[Pramāṇa](https://indike.org/pramana/) › [Indian literature](https://indike.org/pramana/in) › [Purāṇas](https://indike.org/pramana/in.purana) › [Vayupurana](https://indike.org/pramana/in.purana.vayu) › 2.16 # Vayupurana 2.16: adhyāyaḥ 16 Vāyupurāṇa 2.16 - **Language:** Sanskrit ### adhyāyaḥ 16 ### [2.16.1](https://indike.org/pramana/in.purana.vayu.2.16.1) ..bṛhaspatiruvāca.. ### [2.16.2](https://indike.org/pramana/in.purana.vayu.2.16.2) ataḥ paraṃ pravakṣyāmi dānāni ca phalāni ca. śrāddhakarmmāṇi medhyāni varjanīyāni yāni ca .. 16.1 .. ### [2.16.3](https://indike.org/pramana/in.purana.vayu.2.16.3) himaprapatane kuryyādāharedvā himantataḥ. agnihotramataḥ puṇyaṃ paramaṃ hi tataḥ smṛtam .. 16.2 .. ### [2.16.4](https://indike.org/pramana/in.purana.vayu.2.16.4) naktantu varjayecchrāddhaṃ rāhoranyatra darśanāt. sarvvasvenāpi karttavyaṃ kṣipraṃ vai rāhudarśane .. 16.3 .. ### [2.16.5](https://indike.org/pramana/in.purana.vayu.2.16.5) uparāge na kuryyādyaḥ paṅke gauriva sīdati. kurvāṇastūddharetpāpānmagnānnauriva sāgare .. 16.4 .. ### [2.16.6](https://indike.org/pramana/in.purana.vayu.2.16.6) viśvadevañca saumyañca bahumāṃsaparaṃ haviḥ . viṣāṇaṃ varjayetkhāḍgamasūyānāśanāya vai .. 16.5 .. ### [2.16.7](https://indike.org/pramana/in.purana.vayu.2.16.7) tvaṣṭā vai vāryyamāṇastu deveśena mahātmanā. pibañchacīpateḥ somaṃ pṛthivyāmapatatpurā .. 16.6 .. ### [2.16.8](https://indike.org/pramana/in.purana.vayu.2.16.8) śyāmākāstu tathotpannāḥ pitrarthamapi pūjitāḥ. vipruṣastasya nāsābhyāmasaktābhyāṃ tathaiva ca .. 16.7 .. ### [2.16.9](https://indike.org/pramana/in.purana.vayu.2.16.9) śleṣmāṇaḥ śītalā hṛdyā madhurāśca tathekṣavaḥ. śyāmākairikṣubhiścaiva pitṝṇāṃ sārvvakāmikam. kuryyādāgrayaṇaṃ yastu sa śīghraṃ siddhimāpnuyāt .. 16.8 .. ### [2.16.10](https://indike.org/pramana/in.purana.vayu.2.16.10) śyāmākā hastināmā ca paṭolaṃ bṛhatīphalam. agastyasya śikhā tīvrā kaṣāyāḥ sarvva eva ca .. 16.9 .. ### [2.16.11](https://indike.org/pramana/in.purana.vayu.2.16.11) evamātīni cānyāni svādūni madhurāṇi ca . nāgaraṃ cātra vai deyaṃ dīrghamūlakameva ca .. 16.10 .. ### [2.16.12](https://indike.org/pramana/in.purana.vayu.2.16.12) vaṃśīkarīrāḥ surasāḥ sarjjakaṃ bhūstṛṇāni ca. varjanīyāni vakṣyāmi śrāddhakarmmaṇi nityaśaḥ .. 16.11 .. ### [2.16.13](https://indike.org/pramana/in.purana.vayu.2.16.13) laśunaṃ gṛñjanañcaiva palāṇḍuḥ piṇḍamūlakam. karambhādyāni cānyāni hīnāni rasagandhataḥ .. 16.12 .. ### [2.16.14](https://indike.org/pramana/in.purana.vayu.2.16.14) śrāddhakarmmaṇi varjyāni kāraṇañcātra vakṣyate. purā devāsure yuddhe nirjitasya baleḥ suraiḥ .. 16.13 .. ### [2.16.15](https://indike.org/pramana/in.purana.vayu.2.16.15) vraṇebhyo visphuranto vai patitā raktabindavaḥ. tata etāni varjyāni śrāddhakarmmaṇi nityaśaḥ .. 16.14 .. ### [2.16.16](https://indike.org/pramana/in.purana.vayu.2.16.16) atha vedoktaniryāsān lavaṇānyūṣaraṇāni ca. śrāddha karmmaṇi varjyāni yāśca nāryo rajasvalāḥ .. 16.15 .. ### [2.16.17](https://indike.org/pramana/in.purana.vayu.2.16.17) durgandhaṃ phenilaṃ caiva tathā vai palvalodakam. na labhedyatra gaustṛptiṃ naktaṃ yaccaiva gṛhyate .. 16.16 .. ### [2.16.18](https://indike.org/pramana/in.purana.vayu.2.16.18) āvikaṃ mārgamauṣṭraṃ ca sarvvamekaśaphaṃ ca yat. māhiṣañcāmarañcaiva payo varjyaṃ vijānatā .. 16.17 .. ### [2.16.19](https://indike.org/pramana/in.purana.vayu.2.16.19) ataḥ paraṃ pravakṣyāmi varjyān deśān prayatnataḥ. na draṣṭavyaṃ ca yaiḥ śrāddhaṃ śaucāśaucaṃ ca kṛtsnaśaḥ .. 16.18 .. ### [2.16.20](https://indike.org/pramana/in.purana.vayu.2.16.20) vanyamūlaphalāhāraiḥ śrāddhaṃ kuryyāttu śraddhayā. rāṣṭramiṣṭamavāpnoti svargaṃ mokṣaṃ yaśaskaram .. 16.19 .. ### [2.16.21](https://indike.org/pramana/in.purana.vayu.2.16.21) aniṣṭa śabdasaṅkīrṇaṃ jantuvyāptamathāpi vā. pūtigandhāṃ tathā bhūmiṃ śrāddhakarmmaṇi varjayet .. 16.20 .. ### [2.16.22](https://indike.org/pramana/in.purana.vayu.2.16.22) nadyaḥ sāgaraparyyantā dvāraṃ dakṣiṇapūrvvataḥ . triśaṅkuṃ varjayed deśaṃ sarvvaṃ dvādaśayojanam .. 16.21 .. ### [2.16.23](https://indike.org/pramana/in.purana.vayu.2.16.23) uttareṇa mahānadyā dakṣiṇena ca kaikaṭāt. deśastraiśaṅkavo nāma varjitaḥ śrāddhakarmmaṇi .. 16.22 .. ### [2.16.24](https://indike.org/pramana/in.purana.vayu.2.16.24) kāraṅkarāḥ kaliṅgāśca sindhoruttarameva ca. pranaṣṭāśramadharmmāśca varjyā deśāḥ prayatnataḥ .. 16.23 .. ### [2.16.25](https://indike.org/pramana/in.purana.vayu.2.16.25) nagnādayo na paśyeyuḥ śrāddhameva vyayasthitam. gacchanti taistairdṛṣṭāni na pitṝnna pitāmahān .. 16.24 .. ### [2.16.26](https://indike.org/pramana/in.purana.vayu.2.16.26) ..śaṃyuruvāca.. ### [2.16.27](https://indike.org/pramana/in.purana.vayu.2.16.27) nagnādīn bhagavan samyaṅmamādya paripṛcchataḥ. kathaya dvijamukhyāgra vistareṇa yathātatham .. 16.25 .. ### [2.16.28](https://indike.org/pramana/in.purana.vayu.2.16.28) evamukto mahātejā bṛhaspatiruvāca tam. sarveṣāmeva bhūtānāṃ trayīsaṃvaraṇaṃ smṛtam .. 16.26 .. ### [2.16.29](https://indike.org/pramana/in.purana.vayu.2.16.29) parityajati yo mohātte vai nagnā dvijottamāḥ. pralīyate naro yaḥ syānnirālambaśca yo vṛṣaḥ .. 16.27 .. ### [2.16.30](https://indike.org/pramana/in.purana.vayu.2.16.30) vṛṣaṃ yaśca parityajya mokṣamanyatra mārgati . vṛṣo vedasamastasmin yo vai samyaṅna paśyati .. 16.28 .. ### [2.16.31](https://indike.org/pramana/in.purana.vayu.2.16.31) brāhmaṇāḥ kṣatriyā vaiśyā vṛṣalāścaiva sarvvaśaḥ. purā devāsure yuddhe nirjitairasuraistadā .. 16.29 .. ### [2.16.32](https://indike.org/pramana/in.purana.vayu.2.16.32) pāṣaṇḍavaikṛtasthāne naiṣā sṛṣṭiḥ svayambhuvā. dviśrāddhakaśca nirgranthāḥ śākyā puṣṭikalaṃśakāḥ .. 16.30 .. ### [2.16.33](https://indike.org/pramana/in.purana.vayu.2.16.33) ye dharmmaṃ nānuvarttante te vai nagnādayo janāḥ. vṛthājaṭī vṛthāmudrī vṛthānagnaśca yo dvijaḥ .. 16.31 .. ### [2.16.34](https://indike.org/pramana/in.purana.vayu.2.16.34) vṛthāvratī vṛthā jāpī te vai nagnādayo janāḥ. kulandhamā niṣādāśca tathā puṣṭivināśakāḥ .. 16.32 .. ### [2.16.35](https://indike.org/pramana/in.purana.vayu.2.16.35) kṛtakarmmākṣitāstvete kupathāḥ parikīrttitāḥ. ebhirnirvṛttaṃ dṛṣṭaṃ vā śrāddhaṃ gacchanti mānavāḥ .. 16.33 .. ### [2.16.36](https://indike.org/pramana/in.purana.vayu.2.16.36) brahmaghnaśca kṛtaghnaśca nāstikā gurutalpagāḥ. dasyavaśca nṛśaṃsāśca darśanenaiva varjitāḥ .. 16.34 .. ### [2.16.37](https://indike.org/pramana/in.purana.vayu.2.16.37) ye cānye pāpa karmmāṇaḥ sarvvāṃstān parivarjayet. devadevarṣinindāyāṃ ratāṃścaiva viśeṣataḥ .. 16.35 .. ### [2.16.38](https://indike.org/pramana/in.purana.vayu.2.16.38) asurān yātudhānāṃśca dṛṣṭamebhirvrajantyuta. brāhmaṃ kṛtayugaṃ proktaṃ tretā tu kṣatriyaṃ smṛtam .. 16.36 .. ### [2.16.39](https://indike.org/pramana/in.purana.vayu.2.16.39) vaiśyaṃ dvāparamityāhuḥ śūdraṃ kaliyugaṃ smṛtam .. ### [2.16.40](https://indike.org/pramana/in.purana.vayu.2.16.40) ..pitara ūcuḥ .. ### [2.16.41](https://indike.org/pramana/in.purana.vayu.2.16.41) vedāḥ kṛtayuge pūjyāstretāyāṃ tu surāstathā .. 16.37 .. ### [2.16.42](https://indike.org/pramana/in.purana.vayu.2.16.42) yuddhāni dvāpare nityaṃ pāṣaṇḍāśca kalau yuge. apamānāpavitraśca kukkuṭo grāmasūkaraḥ .. 16.38 .. ### [2.16.43](https://indike.org/pramana/in.purana.vayu.2.16.43) śvā caiva darśanādeva hanti śrāddhaṃ na saṃśayaḥ. śāvasūtakasaṃspṛṣṭo dīrgharogibhireva ca .. 16.39 .. ### [2.16.44](https://indike.org/pramana/in.purana.vayu.2.16.44) malinaiḥ patitaiścaiva na draṣṭavyaṃ kathañcana. annaṃ paśyeyurete vai naitatsyāddhavyakavyayoḥ .. 16.40 .. ### [2.16.45](https://indike.org/pramana/in.purana.vayu.2.16.45) tatsaṃspṛṣṭaṃ pradhānārthaṃ saṃskāraśvāpado bhavet. haviṣāṃ saṃhatānāṃ tu pūrvvameva vivarjitam. mṛtsaṃyuktābhiradbhiśca prokṣaṇaṃ ca vidhīyate .. 16.41 .. ### [2.16.46](https://indike.org/pramana/in.purana.vayu.2.16.46) siddhārthakaiḥ kṛṣṇatilaiḥ kāryyaṃ vāpyavakīraṇam. gurusūryyāgnivastūnāṃ darśanaṃ vāpi yatnataḥ .. 16.42 .. ### [2.16.47](https://indike.org/pramana/in.purana.vayu.2.16.47) āsanārūḍhamāneṣu pādopahatameva ca. amedhyairjaṅgamairdṛṣṭaṃ śuṣkaṃ paryuṣitaṃ ca yat .. 16.43 .. ### [2.16.48](https://indike.org/pramana/in.purana.vayu.2.16.48) asitaṃ pariduṣṭaṃ ca tathaivāgrāvalehitam. śarkarākeśapāṣāṇaiḥ kīṭairyaccāpyupadrutam .. 16.44 .. ### [2.16.49](https://indike.org/pramana/in.purana.vayu.2.16.49) piṇyākamathitaṃ caiva tathā tilayavādiṣu. siddhākṣatāśca ye bhakṣyāḥ pratyakṣalavaṇīkṛtāḥ .. 16.45 .. ### [2.16.50](https://indike.org/pramana/in.purana.vayu.2.16.50) vāsasā cāvadhūtāni varjyāni śrāddhakarmaṇi. santi vedavirodhena kecidvijñānamāninaḥ .. 16.46 .. ### [2.16.51](https://indike.org/pramana/in.purana.vayu.2.16.51) ajajñapatayo nāma te śrāddhasya yathā rajaḥ. dadhi śākaṃ tathā'bhakṣyāḥ śuktaṃ caiva vivarjitam .. 16.47 .. ### [2.16.52](https://indike.org/pramana/in.purana.vayu.2.16.52) vārtākuṃ varjayeddadyātsarvānabhiṣavānapi. saindhavaṃ lavaṇaṃ yacca tathā mānasasambhavam .. 16.48 .. ### [2.16.53](https://indike.org/pramana/in.purana.vayu.2.16.53) pavitraṃ paramaṃ hyetat pratyakṣamapi varttate. agnau nikṣipya badhnīyāddhastau prakṣipya yatnataḥ .. 16.49 .. ### [2.16.54](https://indike.org/pramana/in.purana.vayu.2.16.54) gamayenmastakaṃ caiva brahmatīrthaṃ hi tatsmṛtam. dravyāṇāṃ prokṣaṇaṃ kāryyaṃ tathaivāvapanaṃ punaḥ .. 16.50 .. ### [2.16.55](https://indike.org/pramana/in.purana.vayu.2.16.55) nidhāya cādbhiḥ siñceta tathaivāpsu niveśanam. ariṣṭatumule bilvaṃ tviṅgudaśvadanānyapi .. 16.51 .. ### [2.16.56](https://indike.org/pramana/in.purana.vayu.2.16.56) vidalānāñca sarvveṣāṃ dharmavacchaucamiṣyate. tathā dantāsthidārūṇāṃ śrṛṅgāṇāñcāvalekhanam .. 16.52 .. ### [2.16.57](https://indike.org/pramana/in.purana.vayu.2.16.57) sarveṣāṃ mṛnmayānāntu punardāha udāhṛtaḥ. maṇivajrapravālānāṃ muktāśaṅkhamaṇestathā .. 16.53 .. ### [2.16.58](https://indike.org/pramana/in.purana.vayu.2.16.58) siddhārthakānāṃ kalkena tilakalkena vā punaḥ . syācchaucaṃ sarvavālānāmāvikānāñca sarvaśaḥ .. 16.54 .. ### [2.16.59](https://indike.org/pramana/in.purana.vayu.2.16.59) āvi kānāñca sarvveṣāṃ mṛdbhiradbhirvidhīyate. ādyantayostu śaucānāmadbhiḥ prakṣālanaṃ punaḥ .. 16.55 .. ### [2.16.60](https://indike.org/pramana/in.purana.vayu.2.16.60) tathā kārppāsikānāñca bhasmanā samudāhṛtam. phalapuṣpa śalākānāṃ plāvanañcādbhiriṣyate .. 16.56 .. ### [2.16.61](https://indike.org/pramana/in.purana.vayu.2.16.61) saṃmārjanaṃ prokṣaṇañca bhūmeścaivopalepanam. niṣkramya bāhyato grāmādvāyupūtā vasundharā .. 16.57 .. ### [2.16.62](https://indike.org/pramana/in.purana.vayu.2.16.62) dhanuṣmatpakṣiṇāñcaiva mṛdbhiḥ śaucaṃ vidhīyate. evameṣa samuddiṣṭaḥ śaucānāṃ vidhiruttamaḥ. ataḥ paraṃ pravakṣyāmi tanme nigadataḥ śrṛṇu .. 16.58 .. ### [2.16.63](https://indike.org/pramana/in.purana.vayu.2.16.63) prātargṛhātpaścimadakṣiṇena iṣukṣepañcākṣamātraṃ padañca. kuryyātpurīṣaṃ śirovaguṇṭhya na ca spṛśettatra śiraḥ kareṇa .. 16.59 .. ### [2.16.64](https://indike.org/pramana/in.purana.vayu.2.16.64) śuṣkaistṛṇairvā kāṣṭhairvā patrairveṇudalena vā. mṛṇmayairbhājanairvāpi tirodhāya vasundharām .. 16.60 .. ### [2.16.65](https://indike.org/pramana/in.purana.vayu.2.16.65) uddhṛtodakamādāya mṛttikāñcaiva vāgyataḥ. divā udaṅmukhaḥ kuryyādrātrau vai dakṣiṇāmukhaḥ .. 16.61 .. ### [2.16.66](https://indike.org/pramana/in.purana.vayu.2.16.66) dakṣiṇena ca hastena gṛhṇīyādvai kamaṇḍalum. śaucañca vāmahastena gude tisrastu mṛttikāḥ .. 16.62 .. ### [2.16.67](https://indike.org/pramana/in.purana.vayu.2.16.67) daśa cāpi punardadyādvāmahastakrameṇa tu . dvābhyāṃ vāpi punardadyāddhastānāṃ pañca mṛttikāḥ .. 16.63 .. ### [2.16.68](https://indike.org/pramana/in.purana.vayu.2.16.68) mṛdā prakṣālya pādau ca ācamya ca yathāvidhi. āpastyājyāstrayaścaiva sūryyāgnipavanāmbhasām .. 16.64 .. ### [2.16.69](https://indike.org/pramana/in.purana.vayu.2.16.69) kuryyāt sannihitaṃ nityaṃ prājñastīrthe kamaṇḍalum. asatkāryaṃ kāryametairyathāvatpādadhāvanam .. 16.65 .. ### [2.16.70](https://indike.org/pramana/in.purana.vayu.2.16.70) ācamanaṃ dvitīyena devakāryaṃ tataḥ param. upavāsa strirātrantu duṣṭahaste hyudāhṛtaḥ .. 16.66 .. ### [2.16.71](https://indike.org/pramana/in.purana.vayu.2.16.71) viprakṛṣṭena kṛcchreṇa prāyaścittamudāhṛtam. spṛṣṭvā śvānaṃ śvapākaṃ vā taptakṛcchraṃ samācaret .. 16.67 .. ### [2.16.72](https://indike.org/pramana/in.purana.vayu.2.16.72) mānuṣāsthīni saṃspṛśya upoṣyaṃ śuddhikāraṇam . trirātramuktaṃ sasnehamekarātramato'nyathā .. 16.68 .. ### [2.16.73](https://indike.org/pramana/in.purana.vayu.2.16.73) kāraskarāḥ pulindāśca tathāndhaśabarādaya. pītvā cāpobhūtilaye gatvā caiva yugandharām .. 16.69 .. ### [2.16.74](https://indike.org/pramana/in.purana.vayu.2.16.74) sindhoruttaraparyyantaṃ tathā divyantare śatam. pāpadeśāśca ye kecitpāparadhyuṣitā janaiḥ .. 16.70 .. ### [2.16.75](https://indike.org/pramana/in.purana.vayu.2.16.75) śiṣṭaiśca varjitā ye ca brāhmaṇairvedapāragaiḥ. gatvā deśānapuṇyāṃstu kṛtsnaṃ pāpaṃ samaśnute .. 16.71 .. ### [2.16.76](https://indike.org/pramana/in.purana.vayu.2.16.76) manovyaktirathāgniśca kāle caivopalepanam. vikhyāpanañca śaucānāṃ nityamajñānameva ca .. 16.72 .. ### [2.16.77](https://indike.org/pramana/in.purana.vayu.2.16.77) atonyathā tu yaḥ kuryyānmohācchaucasya saṅkaram. piśācān yātudhānāṃśca phalaṃ gacchatyasaṃśayam .. 16.73 .. ### [2.16.78](https://indike.org/pramana/in.purana.vayu.2.16.78) śaucamaśraddadhānaśca mlecchajātiṣu jāyate. ayajñāścaiva pāpo vā tiryyagyonigato'pi vā .. 16.74 .. ### [2.16.79](https://indike.org/pramana/in.purana.vayu.2.16.79) śaucena mokṣaṃ kurvāṇaḥ svargavāsī bhavennaraḥ. śucikāmā hi devā vai devairetadudāhṛtam .. 16.75 .. ### [2.16.80](https://indike.org/pramana/in.purana.vayu.2.16.80) bībhatsamaśuciñcaiva varjayanti surāḥ sadā. trīṇi śaucāni kurvanti nyāyataḥ śubhakarmaṇaḥ .. 16.76 .. ### [2.16.81](https://indike.org/pramana/in.purana.vayu.2.16.81) brahmaṇyāyātitheyāya śaucayuktāya dhīmate. pitṛbhaktāya dāntāya sānukrośāya ca dvijāḥ .. 16.77 .. ### [2.16.82](https://indike.org/pramana/in.purana.vayu.2.16.82) taistaiḥ prītāḥ prayacchanti pitaro yogavarddhanāḥ. manasā kāṃkṣitān kāmāṃstrailokyaprabhavāniti .. 16.78 .. ### [2.16.83](https://indike.org/pramana/in.purana.vayu.2.16.83) iti śrīmahāpurāṇe vāyuprokte śrāddhakalpo nāma ṣoḍaśo'dhyāyaḥ .. 16 .. \* ## Linked texts (7) - [Brahmāṇḍapurāṇa](https://indike.org/pramana/in.purana.brahmanda.2.14.1) — Vyāsa, Sanskrit - [Vaiṣṇava Dharmaśāstra](https://indike.org/pramana/in.niti.dharma.visnu.23.42) — Viṣṇu, Sanskrit - [Gadādharapaddhati](https://indike.org/pramana/in.niti.dharma.nibandha.mahanibandha.gadadharapaddhati.21.p96) — Gadādhara Rājaguru 1725, Sanskrit - [Kālasāra](https://indike.org/pramana/in.astro.muhurta.kala.kalasara.18.p93) — Nārāyaṇa Jyotirvit, Sanskrit - [Kālasāra](https://indike.org/pramana/in.niti.dharma.kala.kalasara.18.p93) — Gadādhara (Pāraskara commentator), Sanskrit - [Śrāddhadīpa](https://indike.org/pramana/in.niti.dharma.sraddha.sraddhadipa.8.443) — Divyasiṃha Mahāpātra 1640, Sanskrit - [Śūdrācāraśiromaṇi](https://indike.org/pramana/in.niti.dharma.acara.sudradharma.sudracarasiromani.4.p57) — Kṛṣṇaśeṣa 1520, Sanskrit --- Source: [https://indike.org/pramana/in.purana.vayu.2.16](https://indike.org/pramana/in.purana.vayu.2.16) · Pramāṇa