[Pramāṇa](https://indike.org/pramana/) › [Indian literature](https://indike.org/pramana/in) › [Purāṇas](https://indike.org/pramana/in.purana) › [Vayupurana](https://indike.org/pramana/in.purana.vayu) › 2.30 # Vayupurana 2.30: adhyāyaḥ 30 Vāyupurāṇa 2.30 - **Language:** Sanskrit ### adhyāyaḥ 30 ### [2.30.1](https://indike.org/pramana/in.purana.vayu.2.30.1) sūta uvāca.. ### [2.30.2](https://indike.org/pramana/in.purana.vayu.2.30.2) ete putrā mahātmānaḥ pañcaivāsan mahābalāḥ. svarbhānutanayā viprāḥ prabhāyāṃ jajñire nṛpāḥ .. 30.1 .. ### [2.30.3](https://indike.org/pramana/in.purana.vayu.2.30.3) nahuṣaḥ prathamasteṣāṃ putradharmmā tataḥ smṛtaḥ. dharmmavṛddhātmajaścaiva sutahotro mahāyaśāḥ .. 30.2 .. ### [2.30.4](https://indike.org/pramana/in.purana.vayu.2.30.4) sutahotrasya dāyādāstrayaḥ paramadhārmmikāḥ. kāśaḥ śalaśca dvāvetau tathā gṛtsamadaḥ prabhuḥ .. 30.3 .. ### [2.30.5](https://indike.org/pramana/in.purana.vayu.2.30.5) putro gṛtsamadasyāpi śunako yasya śaunakaḥ. brāhmaṇāḥ kṣatriyāścaiva vaiśyāḥ śūdrāstathaiva ca .. 30.4 .. ### [2.30.6](https://indike.org/pramana/in.purana.vayu.2.30.6) etasya vaṃśe sambhūtā vicitraiḥ karmmabhirdvijāḥ. śalātmajo hyārṣṭiṣeṇaścarantastasya cātmajaḥ .. 30.5 .. ### [2.30.7](https://indike.org/pramana/in.purana.vayu.2.30.7) śaunakāścārṣṭiṣeṇāśca kṣātropetā dvijātayaḥ. kāśasya kāśayo rāṣṭaḥ putro dīrghatapāstathā .. 30.6 .. ### [2.30.8](https://indike.org/pramana/in.purana.vayu.2.30.8) dharmmaśca dīrghatapaso vidvān dhanvantaristataḥ. tapasā sumahātejā jāto vṛddhasya dhīmataḥ. athainamṛṣayaḥ procuḥ sūtaṃ vākyamimaṃ punaḥ .. 30.7 .. ### [2.30.9](https://indike.org/pramana/in.purana.vayu.2.30.9) ṛṣaya ūcuḥ .. ### [2.30.10](https://indike.org/pramana/in.purana.vayu.2.30.10) kathaṃ dhanvantarirddevo mānuṣeṣviha jajñivān. etadveditumicchāmastato brūhi priyaṃ tathā .. 30.8 .. ### [2.30.11](https://indike.org/pramana/in.purana.vayu.2.30.11) sūta uvāca.. ### [2.30.12](https://indike.org/pramana/in.purana.vayu.2.30.12) dhanvantareḥ sambhavo'yaṃ śrūyatāmiha vai dvijāḥ. sa sambhūtaḥ samudrānte mathyamāne'mṛte purā .. 30.9 .. ### [2.30.13](https://indike.org/pramana/in.purana.vayu.2.30.13) utpannaḥ sakalāt pūrvvaṃ sarvvataśca śriyāvṛtaḥ. sarvvasaṃsiddhakāyaṃ taṃ dṛṣṭvā viṣṭambhitaḥ sthitaḥ. ajastvamiti hovāca tasmādajastu saḥ smṛtaḥ .. 30.10 .. ### [2.30.14](https://indike.org/pramana/in.purana.vayu.2.30.14) ajaḥ provāca viṣṇuṃ taṃ tanayo'smi tava prabho. vidhatsva bhāgaṃ sthānañca mama loke surottama .. 30.11 .. ### [2.30.15](https://indike.org/pramana/in.purana.vayu.2.30.15) evamuktaḥ sudṛṣṭvā tu tathā provāca sa prabhuḥ . kṛto yajñavibhāgastu yajñiyaurhe suraistathā .. 30.12 .. ### [2.30.16](https://indike.org/pramana/in.purana.vayu.2.30.16) vedeṣu vidhiyuktañca vidhihotraṃ maharṣibhiḥ. na śakyamiha homo vai tulyaṃ karttuṃ kadācana .. 30.13 .. ### [2.30.17](https://indike.org/pramana/in.purana.vayu.2.30.17) arvāksuto'si he deva nāmamantro'si vai prabho. dvitīyāyāntu sambhūtyāṃ loke khyātiṅgamiṣyasi .. 30.14 .. ### [2.30.18](https://indike.org/pramana/in.purana.vayu.2.30.18) aṇimādiyutā siddhirgarbhasthasya bhaviṣyati. tenaiva ca śarīreṇa devatvaṃ prāpsyasi prabho. cārumantrairghṛtairgandhairyakṣyanti tvāṃ dvijātayaḥ .. 30.15 .. ### [2.30.19](https://indike.org/pramana/in.purana.vayu.2.30.19) atha ca tvaṃ punaścaiva āyurvedaṃ vidhāsyasi. avaśyambhāvī hyartho'yaṃ prāgdiṣṭastvabjayoninā .. 30.16 .. ### [2.30.20](https://indike.org/pramana/in.purana.vayu.2.30.20) dvitīyaṃ dvāparaṃ prāpya bhavitā tvaṃ na saṃśayaḥ. tasmāt tasmai varaṃ dattvā viṣṇurantardaghe tataḥ .. 30.17 .. ### [2.30.21](https://indike.org/pramana/in.purana.vayu.2.30.21) dvitīye dvāpare prāpte saunahotraḥ sa kāśirāṭ. putrakāma stapastepe nṛpo dīrghatapāstathā .. 30.18 .. ### [2.30.22](https://indike.org/pramana/in.purana.vayu.2.30.22) ajaṃ devantu putrārthe hyārirādhayiṣurnṛpaḥ. vareṇa cchandayāmāsa prīto dhanvantarirnṛpam .. 30.19 .. ### [2.30.23](https://indike.org/pramana/in.purana.vayu.2.30.23) nṛpa uvāca.. ### [2.30.24](https://indike.org/pramana/in.purana.vayu.2.30.24) bhagavan yadi tuṣṭastvaṃ putro me dhṛtimān bhava. tatheti samanujñāya tatraivāntaradhīyata .. 30.20 .. ### [2.30.25](https://indike.org/pramana/in.purana.vayu.2.30.25) tasya gehe samutpanno devo dhanvantaristadā. kāśirājo mahārājaḥ sarvvarogapraṇāśanaḥ .. 30.21 .. ### [2.30.26](https://indike.org/pramana/in.purana.vayu.2.30.26) āyurvedaṃ bharadvājaścakāra sabhiṣakkriyam. tamaṣṭadhā punarvyasya śiṣyebhyaḥ pratyapādayat .. 30.22 .. ### [2.30.27](https://indike.org/pramana/in.purana.vayu.2.30.27) dhanvantarisutaścāpi ketumāniti viśrutaḥ. atha ketumataḥ putro vibho bhīmaratho nṛpaḥ. divodāsa iti khyāto vārāṇasyadhipo'bhavat .. 30.23 .. ### [2.30.28](https://indike.org/pramana/in.purana.vayu.2.30.28) etasminneva kāle tu purīṃ vārāṇasīṃ purā. śūnyāṃ viveśayāmāsa kṣeṇako nāma rākṣasaḥ .. 30.24 .. ### [2.30.29](https://indike.org/pramana/in.purana.vayu.2.30.29) śaptā hi sā purī pūrvvaṃ nikumbhena mahātmanā. śūnyā varṣasahasraṃ vai bhavitrīti punaḥ punaḥ .. 30.25 .. ### [2.30.30](https://indike.org/pramana/in.purana.vayu.2.30.30) tasyāntu śaptamātrāyāṃ divodāsaḥ prajeśvaraḥ. viṣayānte purīṃ ramyāṃ gomatyāṃ sannyaveśayat .. 30.26 .. ### [2.30.31](https://indike.org/pramana/in.purana.vayu.2.30.31) ṛṣa ūcuḥ.. ### [2.30.32](https://indike.org/pramana/in.purana.vayu.2.30.32) vārāṇasīṃ kimarthantāṃ nikumbhaḥ śaptavān purā. nikumbhaścāpi dharmmātmā siddhakṣetraṃ śaśāpa yaḥ .. 30.27 .. ### [2.30.33](https://indike.org/pramana/in.purana.vayu.2.30.33) sūta uvāca.. ### [2.30.34](https://indike.org/pramana/in.purana.vayu.2.30.34) divodāsastu rājarṣirnagarīṃ prāpya pārthivaḥ. vasate sa mahātejāḥ sphītāyāṃ vai narādhipaḥ .. 30.28 .. ### [2.30.35](https://indike.org/pramana/in.purana.vayu.2.30.35) etasminneva kāle tu kṛtadāro maheśvaraḥ. devyāḥ sa priyakāmastu vasānaśca surāntike .. 30.29 .. ### [2.30.36](https://indike.org/pramana/in.purana.vayu.2.30.36) devājñayā pāriṣadā viśvarūpāstapodhanāḥ. pūrvoktai rūpaviśeṣastoṣayanti maheśvarīm .. 30.30 .. ### [2.30.37](https://indike.org/pramana/in.purana.vayu.2.30.37) hṛṣyati tairmahādevo menā naiva tu hṛṣyati. jugupsate sā nityañca devaṃ devīṃ tathaiva ca .. 30.31 .. ### [2.30.38](https://indike.org/pramana/in.purana.vayu.2.30.38) mama pārśve tvanācārastava bharttā maheśvaraḥ. daridraḥ sarva eveha akliṣṭaṃ laḍate'naghe .. 30.32 .. ### [2.30.39](https://indike.org/pramana/in.purana.vayu.2.30.39) mātrā tathoktā vacasā strīsvabāvānnacākṣamat. smitaṃ kṛtvā tu varadā harapārśvamathāgamat .. 30.33 .. ### [2.30.40](https://indike.org/pramana/in.purana.vayu.2.30.40) viṣaṇṇavadanā devī mahādevamabhāṣata. neha vatsyāmyahaṃ deva naya māṃ svaṃ niveśanam .. 30.34 .. ### [2.30.41](https://indike.org/pramana/in.purana.vayu.2.30.41) tathoktastu mahādevaḥ sarvāṃllokānavekṣya ha. vāsārthaṃ rocayāmāsa pṛthivyāṃ tu dvijottamāḥ. vārāṇasīṃ mahātejāḥ siddhakṣetraṃ maheśvaraḥ .. 30.35 .. ### [2.30.42](https://indike.org/pramana/in.purana.vayu.2.30.42) divo dāsena tāṃ jñātvā niviṣṭānnagarīṃ bhavaḥ. pārśvāsthaṃ sa samāhūya gaṇeśaṃ kṣemakaṃ bravīt .. 30.36 .. ### [2.30.43](https://indike.org/pramana/in.purana.vayu.2.30.43) gaṇeśvara purīṅgatvā sūnyāṃ vārāṇasīṃ kuru. mṛdunā cābyupāyena ativīryaḥ sa pārthivaḥ .. 30.37 .. ### [2.30.44](https://indike.org/pramana/in.purana.vayu.2.30.44) tato gatvā nikumbhastu purīṃ vārāṇasīṃ purā . svapne sandarśayāmāsa maṅkanaṃ nāma nāpitam .. 30.38 .. ### [2.30.45](https://indike.org/pramana/in.purana.vayu.2.30.45) śreyaste'haṃ kariṣyāmi sthānaṃ me rocayānagha. madrūpāṃ pratimāṃ kṛtvā nagaryyante niveśaya .. 30.39 .. ### [2.30.46](https://indike.org/pramana/in.purana.vayu.2.30.46) tathā svapne yathā dṛṣṭaṃ sarvaṃ kāritavān dvijāḥ. nagarīdvāryanujñāpya rājānantu yathāvidhi .. 30.40 .. ### [2.30.47](https://indike.org/pramana/in.purana.vayu.2.30.47) pūjā tu mahatī caiva nityameva prayujyate. gandhairdhūpaiśca mālyaiśca prekṣaṇīyaistathaiva ca .. 30.41 .. ### [2.30.48](https://indike.org/pramana/in.purana.vayu.2.30.48) annapradānayuktaiśca atyadbhutamivābhavat. evaṃ sampūjyate tatra nityameva gaṇeśvaraḥ .. 30.42 .. ### [2.30.49](https://indike.org/pramana/in.purana.vayu.2.30.49) tato varasahasrāṇi nagarāṇāṃ prayacchati . putrān hiraṇyamāyūṃṣi sarvvakāmāṃstathaiva ca .. 30.43 .. ### [2.30.50](https://indike.org/pramana/in.purana.vayu.2.30.50) rājñastu mahiṣī śreṣṭhā suyaśā nāma viśrutā. putrārthamāgatā sādhvī rājñā devī pracoditā .. 30.44 .. ### [2.30.51](https://indike.org/pramana/in.purana.vayu.2.30.51) pūjāntu vipulāṃ kṛtvā devī putrānayācata. punaḥ punarathāgamya bahuśaḥ putrakāraṇāt .. 30.45 .. ### [2.30.52](https://indike.org/pramana/in.purana.vayu.2.30.52) na prayacchati putrāṃstu nikumbhaḥ kāraṇena tu. rājā yadi tat krudhyeta tataḥ kiñcit pravarttate .. 30.46 .. ### [2.30.53](https://indike.org/pramana/in.purana.vayu.2.30.53) atha dīrgheṇa kālena krodho rājānamāviśat. bhūtaṃ tvidaṃ mahādvāri nagarāṇāṃ prayacchati .. 30.47 .. ### [2.30.54](https://indike.org/pramana/in.purana.vayu.2.30.54) prītyā varāṃśca śataśo na kiñcittu pravarttate. māmakaiḥ pūjyate nityaṃ nagaryāṃ mama caiva tu .. 30.48 .. ### [2.30.55](https://indike.org/pramana/in.purana.vayu.2.30.55) tatrārccitaśca bahuśo devyā me tatra kāraṇāt . na dadāti ca putraṃ me kṛtaghno bahubhojanaḥ .. 30.49 .. ### [2.30.56](https://indike.org/pramana/in.purana.vayu.2.30.56) ato nārhati pūjāntu matsakāśāt kathañcana. tasmāttu nāśayiṣyāmi tasya sthānaṃ durātmanaḥ .. 30.50 .. ### [2.30.57](https://indike.org/pramana/in.purana.vayu.2.30.57) evaṃ tu saviniścitya durātmā rāja kilbiṣī. sthānaṃ gaṇapatestasya nāśayāmāsa durmatiḥ .. 30.51 .. ### [2.30.58](https://indike.org/pramana/in.purana.vayu.2.30.58) bhagnamāyatanaṃ dṛṣṭvā rājānamagamat prabhuḥ. yasmādṛte'parādhaṃ me tvayā sthānaṃ vinā śitam .. 30.52 .. ### [2.30.59](https://indike.org/pramana/in.purana.vayu.2.30.59) akasmāt tu purī śūnyā bhavitrī te narādhipa. tatastena tu śāpena śūnyā vārāṇasī tathā .. 30.53 .. ### [2.30.60](https://indike.org/pramana/in.purana.vayu.2.30.60) śaptāṃ purīṃ nikumbhastu mahādevamathānayat. śūnyāṃ purīṃ mahādevo nirmmame paramātmanā .. 30.54 .. ### [2.30.61](https://indike.org/pramana/in.purana.vayu.2.30.61) tulyāṃ devavibhūtyāstu devyāścaiva mahātmanaḥ. ramate tatra vai devī ramamāṇe maheśvaraḥ .. 30.55 .. ### [2.30.62](https://indike.org/pramana/in.purana.vayu.2.30.62) na ratiṃ tatra vai devī labhate gṛhavismayāt. devyāḥ krīḍārthamīśāno devo vākyamathābravīt .. 30.56 .. ### [2.30.63](https://indike.org/pramana/in.purana.vayu.2.30.63) nāhaṃ veśma vimokṣyāmi avimuktaṃ hi me gṛham. prahasyaināmathovāca avimuktaṃ hi me gṛham .. 30.57 .. ### [2.30.64](https://indike.org/pramana/in.purana.vayu.2.30.64) nāhaṃ devi gamiṣyāmi gacchasveha ramāmyaham. tasmāttadavimuktaṃ hi proktaṃ devena vai svayam .. 30.58 .. ### [2.30.65](https://indike.org/pramana/in.purana.vayu.2.30.65) evaṃ vārāṇasī śaptā avimuktaṃ ca kīrttitam. yasmin vasati vai devaḥ sarvadevanamaskṛtaḥ. yugeṣu triṣu dharmātmā saha devyā maheśvaraḥ .. 30.59 .. ### [2.30.66](https://indike.org/pramana/in.purana.vayu.2.30.66) antarddhānaṃ kalau yāti tatpurantu mahātmanaḥ. antarhite pure tasmin purī sā vasate punaḥ .. 30.60 .. ### [2.30.67](https://indike.org/pramana/in.purana.vayu.2.30.67) evaṃ vārāṇasī śaptā niveśaṃ punarāgatā. bhadraśreṇyasya putrāṇāṃ śatamuttamadhanvinām .. 30.61 .. ### [2.30.68](https://indike.org/pramana/in.purana.vayu.2.30.68) hatvā niveśayāmāsa divodāso narādhipaḥ. bhadraśreṇyasya rājyantu hṛtantena balīyasā .. 30.62 .. ### [2.30.69](https://indike.org/pramana/in.purana.vayu.2.30.69) bhadraśreṇyasya putrastu durdamo nāma nāmataḥ. divodāsena bāleti ghṛṇayā sa vivarjitaḥ .. 30.63 .. ### [2.30.70](https://indike.org/pramana/in.purana.vayu.2.30.70) divodāsādṝṣadvatyāṃ vīro jajñe pratarddanaḥ. tena putreṇa bālena prahṛtaṃ tasya vai punaḥ .. 30.64 .. ### [2.30.71](https://indike.org/pramana/in.purana.vayu.2.30.71) vairasyāntaṃ mahārājñā tadā tena vidhatsatā. pratarddanasya putrau dvau vatso gargaśca viśrutaḥ .. 30.65 .. ### [2.30.72](https://indike.org/pramana/in.purana.vayu.2.30.72) vatsaputro hyalarkastu sannatistasya cātmajaḥ . alarkaṃ prati rājarṣirgītaślokau purātanau .. 30.66 .. ### [2.30.73](https://indike.org/pramana/in.purana.vayu.2.30.73) ṣaṣṭivarṣasahasrāṇi ṣaṣṭivarṣaśatāni ca. yuvā rūpeṇa sampanno hyalarkaḥ kāśisattamaḥ .. 30.67 .. ### [2.30.74](https://indike.org/pramana/in.purana.vayu.2.30.74) lopāmudrā prasādena paramāyuravāptavān .. 30.68 .. ### [2.30.75](https://indike.org/pramana/in.purana.vayu.2.30.75) śāpasyānte mahābāhurhatvā kṣemakarākṣasam. ramyāmāvāsayāmāsa purīṃ vārāṇasīṃ nṛpaḥ .. 30.69 .. ### [2.30.76](https://indike.org/pramana/in.purana.vayu.2.30.76) sannaterapi dāyādaḥ sunītho nāma dhārmikaḥ. sunīthasya tu dāyādaḥ suketurnāma dhārmmikaḥ .. 30.70 .. ### [2.30.77](https://indike.org/pramana/in.purana.vayu.2.30.77) suketutanayaścāpi dharmaketuriti śrutiḥ. dharmaketostu dāyādaḥ satyaketurmahārathaḥ .. 30.71 .. ### [2.30.78](https://indike.org/pramana/in.purana.vayu.2.30.78) satyaketusutaścāpi vibhurnāma prajeśvaraḥ. suvibhustu vibhoḥ putraḥ sukumārastataḥ smṛtaḥ .. 30.72 .. ### [2.30.79](https://indike.org/pramana/in.purana.vayu.2.30.79) sukumārasya putrastu dhṛṣṭaketuḥ sa dhārmmikaḥ. dhuṣṭaketostu dāyādo veṇuhotraḥ prajeśvaraḥ .. 30.73 .. ### [2.30.80](https://indike.org/pramana/in.purana.vayu.2.30.80) veṇuhotrasutaścāpi gārgyo vai nāma viśrutaḥ. gārgyasya gargabhūmistu vātsyo vatsasya dhīmataḥ .. 30.74 .. ### [2.30.81](https://indike.org/pramana/in.purana.vayu.2.30.81) brāhmaṇāḥ kṣatriyāścaiva tayoḥ putrāḥ sudhārmmikāḥ. vikrāntā balavantaśca siṃhatulyaparākramāḥ .. 30.75 .. ### [2.30.82](https://indike.org/pramana/in.purana.vayu.2.30.82) ityete kāśyapāḥ proktā rajerapi nibodhata. rajeḥ putraśatānyāsan pañca vīryavato bhuvi. rājeyamiti vikhyātaṃ kṣatramindrabhayāvaham .. 30.76 .. ### [2.30.83](https://indike.org/pramana/in.purana.vayu.2.30.83) tadā daivāsure yuddhe samutpanne sudāruṇe. devāścaivāsurāścaiva pitāmahamathābruvan .. 30.77 .. ### [2.30.84](https://indike.org/pramana/in.purana.vayu.2.30.84) āvayorbhagavān yuddhe vijetā ko bhaviṣyati. brūhi naḥ sarvvalokeśa śrotumicchāmahe vayam .. 30.78 .. ### [2.30.85](https://indike.org/pramana/in.purana.vayu.2.30.85) brahmovāca.. ### [2.30.86](https://indike.org/pramana/in.purana.vayu.2.30.86) yeṣāmarthāya saṃgrāme rajirāttāyudhaḥ prabhuḥ. yotsyate te vijeṣyanti trīllom̐kānnātra saṃśayaḥ .. 30.79 .. ### [2.30.87](https://indike.org/pramana/in.purana.vayu.2.30.87) rajiryatastato lakṣmīryato lakṣmīstato dhṛtiḥ. yato dhṛtistato dharmo yato dharmastato jayaḥ .. 30.80 .. ### [2.30.88](https://indike.org/pramana/in.purana.vayu.2.30.88) taddevā dānavāḥ sarve tataḥ śrutvā rajerjayam. abhyayurjayamicchantaḥ stuvanto rājasattamam .. 30.81 .. ### [2.30.89](https://indike.org/pramana/in.purana.vayu.2.30.89) te hṛṣṭamanasaḥ śarve rājānaṃ devadānavāḥ. ūcurasmajjayāya tvaṃ gṛhāṇa varakārmukam .. 30.82 .. ### [2.30.90](https://indike.org/pramana/in.purana.vayu.2.30.90) rajiruvāca.. ### [2.30.91](https://indike.org/pramana/in.purana.vayu.2.30.91) ahañjeṣyāmi no yuddhe devān śakrapurogamān. indro bhavāmi dharmātmā tato yotsyāmi saṃyuge .. 30.83 .. ### [2.30.92](https://indike.org/pramana/in.purana.vayu.2.30.92) dānavā ūcuḥ.. ### [2.30.93](https://indike.org/pramana/in.purana.vayu.2.30.93) asmākamindraḥ prahlādastasyārthe vijayāmahe. asmistu samaye rājaṃstiṣṭhethādeva no'diteḥ .. 30.84 .. ### [2.30.94](https://indike.org/pramana/in.purana.vayu.2.30.94) sa tatheti bruvanneva devairapyabhicoditaḥ. bhaviṣyasīndro jitveti devairapi nimantritaḥ .. 30.85 .. ### [2.30.95](https://indike.org/pramana/in.purana.vayu.2.30.95) jaghāna dānavān sarvvān samakṣaṃ vajrapāṇinaḥ. sa vipranaṣṭāṃ devānāṃ paramaśrīḥ śriyaṃ vaśī .. 30.86 .. ### [2.30.96](https://indike.org/pramana/in.purana.vayu.2.30.96) nihatya dānavān sarvvān vyājahāra rajiḥ prabhuḥ. taṃ tathā tu rajhiṃ tatra devaissaha śatakratuḥ .. 30.87 .. ### [2.30.97](https://indike.org/pramana/in.purana.vayu.2.30.97) rajiputro'hamityuktvā punarevābravīdvacaḥ. īndro'si rājan devānāṃ sarveṣānnātra saṃśayaḥ. yasyāhamindraputraste khyātiṃ yāsyāmi śatruhan .. 30.88 .. ### [2.30.98](https://indike.org/pramana/in.purana.vayu.2.30.98) sa tu śakravacaḥ śrutvā vañcitastena māyayā. tathetyevābravīdrājā prīyamāṇaḥ śatakratum .. 30.89 .. ### [2.30.99](https://indike.org/pramana/in.purana.vayu.2.30.99) tasmiṃstu devasadṛśe divaṃ prāpte mahīpatau. dāyādyamindrādājahrurācāraṃ tanayā rajeḥ .. 30.90 .. ### [2.30.100](https://indike.org/pramana/in.purana.vayu.2.30.100) tāni putraśatānyasya tacca sthānaṃ śacīpateḥ. samakrāmanta bahudhā svargalokaṃ triviṣṭapam .. 30.91 .. ### [2.30.101](https://indike.org/pramana/in.purana.vayu.2.30.101) tataḥ kāle bahutithe satīte mahābalaḥ. hṛtarājyo'bravīcchakro hṛtabhāgo bṛhaspatim .. 30.92 .. ### [2.30.102](https://indike.org/pramana/in.purana.vayu.2.30.102) badarīphalamātraṃ vai puroḍāśaṃ vidhatsva me. brahmarṣe yena tiṣṭheyaṃ tejasāpyāyitastataḥ .. 30.93 .. ### [2.30.103](https://indike.org/pramana/in.purana.vayu.2.30.103) brahman kṛśo'yaṃ vimanā hṛtarājyo hṛtāśanaḥ. hataujā durbalo mūḍho rajiputraiḥ prasīda me .. 30.94 .. ### [2.30.104](https://indike.org/pramana/in.purana.vayu.2.30.104) bṛhaspatiruvāca.. ### [2.30.105](https://indike.org/pramana/in.purana.vayu.2.30.105) yadyevaṃ coditaḥ śakra tvayā syāṃ pūrvvameva hi. nābhaviṣyat tvatpriyārthaṃ nākarttavyaṃ mamānagha .. 30.95 .. ### [2.30.106](https://indike.org/pramana/in.purana.vayu.2.30.106) prayatiṣyāmi devendra taddhitārthaṃ mahādyute. yathā bhāgañca rājyañca acirāt pratipatsyase .. 30.96 .. ### [2.30.107](https://indike.org/pramana/in.purana.vayu.2.30.107) tathā śakra gamiṣyāmi mābhūtte viklavaṃ manaḥ. tataḥ karmma cakārāsya tejaḥsaṃvarddhanaṃ mahat .. 30.97 .. ### [2.30.108](https://indike.org/pramana/in.purana.vayu.2.30.108) teṣāñca buddhisaṃmohamakarodbuddhisattamaḥ. te yadā sasutā mūḍhā rāgotpanna vidharmmiṇaḥ .. 30.98 .. ### [2.30.109](https://indike.org/pramana/in.purana.vayu.2.30.109) brahmadviṣaśca saṃvṛttā hatavīryyaparākramāḥ. tato lebhe suraiśvaryamaindrasthānaṃ tathottamam .. 30.99 .. ### [2.30.110](https://indike.org/pramana/in.purana.vayu.2.30.110) hatvā rajisutān sarvānkāmakrodhaparāyaṇān. ya idaṃ pāvanaṃ sthānaṃ pratiṣṭhānaṃ śatakratoḥ. śrṛṇuyādvā rajervāpi na sa daurātmyamāpnuyāt .. 30.100 .. ### [2.30.111](https://indike.org/pramana/in.purana.vayu.2.30.111) iti śrīmahāpurāṇe vāyuprokte rajiyuddhaṃ nāma triṃśo'dhyāyaḥ .. 30 .. \* ## Linked texts (4) - [Brahmāṇḍapurāṇa](https://indike.org/pramana/in.purana.brahmanda.2.67.3) — Vyāsa, Sanskrit - [Vulgate](https://indike.org/pramana/in.lit.mahabharata.harivamsa*vulgate.1.29.6) — Sanskrit - [Brahmapurāṇa](https://indike.org/pramana/in.purana.brahma.11.32) — Vyāsa, Sanskrit - [Critical edition (Baroda)](https://indike.org/pramana/in.lit.ramayana.valmiki*crit.6.21.5) — Sanskrit --- Source: [https://indike.org/pramana/in.purana.vayu.2.30](https://indike.org/pramana/in.purana.vayu.2.30) · Pramāṇa