[Pramāṇa](https://indike.org/pramana/) › [Indian literature](https://indike.org/pramana/in) › [Purāṇas](https://indike.org/pramana/in.purana) › [Vayupurana](https://indike.org/pramana/in.purana.vayu) › 2.38 # Vayupurana 2.38: adhyāyaḥ 38 Vāyupurāṇa 2.38 - **Language:** Sanskrit ### adhyāyaḥ 38 ### [2.38.1](https://indike.org/pramana/in.purana.vayu.2.38.1) śrutvā pādaṃ tṛtīyantu krāntaṃ sūtena dhīmatā. tataścaturthaṃ papracchuḥ pādaṃ vai ṛṣisattamāḥ .. 38.1 .. ### [2.38.2](https://indike.org/pramana/in.purana.vayu.2.38.2) ṛṣaya ūcuḥ.. ### [2.38.3](https://indike.org/pramana/in.purana.vayu.2.38.3) pādaḥ krāntastṛtīyo'yamanuṣaṅgeṇa yastvayā. caturthaṃ vistarātpādaṃ saṃhāraṃ parikīrttaya .. 38.2 .. ### [2.38.4](https://indike.org/pramana/in.purana.vayu.2.38.4) manvantarāṇi sarvāṇi pūrvāṇyevāparaiḥ saha. saptarṣīṇāmathaiteṣāṃ sāmpratasyāntare manoḥ .. 38.3 .. ### [2.38.5](https://indike.org/pramana/in.purana.vayu.2.38.5) vistarāvayavañcaiva nisargasya mahātmanaḥ. vistareṇānupūrvyā ca sarvameva bravīhi me .. 38.4 .. ### [2.38.6](https://indike.org/pramana/in.purana.vayu.2.38.6) sūta uvāca.. ### [2.38.7](https://indike.org/pramana/in.purana.vayu.2.38.7) bhavatāṃ kathayiṣyāmi sarvametadyathātatham. pādaṃ tvimaṃ sasaṃhāraṃ caturthaṃ munisattamāḥ .. 38.5 .. ### [2.38.8](https://indike.org/pramana/in.purana.vayu.2.38.8) manorvaivasvatasyemaṃ sāṃpratasya mahātmanaḥ. vistareṇānupūrvyā ca nisargaṃ śrṛṇuta dvijāḥ .. 38.6 .. ### [2.38.9](https://indike.org/pramana/in.purana.vayu.2.38.9) manvantarāṇāṃ saṃkṣepaṃ bhaviṣyaiḥ saha saptabhiḥ. pralayañcaiva lokānāṃ bruvato me nibodhata .. 38.7 .. ### [2.38.10](https://indike.org/pramana/in.purana.vayu.2.38.10) etānyuktāni vai samyak saptasaptasu vai mayā. manvantarāṇi saṃkṣepācchṛṇutānāgatāni me .. 38.8 .. ### [2.38.11](https://indike.org/pramana/in.purana.vayu.2.38.11) sāvarṇasya pravakṣyāmi manorvaivasvatasya ha. bhaviṣyasya bhaviṣyanti samāsāttu nibodhata .. 38.9 .. ### [2.38.12](https://indike.org/pramana/in.purana.vayu.2.38.12) anāgatāśca saptaiva smṛtāstviha maharṣayaḥ. kauśiko gātavaścaiva jāmadagnyaśca bhārgavaḥ .. 38.10 .. ### [2.38.13](https://indike.org/pramana/in.purana.vayu.2.38.13) dvaipāyano vasiṣṭhaśca kṛpaḥ śāradvatastathā. ātreyo dīptimāṃścaiva ṛṣyaśrṛṅgastu kāśyapaḥ .. 38.11 .. ### [2.38.14](https://indike.org/pramana/in.purana.vayu.2.38.14) bhāradvājastathā drauṇiraśvatthāmā mahāyaśāḥ. ete sapta mahātmāno bhaviṣyāḥ paramarṣayaḥ .. 38.12 .. ### [2.38.15](https://indike.org/pramana/in.purana.vayu.2.38.15) sutapā ścāmitābhāśca sukhāścaiva gaṇāstrayaḥ. teṣāṃ gaṇāstu devānāṃ ekaiko viṃśakaḥ smṛtaḥ .. 38.13 .. ### [2.38.16](https://indike.org/pramana/in.purana.vayu.2.38.16) nāmatastu pravakṣyāmi nibodhadhvaṃ samāhitāḥ. ritastapaśca śukraśca dyutirjyotiḥ prabhākarau .. 38.14 .. ### [2.38.17](https://indike.org/pramana/in.purana.vayu.2.38.17) prabhāso bhāsakṛddharmmastejoraśmiṛturvirāṭ. arciṣmān dyotano bhānuryaśakīrttirbudho dhṛtiḥ. viṃśatiḥ sutapā hyete nāmabhiḥ parikīrtitāḥ .. 38.15 .. ### [2.38.18](https://indike.org/pramana/in.purana.vayu.2.38.18) prabhurvibhurvibhāsaśca jetā hantā'rihā rituḥ. sumatiḥ pramatirdīptiḥ samākhyāto mahomahān .. 38.16 .. ### [2.38.19](https://indike.org/pramana/in.purana.vayu.2.38.19) deho munirnayo jyeṣṭhaḥ samaḥ satyaśca viśrutaḥ. ityete hyamitābhāstu viṃśatiḥ parikīrttitāḥ .. 38.17 .. ### [2.38.20](https://indike.org/pramana/in.purana.vayu.2.38.20) damo dātā vidaḥ somo vittavaidyau yamo nidhiḥ. homaṃ havyaṃ hutaṃ dānaṃ deyaṃ dātā tapaḥ śamaḥ .. 38.18 .. ### [2.38.21](https://indike.org/pramana/in.purana.vayu.2.38.21) dhruvaṃ sthānaṃ vidhānañca niyamaśceti viṃśatiḥ. mukhyā hyete samākhyātāḥ sāvarṇe prathame'ntare .. 38.19 .. ### [2.38.22](https://indike.org/pramana/in.purana.vayu.2.38.22) mārīcasyaiva te putrāḥ kaśyapasya mahātmanaḥ. sāmpratasya bhaviṣyanti sāvarṇasyāntare manoḥ .. 38.20 .. ### [2.38.23](https://indike.org/pramana/in.purana.vayu.2.38.23) teṣāmindro bhaviṣyastu balirvairocanaḥ purā. vīravāṃścāvarīyāṃśca nirmohaḥ satyavāk kṛtī .. 38.21 .. ### [2.38.24](https://indike.org/pramana/in.purana.vayu.2.38.24) cariṣṇurājyo viṣṇuśca vācaḥ sumatireva ca. sāvarṇasya manoḥ putrā bhaviṣyanti navaiva tu .. 38.22 .. ### [2.38.25](https://indike.org/pramana/in.purana.vayu.2.38.25) nava cānyeṣu vakṣyāmi sāvarṇeścāntareṣu vai. sāvarṇamanavaścānye bhaviṣyā brahmaṇaḥ sutāḥ .. 38.23 .. ### [2.38.26](https://indike.org/pramana/in.purana.vayu.2.38.26) merusāvarṇinaste vai dṛṣṭā ye divyadṛṣṭibhiḥ. dakṣasya te hi dauhitrāḥ priyāyā duhituḥ sutāḥ .. 38.24 .. ### [2.38.27](https://indike.org/pramana/in.purana.vayu.2.38.27) mahatā tapasā yuktā merupṛṣṭhe mahaujasaḥ. brahmādibhiste janitā dakṣeṇaiva ca dhīmatā .. 38.25 .. ### [2.38.28](https://indike.org/pramana/in.purana.vayu.2.38.28) maharlokagatāvṛtya bhaviṣyā merumāśritāḥ. mahābhāvāttu te pūrvaṃ jajñire cākṣuṣe'ntare .. 38.26 .. ### [2.38.29](https://indike.org/pramana/in.purana.vayu.2.38.29) ṛṣaya ūcuḥ.. ### [2.38.30](https://indike.org/pramana/in.purana.vayu.2.38.30) dakṣeṇa janitāḥ putrāḥ kanyāyāmātmanaḥ katham. bhavettu brahmaṇaścaiva dharmeṇa ca mahātmanaḥ .. 38.27 .. ### [2.38.31](https://indike.org/pramana/in.purana.vayu.2.38.31) sūta uvāca.. ### [2.38.32](https://indike.org/pramana/in.purana.vayu.2.38.32) ato bhaviṣyān vakṣyāmi sāvarṇamanavastu ye. teṣāṃ janma prabhāvañca namaskṛtya pracetase .. 38.28 .. ### [2.38.33](https://indike.org/pramana/in.purana.vayu.2.38.33) vaivasvate hyupaspṛṣṭe kiñcicchiṣṭe ca cākṣuṣe. jajñire manavaste hi bhaviṣyānāgatāntare .. 38.29 .. ### [2.38.34](https://indike.org/pramana/in.purana.vayu.2.38.34) prācetasasya dakṣasya dauhitrā manavastu ye. sāvarṇā nāmataḥ pañca catvāraḥ paramarṣijāḥ .. 38.30 .. ### [2.38.35](https://indike.org/pramana/in.purana.vayu.2.38.35) saṃjñāputrastu sāvarṇa eko vaivasvatastathā. jyeṣṭhaḥ saṃjñāsuto nāma manurvaivasvataḥ prabhuḥ .. 38.31 .. ### [2.38.36](https://indike.org/pramana/in.purana.vayu.2.38.36) vaivasvate'ntare prāpte samutpattistayoḥ śubhā. caturddaśaite manavaḥ kīrttitāḥ kīrttivarddhanāḥ .. 38.32 .. ### [2.38.37](https://indike.org/pramana/in.purana.vayu.2.38.37) vede śrutau purāṇe ca sarve te prabhaviṣṇavaḥ. prajānāṃ patayaḥ sarve bhūtānāṃ patayaḥ sthitāḥ .. 38.33 .. ### [2.38.38](https://indike.org/pramana/in.purana.vayu.2.38.38) tairiyaṃ pṛthivī sarvā saptadvīpā saparvatā. pūrṇaṃ yugasahasraṃ vai paripālyā nareśvaraiḥ .. 38.34 .. ### [2.38.39](https://indike.org/pramana/in.purana.vayu.2.38.39) prajābhistapasā caiva vistaraṃ teṣu vakṣyate. caturddaśaiva te jñeyāḥ sargāḥ svāyambhuvādayaḥ .. 38.35 .. ### [2.38.40](https://indike.org/pramana/in.purana.vayu.2.38.40) manvantarādhikāreṣu vartante ca sakṛt sakṛt. vinivṛttādhikārāste maharlokaṃ samāśritāḥ .. 38.36 .. ### [2.38.41](https://indike.org/pramana/in.purana.vayu.2.38.41) samatītāstu ye teṣāmaṣṭau ṣaṣṭhāstathāpare. pūrveṣu sāmprataścāyaṃ śāntirvaivasvataḥ prabhuḥ .. 38.37 .. ### [2.38.42](https://indike.org/pramana/in.purana.vayu.2.38.42) ye śiṣṭāstān pravakṣyāmi saha devarṣidānavaiḥ. saha prajānisargeṇa sarvvāṃstvanāgatān dvijān .. 38.38 .. ### [2.38.43](https://indike.org/pramana/in.purana.vayu.2.38.43) vaivasvatanisargeṇa teṣāṃ jñeyastu vistaraḥ. anyūnā nātiriktāste yasmāt sarvve vivasvataḥ .. 38.39 .. ### [2.38.44](https://indike.org/pramana/in.purana.vayu.2.38.44) punaruktā bahutvāttu vakṣye na teṣu vistaram. manvantareṣu bhāvyeṣu bhūteṣvapi tathaiva ca .. 39.40 .. ### [2.38.45](https://indike.org/pramana/in.purana.vayu.2.38.45) kule kule nisargāṃstu tasmādbhūyo vibhāgaśaḥ . teṣāmeva hi śiṣṭārthaṃ vistareṇa krameṇa ca .. 39.41 .. ### [2.38.46](https://indike.org/pramana/in.purana.vayu.2.38.46) dakṣasya kanyā dharmiṣṭhā suvratā nāma viśrutā. sarvakanyāvaśiṣṭā tu śreṣṭhā dharmaparā sutā. gṛhītvā tāṃ pitā kanyāṃ jagāma brahmaṇo'ntike .. 39.42 .. ### [2.38.47](https://indike.org/pramana/in.purana.vayu.2.38.47) vairājastamupāsīnaṃ dharmeṇa ca bhavena ca. bhavadharmasamīpasthaṃ dakṣaṃ brahmābhyabhāṣata .. 39.43 .. ### [2.38.48](https://indike.org/pramana/in.purana.vayu.2.38.48) dakṣa kanyā taveyaṃ vai janayiṣyati suvratā. caturo vai manūn putrāṃścāturvarṇyakarāñchubhān .. 38.44 .. ### [2.38.49](https://indike.org/pramana/in.purana.vayu.2.38.49) brahmaṇo vacanaṃ śrutvā dakṣo dharmo bhavastadā. tāṃ kanyāṃ manasā jagmustrayaste brahmaṇā saha .. 38.45 .. ### [2.38.50](https://indike.org/pramana/in.purana.vayu.2.38.50) satyābhidhyāyināṃ teṣāṃ sadyaḥ kanyā vyajāyata. sadṛśānurūpāṃsteṣāṃ caturo vai kumārakān .. 38.46 .. ### [2.38.51](https://indike.org/pramana/in.purana.vayu.2.38.51) saṃsiddhāḥ kāryakaraṇe sambhūtāste śriyānvitaḥ. upabhogasamarthaiśca sadyojātaiḥ śarīrakaiḥ .. 38.47 .. ### [2.38.52](https://indike.org/pramana/in.purana.vayu.2.38.52) te dṛṣṭvā tān svayambuddhvā brahmā vyāhāhiṇastadā. saṃrabdhā vai vyakarṣanta mama putro mametyuta .. 38.48 .. ### [2.38.53](https://indike.org/pramana/in.purana.vayu.2.38.53) abhidhyānānmanotpannānūcurvai te parasparam. yo yasya vapuṣā tulyo bhajatāṃ sa tu taṃ sutam .. 38.49 .. ### [2.38.54](https://indike.org/pramana/in.purana.vayu.2.38.54) yasya yaḥ sadṛśaścāpi rūpe vīrya ca nāmataḥ. taṃ gṛhṇātu subhadraṃ vo varṇato yasya yaḥ samaḥ .. 38.50 .. ### [2.38.55](https://indike.org/pramana/in.purana.vayu.2.38.55) dhruvaṃ rūpaṃ pituḥ putraḥ so'nurudhyati sarvadā. tasmādātmasamaḥ putraḥ piturmātuśca jāyate .. 38.51 .. ### [2.38.56](https://indike.org/pramana/in.purana.vayu.2.38.56) evaṃ te samayaṃ kṛtvā savarṇān jagṛhuḥ sutān. yasmāt savarṇāsteṣāṃ vai brahmādīnāṃ kumārakāḥ .. 38.52 .. ### [2.38.57](https://indike.org/pramana/in.purana.vayu.2.38.57) savarṇā manavastasmāt savarṇatvaṃ hi te yataḥ. mananānmānanāccaiva tasmātte manavaḥ smṛtāḥ .. 38.53 .. ### [2.38.58](https://indike.org/pramana/in.purana.vayu.2.38.58) cākṣuṣasyāntare'tīte prāpte vaivasvatasya ha. ruceḥ prajāpateḥ putro raucyo nāmābhavatsutaḥ .. 38.54 .. ### [2.38.59](https://indike.org/pramana/in.purana.vayu.2.38.59) bhūtyāmutpādito yastu bhautyo nāmābhavatsutaḥ. vaivasvate'ntare rājā dvau manū tu vivasvatoḥ .. 38.55 .. ### [2.38.60](https://indike.org/pramana/in.purana.vayu.2.38.60) vaivasvato manuryaśca sāvarṇo yaśca viśrutaḥ. jyeṣṭhaḥ saṃjñāsuto vidvān manurvaivasvataḥ prabhuḥ .. 38.56 .. ### [2.38.61](https://indike.org/pramana/in.purana.vayu.2.38.61) savarṇāyāḥ sutaścānyaḥ smṛto vaivasvato manuḥ . savarṇā manavo ye ca catvārastu maharṣijāḥ .. 38.57 .. ### [2.38.62](https://indike.org/pramana/in.purana.vayu.2.38.62) tapasā sambhṛtātmānaḥ sveṣu manvantareṣu vai. bhaviṣyeṣu bhaviṣyanti sarvakāryārthasādhakāḥ .. 38.58 .. ### [2.38.63](https://indike.org/pramana/in.purana.vayu.2.38.63) prathamaṃ merusāvarṇerdakṣaputrasya vai manoḥ. putrā marīcigarbhāśca suśarmāṇaśca te trayaḥ . sambhūtāśca mahātmānaḥ sarve vaivasvate'ntare .. 38.59 .. ### [2.38.64](https://indike.org/pramana/in.purana.vayu.2.38.64) dakṣaputrasya putrāste rohitasya prajāpateḥ. bhaviṣyasya bhaviṣyastu ekaiko dvādaśo gaṇaḥ .. 38.60 .. ### [2.38.65](https://indike.org/pramana/in.purana.vayu.2.38.65) aiśvaryasaṃgrāho rāho bāhuvaśastathaiva ca. pārā dvādaśa vijñeyā uttarāṃstu nibodhata .. 38.61 .. ### [2.38.66](https://indike.org/pramana/in.purana.vayu.2.38.66) vājiyo vājijiccaiva prabhṛtiśca kakudyatha. dadhikrāvāyapakvāśca praṇīto vijayo madhuḥ .. 38.62 .. ### [2.38.67](https://indike.org/pramana/in.purana.vayu.2.38.67) tejasmānnathavo dvau tu dvādaśaite marīcayaḥ. suśarmmāṇastu vakṣyāmi nāmatastu nibodhata .. 38.63 .. ### [2.38.68](https://indike.org/pramana/in.purana.vayu.2.38.68) varṇastathāpyaṅgaviśvau muraṇyo vrajano mataḥ. amito dravaketuśca jambhosthājasraśakrakāḥ .. 38.64 .. ### [2.38.69](https://indike.org/pramana/in.purana.vayu.2.38.69) sunemirdyutapāścaiva suśarmmāṇaḥ prakīrttitāḥ. teṣāmindrastadā bhāvyo hyadbhuto nāma nāmataḥ .. 38.65 .. ### [2.38.70](https://indike.org/pramana/in.purana.vayu.2.38.70) skandaḥ somapratīkāśaḥ kārtikeyastu pāvakaḥ. māghātithiśca paulastyo vasuḥ kāśyapa eva ca .. 38.66 .. ### [2.38.71](https://indike.org/pramana/in.purana.vayu.2.38.71) jyotiṣmān bhārgavaścaiva dyutimānaṅgirāstathā. vasitaścaiva vāsiṣṭha ātreyo havyavāhanaḥ .. 38.67 .. ### [2.38.72](https://indike.org/pramana/in.purana.vayu.2.38.72) sutapāḥ paulavaścaiva saptaite rohitāntare. dhṛtiketudīptiketuśāpahastā nirāmayaḥ .. 38.68 .. ### [2.38.73](https://indike.org/pramana/in.purana.vayu.2.38.73) pṛthuśravāstathā nāko bhūridyumno bṛhadrathaḥ. prathamasya tu sāvarṇernava putrāḥ prakīrtitāḥ .. 38.69 .. ### [2.38.74](https://indike.org/pramana/in.purana.vayu.2.38.74) daśame tvatha paryāye dharmaputrasya vai manoḥ. dvitīyasya tu sāvarṇerbhāvyasyaivāntare manoḥ .. 38.70 .. ### [2.38.75](https://indike.org/pramana/in.purana.vayu.2.38.75) sukhāmanā viruddhāśca dvāveva tu gaṇau smṛtau. tviṣivantaśca te sarve śatasaṅkhyāśca te samāḥ .. 38.71 .. ### [2.38.76](https://indike.org/pramana/in.purana.vayu.2.38.76) prāṇā nāyacchataḥ prokta ṛṣibhiḥ puruṣeṣu vai. devāste vai bhaviṣyanti dharmaputrasya vai manoḥ .. 38.72 .. ### [2.38.77](https://indike.org/pramana/in.purana.vayu.2.38.77) teṣāmindrastathā vidvān bhaviṣyaḥ śāntirucyate. haviṣmān paulahaḥ śrīmān sukīrtiścāpi bhārgavaḥ .. 38.73 .. ### [2.38.78](https://indike.org/pramana/in.purana.vayu.2.38.78) āpomūrtistathātreyo vasiṣṭhaścāpi yaḥ smṛtaḥ. paulastyaḥ pratipaścāpi nābhāgaścaiva kāśyapaḥ. abhimanyuścāṅgirasaḥ saptaite paramarṣayaḥ .. 38.74 .. ### [2.38.79](https://indike.org/pramana/in.purana.vayu.2.38.79) sukṣetraścottamaujāśca bhūriṣeṇaśca vīryavān. śatānīko nirāmitro vṛṣaseno jayadrathaḥ .. 38.75 .. ### [2.38.80](https://indike.org/pramana/in.purana.vayu.2.38.80) bhūridyumnaḥ suvarccāśca daśaite mānavāḥ smṛtāḥ. ekādaśe tu paryyāye sāvarṇe vai tṛtīyake .. 38.76 .. ### [2.38.81](https://indike.org/pramana/in.purana.vayu.2.38.81) nirmmāṇaratayo devāḥ kāmajā vai manojavāḥ. gaṇāstvete trayaḥ khyātā devatānāṃ mahātmanām .. 38.77 .. ### [2.38.82](https://indike.org/pramana/in.purana.vayu.2.38.82) ekaikaṃ triṃśatasteṣāṃ gaṇāstu tridivaukasām. māsasyāhāni triṃśattu yāni vai kavayo viduḥ .. 38.78 .. ### [2.38.83](https://indike.org/pramana/in.purana.vayu.2.38.83) nirmmāṇaratayo devā rātrayastu vihaṅgamāḥ. gaṇāste vai trayaḥ proktā devatānāṃ bhaviṣyati .. 38.79 .. ### [2.38.84](https://indike.org/pramana/in.purana.vayu.2.38.84) manojavā muhūrttāstu iti devāḥ prakīrttitāḥ . ete hi brahmaṇaḥ putrā bhaviṣyā manavaḥ smṛtāḥ .. 38.80 .. ### [2.38.85](https://indike.org/pramana/in.purana.vayu.2.38.85) teṣāmindro vṛṣo nāma bhaviṣyaḥ surarāṭ tataḥ. teṣāṃ saptarṣayaścāpi kīrttyamānānnibodhata .. 38.81 .. ### [2.38.86](https://indike.org/pramana/in.purana.vayu.2.38.86) haviṣmān kāśyapaścāpi vapuṣmān yaśca bhārgavaḥ. vāruṇiścaiva cātreyo vāsiṣṭho bhaga eva ca .. 38.82 .. ### [2.38.87](https://indike.org/pramana/in.purana.vayu.2.38.87) puṣṭiścāṅgiraso jñeyaḥ paulastyo niścarastathā. paulaho hyagnitejāśca devā hyekādaśe'ntare .. 38.83 .. ### [2.38.88](https://indike.org/pramana/in.purana.vayu.2.38.88) sarvvavegaḥ sudharmmā ca devānīkaḥ purovahaḥ. kṣemadharmā gṛheṣuśca hyādarśaḥ pauṇḍrako manaḥ .. 38.84 .. ### [2.38.89](https://indike.org/pramana/in.purana.vayu.2.38.89) sāvarṇasya tu te putrāḥ prājāpatyasya vai manoḥ. dvādaśe tvatha paryāye rudraputrasya vai manoḥ .. 38.85 .. ### [2.38.90](https://indike.org/pramana/in.purana.vayu.2.38.90) caturthe ṛtusāvarṇe devāstasyāntare śrṛṇu. pañcaiva tu gaṇāḥ proktā devatānāmanāgatāḥ .. 38.86 .. ### [2.38.91](https://indike.org/pramana/in.purana.vayu.2.38.91) haritā rohitāścaiva devāḥ sumanasastathā. sukarmmāṇaḥ supārāśca pañca devagaṇāḥ smṛtāḥ .. 38.87 .. ### [2.38.92](https://indike.org/pramana/in.purana.vayu.2.38.92) brahmaṇo mānasā hyete ekaiko daśako gaṇaḥ. aruntijo hariścaiva vidvān yaśca sahasraśaḥ .. 38.88 .. ### [2.38.93](https://indike.org/pramana/in.purana.vayu.2.38.93) parvatānucaraścaiva hyapoṃ'śuśca manojavaḥ. urjjā svāhā svadhā tārā daśaite rohitāḥ smṛtāḥ .. 38.89 .. ### [2.38.94](https://indike.org/pramana/in.purana.vayu.2.38.94) tapojānirbhṛtiścaiva vācā bandhuśca yaḥ smṛtaḥ . rajaścaiva tu rājaśca svarṇapādastathaiva ca .. 38.90 .. ### [2.38.95](https://indike.org/pramana/in.purana.vayu.2.38.95) vyuṣṭirvidhiśca vai devo daśaite rohitāḥ smṛtāḥ . uṣitādyāstu ye devāstrayastriśatprakīrtitāḥ .. 38.91 .. ### [2.38.96](https://indike.org/pramana/in.purana.vayu.2.38.96) devān sumanaso viddhi sukarmāṇo nibodhata. suparvā vṛṣabhaḥ pṛṣṭaḥ kṛpidyumnau vipaścitaḥ .. 38.92 .. ### [2.38.97](https://indike.org/pramana/in.purana.vayu.2.38.97) vikramaśca kramaścaiva nibhṛtaḥ kānta eva ca.. ### [2.38.98](https://indike.org/pramana/in.purana.vayu.2.38.98) ete sukarmaṇo devāḥ sutāṃścaiṣāṃ nibodhata .. 38.93 .. ### [2.38.99](https://indike.org/pramana/in.purana.vayu.2.38.99) varyyoditastathā jiṣṭo varcasvī dyutimān haviḥ. śubho havikṛtātprāptirvyāpṛtho daśamastathā .. 38.94 .. ### [2.38.100](https://indike.org/pramana/in.purana.vayu.2.38.100) supārā mānasāstvete devā vai samprakīrttitāḥ. teṣāmindrastu vijñeya ṛtadhāmā mahāyaśāḥ .. 38.95 .. ### [2.38.101](https://indike.org/pramana/in.purana.vayu.2.38.101) kṛtirvasiṣṭhaputrastu hyātreyaḥ sutapāstathā. tapomūrtiścāṅgirasastapasvī kāśyapastathā .. 38.96 .. ### [2.38.102](https://indike.org/pramana/in.purana.vayu.2.38.102) tapo'śayānaḥ paulastyaḥ pulahaśca taporatiḥ. bhārgavaḥ saptamastveṣāṃ vijñeyastu tapomatiḥ .. 38.97 .. ### [2.38.103](https://indike.org/pramana/in.purana.vayu.2.38.103) ete saptarṣayaḥ siddhā anye sāvarṇike'ntare. devavānupadevaśca devaśreṣṭho vidūrathaḥ .. 38.98 .. ### [2.38.104](https://indike.org/pramana/in.purana.vayu.2.38.104) mitravān mitrabinduśca mitraseno hyamitrahā. mitrabāhuḥ suvarcāśca dvādaśaite manoḥ sutāḥ .. 38.99 .. ### [2.38.105](https://indike.org/pramana/in.purana.vayu.2.38.105) trayo daśe tu paryāye bhāvyā raucyāntare punaḥ. traya eva gaṇāḥ proktā devānāntu svayambhuvā .. 38.100 .. ### [2.38.106](https://indike.org/pramana/in.purana.vayu.2.38.106) brahmaṇo mānasāḥ putrāste hi sarve mahātmanaḥ. sutrāmāṇaḥ sudharmmāṇaḥ sukarmmāṇaśca te trayaḥ .. 38.101 .. ### [2.38.107](https://indike.org/pramana/in.purana.vayu.2.38.107) tridaśānāṃ gaṇāḥ proktā bhaviṣyāḥ somapāyinaḥ. trayastriṃśaddevatā yāḥ prābhaviṣyanta yājñikaiḥ .. 38.102 .. ### [2.38.108](https://indike.org/pramana/in.purana.vayu.2.38.108) ājyena pṛṣadājyena grahaśreṣṭhena caiva hi. devairdevāstrayastriṃśatpṛthaktvena nibodhata .. 38.103 .. ### [2.38.109](https://indike.org/pramana/in.purana.vayu.2.38.109) sutrāmāṇaḥ prayājyāstu hyādyājyāstu sāmpratam. sukarmaṇo'nuyājyāstu pṛṣadājyāśinastu ye .. 38.104 .. ### [2.38.110](https://indike.org/pramana/in.purana.vayu.2.38.110) upayājyāḥ sudharmāṇa iti devāḥ prakīrttitāḥ . divaspatirmahāsattvasteṣāmindro bhaviṣyati .. 38.105 .. ### [2.38.111](https://indike.org/pramana/in.purana.vayu.2.38.111) pulahātmajaputrāste vijñeyāstu ruceḥ sutāḥ . aṅgirāścaiva dhṛtimān paulastyaḥ pathyavāṃstu saḥ .. 38.106 .. ### [2.38.112](https://indike.org/pramana/in.purana.vayu.2.38.112) paulahastattva darśī ca bhārgavaśca nirutsakaḥ. niṣprakampastathātreyo nirmohaḥ kaśyapastathā .. 38.107 .. ### [2.38.113](https://indike.org/pramana/in.purana.vayu.2.38.113) svarūpaścaiva vāsiṣṭhaḥ saptaite tu trayodaśe. citraseno vicitraśca tapo dharmadhṛto bhavaḥ .. 38.108 .. ### [2.38.114](https://indike.org/pramana/in.purana.vayu.2.38.114) anekakṣatrabaddhaśca suraso nirbhayaḥ pṛthaḥ. raucyasyaite manoḥ putrā hyantare tu trayodaśe .. 38.109 .. ### [2.38.115](https://indike.org/pramana/in.purana.vayu.2.38.115) caturddaśe tu paryāye bhautasyāpyantare manoḥ . devatānāṃ gaṇāḥ pañca proktā yetu bhaviṣyati .. 38.110 .. ### [2.38.116](https://indike.org/pramana/in.purana.vayu.2.38.116) cākṣuṣāśca kaniṣṭhāśca pavitrā bhājarāstathā. vācāvṛddhāśca ityete pañca devagaṇāḥ smṛtāḥ .. 38.111 .. ### [2.38.117](https://indike.org/pramana/in.purana.vayu.2.38.117) saptaiva tāṃstān bhāgāṃśca viddhi cākṣuṣasaṃjñakān. bṛhadādyāni sāmāni kaniṣṭhān sapta tān viduḥ. sapta lokāḥ paritrāste bhājirāḥ sapta sindhavaḥ .. 38.112 .. ### [2.38.118](https://indike.org/pramana/in.purana.vayu.2.38.118) vācāvṛddhānṛṣīn viddhi manoḥ svāyambhuvasya vai. sarve manvantarendrāśca vijñeyāstulyalakṣaṇāḥ .. 38.113 .. ### [2.38.119](https://indike.org/pramana/in.purana.vayu.2.38.119) tejasā tapasā buddhyā balaśrutaparākramaiḥ. trailokye yāni sattvāni gatimanti dhruvāṇi ca. sarvaśaḥ svairguṇaistāni indrāste'bhibhavanti vai .. 38.114 .. ### [2.38.120](https://indike.org/pramana/in.purana.vayu.2.38.120) bhūtāpavādino hṛṣṭā madhyasthā bhūtavādinaḥ. bhūtānuvādinaḥ saktāstrayo vedāḥ pravādinām .. 38.115 .. ### [2.38.121](https://indike.org/pramana/in.purana.vayu.2.38.121) agnidhraḥ kāśyapaścaiva paulastyo māgadhaśca yaḥ. bhārgavo hyagnibāhuśca śucirāṅgirasastathā. ojasvī subalaścaiva bhautyasyaite manoḥ sutāḥ .. 38.116 .. ### [2.38.122](https://indike.org/pramana/in.purana.vayu.2.38.122) savarṇā manavo hyete catvāro brahmaṇaḥ sutāḥ. eko vaivasvataścaiva sāvarṇo manurucyate .. 38.117 .. ### [2.38.123](https://indike.org/pramana/in.purana.vayu.2.38.123) raucyo bhautyaśca yau tau tu manoḥ paulahabhārgavau. bhautyasyaivādhipatye tu pūrṇaḥ kalpastu pūryyate .. 38.118 .. ### [2.38.124](https://indike.org/pramana/in.purana.vayu.2.38.124) sūta uvāca.. ### [2.38.125](https://indike.org/pramana/in.purana.vayu.2.38.125) niḥśeṣeṣu ca sarveṣu tadā manvantareṣviha. ante'nekayuge tasmin kṣīṇe saṃhāra ucyate .. 38.119 .. ### [2.38.126](https://indike.org/pramana/in.purana.vayu.2.38.126) saptaite bhārgavā devā ante manvantare tadā. bhuktvā trailokyamadhyasthā yugākhyāṃ hyekasaptatim .. 38.120 .. ### [2.38.127](https://indike.org/pramana/in.purana.vayu.2.38.127) pitṛbhirmanubhiścaiva sārddhaṃ saptarṣibhistu ye. yajvānaścaiva te'pyanye tadbhāktāścaiva taiḥ saha .. 38.121 .. ### [2.38.128](https://indike.org/pramana/in.purana.vayu.2.38.128) maharlokaṃ gamiṣyanti tyaktvā trailokyamīśvarāḥ. tatasteṣu gateṣūrddhvaṃ kṣīṇe manvantare tadā. anādhāramidaṃ sarvaṃ trailokyaṃ vai bhaviṣyati .. 38.122 .. ### [2.38.129](https://indike.org/pramana/in.purana.vayu.2.38.129) tataḥ sthānāni śūnyāni sthānināṃ tāni vai dvijāḥ. prabhraśyanti vimuktāni tārāṛkṣagrahaistathā .. 38.123 .. ### [2.38.130](https://indike.org/pramana/in.purana.vayu.2.38.130) tatasteṣu vyatīteṣu trailokyasyeśvareṣviha. sendrāṣṭeṣu maharlokaṃ yasmiṃste kalpavāsinaḥ .. 38.124 .. ### [2.38.131](https://indike.org/pramana/in.purana.vayu.2.38.131) jitādyāśca gaṇā hyatra cākṣuṣāntāścaturdaśa. manvantareṣu sarvveṣu devāste vai mahaujasaḥ .. 38.125 .. ### [2.38.132](https://indike.org/pramana/in.purana.vayu.2.38.132) tatasteṣu gateṣūrddhvaṃ sāyojyaṃ kalpavāsinām. sametya devāste sarve prāpte saṃkalane tadā .. 38.126 .. ### [2.38.133](https://indike.org/pramana/in.purana.vayu.2.38.133) maharlokaṃ parityajya gaṇāste vai caturddaśa. saśarīrāśca śrūyante janalokaṃ sahānugāḥ .. 38.127 .. ### [2.38.134](https://indike.org/pramana/in.purana.vayu.2.38.134) evaṃ deveṣvatīteṣu maharlokājjanaṃ prati. bhūtādiṣvavaśiṣṭeṣu sthāvarānteṣu cāpyuta .. 38.128 .. ### [2.38.135](https://indike.org/pramana/in.purana.vayu.2.38.135) śūnyeṣu lokasthāneṣu mahānteṣu bhūrādiṣu. deveṣu ca gateṣūrddhvaṃ sāyojyaṃ kalpavāsinām .. 38.129 .. ### [2.38.136](https://indike.org/pramana/in.purana.vayu.2.38.136) saṃhṛtya tāṃstato brahmā devarṣipitṛdānavān. saṃsthāpayati vai sargaṃ mahadṝṣṭyā yugakṣaye .. 38.130 .. ### [2.38.137](https://indike.org/pramana/in.purana.vayu.2.38.137) tatra yugasahasrāntamaharyardbrahmaṇo viduḥ. rātriṃ yugasahasrāntāmahorātravido janāḥ .. 38.131 .. ### [2.38.138](https://indike.org/pramana/in.purana.vayu.2.38.138) naimittikaḥ prākṛtiko yaścaivātyantiko'rthataḥ. trividhaḥ sarvvabhūtānāmityeṣa pratisañcaraḥ .. 38.132 .. ### [2.38.139](https://indike.org/pramana/in.purana.vayu.2.38.139) brāhmo naimittikastasya kalpadāhaḥ prasaṃyamaḥ. pratisarge tu bhūtānāṃ prākṛtaḥ karaṇakṣayaḥ .. 38.133 .. ### [2.38.140](https://indike.org/pramana/in.purana.vayu.2.38.140) jñānāccātyantikaḥ proktaḥ kāraṇānāmasambhavaḥ . tataḥ saṃhṛtya tān brahmā devāṃstrailokyavāsinaḥ .. 38.134 .. ### [2.38.141](https://indike.org/pramana/in.purana.vayu.2.38.141) aharante prakurute sargasya pralayaṃ punaḥ. suṣupsurbhagavān brahmā prajāḥ saṃharate tadā .. 38.135 .. ### [2.38.142](https://indike.org/pramana/in.purana.vayu.2.38.142) tato yugasahasrānte saṃprāpte ca yugakṣaye. tatrātmasthāḥ prajāḥ karttuṃ prapede sa prajāpatiḥ .. 38.136 .. ### [2.38.143](https://indike.org/pramana/in.purana.vayu.2.38.143) tadā bhavatyanāvṛṣṭistadā sā śata vārṣikī. tathā yānyalpasārāṇi sattvāni pṛthivītale .. 38.137 .. ### [2.38.144](https://indike.org/pramana/in.purana.vayu.2.38.144) tānyevātra pralīyante bhūmitvamupayānti ca. saptaraśmiratho bhūtvā hyudatiṣṭhadvibhāvasuḥ .. 38.138 .. ### [2.38.145](https://indike.org/pramana/in.purana.vayu.2.38.145) asahyaraśmirbhagavān pibannambho gabhastibhiḥ. haritā raśmayastasya dīpyamānāstu saptabhiḥ .. 38.139 .. ### [2.38.146](https://indike.org/pramana/in.purana.vayu.2.38.146) bhūya eva vivartante vyāpnuvanto vanaṃ śanaiḥ. bhaumaṃ kāṣṭhaṃ dhanaṃ tejo bhṛśamadbhistu dīpyate .. 38.140 .. ### [2.38.147](https://indike.org/pramana/in.purana.vayu.2.38.147) tasmādudakaṃ sūryyasya tapato'ti hi kathyate. nāvṛṣṭyā tapate sūryo nāvṛṣṭyā pariviṣyate .. 38.141 .. ### [2.38.148](https://indike.org/pramana/in.purana.vayu.2.38.148) nāvṛṣṭyā paricinvanti vāriṇā dīpyate raviḥ. tasmādapaḥ piban yā vai dīpyate ravirambare .. 38.142 .. ### [2.38.149](https://indike.org/pramana/in.purana.vayu.2.38.149) tasya te raśmayaḥ sapta pibantyambho mahārṇavāt. tenāhāreṇa sandīptaḥ sūryyaḥ sapta bhavatyuta .. 38.143 .. ### [2.38.150](https://indike.org/pramana/in.purana.vayu.2.38.150) tataste raśmayaḥ sapta sūryyabhūtāścaturdiśam. caturlokamimaṃ sarvaṃ dahanti śikhinastadā .. 38.144 .. ### [2.38.151](https://indike.org/pramana/in.purana.vayu.2.38.151) prāpnuvanti ca bhābhistu hyūrddhaṃ cādhaśca raśmibhiḥ. dīpyante bhāskarāḥ sapta yugāntāgniḥ pratāpinaḥ .. 38.145 .. ### [2.38.152](https://indike.org/pramana/in.purana.vayu.2.38.152) te vāriṇā ca saṃdīptā bahusāhasraraśmayaḥ. khaṃ samāvṛtya tiṣṭhanti nirdahanto vasundharām .. 38.146 .. ### [2.38.153](https://indike.org/pramana/in.purana.vayu.2.38.153) tatasteṣāṃ pratāpena dahyamānā vasundharā. sādrinadyarṇavā pṛthvī visnehā samapadyata .. 38.147 .. ### [2.38.154](https://indike.org/pramana/in.purana.vayu.2.38.154) dīptābhiḥ santatābhiśca citrābhiśca samantataḥ. adhaścordhvaśca tiryak ca saṃruddhaṃ sūryaraśmibhiḥ .. 38.148 .. ### [2.38.155](https://indike.org/pramana/in.purana.vayu.2.38.155) sūryyagnīnāṃ pravṛddhānāṃ saṃsṛṣṭānāṃ parasparam. ekatvamupayātānāmekajvālaṃ bhavatyuta .. 38.149 .. ### [2.38.156](https://indike.org/pramana/in.purana.vayu.2.38.156) sarvalokapraṇāśañca so'gnirbhūtvā tu maṇḍalī. caturlokamidaṃ sarvaṃ nirdahatyāśu tejasā .. 38.150 .. ### [2.38.157](https://indike.org/pramana/in.purana.vayu.2.38.157) tataḥ pralīyate sarvvaṃ jaṅgamaṃ sthāvaraṃ tadā. nirvṛkṣā nistṛṇā bhūmiḥ kūrmapṛṣṭhasamā bhavet .. 38.151 .. ### [2.38.158](https://indike.org/pramana/in.purana.vayu.2.38.158) ambarīṣamivābhāti sarvaṃ māriṣitaṃ jagat. sarvameva tadārcirbhiḥ pūrṇaṃ jajvālyate nabhaḥ .. 38.152 .. ### [2.38.159](https://indike.org/pramana/in.purana.vayu.2.38.159) pātāle yāni bhūtāni mahotadhigatāni ca . tatastāni pralīyante bhūmitvamupayānti ca .. 38.153 .. ### [2.38.160](https://indike.org/pramana/in.purana.vayu.2.38.160) dvīpāśca parvatāścaiva varṣāṇyatha mahodadhiḥ. sarvvaṃ tadbhasmasāccakre sarvvātmā pāvakastu saḥ .. 38.154 .. ### [2.38.161](https://indike.org/pramana/in.purana.vayu.2.38.161) samudrebhyo nadībhyaśca pātālebhyaśca sarvataḥ. pibannapaḥ samiddho'gniḥ pṛthivīmāśrito jvalan .. 38.155 .. ### [2.38.162](https://indike.org/pramana/in.purana.vayu.2.38.162) tataḥ saṃvarttakaḥ śailānatikramya mahāṃstathā. lokān saṃharate dīpto ghoraḥ saṃvarttako'nalaḥ .. 38.156 .. ### [2.38.163](https://indike.org/pramana/in.purana.vayu.2.38.163) tataḥ sa pṛthivīṃ bhittvā rasātalamaśoṣayat. nirdahya tāṃstu pātālānnāgalokamathādahat .. 38.157 .. ### [2.38.164](https://indike.org/pramana/in.purana.vayu.2.38.164) adhastātpṛthivīṃ dagdhvā hyūrddhvaṃ sa dahate divam. yojanānāṃ sahasrāṇi hyayutānyarbudāni ca .. 38.158 .. ### [2.38.165](https://indike.org/pramana/in.purana.vayu.2.38.165) udatiṣṭhañchikhāstasya bahvayaḥ saṃvarttakasya tu. gandharvāṃśca piśācāṃśca samahoragarākṣasān . tadā dahati sandīpto golakaṃ caiva sarvvaśaḥ .. 38.159 .. ### [2.38.166](https://indike.org/pramana/in.purana.vayu.2.38.166) bhūrlokantu bhuvarlokaṃ svarlokañca mahastathā. ghoraṃ dahati kālāgnirevaṃ lokacatuṣṭayam .. 38.160 .. ### [2.38.167](https://indike.org/pramana/in.purana.vayu.2.38.167) vyāpteṣu teṣu lokeṣu tiryagūrddhvamathāgninā. tattejaḥ samanuprāptaṃ kṛtsnaṃ jagadidaṃ śanaiḥ. ayoguḍanibhaṃ sarvvaṃ tadā hyevaṃ prakāśate .. 38.161 .. ### [2.38.168](https://indike.org/pramana/in.purana.vayu.2.38.168) tato gajakulākārāstaḍidbhi samalaṃkṛtāḥ. uttiṣṭhanti tadā ghorā vyomni saṃvarttakā ghanāḥ .. 38.162 .. ### [2.38.169](https://indike.org/pramana/in.purana.vayu.2.38.169) kecinnīlotpalaśyāmāḥ kecitkumudasannibhāḥ. kecidvaiḍhūryasaṃkāśā indranīlanibhā'pare .. 38.163 .. ### [2.38.170](https://indike.org/pramana/in.purana.vayu.2.38.170) śaṅkhakundanibhāścānye jātyañjananibhāstathā . dhūmra varṇā ghanāḥ kecitkecitpītāḥ payodharāḥ .. 38.164 .. ### [2.38.171](https://indike.org/pramana/in.purana.vayu.2.38.171) kecidrāsabhavarṇābhā lākṣāraktanibhāstathā. manaḥśilābhāstvapare kapotābhāstathāmbudāḥ .. 38.165 .. ### [2.38.172](https://indike.org/pramana/in.purana.vayu.2.38.172) indragopanibhāḥ keciduttiṣṭhanti ghanā divi. kecitpuradharākārāḥ kecidgajakulopamāḥ .. 38.166 .. ### [2.38.173](https://indike.org/pramana/in.purana.vayu.2.38.173) ke citparvatasaṃkāśāḥ kecitsthalanibhā ghanāḥ. kuṇḍāgāranibhāḥ kecitkecinmīnakulopamāḥ .. 38.167 .. ### [2.38.174](https://indike.org/pramana/in.purana.vayu.2.38.174) bahurūpā ghorarūpā ghorasvaraninādinaḥ. tadā jaladharāḥ sarve pūrayanti nabhaḥsthalam .. 38.168 .. ### [2.38.175](https://indike.org/pramana/in.purana.vayu.2.38.175) tataste jaladā ghorā navīnā bhāskarātmikāḥ. saptadhā saṃvṛtātmānastamagniṃ śamayantyuta .. 38.169 .. ### [2.38.176](https://indike.org/pramana/in.purana.vayu.2.38.176) tataste jaladā varṣaṃ muñcanti ca mahodyamam. sughoramaśivaṃ sarvvaṃ nāśayanti ca pāvakam .. 38.170 .. ### [2.38.177](https://indike.org/pramana/in.purana.vayu.2.38.177) pravṛṣṭaiśca tathātyarthaṃ vāribhiḥ pūryyate jagat. adbhistejo'bhibhūtañca tadāgniḥ prāviśatyapaḥ .. 38.171 .. ### [2.38.178](https://indike.org/pramana/in.purana.vayu.2.38.178) naṣṭe cāgnau varṣaśate payodāḥ pākasambhavāḥ. plāvayanti jagatsarvaṃ bṛhajjālaparisravaiḥ .. 38.172 .. ### [2.38.179](https://indike.org/pramana/in.purana.vayu.2.38.179) dhārābhiḥ pūrayantīmaṃ codyamānāḥ svayambhuvā. anye tu salilaughaistu velāmabhibhavantyapi. sādrirdvīpāntaraṃ pṛthvī hyadbhiḥ saṃchādyate tadā .. 38.173 .. ### [2.38.180](https://indike.org/pramana/in.purana.vayu.2.38.180) tasya vṛṣṭyā ca toyaṃ tatsarvvaṃ hi parimaṇḍitam. praviśatyudadhau viprāḥ pītaṃ sūryyasya raśmibhiḥ .. 38.174 .. ### [2.38.181](https://indike.org/pramana/in.purana.vayu.2.38.181) ādityaraśmibhiḥ pītaṃ jalamabhreṣu tiṣṭhati. punaḥ patati tadbhūmau tena pūryyanti cārṇavāḥ .. 38.175 .. ### [2.38.182](https://indike.org/pramana/in.purana.vayu.2.38.182) tataḥ samudrāḥ svāṃ velāṃ parikrāmanti sarvvaśaḥ. parvvatāśca viśīryyante mahī cāpsu nimajjati .. 38.176 .. ### [2.38.183](https://indike.org/pramana/in.purana.vayu.2.38.183) tatastu sahasodbhrāntaḥ payodāṃstānnabhastale. saṃveṣṭayati ghorātmā divi vāyuḥ samantataḥ .. 38.177 .. ### [2.38.184](https://indike.org/pramana/in.purana.vayu.2.38.184) tasminnekārṇave ghore naṣṭe sthāvarajaṅgame. pūrṇe yugasahasre vai niḥśeṣaḥ kalpa ucyate .. 38.178 .. ### [2.38.185](https://indike.org/pramana/in.purana.vayu.2.38.185) athāmbhasā vṛte loke prāhurekārṇavaṃ budhāḥ. atha bhūmitalaṃ khañca vāyuścaikārṇave tadā. naṣṭe bhāve'valīnaṃ tatprājñāyata na kiñcana .. 38.179 .. ### [2.38.186](https://indike.org/pramana/in.purana.vayu.2.38.186) pārthivāstvatha sāmudrā āpo haimāśca sarvvaśaḥ. prasarantyo vrajantyekaṃ salilākhyāṃ bhajantyuta .. 38.180 .. ### [2.38.187](https://indike.org/pramana/in.purana.vayu.2.38.187) āgatāgatikaṃ caiva tadā tatsalilaṃ smṛtam. pracchādya tiṣṭhati mahīmarṇavākhyaṃ ca tajjalam .. 38.181 .. ### [2.38.188](https://indike.org/pramana/in.purana.vayu.2.38.188) ābhānti yasmāttā bhābhirbhāśabdavyāptidīptiṣu. bhasma sarvvamanuprāpya tasmādambho nirucyate .. 38.182 .. ### [2.38.189](https://indike.org/pramana/in.purana.vayu.2.38.189) nānātve caiva śīghre ca dhāturvai ara ucyate. ekārṇave tadā yo vai na śīghrāstena tā narāḥ .. 38.183 .. ### [2.38.190](https://indike.org/pramana/in.purana.vayu.2.38.190) tasmin yugasahasrānte divase brahmaṇo gate. tāvantaṃ kālamevaṃ tu bhavatyekārṇavaṃ jagat. tadā tu sarvvavyāpārā nivarttante prajāpateḥ .. 38.184 .. ### [2.38.191](https://indike.org/pramana/in.purana.vayu.2.38.191) evamekārṇave tasminnaṣṭe sthāvara jaṅgame. tadā sa bhavati brahmā sahasrākṣaḥ sahasrapāt .. 38.185 .. ### [2.38.192](https://indike.org/pramana/in.purana.vayu.2.38.192) sahasraśīrṣā sumanāḥ sahasrapāt sahasracakṣurvadanaḥ sahasravāk. sahasrabāhuḥ prathamaḥ prajāpatistrīyapathe yaḥ puruṣo nirucyate .. 38.186 .. ### [2.38.193](https://indike.org/pramana/in.purana.vayu.2.38.193) ādityavarṇo bhuvanasya goptā hyapūrvva ekaḥ prathamasturāṣāṭ . hiraṇyagarbhaḥ puruṣo mahān vai saṃpadyate vai tamasaḥ parastāt .. 38.187 .. ### [2.38.194](https://indike.org/pramana/in.purana.vayu.2.38.194) caturyugasahasrānte sarvataḥ salilaplute. suṣupsuraprakāśāṃ svāṃ rātriṃ tu kurute prabhuḥ .. 38.188 .. ### [2.38.195](https://indike.org/pramana/in.purana.vayu.2.38.195) caturvidhā yadā śete prajāḥ sarvvāṇḍamaṇḍitāḥ. paśyante taṃ mahātmānaṃ kālaṃ sapta maharṣayaḥ .. 38.189 .. ### [2.38.196](https://indike.org/pramana/in.purana.vayu.2.38.196) janalokavivarttantastapasā labdhacakṣuṣaḥ. bhṛgvādayo mahātmānaḥ pūrvve vyākhyātalakṣaṇāḥ .. 38.190 .. ### [2.38.197](https://indike.org/pramana/in.purana.vayu.2.38.197) satyādīn saptalokān vai te hi paśyanti cakṣuṣā. brahmāṇaṃ te tu paśyanti mahābrāhmīṣu rātriṣu .. 38.191 .. ### [2.38.198](https://indike.org/pramana/in.purana.vayu.2.38.198) saptarṣayaḥ prapaśyanti saptakālaṃ svarātriṣu. kalpānāṃ parameṣṭhitvāttasmādādyaḥ sa paṭhyate .. 38.192 .. ### [2.38.199](https://indike.org/pramana/in.purana.vayu.2.38.199) sa yaṣṭā sarvabhūtānāṃ kalpādiṣu punaḥ punaḥ. evamāveśayitvā tu svātmanyeva prajāpatiḥ .. 38.193 .. ### [2.38.200](https://indike.org/pramana/in.purana.vayu.2.38.200) athātmani mahātejāḥ sarvamādāya sarvakṛt. tataste vasate rātriṃ tamasyekārṇave jale .. 38.194 .. _First 200 of 254 passages. [Read on](https://indike.org/pramana/in.purana.vayu.2.38)_ ## Linked texts (4) - [Brahmāṇḍapurāṇa](https://indike.org/pramana/in.purana.brahmanda.3.1.1) — Vyāsa, Sanskrit - [Kūrmapurāṇa](https://indike.org/pramana/in.purana.kurma.2.43.13) — Vyāsa, Sanskrit - [Viṣṇupurāṇa (vulgate)](https://indike.org/pramana/in.purana.visnu*vulgate.6.3.32) — Sanskrit - [Brahmapurāṇa](https://indike.org/pramana/in.purana.brahma.232.34) — Vyāsa, Sanskrit --- Source: [https://indike.org/pramana/in.purana.vayu.2.38](https://indike.org/pramana/in.purana.vayu.2.38) · Pramāṇa