[Pramāṇa](https://indike.org/pramana/) › [Indian literature](https://indike.org/pramana/in) › [Purāṇas](https://indike.org/pramana/in.purana) › [Vayupurana](https://indike.org/pramana/in.purana.vayu) › 2.17 # Vayupurana 2.17: adhyāyaḥ 17 Vāyupurāṇa 2.17 - **Language:** Sanskrit ### adhyāyaḥ 17 ### [2.17.1](https://indike.org/pramana/in.purana.vayu.2.17.1) ..ṛṣaya ūcuḥ.. ### [2.17.2](https://indike.org/pramana/in.purana.vayu.2.17.2) aho dhīmaṃstvayā sūta śrāddhakalpastu kīrtitaḥ. śruto naḥ śrāddhakalpo vai ṛṣibhiḥ parikīrtitaḥ .. 17.1 .. ### [2.17.3](https://indike.org/pramana/in.purana.vayu.2.17.3) atīva vistaro yasya viśeṣeṇa prakīrtitaḥ. vada śeṣaṃ mahāprājña ṛṣestasya yathāmatam .. 17.2 .. ### [2.17.4](https://indike.org/pramana/in.purana.vayu.2.17.4) ..sūta uvāca.. ### [2.17.5](https://indike.org/pramana/in.purana.vayu.2.17.5) kīrtayiṣyāmi te viprā ṛṣestasya matantu tat. śrāddhaṃ prati mahābhāgāstanme śrṛṇuta vistarāt .. 17.3 .. ### [2.17.6](https://indike.org/pramana/in.purana.vayu.2.17.6) uktaṃ śrāddhaṃ mayā pūrvaṃ vidhiśca śrāddhakarmmaṇi. pariśiṣṭaṃ pravakṣyāmi brāhmaṇānāṃ yathākramam .. 17.4 .. ### [2.17.7](https://indike.org/pramana/in.purana.vayu.2.17.7) na mīmāṃsyāḥ sadā viprāḥ pavitraṃ hyetaduttamam. daive pitrye ca satataṃ śrūyate vai parīkṣaṇam .. 17.5 .. ### [2.17.8](https://indike.org/pramana/in.purana.vayu.2.17.8) yasmin doṣāḥ pradṛśyeran sadbhirvā varjitastu yaḥ. jānīyādvāpi saṃvāsādvarjjayettaṃ prayatnataḥ .. 17.6 .. ### [2.17.9](https://indike.org/pramana/in.purana.vayu.2.17.9) avijñātaṃ dvijaṃ śrāddhe parīkṣeta sadā budhaḥ . siddhā hi viprarūpeṇa caranti pṛthivīmimām .. 17.7 .. ### [2.17.10](https://indike.org/pramana/in.purana.vayu.2.17.10) tasmādatithimāyāntamabhigacchet kṛtāñjaliḥ. pūjayeccāpi pādyena pādābhyañjanabhojanaiḥ .. 17.8 .. ### [2.17.11](https://indike.org/pramana/in.purana.vayu.2.17.11) urvīṃ sāgaraparyantāṃ devā yogeśvarāstathā. nānā rūpaiścarantyete prajā dharmmeṇa pālayan .. 17.9 .. ### [2.17.12](https://indike.org/pramana/in.purana.vayu.2.17.12) arcayitvā tato dadyādviprāyātithaye naraḥ. vyañjanāni ca bhakṣyāṇi phalaṃ teṣāṃ tathaiva ca .. 17.10 .. ### [2.17.13](https://indike.org/pramana/in.purana.vayu.2.17.13) āgniṣṭomaṃ tu payasā prāpnuyādvai tathāśrutam. sarpiṣā tu śubhaṃ cakṣuḥ ṣoḍaśāhaphalaṃ labhet. madhunā tvatirātrasya phalaṃ ca samavāpnuyāt .. 17.11 .. ### [2.17.14](https://indike.org/pramana/in.purana.vayu.2.17.14) tatprāpnuyācchraddadhāno naro vai sarvaiḥ kāmairbhojayedyastu viprān. sarvārthadaḥ sarvaviprātithau yaḥ phalaṃ bhuṅkte sarvamedhasya nityam .. 17.12 .. ### [2.17.15](https://indike.org/pramana/in.purana.vayu.2.17.15) yastu śrāddhe'tithiṃ prāpya daive vāpyavamanyate. taṃ vai devā viśvayanti hotā yadvat parāṃ vasum .. 17.13 .. ### [2.17.16](https://indike.org/pramana/in.purana.vayu.2.17.16) devāśca pitaraścaiva vahniścaiva hi tān dvijān . āviśya bhuñjate tadvai lokānugrahakāraṇāt .. 17.14 .. ### [2.17.17](https://indike.org/pramana/in.purana.vayu.2.17.17) apūjitā dahantyete dadyuḥ kāmāṃśca pūjitāḥ. sarvasvenāpi tasmādvai pūjayedatithīn sadā .. 17.15 .. ### [2.17.18](https://indike.org/pramana/in.purana.vayu.2.17.18) vānaprastho gṛhasthaśca gṛhamabhyāgato'thavā. bālāḥ khinnā yatiścaiva jānīyādatithīn sadā .. 17.16 .. ### [2.17.19](https://indike.org/pramana/in.purana.vayu.2.17.19) abhyāgato yācakaḥ syādatithiḥ syādayācakaḥ. atitheratithiḥ śreṣṭhaḥ so'tithiryoga ucyate .. 17.17 .. ### [2.17.20](https://indike.org/pramana/in.purana.vayu.2.17.20) na ghoro nāpi saṅkīrṇo nāvidyo na viśeṣavit. na ca santo na samṛddho na sevī nācaro'tithiḥ .. 17.18 .. ### [2.17.21](https://indike.org/pramana/in.purana.vayu.2.17.21) pipāsitāya śrāntāya bhrāntāyātibubhukṣate. tasmai satkṛtya dātavyaṃ yajñasya phalamicchatā .. 17.19 .. ### [2.17.22](https://indike.org/pramana/in.purana.vayu.2.17.22) āruhya bhṛgutuṅgoṣu gatvā puṇyāṃ sarasvatīm. āpagāṃ tu nadī puṇyāṃ gaṅgā devī mahānadī .. 17.20 .. ### [2.17.23](https://indike.org/pramana/in.purana.vayu.2.17.23) himavatprabhavā nadyo yāścānyā ṛṣipūjitāḥ . sarastīrthābhisaṃvedyā nadī navavahāstathā .. 17.21 .. ### [2.17.24](https://indike.org/pramana/in.purana.vayu.2.17.24) gatvaitān mucyate pāpaiḥ svarge nityaṃ mahīyate. daśarātramaśaucantu proktaṃ vai mṛtasūtake .. 17.22 .. ### [2.17.25](https://indike.org/pramana/in.purana.vayu.2.17.25) brāhmaṇasya viśeṣeṇa kṣatriye dvādaśa smṛtam. arddhaṃ māsantu vaiśyasya māsācchūdrastu śudhyati .. 17.23 .. ### [2.17.26](https://indike.org/pramana/in.purana.vayu.2.17.26) udakyā sarvavarṇānāṃ trirātreṇa tu śuddhayati. udakyāṃ sūtikāñcaiva śvānamantyāvasāyinam .. 17.24 .. ### [2.17.27](https://indike.org/pramana/in.purana.vayu.2.17.27) nagnādīn mṛtahārāṃśca spṛṣṭvā'śaucaṃ vidhīyate. snātvā sacailo mṛdbhistu dvādaśabhistu śudhyati .. 17.25 .. ### [2.17.28](https://indike.org/pramana/in.purana.vayu.2.17.28) etadeva bhavecchaucaṃ maithune navabhistathā. mṛdā prakṣālya hastau tu kuryācchaucavidhinnaraḥ .. 17.26 .. ### [2.17.29](https://indike.org/pramana/in.purana.vayu.2.17.29) prakṣālya cādbhirhastau ca snātvā caiva mṛdā punaḥ. mṛdaṃ guhye tato dvistu punareva mṛdaṃ budhaḥ .. 17.27 .. ### [2.17.30](https://indike.org/pramana/in.purana.vayu.2.17.30) evaṃ śauca vidhirdṛṣṭaḥ sarvavarṇeṣu nityadā. paridadyānmṛdastisro hastapādāvasecanam .. 17.28 .. ### [2.17.31](https://indike.org/pramana/in.purana.vayu.2.17.31) āraṇyaṃ śaucametattu grāmyaṃ vakṣyāmyataḥ param. mṛdastisraḥ pādayostu hastayostisra eva ca .. 17.29 .. ### [2.17.32](https://indike.org/pramana/in.purana.vayu.2.17.32) mṛdaḥ pañcadaśāmedhye hastādīnāṃ vibhāgaśaḥ. anirṇikte mṛdaṃ dadyānmṛdante tvadbhireva tu .. 17.30 .. ### [2.17.33](https://indike.org/pramana/in.purana.vayu.2.17.33) kaṇṭhaṃ śiro vā prāvṛtya rathyā pādagatastu vā. akṛtvā pādayoḥ śaucamācānto'pyaśucirbhavet .. 17.31 .. ### [2.17.34](https://indike.org/pramana/in.purana.vayu.2.17.34) prakṣālya pātraṃ niḥkṣipya ācamyābhyukṣaṇaṃ punaḥ. dravyasyānyasya tu tathā kuryādabhyukṣaṇaṃ punaḥ .. 17.32 .. ### [2.17.35](https://indike.org/pramana/in.purana.vayu.2.17.35) puṣpādīnāṃ tṛṇānāñca prokṣaṇaṃ haviṣāntathā. parāhṛtānāṃ dravyāṇāṃ nidhāyābhyukṣaṇaṃ tathā .. 17.33 .. ### [2.17.36](https://indike.org/pramana/in.purana.vayu.2.17.36) prokṣitantu haret kiñci cchrāddhe daiva tathā punaḥ. uttareṇa haredvedyāṃ dakṣiṇena visarjayet .. 17.34 .. ### [2.17.37](https://indike.org/pramana/in.purana.vayu.2.17.37) vicchinnaṃ syādviparyāse daive pitrye tathaiva ca. dakṣiṇena tu hastena dakṣiṇāṃ vedimālikhet .. 17.35 .. ### [2.17.38](https://indike.org/pramana/in.purana.vayu.2.17.38) karābhyāmeva devānāṃ pitṝṇāṃ vikaraṃ śubham. kṣubhitasvapnayoścaiva tathā mūtrapurīṣayoḥ .. 17.36 .. ### [2.17.39](https://indike.org/pramana/in.purana.vayu.2.17.39) niṣṭhīvite yathā vyakte bhuktvā viparidhāya ca. ucchiṣṭasya ca saṃsparśe tathā pādāvasecane .. 17.37 .. ### [2.17.40](https://indike.org/pramana/in.purana.vayu.2.17.40) utsṛṣṭasya sumambhāṣe hyaśuciṃ prayatasya ca. sandeheṣu ca sarveṣu śikhāṃ muktvā tathaiva ca .. 17.38 .. ### [2.17.41](https://indike.org/pramana/in.purana.vayu.2.17.41) vinā yajñopavītena mohāttu yadyupaspṛṣet. auṣṭhasya dantasaṃsparśe darśane cāntyavāsinām .. 17.39 .. ### [2.17.42](https://indike.org/pramana/in.purana.vayu.2.17.42) jiṅvayā caiva saṃspṛśya dantāsaktaṃ tathaiva ca. saśabdamaṅgulībhiśca praṇataścāvalo kayan .. 17.40 .. ### [2.17.43](https://indike.org/pramana/in.purana.vayu.2.17.43) yaścādharme sthito mohādāyānto'pyaśucirbhavet. upaviśya śucau deśe praṇataḥ prāgudaṅmukhaḥ .. 17.41 .. ### [2.17.44](https://indike.org/pramana/in.purana.vayu.2.17.44) pādau prakṣālya hastau tu antarjānurupa spṛśet. prasannāstriḥ pibeccāpaḥ prayataḥ susamāhitaḥ .. 17.42 .. ### [2.17.45](https://indike.org/pramana/in.purana.vayu.2.17.45) dvireva mārjanaṃ kuryātsakṛdabhyukṣaṇaṃ tataḥ. khāni mūrddhānamātmānaṃ hastau pādau tathaiva ca .. 17.43 .. ### [2.17.46](https://indike.org/pramana/in.purana.vayu.2.17.46) abhyukṣaṇaṃ tathā tasya yadyamīmāṃsitaṃ bhavet. evamācamanaṃ tasya vedā yajñāstapāṃsi ca .. 17.44 .. ### [2.17.47](https://indike.org/pramana/in.purana.vayu.2.17.47) dānāni brahmacaryañca bhavanti saphalāstathā. kriyāṃ yaḥ kurute mohādanācamyaiva nāstikaḥ .. 17.45 .. ### [2.17.48](https://indike.org/pramana/in.purana.vayu.2.17.48) bhavanti ca vṛthā tasya kriyā hyetā na saṃśayaḥ. vāgbhāvaśuddhanirṇiktamaduṣṭaṃ vāpyaninditam .. 17.46 .. ### [2.17.49](https://indike.org/pramana/in.purana.vayu.2.17.49) medhyānyetāni jñeyāni duṣṭamebhyo viparyayaḥ. na vaktavyaḥ sadā vipraḥ kṣudhito nāsti kiñcana .. 17.47 .. ### [2.17.50](https://indike.org/pramana/in.purana.vayu.2.17.50) tasmai satkṛtya yo dadyādayūpo yajña ucyate. apluṣṭānnaṃ śrṛtānnantu kṛśavṛttimayācakam .. 17.48 .. ### [2.17.51](https://indike.org/pramana/in.purana.vayu.2.17.51) ekāntaśīlaṃ hrīmantaṃ sadā śrāddheṣu bhojayet . yo dadātyāntimabhyeśca sa brahmaghno durātmavān .. 17.49 .. ### [2.17.52](https://indike.org/pramana/in.purana.vayu.2.17.52) api jātiśataṃ gatvā na sa mucyeta kilbiṣāt. viṣamaṃ bhojayedviprānekapaṃktyā ca yo naraḥ .. 17.50 .. ### [2.17.53](https://indike.org/pramana/in.purana.vayu.2.17.53) niyukto vā'niyukto vā paṃkt‌yā harati duṣkṛtam. pāpena gṛhyate kṣipramiṣṭāpūrttaṃ ca naśyati .. 17.51 .. ### [2.17.54](https://indike.org/pramana/in.purana.vayu.2.17.54) yatistu sarvvaviprāṇāṃ sarvveṣāmagrya utsave. itihāsapañcamān vedān yaḥ paṭhettu dvijottamaḥ .. 17.52 .. ### [2.17.55](https://indike.org/pramana/in.purana.vayu.2.17.55) anantaraṃ yathāyogyaṃ niyoktavyo vijānatā. trivedo'nantarastasya dvivedastadanantaraḥ .. 17.53 .. ### [2.17.56](https://indike.org/pramana/in.purana.vayu.2.17.56) ekavedastathā paścānnyāyādhyāyī tataḥ param. pāvanāyaiva paṃktyā vai tān pravakṣye nibodhata .. 17.54 .. ### [2.17.57](https://indike.org/pramana/in.purana.vayu.2.17.57) ya ete pūrvvanirddiṣṭāḥ sarvve te hyanupūrvvaśaḥ. ṣaḍaṅgī vinayī yogī sarvvatantrastathaiva ca .. 17.55 .. ### [2.17.58](https://indike.org/pramana/in.purana.vayu.2.17.58) yāyāvaraśca pañcaite vijñeyāḥ paṅktipāvanāḥ . aṣṭādaśānāṃ vidyānāmekasmin pārago'pi yaḥ .. 17.56 .. ### [2.17.59](https://indike.org/pramana/in.purana.vayu.2.17.59) yathāvadvarttamānaśca sarve te paṅktipāvanāḥ. triṇāciketāstraividyo yaśca dharmmān paṭheddvijaḥ .. 17.57 .. ### [2.17.60](https://indike.org/pramana/in.purana.vayu.2.17.60) bārhaspatye tathā śāstre pāraṃ yaśca dvijo gataḥ. sarva te pāvanā viprāḥ paṅktīnāṃ samudāhṛtāḥ .. 17.58 .. ### [2.17.61](https://indike.org/pramana/in.purana.vayu.2.17.61) āmantritastu yaḥ śrāddhe yoṣitaṃ sevate dvijaḥ. pitarastasya taṃ māsaṃ tasya retasi śerate .. 17.59 .. ### [2.17.62](https://indike.org/pramana/in.purana.vayu.2.17.62) śrāddhaṃ dattvā ca bhuktvā ca maithunaṃ yo niṣevate. pitarastasya taṃ māsaṃ retaḥsthā nātra saṃśayaḥ .. 17.60 .. ### [2.17.63](https://indike.org/pramana/in.purana.vayu.2.17.63) tasmādatithaye deyaṃ bhojayedbrahmacāriṇam. dhyānaniṣṭhāya dātavyaṃ sānukrośāya dhārmikam .. 17.61 .. ### [2.17.64](https://indike.org/pramana/in.purana.vayu.2.17.64) yatiṃ vā vālakhilyān vā bhojayecchrāddhakarmmaṇi. vānaprasthopakurvvāṇaḥ pūjāmātreṇa toṣitaḥ .. 17.62 .. ### [2.17.65](https://indike.org/pramana/in.purana.vayu.2.17.65) gṛhasthaṃ bhojayedyastu viśvedevāstu pūjitāḥ. vānaprasthena ṛṣayo vālakhilyaiḥ purandaraḥ .. 17.63 .. ### [2.17.66](https://indike.org/pramana/in.purana.vayu.2.17.66) yatīnāṃ pūjane cāpi sākṣādbrahmā tu pūjitaḥ. āśramāḥ pāvanāḥ pañca upadhābhiranāśramāḥ .. 17.64 .. ### [2.17.67](https://indike.org/pramana/in.purana.vayu.2.17.67) catvāra āśramāḥ pūjyāḥ śrāddhe daive tathaiva ca. caturāśramabāhyebhyaḥ śrāddhaṃ naiva pradāpayet .. 17.65 .. ### [2.17.68](https://indike.org/pramana/in.purana.vayu.2.17.68) sa tiṣṭhedvā bubhukṣustu caturāśramabāhyataḥ. ayati rmokṣavādī ca ubhau tau paṅktidūṣakau .. 17.66 .. ### [2.17.69](https://indike.org/pramana/in.purana.vayu.2.17.69) vṛthāmuṇḍāśca jaṭilāḥ sarve kārppaṭikāstathā. nirghṛṇān bhinnavṛttāṃśca sarvabhakṣān vivarjayet .. 17.67 .. ### [2.17.70](https://indike.org/pramana/in.purana.vayu.2.17.70) kārukādīnanācārān sarvavedabahiṣkṛtān. gāyanān devavṛttāṃśca havyakavyeṣu varjayet .. 17.68 .. ### [2.17.71](https://indike.org/pramana/in.purana.vayu.2.17.71) dvijeṣvapi kṛtaṃ nityaṃ śrāddhakarmmaṇi varjayet .. 17.69 .. ### [2.17.72](https://indike.org/pramana/in.purana.vayu.2.17.72) eteṣu varttate yaśca kṛtsvavarṇaṃ sa gacchati. yo'śnāti saha śūdreṇa sarve te paṅktidūṣakāḥ .. 17.70 .. ### [2.17.73](https://indike.org/pramana/in.purana.vayu.2.17.73) vyāpādanaṃ śaktinibarhaṇaṃ kṛṣirvāṇijyakāryyaṃ paśupālanaṃ ca. śuśrūṣaṇaṃ vāpyaguro raho vā kāryyaṃ naitadvidyate brāhmaṇasya .. 17.71 .. ### [2.17.74](https://indike.org/pramana/in.purana.vayu.2.17.74) ye tu viprāḥ sthitā nityaṃ jñānino dhyāninastathā. mithyāsaṅkalpinaḥ sarve durvṛttā vā dvijātayaḥ .. 17.72 .. ### [2.17.75](https://indike.org/pramana/in.purana.vayu.2.17.75) mithyātattvavido varjjyāstathā dambhaviṣūcakāḥ. upapātakasaṃyuktāḥ pātakaiśca viśeṣataḥ .. 17.73 .. ### [2.17.76](https://indike.org/pramana/in.purana.vayu.2.17.76) vede niyogadātāro lobhamohaphalārthinaḥ. brahmavikrayiṇaścaiva śrāddhakarmmaṇi varjitāḥ .. 17.74 .. ### [2.17.77](https://indike.org/pramana/in.purana.vayu.2.17.77) na niyogo'sti vedānāṃ yo niyuṅkte sa pāpakṛt. bhoktā vedaphalādbhraśyeddātā dānaphalāttathā .. 17.75 .. ### [2.17.78](https://indike.org/pramana/in.purana.vayu.2.17.78) bhṛto'dhyāpayate yastu bhṛtakādhyāpitastu yaḥ . nārhatastāvapi śrāddhaṃ brahmaṇaḥ kriyavikrayī .. 17.76 .. ### [2.17.79](https://indike.org/pramana/in.purana.vayu.2.17.79) krayavikrayiṇau caiva jīvitārthaṃ vigarhitau. vṛttireṣā tu vaiśyasya brāhmaṇasya tu pātakam .. 17.77 .. ### [2.17.80](https://indike.org/pramana/in.purana.vayu.2.17.80) prāhurvedān vedavido vedān yaścopajīvati.. ### [2.17.81](https://indike.org/pramana/in.purana.vayu.2.17.81) ubhau tau nārhataḥ śrāddhaṃ putrikāpatireva ca .. 17.78 .. ### [2.17.82](https://indike.org/pramana/in.purana.vayu.2.17.82) vṛthā dārāṃśca yo gacchedyo yajeta vṛthādhvare. nārhatastāvapi śrāddhaṃ dvijo yaścaiva nāstikaḥ .. 17.79 .. ### [2.17.83](https://indike.org/pramana/in.purana.vayu.2.17.83) ātmārthaṃ yaḥ pacedannaṃ na devātithikārakaḥ. nārhatastāvapi śrāddhaṃ patitau brahmarākṣasau .. 17.80 .. ### [2.17.84](https://indike.org/pramana/in.purana.vayu.2.17.84) striyo naktaṃparā yeṣāṃ paradāraratāśca ye. arthakāma ratāścaiva na tān śrāddheṣu bhojayet .. 17.81 .. ### [2.17.85](https://indike.org/pramana/in.purana.vayu.2.17.85) varṇāśramāṇāṃ dharmmeṣu viruddhāḥ śrāddhakarmmaṇi. stenaśca sarvayājī ca sarve te paṅktidūṣakāḥ .. 17.82 .. ### [2.17.86](https://indike.org/pramana/in.purana.vayu.2.17.86) yaśca sūkaravadbhuṅkte yaśca pāṇitale dvijaḥ. na tadaśnanti pitaro yaśca vāmaṃ samaśnute .. 17.83 .. ### [2.17.87](https://indike.org/pramana/in.purana.vayu.2.17.87) strīśūdrāyānupetāya śrāddhocchiṣṭaṃ na dāpayet. yo dadyā drāgamohāttu na tadgacchetpitṝnsadā .. 17.84 .. ### [2.17.88](https://indike.org/pramana/in.purana.vayu.2.17.88) tasmānna deyamucchiṣṭamannādyaṃ śrāddhakarmmaṇi. anyatra dadhisarpirbhyāṃ śiṣye putrāya nānyathā .. 17.85 .. ### [2.17.89](https://indike.org/pramana/in.purana.vayu.2.17.89) anucchiṣṭantu dātavyamannādyaṃ vai viśeṣataḥ. puṣpamūlaphalairvāpi tuṣṭiṃ gacchanti cānnataḥ .. 17.86 .. ### [2.17.90](https://indike.org/pramana/in.purana.vayu.2.17.90) yāvantyannāni pūtāni yāvaduṣṇaṃ na muñcati. tāvadaśnanti pitaro yāvadaśnanti vāgyatāḥ .. 17.87 .. ### [2.17.91](https://indike.org/pramana/in.purana.vayu.2.17.91) dānaṃ pratigraho homo bhojanaṃ balireva ca. sāṅguṣṭhena tathā kāryyaṃ nāsurebhyo yathā bhavet .. 17.88 .. ### [2.17.92](https://indike.org/pramana/in.purana.vayu.2.17.92) etānyeva ca sarvvāṇi dānādīni viśeṣataḥ. antarjānvaviśeṣeṇa tadvadācamanaṃ bhavet .. 17.89 .. ### [2.17.93](https://indike.org/pramana/in.purana.vayu.2.17.93) muṇḍāñjaṭilakāṣāyān śrāddhakāle'pi varjjayet. śikhibhyo vā tridaṇiḍabhyaḥ śrāddhaṃ yatnāt pradāpayet .. 17.90 .. ### [2.17.94](https://indike.org/pramana/in.purana.vayu.2.17.94) ye tu vrate sthitā nityaṃ jñānino dhyāninastathā. devabhaktā mahātmānaḥ punīyurdarśanādapi .. 17.91 .. ### [2.17.95](https://indike.org/pramana/in.purana.vayu.2.17.95) sarvvaṃ yogeśvarairvyāptaṃ trailokyaṃ vai nirantaram . tasmāt paśyanti te sarve yatkiñcijjagatīgatam .. 17.92 .. ### [2.17.96](https://indike.org/pramana/in.purana.vayu.2.17.96) vyaktāvyaktaṃ vaśīkṛtya sarvvasyāpi ca yatparam. sadasacceti yairdṛṣṭaṃ sadasacca mahātmanām .. 17.93 .. ### [2.17.97](https://indike.org/pramana/in.purana.vayu.2.17.97) sarvvajñānāni dṛṣṭāni mokṣādīni mahātmanām. tasmātteṣu sadāsaktaḥ prāpnotyanuttamaṃ śubham .. 17.94 .. ### [2.17.98](https://indike.org/pramana/in.purana.vayu.2.17.98) ṛco hi yo veda sa veda vedān yajūṃṣi yo veda sa veda yajñam. sāmāni yo veda sa veda brahma yo mānasaṃ veda sa veda sarvvam .. 17.95 .. ### [2.17.99](https://indike.org/pramana/in.purana.vayu.2.17.99) iti śrīmahāpurāṇe vāyuprokte śrāddhakalpe brāhmaṇaparīkṣā nāma saptadaśo'dhyāyaḥ .. 17 .. \* ## Linked texts (3) - [Brahmāṇḍapurāṇa](https://indike.org/pramana/in.purana.brahmanda.2.15.3) — Vyāsa, Sanskrit - [Gṛhastharatnākara](https://indike.org/pramana/in.niti.dharma.acara.ahnika.grhastharatnakara.38.p14) — Caṇḍeśvara, Sanskrit - [Śrāddhacandrikā (Divākarabhaṭṭa)](https://indike.org/pramana/in.niti.dharma.sraddha.sraddhacandrika.2.p88) — Divākarabhaṭṭa 1655, Sanskrit --- Source: [https://indike.org/pramana/in.purana.vayu.2.17](https://indike.org/pramana/in.purana.vayu.2.17) · Pramāṇa