[Pramāṇa](https://indike.org/pramana/) › [Indian literature](https://indike.org/pramana/in) › [Purāṇas](https://indike.org/pramana/in.purana) › [Vayupurana](https://indike.org/pramana/in.purana.vayu) › 2.31 # Vayupurana 2.31: adhyāyaḥ 31 Vāyupurāṇa 2.31 - **Language:** Sanskrit ### adhyāyaḥ 31 ### [2.31.1](https://indike.org/pramana/in.purana.vayu.2.31.1) ..ṛṣayaḥ ūcuḥ.. ### [2.31.2](https://indike.org/pramana/in.purana.vayu.2.31.2) marutena kathaṃ kanyā rājñe dattā mahātmanā. kiṃvīryāśca mahātmāno jātā marutakanyakāḥ .. 31.1 .. ### [2.31.3](https://indike.org/pramana/in.purana.vayu.2.31.3) ..sūta uvāca.. ### [2.31.4](https://indike.org/pramana/in.purana.vayu.2.31.4) āhavan taṃ marutsomamannakāmaḥ prajeśvaram. māsi māsi mahātejāḥ ṣaṣṭisaṃvatsarānnṛpaḥ .. 31.2 .. ### [2.31.5](https://indike.org/pramana/in.purana.vayu.2.31.5) tena te marutastasya marutsomena toṣitāḥ. akṣayyānnaṃ daduḥ prītāḥ sarvakāmaparicchadam .. 31.3 .. ### [2.31.6](https://indike.org/pramana/in.purana.vayu.2.31.6) annaṃ tasya sakṛtpakvamahorātre na kṣīyate. koṭiśo dīyamānaṃ ca sūryyasyodayanādapi .. 31.4 .. ### [2.31.7](https://indike.org/pramana/in.purana.vayu.2.31.7) mitrājyotistu kanyāyāṃ marutasya ca dhīmataḥ. tasmājjātā mahāsattvā dharmajñā mokṣadarśinaḥ .. 31.5 .. ### [2.31.8](https://indike.org/pramana/in.purana.vayu.2.31.8) saṃnyasya gṛhadharmāṇi vairāgyaṃ samupasthitāḥ. yatidharmamavāpyeha brahmabhūyāya te gatāḥ .. 31.6 .. ### [2.31.9](https://indike.org/pramana/in.purana.vayu.2.31.9) anapāyastato jātastadā dharmapradattavān. kṣatradharmastato jātaḥ pratipakṣo mahātapāḥ .. 31.7 .. ### [2.31.10](https://indike.org/pramana/in.purana.vayu.2.31.10) pratipakṣasutaścāpi sañjayo nāma viśrutaḥ. sañjayasya jayaḥ putro vijayastasya jagmivān .. 31.8 .. ### [2.31.11](https://indike.org/pramana/in.purana.vayu.2.31.11) vijayasya jayaḥ putrastasya haryandvataḥ smṛtaḥ . haryandutastato rājā sahadevaḥ pratāpavān .. 31.9 .. ### [2.31.12](https://indike.org/pramana/in.purana.vayu.2.31.12) sahadevasya dharmātmā adīna iti viśrutaḥ. adīnasya jayatsenastasya putro'tha saṃkṛtiḥ .. 31.10 .. ### [2.31.13](https://indike.org/pramana/in.purana.vayu.2.31.13) saṃkṛterapi dharmātmā kṛtadharmā mahāyaśāḥ. ityete kṣatra dharmāṇo nahuṣasya nibodhata .. 31.11 .. ### [2.31.14](https://indike.org/pramana/in.purana.vayu.2.31.14) nahuṣasya tu dāyādāḥ ṣaḍindropamatejasaḥ. utpannāḥ pitṛkanyāyāṃ virajāyāṃ mahaujasaḥ .. 31.12 .. ### [2.31.15](https://indike.org/pramana/in.purana.vayu.2.31.15) yatiryayātiḥ saṃyātirāyātiḥ pañca tudvayaḥ. yatirjyeṣṭhastu teṣāṃ vai yayātistu tato'varaḥ .. 31.13 .. ### [2.31.16](https://indike.org/pramana/in.purana.vayu.2.31.16) kākutsthakanyāṃ gāṃ nāma lebhe patnīṃ yatistadā. saṃyātirmo kṣamāsthāya brahmabhūto'bhavanmuniḥ .. 31.14 .. ### [2.31.17](https://indike.org/pramana/in.purana.vayu.2.31.17) teṣāṃ madhye tu pañcānāṃ yayātiḥ pṛthivīpatiḥ. devayānimuśanasaḥ sutāṃ bhāryāmavāpa ha .. 31.15 .. ### [2.31.18](https://indike.org/pramana/in.purana.vayu.2.31.18) śarmiṣṭhā māsurīṃ caiva tanayāṃ vṛṣaparvaṇaḥ. yaduṃ ca turvasuṃ caiva devayānirvyajāyata .. 31.16 .. ### [2.31.19](https://indike.org/pramana/in.purana.vayu.2.31.19) druhyuñcānuñca pūruñca śarmiṣṭhā vārṣaparvaṇī . ajījananmahāvīryān sutāndevasutopamān .. 31.17 .. ### [2.31.20](https://indike.org/pramana/in.purana.vayu.2.31.20) rathantasmai dadau rudraḥ prītaḥ paramabhāsvaram. asaṅgaṃ kāñcanaṃ divyamakṣayau ca maheṣudhī .. 31.18 .. ### [2.31.21](https://indike.org/pramana/in.purana.vayu.2.31.21) yuktaṃ mano javairaśvairyena kanyāṃ samudvahat. sa tena rathamukhyena jigāya ca tato mahīm .. 31.19 .. ### [2.31.22](https://indike.org/pramana/in.purana.vayu.2.31.22) yayātiryudhi durddharṣo devadānavamānavaiḥ . pauravāṇāṃ nṛpāṇāñca sarveṣāṃ so'bhavadrathaḥ .. 31.20 .. ### [2.31.23](https://indike.org/pramana/in.purana.vayu.2.31.23) yovatsudeśaprabhavaḥ kauravo janamejayaḥ. kuroḥ putrasya rājñastu rājñaḥ pārikṣitasya ha. jagāma sa ratho nāśaṃ śāpādgārgyasya dhīmataḥ .. 31.21 .. ### [2.31.24](https://indike.org/pramana/in.purana.vayu.2.31.24) gārgyasya hi sutaṃ bālaḥ sa rājā janamejayaḥ. durbuddhirhiṃsayāmāsa lohagandhaṃ narādhipam .. 31.22 .. ### [2.31.25](https://indike.org/pramana/in.purana.vayu.2.31.25) sa lohagandho rājarṣiḥ paridhāvannitastataḥ. paurajānapadaistyakto na lebhe śarma karhicit .. 31.23 .. ### [2.31.26](https://indike.org/pramana/in.purana.vayu.2.31.26) tataḥ sa duḥkhasantapto nālabhatsaṃvidaṃ kvacit. śaśāpa hetukamṛṣiṃ śaraṇyaṃ vyathitastadā .. 31.24 .. ### [2.31.27](https://indike.org/pramana/in.purana.vayu.2.31.27) īndroto nāma vikhyāto yo'sau munirudāradhīḥ. yojayāmāsa cendrotaḥ śaunako janamejayam. aśvamedhena rājānaṃ pāvanārthaṃ dvijottamaḥ .. 31.25 .. ### [2.31.28](https://indike.org/pramana/in.purana.vayu.2.31.28) sa lohagandho vyanaśattasyāvasathametya ha. sa ca divyo rathastasmādvasoścedipatestathā .. 31.26 .. ### [2.31.29](https://indike.org/pramana/in.purana.vayu.2.31.29) tataḥ śakreṇa tuṣṭena lebhe tasmādbṛhadrathaḥ. tato hatvā jarāsandhaṃ bhīmastaṃ rathamuttamam. pradadau vāsudevāya prītyā kauravanandanaḥ .. 31.27 .. ### [2.31.30](https://indike.org/pramana/in.purana.vayu.2.31.30) sa jarāṃ prāpya rājarṣiryayātirnahuṣātmajaḥ. putraṃ jyeṣṭhaṃ variṣṭhañca yadumityabravīdvacaḥ ..31.28 .. ### [2.31.31](https://indike.org/pramana/in.purana.vayu.2.31.31) jarāvalī ca māṃ tāta palitāni ca paryaguḥ . kāvyasyośanasaḥ śāpānna ca tṛpto'smi yauvane .. 31.29 .. ### [2.31.32](https://indike.org/pramana/in.purana.vayu.2.31.32) tvaṃ yado pratipadyasva pāpmānaṃ jarayā saha. jarāṃ me pratigṛhṇīṣva taṃ yaduḥ pratyuvāca ha .. 31.30 .. ### [2.31.33](https://indike.org/pramana/in.purana.vayu.2.31.33) anirdiṣṭā mayā bhikṣā brāhmaṇasya pratiśrutā . sā ca vyāyāmasādhyā vai na grahīṣyāmi te jarām .. 31.31 .. ### [2.31.34](https://indike.org/pramana/in.purana.vayu.2.31.34) jarāyā bahavo doṣā pānabhojanakāriṇaḥ. tasmājjarānna te rājan grahītumahamutsahe .. 31.32 .. ### [2.31.35](https://indike.org/pramana/in.purana.vayu.2.31.35) sitaśmaśrudharo dīno jarayā śithilīkṛtaḥ. balī sannatagātraśca durddaśo durbalākṛtiḥ .. 31.33 .. ### [2.31.36](https://indike.org/pramana/in.purana.vayu.2.31.36) aśaktaḥ kāryakaraṇe paribhūtastu yauvane. mahopabhītibhiścaiva tāṃ jarānnābhikāmaye .. 31.34 .. ### [2.31.37](https://indike.org/pramana/in.purana.vayu.2.31.37) santi te bahavaḥ putrā mattaḥ priyatarā nṛpa. pratigṛhṇantu dharmajña putramanyaṃ vṛṇīṣva vai .. 31.35 .. ### [2.31.38](https://indike.org/pramana/in.purana.vayu.2.31.38) sa evamukto yadunā tīvrakopasamanvitaḥ. uvāca vadatāṃ śreṣcho jyeṣṭhaṃ taṃ garhayan sutam .. 31.36 .. ### [2.31.39](https://indike.org/pramana/in.purana.vayu.2.31.39) āśramaḥ kaśca vānyo'sti ko vā dharmavidhistava. māmanādṛtya durbuddhe yadāttha navadeśika .. 31.37 .. ### [2.31.40](https://indike.org/pramana/in.purana.vayu.2.31.40) evamuktvā yaduṃ rājā śaśāpainaṃ sa manyumān . yastvaṃ me hṛdayājjāto vayaḥ svaṃ na prayacchasi .. 31.38 .. ### [2.31.41](https://indike.org/pramana/in.purana.vayu.2.31.41) tasmānna rājyabhāg mūḍha prajā te vai bhaviṣyati. turvaso pratipadyasva pāpmānaṃ jarayā saha .. 31.39 .. ### [2.31.42](https://indike.org/pramana/in.purana.vayu.2.31.42) turvasuruvāca.. ### [2.31.43](https://indike.org/pramana/in.purana.vayu.2.31.43) na kāmaye jarāṃ tāta sāmabhogapraṇāśinīm. jarāyā bahavo doṣāḥ pānabhojanakāriṇaḥ. tasmājjarāṃ na te rājan grahītumahamutsahe .. 31.40 .. ### [2.31.44](https://indike.org/pramana/in.purana.vayu.2.31.44) yayātiruvāca.. ### [2.31.45](https://indike.org/pramana/in.purana.vayu.2.31.45) yastvaṃ me hṛdayājjāto vayaḥ svanna prayacchasi. tasmāt prajā samucchedaṃ turvaso tava yāsyati .. 31.41 .. ### [2.31.46](https://indike.org/pramana/in.purana.vayu.2.31.46) asaṅkīrṇā ca dharmeṇa pratilomavareṣu ca. piśitādiṣu cānyeṣu mūḍha rājā bhaviṣyasi .. 31.42 .. ### [2.31.47](https://indike.org/pramana/in.purana.vayu.2.31.47) guru dāraprasakteṣu tiryagyonigateṣu vā. paśudharmeṣu mleccheṣu bhaviṣyati na saṃśayaḥ .. 31.43 .. ### [2.31.48](https://indike.org/pramana/in.purana.vayu.2.31.48) sūta uvāca. evantu turvasuṃ śaptvā yayātiḥ sutamātmanaḥ. śarmiṣṭhāyāḥ sutaṃ druhyumidaṃ vacanamabravīt .. 31.44 .. ### [2.31.49](https://indike.org/pramana/in.purana.vayu.2.31.49) druhyo tvaṃ pratipadyasva varṇarūpavināśinīm. jarāṃ varṣasahasraṃ vai yauvanaṃ svandadasva me .. 31.45 .. ### [2.31.50](https://indike.org/pramana/in.purana.vayu.2.31.50) pūrṇe varṣasahasre te pratidāsyāmi yauvanam. svañcādāsyāmi būyo'haṃ pāpmānaṃ jarayā saha .. 31.46 .. ### [2.31.51](https://indike.org/pramana/in.purana.vayu.2.31.51) druhyuruvāca.. ### [2.31.52](https://indike.org/pramana/in.purana.vayu.2.31.52) na gajaṃ na rathaṃ nāśvaṃ jīrṇo bhuṅkte na ca striyam .. ### [2.31.53](https://indike.org/pramana/in.purana.vayu.2.31.53) na saṅgaścāsya bhavati na jarāṃ tena kāmaye .. 31.47 .. ### [2.31.54](https://indike.org/pramana/in.purana.vayu.2.31.54) yayātiruvāca.. ### [2.31.55](https://indike.org/pramana/in.purana.vayu.2.31.55) yastvaṃ me hṛdayājjāto vayaḥ svanna prayacchasi. tasmād druhyo priyaḥ kāmo na te sampatsyate kvacit .. 31.48 .. ### [2.31.56](https://indike.org/pramana/in.purana.vayu.2.31.56) nauplavottarasañcārastatra nityaṃ bhaviṣyati. arājabhrājavaṃśastvaṃ tatra nityaṃ bhaviṣyasi .. 31.49 .. ### [2.31.57](https://indike.org/pramana/in.purana.vayu.2.31.57) ano tvaṃ pratipadyasva pāpmānaṃ jarayā saha. evaṃ varṣasahasrantu careyaṃ yauvanena te .. 31.50 .. ### [2.31.58](https://indike.org/pramana/in.purana.vayu.2.31.58) anuruvāca.. ### [2.31.59](https://indike.org/pramana/in.purana.vayu.2.31.59) jīrṇaḥ śiśuvaraṃ datte jarayā hyaśuciḥ sadā.. ### [2.31.60](https://indike.org/pramana/in.purana.vayu.2.31.60) na juhoti sa kāle'gni tāṃ jarānnābikāmaye .. 31.51 .. ### [2.31.61](https://indike.org/pramana/in.purana.vayu.2.31.61) yayātiruvāca.. ### [2.31.62](https://indike.org/pramana/in.purana.vayu.2.31.62) yastvaṃ me hṛdayājjāto vayaḥ svanna prayacchasi. jarādoṣastvayokto'yaṃ tasmātte pratipatsyate .. 31.52 .. ### [2.31.63](https://indike.org/pramana/in.purana.vayu.2.31.63) prajā ca yauvanaṃ prāptā vinaśiṣyatyatastava. agnipraskandanaparastvaṃ cāpyeva bhaviṣyasi .. 31.53 .. ### [2.31.64](https://indike.org/pramana/in.purana.vayu.2.31.64) pūro tvaṃ pratipadyasva pāpmānañjarayā saha. jarāvalī ca māntāta palitāni ca paryaguḥ .. 31.54 .. ### [2.31.65](https://indike.org/pramana/in.purana.vayu.2.31.65) kāvyasyośanasaḥ śāpānna ca tṛpto'smi yauvane. kañcitkālañjareyaṃ vai viṣayān vayasā tava .. 31.55 .. ### [2.31.66](https://indike.org/pramana/in.purana.vayu.2.31.66) pūrṇeṃ varṣasahasre te pratidāsyāmi yauvanam. svañcaiva pratipatsyāmi pāpmānañjarayā saha .. 31.56 .. ### [2.31.67](https://indike.org/pramana/in.purana.vayu.2.31.67) sūta uvāca.. ### [2.31.68](https://indike.org/pramana/in.purana.vayu.2.31.68) evamuktaḥ pratyuvāca putraḥ pitaramañjasā. yathānumanyase tāta kariṣyāmi tathaiva ca .. 31.57 .. ### [2.31.69](https://indike.org/pramana/in.purana.vayu.2.31.69) pratipatsyāmi te rājan pāpmānaṃ jarayā saha. gṛhāṇa yauvanaṃ mattaścara kāmān yathepsitān .. 31.58 .. ### [2.31.70](https://indike.org/pramana/in.purana.vayu.2.31.70) jarayāhaṃ praticchanno vayorūpadharastava. yauvanaṃ bhavate dattvā cariṣyāmi yathārtavat .. 31.59 .. ### [2.31.71](https://indike.org/pramana/in.purana.vayu.2.31.71) yayātiruvāca.. ### [2.31.72](https://indike.org/pramana/in.purana.vayu.2.31.72) pūro prīto'smi bhadrante prītaścedaṃ dadāmi te. sarvakāmasamṛddhā te prajā rājye bhaviṣyati .. 31.60 .. ### [2.31.73](https://indike.org/pramana/in.purana.vayu.2.31.73) sūta uvāca.. ### [2.31.74](https://indike.org/pramana/in.purana.vayu.2.31.74) pūroranumato rājā yayātiḥ svāṃ jarāntataḥ. saṃkrāmayāmāsa tadā prasādādbhārgavasya tu .. 31.61 .. ### [2.31.75](https://indike.org/pramana/in.purana.vayu.2.31.75) yauvanenātha vayasā yayātiranahuṣātmajaḥ . prītiyukto naraśreṣṭhaścacāra viṣayān svakān .. 31.62 .. ### [2.31.76](https://indike.org/pramana/in.purana.vayu.2.31.76) yathākāmaṃ yathotsāhaṃ yathākālaṃ yathāsukham. dharmmāvirodhādrājendro yathārhati sa eva hi .. 31.63 .. ### [2.31.77](https://indike.org/pramana/in.purana.vayu.2.31.77) devānatarpayadyajñaiḥ pitṝñchrāddhaistathaiva ca. dīnāṃścānugrahairiṣṭaiḥ kāmaiśca dvijasattamān .. 31.64 .. ### [2.31.78](https://indike.org/pramana/in.purana.vayu.2.31.78) atithīnannapānaiśca vaiśyāṃśca paripālanaiḥ. ānṛśaṃsyena śūdrāṃśca dasyūn saṃnigraheṇa ca .. 31.65 .. ### [2.31.79](https://indike.org/pramana/in.purana.vayu.2.31.79) dharmmeṇa ca prajāḥ sarvvā yathāvadanurañjayan. yayātiḥ pālayāmāsa sākṣādindra ivāparaḥ .. 31.66 .. ### [2.31.80](https://indike.org/pramana/in.purana.vayu.2.31.80) sa rājā siṃhavikrānto yuvā viṣayagocaraḥ. avirodhena dharmasya cacāra sukhamuttamam .. 31.67 .. ### [2.31.81](https://indike.org/pramana/in.purana.vayu.2.31.81) sa mārgamāṇaḥ kāmānāmantardoṣanidarśanāt. viśvāsaheto reme vai vaibrāje nandane vane .. 31.68 .. ### [2.31.82](https://indike.org/pramana/in.purana.vayu.2.31.82) apaśyatsa yadā tāṃ vai varddhamānāṃ nṛpastadā. gatvā pūroḥ sakāśaṃ vai svāṃ jarā pratyapadyata .. 31.69 .. ### [2.31.83](https://indike.org/pramana/in.purana.vayu.2.31.83) sa samprāpya tu tān kāmāṃstṛptaḥ khinnaśca pārthivaḥ. kālaṃ varṣasahasraṃ vai sasmāra manujādhipaḥ. .. 31.70 .. ### [2.31.84](https://indike.org/pramana/in.purana.vayu.2.31.84) parisaṅkhyāya kālañca kalākāṣṭhāstathaiva ca. pūrṇaṃ mattvā tataḥ kālaṃ pūruṃ putramuvāca ha .. 31.71 .. ### [2.31.85](https://indike.org/pramana/in.purana.vayu.2.31.85) yathāsukhaṃ yathotsāhaṃ yathākālamariṃdama. sevitā viṣayāḥ putra yauvanena mayā tava .. 31.72 .. ### [2.31.86](https://indike.org/pramana/in.purana.vayu.2.31.86) pūro prīto'smi bhadraṃ te gṛhāṇa tvaṃ svayauvanam. rāṣṭrañca nṛpaṃ pūruṃ putraṃ kanīyasam. brāhmaṇapramukhā varṇā idaṃ vacanamabruvan .. 31.73 .. ### [2.31.87](https://indike.org/pramana/in.purana.vayu.2.31.87) pratipede jarāṃ rājā yayātirnahuṣātmajaḥ. yauvanaṃ pratipede ca pūruḥ svaṃ punarātmanaḥ .. 31.74 .. ### [2.31.88](https://indike.org/pramana/in.purana.vayu.2.31.88) abhiṣektukāmañca nṛpaṃ pūruṃ putraṃ kanīyasam. brāhmaṇapramukhā varṇā idaṃ vacanamabruvan .. 31.75 .. ### [2.31.89](https://indike.org/pramana/in.purana.vayu.2.31.89) kathaṃ śukrasya naptāraṃ devayānyāḥ sutaṃ prabho. śreṣṭhaṃ yadumatikramya pūro rājyaṃ pradāsyasi .. 31.76 .. ### [2.31.90](https://indike.org/pramana/in.purana.vayu.2.31.90) yadurjyeṣṭhastava suto jātastamanu turvasuḥ. śarmiṣṭhāyāḥ suto druhyustano'nuḥ pūrureva ca .. 31.77 .. ### [2.31.91](https://indike.org/pramana/in.purana.vayu.2.31.91) kathaṃ jyeṣṭhānatikramya kanīyān rājyamarhati . ataḥ sambodhayāmi tvāṃ dharmmaṃ samanupālaya .. 31.78 .. ### [2.31.92](https://indike.org/pramana/in.purana.vayu.2.31.92) yayātiruvāca.. ### [2.31.93](https://indike.org/pramana/in.purana.vayu.2.31.93) brāhmaṇapramukhā varṇāḥ sarve śrṛṇvantu me vacaḥ. jyeṣṭaṃ prati yathā rārṣṭraṃ na deyaṃ me kathañcana .. 31.79 .. ### [2.31.94](https://indike.org/pramana/in.purana.vayu.2.31.94) mātā pitrorvacanakṛtsa hi putraḥ praśasyate . mama jyeṣṭhena yadunā niyogo nānupālitaḥ .. 31.80 .. ### [2.31.95](https://indike.org/pramana/in.purana.vayu.2.31.95) pratikūlaṃ pituryaśca na sa putraḥ satāṃ mataḥ. sa putraḥ putravad yaśca varttate pitṛmātṛṣu .. 31.81 .. ### [2.31.96](https://indike.org/pramana/in.purana.vayu.2.31.96) yadunāhamavajñātastathā turvasunāpi ca. druhyuṇā cānunā caivamapyavajñā kṛtā bhṛśam .. 31.82 .. ### [2.31.97](https://indike.org/pramana/in.purana.vayu.2.31.97) pūruṇā tu kṛtaṃ vākyaṃ mānitaśca viśeṣataḥ. kanīyān mama dāyādo jarā yena dhṛtā mama. sarvakāmaḥ sarvakṛtaḥ pūruṇā putrakāriṇā .. 31.83 .. ### [2.31.98](https://indike.org/pramana/in.purana.vayu.2.31.98) śukreṇa ca varo dattaḥ kāvye nośanasā svayam. putro yastvānuvartteta sa rājā te mahāmate .. 31.84 .. ### [2.31.99](https://indike.org/pramana/in.purana.vayu.2.31.99) bhavato'numatopyevaṃ pūru rāṣṭre'bhiṣicyatām . yaḥputro guṇasampanno mātāpitrorhitaḥ sadā. sarvamarhati kalyāṇaṃ kanīyānapi sa prabhuḥ .. 31.85 .. ### [2.31.100](https://indike.org/pramana/in.purana.vayu.2.31.100) arhaḥ pūruridaṃ rāṣṭraṃ yaḥ priyaḥ priyakṛttava. varadānena śukrasya na śakyaṃ vaktumuttaram .. 31.86 .. ### [2.31.101](https://indike.org/pramana/in.purana.vayu.2.31.101) paurajānapadaistuṣṭairityukto nāhuṣastadā. abhiṣicya tataḥ pūruṃ svarāṣṭre sutamātmanaḥ .. 31.87 .. ### [2.31.102](https://indike.org/pramana/in.purana.vayu.2.31.102) diśi dakṣiṇapūrvasyāṃ turvasuṃ tu nyaveśayat. dakṣiṇāparato rājā yaduṃ śreṣṭhaṃ nyaveśayat .. 31.88 .. ### [2.31.103](https://indike.org/pramana/in.purana.vayu.2.31.103) pratīcyāmuttarasyāñca druhyuñcānuñca tāvubhau. saptadvīpāṃ yayātistu jittvā pṛthvīṃ sasāgarām. vyabhajat pañcadhā rājā putrebhyo nāhuṣastadā .. 31.89 .. ### [2.31.104](https://indike.org/pramana/in.purana.vayu.2.31.104) tairiyaṃ pṛthivī sarvā saptadvīpā sapattanā. yathāpradeśaṃ dharmajñairdharmmeṇa pratipālyate .. 31.90 .. ### [2.31.105](https://indike.org/pramana/in.purana.vayu.2.31.105) evaṃ visṛjya pṛthivīṃ putrebhyo nāhuṣastadā. putrasaṃkrāmitaśrīstu prītimānabhavannṛpaḥ .. 31.91 .. ### [2.31.106](https://indike.org/pramana/in.purana.vayu.2.31.106) dhanurnyasya pṛṣatkāṃśca rājyañcaiva suteṣu tu. prītimānabhavadrājā bhāramāveśya bandhuṣu .. 31.92 .. ### [2.31.107](https://indike.org/pramana/in.purana.vayu.2.31.107) atra gāthā mahārājñā purā gītā yayātinā. yo'bhipretyāharan kāmān kūrmoṅgānīva sarvaśaḥ .. 31.93 .. ### [2.31.108](https://indike.org/pramana/in.purana.vayu.2.31.108) na jātu kāmaḥ kāmānāmupabhogena śāmyati. haviṣā kṛṣṇavartmeva bhūya evābhivarddhate .. 31.94 .. ### [2.31.109](https://indike.org/pramana/in.purana.vayu.2.31.109) yat pṛthivyāṃ vrīhiyavaṃ hiraṇyaṃ paśavaḥ striyaḥ . nālamekasya tatsarvamiti paśyanna muhyati .. 31.95 .. ### [2.31.110](https://indike.org/pramana/in.purana.vayu.2.31.110) yadā tu kurute bhāvaṃ sarvvabhūteṣu pāvakam. karmmaṇā manasā vācā brahma sampadyate tadā .. 31.96 .. ### [2.31.111](https://indike.org/pramana/in.purana.vayu.2.31.111) yadā parānna bibheti yadā tvasmānna bibhyati. yadā necchati na dveṣṭi brahma sampadyate tadā .. 31.97 .. ### [2.31.112](https://indike.org/pramana/in.purana.vayu.2.31.112) yā dustyajā durmmatibhiryā na jīryati jīryyataḥ. doṣāprāṇāntiko rāgastāṃ tṛṣṇāntyajataḥ sukham .. 31.98 .. ### [2.31.113](https://indike.org/pramana/in.purana.vayu.2.31.113) jīryyanti jīryataḥ kośā dantā jīryanti jaryitaḥ. jīvitāśā dhanāśā ca jīryyatopi na jīryati .. 31.99 .. ### [2.31.114](https://indike.org/pramana/in.purana.vayu.2.31.114) yaccākāmasukhaṃ loke yacca divyaṃ mahat sukham. tṛṣṇāsya ca sukhasyaiva kalāṃ nārhati ṣoḍaśīm .. 31.100 .. ### [2.31.115](https://indike.org/pramana/in.purana.vayu.2.31.115) evamuktvā sa rājarṣiḥ sadāraḥ prasthito vanam. bhṛgutuṅge tapastaptvā tatraiva ca mahāyaśāḥ. pālayitvā vrataśataṃ tatraiva svargamāpnuyāt .. 31.101 .. ### [2.31.116](https://indike.org/pramana/in.purana.vayu.2.31.116) tasya vaṃśāstu pañcaite puṇyā devarṣisatkṛtāḥ. yairvyāptā pṛthivī kṛtsnā sūryasyeva gabhastibhiḥ .. 31.102 .. ### [2.31.117](https://indike.org/pramana/in.purana.vayu.2.31.117) dhanyaḥ prajāvānāyuṣmān kīrtimāṃśca bhavennaraḥ. yayāteścaritaṃ sarvaṃ paṭhañchṛṇvan dvijottamaḥ .. 31.103 .. ### [2.31.118](https://indike.org/pramana/in.purana.vayu.2.31.118) iti śrīmahāpurāṇe vāyuprokte candra vaṃśakīrttanaṃ nāmaikatriṃśo'dyāyaḥ .. 31 ..\* ## Linked texts (7) - [Brahmāṇḍapurāṇa](https://indike.org/pramana/in.purana.brahmanda.2.68.1) — Vyāsa, Sanskrit - [Southern recension](https://indike.org/pramana/in.lit.mahabharata.vyasa*southern.1.78.2) — Sanskrit - [Liṅgapurāṇa](https://indike.org/pramana/in.purana.linga.1.66.64) — Vyāsa, Sanskrit - [Vulgate](https://indike.org/pramana/in.lit.mahabharata.harivamsa*vulgate.1.30.3) — Sanskrit - [Brahmapurāṇa](https://indike.org/pramana/in.purana.brahma.12.3) — Vyāsa, Sanskrit - [Vallālacarita](https://indike.org/pramana/in.lit.historical.vallalacarita.2.11.22) — Ānandabhaṭṭa 1510, Sanskrit - [Liṅgapurāṇa](https://indike.org/pramana/in.vernacular.tamil.kappiyam.lingapurana.75.64) — Ativīrarāma Pāṇṭiyar 1500, Sanskrit --- Source: [https://indike.org/pramana/in.purana.vayu.2.31](https://indike.org/pramana/in.purana.vayu.2.31) · Pramāṇa