[Pramāṇa](https://indike.org/pramana/) › [Indian literature](https://indike.org/pramana/in) › [Purāṇas](https://indike.org/pramana/in.purana) › [Vayupurana](https://indike.org/pramana/in.purana.vayu) › 2.35 # Vayupurana 2.35: adhyāyaḥ 35 Vāyupurāṇa 2.35 - **Language:** Sanskrit ### adhyāyaḥ 35 ### [2.35.1](https://indike.org/pramana/in.purana.vayu.2.35.1) manuṣyaprakṛtīn devān kīrtyamānānnibodhata . saṅkarṣaṇo vāsudevaḥ pradyumnaḥ sāmba eva ca .. 35.1 .. ### [2.35.2](https://indike.org/pramana/in.purana.vayu.2.35.2) aniruddhaśca pañcaite vaṃśavīrāḥ prakīrttitāḥ. saptarṣayaḥ kuberaśca yakṣo maṇivarastathā .. 35.2 .. ### [2.35.3](https://indike.org/pramana/in.purana.vayu.2.35.3) śālakī badaraścaiva vidvān dhanvantaristathā. nandinaśca mahādevaḥ śālaṅkāyana ucyate. ādidevastadā jiṣṇurebhiśca saha daivataiḥ .. 35.3 .. ### [2.35.4](https://indike.org/pramana/in.purana.vayu.2.35.4) ..ṛṣaya ūcuḥ .. ### [2.35.5](https://indike.org/pramana/in.purana.vayu.2.35.5) viṣṇuḥ kimarthaṃ sambhūtaḥ smṛtāḥ sambhūtayaḥ kati. bhaviṣyāḥ kati vānye tu prādurbhāvā mahātmanaḥ .. 35.4 .. ### [2.35.6](https://indike.org/pramana/in.purana.vayu.2.35.6) brahmakṣetre yugānteṣu kimarthamiha jāyate . punaḥ punarmmanuṣyeṣu tannaḥ prabrūhi pṛcchatām .. 35.5 .. ### [2.35.7](https://indike.org/pramana/in.purana.vayu.2.35.7) vistareṇaiva sarvāṇi karmmāṇi ripughātinaḥ. śrotumicchāmahe samyag dehaiḥ kṛṣṇasya dhīmataḥ .. 35.6 .. ### [2.35.8](https://indike.org/pramana/in.purana.vayu.2.35.8) karmmaṇāmānupūrvyañca prādurbhāvāśca ye prabho . yā cāsya prakṛtiḥ sūta tāścāsmān vaktumarhasi .. 35.7 .. ### [2.35.9](https://indike.org/pramana/in.purana.vayu.2.35.9) kathaṃ sa bhagavān viṣṇuḥ sureṣvariniṣūdanaḥ. vasudevakule dhīmān vāsudevatvamāgataḥ .. 35.8 .. ### [2.35.10](https://indike.org/pramana/in.purana.vayu.2.35.10) amaraiḥ sūta kiṃ puṇyaṃ puṇyakṛdbhiralaṃkṛtam. devalokaṃ samutsṛjya martyalokamihāgataḥ .. 35.9 .. ### [2.35.11](https://indike.org/pramana/in.purana.vayu.2.35.11) devamānuṣayornetā bhūrbhuvaḥprasavo hariḥ. kimarthaṃ divyamātmānaṃ mānuṣe samaveśayat .. 35.10 .. ### [2.35.12](https://indike.org/pramana/in.purana.vayu.2.35.12) yaścakraṃ vartayatyeko manuṣyāṇāṃ manomayam. manuṣye sa kathaṃ buddhiṃ cakre cakrabhṛtāṃ varaḥ .. 35.11 .. ### [2.35.13](https://indike.org/pramana/in.purana.vayu.2.35.13) gopāyanaṃ yaḥ kurute jagatāṃ sārvvalaukikam. sa kathaṃ gāṃ gato viṣṇurgopamanvakarotprabhuḥ .. 35.12 .. ### [2.35.14](https://indike.org/pramana/in.purana.vayu.2.35.14) mahābhūtāni bhūtātmā yo dadāra cakāra ha. śrīgarbhaḥ sa kathaṃ garbhe striyā bhūcarayā dhṛtaḥ .. 35.13 .. ### [2.35.15](https://indike.org/pramana/in.purana.vayu.2.35.15) yena lokān kramairjittvā tribhistrīṃstridaśepsayā. sthāpitā jagato mārgāstrivargapravarāstrayaḥ .. 35.14 .. ### [2.35.16](https://indike.org/pramana/in.purana.vayu.2.35.16) yo'ntakāle jagatpītvā kṛtvā toyamayaṃ vapuḥ. lokamekārṇavaṃ cakre dṛśyādṛśyena vartmanā .. 35.15 .. ### [2.35.17](https://indike.org/pramana/in.purana.vayu.2.35.17) yaḥ purāṇe purāṇātmā vārāhaṃ vapurāsthitaḥ. dadau jittvā vasumatīṃ surāṇāṃ surasattamaḥ .. 35.16 .. ### [2.35.18](https://indike.org/pramana/in.purana.vayu.2.35.18) yena saiṃhaṃ vapuḥ kṛtvā dvidhākṛtvā ca yatpunaḥ. pūrvvadaityo mahāvīryyo hiraṇyakaśipurhataḥ .. 35.17 .. ### [2.35.19](https://indike.org/pramana/in.purana.vayu.2.35.19) yaḥ purā hyanalo bhūtvā aurvvaḥ saṃvarttako vibhuḥ. pātālastho'rṇavagataḥ papau toyamayaṃ haviḥ .. 35.18 .. ### [2.35.20](https://indike.org/pramana/in.purana.vayu.2.35.20) sahasracaraṇaṃ devaṃ sahasrāṃśuṃ sahasraśaḥ. sahasraśirasaṃ devaṃ yamāhurvai yuge yuge .. 35.19 .. ### [2.35.21](https://indike.org/pramana/in.purana.vayu.2.35.21) nābhyāraṇyāḥ samudbhūtaṃ yasya paitāmahaṃ gṛham. ekārṇavagate loke tatpaṅkajamapaṅkajam .. 35.20 .. ### [2.35.22](https://indike.org/pramana/in.purana.vayu.2.35.22) yena te nihatā daityāḥ saṃgrāme tārakāmaye. sarvvadevamayaṃ kṛtvā sarvāyudhadharaṃ vapuḥ .. 35.21 .. ### [2.35.23](https://indike.org/pramana/in.purana.vayu.2.35.23) garuḍasthena cotsiktaḥ kālanemirnipātitaḥ. uttarāṃśe samudrasya kṣīrodasyāmṛtodadheḥ. yaḥ śete śāśvataṃ yogamāsthāya timiraṃ mahat .. 35.22 .. ### [2.35.24](https://indike.org/pramana/in.purana.vayu.2.35.24) purāṇī garbhamadhatta divyaṃ tapaḥprakarṣādaditiḥ purā yam. śakrañca yo daityagaṇāvaruddhaṃ garbhāvamānena bhṛśaṃ cakāra .. 35.23 .. ### [2.35.25](https://indike.org/pramana/in.purana.vayu.2.35.25) yadānilo lokapadāni hṛtvā cakāra daityān salileśayāṃstān . kṛtvādidevastridivasya devāṃścakre sureśaṃ puruhūtameva .. 35.24 .. ### [2.35.26](https://indike.org/pramana/in.purana.vayu.2.35.26) gārhapatyena vidhinā anvāhāryyeṇa karmmaṇā. agnimāhavanīyañca vediñcaiva kuśasravam .. 35.25 .. ### [2.35.27](https://indike.org/pramana/in.purana.vayu.2.35.27) prokṣaṇīyaṃ sruvañcaiva avabhṛthaṃ tathaiva ca. atha trīniha yaścakre havyabhāga pradānmakhe .. 35.26 .. ### [2.35.28](https://indike.org/pramana/in.purana.vayu.2.35.28) havyādāṃśca surāṃścakre kavyādāṃśca pitṝnapi. bhogārthaṃ yajñavidhinā yo yajño yajñakarmmaṇi .. 35.27 .. ### [2.35.29](https://indike.org/pramana/in.purana.vayu.2.35.29) yūpān samitsruvaṃ somaṃ pavitraṃ paridhīnapi. yajñiyāni ca dravyāṇi yajñīyāṃśca tathānalān .. 35.28 .. ### [2.35.30](https://indike.org/pramana/in.purana.vayu.2.35.30) sadasyān yajamānāṃśca aśvamedhān kratūttamān. vibabhrāja purā yaśca pārameṣṭhyena karmmaṇā .. 35.29 .. ### [2.35.31](https://indike.org/pramana/in.purana.vayu.2.35.31) yugānurūpaṃ yaḥ kṛtvā trīllom̐kān hi yathākramam. kṣaṇā nimeṣāḥ kāṣṭhāśca kalāstraikālameva ca .. 35.30 .. ### [2.35.32](https://indike.org/pramana/in.purana.vayu.2.35.32) muhūrttāstithayo māsā dinasaṃvatsarāstathā. ṛtavaḥ kālayogāśca pramāṇaṃ trividhantathā .. 35.31 .. ### [2.35.33](https://indike.org/pramana/in.purana.vayu.2.35.33) āyuḥ kṣetrāṇyupacayaṃ lakṣaṇaṃ rūpasauṣṭhavam. medhā vittaṃ ca śauryyañca śāstrasyaiva ca pāraṇam .. 35.32 .. ### [2.35.34](https://indike.org/pramana/in.purana.vayu.2.35.34) trayo varṇāstrayo lokāstraividyaṃ pāvakāstrayaḥ. traikālyaṃ trīṇi karmmāṇi tisro māyāstrayo guṇāḥ .. 35.33 .. ### [2.35.35](https://indike.org/pramana/in.purana.vayu.2.35.35) sṛṣṭā lokāḥ surāścaiva yenātyantena karmmaṇā. sarvvabhūtagaṇāḥ sṛṣṭāḥ sarvvabhūtagaṇātmanā .. 35.34 .. ### [2.35.36](https://indike.org/pramana/in.purana.vayu.2.35.36) nṛṇāmindriyapūrvveṇa yogena ramate ca yaḥ . gatāgatānāṃ yo netā sarvvatra vividheśvaraḥ .. 35.35 .. ### [2.35.37](https://indike.org/pramana/in.purana.vayu.2.35.37) yo gatirdharmayuktānāmagatiḥ pāpakarmmaṇām. cāturvarṇyasya prabhavaścāturvarṇyasya rakṣitā .. 35.36 .. ### [2.35.38](https://indike.org/pramana/in.purana.vayu.2.35.38) cāturvidyasya yo vettā caturāśramasaṃśrayaḥ. digantaraṃ nabho bhūmirāpo vāyurvibhāvasuḥ .. 35.37 .. ### [2.35.39](https://indike.org/pramana/in.purana.vayu.2.35.39) candrasūryyadvayaṃ jyotiryugeśaḥ kṣaṇadācaraḥ. yaḥ paraḥ śrūyate devo yaḥ paraṃ śrūyate tapaḥ .. 35.38 .. ### [2.35.40](https://indike.org/pramana/in.purana.vayu.2.35.40) yaḥ parantapasaḥ prāhuryaḥ paramparamātmavān. ādityādistu yo devo yaśca daityāntako vibhuḥ .. 35.39 .. ### [2.35.41](https://indike.org/pramana/in.purana.vayu.2.35.41) yugānteṣvantako yaśca yaśca lokāntakāntakaḥ. seturyo lokasetūnāṃ medhyo yo medhyakarmmaṇām .. 35.40 .. ### [2.35.42](https://indike.org/pramana/in.purana.vayu.2.35.42) vedyo yo vedaviduṣāṃ prabhuryaḥ prabhavātmanām. somabhūtastu bhūtānāmagnibhūto'gnivarcasām .. 35.41 .. ### [2.35.43](https://indike.org/pramana/in.purana.vayu.2.35.43) manuṣyāṇāṃ manobhūtastapobhūtastapasvinām . vinayo nayatṛptānāṃ tejastejasvināmapi .. 35.42 .. ### [2.35.44](https://indike.org/pramana/in.purana.vayu.2.35.44) vigraho vigrahāṇāṃ yo gatirgatimatāmapi. ākāśa prabhavo vāyurvāyuprāṇā hutāśanaḥ .. 35.43 .. ### [2.35.45](https://indike.org/pramana/in.purana.vayu.2.35.45) divā hutāśanaprāṇāḥ prāṇo'gnermadhusūdanaḥ. raso'bhavacchoṇitaṃ vai śoṇitānmāṃsamucyate .. 35.44 .. ### [2.35.46](https://indike.org/pramana/in.purana.vayu.2.35.46) māṃsāttu medaso janma medaso'sthi nirūpyate. asthnā majjā samabhavanmajjātaḥ śukrasambhavaḥ .. 35.45 .. ### [2.35.47](https://indike.org/pramana/in.purana.vayu.2.35.47) śukrādgharbhaḥ samabhavadrasamūlena karmmaṇā. tatrāpi prathamañcāpastāḥ saumyarāśirucyate .. 35.46 .. ### [2.35.48](https://indike.org/pramana/in.purana.vayu.2.35.48) garbhoṣmasambhavo jñeyo dvitīyo rāśirucyate. śukraṃ somātmakaṃ vidyādārttavaṃ pāvakātmakam .. 35.47 .. ### [2.35.49](https://indike.org/pramana/in.purana.vayu.2.35.49) bhāvau rasānugāvetau vīryye ca śaśipāvakau. kaphavarge'bhavacchukraṃ pittavarge ca śoṇitam .. 35.48 .. ### [2.35.50](https://indike.org/pramana/in.purana.vayu.2.35.50) kaphasya hṛdayaṃ sthānaṃ nābhyāṃ pittaṃ pratiṣṭhitam. dehasya madhye hṛdayaṃ sthānantu manasaḥ smṛtam .. 35.49 .. ### [2.35.51](https://indike.org/pramana/in.purana.vayu.2.35.51) nābikoṣṭhāntaraṃ yattu tatra devo hutāśanaḥ. manaḥ prajāpatirjñeyaṃ kaphaḥ somo vibhāvyate .. 35.50 .. ### [2.35.52](https://indike.org/pramana/in.purana.vayu.2.35.52) pittamagniḥ smṛtāvetāvagnisomātmakaṃ jagat. evaṃ pravarttito garbho varttate'mbudasannibhaḥ .. 35.51 .. ### [2.35.53](https://indike.org/pramana/in.purana.vayu.2.35.53) vāyuḥ praveśanaṃ cakre saṅgataḥ paramātmanā. sa pañcadhā śarīrastho vidyate varddhayet punaḥ .. 35.52 .. ### [2.35.54](https://indike.org/pramana/in.purana.vayu.2.35.54) prāṇāpānau samānaśca udāno vyāna eva ca. prāṇo'sya paramātmānaṃ varddhayan parivarttate .. 35.53 .. ### [2.35.55](https://indike.org/pramana/in.purana.vayu.2.35.55) apānaḥ paścimaṃ kāyamudānorddhvaśarīragaḥ. vyāno vyānasyate yena samānaḥ sarvvasandhiṣu .. 35.54 .. ### [2.35.56](https://indike.org/pramana/in.purana.vayu.2.35.56) bhūtāvāptistatastasya jāyatendriyagocarā. pṛthivī vāyurākāśamāpo jyotiśca pañcamam .. 35.55 .. ### [2.35.57](https://indike.org/pramana/in.purana.vayu.2.35.57) sarvvendriyā niviṣṭāstaṃ svaṃ svaṃ yogaṃ pracakrire. pārthivaṃ dehamāhustaṃ prāṇātmānaṃ ca mārutam .. 35.56 .. ### [2.35.58](https://indike.org/pramana/in.purana.vayu.2.35.58) chidrāṇyākāśayonīni jalāsrāvaṃ pravarttate . tejaścakṣuḥṣvitā jyotsnā teṣāṃ yannāmataḥ smṛtam. saṅgrāmā viṣayāścaiva yasya vīryyātpravarttitāḥ .. 35.57 .. ### [2.35.59](https://indike.org/pramana/in.purana.vayu.2.35.59) ityetān puruṣaḥ sarvvān sṛjam̐llokān sanātanaḥ. naidhane'smin kathaṃ loke naratvaṃ viṣṇurāgataḥ .. 35.58 .. ### [2.35.60](https://indike.org/pramana/in.purana.vayu.2.35.60) eṣa naḥ saṃśayo dhīmanneṣa vai vismayo mahān . kathaṃ gatirgatimatāmāpanno mānuṣīṃ tanum .. 35.59 .. ### [2.35.61](https://indike.org/pramana/in.purana.vayu.2.35.61) śrotumicchāmahe viṣṇoḥ karmmāṇi ca yathākramam. āścaryyāṇi paraṃ viṣṇurvedadevaiśca kathyate .. 35.60 .. ### [2.35.62](https://indike.org/pramana/in.purana.vayu.2.35.62) viṣṇorutpattimāścaryyaṃ kathayasva mahāmate. etadāścaryyamākhyānaṃ kathyatāṃ vai sukhāvaham .. 35.61 .. ### [2.35.63](https://indike.org/pramana/in.purana.vayu.2.35.63) prakhyātabalavīryyasya prādurbhāvā mahātmanaḥ. karmmaṇāścaryyabhūtasya viṣṇoḥ sattvamihocyatām .. 35.62 .. ### [2.35.64](https://indike.org/pramana/in.purana.vayu.2.35.64) ..sūta uvāca.. ### [2.35.65](https://indike.org/pramana/in.purana.vayu.2.35.65) ahañca kīrttayiṣyāmi prādurbhāvaṃ mahātmanaḥ. yathā sa bhagavāñjāto mānuṣeṣu mahātapāḥ .. 35.63 .. ### [2.35.66](https://indike.org/pramana/in.purana.vayu.2.35.66) saptasaptatapaḥ proktā bhṛguśāpena mānuṣe. jāyate ca yugānteṣu devakāryyarthasiddhaye .. 35.64 .. ### [2.35.67](https://indike.org/pramana/in.purana.vayu.2.35.67) tasya divyatanuṃ viṣṇorgadato me nibodhata. yugadharmme parāvṛtte kāle ca śithile prabhuḥ .. 35.65 .. ### [2.35.68](https://indike.org/pramana/in.purana.vayu.2.35.68) kartuṃ dharmmavyavasthānaṃ jāyate mānuṣeṣviha. bhṛgoḥ śāpanimittena devāsurakṛtena ca .. 35.66 .. ### [2.35.69](https://indike.org/pramana/in.purana.vayu.2.35.69) ..ṛṣaya ūcuḥ.. ### [2.35.70](https://indike.org/pramana/in.purana.vayu.2.35.70) kathaṃ devāsurakṛte adhyāhāramavāpnuyāt. etadveditumicchāmo vṛttaṃ daivāsuraṃ katham .. 35.67 .. ### [2.35.71](https://indike.org/pramana/in.purana.vayu.2.35.71) ..sūta uvāca.. ### [2.35.72](https://indike.org/pramana/in.purana.vayu.2.35.72) daivāsuraṃ yathāvṛttaṃ bruvatastannibodhata. hiraṇyakaśipurdaityastrailokyaṃ prāk praśāsati .. 35.68 .. ### [2.35.73](https://indike.org/pramana/in.purana.vayu.2.35.73) balinādhiṣṭhitaṃ rāṣṭraṃ punarlokatraye kramāt. sakhyamāsītparaṃ teṣāṃ devānāmasuraiḥ saha .. 35.69 .. ### [2.35.74](https://indike.org/pramana/in.purana.vayu.2.35.74) yugaṃ vai daśasaṅkīrṇamāsīdavyāhataṃ jagat. nideśasthāyinaścaiva tayordevāsurābhavan .. 35.70 .. ### [2.35.75](https://indike.org/pramana/in.purana.vayu.2.35.75) balavān vai vivādo'yaṃ saṃpravṛttaḥ sudāruṇaḥ. devāsurāṇāṃ ca tadā ghorakṣayakaro mahān .. 35.71 .. ### [2.35.76](https://indike.org/pramana/in.purana.vayu.2.35.76) teṣāṃ dāyanimittaṃ vai saṃgrāṇā bahavo'bhavan. vārāhe'smin daśa dvau ca ṣaṇḍāmārkottarāḥ smṛtā .. 35.72 .. ### [2.35.77](https://indike.org/pramana/in.purana.vayu.2.35.77) nāmatastu samāsena śrṛṇudhvaṃ tān vivakṣataḥ. prathamo nārasiṃhastu dvitīyaścāpi vāmanaḥ .. 35.73 .. ### [2.35.78](https://indike.org/pramana/in.purana.vayu.2.35.78) tṛtīyaḥ sa tu vārāhaścaturtho'mṛtamandhanaḥ. saṃgrāmaḥ pañcamaścaiva sughorastārakāmayaḥ .. 35.74 .. ### [2.35.79](https://indike.org/pramana/in.purana.vayu.2.35.79) ṣaṣṭho hyāḍībakasteṣāṃ saptamastraipuraḥ smṛtaḥ. andhakāro'ṣṭamasteṣāṃ dhvajaśca navamaḥ smṛtaḥ .. 35.75 .. ### [2.35.80](https://indike.org/pramana/in.purana.vayu.2.35.80) vārttaśca daśamo jñeyastato hālā halaḥ smṛtaḥ. smṛto dvādaśamasteṣāṃ ghorakolāhalo'paraḥ .. 35.76 .. ### [2.35.81](https://indike.org/pramana/in.purana.vayu.2.35.81) hiraṇyakaśipurdaityo narasiṃhena sūditaḥ. vāmanena balirvaddhastrailokyākramaṇe kṛte .. 35.77 .. ### [2.35.82](https://indike.org/pramana/in.purana.vayu.2.35.82) hiraṇyākṣo hato dvandve prativāde tu daivataiḥ. mahābalo mahāsattvaḥ saṃgrāmeṣvaparājitaḥ .. 35.78 .. ### [2.35.83](https://indike.org/pramana/in.purana.vayu.2.35.83) daṃṣṭrāyāntu varāheṇa samudrādbhūryadā kṛtā . prāhlādo nirjito yuddhe indreṇāmṛtamanthane .. 35.79 .. ### [2.35.84](https://indike.org/pramana/in.purana.vayu.2.35.84) virocanastu prāhlādirnityamindravadhodyataḥ. indreṇaiva sa vikramya nihatastārakāmaye .. 35.80 .. ### [2.35.85](https://indike.org/pramana/in.purana.vayu.2.35.85) bhavādavadhyatāṃ prāpya viśeṣāstrādibhistu yaḥ. sañjabho nihataḥ ṣaṣṭhe śakrāviṣṭena viṣṇunā .. 35.81 .. ### [2.35.86](https://indike.org/pramana/in.purana.vayu.2.35.86) aśaknuvanto deveṣu puraṃ goptuṃ tridaivatam . nihatā dānavāḥ sarve tripurastryambakeṇa tu .. 35.82 .. ### [2.35.87](https://indike.org/pramana/in.purana.vayu.2.35.87) aṣṭame tvasurāścaivaṃ rākṣasāścāndhakārakāḥ. jitadevamanuṣyaistu pitṛbhiścaiva saṅgatān .. 35.83 .. ### [2.35.88](https://indike.org/pramana/in.purana.vayu.2.35.88) saṃvṛtān dānavāṃścaiva saṅgatān kṛtsnaśaśca tān . tathā viṣṇusahāyena mahendreṇa nibarhitāḥ .. 35.84 .. ### [2.35.89](https://indike.org/pramana/in.purana.vayu.2.35.89) hato dhvajo mahendreṇa māyācchannaśca yodhayan. dhvaje lakṣyaṃ samāviśya vipravarttirmahābhujaḥ .. 35.85 .. ### [2.35.90](https://indike.org/pramana/in.purana.vayu.2.35.90) daityāṃśca dānavāṃścaiva saṃhatān kṛtsnaśaśca tān. rajiḥ kolāhale sarvān devaiḥ parivṛto'jayat. yajñāmṛtena vijitau ṣaṇḍāmārkau tu daivataiḥ .. 35.86 .. ### [2.35.91](https://indike.org/pramana/in.purana.vayu.2.35.91) ete daivāsurā vṛttāḥ saṃgrāmā dvādaśaiva tu. devāsurakṣayakarāḥ prajānāmaśivāya ca .. 35.87 .. ### [2.35.92](https://indike.org/pramana/in.purana.vayu.2.35.92) hiraṇyakaśipū rājā varṣāṇāmarbudaṃ babhau. tathā śatasahasrāṇi hyadikāni dvisaptatiḥ . aśītiṃ ca sahasrāṇi trailokyasyeśvaro'bhavat .. 35.88 .. ### [2.35.93](https://indike.org/pramana/in.purana.vayu.2.35.93) paryāye tasya rājā'nu balirvarṣārbudaṃ punaḥ . ṣaṣṭiṃ caiva sahasrāṇi triṃśataṃ niyutāni ca .. 35.89 .. ### [2.35.94](https://indike.org/pramana/in.purana.vayu.2.35.94) bale rājyādhikārastu yāvatkālaṃ babhūva ha. prahlādena gṛhīto'bhūttāvatkālaṃ tadāsuraiḥ .. 35.90 .. ### [2.35.95](https://indike.org/pramana/in.purana.vayu.2.35.95) indrāstrayaste vikhyātā asurāṇāṃ mahaujasaḥ . daityasaṃsthamidaṃ sarvamāsīddaśayugaṃ kila .. 35.91 .. ### [2.35.96](https://indike.org/pramana/in.purana.vayu.2.35.96) asapatnaṃ tataḥ sarvaṃ rāṣṭraṃ daśayugaṃ purā. trailokyamavyayamidaṃ mahendreṇa tu pālyate .. 35.92 .. ### [2.35.97](https://indike.org/pramana/in.purana.vayu.2.35.97) prahlādasya tataścādastrailokyaṃ kālaparyayāt . paryāyeṇa ca saṃprāpte trailokye pākaśāsanaḥ .. 35.93 .. ### [2.35.98](https://indike.org/pramana/in.purana.vayu.2.35.98) tato'surān parityajya yajñe devā upāgaman . yajñe devānatha gate kāvyaṃ te hyasurābruvan .. 35.94 .. ### [2.35.99](https://indike.org/pramana/in.purana.vayu.2.35.99) kṛtaṃ no miṣatāṃ rāṣṭraṃ tyaktvā yajñaṃ punargatāḥ. sthātuṃ na śaknumo hyadya praviśāmo rasātalam .. 35.95 .. ### [2.35.100](https://indike.org/pramana/in.purana.vayu.2.35.100) evamukto'bravīdetān viṣaṇṇaḥ sāntvayan girā. mābhaiṣṭa dhārayiṣyāmi tejasā svena cāsurāḥ .. 35.96 .. ### [2.35.101](https://indike.org/pramana/in.purana.vayu.2.35.101) vṛṣṭiroṣadhayaścaiva rasā vasu ca yadvayam. kṛtsnā mayi ca tiṣṭhanti pādasteṣāṃ sureṣu vai. yuṣmadarthaṃ pradāsyāmi tatsarvaṃ dhāryate mayā .. 35.97 .. ### [2.35.102](https://indike.org/pramana/in.purana.vayu.2.35.102) tato devāsurān dṛṣṭvā dhṛtān kāvyena dhīmatā. amantrayaṃstadā te vai saṃvignā vijigīṣayā .. 35.98 .. ### [2.35.103](https://indike.org/pramana/in.purana.vayu.2.35.103) eṣa kāvya idaṃ sarvaṃ vyāvarttayati no balāt . sādhu gacchāmahe tūrṇaṃ kṣīṇānnāpyāyayasva tān . prasahya hatvā śiṣṭān vai pātālaṃ prāpayāmahe .. 35.99 .. ### [2.35.104](https://indike.org/pramana/in.purana.vayu.2.35.104) tato devāḥ susaṃrabdhā dānavānabhisṛtya vai. jadhnustai rvadhyamānāste kāvyamevābhidudruvuḥ .. 35.100 .. ### [2.35.105](https://indike.org/pramana/in.purana.vayu.2.35.105) tataḥ kāvyastu tāndṛṣṭvā tūrṇaṃ devairabhidrutān. samare'ktrakṣatārttāṃstān devebhyastān diteḥ sutān .. 35.101 .. ### [2.35.106](https://indike.org/pramana/in.purana.vayu.2.35.106) kāvyo dṛṣṭvā sthitān devān tatra devo'bhyacintayat. tānuvāca tato dhyātvā pūrvavṛttamanusmaran .. 35.102 .. ### [2.35.107](https://indike.org/pramana/in.purana.vayu.2.35.107) trailokyaṃ vijitaṃ sarvaṃ vāmanena tribhiḥ kramaiḥ . balirbaddho hato jambho nihataśca virocanaḥ .. 35.103 .. ### [2.35.108](https://indike.org/pramana/in.purana.vayu.2.35.108) mahārheṣu dvādaśasu saṃgrāmeṣu surairhatāḥ. taistairupāyairbhūyiṣṭhā nihatā ye pradhānataḥ .. 35.104 .. ### [2.35.109](https://indike.org/pramana/in.purana.vayu.2.35.109) kiñcicchiṣṭāstu vai yūyaṃ yuddheṣvantyeṣu vai svayam. nītiṃ vo hi vidhāsyāmi kālaḥ kaścitpratīkṣyatām .. 35.105 .. ### [2.35.110](https://indike.org/pramana/in.purana.vayu.2.35.110) yāsyāmyahaṃ mahādevaṃ mantrārthe vijayāya vaḥ. agnimāpyāyayeddhotā mantraireva bṛhaspatiḥ .. 35.106 .. ### [2.35.111](https://indike.org/pramana/in.purana.vayu.2.35.111) tato yāsyāmyahaṃ devaṃ mantrārthe nīlalohitam. yuṣmānanugrahīṣyāmi punaḥ paścādihāgataḥ .. 35.107 .. ### [2.35.112](https://indike.org/pramana/in.purana.vayu.2.35.112) yūyaṃ tapaścaradhvaṃ vai saṃvṛtā valkalairvane. na vai devā vadhiṣyanti yāvadāgamanaṃ mama .. 35.108 .. ### [2.35.113](https://indike.org/pramana/in.purana.vayu.2.35.113) apratīpāṃstato mantrān devāt prāpya maheśvarāt. yotsyāmahe punardevāṃstataḥ prāpsyatha vai jayam .. 35.109 .. ### [2.35.114](https://indike.org/pramana/in.purana.vayu.2.35.114) tataste kṛtasaṃvādā devānūcustato'surāḥ. nyastavādā vayaṃ sarve lokān yūyaṃ kramantu vai .. 35.110 .. ### [2.35.115](https://indike.org/pramana/in.purana.vayu.2.35.115) vayaṃ tapaścariṣyāmaḥ saṃvṛtā valkalairvane. prahlādasya vacaḥ śrutvā satyavyāharaṇaṃ tu tat .. 35.111 .. ### [2.35.116](https://indike.org/pramana/in.purana.vayu.2.35.116) tato devā nivṛttā vai vijvarā muditāśca ha. nyastaśastreṣu daityeṣu svān vai jagmuryathāgatān .. 35.112 .. ### [2.35.117](https://indike.org/pramana/in.purana.vayu.2.35.117) tatastānabravītkāvyaḥ kañcitkālamupāsyatām. nirutsukaistapoyuktaiḥ kālaṃ kāryārthasādhakaiḥ. piturmamāśramasthā vai sarve devāḥ savāsavāḥ .. 35.113 .. ### [2.35.118](https://indike.org/pramana/in.purana.vayu.2.35.118) sa sandiśyāsurān kāvyo mahādevaṃ prapadya ca. praṇamyenasuvācātha jagatprabhavamīśvaram .. 35.114 .. ### [2.35.119](https://indike.org/pramana/in.purana.vayu.2.35.119) mantrānicchāmyahaṃ deva me nasanti bṛhaspatau. parābhavāya devānāmasureṣvabhayāvahān .. 35.115 .. ### [2.35.120](https://indike.org/pramana/in.purana.vayu.2.35.120) evamukto'bravīddevo mantrānicchasi vai dvija. vrataṃ cara mayo ddiṣṭaṃ brahmacārī samāhitaḥ .. 35.116 .. ### [2.35.121](https://indike.org/pramana/in.purana.vayu.2.35.121) pūrṇaṃ varṣasahasraṃ vai kuṇḍadhūmamavākśirāḥ. yadyupāsyasi bhadrante matto mantramavāpsyasi .. 35.117 .. ### [2.35.122](https://indike.org/pramana/in.purana.vayu.2.35.122) tathokto deva devena sa śukrastu mahātapāḥ. pādau saṃspṛśya devasya bāḍhamityabhyabhāṣata .. 35.118 .. ### [2.35.123](https://indike.org/pramana/in.purana.vayu.2.35.123) vrataṃ carāmyahaṃ śeṣaṃ yathoddiṣṭo'smi vai prabho. tato niyukto devena kuṇḍadhāro'sya dhūmakṛt .. 35.119 .. ### [2.35.124](https://indike.org/pramana/in.purana.vayu.2.35.124) asurāṇāṃ hitārthāya tasmiñchukre gate tadā. mantrārthaṃ tatra vasati brahmacarye maheśvaraḥ .. 35.120 .. ### [2.35.125](https://indike.org/pramana/in.purana.vayu.2.35.125) tadbuddhvā nātipūrvantu rājyaṃ nyastaṃ tadāsuraiḥ. tasmiñchidre tadāmarṣā devāstān samabhidravan. niśitāttāyudhāḥ sarve bṛhaspatipurogamāḥ .. 35.121 .. ### [2.35.126](https://indike.org/pramana/in.purana.vayu.2.35.126) dṛṣṭvāsuragaṇā devān pragṛhītāyudhān punaḥ. utpetuḥ sahasā sarve santrastāste tato'bhavan .. 35.122 .. ### [2.35.127](https://indike.org/pramana/in.purana.vayu.2.35.127) nyastaśastre jaye datte ācāryavratamāsthite. santyajya. samayaṃ devāste sapatnajighāṃsavaḥ .. 35.123 .. ### [2.35.128](https://indike.org/pramana/in.purana.vayu.2.35.128) anācāryāstu bhadraṃ vo viśvastāstapasi sthitāḥ. cīravalkājinadharā niṣkriyā niṣparigrahāḥ .. 35.124 .. ### [2.35.129](https://indike.org/pramana/in.purana.vayu.2.35.129) raṇe vijetuṃ devān vai naśakṣyāmaḥ kathañcana. aśuddhena prapadyāmaḥ śaraṇaṃ kāvyamātaram .. 35.125 .. ### [2.35.130](https://indike.org/pramana/in.purana.vayu.2.35.130) jñāpayāmastatamidaṃ yāvadāgamanaṃ guroḥ. vinivṛtte tataḥ kāvye yotsyāmo yudhi tān surān .. 35.126 .. ### [2.35.131](https://indike.org/pramana/in.purana.vayu.2.35.131) evamuktvā surān yogyaṃ śaraṇaṃ kāvyamātaram. prāpadyanta tato bhītāstadā caiva tadā'bhayam .. 35.127 .. ### [2.35.132](https://indike.org/pramana/in.purana.vayu.2.35.132) dattanteṣāntu bhītānāṃ daityā nāmabhayārthinām. na bhetavyaṃ na bhetavya bhayantyajata dānavāḥ .. 35.128 .. ### [2.35.133](https://indike.org/pramana/in.purana.vayu.2.35.133) matsannidhau vartatāṃ vo na bhīrbhavitumarhati. bhayāccāpyabhipannāṃstān dṛṣṭvā devāsurāṃstadā .. 35.129 .. ### [2.35.134](https://indike.org/pramana/in.purana.vayu.2.35.134) abhijagmuḥ prasahyaitānavicārya balābalam. tāṃstrastān vadhyamānāṃśca devairdṛṣṭvāsurāṃstadā .. 35.130 .. ### [2.35.135](https://indike.org/pramana/in.purana.vayu.2.35.135) devī kruddhābravīdenānanindratvaṃ karomyaham. saṃstabhya śīghraṃ saṃrambhādindraṃ sā'bhyacarattataḥ .. 35.131 .. ### [2.35.136](https://indike.org/pramana/in.purana.vayu.2.35.136) tataḥ saṃstambhitaṃ dṛṣṭvā śakraṃdevāstu yūpavat. vyadravanta tato bhītā dṛṣṭvā śakraṃ vaśīkṛtam .. 35.132 .. ### [2.35.137](https://indike.org/pramana/in.purana.vayu.2.35.137) gateṣu surasaṅgheṣu viṣṇurindramabhāṣata. māṃtvaṃ praviśa bhadrante neṣyāmi tvāṃ sureśvara .. 35.133 .. ### [2.35.138](https://indike.org/pramana/in.purana.vayu.2.35.138) evamuktastato viṣṇuṃ praviveśa purandaraḥ. viṣṇunā rakṣitaṃ dṛṣṭvā devī kruddhā vaco'vadat .. 35.134 .. ### [2.35.139](https://indike.org/pramana/in.purana.vayu.2.35.139) eṣā tvāṃ viṣṇunā sārddhaṃ dahāmi maghavāniva. miṣatāṃ sarvabhūtānāṃ dṛśyatāṃ me tapobalam .. 35.135 .. ### [2.35.140](https://indike.org/pramana/in.purana.vayu.2.35.140) tayābhibhūtau tau devāvindraviṣṇū jajalpatuḥ. kathaṃ mucyeva sahitau viṣṇurindramabhāṣata .. 35.136 .. ### [2.35.141](https://indike.org/pramana/in.purana.vayu.2.35.141) indro'bravījjahi hyenāṃ yāvannau na dahedvibho. viśeṣeṇābhibhūto'hamatastvañca hi mā ciram .. 35.137 .. ### [2.35.142](https://indike.org/pramana/in.purana.vayu.2.35.142) tataḥ samīkṣya tāṃ viṣṇuḥ strīvadhaṃ karttumāsthitaḥ. abhidhyāya tataścakramāpannaḥ satvaraṃ prabhuḥ .. 35.138 .. ### [2.35.143](https://indike.org/pramana/in.purana.vayu.2.35.143) tasyāḥ satvaramāṇāyāḥ śīghrakārī surārihā. striyā viṣṇustato devyā krūraṃ buddhvā cikīrṣitam. kruddhastadastramāviddhya śiraściccheda mādhavaḥ .. 35.139 .. ### [2.35.144](https://indike.org/pramana/in.purana.vayu.2.35.144) taṃ dṛṣṭvā strīvadhaṃ ghoraṃ cukopa bhṛgurīśvaraḥ. tato'bhiśasto bhṛguṇā viṣṇurbhāryāvadhe tadā .. 35.140 .. ### [2.35.145](https://indike.org/pramana/in.purana.vayu.2.35.145) yasmātte jānatā dharmānavadhyā strī niṣūditā. tasmāttvaṃ saptakṛtvo vai mānuṣeṣu prapatsyasi .. 35.141 .. ### [2.35.146](https://indike.org/pramana/in.purana.vayu.2.35.146) tatastenābhiśāpena naṣṭe dharme punaḥ punaḥ. loke sarvahitārthāya jāyate mānuṣeṣviha .. 35.142 .. ### [2.35.147](https://indike.org/pramana/in.purana.vayu.2.35.147) anuvyāhṛtya viṣṇuṃ sa tadādāya śiraḥ svayam. samānīya tataḥ kāye apo gṛhyedamabravīt .. 35.143 .. ### [2.35.148](https://indike.org/pramana/in.purana.vayu.2.35.148) eṣa tvāṃ viṣṇunā satye hatāṃ saṃjīvayāmyaham . yadi kṛtsno mayā dharmaścarito jñāyate'pi vā. tena satyena jīvasva yadi satyaṃ bravīmyaham .. 35.144 .. ### [2.35.149](https://indike.org/pramana/in.purana.vayu.2.35.149) satyābhivyāhṛtā tasyā devī saṃjīvitā tadā. tadā tāṃ prokṣya śītābhiradbhirjīveti so'bravīt .. 35.145 .. ### [2.35.150](https://indike.org/pramana/in.purana.vayu.2.35.150) tatastāṃ sarvabhūtāni dṛṣṭvā suptotthitāmiva. sādhu sādhvityadṛśyānāṃ vācastāḥ sasvarurdiśaḥ .. 35.146 .. ### [2.35.151](https://indike.org/pramana/in.purana.vayu.2.35.151) dṛṣṭvā sañjīvitāmevaṃ devīṃ tāṃ bhṛguṇā tadā. miṣatāṃ sarvabhūtānāṃ tadadbhutamivābhavat .. 35.147 .. ### [2.35.152](https://indike.org/pramana/in.purana.vayu.2.35.152) asaṃbhrāntena bhṛguṇā patnīṃ sañjīvitāṃ tataḥ. dṛṣṭvā śakro na lebhe'tha śarma kāvyabhayāttataḥ .. 35.148 .. ### [2.35.153](https://indike.org/pramana/in.purana.vayu.2.35.153) prajāgare tataścendro jayantīmātmanaḥ sutām. provāca matimān vākyaṃ svāṃ kanyāṃ pākaśāsanaḥ .. 35.149 .. ### [2.35.154](https://indike.org/pramana/in.purana.vayu.2.35.154) eṣa kāvyo hyanindrāya carate dāruṇaṃ tapaḥ. tenāhaṃ vyākulaḥ putri kṛto dhṛtimatā dṛḍham .. 35.150 .. ### [2.35.155](https://indike.org/pramana/in.purana.vayu.2.35.155) gaccha sambhāvayasvainaṃ śramāpanayanaiḥ śubhaiḥ. taistairmanonukūlaiśca hyupacārairatandritā .. 35.151 .. ### [2.35.156](https://indike.org/pramana/in.purana.vayu.2.35.156) devī sā hīndratuhitā jayantī śubhacāriṇī. yuktadhyānañca śāmyaṃ taṃ durbalaṃ dhṛtimāsthitam .. 35.152 .. ### [2.35.157](https://indike.org/pramana/in.purana.vayu.2.35.157) pitrā yathoktaṃ kāvyaṃ sā kāvye kṛtavatī tadā. gīrbhiścaivānukūlābhiḥ stuvatī valgubhāṣiṇī .. 35.153 .. ### [2.35.158](https://indike.org/pramana/in.purana.vayu.2.35.158) gātrasaṃvāhanaiḥ kāle sevamānā sukhāvahaiḥ . śuśrūṣantyanukūlā ca uvāsa bahulāḥ samāḥ .. 35.154 .. ### [2.35.159](https://indike.org/pramana/in.purana.vayu.2.35.159) pūrṇe dhūmavrate cāpi ghore varṣasahasrike . vareṇa cchandayāmāsa kāvyaṃ prīto'bhavattadā .. 35.155 .. ### [2.35.160](https://indike.org/pramana/in.purana.vayu.2.35.160) evaṃ bruvaṃstvayaikena cīrṇaṃ nānyena kenacit. tasmāttvaṃ tapasā buddhyā śrutena ca balena ca .. 35.156 .. ### [2.35.161](https://indike.org/pramana/in.purana.vayu.2.35.161) tejasā cāpi vibudhān sarvānabhibhaviṣyasi. yacca kiñcinmama brahman vidyate bhṛgunandana .. 35.157 .. ### [2.35.162](https://indike.org/pramana/in.purana.vayu.2.35.162) sāṅgañca sarahasyañca yajñopaniṣadāntathā. pratibhāsyati te sarvaṃ taccādyantaṃ na kasyacit .. 35.158 .. ### [2.35.163](https://indike.org/pramana/in.purana.vayu.2.35.163) sarvābhibhāvī tena tvaṃ dvijaśreṣṭho bhaviṣyasi. evaṃ dattvā varāṃstasmai bhārgavāya punaḥ punaḥ .. 35.159 .. ### [2.35.164](https://indike.org/pramana/in.purana.vayu.2.35.164) ajeyatvaṃ dhaneśatvamavadhyatvaṃ ca vai dadau. etān labdhvā varān kāvyaḥ samprahṛṣṭatanūruhaḥ .. 35.160 .. ### [2.35.165](https://indike.org/pramana/in.purana.vayu.2.35.165) harṣāt prādurbabhau tasya devastotraṃ maheśvaram. tadā tiryaksthitastvevaṃ tuṣṭuve nīlalohitam .. 35.161 .. ### [2.35.166](https://indike.org/pramana/in.purana.vayu.2.35.166) namo'stu śitikaṇṭhāya surāpāya suvarcase. ririhāṇāya lopāya vatsarāya jagatpate .. 35.162 .. ### [2.35.167](https://indike.org/pramana/in.purana.vayu.2.35.167) kapardine hyūrddhvaromṇe hayāya karaṇāya ca. saṃskṛtāya sutīrthāya devadevāya raṃhase .. 35.163 .. ### [2.35.168](https://indike.org/pramana/in.purana.vayu.2.35.168) uṣṇīṣiṇe suvakrāya sahasrākṣāya mīḍhuṣe. vasuretāya rudrāya tapase cīravāsase .. 35.164 .. ### [2.35.169](https://indike.org/pramana/in.purana.vayu.2.35.169) hrasvāya muktakeśāya senānye rohitāya ca .. 35.165 .. ### [2.35.170](https://indike.org/pramana/in.purana.vayu.2.35.170) kavaye rājavṛddhāya takṣakakrīḍanāya ca. giriśāyārkanetrāya yatine jāmbavāya ca. suvṛttāya suhastāya dhanvine bhārgavāya ca .. 35.166 .. ### [2.35.171](https://indike.org/pramana/in.purana.vayu.2.35.171) sahasrabāhave caiva sahasrāmalacakṣuṣe. sahasrakukṣaye caiva sahasracaraṇāya ca .. 35.167 .. ### [2.35.172](https://indike.org/pramana/in.purana.vayu.2.35.172) sahasraśirase caiva bahurūpāya vedhase. bhavāya viśvarūpāya śvetāya puruṣāya ca .. 35.168 .. ### [2.35.173](https://indike.org/pramana/in.purana.vayu.2.35.173) niṣaṅgiṇe kavacine sūkṣmāya kṣapaṇāya ca. tāmrāya caiva bhīmāya ugrāya ca śivāya ca .. 35.169 .. ### [2.35.174](https://indike.org/pramana/in.purana.vayu.2.35.174) babhrave ca piśaṅgāya piṅgalāyāruṇāya ca. mahādevāya śarvvāya viśvarūpaśivāya ca .. 35.170 .. ### [2.35.175](https://indike.org/pramana/in.purana.vayu.2.35.175) hiraṇyāya ca śiṣṭāya śreṣṭhāya madhyamāya ca . pinākine ceṣumate citrāya rohitāya ca .. 35.171 .. ### [2.35.176](https://indike.org/pramana/in.purana.vayu.2.35.176) dundubhyāyaikapādāya arhāya buddhaye tathā. mṛgavyādhāya sarpāya sthāṇave bhīṣaṇāya ca .. 35.172 .. ### [2.35.177](https://indike.org/pramana/in.purana.vayu.2.35.177) bahurūpāya cogrāya trinetrāyeśvarāya ca. kapilāyaikavīrāya mṛtyave tryambakāya ca .. 35.173 .. ### [2.35.178](https://indike.org/pramana/in.purana.vayu.2.35.178) vāstoṣpate vinākāya śaṅkarāya śivāya ca. āraṇyāya guhasthāya yatine brahmacāriṇe .. 35.174 .. ### [2.35.179](https://indike.org/pramana/in.purana.vayu.2.35.179) sāṅkhyāya caiva yogāya dhyānine dīkṣitāya ca. antarhitāya śarvvāya mānyāya māline tathā .. 35.175 .. ### [2.35.180](https://indike.org/pramana/in.purana.vayu.2.35.180) buddhāya caiva puṇyāya dhārmikāya śubhāya ca. rodhase cekitānāya brahmiṣṭhāya maharṣaye .. 35.176 .. ### [2.35.181](https://indike.org/pramana/in.purana.vayu.2.35.181) catuṣpādāya medhyāya dharmiṇe śīghragāya ca. śikhaṇḍine kapālāya daṃṣṭriṇe viśvamedhase .. 35.177 .. ### [2.35.182](https://indike.org/pramana/in.purana.vayu.2.35.182) apratīghātāya dīptāya bhāskarāya sumedhase. krūrāya vikṛtāyaiva bībhatsāya śivāya ca .. 35.178 .. ### [2.35.183](https://indike.org/pramana/in.purana.vayu.2.35.183) saumyāya caiva puṇyāya dhārmikāya śubhāya ca. avadhyāya mṛtāṅgāya nityāya śāśvatāya ca .. 35.179 .. ### [2.35.184](https://indike.org/pramana/in.purana.vayu.2.35.184) sādyāya śarabhāyaiva śūline ca tricakṣuṣe. somapāyājyapāyaiva dhūmapāyoṣmapāya ca .. 35.180 .. ### [2.35.185](https://indike.org/pramana/in.purana.vayu.2.35.185) śucaye rerihāṇāya sadyojātāya mṛtyave. piśitāśāya kharvāya medhāya vaidyutāya ca .. 35.181 .. ### [2.35.186](https://indike.org/pramana/in.purana.vayu.2.35.186) vyāśritāya śraviṣṭāya bhāratāyāntarikṣaye. kṣamāya saha mānāya satyāya tapanāya ca .. 35.182 .. ### [2.35.187](https://indike.org/pramana/in.purana.vayu.2.35.187) tripuraghnāya dīptāya cakrāya romaśāya ca. tigmāyudhāya medhyāya siddhāya ca pulastaye .. 35.183 .. ### [2.35.188](https://indike.org/pramana/in.purana.vayu.2.35.188) rocamānāya khaṇḍāya sphītāya ṛṣabhāya ca. bhogine puñjamānāya śāntāyaivorddhvaretase .. 35.184 .. ### [2.35.189](https://indike.org/pramana/in.purana.vayu.2.35.189) aghaghnāya makhghnāya mṛtyave yajñiyāya ca. kṛśānave pracetāya vahnaye kiśalāya ca .. 35.185 .. ### [2.35.190](https://indike.org/pramana/in.purana.vayu.2.35.190) sikatyāya prasannāya vareṇyāyaiva cakṣuṣe. kṣipregave sudhanvāya pramedhyāya priyāya ca .. 35.186 .. ### [2.35.191](https://indike.org/pramana/in.purana.vayu.2.35.191) rakṣoghnāya paśughnāya vighnāya śayanāya ca. vibhrāntāya mahantāya antaye durgamāya ca .. 35.187 .. ### [2.35.192](https://indike.org/pramana/in.purana.vayu.2.35.192) dakṣāya ca jaghanyāya lokānāmīśvarāya ca. anāmayāya corddhvāya saṃhatyādhiṣṭhitāya ca .. 35.188 .. ### [2.35.193](https://indike.org/pramana/in.purana.vayu.2.35.193) hiraṇyabāhave caiva satyāya śamanāya ca. asikalyāya māghāya rīriṇyāyaikacakṣuṣe .. 35.189 .. ### [2.35.194](https://indike.org/pramana/in.purana.vayu.2.35.194) śreṣṭhāya vāmadevāya īśānāya ca dhīmate. mahākalpāya dīptāya rādenāya hasāya ca .. 35.190 .. ### [2.35.195](https://indike.org/pramana/in.purana.vayu.2.35.195) vṛtadhanvane kavicine rathine ca varūthine. bhṛgunāthāya śukrāya vahniriṣṭāya dhīmate .. 35.191 .. ### [2.35.196](https://indike.org/pramana/in.purana.vayu.2.35.196) aghāya aghaśaṃsāya vipriyāya priyāya ca . digvāsaḥkṛttivāsāya bhagaghnāya namo'stu te .. 35.192 .. ### [2.35.197](https://indike.org/pramana/in.purana.vayu.2.35.197) paśūnāṃ pataye caiva bhūtānāṃ pataye namaḥ. praṇane ṛgyajuḥsāmne svadhāyai ca sudhāya ca .. 35.193 .. ### [2.35.198](https://indike.org/pramana/in.purana.vayu.2.35.198) vaṣaṭkāratamāyaiva tubhyamantātmane namaḥ . sraṣṭre dhātre tathā hotre hartre ca kṣapaṇāya ca .. 35.194 .. ### [2.35.199](https://indike.org/pramana/in.purana.vayu.2.35.199) bhūtabhavyabhavāyaiva tubhyaṃ kālātmane namaḥ. vasave caiva sādhyāya rudrādityāśvināya ca .. 35.195 .. ### [2.35.200](https://indike.org/pramana/in.purana.vayu.2.35.200) viśvāya marute caiva tubhyandevātmane namaḥ. agnisomartvigijyāya paśumantrauṣadhāya ca .. 35.196 .. _First 200 of 209 passages. [Read on](https://indike.org/pramana/in.purana.vayu.2.35)_ ## Linked texts (5) - [Brahmāṇḍapurāṇa](https://indike.org/pramana/in.purana.brahmanda.2.72.1) — Vyāsa, Sanskrit - [Brahmapurāṇa](https://indike.org/pramana/in.purana.brahma.179.16) — Vyāsa, Sanskrit - [Padmapurāṇa](https://indike.org/pramana/in.purana.padma.1.13.167) — Vyāsa, Sanskrit - [Vulgate](https://indike.org/pramana/in.lit.mahabharata.harivamsa*vulgate.1.40.11) — Sanskrit - [Devībhāgavatapurāṇa](https://indike.org/pramana/in.purana.upa.sakta.devibhagavata.4.10.47) — Sanskrit --- Source: [https://indike.org/pramana/in.purana.vayu.2.35](https://indike.org/pramana/in.purana.vayu.2.35) · Pramāṇa