[Pramāṇa](https://indike.org/pramana/) › [Indian literature](https://indike.org/pramana/in) › [Purāṇas](https://indike.org/pramana/in.purana) › [Vayupurana](https://indike.org/pramana/in.purana.vayu) › 2.26 # Vayupurana 2.26: adhyāyaḥ 26 Vāyupurāṇa 2.26 - **Language:** Sanskrit ### adhyāyaḥ 26 ### [2.26.1](https://indike.org/pramana/in.purana.vayu.2.26.1) sūta uvāca.. ### [2.26.2](https://indike.org/pramana/in.purana.vayu.2.26.2) kakudminastu taṃ lokaṃ raivatasya gatasya ha. hatāḥ puṇyajanaiḥ sarvvā rākṣasaiḥ sā kuśasthalī .. 26.1 .. ### [2.26.3](https://indike.org/pramana/in.purana.vayu.2.26.3) tadvai bhrātṛśataṃ tasya dhārmmikasya mahātmanaḥ. nibadhyamānā rakṣobhirdiśaḥ saṃprādravan bhayāt .. 26.2 .. ### [2.26.4](https://indike.org/pramana/in.purana.vayu.2.26.4) teṣāntu te bhayākrāntāḥ kṣatriyāstatra tatra hi. anvavāyastu sumahān mahāṃstatra dvijottamāḥ .. 26.3 .. ### [2.26.5](https://indike.org/pramana/in.purana.vayu.2.26.5) prayatā iti vikhyātā dikṣu sarvvāsu dhārmmikāḥ. dhṛṣṭasya dhārṣṭakaṃ kṣatraṃ raṇadhṛṣṭaṃ babhūva ha .. 26.4 .. ### [2.26.6](https://indike.org/pramana/in.purana.vayu.2.26.6) trisāhasrantu sagaṇaṃ kṣatriyāṇāṃ mahātmanām. nabhagasya ca dāyādo nābhāgo nāma vīryyavān .. 26.5 .. ### [2.26.7](https://indike.org/pramana/in.purana.vayu.2.26.7) ambarīṣastu nābhāgirvirūpastasya cātmajaḥ. pṛṣadaśvo virūpasya tasya putro rathītaraḥ .. 26.6 .. ### [2.26.8](https://indike.org/pramana/in.purana.vayu.2.26.8) ete kṣatraprasūtā vai punaścāṅgirasaḥ smṛtāḥ . rathītarāṇāṃ pravarāḥ kṣātropetā dvijātayaḥ .. 26.7 .. ### [2.26.9](https://indike.org/pramana/in.purana.vayu.2.26.9) kṣuvatastu manoḥ pūrvvamikṣyākurabhiniḥsṛtaḥ . tasya putraśataṃ tvāsīdikṣvākorbhūridakṣiṇam .. 26.8 .. ### [2.26.10](https://indike.org/pramana/in.purana.vayu.2.26.10) teṣāṃ jyeṣṭho vikukṣiśca nemirdaṇḍaśca te trayaḥ. śakunipramukhāstasya putrāḥ paṃcāśatastu te .. 26.9 .. ### [2.26.11](https://indike.org/pramana/in.purana.vayu.2.26.11) uttarāpathadeśasya rakṣitāro mahīkṣitaḥ. catvāriṃśattathāṣṭau ca dakṣiṇasyāñca te diśi .. 26.10 .. ### [2.26.12](https://indike.org/pramana/in.purana.vayu.2.26.12) viṃśatipramukhāste tu dakṣiṇāpatharakṣiṇaḥ. ikṣvākustu vikukṣiṃ vai aṣṭakāyāmathādiśet .. 26.11 .. ### [2.26.13](https://indike.org/pramana/in.purana.vayu.2.26.13) rājovāca.. ### [2.26.14](https://indike.org/pramana/in.purana.vayu.2.26.14) māṃsamānaya śrāddheyaṃ mṛgān hatvā mahābala. śrāddhamadya nu kartavyamaṣṭakāyāṃ na saṃśayaḥ .. 26.12 .. ### [2.26.15](https://indike.org/pramana/in.purana.vayu.2.26.15) sa gatastu mṛgavyāṃ vai vacanāttasya dhīmataḥ. mṛgān sahasraśo hatvā pariśrāntaśca vīryyavān. bhakṣayacchaśakantatra vikukṣirmṛgayāṅgataḥ .. 26.13 .. ### [2.26.16](https://indike.org/pramana/in.purana.vayu.2.26.16) āgate sa vikukṣau tu samāṃse sahasainike. vasiṣṭhañcodayāmāsa māṃsaṃ prokṣayatāmiti .. 26.14 .. ### [2.26.17](https://indike.org/pramana/in.purana.vayu.2.26.17) tatheti codito rājñā vidhivatsamupasthitaḥ. sa dṛṣṭvopahataṃ māṃsaṃ kruddho rājānamabravīt .. 26.15 .. ### [2.26.18](https://indike.org/pramana/in.purana.vayu.2.26.18) śūdreṇopahataṃ māṃsaṃ putreṇa tava pārthiva. śaśabhakṣādabhojyaṃ vai tava māṃsaṃ mahādyute .. 26.16 .. ### [2.26.19](https://indike.org/pramana/in.purana.vayu.2.26.19) śaśo durātmanā pūrvamaraṇye bhakṣito'nagha. tena māṃsamidaṃ duṣṭaṃ pitṝṇāṃ nṛpasattama .. 26.17 .. ### [2.26.20](https://indike.org/pramana/in.purana.vayu.2.26.20) ikṣvākustu tataḥ kruddho vikukṣimidamabravīt. pitṛkarmmaṇi nirddiṣṭo mayā tvaṃ mṛgayāṅkataḥ. śaśaṃ bhakṣayase'raṇye nirghṛṇaḥ pūrvvamadya nu .. 26.18 .. ### [2.26.21](https://indike.org/pramana/in.purana.vayu.2.26.21) tasmātparityajāmi tvāṃ gaccha tvaṃ svena karmmaṇā. evamikṣvākunā tyakto vasiṣṭhavacanāt sutaḥ .. 26.19 .. ### [2.26.22](https://indike.org/pramana/in.purana.vayu.2.26.22) ikṣvākau saṃsthite tasmiñchaśī sa pṛthivīmimām . prāptaḥ paramadharmmātmā sa cāyodhyādhipo'bhavat .. 26.20 .. ### [2.26.23](https://indike.org/pramana/in.purana.vayu.2.26.23) tadākarotsa rājyaṃ vai vasiṣṭhaparinoditaḥ. tataḥ stenena sā pūrṇo rājyāvasthā mahīpateḥ .. 26.21 .. ### [2.26.24](https://indike.org/pramana/in.purana.vayu.2.26.24) kālena gatavāṃstatra sa ca nyūnatarāṅgatim. jñātvaivametadākhyānaṃ nā vidhirbhakṣayettu vai .. 26.22 .. ### [2.26.25](https://indike.org/pramana/in.purana.vayu.2.26.25) māṃ sabhakṣayitāmutra yasya māṃsamihājyaham. etanmāṃsasya māṃsatvaṃ pravadanti manīṣiṇaḥ .. 26.23 .. ### [2.26.26](https://indike.org/pramana/in.purana.vayu.2.26.26) śaśādasya tu dāyādaḥ kakutstho nāma vīryyavān. indrasya vṛṣabhūtasya kakutstho jāyate purā .. 26.24 .. ### [2.26.27](https://indike.org/pramana/in.purana.vayu.2.26.27) pūrvvamāḍībake yuddhe kakutsthastena sa smṛtaḥ . anenāstu kakutsthasya pṛthuromā ca sa smṛtaḥ .. 26.25 .. ### [2.26.28](https://indike.org/pramana/in.purana.vayu.2.26.28) vṛṣadaśvaḥ pṛthoḥ putrastasmādandhrastu vīryyavān . āndhrastu yavanāśvastu śrāvastastasya cātmajaḥ .. 26.26 .. ### [2.26.29](https://indike.org/pramana/in.purana.vayu.2.26.29) jajñe śrāvastako rājā śrāvastī yena nirmitā. śrāvastasya tu dāyādo bṛhadaśvo mahāyaśāḥ .. 26.27 .. ### [2.26.30](https://indike.org/pramana/in.purana.vayu.2.26.30) bṛhadaśvasutaścāpi kubalāśca iti śrutiḥ. yaḥ sa dhundhuvadhādrājā dhundhumāratvamāgataḥ .. 26.28 .. ### [2.26.31](https://indike.org/pramana/in.purana.vayu.2.26.31) ṛṣaya ūcuḥ .. ### [2.26.32](https://indike.org/pramana/in.purana.vayu.2.26.32) dhundhuvadhaṃ mahāprājña śrotumicchami vistarāt. yadarthaṃ kubalāśvaḥ sa dhundhumāratvamāgataḥ .. 26.29 .. ### [2.26.33](https://indike.org/pramana/in.purana.vayu.2.26.33) sūta uvāca.. ### [2.26.34](https://indike.org/pramana/in.purana.vayu.2.26.34) bṛhadaśvasya putrāṇāṃ sahasrāṇyekaviṃśatiḥ . sarve vidyāsu niṣṇātā balavanto durāsadāḥ .. 26.30 .. ### [2.26.35](https://indike.org/pramana/in.purana.vayu.2.26.35) babhūvurddhārmikāḥ sarve yajvāno bhūridakṣiṇāḥ. kubalāśvaṃ mahāvīryaṃ śūramuttamadhārmikam .. 26.31 .. ### [2.26.36](https://indike.org/pramana/in.purana.vayu.2.26.36) bṛhadaśvo'bhyaṣiñcattaṃ tasmin rāṣṭre narādhipaḥ. putrasaṃkrāmitaśrīstu vanaṃ rājā viveśa ha .. 26.32 .. ### [2.26.37](https://indike.org/pramana/in.purana.vayu.2.26.37) bṛhadaśvaṃ mahārājaṃ śūramuttamadhārmmikam . prayātaṃ tamuttaṅkastu brahmarṣiḥ pratyavārayat .. 26.33 .. ### [2.26.38](https://indike.org/pramana/in.purana.vayu.2.26.38) uttaṅka uvāca.. ### [2.26.39](https://indike.org/pramana/in.purana.vayu.2.26.39) bhavato rakṣaṇaṃ kāryyaṃ tattāvat kartumarhati. nirudvignastapaḥ kartuṃ na hi śaknomi pārthiva .. 26.34 .. ### [2.26.40](https://indike.org/pramana/in.purana.vayu.2.26.40) mamāśramasamīpeṣu sameṣu marudhanvasu. samudro vālukāpūrṇastatra tiṣṭhati bhūpate .. 26.35 .. ### [2.26.41](https://indike.org/pramana/in.purana.vayu.2.26.41) devatānāmavadhyastu mahākāyo mahābalaḥ. antarbhūmigatastatra vālukāntarhito mahān .. 26.36 .. ### [2.26.42](https://indike.org/pramana/in.purana.vayu.2.26.42) sa manostanayaḥ krūro dhundhurnāma sudāruṇaḥ. śataṃ lokavināśāya tapa āsthāya dāruṇam .. 26.37 .. ### [2.26.43](https://indike.org/pramana/in.purana.vayu.2.26.43) saṃvatsarasya paryyante sa niḥśvāsaṃ pramuñcati. yadā tadā mahī tatra calitā sma sakānanā .. 26.38 .. ### [2.26.44](https://indike.org/pramana/in.purana.vayu.2.26.44) tasya niḥśvāsavātena raja uddhūyate mahat. ādityapathamāvṛtya saptāhaṃ bhūmikampanam .. 26.39 .. ### [2.26.45](https://indike.org/pramana/in.purana.vayu.2.26.45) savisphuliṅgaṃ sajvālaṃ sadhūmamatidāruṇam . tena rājanna śaknomi tasmin sthātuṃ sva āśrame .. 26.40 .. ### [2.26.46](https://indike.org/pramana/in.purana.vayu.2.26.46) taṃ vāraya mahābāho lokānāṃ hitakāmyayā. tejaste sumahāviṣṇustejasāpyāyayiṣyati .. 26.41 .. ### [2.26.47](https://indike.org/pramana/in.purana.vayu.2.26.47) lokāḥ svasthā bhavantvadya tasmin vinihate'sure . tvaṃ hi tasya vadhāyādya samarthaḥ pṛthivīpate .. 26.42 .. ### [2.26.48](https://indike.org/pramana/in.purana.vayu.2.26.48) viṣṇunā ca varo datto mama pūrvvaṃ tato'nagha. na hi dhundhurmahāvīryyastejasālpena śakyate .. 26.43 .. ### [2.26.49](https://indike.org/pramana/in.purana.vayu.2.26.49) nirddagdhuṃ pṛthivīpāla api varṣa śatairiha. vīryyaṃ hi sumahattasya devairapi durāsaham .. 26.44 .. ### [2.26.50](https://indike.org/pramana/in.purana.vayu.2.26.50) evamuktastu rājarṣiruttaṅkena mahātmanā. kubalāśvaṃ sutaṃ prādāttasmin dhundhunivāraṇe .. 26.45 .. ### [2.26.51](https://indike.org/pramana/in.purana.vayu.2.26.51) rājā saṃnyastaśastro'hamayantu tanayo mama. bhaviṣyati dvijaśveṣṭha dhundhumāro na saṃśayaḥ .. 26.46 .. ### [2.26.52](https://indike.org/pramana/in.purana.vayu.2.26.52) sa taṃ vyādiśya tanayaṃ dhundhumāraṇamudyatam. jagāma parvvatāyaiva tapase śaṃsitavrataḥ .. 26.47 .. ### [2.26.53](https://indike.org/pramana/in.purana.vayu.2.26.53) kubalāśvastu dharmmātmā piturvacanamāsthitaḥ. sahasrairekaviṃśatyā putrāṇāṃ saha pārthivaḥ. prāyāduttaṅka sahito dhundhostasya nivāraṇe .. 26.48 .. ### [2.26.54](https://indike.org/pramana/in.purana.vayu.2.26.54) tamāviśattato viṣṇurbhagavān svena tejasā. uttaṅkasya niyogāttu lokānāṃ hitakāmyayā .. 26.49 .. ### [2.26.55](https://indike.org/pramana/in.purana.vayu.2.26.55) tasmin prayāte durddharṣe divi śabdo mahānabhūt. adyaprubhṛtyeṣa nṛpo dhundhumāro bhaviṣyati .. 26.50 .. ### [2.26.56](https://indike.org/pramana/in.purana.vayu.2.26.56) divyaiḥ puṣpaiśca taṃ devāḥ samamaṃsata adbhutam. sagatvā puruṣa vyāghrastanayaiḥ saha vīryyavān .. 26.51 .. ### [2.26.57](https://indike.org/pramana/in.purana.vayu.2.26.57) samudraṃ khanayāmāsa vālukārṇavamavyayam. nārāyaṇena rājarṣistejasāpyāyito hi saḥ .. 26.52 .. ### [2.26.58](https://indike.org/pramana/in.purana.vayu.2.26.58) babhūvātibalo bhūya uttaṅkasya vaśe sthitaḥ. tasya putraiḥ khanadbhiśca vālukāntarhitastadā .. 26.53 .. ### [2.26.59](https://indike.org/pramana/in.purana.vayu.2.26.59) dhundhurāsāditastatra diśamāśritya paścimām. mukhajenāgninā kruddho lokānudvarttayanniva .. 26.54 .. ### [2.26.60](https://indike.org/pramana/in.purana.vayu.2.26.60) vāri śuśrāva yogena mahodadhirivodaye. somasya somapaśreṣṭha dhārormikalilo mahān .. 26.55 .. ### [2.26.61](https://indike.org/pramana/in.purana.vayu.2.26.61) tasya putrāstu nirddagdhāstribhirūnāstu rākṣasāḥ. tataḥ sa rājātibalo dhundhubandhunibarhaṇaḥ .. 26.56 .. ### [2.26.62](https://indike.org/pramana/in.purana.vayu.2.26.62) tasya vārimayaṃ vegamapibat sa narādhipaḥ. yogī yogena vahniṃ vā śamayāmāsa vāriṇā .. 26.57 .. ### [2.26.63](https://indike.org/pramana/in.purana.vayu.2.26.63) nirasyattaṃ mahākāyaṃ balenodakarākṣasam. uttaṅkaṃ darśayāmāsa kṛtakarmmā narādhipaḥ .. 26.58 .. ### [2.26.64](https://indike.org/pramana/in.purana.vayu.2.26.64) uttaṅkaśca varaṃ prādāttasmai rājñe mahātmane. adāttasyākṣayaṃ vittaṃ śatrubhiścāpyadhṛṣyatām .. 26.59 .. ### [2.26.65](https://indike.org/pramana/in.purana.vayu.2.26.65) dharmme ratiñca satataṃ svarge vāsaṃ tathākṣayam. putrāṇāṃ cākṣayām̐llokān svarge ye rākṣasā hatāḥ .. 26.60 .. ### [2.26.66](https://indike.org/pramana/in.purana.vayu.2.26.66) tasya putrāstrayaḥ śiṣṭā dṛḍhāśvo jyeṣṭha ucyate. bhadrāśvaḥ kapilāśvaśca kanīyāsau tu tau smṛtau .. 26.61 .. ### [2.26.67](https://indike.org/pramana/in.purana.vayu.2.26.67) dhaundhumārirdṛḍhāśvastu haryaśvastasya cātmajaḥ. haryaśvasya nikumbho'bhūt kṣatradharmarataḥ sadā .. 26.62 .. ### [2.26.68](https://indike.org/pramana/in.purana.vayu.2.26.68) saṃhatāśvo nikumbhasya śruto raṇaviśāradaḥ . kṛśāśvaścākṣayāśvaśca saṃhatāśca sutāvubhau .. 26.63 .. ### [2.26.69](https://indike.org/pramana/in.purana.vayu.2.26.69) tasya patnī haimavatī satāṃ matidṛṣadvatī. vikhyātā triṣu lokeṣu putrastasyāḥ prasenajit .. 26.64 .. ### [2.26.70](https://indike.org/pramana/in.purana.vayu.2.26.70) yuvanāśvaḥ sutastasya triṣu lokeṣvatidyutiḥ. atyantadhārmiko gaurī tasya patnī pativratā .. 26.65 .. ### [2.26.71](https://indike.org/pramana/in.purana.vayu.2.26.71) abhiśastā tu sā bhartrā nadī sā bāhudā kṛtā . tasyāstu gaurikaḥ putra ścakravarttī babhūva ha .. 26.66 .. ### [2.26.72](https://indike.org/pramana/in.purana.vayu.2.26.72) māndhātā yauvanāśvo vai trailokyavijayī nṛpaḥ. atrāpyudāharantīmau ślokau paurāṇikī dvijāḥ .. 26.67 .. ### [2.26.73](https://indike.org/pramana/in.purana.vayu.2.26.73) yāvatsūrya udayati yāvacca pratitiṣṭhati. sarvaṃ tadyauvanāśvasya māndhātuḥ kṣetramucyate .. 26.68 .. ### [2.26.74](https://indike.org/pramana/in.purana.vayu.2.26.74) atrāpyudāharantīmaṃ ślokaṃ vaṃśavido janāḥ . yauvanāśvaṃ mahātmānaṃ yajvāna mamitaujasam. māndhātā tu tanurviṣṇoḥ purāṇajñāḥ prajakṣate .. 26.69 .. ### [2.26.75](https://indike.org/pramana/in.purana.vayu.2.26.75) tasya caitrarathī bhāryyā śaśabindoḥ sutā'bhavat. sādhvī bindumatī nāma rūpeṇāpratimā bhuvi .. 26.70 .. ### [2.26.76](https://indike.org/pramana/in.purana.vayu.2.26.76) pativratā ca jyeṣṭhā ca bhrātṝṇāmayutasya sā. tasyāmutpādayāmāsa māndhātā trīn sutān prabhuḥ .. 26.71 .. ### [2.26.77](https://indike.org/pramana/in.purana.vayu.2.26.77) purukutsamambarīṣaṃ mucukundañca viśrutam. ambarīṣasya dāyādo yuvanāśvo'paraḥ smṛtaḥ .. 26.72 .. ### [2.26.78](https://indike.org/pramana/in.purana.vayu.2.26.78) harito yuvanāśvasya hāritāḥ śūrayaḥ smṛtāḥ . ete hyaṅgirasaḥ putrāḥ kṣātropetā dvijātayaḥ .. 26.73 .. ### [2.26.79](https://indike.org/pramana/in.purana.vayu.2.26.79) purukutsasya dāyādastrasaddasyurmahāyaśāḥ. narmadāyāṃ samutpannaḥ sambhūtastasya cātmajaḥ .. 26.74 .. ### [2.26.80](https://indike.org/pramana/in.purana.vayu.2.26.80) sambhūtasyātmajaḥ putro hyanaraṇyaḥ pratāpavān. rāvaṇena hato yena trilokīvijaye purā .. 26.75 .. ### [2.26.81](https://indike.org/pramana/in.purana.vayu.2.26.81) trasadaśvo'naraṇyasya haryyaśvastasya cātmajaḥ . haryyaśvāttu dṛṣadvatyāṃ jajñe vasumato nṛpaḥ .. 26.76 .. ### [2.26.82](https://indike.org/pramana/in.purana.vayu.2.26.82) tasya putro'bhavadrājā tridhanvā nāma dhārmmikaḥ. āsīt traidhanvanaścāpi vidvāṃstrayyāṃ raṇaprabhuḥ .. 26.77 .. ### [2.26.83](https://indike.org/pramana/in.purana.vayu.2.26.83) tasya satyavrato nāma kumāro'bhūnmahābalaḥ. tena bhāryyā vidarbhasya hṛtā hatvā divaukasaḥ .. 26.78 .. ### [2.26.84](https://indike.org/pramana/in.purana.vayu.2.26.84) pāṇigrahaṇamantreṣu niṣṭhāṃ samprāpitoṣviha. viṣṇuvṛddhaḥ sutastasya viṣṇu vṛddho yataḥ smṛtaḥ . ete hyaṅgirasaḥ putrāḥ kṣātropetāḥ samāśritāḥ .. 26.79 .. ### [2.26.85](https://indike.org/pramana/in.purana.vayu.2.26.85) kāmādbalācca mohācca saṅkarṣaṇabalena ca. bhāvino'rthasya ca balāt tatkṛtaṃ tena dhīmatā .. 26.80 .. ### [2.26.86](https://indike.org/pramana/in.purana.vayu.2.26.86) tamadharmmeṇa saṃyuktaṃ pitā trayīguṇo'tyajat. apadhvaṃseti bahuśo'vadat krodhasamanvitaḥ .. 26.81 .. ### [2.26.87](https://indike.org/pramana/in.purana.vayu.2.26.87) pitaraṃ so'bravīdekaḥ kva gacchāmīti vai muhuḥ. pitā cainamathovāca śvapākaiḥ saha varttaya .. 26.82 .. ### [2.26.88](https://indike.org/pramana/in.purana.vayu.2.26.88) nāhaṃ putreṇa putrārthī tvayādya kulapāṃsana. ityuktaḥ sa nirākrāmannagarādvacanādvibho .. 26.83 .. ### [2.26.89](https://indike.org/pramana/in.purana.vayu.2.26.89) na cainaṃ dhārayāmāsa vasiṣṭho bhagavānṛṣiḥ. sa tu satyavrato dhīmāñchvapākāvasathāntikam. pitrā mukto'vasadvīraḥ pitā cāsya vanaṃ yayau .. 26.84 .. ### [2.26.90](https://indike.org/pramana/in.purana.vayu.2.26.90) tasmiṃstu viṣaye tasya nāvarṣat pākaśāsanaḥ. samā dvādaśa saṃpūrṇāstenādharmmeṇa vai tadā .. 26.85 .. ### [2.26.91](https://indike.org/pramana/in.purana.vayu.2.26.91) dārāṃstu tasya viṣaye viśvāmitro mahātapāḥ. saṃnyasya sāgarānūpe cacāra vipulaṃ tapaḥ .. 26.86 .. ### [2.26.92](https://indike.org/pramana/in.purana.vayu.2.26.92) tasya patnī gale baddhvā madhyamaṃ putramaurasam. śikhayā bharaṇārthāya vyakrīṇādghośatena vai .. 26.87 .. ### [2.26.93](https://indike.org/pramana/in.purana.vayu.2.26.93) taṃ tu baddhaṃ gale dṛṣṭvā vikrītaṃ taṃ narottamaḥ. maharṣiputraṃ dharmmātmā mokṣayāmāsa suvrataḥ .. 26.88 .. ### [2.26.94](https://indike.org/pramana/in.purana.vayu.2.26.94) satyavrato mahābuddhirbharaṇaṃ tasya cākarot . viśvāmitrasya tuṣṭyarthamanukampārthameva ca .. 26.89 .. ### [2.26.95](https://indike.org/pramana/in.purana.vayu.2.26.95) so'bhavadghālavo nāma gale baddho mahātapāḥ. maharṣiḥ kauśikastātastena vīryeṇa mokṣitaḥ .. 26.90 .. ### [2.26.96](https://indike.org/pramana/in.purana.vayu.2.26.96) tasya vratena bhaktyā ca kṛpayā ca pratijñayā. viśvāmitrakalatrañca babhāra vinaye sthitaḥ .. 26.91 .. ### [2.26.97](https://indike.org/pramana/in.purana.vayu.2.26.97) hatvā mṛgān varāhāṃśca mahiṣāṃśca vanecarān. viśvāmitrāśramābhyāśe tanmāṃsamapacattataḥ .. 26.92 .. ### [2.26.98](https://indike.org/pramana/in.purana.vayu.2.26.98) upāṃśuvratamāsthāya dīkṣāṃ dvādaśavārṣikīm. piturniyogātabhajannṛpe tu vanamāsthite .. 26.93 .. ### [2.26.99](https://indike.org/pramana/in.purana.vayu.2.26.99) ayodhyāñcaiva rājyañca tathaivāntaḥpuraṃ muniḥ. yājyopādhyāyasaṃyogādvasiṣṭhaḥ parirakṣitaḥ .. 26.94 .. ### [2.26.100](https://indike.org/pramana/in.purana.vayu.2.26.100) satyavratastu bālyāttu bhāvino'rthasya vai balāt. vasiṣṭhe'bhyādhikaṃ manyuṃ dhārayāmāsa manyunā .. 26.95 .. ### [2.26.101](https://indike.org/pramana/in.purana.vayu.2.26.101) pitrā rudaṃstadā rāṣṭrāt parityaktaṃ svamātmajam. na vārayāmāsa munirvasiṣṭhaḥ kāraṇena vai .. 26.96 .. ### [2.26.102](https://indike.org/pramana/in.purana.vayu.2.26.102) pāṇigrahaṇamantrāṇāṃ niṣṭhā syāt saptame pade. evaṃ satyavratastān vai kṛtavān saptame pade .. 26.97 .. ### [2.26.103](https://indike.org/pramana/in.purana.vayu.2.26.103) jānan dharmmān vasiṣṭhastu na ca mantrānihecchati. iti satyavrate roṣaṃ vasiṣṭho manasākarot .. 26.98 .. ### [2.26.104](https://indike.org/pramana/in.purana.vayu.2.26.104) gururbuddhyā tu bhagavān vasiṣṭhaḥ kṛtavāṃstadā. na tu satyavrato buddhyā upāṃśuvratamasya vai .. 26.99 .. ### [2.26.105](https://indike.org/pramana/in.purana.vayu.2.26.105) tasmiṃścoparate yo yatpiturāsīnmahāmanāḥ. tena dvādaśavarṣāṇi nāvarṣat pākaśāsanaḥ .. 26.100 .. ### [2.26.106](https://indike.org/pramana/in.purana.vayu.2.26.106) tena tvidānīṃ bahudhā dīkṣāṃ tāṃ durbalāṃ bhuvi. kulasya niṣkṛtiḥ svasya kṛteyañca bhavediti .. 26.101 .. ### [2.26.107](https://indike.org/pramana/in.purana.vayu.2.26.107) tato vasiṣṭho bhagavān pitrā tyaktaṃ nyavārayat. abhiṣekṣyāmyahaṃ rājye paścādenamiti prabhuḥ .. 26.102 .. ### [2.26.108](https://indike.org/pramana/in.purana.vayu.2.26.108) sa tu dvādaśavarṣāṇi dīkṣāntāmudvahan balī. avidyamāne māṃse tu vasiṣṭhasya mahātmanaḥ .. 26.103 .. ### [2.26.109](https://indike.org/pramana/in.purana.vayu.2.26.109) sarvvakāmadughāṃ dhenuṃ saṃdadarśa nṛpātmajaḥ. tāṃ vai krodhācca mohācca śramāccaiva kṣudhānvitaḥ .. 26.104 .. ### [2.26.110](https://indike.org/pramana/in.purana.vayu.2.26.110) dasyudharmmaṃ gato dṛṣṭvā jaghāna balināṃ varaḥ. sa tu māṃsaṃ svayaṃ caiva viśvāmitrasya cātmajān .. 26.105 .. ### [2.26.111](https://indike.org/pramana/in.purana.vayu.2.26.111) bhojayāmāsa tacchrutvā vasiṣṭhastaṃ tadātyajat. provāca caiva bhagavān vasiṣṭhastaṃ nṛpātmajam .. 26.106 .. ### [2.26.112](https://indike.org/pramana/in.purana.vayu.2.26.112) pātaye krūra he krūra tava śaṃkumayomayam . yadi te trīṇi śaṃkūni na syurhi puruṣādhama .. 26.107 .. ### [2.26.113](https://indike.org/pramana/in.purana.vayu.2.26.113) pituścāparitoṣeṇa gurordogdhrīvadhena ca. aproṣitopayogācca trividhaste vyatikramaḥ .. 26. 108 .. ### [2.26.114](https://indike.org/pramana/in.purana.vayu.2.26.114) evaṃ sa trīṇi śaṃkūni dṛṣṭvā tasya mahā tapāḥ. triśaṅkuriti hovāca triśaṅkustena sa smṛtaḥ .. 26.109 .. ### [2.26.115](https://indike.org/pramana/in.purana.vayu.2.26.115) viśvāmitrastu dārāṇāmāgato bharaṇe kṛte. tatastasmai varaṃ prādāttadā prītastriśaṅkave .. 26.110 .. ### [2.26.116](https://indike.org/pramana/in.purana.vayu.2.26.116) chandyamāno vareṇātha guruṃ vrave nṛpātmajaḥ. anāvṛṣṭibhaye tasmin gate dvādaśavārṣike .. 26.111 .. ### [2.26.117](https://indike.org/pramana/in.purana.vayu.2.26.117) abhiṣicya rājye pitrye yājayāmāsa taṃ muniḥ. miṣatāṃ daivatānāñca vasiṣṭhasya ca kauśikaḥ. saśarīraṃ tadā taṃ vai divamāropayat prabhuḥ .. 26.112 .. ### [2.26.118](https://indike.org/pramana/in.purana.vayu.2.26.118) miṣatastu vasiṣṭhasya tadadbhutamivābhavat. atrāpyudāharantīmau ślokau paurāṇikā janāḥ .. 26.113 .. ### [2.26.119](https://indike.org/pramana/in.purana.vayu.2.26.119) viśvāmitraprasādena triśaṅkurdivi rājate . devai sārddhaṃ mahātejānugrahāttasya dhīmataḥ .. 26.114 .. ### [2.26.120](https://indike.org/pramana/in.purana.vayu.2.26.120) śanairyātyabalā ramyā hemante candramaṇḍitā. alaṃkṛtā tribhirbhāvaistriśaṅkugrahabhūṣitā .. 26.115 .. ### [2.26.121](https://indike.org/pramana/in.purana.vayu.2.26.121) tasya satyaratā nāma bhāryyā kekayavaṃśajā. kumāraṃ janayāmāsa hariścandramakalmaṣam .. 26.116 .. ### [2.26.122](https://indike.org/pramana/in.purana.vayu.2.26.122) sa tu rājā hariścandrastraiśaṅkava iti śrutaḥ . āharttā rājasūyasya samrāḍiti pariśrutaḥ .. 26.117 .. ### [2.26.123](https://indike.org/pramana/in.purana.vayu.2.26.123) hariścandrasya tu suto rohito nāma vīryyavān. harito rohitasyātha caṃcuhārīta ucyate .. 26.118 .. ### [2.26.124](https://indike.org/pramana/in.purana.vayu.2.26.124) vijayaśca sudevaśca caṃcuputrau babhūvatuḥ. jetā sarvvasya kṣatrasya vijayastena sa smṛtaḥ .. 26.119 .. ### [2.26.125](https://indike.org/pramana/in.purana.vayu.2.26.125) rurukastanayastatra rājā dharmmārthakovidaḥ. rurukāddhṛtakaḥ putrastasmādbāhuśca jajñivān .. 26.120 .. ### [2.26.126](https://indike.org/pramana/in.purana.vayu.2.26.126) haihayaistālajaṅghaiśca nirasto vyasanī nṛpaḥ. śakairyavanakāmbojaiḥ pāradaiḥ pahlavaistathā .. 26.121 .. ### [2.26.127](https://indike.org/pramana/in.purana.vayu.2.26.127) nātyarthaṃ dhārmmiko'bhūt sa dharmmye satyayuge tathā. sagarastu suto bāhorjajñe saha gareṇa vai. bhṛgorāśramamāsādya turveṇa parirakṣitaḥ .. 26.122 .. ### [2.26.128](https://indike.org/pramana/in.purana.vayu.2.26.128) āgneyamastraṃ labdhvā tu bhārgavāt sagaro nṛpaḥ. jaghāna pṛthivīṅgatvā tālajaṃghān sahaihayān .. 26.123 .. ### [2.26.129](https://indike.org/pramana/in.purana.vayu.2.26.129) śakānāṃ pahlavānāñca dharmmānnirasadacyutaḥ. kṣatriyāṇāṃ tathā teṣāṃ pāradānāñca dharmmavit .. 26.124 .. ### [2.26.130](https://indike.org/pramana/in.purana.vayu.2.26.130) ṛṣaya ūcuḥ.. ### [2.26.131](https://indike.org/pramana/in.purana.vayu.2.26.131) kathaṃ sa sagaro rājā gareṇa saha jajñivān. kimarthañca śakādīnāṃ kṣatriyāṇāṃ mahaujasām. dharmmān kulocitān kruddho rājā nirasadacyutaḥ .. 26.125 .. ### [2.26.132](https://indike.org/pramana/in.purana.vayu.2.26.132) sūta uvāca.. ### [2.26.133](https://indike.org/pramana/in.purana.vayu.2.26.133) bāhorvyasaninastasya hṛtaṃ rājyaṃ purā kila. haihayaistālajaṃvaiśca śakaiḥ sārddhaṃ samāgataiḥ .. 26.126 .. ### [2.26.134](https://indike.org/pramana/in.purana.vayu.2.26.134) yavanāḥ pāradāścaiva kāmbojāḥ pahlavāstathā. haihayārthaṃ parākrāntā ete pañcagaṇāstadā .. 26.127 .. ### [2.26.135](https://indike.org/pramana/in.purana.vayu.2.26.135) hṛtaṃ rājyaṃ balīyobhirebhiḥ kṣatriyapuṅgavaiḥ . hṛtarājyastadā bāhuḥ saṃnyasya nu tadā nṛpaḥ. vanaṃ praviśya dharmmātmā saha patnyā tapo'carat .. 26.128 .. ### [2.26.136](https://indike.org/pramana/in.purana.vayu.2.26.136) kasyacittvatha kālasya toyārthaṃ prasthito nṛpaḥ. vṛddhatvāddurbbalatvācca antarā sa mamāra ca .. 26.129 .. ### [2.26.137](https://indike.org/pramana/in.purana.vayu.2.26.137) patnī tu yādavī tasya sagarbhā pṛṣṭhato'nvagāt . sapatnyā tu garastasyai datto garbhajighāṃsayā .. 26.130 .. ### [2.26.138](https://indike.org/pramana/in.purana.vayu.2.26.138) sā tu bhartuścitāṃ kṛtvā vahnau taṃ samarohayat. aurvastāṃ bhārgavo dṛṣṭvā kāruṇyādvinyavarttayat .. 26.131 .. ### [2.26.139](https://indike.org/pramana/in.purana.vayu.2.26.139) tasyāśrame tu taṅgarbhaṃ sāgareṇa tadā saha. vyajāyata mahābāhuṃ sagaraṃ nāma dhārmikam .. 26.132 .. ### [2.26.140](https://indike.org/pramana/in.purana.vayu.2.26.140) aurvastu jātakarmādīn kṛtvā tasya mahātmanaḥ. adhyāpya vedaśāstrāṇi tato'straṃ pratyapādayat .. 26.133 .. ### [2.26.141](https://indike.org/pramana/in.purana.vayu.2.26.141) jāmadagnyāttadāgneyamasurairapi duḥsaham. sa tenāstrabalenaiva balena ca samanvitaḥ . jaghāna haihayān kruddho rudraḥ paśugaṇāniva .. 26.134 .. ### [2.26.142](https://indike.org/pramana/in.purana.vayu.2.26.142) tataḥ śakān sayavanān kāmbojān pāradāṃstathā. pahlavāṃścaiva niḥśeṣān kartuṃ vyavasito nṛpaḥ .. 26.135 .. ### [2.26.143](https://indike.org/pramana/in.purana.vayu.2.26.143) te vadhyamānā vīreṇa sagareṇa mahātmanā. vasiṣṭhaṃ śaraṇaṃ sarvve prapannāḥ śaraṇaiṣiṇaḥ .. 26.136 .. ### [2.26.144](https://indike.org/pramana/in.purana.vayu.2.26.144) vasiṣṭhastān tathetyuktvā samayena mahāmuniḥ . sagaraṃ vārayāmāsa teṣāndattvā'bhayantadā .. 26.137 .. ### [2.26.145](https://indike.org/pramana/in.purana.vayu.2.26.145) sagaraḥ svāmpratijñāñca gurorvāsyaṃ niśamya ca. dharmmaṃ jaghāna teṣāṃ vai veṣānyatvaṃ cakāra ha .. 26.138 .. ### [2.26.146](https://indike.org/pramana/in.purana.vayu.2.26.146) arddhaṃ śakānāṃ śiraso muṇḍayitvā vyasarjayat. yavanānāṃ śiraḥ sarvaṃ kāmbojānāntathaiva ca.. 26.139 .. ### [2.26.147](https://indike.org/pramana/in.purana.vayu.2.26.147) pāradā muktakeśāśca pahlavāḥ śmaśru dhāriṇaḥ. niḥsvādhyāyavaṣaṭkārāḥ kṛtāstena mahātmanā .. 26.140 .. ### [2.26.148](https://indike.org/pramana/in.purana.vayu.2.26.148) śakā yavanakāmbojāḥ pahlavāḥ pāradaiḥ saha. kelisparśā māhiṣikā dārvāścolāḥ khasāstathā .. 26.141 .. ### [2.26.149](https://indike.org/pramana/in.purana.vayu.2.26.149) sarvve te kṣatriyagaṇā dharmmasteṣāṃ nirākṛtaḥ. vasiṣṭhavacanātpūrvaṃ sagareṇa mahātmanā .. 26.142 .. ### [2.26.150](https://indike.org/pramana/in.purana.vayu.2.26.150) sa dharmavijayī rājā vijityemāṃ vasundharām. aśvaṃ vicārayāmāsa vājimedhāya dīkṣitaḥ .. 26.143 .. ### [2.26.151](https://indike.org/pramana/in.purana.vayu.2.26.151) tasya cārayataḥ so'śvaḥ samudre pūrvadakṣiṇe. velāsamīpe'pahṛto bhūmiñcaiva praveśitaḥ .. 26.144 .. ### [2.26.152](https://indike.org/pramana/in.purana.vayu.2.26.152) sa tandeśaṃ sutaiḥ sarvaiḥ khanayāmāsa pārthivaḥ. āseduśca tatastasmiṃstadantaste mahārṇave .. 26.145 .. ### [2.26.153](https://indike.org/pramana/in.purana.vayu.2.26.153) tamādipuruṣaṃ devaṃ hariṃ kṛṣṇaṃ prajāpatim. viṣṇuṃ kapilarūpeṇa haṃsaṃ nārāyaṇaṃ prabhum .. 26.146 .. ### [2.26.154](https://indike.org/pramana/in.purana.vayu.2.26.154) tasya cakṣuḥ samāsādya tejastat pratipadyate. dagdhāḥ putrāstadā sarve catvārastvavaśeṣitāḥ .. 26.147 .. ### [2.26.155](https://indike.org/pramana/in.purana.vayu.2.26.155) barhiketuḥ saketuśca tathā dharmmaratastrayaḥ. śūraḥ pañcavanaścaiva tasya vaṃśakarāḥ prabho .. 26.148 .. ### [2.26.156](https://indike.org/pramana/in.purana.vayu.2.26.156) prādācca tasya bhagavān harirnārāyaṇo varān. akṣayatvaṃ svavaṃśasya vājimedhaśataṃ tathā. vibhuṃ putraṃ samudrañca svarge vāsaṃ tathākṣayam .. 26.149 .. ### [2.26.157](https://indike.org/pramana/in.purana.vayu.2.26.157) sa samudro'śvamādāya vandade (?) saritāṃpatiḥ. sāgaratvaṃ ca lebhe sa karmaṇā tena tasya vai .. 26.150 .. ### [2.26.158](https://indike.org/pramana/in.purana.vayu.2.26.158) taṃ cāśvamedhikaṃ so'śvaṃ samudrāt prāpya pārthivaḥ. ājahārāśvamedhānāṃ śataṃ caiva punaḥ punaḥ .. 26.151 .. ### [2.26.159](https://indike.org/pramana/in.purana.vayu.2.26.159) ṣaṣṭiputrasahasrāṇi dagdhānyaśvānusāriṇām. teṣāṃ nārāyaṇaṃ tejaḥ praviṣṭānāṃ mahātmanām. putrāṇāntu sahasrāṇi ṣaṣṭistu iti naḥ śrutam .. 26.152 .. ### [2.26.160](https://indike.org/pramana/in.purana.vayu.2.26.160) ṛṣaya ūcuḥ.. sagarasyātmajā rājñaḥ kathaṃ jātā mahābalāḥ. vikrāntāḥ ṣaṣṭisāhasrā vidhinā kena vā vada .. 26.153 .. ### [2.26.161](https://indike.org/pramana/in.purana.vayu.2.26.161) sūta uvāca.. ### [2.26.162](https://indike.org/pramana/in.purana.vayu.2.26.162) dve patnyau sagarasyāstāṃ tapasā dagdhakilbiṣe. jyeṣṭhā vidarbhaduhitā keśinī nāma nāmataḥ .. 26.154 .. ### [2.26.163](https://indike.org/pramana/in.purana.vayu.2.26.163) kanīyasī tu yā tasya patnī paramadharmiṇī. ariṣṭanemiduhitā rūpeṇāpratimā bhuvi .. 26.155 .. ### [2.26.164](https://indike.org/pramana/in.purana.vayu.2.26.164) aurvastābhyāṃ varaṃ prādāt tapasārādhitaḥ prabhuḥ. ekā janiṣyate putraṃ vaṃśakarttāramīpsitam. ṣaṣṭiputraṃ sahasrāṇi dvitīyā janayiṣyati .. 26.156 .. ### [2.26.165](https://indike.org/pramana/in.purana.vayu.2.26.165) munestu vacanaṃ śrutvā keśinī putramekakam. vaṃśasya kāraṇaṃ śreṣṭhā jagrāha nṛpasaṃsadi .. 26.157 .. ### [2.26.166](https://indike.org/pramana/in.purana.vayu.2.26.166) ṣaṣṭiputrasahasrāṇi suparṇabhaginī tathā. mahātmanastu jagrāha sumatiḥ poṣaṇe nṛpaḥ .. 26.158 .. ### [2.26.167](https://indike.org/pramana/in.purana.vayu.2.26.167) atha kāle gate jyeṣṭhā jyeṣṭhaṃ putraṃ vyajāyata. asamañja iti khyātaṃ kākutsthaṃ sagarātmajam .. 26.159 .. ### [2.26.168](https://indike.org/pramana/in.purana.vayu.2.26.168) sumatistvapi jajñe vai garbhantumbaṃ yaśasvinī. ṣaṣṭiputrasahasrāṇi tumbamadhyādviniḥsṛtāḥ .. 26.160 .. ### [2.26.169](https://indike.org/pramana/in.purana.vayu.2.26.169) ghṛtapūrṇeṣu kumbheṣu tān garbhān nyadadhattataḥ. dhātrīścaikaikaśaḥ prādāt tāvatīḥ poṣaṇe nṛpaḥ .. 26.161 .. ### [2.26.170](https://indike.org/pramana/in.purana.vayu.2.26.170) tato navasu māseṣu samuttasthuryathāsukham. kumārāste mahābhāgāḥ sagaraprītivarddhanāḥ .. 26.162 .. ### [2.26.171](https://indike.org/pramana/in.purana.vayu.2.26.171) kālena mahatā caiva cauvanaṃ pratipedire. ṣaṣṭiputrasahasrāṇi teṣāmaśvānusāriṇām .. 26.163 .. ### [2.26.172](https://indike.org/pramana/in.purana.vayu.2.26.172) sa tu jyeṣṭho naravyāghraḥ sagarasyātmasambhavaḥ. asamañja iti khyāto barhiketurmahābalaḥ .. 26.164 .. ### [2.26.173](https://indike.org/pramana/in.purana.vayu.2.26.173) paurāṇāmahite yuktaḥ pitrā nirvāsitaḥ purā. tasya putroṃ'śumānnāma asamañjasya vīryavān .. 26.165 .. ### [2.26.174](https://indike.org/pramana/in.purana.vayu.2.26.174) tasya putrastu dharmātmā dilīpa iti viśrutaḥ. dilīpāttu mahātejā vīro jāto bhagīrathaḥ .. 26.166 .. ### [2.26.175](https://indike.org/pramana/in.purana.vayu.2.26.175) yena gaṅgā saricchreṣṭhā vimānairupaśobhitā . ījā'nena samudrādvai duhitṛtvena kalpitā. atrāpyudāharantīmaṃ ślokaṃ paurāṇikā janāḥ .. 26.167 .. ### [2.26.176](https://indike.org/pramana/in.purana.vayu.2.26.176) bhagīrathastu tāṃ gaṅgāmānayāmāsa karmabhiḥ . tasmādbhāgīrathī gaṅgā kathyate vaṃśavittamaiḥ .. 26.168 .. ### [2.26.177](https://indike.org/pramana/in.purana.vayu.2.26.177) bhagīrathasutaścāpi śruto nāma babhūva ha. nābhāgastasya dāyādo nityaṃ dharmaparāyaṇaḥ .. 26.169 .. ### [2.26.178](https://indike.org/pramana/in.purana.vayu.2.26.178) ambarīṣaḥ sutastasya sindhudvīpastato'bhavat. evaṃ vaṃśapurāṇajñā gāyantīti pariśrutam .. 26.170 .. ### [2.26.179](https://indike.org/pramana/in.purana.vayu.2.26.179) nābhāgerambarīṣasya bhujābhyāṃ paripālitā. babhūva vasudhātyarthaṃ tāpatrayavivarjitā .. 26.171 .. ### [2.26.180](https://indike.org/pramana/in.purana.vayu.2.26.180) ayutāyuḥ sutastasya sindhudvīpasya vīryavān. ayutāyostu dāyāda ṛtuparṇo mahāyaśāḥ .. 26.172 .. ### [2.26.181](https://indike.org/pramana/in.purana.vayu.2.26.181) divyākṣahṛdajño'sau rājā nalasakho balī. nalau dvāviti vikhyātau purāṇeṣu dṛḍhavratau .. 26.173 .. ### [2.26.182](https://indike.org/pramana/in.purana.vayu.2.26.182) vīrasenātmajaścaiva yaścekṣvākukulodvahaḥ. ṛtuparṇasya putro'bhūt sarvvakāmo janeśvaraḥ .. 26.174 .. ### [2.26.183](https://indike.org/pramana/in.purana.vayu.2.26.183) sudāsastasya tanayo rājā haṃsamukho'bhavat. sudāsasya sutaḥ proktaḥ saudāso nāma pārthivaḥ .. 26.175 .. ### [2.26.184](https://indike.org/pramana/in.purana.vayu.2.26.184) khyātaḥ kalmāṣapādo vai nāmnā mitrasahaśca saḥ . vasiṣṭhastu mahātejāḥ kṣetre kalmāṣapādake. aśmakaṃ janayāmāsa ikṣvākukulavṛddhaye .. 26.176 .. ### [2.26.185](https://indike.org/pramana/in.purana.vayu.2.26.185) aśmakasyorakāmastu mūlakastatsuto'bhavat. atrāpyudāharantīmaṃ mūlakaṃ vai nṛpaṃ prati .. 26.177 .. ### [2.26.186](https://indike.org/pramana/in.purana.vayu.2.26.186) sa hi rāmabhayādrājā strībhiḥ parivṛto'vasat. vivastrastrāṇamicchan vai nārīkavacamīśvaraḥ .. 26.178 .. ### [2.26.187](https://indike.org/pramana/in.purana.vayu.2.26.187) mūlakasyāpi dharmātmā rājā śatarathaḥ smṛtaḥ. tasmācchatarathājjajñe rājā caiḍiviḍo balī .. 26.179 .. ### [2.26.188](https://indike.org/pramana/in.purana.vayu.2.26.188) āsīttvaiḍiviḍaḥ śrīmān kṛtaśarmā pratāpavān. putro viśvamahattasya putrīkasya vyajāyata .. 26.180 .. ### [2.26.189](https://indike.org/pramana/in.purana.vayu.2.26.189) dilīpastasya putro'bhūt khaṭvāṅga iti viśrutaḥ. yena svargādihāgamya muhūrttaṃ prāpya jīvitam. trayo'bhisaṃhitā lokā buddhyā satyena caiva hi .. 26.181 .. ### [2.26.190](https://indike.org/pramana/in.purana.vayu.2.26.190) dīrgabāhuḥ sutastasya raghustasmādajāyata. ajaḥ putro raghoścāpi tasmājjajñe sa vīryavān. rājā daśaratho nāma ikṣvākukulanandanaḥ .. 26.182 .. ### [2.26.191](https://indike.org/pramana/in.purana.vayu.2.26.191) rāmo dāśarathirvīro dharmajño lokaviśrutaḥ. bharato lakṣmaṇaścaiva śatrughnaśca mahābalaḥ .. 26.183 .. ### [2.26.192](https://indike.org/pramana/in.purana.vayu.2.26.192) mādhavaṃ lavaṇaṃ hatvā gatvā madhuvanañca tat. śatrughnena purī tasya mathurā sanniveśitā .. 26.184 .. ### [2.26.193](https://indike.org/pramana/in.purana.vayu.2.26.193) subāhuḥ śūrasenaśca śatrughnasahitāvubhau. pālayāmāsatuḥ sūnū vaidehyau mathurāṃ purīm .. 26.185 .. ### [2.26.194](https://indike.org/pramana/in.purana.vayu.2.26.194) aṅgadaścāndraketuśca lakṣmaṇasyātmajāvubhau. himavatparvatābhyāśe sphītau janapadau tayoḥ .. 26.186 .. ### [2.26.195](https://indike.org/pramana/in.purana.vayu.2.26.195) aṅgadasyāṅgadīyā tu deśe kārapathe purī. candraketostu mallasya candravaktā purī śubhā .. 26.187 .. ### [2.26.196](https://indike.org/pramana/in.purana.vayu.2.26.196) bharatasyātmajau vīrau takṣaḥ puṣkara eva ca. gāndhāraviṣaye siddhe tayoḥ puryau mahātmanoḥ .. 26.188 .. ### [2.26.197](https://indike.org/pramana/in.purana.vayu.2.26.197) takṣasya dikṣu vikhyātā ramyā takṣaśilā purī. puṣkarasyāpi vīrasya vikhyātā puṣkarāvatī .. 26.189 .. ### [2.26.198](https://indike.org/pramana/in.purana.vayu.2.26.198) gāthāṃ caivātra gāyanti ye purāṇavido jatāḥ. rāme nibaddhāssattvārthā māhātmyāttasya dhīmataḥ .. 26.190 .. ### [2.26.199](https://indike.org/pramana/in.purana.vayu.2.26.199) śyāmo yuvā lohitākṣo dīptāsyo mitabhāṣitaḥ. ājānubāhuḥ sumukhaḥ siṃhaskandho mahābhujaḥ .. 26.191 .. ### [2.26.200](https://indike.org/pramana/in.purana.vayu.2.26.200) daśavarṣasahasrāṇi rāmo rājyamakārayat. ṛksāmayajuṣāṃ ghoṣo jyāghoṣaśca mahāsvanaḥ .. 26.192 .. _First 200 of 224 passages. [Read on](https://indike.org/pramana/in.purana.vayu.2.26)_ ## Linked texts (10) - [Brahmāṇḍapurāṇa](https://indike.org/pramana/in.purana.brahmanda.2.63.1) — Vyāsa, Sanskrit - [Critical edition (BORI)](https://indike.org/pramana/in.lit.mahabharata.harivamsa*crit.9.32) — Sanskrit - [Brahmapurāṇa](https://indike.org/pramana/in.purana.brahma.7.47) — Vyāsa, Sanskrit - [Śivapurāṇa (complete text)](https://indike.org/pramana/in.purana.siva*complete-2.5.37.6) — Sanskrit - [Liṅgapurāṇa](https://indike.org/pramana/in.purana.linga.1.65.40) — Vyāsa, Sanskrit - [Mudgalapurāṇa](https://indike.org/pramana/in.purana.upa.surya.mudgala.4.29.12) — Sanskrit - [Bhāgavatapurāṇa](https://indike.org/pramana/in.purana.bhagavata.9.22.17) — Vyāsa, Sanskrit - [Saurapurāṇa](https://indike.org/pramana/in.purana.upa.saiva.saura.30.35) — Sanskrit - [Liṅgapurāṇa](https://indike.org/pramana/in.vernacular.tamil.kappiyam.lingapurana.74.40) — Ativīrarāma Pāṇṭiyar 1500, Sanskrit - [Śūdrakamalākara](https://indike.org/pramana/in.niti.dharma.jati.sudrakamalakara.69.1-2) — Kamalākarabhaṭṭa, Sanskrit --- Source: [https://indike.org/pramana/in.purana.vayu.2.26](https://indike.org/pramana/in.purana.vayu.2.26) · Pramāṇa