[Pramāṇa](https://indike.org/pramana/) › [Indian literature](https://indike.org/pramana/in) › [Purāṇas](https://indike.org/pramana/in.purana) › [Vayupurana](https://indike.org/pramana/in.purana.vayu) › 2.29 # Vayupurana 2.29: adhyāyaḥ 29 Vāyupurāṇa 2.29 - **Language:** Sanskrit ### adhyāyaḥ 29 ### [2.29.1](https://indike.org/pramana/in.purana.vayu.2.29.1) sūta uvāca .. ### [2.29.2](https://indike.org/pramana/in.purana.vayu.2.29.2) somasya tu budhaḥ putro budhasya tu purūravāḥ. tejasvī dānaśīlaśca yajvā vipuladakṣiṇaḥ .. 29.1 .. ### [2.29.3](https://indike.org/pramana/in.purana.vayu.2.29.3) brahmavādī parākrāntaḥ śatrubhiryudhi durjayaḥ. āharttā cāgnihotrasya yajvanāñca dadau mahīm .. 29.2 .. ### [2.29.4](https://indike.org/pramana/in.purana.vayu.2.29.4) satyavāk karmmabuddhiśca kāntaḥ saṃvṛtamaithunaḥ. atīva putro lokeṣu rūpeṇāpratimo'bhavat .. 29.3 .. ### [2.29.5](https://indike.org/pramana/in.purana.vayu.2.29.5) taṃ brahmavādinaṃ dāntaṃ dharmajñaṃ satyavādinam. urvaśī varayāmāsa hitvā mānaṃ yaśasvinī .. 29.4 .. ### [2.29.6](https://indike.org/pramana/in.purana.vayu.2.29.6) tayā sahāvasadrājā daśavarṣāṇi cāṣṭa ca. sapta ṣaṭ sapta cāṣṭau ca daśa cāṣṭau ca vīryavān .. 29.5 .. ### [2.29.7](https://indike.org/pramana/in.purana.vayu.2.29.7) vane caitrarathe ramye tathā mandākinītaṭe. alakāyāṃ viśālāyāṃ nandane ca vanottame .. 29.6 .. ### [2.29.8](https://indike.org/pramana/in.purana.vayu.2.29.8) gandhamādanapādeṣu meruśrṛṅge nagottame. uttarāṃśca kurūn prāpya kalāpagrāmameva ca .. 29.7 .. ### [2.29.9](https://indike.org/pramana/in.purana.vayu.2.29.9) eteṣu vanasukhyeṣu surairācariteṣu ca. urvaśyā sahito rājā reme paramayā mudā .. 29.8 .. ### [2.29.10](https://indike.org/pramana/in.purana.vayu.2.29.10) ṛṣaya ūcuḥ.. ### [2.29.11](https://indike.org/pramana/in.purana.vayu.2.29.11) gandharvā corvaśī devī rājānaṃ mānuṣaṃ katham. devānutsṛjya samprāptā tanno brūhi bahuśruta .. 29.9 .. ### [2.29.12](https://indike.org/pramana/in.purana.vayu.2.29.12) sūta uvāca.. ### [2.29.13](https://indike.org/pramana/in.purana.vayu.2.29.13) brahmaśāpābhibhūtā sā mānuṣaṃ samupasthitā. ailaṃ tu taṃ varārohā samayena vyavasthitā .. 29.10 .. ### [2.29.14](https://indike.org/pramana/in.purana.vayu.2.29.14) ātmanaḥ śāpamokṣārthaṃ niyamaṃ sā cakāra tu . anagnadarśanañcaiva akāmāta saha maithunam .. 29.11 .. ### [2.29.15](https://indike.org/pramana/in.purana.vayu.2.29.15) dvau meṣau śayanābhyāśe sa tāvad vyavatiṣṭhate. ghṛtamātraṃ tathāhāraḥ kālamekantu pārthiva .. 29.12 .. ### [2.29.16](https://indike.org/pramana/in.purana.vayu.2.29.16) yadyeṣa samayo rājan yāvatkālañca te dṛḍham. tāvatkālantu vatsyāmi eṣa naḥ samayaḥ kṛtaḥ .. 29.13 .. ### [2.29.17](https://indike.org/pramana/in.purana.vayu.2.29.17) tasyāstaṃ samayaṃ sarvaṃ sa rājā paryapālayat. evaṃ sā cāvasat tasmin purūravasi bhāminī .. 29.14 .. ### [2.29.18](https://indike.org/pramana/in.purana.vayu.2.29.18) varṣāṇyatha catuḥṣaṣṭiṃ tadbhaktyā śāpamohitā. urvaśī mānuṣaṃ prāptā gandharvvā ścintayānvitāḥ .. 29.15 .. ### [2.29.19](https://indike.org/pramana/in.purana.vayu.2.29.19) gandharvvā ūcuḥ. cintayadhvaṃ mahābhāgā yathā sā tu varāṅganā. āgacchettu punarddevānurvaśī svargabhūṣaṇā .. 29.16 .. ### [2.29.20](https://indike.org/pramana/in.purana.vayu.2.29.20) tato viśvāvasurnāma tatrāha vadatāṃ varaḥ. tayā tu samayastatra kriyamāṇo mato'naghaḥ .. 29.17 .. ### [2.29.21](https://indike.org/pramana/in.purana.vayu.2.29.21) samayanyutkramāt sā vai rājānaṃ tyakṣyate yathā. tadahaṃ vacmi vaḥ sarvaṃ yathā tyakṣyati sā nṛpam .. 29.18 .. ### [2.29.22](https://indike.org/pramana/in.purana.vayu.2.29.22) sahasā yogameṣyāmi yuṣmākaṃ kāryasiddhaye. evamuktvā gatastatra pratiṣṭhānaṃ mahāyaśāḥ .. 29.19 .. ### [2.29.23](https://indike.org/pramana/in.purana.vayu.2.29.23) sa niśāyāmathāgamya meṣamekaṃ jahāra vai. mātṛvadvarttate sā tu meṣayoścāruhāsinī .. 29.20 .. ### [2.29.24](https://indike.org/pramana/in.purana.vayu.2.29.24) gandharvāgamanaṃ jñātvā śayanasthā yaśasvinī. rājānamabravītsā tu putro me hriyateti vai .. 29.21 .. ### [2.29.25](https://indike.org/pramana/in.purana.vayu.2.29.25) evamukto viniścitya nagnastiṣṭhati vai nṛpaḥ . nagnaṃ drakṣyati māṃ devī samayo vitatho bhavet .. 29.22 .. ### [2.29.26](https://indike.org/pramana/in.purana.vayu.2.29.26) tato bhūyastu gandharvvā dvitīyaṃ meṣamādaduḥ. dvitīye'pahṛte meṣe ailaṃ devī tamabravīt .. 29.23 .. ### [2.29.27](https://indike.org/pramana/in.purana.vayu.2.29.27) putrau mama hṛtau rājannanāthāyā iva prabho. evamuktastadotthāya nagno rājā pradhāvitaḥ .. 29.24 .. ### [2.29.28](https://indike.org/pramana/in.purana.vayu.2.29.28) meṣābabhyāṃ padavīṃ rājan gandharvvairvyutthitāmatha. utpāditā tu mahatī māyā tadbhavanaṃ mahat .. 29.25 .. ### [2.29.29](https://indike.org/pramana/in.purana.vayu.2.29.29) prakāśitantu sahasā tato nagnamavekṣya sā. nagnaṃ dṛṣṭvā tiro'bhūtsā apsarā kāmarūpiṇī .. 29.26 .. ### [2.29.30](https://indike.org/pramana/in.purana.vayu.2.29.30) tirobhūtāntu tāṃ jñātvā gandharvāstatra tāvubhau. meṣau tyaktvā ca te sarve tatraivāntarhitābhavan .. 29.27 .. ### [2.29.31](https://indike.org/pramana/in.purana.vayu.2.29.31) utsṛṣṭāvuraṇau dṛṣṭvā rājā gṛhyāgataḥ prabhuḥ. apaśyaṃstāṃ tu vai rājā vilalāpa suduḥkhitaḥ .. 29.28 .. ### [2.29.32](https://indike.org/pramana/in.purana.vayu.2.29.32) cacāra pṛthivīṃ caiva mārgamāṇastatastataḥ. athāpaśyacca tāṃ rājā kurukṣetre mahābalaḥ .. 29.29 .. ### [2.29.33](https://indike.org/pramana/in.purana.vayu.2.29.33) plakṣatīrthe puṣkariṇyāṃ vigāḍhenāmbunāplutām. krīḍantīmapsarobhiśca pañcabhiḥ saha śobhanām .. 29.30 .. ### [2.29.34](https://indike.org/pramana/in.purana.vayu.2.29.34) apaśyatsā tataḥ subhrū rājānamavidūrataḥ. urvaśī tāḥ sakhīḥ prāha ayaṃ sa puruṣottamaḥ .. 29.31 .. ### [2.29.35](https://indike.org/pramana/in.purana.vayu.2.29.35) yasminnahamavātsaṃ hi darśayāmāsa taṃ nṛpam . tata āvirbabhūvustāḥ pañcacūḍāpsarāstu tāḥ .. 29.32 .. ### [2.29.36](https://indike.org/pramana/in.purana.vayu.2.29.36) dṛṣṭvā tu rājā tāṃ prītaḥ pralāpān kurute bahūn. āyāhi tiṣṭha manasā ghore vacasi tiṣṭha he .. 29.33 .. ### [2.29.37](https://indike.org/pramana/in.purana.vayu.2.29.37) evamādīni sūkṣmāṇi parasparamabhāṣata. urvvaśī tvabravīccailaṃ sagarbhāhaṃ tvayā prabho .. 29.34 .. ### [2.29.38](https://indike.org/pramana/in.purana.vayu.2.29.38) saṃvatsarāt kumāraste bhavitā nava saṃśayaḥ. niśāmekāntu vai rājā hyavasattu tayā saha .. 29.35 .. ### [2.29.39](https://indike.org/pramana/in.purana.vayu.2.29.39) samprahṛṣṭo jagāmātha svapurantu mahāyaśāḥ. gate saṃvatsare rājā urvvaśīṃ punarāgamat .. 29.36 .. ### [2.29.40](https://indike.org/pramana/in.purana.vayu.2.29.40) uṣitvā tu tayā sārddhamekarātraṃ mahāmanāḥ. kāmārttaścā bravīddīno bhava nityaṃ mameti vai .. 29.37 .. ### [2.29.41](https://indike.org/pramana/in.purana.vayu.2.29.41) urvvaśyathābravīccailaṃ gandharvāste varaṃ daduḥ. taṃ vṛṇīṣva mahārāja brūhi caitāṃstvameva hi .. 29.38 .. ### [2.29.42](https://indike.org/pramana/in.purana.vayu.2.29.42) vṛṇe nityaṃ hi sālokyaṃ gandharvāṇāṃ mahātmanām. tathetyuktvā varaṃ vavre gandharvāśca tathāstviti .. 29.39 .. ### [2.29.43](https://indike.org/pramana/in.purana.vayu.2.29.43) sthālīmagneḥ pūrayitvā gandharvvāśca tamabruvan. anena iṣṭvā lokantaṃ prāpsyasi tvaṃ narādhipa .. 29.40 .. ### [2.29.44](https://indike.org/pramana/in.purana.vayu.2.29.44) tamādāya kumārantu nagarāyopacakrame. niḥkṣipya tamaraṇyāñca sa putrantu gṛhaṃ yayau .. 29.41 .. ### [2.29.45](https://indike.org/pramana/in.purana.vayu.2.29.45) punarādāya dṛśyāgnimaśvatthaṃ tatra dṛṣṭavān. samīpatastu taṃ dṛṣṭvā hyaśvatthaṃ tatra vismitaḥ .. 29.42 .. ### [2.29.46](https://indike.org/pramana/in.purana.vayu.2.29.46) gandharvvebhyastathākhyātumagninā gāṃ gatastu saḥ . śrutvā tamarthamaśilamaraṇiṃ tu samādiśat .. 29.43 .. ### [2.29.47](https://indike.org/pramana/in.purana.vayu.2.29.47) aśvatthādaraṇiṃ kṛtvā mathitvāgniṃ yathāvidhi. teneṣṭvā tu salokaṃ naḥ prāpsyasi tvaṃ narādhipa. mathitvāgniṃ tridhā kṛtvā hyayajatsa narādhipaḥ .. 29.44 .. ### [2.29.48](https://indike.org/pramana/in.purana.vayu.2.29.48) iṣṭvā yajñairbahuvidhairgatasteṣāṃ salokatām. vāsāya ca sa gandharvvastretāyāṃ sa mahārathaḥ. eko'gniḥ pūrvamāsīdvai ailastrīṃstānakalpayat .. 29.45 .. ### [2.29.49](https://indike.org/pramana/in.purana.vayu.2.29.49) evaṃprabhāvo rājāsīdailastu dvijasattamāḥ. deśe puṇyatame caiva maharṣibhiralaṃkṛte .. 29.46 .. ### [2.29.50](https://indike.org/pramana/in.purana.vayu.2.29.50) rājyaṃ sa kārayāmāsa prayāge pṛthivī patiḥ. uttare yāmune tīre pratiṣṭhāne mahāyaśāḥ .. 29.47 .. ### [2.29.51](https://indike.org/pramana/in.purana.vayu.2.29.51) tasya putrā babhūvurhi ṣaḍindropamatejasaḥ. gandharvvaloke viditā āyurddhīmānamāvasuḥ .. 29.48 .. ### [2.29.52](https://indike.org/pramana/in.purana.vayu.2.29.52) viśvāyuśca śatāyuśca gatāyuścorvaśīsutāḥ. amāvasostu vai jāto bhīmo rājātha viśvajit .. 29.49 .. ### [2.29.53](https://indike.org/pramana/in.purana.vayu.2.29.53) śrīmān bhīmasya dāyādo rājāsītkāñcanaprabhaḥ. vidvāṃstu kāñcanasyāpi suhotro'bhūnmahābalaḥ .. 29.50 .. ### [2.29.54](https://indike.org/pramana/in.purana.vayu.2.29.54) suhotrasyābhajjahnuḥ keśikāgarbhasambhavaḥ. pratigatya tato gaṅgā vitato yajñakarmmaṇi .. 29.51 .. ### [2.29.55](https://indike.org/pramana/in.purana.vayu.2.29.55) plāvayāmāsa taṃ deśaṃ bhāvino'rthasya darśanāt. gaṅgayā plāvitaṃ dṛṣṭvā yajñavāṭaṃ samantataḥ .. 29.52 .. ### [2.29.56](https://indike.org/pramana/in.purana.vayu.2.29.56) sauhotrirvaradaḥ kruddho gaṅgāṃ saṃraktalocanaḥ. asya gaṅge'valepasya sadyaḥ phalamavāpnuhi .. 29.53 .. ### [2.29.57](https://indike.org/pramana/in.purana.vayu.2.29.57) etatte viphalaṃ sarvvaṃ pītamambhaḥ karomyaham. rājarṣiṇā tataḥ pītāṃ gaṅgāṃ dṛṣṭvā surarṣayaḥ .. 29.54 .. ### [2.29.58](https://indike.org/pramana/in.purana.vayu.2.29.58) upaninyurmahābhāgā duhitṛtvena jāhnavīm. yauvanāśvasya pautrīntu kāverīñjahnurāvahat .. 29.55 .. ### [2.29.59](https://indike.org/pramana/in.purana.vayu.2.29.59) yuvanāśvasya śāpena gaṅgā yena vinirmame . kāverīṃ saritāṃ śreṣṭhāṃ jahnubhāryyāmaninditām .. 29.56 .. ### [2.29.60](https://indike.org/pramana/in.purana.vayu.2.29.60) jahnuśca dayitaṃ putraṃ suhotraṃ nāma dhārmikam. kāveryyāṃ janayāmāsa ajakastasya cātmajaḥ .. 29.57 .. ### [2.29.61](https://indike.org/pramana/in.purana.vayu.2.29.61) ajakasya tu dāyādo balākāśvo mahāyaśāḥ. babhūvuśca gayaḥ śīlaḥ kuśastasyātmajaḥ smṛtaḥ .. 29.58 .. ### [2.29.62](https://indike.org/pramana/in.purana.vayu.2.29.62) kuśaputrā babhūvuśca catvāro vedavarcasaḥ. kuśāśvaḥ kuśanābhaśca amūrttārayaśovasuḥ .. 29.59 .. ### [2.29.63](https://indike.org/pramana/in.purana.vayu.2.29.63) kuśastambastapastepe putrārthī rājasattamaḥ. pūrṇe varṣasahasre vai śatakratumapaśyata .. 29.60 .. ### [2.29.64](https://indike.org/pramana/in.purana.vayu.2.29.64) tamugratapasaṃ dṛṣṭvā sahasrākṣaḥ purandaraḥ. samarthaḥ putrajanane svayamevāsya śāśvataḥ .. 29.61 .. ### [2.29.65](https://indike.org/pramana/in.purana.vayu.2.29.65) putratvaṃ kalpayāmāsa svayameva purandaraḥ. gādhirnāmābhavatputraḥ kauśikaḥ pākaśāsanaḥ .. 29.62 .. ### [2.29.66](https://indike.org/pramana/in.purana.vayu.2.29.66) paurukutsābhavadbhāryā gādhistasyāmajāyata. pūrvvaṃ kanyāṃ mahābhāgāṃ nāmnā satyavatīṃ śubhām. tāṃ gādhiputraḥ kāvyāya ṛcīkāya dadau prabhuḥ .. 29.63 .. ### [2.29.67](https://indike.org/pramana/in.purana.vayu.2.29.67) tasyāṃ putrastu vai bharttā bhārgavo bhṛgunandanaḥ. putrārthe sādhayāmāsa caruṃ gādhestathaiva ca .. 29.64 .. ### [2.29.68](https://indike.org/pramana/in.purana.vayu.2.29.68) tathā cāhūya sudhṛtiṛcīko bhārgavastadā. upayojyaścarurayaṃ tvayā mātrā ca teśubhe .. 29.65 .. ### [2.29.69](https://indike.org/pramana/in.purana.vayu.2.29.69) tasyāṃ janiṣyate putro dīptimān kṣatriyarṣabhaḥ. ajeyaḥ kṣatriyairyuddhe kṣatriyarṣabhasūdanaḥ .. 29.66 .. ### [2.29.70](https://indike.org/pramana/in.purana.vayu.2.29.70) tavāpi putraṃ kalyāṇi dhṛtintaṃ tapodhanam. śamātmakaṃ dvijaśreṣṭhaṃ carureṣa vidhāsyati .. 29.67 .. ### [2.29.71](https://indike.org/pramana/in.purana.vayu.2.29.71) evamuktvā tu tāṃ bhāryyāmṛcīko bhṛgunandanaḥ. tapasyābhirato nityamaraṇyaṃ praviveśa ha .. 29.68 .. ### [2.29.72](https://indike.org/pramana/in.purana.vayu.2.29.72) gādhiḥ sadārastu tadā ṛcīkāśramamabhyagāt. tīrthayātrāprasaṅgena sutāṃ draṣṭuṃ nareśvaraḥ .. 29.69 .. ### [2.29.73](https://indike.org/pramana/in.purana.vayu.2.29.73) carudvayaṃ gṛhītvā tu ṛṣeḥ satyavatī sadā. bhartturvacanamavyagrā hṛṣṭā mātre nyavedayat .. 29.70 .. ### [2.29.74](https://indike.org/pramana/in.purana.vayu.2.29.74) mātā tu tasyai daivena duhitre svaṃ caruṃ dadau . tasyāścarumathājñānādātmanaḥ sā cakāra ha .. 29.71 .. ### [2.29.75](https://indike.org/pramana/in.purana.vayu.2.29.75) atha satyavatī garbhaṃ kṣatriyāntakaraṃ śubham. dhārayāmāsa dīptena vapuṣā ghoradarśanā .. 29.72 .. ### [2.29.76](https://indike.org/pramana/in.purana.vayu.2.29.76) tamṛcīkastato dṛṣṭvā yogenāpyanumṛśya ca. tadābravīddvijaśreṣṭhaḥ svāṃ bhāryyāṃ varavarṇinīm .. 29.73 .. ### [2.29.77](https://indike.org/pramana/in.purana.vayu.2.29.77) mātuḥ siddhyati te bhadre caruvyatyāsahetunā. janiṣyati hi putraste krūrakarmātidāruṇaḥ .. 29.74 .. ### [2.29.78](https://indike.org/pramana/in.purana.vayu.2.29.78) mātā janiṣyate vāpi tathābhūtaṃ tapodhanam . viśvaṃ hi brahma tapasā mayā tatra samarpitam .. 29.75 .. ### [2.29.79](https://indike.org/pramana/in.purana.vayu.2.29.79) evamuktā mahābhāgā bhartrā satyavatī tadā. prasādayāmāsa patiṃ suto me nedṛśo bhavet. brāhmaṇāpasadastvanya ityukto munirabravīt .. 29.76 .. ### [2.29.80](https://indike.org/pramana/in.purana.vayu.2.29.80) naiṣa saṅkalpitaḥ kāmo mayā bhadre tathā tvayā . ugrakarmā bhavet putraḥ piturmātuśca kāraṇāt .. 29.77 .. ### [2.29.81](https://indike.org/pramana/in.purana.vayu.2.29.81) punaḥ satyavatī vākyamevamuktābravīdidam. iccham̐llokānapi mune sṛjethāḥ kiṃ punaḥ sutam .. 29.78 .. ### [2.29.82](https://indike.org/pramana/in.purana.vayu.2.29.82) śamātmakamṛjuṃ bharttaḥ putraṃ me dātumarhasi. kāmamevaṃvidhaḥ putro mama syāttu vada prabho .. 29.79 .. ### [2.29.83](https://indike.org/pramana/in.purana.vayu.2.29.83) mayyanyathā na śakyaṃ vai kartumeva dvijottama. tataḥ prasādamakarot sa tasyāstapaso balāt .. 29.80 .. ### [2.29.84](https://indike.org/pramana/in.purana.vayu.2.29.84) putre nāsti viśeṣo me pautre vā varavarṇini. tvayā yathoktaṃ vacanaṃ tathā bhadre bhaviṣyati .. 29.81 .. ### [2.29.85](https://indike.org/pramana/in.purana.vayu.2.29.85) tasmāt satyavatī putraṃ janayāmāsa bhārgavam. tapasyabhiratandāntaṃ jamadagniḥ śamātmakam .. 29.82 .. ### [2.29.86](https://indike.org/pramana/in.purana.vayu.2.29.86) bhṛgoścaruviparyāse raudravaiṣṇavayoḥ purā. yamanādvaiṣṇavasyāgnerjamadagnirajāyata .. 29.83 .. ### [2.29.87](https://indike.org/pramana/in.purana.vayu.2.29.87) viśvāmitraṃ tu dāyādaṃ gādhiḥ kuśikanandanaḥ. prāpya brahmarṣisahito (savitā) jagāma brahmaṇāvṛtaḥ .. 29.84 .. ### [2.29.88](https://indike.org/pramana/in.purana.vayu.2.29.88) sā hi satyavatī puṇyā satyavrataparāyaṇā. kauśikīti samākhyātā pravṛtteyaṃ mahānadī .. 29.85 .. ### [2.29.89](https://indike.org/pramana/in.purana.vayu.2.29.89) parisrutā mahābhāgā kauśikī saritāṃ varā. ikṣvākuvaṃśe tvabhavatsuveṇurnāma pārthivaḥ .. 29.86 .. ### [2.29.90](https://indike.org/pramana/in.purana.vayu.2.29.90) tasya kanyā mahābhāgā kāmalī nāma reṇukā. reṇu kāyāntu kāmalyāṃ tapodhṛtisamanvitaḥ. ārcīko janayāmāsa jamadagniḥ sudāruṇam .. 29.87 .. ### [2.29.91](https://indike.org/pramana/in.purana.vayu.2.29.91) sarvavidyāntagaṃ śreṣṭhaṃ dhanurvedasya pāragam. rāmaṃ kṣatriya hantāraṃ pradīptamiva pāvakam .. 29.88 .. ### [2.29.92](https://indike.org/pramana/in.purana.vayu.2.29.92) aurvvasyaivamṛcīkasya satyavatyāṃ mahāmanāḥ. jamadagnistato vīryyājjajñe brahmavidāṃ varaḥ. madhyamaśca śunaḥśephaḥ śunaḥpucchaḥ kaniṣṭhakaḥ .. 29.89 .. ### [2.29.93](https://indike.org/pramana/in.purana.vayu.2.29.93) viśvāmitrastu dharmātmā nāmnā viśvarathaḥ smṛtaḥ . jajñe bhṛguprasādena kauśikādvaṃśavarddhanaḥ .. 29.90 .. ### [2.29.94](https://indike.org/pramana/in.purana.vayu.2.29.94) viśvāmitrasya putrastu śunaḥśepho'bhavanmuniḥ. hariścandrasya yajñe tu paśutve niyutaḥ savai. devairdattaḥ sa vai yasmāddevarātastato'bhavat .. 29.91 .. ### [2.29.95](https://indike.org/pramana/in.purana.vayu.2.29.95) viśvāmitrasya putrāṇāṃ śunaḥ śepho'grajaḥ smṛtaḥ. madhucchando nayaścaiva kṛtadevau dhruvāṣṭakau .. 29.92 .. ### [2.29.96](https://indike.org/pramana/in.purana.vayu.2.29.96) kacchapaḥ pūraṇaścaiva viśvāmitrasutāstu vai. teṣāṃ gotrāṇi bahudhā kauśikānāṃ mahātmanām .. 29.93 .. ### [2.29.97](https://indike.org/pramana/in.purana.vayu.2.29.97) pārthivā devarātāśca yājñavalkyā samarṣaṇāḥ . udumbarā udumlānāstārakā yamamuñcatāḥ .. 29.94 .. ### [2.29.98](https://indike.org/pramana/in.purana.vayu.2.29.98) lohiṇyo reṇavaścaiva tathā kārīṣavaḥ smṛtāḥ. babhravaḥ pāṇinaścaiva dhyāvajapyāstathaiva ca .. 29.95 .. ### [2.29.99](https://indike.org/pramana/in.purana.vayu.2.29.99) śālāvatyā hiraṇyākṣāḥ syaṅkṛtā gālavāḥ smṛtāḥ . devalā yāmadūtāśca śālaṅkāyanabāṣkalāḥ .. 29.96 .. ### [2.29.100](https://indike.org/pramana/in.purana.vayu.2.29.100) dadāti bādarāścānye viśvāmitrasya dhīmataḥ. ṛṣyantaravivāṅyāste bahavaḥ śauśikāḥ smṛtāḥ .. 29.97 .. ### [2.29.101](https://indike.org/pramana/in.purana.vayu.2.29.101) kauśikāsośrumāścaiva tathānye saidhavāyanāḥ. pauroravasya puṇyasya brahmarṣeḥ kauśikasya tu .. 29.98 .. ### [2.29.102](https://indike.org/pramana/in.purana.vayu.2.29.102) dṛṣadvatīsutaścāpi viśvāmitrāttathāṣṭakaḥ. aṣṭakasya suto yo hi prokto jahnugaṇomayā .. 29.99 .. ### [2.29.103](https://indike.org/pramana/in.purana.vayu.2.29.103) ṛṣaya ūcuḥ .. ### [2.29.104](https://indike.org/pramana/in.purana.vayu.2.29.104) kiṃ lakṣaṇena dharmeṇa tapaseha śrutena vā. brāhmaṇyaṃ samanuprāptaṃ viśvāmitrādibhirnṛpaiḥ .. 29.100 .. ### [2.29.105](https://indike.org/pramana/in.purana.vayu.2.29.105) yena yonābhidhā nena brāhmaṇyaṃ kṣatriyā gatāḥ . viśeṣaṃ jñātumicchāmi tapasā dānatastathā .. 29.101 .. ### [2.29.106](https://indike.org/pramana/in.purana.vayu.2.29.106) evamuktastato vākyamabravīdidamarthavat. anyāyopagatairdravyairāhṛtya yajane dhiyā. dharmābhikāṃkṣī yajate na dharmaphalamaśnute .. 29.102 .. ### [2.29.107](https://indike.org/pramana/in.purana.vayu.2.29.107) dharmmaṃ caitaṃ samākhyāya pāpātmā puruṣādhamaḥ. dadāti dānaṃ viprebhyo lokānāṃ dambhakāraṇāt .. 29.103 .. ### [2.29.108](https://indike.org/pramana/in.purana.vayu.2.29.108) japaṃ kṛtvā tathā tīvraṃ dhanalobhānniraṅkuśaḥ. rāgamohānvito hyante pāvanārthaṃ dadāti yaḥ .. 29.104 .. ### [2.29.109](https://indike.org/pramana/in.purana.vayu.2.29.109) tena dattāni dānāni aphalāni bhavantyuta. tasya dharmmapravṛttasya hiṃsakasya durātmanaḥ .. 29.105 .. ### [2.29.110](https://indike.org/pramana/in.purana.vayu.2.29.110) evaṃ labdhvā dhanaṃ mohāddadato yajataśca ha. sakliṣṭakarmaṇo dānaṃ na tiṣṭhati durātmanaḥ .. 29.106 .. ### [2.29.111](https://indike.org/pramana/in.purana.vayu.2.29.111) nyāyāgatānāṃ dravyāṇāṃ tīrthe sampratipādanam. kāmānanabhisandhāya yajate ca dadāti ca .. 29.107 .. ### [2.29.112](https://indike.org/pramana/in.purana.vayu.2.29.112) sa dānaphalamāpnoti tacca dānaṃ sukhodayam. dānena bhogānāpnoti svargaṃ satyena gacchati .. 29.108 .. ### [2.29.113](https://indike.org/pramana/in.purana.vayu.2.29.113) tapasā tu sutaptena lokān viṣṭabhya tiṣṭhati . viṣṭabhya sa tu tejasvī lokeṣvānantyamaśnute .. 29.109 .. ### [2.29.114](https://indike.org/pramana/in.purana.vayu.2.29.114) dānācchreyāṃstathā yajño yajñācchreyastathā tapaḥ. saṃnyāsastapasaḥ śreyāṃstasmājjñānaṃ guruḥ smṛtam .. 29.110 .. ### [2.29.115](https://indike.org/pramana/in.purana.vayu.2.29.115) śrṛyante hi tapaḥsiddhāḥ kṣātropetā dvijātayaḥ. viśvāmitro narapatirmāndhātā saṃkṛtiḥ kapiḥ .. 29.111 .. ### [2.29.116](https://indike.org/pramana/in.purana.vayu.2.29.116) kapeśca purukutsaśca satyaścānṛhavānṛthuḥ ārṣṭiṣeṇo'mīḍhaśca bhāgānyonyastathaiva ca .. 29.112 .. ### [2.29.117](https://indike.org/pramana/in.purana.vayu.2.29.117) kakṣīvaścaiva śijayastathānye ca mahārathāḥ. rathītaraśca rundaśca viṣṇuvṛddhādayo nṛpāḥ .. 29.113 .. ### [2.29.118](https://indike.org/pramana/in.purana.vayu.2.29.118) kṣātropetāḥ smṛtā hyete tapasā ṛṣitāṅgatāḥ . ete rājarṣayaḥ sarvve siddhiṃ sumahatīṅgatāḥ. ata ūrddhvaṃ pravakṣyāmi ayorvaṃśaṃ mahātmanaḥ .. 29.114 .. ### [2.29.119](https://indike.org/pramana/in.purana.vayu.2.29.119) iti śrīmahāpurāṇe vāyuprokte candravaṃśakīrtanaṃ nāmonatriśo'dhyāyaḥ .. 29 .. \* ## Linked texts (3) - [Vulgate](https://indike.org/pramana/in.lit.mahabharata.harivamsa*vulgate.1.26.1) — Sanskrit - [Brahmapurāṇa](https://indike.org/pramana/in.purana.brahma.10.10) — Vyāsa, Sanskrit - [Brahmāṇḍapurāṇa](https://indike.org/pramana/in.purana.brahmanda.2.66.67) — Vyāsa, Sanskrit --- Source: [https://indike.org/pramana/in.purana.vayu.2.29](https://indike.org/pramana/in.purana.vayu.2.29) · Pramāṇa