇāṃ prītivarddhanam .. 15.13 .. ### [2.15.15](https://indike.org/pramana/in.purana.vayu.2.15.15) siddhakṣetramṛṣiśreṣṭā yaduktaṃ paramaṃ bhuvi. sammato devadaityānāṃ ślokamapyuśanā jagau .. 15.14 .. ### [2.15.16](https://indike.org/pramana/in.purana.vayu.2.15.16) dhanyāste puruṣā loke ye prāpyāmarakaṇṭakam. pitṝnsantarpayiṣyanti śrāddhe pitṛparāyaṇāḥ .. 15.15 .. ### [2.15.17](https://indike.org/pramana/in.purana.vayu.2.15.17) alpena tapasā siddhiṃ gamiṣyanti na saṃśayaḥ. sakṛdevārcitāstatra svargamamarakaṇṭake .. 15.16 .. ### [2.15.18](https://indike.org/pramana/in.purana.vayu.2.15.18) mahendraparvate ramye puṇyaṃ śakraniṣevitam. tatrāruhya bhavet prītiḥ śrāddhaṃ caiva mahatphalam .. 15.17 .. ### [2.15.19](https://indike.org/pramana/in.purana.vayu.2.15.19) bilvādhaḥśikhare yuktā divyaṃ cakṣuḥ pravarttate. adṛśyaṃ caiva bhūtānāṃ devavaccarate mahīm .. 15.18 .. ### [2.15.20](https://indike.org/pramana/in.purana.vayu.2.15.20) saptagodāvare caiva gokarṇe ca tapovane. aśvamedhaphalaṃ tatra snātvā ca labhatenaraḥ .. 15.19 .. ### [2.15.21](https://indike.org/pramana/in.purana.vayu.2.15.21) dhūtapāpasthalaṃ prāpya pūtaḥ snātvā bhavennaraḥ. rudrastatra tapastepe devadevo maheśvaraḥ .. 15.20 .. ### [2.15.22](https://indike.org/pramana/in.purana.vayu.2.15.22) gokarṇe varṇitaṃ viprairnastikānāṃ nidarśanam. abrāhmaṇasya sāvitrī paṭhataḥ sampraṇaśyati .. 15.21 .. ### [2.15.23](https://indike.org/pramana/in.purana.vayu.2.15.23) devarṣibhavane śrṛṅge siddhacāraṇasevite. āruhya taṃ tu niyamāttato yānti triviṣṭapam .. 15.22 .. ### [2.15.24](https://indike.org/pramana/in.purana.vayu.2.15.24) divyaiśvandanavṛkṣaiśca pādapairupaśobhitam. āpaḥ svādanasampṛktā vahanti satataṃyataḥ .. 15.23 .. ### [2.15.25](https://indike.org/pramana/in.purana.vayu.2.15.25) nadī pravarttate tābhyastāmraparṇīti nāmataḥ. yoṣeva samahākhedā dakṣiṇaṃ yāti sāgaram .. 15.24 .. ### [2.15.26](https://indike.org/pramana/in.purana.vayu.2.15.26) nadyāstasyāstu yā āpo mūrcchamānā mahodadhau. śaṅkhā bhavanti muktāśca jāyante śaṅkhamuktikāḥ .. 15.25 .. ### [2.15.27](https://indike.org/pramana/in.purana.vayu.2.15.27) udakānayanaṃ kṛtvā śaṅkhamauktikasaṃyutam. ādhibhirvyādhibhiścaiva muktā yāntyamarāvatīm .. 15.26 .. ### [2.15.28](https://indike.org/pramana/in.purana.vayu.2.15.28) candanebhyaḥ prayuktānāṃ śaṅkhānāṃ mauktikasya ca. pāpa kartṝnapi pitṝṃśtārayanti yathā śrutiḥ .. 15.27 .. ### [2.15.29](https://indike.org/pramana/in.purana.vayu.2.15.29) candratīrthe kumāryyāntu kāveryyāṃ prabhave'kṣaye. śrīparvatasya tīrtheṣu vaikṛte ca tathā girau .. 15.28 .. ### [2.15.30](https://indike.org/pramana/in.purana.vayu.2.15.30) ekasthā yatra dṛśyante vṛkṣā hyośiraparvate. pālāśāḥ khādirā bilvā plakṣāśvatthavikaṅkatāḥ .. 15.29 .. ### [2.15.31](https://indike.org/pramana/in.purana.vayu.2.15.31) etaddhi maṇḍalaṃ siddhaṃ yajñīyaṃ dvijasattamāḥ. asmin muktvā jano'ṅgāni kṣipraṃ yātyamarāvatīm .. 15.30 .. ### [2.15.32](https://indike.org/pramana/in.purana.vayu.2.15.32) karmāṇi svaprayuktāni sidhyanti prabhavātyaye . duṣprasaktāni pitṛṣu prayuktāni bhavantyuta .. 15.31 .. ### [2.15.33](https://indike.org/pramana/in.purana.vayu.2.15.33) pitṝṇāṃ duhitā puṇyā narmadā saritāṃ varā. tatra śrāddhāni dattāni akṣayāṇi bhavantyuta .. 15.32 .. ### [2.15.34](https://indike.org/pramana/in.purana.vayu.2.15.34) māṭharasya vane puṇye siddhacāraṇasevite. antarddhānaṃ na gacchanti sattāstasminmahāgirau .. 15.33 .. ### [2.15.35](https://indike.org/pramana/in.purana.vayu.2.15.35) vindhye caiva girau puṇye dharmādharmanidarśanam. pāpadhārāṃ na paśyanti dhārāṃ paśyanti sādhavaḥ .. 15.34 .. ### [2.15.36](https://indike.org/pramana/in.purana.vayu.2.15.36) tasyāṃ na dṛśyate pāpaṃ keṣāñcit pāpakarmaṇām. spaṣṭā bhavati sā dhārā prāyaśaḥ śubhakarmaṇām .. 15.35 .. ### [2.15.37](https://indike.org/pramana/in.purana.vayu.2.15.37) kauśalāyāṃ mataṅgasya vāpī pāpaniṣūdanī. snātāstasyāṃ divaṃ yānti kāmacāravihaṅgamāḥ .. 15.36 .. ### [2.15.38](https://indike.org/pramana/in.purana.vayu.2.15.38) kumārakośalātīrthe parvate pālapañjare. pāṇḍu kūle samudrānte paṇḍārakavane tathā .. 15.37 .. ### [2.15.39](https://indike.org/pramana/in.purana.vayu.2.15.39) vimale ca vipāpe ca satkṛtya prabhave'bhaye. bhīvṛkṣe gṛdhrakūṭe ca jambūmārge ca nityaśaḥ .. 15.38 .. ### [2.15.40](https://indike.org/pramana/in.purana.vayu.2.15.40) asitasya guroḥ puṇye yogācāryasya dhīmataḥ. tatrāpi śrāddhamānantyamasitāyāñca nityaśaḥ .. 15.39 .. ### [2.15.41](https://indike.org/pramana/in.purana.vayu.2.15.41) puṣkareṣvakṣayaṃ śrāddhaṃ tapaścaiva mahāphalam. mahodadhau prabhāse ca tasmādevaṃ vinirddiśet .. 15.40 .. ### [2.15.42](https://indike.org/pramana/in.purana.vayu.2.15.42) devikāyāṃ vṛṣo nāma kūpaḥ siddhaniṣevitaḥ. samutpatanti tasyāpo gavāṃ śabdena nityaśaḥ .. 15.41 .. ### [2.15.43](https://indike.org/pramana/in.purana.vayu.2.15.43) yogeśvaraiḥ sadā juṣṭaḥ sarvapāpabahiṣkṛtaiḥ. dadyācchrāddhantu yastasmiṃstasya vakṣyāmi yatphalam .. 15.42 .. ### [2.15.44](https://indike.org/pramana/in.purana.vayu.2.15.44) akṣayaṃ sārvakāmīyaṃ śrāddhaṃ prīṇāti vai pitṝn. jātavedaḥ śilā tatra sākṣādagneḥ sanātanī .. 15.43 .. ### [2.15.45](https://indike.org/pramana/in.purana.vayu.2.15.45) yastvāgniṃ praviśettatra nākapṛṣṭhe sa modate. agniḥ śāntaḥ punarjātastasmindattaṃ tadakṣayam .. 15.44 .. ### [2.15.46](https://indike.org/pramana/in.purana.vayu.2.15.46) daśāśvamadike tīrthe tīrthe pañcāśvamedhike. yathoddiṣṭaṃ phalaṃ teṣāṃ kratūnāṃ nātra saṃśayaḥ .. 15.45 .. ### [2.15.47](https://indike.org/pramana/in.purana.vayu.2.15.47) khyātaṃ hayaśiro nāma tīrthaṃ sadyo varapradam. śrāddhaṃ tatra tadākṣayyaṃ dattvā svarge ca modate .. 15.46 .. ### [2.15.48](https://indike.org/pramana/in.purana.vayu.2.15.48) śrāddhaṃ kumbhe vimucyanti jñeyaṃ pāpaniṣūdanam. śrāddhaṃ tatrākṣayaṃ proktaṃ japyahomatapāṃsi ca .. 15.47 .. ### [2.15.49](https://indike.org/pramana/in.purana.vayu.2.15.49) ajhatuṅge śubhe tīrthe tarpayetsatataṃ pitṝn. dṛśyate parvasu cchāyā yatra nityaṃ divaukasām. pṛthivyāmakṣayaṃ dattaṃ nirujā yatra pāṇḍavāḥ .. 15.48 .. ### [2.15.50](https://indike.org/pramana/in.purana.vayu.2.15.50) yogeśvaraiḥ sadā juṣṭaṃ sarvapāpabahiṣkṛtaiḥ. dadyācchrāddhantu yastasmistasya vakṣyāmi yatphalam .. 15.49 .. ### [2.15.51](https://indike.org/pramana/in.purana.vayu.2.15.51) arcitāstena vai sākṣādbhavanti pitaraḥ sadā. asmim̐lloke vaśī yaḥ syātpretya svarge sa modate .. 15.50 .. ### [2.15.52](https://indike.org/pramana/in.purana.vayu.2.15.52) prāyaśaḥ pravaraḥ puṇyaḥ śivo nāma hradastathā. tatra vyāsasaraḥ puṇyaṃ divyaṃ brahmasarastathā .. 15.51 .. ### [2.15.53](https://indike.org/pramana/in.purana.vayu.2.15.53) ujjantaḥ parvataḥ puṇyo vasiṣṭhasya mahātmanaḥ. ṛgyajuḥsāmaśirasaḥ kāpotaḥ puṣpasāhvayaḥ. ākhyātaḥ pañcamo vedaḥ sṛṣṭvā hyeteṣu brahmaṇā .. 15.52 .. ### [2.15.54](https://indike.org/pramana/in.purana.vayu.2.15.54) gatvaitān mucyate pāpāddvijo vahniḥ sanātanaḥ .. ### [2.15.55](https://indike.org/pramana/in.purana.vayu.2.15.55) śrāddhañcānantyameteṣu japya homatapāṃsi ca .. 15.53 .. ### [2.15.56](https://indike.org/pramana/in.purana.vayu.2.15.56) puṇḍarīke mahātīrthe puṇḍarīkasamaṃ phalam. brahmatīrthe mahātīrthe aśvamedhaphalaṃ labhet .. 15.54 .. ### [2.15.57](https://indike.org/pramana/in.purana.vayu.2.15.57) sindhusāgarasambhede tadā pañcanade'kṣayam . kīrakātmā tataḥ puṇyo maṇḍavāyāṃ ca parvate .. 15.55 .. ### [2.15.58](https://indike.org/pramana/in.purana.vayu.2.15.58) deyaṃ saptahrade śrāddhaṃ mānase ca viśeṣataḥ. mahākūṭe ca vande ca girau trirau trikakude tathā .. 15.56 .. ### [2.15.59](https://indike.org/pramana/in.purana.vayu.2.15.59) sandhyāyāṃ ca mahāvedyāṃ dṛśyate mahadadbhutam. aśraddadhānānnābhyeti sābhyeti ca dhṛtavratān .. 15.57 .. ### [2.15.60](https://indike.org/pramana/in.purana.vayu.2.15.60) jātavedaḥ śilā tatra sākṣādagneḥ sanātanī. śrāddhāni cāgnikāryaṃ ca tatra kuryāt sadākṣayam .. 15.58 .. ### [2.15.61](https://indike.org/pramana/in.purana.vayu.2.15.61) saṃśrayitvaikamekena sāyāhnaṃ prati nityaśaḥ. tasmindeyaṃ sadā śrāddhaṃ pitṝṇāmakṣayārthinā .. 15.59 .. ### [2.15.62](https://indike.org/pramana/in.purana.vayu.2.15.62) kṛtātmā vā'kṛtātmā vā yatra vijñāyate naraḥ. svargyamārgapradaṃ nāma tīrthaṃ sadyo varapradam. vairāṇyutsṛjya tasmistu divaṃ saptarṣayo gatāḥ .. 15.60 .. ### [2.15.63](https://indike.org/pramana/in.purana.vayu.2.15.63) adyāpi tāni dṛśyante vairāṇyeva gatāni tu. snātvā svargamavāpnoti tasmistīrthottame naraḥ .. 15.61 .. ### [2.15.64](https://indike.org/pramana/in.purana.vayu.2.15.64) khyātamāyatanaṃ tatra nandisiddha niṣevitam. nandīśvarasya yā mūrttirdurājārairna dṛśyate .. 15.62 .. ### [2.15.65](https://indike.org/pramana/in.purana.vayu.2.15.65) dṛśyante kāñcanā yūpāḥ sañciṣye bhāskarodaye. kṛtvā pradakṣiṇaṃ te tu gacchantyantarhitā divam .. 15.63 .. ### [2.15.66](https://indike.org/pramana/in.purana.vayu.2.15.66) sarvataśca kurukṣetraṃ sutīrthañca viśeṣataḥ. puṇyaṃ sanatkumārasya yogeśasya mahātmanaḥ. kīrttyate ca tilāndattvā pitṝṇāṃ vai sadā'kṣayam .. 15.64 .. ### [2.15.67](https://indike.org/pramana/in.purana.vayu.2.15.67) ojase cākṣayaṃ śrāddhaṃ dharmarājaniveśane. śrāddhaṃ dattamamāvasyāṃ vidhinā ca yathākramam .. 15.65 .. ### [2.15.68](https://indike.org/pramana/in.purana.vayu.2.15.68) punaḥ sannihitānāṃ vai kurukṣetre viśeṣataḥ. arcayedvā pitṝṃstatra satputrastvanṛṇo bhavet .. 15.66 .. ### [2.15.69](https://indike.org/pramana/in.purana.vayu.2.15.69) vinaśane sarasvatyāṃ plakṣapraśravaṇe tathā. vyāsatīrthe sarasvatyāṃ brahmakṣetre viśeṣataḥ .. 15.67 .. ### [2.15.70](https://indike.org/pramana/in.purana.vayu.2.15.70) deyamoṅkārapaṭhanaiḥ śrāddhamakṣayamicchatā. sarvataścaiva gaṅgyāṃ maināke ca nagottame .. 15.68 .. ### [2.15.71](https://indike.org/pramana/in.purana.vayu.2.15.71) yamunāprabhave caiva sarvapāpaiḥ pramucyate . atyuṣṇāścātiśītāśca āpastatra nidarśanam .. 15.69 .. ### [2.15.72](https://indike.org/pramana/in.purana.vayu.2.15.72) yamasya bhaginī puṇyā mārttaṇḍaduhitā tathā. tatrākṣayaṃ tadā śrāddhaṃ pitṛbhiḥ pūrvakīrttitam .. 15.70 .. ### [2.15.73](https://indike.org/pramana/in.purana.vayu.2.15.73) brahmānugahrade snātvā sadyo bhavati brāhmaṇaḥ. tasmin hi śrāddhamānantyaṃ japahomatapāṃsi ca .. 15.71 .. ### [2.15.74](https://indike.org/pramana/in.purana.vayu.2.15.74) sthāṇubhūtaścaraṃstatra vasiṣṭho vai mahātapāḥ. adyāpi yatra dṛśyante pādapā maṇicarccitāḥ .. 15.72 .. ### [2.15.75](https://indike.org/pramana/in.purana.vayu.2.15.75) tulā tu dṛśyate yatra dharmādharmapradarśinī. yayā vai tulitaṃ vipraistīrthānāṃ phalamuttamam .. 15.73 .. ### [2.15.76](https://indike.org/pramana/in.purana.vayu.2.15.76) pitṝṇāṃ duhitā yogā gandhakālīti viśrutā. caturtho brahmaṇaścāṃśaḥ parāśarakulodvahaḥ .. 15.74 .. ### [2.15.77](https://indike.org/pramana/in.purana.vayu.2.15.77) vyasya tvekaṃ caturddhā tu vedaṃ dhīmān mahāmuniḥ. mahāyogaṃ mahātmānaṃ yo vyāsaṃ janayiṣyati .. 15.75 .. ### [2.15.78](https://indike.org/pramana/in.purana.vayu.2.15.78) acchodakaṃ nāma saro yatrācchodā samucchritā . matsyayonau punarjātā niyogādvāraṇena tu .. 15.76 .. ### [2.15.79](https://indike.org/pramana/in.purana.vayu.2.15.79) tasyā yatrāśramaḥ puṇyaḥ puṇyakṛdbhirniṣevitaḥ. sakṛddattaṃ tu vai śrāddhamakṣayaṃ samudāhṛtam. tasyāṃ yoga samādhāne dattaṃ yugapadudbhavet .. 15.77 .. ### [2.15.80](https://indike.org/pramana/in.purana.vayu.2.15.80) kuberatuṅge vyāmocce vyāsatīrthe tathaiva ca. puṇyaḥ sa brāhmaṇo dadyāchrāddhamānantyamakṣayam .. 15.78 .. ### [2.15.81](https://indike.org/pramana/in.purana.vayu.2.15.81) siddhaistu sevitā nityaṃ dṛśyate nākṛtātmabhiḥ. anivarttanaṃ tu nandāyāṃ vedyāṃ prāguttare diśi .. 15.79 .. ### [2.15.82](https://indike.org/pramana/in.purana.vayu.2.15.82) siddhakṣetraṃ tu vai juṣṭaṃ yatprāpya na nivarttate. mahālaye padaṃ nyastaṃ mahādevena dhīmatā .. 15.80 .. ### [2.15.83](https://indike.org/pramana/in.purana.vayu.2.15.83) devyālaye tapastaptvā ekapādena īśvaraḥ. nīhāraśca yugaṃ divyamumātuṅge sthitaṃ jalam .. 15.81 .. ### [2.15.84](https://indike.org/pramana/in.purana.vayu.2.15.84) umā tuṅge bhṛgostuṅge brahmatuṅge mahālaye. kādravatyāṃ ca śāṇḍilyāṃ guhāyāṃ vāmanasya ca .. 15.82 .. ### [2.15.85](https://indike.org/pramana/in.purana.vayu.2.15.85) gatvā caitāni pūtaḥ syācchrāddhamakṣayameva ca. japo homastathā dhyānaṃ yatkicitsukṛtaṃ bhavet .. 15.83 .. ### [2.15.86](https://indike.org/pramana/in.purana.vayu.2.15.86) brahmacaryaṃ yajante vai gurubhaktāḥ śataṃ samāḥ . evamādīni sadyastāṃ snātvā prāpnoti satphalm .. 15.84 .. ### [2.15.87](https://indike.org/pramana/in.purana.vayu.2.15.87) kumāradhārā tatraiva dṛṣṭā pāpapraṇāśanī. yānāsanaṃ ca tatraiva sadyaḥ syādyat pradṛśyate .. 15.85 .. ### [2.15.88](https://indike.org/pramana/in.purana.vayu.2.15.88) śailakīrttipurābhyāśe kāmānāpnoti puṣkalān. adṛśyaḥ sarvabhūtānāṃ devavaccarate mahīm .. 15.85 .. ### [2.15.89](https://indike.org/pramana/in.purana.vayu.2.15.89) kāśyapasya mahātīrthaṃ kālasarpiriti śrutam. tatra śrāddhāni deyāni nityamakṣayamicchatā .. 15.86 .. ### [2.15.90](https://indike.org/pramana/in.purana.vayu.2.15.90) kāśyapasya mahātīrthaṃ kālasarpiriti śrutam. tatra śrāddhāni deyāni nityamakṣayamicchatā .. 15.87 .. ### [2.15.91](https://indike.org/pramana/in.purana.vayu.2.15.91) akṣayaṃ tu bhavecchrāddhaṃ śālagrāmasamantataḥ. dṛṣṭyā na dṛśyate tatra pratyakṣamakṛtātmanā .. 15.88 .. ### [2.15.92](https://indike.org/pramana/in.purana.vayu.2.15.92) pratyādeśo hyaśiṣṭānāṃ śiṣṭānāṃ ca niveśanam . tatra caiva hrade puṇye divyo vai nāgarāḍ yataḥ .. 15.89 .. ### [2.15.93](https://indike.org/pramana/in.purana.vayu.2.15.93) piṇḍaṃ gṛhṇāti hisatāṃ na gṛhṇātyasatāṃ hi saḥ. atipradīptairbhujagairbhoktumannaṃ na śakyate .. 15.90 .. ### [2.15.94](https://indike.org/pramana/in.purana.vayu.2.15.94) pratyakṣaṃ dṛśyate dharmastīrthayoranayordvayoḥ. devadāruvane cāpi cārayestaṃ nidarśanam .. 15.91 .. ### [2.15.95](https://indike.org/pramana/in.purana.vayu.2.15.95) vidhūtāni tu pāpāni dṛśyante sukṛtātmanā . bhāgīrathyāṃ prayāge ca nityamakṣayyamucyate .. 15.92 .. ### [2.15.96](https://indike.org/pramana/in.purana.vayu.2.15.96) kālañjare daśārṇāyāṃ naimiṣe kurujāṅgale. vārāṇasyāṃ nagaryāṃ tu deyaṃ śrāddhaṃ tu yatnataḥ .. 15.93 .. ### [2.15.97](https://indike.org/pramana/in.purana.vayu.2.15.97) tasyāṃ yogeśvaro nityaṃ tattasyāṃ dattamakṣayam. dattvā caiteṣu pūtaḥ syācchrāddhamānantyameva ca .. 15.94 .. ### [2.15.98](https://indike.org/pramana/in.purana.vayu.2.15.98) tapo homastathā dhyānaṃ yat kiñcitsukṛtaṃ bhavet. lauhitye vaitaraṇyāṃ vai svarṇavedyāṃ tathaiva ca .. 15.95 .. ### [2.15.99](https://indike.org/pramana/in.purana.vayu.2.15.99) sakṛdeva samudrānte dṛśyate puṇyakarmabhiḥ. gayāyāṃ dharmapṛṣṭhe ca sarasi brahmaṇastathā .. 15.96 .. ### [2.15.100](https://indike.org/pramana/in.purana.vayu.2.15.100) gayāyāṃ gṛdhrakūṭe ca śrāddhaṃ dattaṃ mahāphalam. himañca patate tatra samantāt pañcayojanam .. 15.97 .. ### [2.15.101](https://indike.org/pramana/in.purana.vayu.2.15.101) bharatasyāśrame puṇye'raṇyaṃ puṇyatamaṃ smṛtam . mataṅgasya padaṃ tatra dṛśyate māṃsa cakṣuṣā .. 15.98 .. ### [2.15.102](https://indike.org/pramana/in.purana.vayu.2.15.102) khyāpitaṃ dharmmasarvvasvaṃ lokasyāsya nidarśanam. evaṃ pañcavanaṃ puṇyaṃ puṇyakṛdbhirniṣevitam. yasminpāṇḍuviśāleti tīrthaṃ sadyo nidarśanam .. 15.99 .. ### [2.15.103](https://indike.org/pramana/in.purana.vayu.2.15.103) tulāmānaistathā cāpaiḥ śāstraiśca vividhaistathā. unmajjanti tathā lagne ye vai pāpakṛto janāḥ .. 15.100 .. ### [2.15.104](https://indike.org/pramana/in.purana.vayu.2.15.104) tṛtīyāyāṃ tathā pāde niḥsvare pāvamaṇḍale. mahāhrade vai kauśikyāṃ dattaṃ śrāddhaṃ mahāphalam .. 15.101 .. ### [2.15.105](https://indike.org/pramana/in.purana.vayu.2.15.105) muṇḍapṛṣṭhe padaṃ nyastaṃ mahādevena dhīmatā. bahūndaveyugāṃstaptvā tapastīvraṃ suduścaram .. 15.102 .. ### [2.15.106](https://indike.org/pramana/in.purana.vayu.2.15.106) alpenāpyatra kālena naro dharmmaparāyaṇaḥ. pāpmānamutsṛjatyāśu jīrṇatvacamivoragaḥ .. 15.103 .. ### [2.15.107](https://indike.org/pramana/in.purana.vayu.2.15.107) siddhānāṃ prītijananaiḥ pāpā nāñca bhayaṅkaraiḥ. lelihānairmahābhogai rakṣitantu divāniśam .. 15.104 .. ### [2.15.108](https://indike.org/pramana/in.purana.vayu.2.15.108) nāmnā kanakanandīti tīrthaṃ trailokyaviśrutam. udīcyāṃ muṇḍapṛṣṭhasya devarṣi gaṇasevitam. tatra srātvā divaṃ yānti kāmacārā vihaṅgamāḥ .. 15.105 .. ### [2.15.109](https://indike.org/pramana/in.purana.vayu.2.15.109) dattaṃ cāpi tathā śrāddhamakṣayaṃ samudāhṛtam. ṛṇaistribhistadā snātvā nikṣiṇoti narottamaḥ .. 15.106 .. ### [2.15.110](https://indike.org/pramana/in.purana.vayu.2.15.110) tīre tu sarasastatra devasyāyatanaṃ mahat. āruhya tajjapaṃstatra siddho yāti divaṃ tataḥ .. 15.107 .. ### [2.15.111](https://indike.org/pramana/in.purana.vayu.2.15.111) uttaraṃ mānasaṃ gatvā siddhiṃ prāpnotyanuttamām . tatra gatvā puraśreṣṭhaṃ dṛśyate mahadadbhutam .. 15.108 .. ### [2.15.112](https://indike.org/pramana/in.purana.vayu.2.15.112) tasminnirvarttayecchrāddhaṃ yathāśakti yathābalam. kāmān sa labhate divyān mokṣopāyaṃ ca nityaśaḥ .. 15.109 .. ### [2.15.113](https://indike.org/pramana/in.purana.vayu.2.15.113) mānase sarasi śreṣṭhe dṛśyate mahadadbhutam. divaścyutā mahābhāgā hyantarikṣe virājate .. 15.110 .. ### [2.15.114](https://indike.org/pramana/in.purana.vayu.2.15.114) gaṅgā tripathagā devī somapādāccyutā bhuvi. ākāśe dṛśyate tatra toraṇaṃ sūryyasannibham .. 15.111 .. ### [2.15.115](https://indike.org/pramana/in.purana.vayu.2.15.115) jāmbūnadamayaṃ divyaṃ svargadvāramivāyatam. yataḥ pravarttate bhūyaḥ pūrvvasāgaramantimam .. 15.112 .. ### [2.15.116](https://indike.org/pramana/in.purana.vayu.2.15.116) pāvanī sarvvabhūtānāṃ dharmajñānāṃ viśeṣataḥ. candrabhāgā ca sindhuśca ubhau mānasasannibhau. sāgaraṃ paścimaṃ yāti divyasindhurnadīvaraḥ .. 15.113 .. ### [2.15.117](https://indike.org/pramana/in.purana.vayu.2.15.117) parvvato himavānnāma nānādhātuvibhūṣitaḥ. yojanānāṃ sahasrāṇi āyato'śītirucyate .. 15.114 .. ### [2.15.118](https://indike.org/pramana/in.purana.vayu.2.15.118) siddhacāraṇasaṅkīrṇaḥ siddhacāraṇasevitaḥ. tatra puṣkariṇī ramyā suṣumnā nāma viśrutā .. 15.115 .. ### [2.15.119](https://indike.org/pramana/in.purana.vayu.2.15.119) daśavarṣasahasrāṇi tatra jātastu jīvati. śrāddhaṃ bhavati cānantyaṃ tasyāṃ dattaṃ mahodayam. tārayecca yadā śrāddhaṃ daśapūrvvāndaśāparān .. 15.116 .. ### [2.15.120](https://indike.org/pramana/in.purana.vayu.2.15.120) sarvvaṃ puṇyaṃ himavato gaṅgā puṇyā ca sarvvataḥ. samudragāḥ samudrāśca sarvve puṇyāḥ samantataḥ .. 15.117 .. ### [2.15.121](https://indike.org/pramana/in.purana.vayu.2.15.121) evamādiṣu sarvveṣu śrāddhaṃ nirvarttayedbudhaḥ . pūto bhavati snātvā nu dattvā dattvā tathaiva ca .. 15.118 .. ### [2.15.122](https://indike.org/pramana/in.purana.vayu.2.15.122) śailasānuṣu tuṅgeṣu kandareṣu guhāsu ca. upahvaranitambeṣu tathā prasravaṇeṣu ca .. 15.119 .. ### [2.15.123](https://indike.org/pramana/in.purana.vayu.2.15.123) pulineṣvāpagānāṃ ca tathaiva prabhave yuge. mahodadhau gavāṃ goṣṭhe saṅgameṣu vaneṣu ca .. 15.120 .. ### [2.15.124](https://indike.org/pramana/in.purana.vayu.2.15.124) asaṃsṛṣṭopaliptāsu hṛdyāsu surabhīṣu ca. gomayenopalipteṣu vivikteṣu gṛheṣu ca .. 15.121 .. ### [2.15.125](https://indike.org/pramana/in.purana.vayu.2.15.125) kuryyācchrāddhamathaiteṣu nityameva yathāvidhi. pradakṣiṇaṃ diśaṃ gatvā sarvvakāmacikīrṣavaḥ .. 15.122 .. ### [2.15.126](https://indike.org/pramana/in.purana.vayu.2.15.126) evameteṣu sarvveṣu śrāddhaṃ kuryyādatandritaḥ. evameva tu medhāvī brāhmīṃ siddhimavāpnuyāt .. 15.123 .. ### [2.15.127](https://indike.org/pramana/in.purana.vayu.2.15.127) traivarṇye vihite sthāne dharmmavarṇāśrame tathā. kopasthānasya saṃtyāgātprāpyate pitṛpūjanam .. 15.124 .. ### [2.15.128](https://indike.org/pramana/in.purana.vayu.2.15.128) tīrthānyanusaran dhīraḥ śraddadhāno jitendriyaḥ. kṛtapāpaśca śuddhyeta kiṃ punaḥ śubhakarmmakṛt .. 15.125 .. ### [2.15.129](https://indike.org/pramana/in.purana.vayu.2.15.129) tiryagyoniṃ na gacchecca kudeśe na ca jāyate. svargī bhavati vai vipro mokṣopāyaṃ ca vindati .. 15.126 .. ### [2.15.130](https://indike.org/pramana/in.purana.vayu.2.15.130) aśraddadhānāḥ pāpmāno nāstikāḥ sthitasaṃśayāḥ. hetudraṣṭā ca pañcaite na tīrthaphalamaśrnute .. 15.127 .. ### [2.15.131](https://indike.org/pramana/in.purana.vayu.2.15.131) gurutīrthe parā siddhistīrthānāṃ paramaṃ padam . dhyānaṃ tīrthaparaṃ tasmādbrahmatīrthaṃ sanātanam .. 15.128 .. ### [2.15.132](https://indike.org/pramana/in.purana.vayu.2.15.132) upavāsātparaṃ dhyānamindriyāṇāṃ nivarttanam. upavāsanibaddhā hi prāṇairiha punaḥ punaḥ .. 15.129 .. ### [2.15.133](https://indike.org/pramana/in.purana.vayu.2.15.133) prāṇāpānau samau kṛtvā viṣayāṇīndriyāṇi ca . buddhiṃ manasi saṃyamya sarvveṣāṃ tu nivarttanam .. 15.130 .. ### [2.15.134](https://indike.org/pramana/in.purana.vayu.2.15.134) pratyāhāraṃ punarviddhi mokṣopāyamasaṃśayam. indriyāṇāṃ mano ghoraṃ buddhyādīnāṃ pravarttanam .. 15.131 .. ### [2.15.135](https://indike.org/pramana/in.purana.vayu.2.15.135) anāhārātkṣayaṃ yāti vidyādanaśanaṃ tapaḥ. nigrahādbuddhimanaso ramyā buddhistu jāyate .. 15.132 .. ### [2.15.136](https://indike.org/pramana/in.purana.vayu.2.15.136) kṣīṇeṣu sarvvapāpeṣu kṣīṇeṣvevendriyeṣu ca. parinirvāti śuddhātmā yathā vahnirnirindhanaḥ .. 15.133 .. ### [2.15.137](https://indike.org/pramana/in.purana.vayu.2.15.137) kāraṇebhyo guṇebhyo'tha vyaktāvyaktasya kṛtsnaśaḥ. viyojayati kṣetrajñaṃ tebhyo yogena yogavit .. 15.134 .. ### [2.15.138](https://indike.org/pramana/in.purana.vayu.2.15.138) tasya nāsti gatisthānaṃ vyaktāvyaktaṃ na saṃśayaḥ. āsannaḥ sadasannaiva naiva kiñcit sthita iti .. 15.135 .. ### [2.15.139](https://indike.org/pramana/in.purana.vayu.2.15.139) iti śrīmahāpurāṇe vāyuprokte śrāddhakalpe tīrthayātrā nāma pañcadaśo'dhyāyaḥ .. 15 .. \* ## Linked texts (5) - [Brahmāṇḍapurāṇa](https://indike.org/pramana/in.purana.brahmanda.2.13.1) — Vyāsa, Sanskrit - [Kūrmapurāṇa](https://indike.org/pramana/in.purana.kurma.2.36.32) — Vyāsa, Sanskrit - [Varāhapurāṇa](https://indike.org/pramana/in.purana.varaha.151.90) — Vyāsa, Sanskrit - [Smṛticandrikā](https://indike.org/pramana/in.niti.dharma.nibandha.mahanibandha.smrticandrika.79.p29) — Devaṇṇabhaṭṭa, Sanskrit - [Vratakhaṇḍa](https://indike.org/pramana/in.niti.dharma.vrata.vratakhanda.112.p1.21) — Hemādri, Sanskrit --- Source: [https://indike.org/pramana/in.purana.vayu.2.15](https://indike.org/pramana/in.purana.vayu.2.15) · Pramāṇa