[Pramāṇa](https://indike.org/pramana/) › [Indian literature](https://indike.org/pramana/in) › [Purāṇas](https://indike.org/pramana/in.purana) › [Vayupurana](https://indike.org/pramana/in.purana.vayu) › 2.39 # Vayupurana 2.39: adhyāyaḥ 39 Vāyupurāṇa 2.39 - **Language:** Sanskrit ### adhyāyaḥ 39 ### [2.39.1](https://indike.org/pramana/in.purana.vayu.2.39.1) vāyuruvāca.. ### [2.39.2](https://indike.org/pramana/in.purana.vayu.2.39.2) asādhāraṇavṛttaistu hutaśeṣādibhirdvijaiḥ. dharmmavaiśeṣikaiścaiva hyācūrṇasūkṣmadarśibhiḥ .. 39.1 .. ### [2.39.3](https://indike.org/pramana/in.purana.vayu.2.39.3) te devaiḥ saha tiṣṭhanti maharlokanivāsinaḥ. caturddaśaite manavaḥ kīrttitāḥ kīrttivardhanāḥ .. 39.2 .. ### [2.39.4](https://indike.org/pramana/in.purana.vayu.2.39.4) atītā varttamānāśca tathaivānāgatāśca ye. ṛṣibhi rdaivataiścaiva saha gandharvarākṣasaiḥ .. 39.3 .. ### [2.39.5](https://indike.org/pramana/in.purana.vayu.2.39.5) sarvve hyapi kramātītā maharlokaṃ samāśritāḥ. brāhmaṇaiḥ kṣatriyairvaiśyairdhārmikaiḥ sahitaiḥ surāḥ .. 39.4 .. ### [2.39.6](https://indike.org/pramana/in.purana.vayu.2.39.6) sarvve hyapi kramātītā maharlokaṃ samāśritāḥ. brāhmaṇaiḥ kṣatriyairvaiśyairdhārmikaiḥ sahitaiḥ surāḥ .. 39.5 .. ### [2.39.7](https://indike.org/pramana/in.purana.vayu.2.39.7) taistathyakāribhiryuktaiḥ śraddhāvadbhiradarpitaiḥ. varṇāśramāṇāṃ dharmmeṣu śrautasmārtteṣu saṃsthitaiḥ. vinivṛttādhikārāste yāvanmanvantarakṣayaḥ .. 39.6 .. ### [2.39.8](https://indike.org/pramana/in.purana.vayu.2.39.8) ..ṛṣaya ūcuḥ.. ### [2.39.9](https://indike.org/pramana/in.purana.vayu.2.39.9) maharloketi yatproktaṃ mātariśvaṃstvayā vibho. pratiloke ca karttavyamanekaiḥ samadhiṣṭhitāḥ .. 39.7 .. ### [2.39.10](https://indike.org/pramana/in.purana.vayu.2.39.10) yāvantaścaiva te lokā dahyante ye na teprabho. etannaḥ kathaya prītyā tvaṃ hi vettha yathā tatham .. 39.8 .. ### [2.39.11](https://indike.org/pramana/in.purana.vayu.2.39.11) evamuktastato vāyurmunibhirvinayātmabhiḥ. provāca madhuraṃ vākyaṃ yathātattvena tattvavit .. 39.9 .. ### [2.39.12](https://indike.org/pramana/in.purana.vayu.2.39.12) vāyuruvāca.. ### [2.39.13](https://indike.org/pramana/in.purana.vayu.2.39.13) caturddaśaiva sthānāni varṇitāni maharṣibhiḥ. lokākhyāni tu yāni syuryeṣu tiṣṭhanti mānavāḥ .. 39.10 .. ### [2.39.14](https://indike.org/pramana/in.purana.vayu.2.39.14) sapta teṣu kṛtānyāhurakṛtāni tu sapta vai. bhūrādayastu saṅkhyātāḥ sapta lokāḥ kṛtāstviha .. 39.11 .. ### [2.39.15](https://indike.org/pramana/in.purana.vayu.2.39.15) akṛtāni tu saptaiva prākṛtāni tu yāni vai. sthānāni sthānibhiḥ sārddhaṃ kṛtāni tu nibandhanam .. 39.12 .. ### [2.39.16](https://indike.org/pramana/in.purana.vayu.2.39.16) pṛthivīṃ cāntarikṣaṃ ca divyaṃ yacca mahaḥ smṛtam. sthānānyetāni catvāri smṛtānyārṇavakāni ca .. 39.13 .. ### [2.39.17](https://indike.org/pramana/in.purana.vayu.2.39.17) kṣayātiśayayuktāni tathā yuktāni vakṣyate. yāni naimittikāni syustiṣṭhantyābhūtasaṃplavam .. 39.14 .. ### [2.39.18](https://indike.org/pramana/in.purana.vayu.2.39.18) janastapaśca satyañca sthānānyetāni trīṇi tu. aikāntikāni sattvāni tiṣṭhantīhāprasaṃyamāt .. 39.15 .. ### [2.39.19](https://indike.org/pramana/in.purana.vayu.2.39.19) vyaktāni tu pravakṣyāmi sthānānyetāni sapta vai. bhūrlokaḥ prathamasteṣāṃ dvitīyastu bhuvaḥ smṛtaḥ .. 39.16 .. ### [2.39.20](https://indike.org/pramana/in.purana.vayu.2.39.20) svastṛtīyastu vijñeyaścaturtho vai mahaḥ smṛtaḥ. janastu pañcamo lokastapaḥ ṣaṣṭho vibhāvyate .. 39.17 .. ### [2.39.21](https://indike.org/pramana/in.purana.vayu.2.39.21) satyantu saptamo loko nirālokastataḥ param. bhūriti vyāhṛte pūrvaṃ bhūrlokaśca tato'bhavat .. 39.18 .. ### [2.39.22](https://indike.org/pramana/in.purana.vayu.2.39.22) dvitīyaṃ bhuva ityukta antarikṣaṃ tato'bhavat. tṛtīyaṃ svaritītyukte divaṃ prādurbabhūva ha .. 39.19 .. ### [2.39.23](https://indike.org/pramana/in.purana.vayu.2.39.23) vyāhāraistribhiretaistu brahmalokamakalpayat. tato bhūḥ pārthivo loka antarikṣaṃ tato'bhavat. tṛtīyaṃ svaritītyukte divaṃ prādurbabhūva ha .. 39.20 .. ### [2.39.24](https://indike.org/pramana/in.purana.vayu.2.39.24) svarloko vai divaṃ hyetatpurāṇe niścayaṃ gatam. bhūtasyādhipatiścāgnistato bhūtapatiḥ smṛtaḥ .. 39.21 .. ### [2.39.25](https://indike.org/pramana/in.purana.vayu.2.39.25) vāyurbhuvasyādhipatistena vāyurbhuvapatiḥ. bhavyasya sūryo'dhipatistena sūryo divaspatiḥ .. 39.22 .. ### [2.39.26](https://indike.org/pramana/in.purana.vayu.2.39.26) maheti vyāhṛtenaivaṃ maharlokastato'bhavat. vinivṛttādhikārāṇāṃ devānāṃ tatra vai kṣayaḥ .. 39.23 .. ### [2.39.27](https://indike.org/pramana/in.purana.vayu.2.39.27) janastu pañcamo lokastasmājjāyanti vai janāḥ . tāsāṃ svāyaṃbhuvādyānāṃ prajānāṃ jananājjanaḥ .. 39.24 .. ### [2.39.28](https://indike.org/pramana/in.purana.vayu.2.39.28) yāstāḥ svāyambhuvādyā hi purastātparikīrttitāḥ. kalpadagdhe tadā loke pratiṣṭhanti tadā tapaḥ .. 39.25 .. ### [2.39.29](https://indike.org/pramana/in.purana.vayu.2.39.29) ṛbhuḥ sanatkumārādyā yatra santyūrddhvaretasaḥ . tapasā bhāvitātmānastatra santīti vā tapaḥ .. 39.26 .. ### [2.39.30](https://indike.org/pramana/in.purana.vayu.2.39.30) satyeti brahmaṇaḥ śabdaḥ sattāmātrastu saḥ smṛtaḥ. brahmalokastataḥ satyaṃ saptamaḥ sa tu bhāskaraḥ .. 39.27 .. ### [2.39.31](https://indike.org/pramana/in.purana.vayu.2.39.31) gandharvāpsaraso yakṣā guhyakāstu sarākṣasāḥ. sarvabhūtapiśācāśca nāgāśca saha mānuṣaiḥ. svarlokavāsinaḥ sarve devā bhuvinivāsinaḥ .. 39.28 .. ### [2.39.32](https://indike.org/pramana/in.purana.vayu.2.39.32) maruto mātariśvāno rudrā devāstathāśvinau. aniketāntarikṣāste bhuvarlaukyā divaukasaḥ .. 39.29 .. ### [2.39.33](https://indike.org/pramana/in.purana.vayu.2.39.33) ādityā ṛbhavo viśve sādhyāśca pitarastathā. ṛṣayo'ṅgirasaścaiva bhuvarllokaṃ samāśritāḥ .. 39.30 .. ### [2.39.34](https://indike.org/pramana/in.purana.vayu.2.39.34) ete vaimānikā devāstārāgrahanivāsinaḥ. ityete kramaśaḥ proktā brahmavyāhārasambhavāḥ .. 39.31 .. ### [2.39.35](https://indike.org/pramana/in.purana.vayu.2.39.35) bhūrlokaprathamā lokā mahadantāśca te smṛtāḥ. ārabhyante tu tanmātraiḥ śuddhāsteṣāṃ parasparam .. 39.32 .. ### [2.39.36](https://indike.org/pramana/in.purana.vayu.2.39.36) śukrādyāścākṣuṣāntāśca ye vyatītā bhuvaṃ śritāḥ. maharlokaścaturthastu tasmiṃste kalpavāsinaḥ .. 39.33 .. ### [2.39.37](https://indike.org/pramana/in.purana.vayu.2.39.37) bhūrlokaprathamā lokā mahadantāśca ye smṛtāḥ. tān sarvān sapta sūryāste arccirbhirnidahanti vai .. 39.34 .. ### [2.39.38](https://indike.org/pramana/in.purana.vayu.2.39.38) marīciḥ kaśyapo dakṣastathā svāyambhuvo'ṅgirāḥ . bhṛguḥ pulastyaḥ pulahaḥ kraturityevamādayaḥ .. 39.35 .. ### [2.39.39](https://indike.org/pramana/in.purana.vayu.2.39.39) prajānāṃ patayaḥ sarve varttante tatra taiḥ saha. niḥsattvā nirmamāścaiva tatra te hyūrddhvaretasaḥ .. 39.36 .. ### [2.39.40](https://indike.org/pramana/in.purana.vayu.2.39.40) ṛbhuḥ sanatkumārādyā vairājyāste tapodhanāḥ. manvantarāṇāṃ sarveṣāṃ sāvarṇānāṃ tataḥ smṛtāḥ . caturddaśānāṃ sarveṣāṃ punarāvṛttihetavaḥ .. 39.37 .. ### [2.39.41](https://indike.org/pramana/in.purana.vayu.2.39.41) yogaṃ tapaśca satyañca samādhāya tadātmani. ṣaṣṭhe kāle nivarttante tattadāharviparyaye .. 39.38 .. ### [2.39.42](https://indike.org/pramana/in.purana.vayu.2.39.42) satyantu saptamo loko hyapunarmārgagāminām. brahmalokaḥ samākhyāto hyapratīghātalakṣaṇaḥ .. 39.39 .. ### [2.39.43](https://indike.org/pramana/in.purana.vayu.2.39.43) paryāsapārimāṇyena bhūrlokaḥ samitiḥ smṛtaḥ . bhūmyantaraṃ yadādityādantarikṣaṃ bhuvaḥ smṛtam .. 39.40 .. ### [2.39.44](https://indike.org/pramana/in.purana.vayu.2.39.44) sūryadhruvāntaraṃ yacca svargaloko divaḥ smṛtaḥ. dhruvājjanāntaraṃ yacca maharlokastaducyate .. 39.41 .. ### [2.39.45](https://indike.org/pramana/in.purana.vayu.2.39.45) vikhyātāḥ saptalokāstu teṣāṃ vakṣyāmi siddhayaḥ. bhūrlokavāsinaḥ sarve hyannādāstu ramātmakāḥ .. 39.42 .. ### [2.39.46](https://indike.org/pramana/in.purana.vayu.2.39.46) bhuve svarge ca ye sarve somapā ājyapāśca te. caturthe ye'pi varttante maha rlokaṃ samāśritāḥ .. 39.43 .. ### [2.39.47](https://indike.org/pramana/in.purana.vayu.2.39.47) vijñeyā mānasī teṣāṃ siddhirvai pañcalakṣaṇā. sadyaścotpadyate teṣāṃ manasā sarvvamīpsitam .. 39.44 .. ### [2.39.48](https://indike.org/pramana/in.purana.vayu.2.39.48) ete daivā yajante vai yajñaiḥ sarvaiḥ parasparam. atītān vartamānāṃśca varttamānānanāgatān .. 39.45 .. ### [2.39.49](https://indike.org/pramana/in.purana.vayu.2.39.49) prathamānantarairiṣṭvā hyantarāḥ sāmprataiḥ punaḥ. nivarttatītyāsambandho'tīte devagaṇe tataḥ .. 39.46 .. ### [2.39.50](https://indike.org/pramana/in.purana.vayu.2.39.50) vinivṛttādhikārāṇāṃ siddhisteṣāntu mānasī. teṣāntu mānasī jñeyā śuddhā siddhiparamparā .. 39.47 .. ### [2.39.51](https://indike.org/pramana/in.purana.vayu.2.39.51) uktā lokāśca catvāro janasyānuvidhistathā. samāsena mayā viprā bhūyastaṃ varttayāmi vaḥ .. 39.48 .. ### [2.39.52](https://indike.org/pramana/in.purana.vayu.2.39.52) vāyuruvāca.. ### [2.39.53](https://indike.org/pramana/in.purana.vayu.2.39.53) marīciḥ kaśyapo dakṣo vasiṣṭhaścāṅgirā bhṛguḥ. pulastyaḥ pulahaścaiva kraturityevamādayaḥ .. 39.49 .. ### [2.39.54](https://indike.org/pramana/in.purana.vayu.2.39.54) pūrvaṃ te saṃprasūyante brahmaṇo manasā iha. tataḥ prajāḥ pratiṣṭhāpya janamevāśrayanti te .. 39.50 .. ### [2.39.55](https://indike.org/pramana/in.purana.vayu.2.39.55) kalpadāhapradīpteṣu tadā kāleṣu teṣu vai. bhūrā diṣu mahānteṣu bhṛśaṃ vyāpteṣvathāgninā .. 39.51 .. ### [2.39.56](https://indike.org/pramana/in.purana.vayu.2.39.56) śikhā saṃvarttakā jñeyā prāpnuvanti sadā janāḥ. yāmādayo gaṇāḥ sarve maharlokanivāsinaḥ .. 39.52 .. ### [2.39.57](https://indike.org/pramana/in.purana.vayu.2.39.57) maharlokeṣu dīpteṣu janamevāśrayanti te. sarve sūkṣmaśarīrāste tatrasthāstu bhavanti te .. 39.53 .. ### [2.39.58](https://indike.org/pramana/in.purana.vayu.2.39.58) teṣāṃ te tulyasāmarthyāstulyamūrttidharāstathā . jana loke vivarttante yāvatsaṃplavate jagat .. 39.54 .. ### [2.39.59](https://indike.org/pramana/in.purana.vayu.2.39.59) vyuṣṭāyāntu rajanyāṃ vai brahmaṇo'vyaktayoninaḥ. aharādau prasūyante pūrvavatkramaśāstviha .. 39.55 .. ### [2.39.60](https://indike.org/pramana/in.purana.vayu.2.39.60) svāyambhuvādayaḥ sarve marīcyantāstu sādhakāḥ. devāste vai punasteṣāṃ jāyante nidhaneṣviha .. 39.56 .. ### [2.39.61](https://indike.org/pramana/in.purana.vayu.2.39.61) yāmādayaḥ krameṇaiva kaniṣṭhādyāḥ prajāpateḥ. pūrvaṃ pūrvaṃ prasūyante paścime paścacimāstathā. devānvaye devatā hi sapta sambhūtayaḥ smṛtāḥ. vyatītāḥ kalyajāsteṣāṃ tisraḥ śiṣṭāstathā pare .. 39.58 .. ### [2.39.62](https://indike.org/pramana/in.purana.vayu.2.39.62) āvarttamānā devāste krameṇaite na sarvvaśaḥ. gatvā javantavībhāvandaśakṛtvaḥ punaḥ punaḥ .. 39.59 .. ### [2.39.63](https://indike.org/pramana/in.purana.vayu.2.39.63) tataste vai gaṇāḥ sarvve dṛṣṭvā bhāveṣvanityatām. bhāvino'rthasya ca balāt puṇyākhyātibalena ca .. 39.60 .. ### [2.39.64](https://indike.org/pramana/in.purana.vayu.2.39.64) nivṛttavṛttayaḥ sarve svasthāḥ sumanasastathā. vairāje tūpapadyante lokamutsṛjya tajjanam .. 39.61 .. ### [2.39.65](https://indike.org/pramana/in.purana.vayu.2.39.65) tato'nyenaiva kālena nityayuktāstapasvinaḥ. kathanāccaiva dharmasya teṣāṃ te jajñire'nvaye .. 39.62 .. ### [2.39.66](https://indike.org/pramana/in.purana.vayu.2.39.66) īhotpannāstataste vai sthānā āpūrayantyuta. devatve ca ṛṣitve ca manuṣyanve ca sarvaśaḥ .. 39.63 .. ### [2.39.67](https://indike.org/pramana/in.purana.vayu.2.39.67) evaṃ devagaṇāḥ sarve daśakṛtvo nivarttya vai. vairājeṣūpapannāste daśa tiṣṭhantyupaplavān .. 39.64 .. ### [2.39.68](https://indike.org/pramana/in.purana.vayu.2.39.68) pūrṇe pūrṇe tataḥ kalpe sthitvā vairājake punaḥ. brahmaloke vivarttaṃte pūrvvapūrvvakrameṇa tu .. 39.65 .. ### [2.39.69](https://indike.org/pramana/in.purana.vayu.2.39.69) etasmin brahmaloke tu kalpe vairājake gate. vairājaṃ punarapyeke kalpasthānamakalpayan .. 39.66 .. ### [2.39.70](https://indike.org/pramana/in.purana.vayu.2.39.70) evaṃ pūrvvānupūrvyeṇa brahmalokagatena vai. evaṃ teṣu vyatīteṣu tapasā parikalpite. vairāje tūpapadyante daśakṛtvo nivarttate .. 39.67 .. ### [2.39.71](https://indike.org/pramana/in.purana.vayu.2.39.71) evaṃ devayugānīha vyatītāni sahasraśaḥ. nidhanaṃ brahmaloke tu gatānāmṛṣibhiḥ saha .. 39.68 .. ### [2.39.72](https://indike.org/pramana/in.purana.vayu.2.39.72) ..sūta uvāca.. na śakyamānupūrveṇa teṣāṃ vaktuṃ pravistaram. anāditvācca kālasya hyasaṃ khyānācca sarvaśaḥ. evameva na sandeho yathāvatkathitaṃ mayā .. 39.69 .. ### [2.39.73](https://indike.org/pramana/in.purana.vayu.2.39.73) tadupaśrutya vākyārthamṛṣayaḥ saṃśayānvitāḥ. sūtamāhuḥ purāṇajñaṃ vyāsaśiṣyaṃ mahā matim .. 39.70 .. ### [2.39.74](https://indike.org/pramana/in.purana.vayu.2.39.74) ṛṣaya ūcuḥ.. ### [2.39.75](https://indike.org/pramana/in.purana.vayu.2.39.75) vairājāste yadāhārā yatsattvāśca yadāśrayāḥ. tiṣṭhanti caiva yatkālaṃ tanno brūhi yathātatham .. 39.71 .. ### [2.39.76](https://indike.org/pramana/in.purana.vayu.2.39.76) taduktamṛṣibhirvākyaṃ śrutvā lokārthatattvavit. sūtaḥ paurāṇiko vākyaṃ vinayenedamabravīt .. 39.72 .. ### [2.39.77](https://indike.org/pramana/in.purana.vayu.2.39.77) tataḥ prāpyanta te sarvve śuddhiśuddhatamāśca ye. ābhūta saṃplavāstatra daśa tiṣṭhanti tejanāḥ .. 39.73 .. ### [2.39.78](https://indike.org/pramana/in.purana.vayu.2.39.78) sarve sūkṣmaśarīrāste vidvāṃso ghanamūrttayaḥ. sthitalokāsthitatvācca teṣāṃ bhūtaṃ na vidyate .. 39.74 .. ### [2.39.79](https://indike.org/pramana/in.purana.vayu.2.39.79) ūcuḥ sanatkumārādyāḥ siddhāste thogadharmiṇaḥ. khyātiṃ naimittikīṃ teṣāṃ paryyāye samupasthite .. 39.75 .. ### [2.39.80](https://indike.org/pramana/in.purana.vayu.2.39.80) sthānatyāge manaścāpi yugapatsaṃpravarttate. ūcuḥ sarvve tadānyo'nyaṃ vairājāñchuddhabuddhayaḥ .. 39.76 .. ### [2.39.81](https://indike.org/pramana/in.purana.vayu.2.39.81) evameva mahābhāgāḥ praṇavaṃ sampraviśya ha. brahmaloke pravarttānastannaḥ śreyo bhaviṣyati .. 39.77 .. ### [2.39.82](https://indike.org/pramana/in.purana.vayu.2.39.82) evamuktvā tadā sarve brahmānte vyavasāyinaḥ. yojayitvā tadā sarvve varttante yogadharmmiṇaḥ .. 39.78 .. ### [2.39.83](https://indike.org/pramana/in.purana.vayu.2.39.83) tatraiva sampralīyante śāntā dīpārciṣo yathā. brahmakāyamavarttanta punarāvṛttidurllabham ... 39.79 .. ### [2.39.84](https://indike.org/pramana/in.purana.vayu.2.39.84) lokaṃ taṃ samanuprāpya sarvve te bhāvanāmayam. ānandaṃ brahmaṇaḥ prāpya hyamṛtatvāya te gatāḥ .. 39.80 .. ### [2.39.85](https://indike.org/pramana/in.purana.vayu.2.39.85) vairājebhyastathaivorddhvamantare ṣaḍguṇe tataḥ. brahmalokaḥ samākhyāto yatra brahmā purohitaḥ .. 39.81 .. ### [2.39.86](https://indike.org/pramana/in.purana.vayu.2.39.86) te sarve praṇavātmāno buddhaśuddhatapāstathā. ānandaṃ brahmaṇaḥ prāpyāmṛtatvañca bhajantyuta .. 39.82 .. ### [2.39.87](https://indike.org/pramana/in.purana.vayu.2.39.87) dvandvaiste nābhibhūyante bhāvatrayavivarjjitāḥ. ādhipatyaṃ vinā tulyā brahmaṇaste mahaujasaḥ .. 39.83 .. ### [2.39.88](https://indike.org/pramana/in.purana.vayu.2.39.88) prabhāvavijayaiśvaryyasthitivairāgyadarśanaiḥ. tebrahmalaukikāḥ sarve gatiṃ prāpya vivarttanīm .. 39.84 .. ### [2.39.89](https://indike.org/pramana/in.purana.vayu.2.39.89) brahmaṇā saha devaiśca samprāpte pratisañcare. tapaso'nte kriyātmāno buddhāvasthā manīṣiṇaḥ. avyakte saṃpralīyante sarve te kṣaṇadarśinaḥ .. 39.85 .. ### [2.39.90](https://indike.org/pramana/in.purana.vayu.2.39.90) ityetadamṛtaṃ śukraṃ nityamakṣayamavyayam. devarṣayo brahmasatraṃ sanātanamupāsate .. 39.86 .. ### [2.39.91](https://indike.org/pramana/in.purana.vayu.2.39.91) apunarmārgagādīnāṃ teṣāṃ caivorddhvaretasām . karmābhyāsakṛtā śuddhirvedānteṣūpalakṣyate .. 39.87 .. ### [2.39.92](https://indike.org/pramana/in.purana.vayu.2.39.92) tatra te'bhyāsino yuktāḥ parāṃ kāṣṭhāmupāsate. hitvā śarīraṃ pāpmānamamṛtatvāya te gatāḥ .. 39.88 .. ### [2.39.93](https://indike.org/pramana/in.purana.vayu.2.39.93) vītarāgā jitakrodhāḥ nirmohāḥ satyavādinaḥ. śāntāḥ praṇihitātmāno dayāvanto jitendriyāḥ .. 39.89 .. ### [2.39.94](https://indike.org/pramana/in.purana.vayu.2.39.94) niḥsaṅgāḥ śucayaścaiva brahmasāyujyagāḥ smṛtāḥ . akāmayuktairye vīrāstapobhirddagdhakilbiṣāḥ. teṣāmabhraṃśino lokā aprameyasukhāḥ smṛtāḥ .. 39.90 .. ### [2.39.95](https://indike.org/pramana/in.purana.vayu.2.39.95) etadbrahmapadaṃ divyaṃ paramaṃ vyomni bhāsvaram. gatvā na yatra śocanti hyamarā brahmaṇā saha .. 39.91 .. ### [2.39.96](https://indike.org/pramana/in.purana.vayu.2.39.96) ṛṣaya ūcuḥ.. ### [2.39.97](https://indike.org/pramana/in.purana.vayu.2.39.97) kasmādeṣa parārddhaśca kaścaiṣa para ucyate. etadveditumicchāmastanno nigada sattama .. 39.92 .. ### [2.39.98](https://indike.org/pramana/in.purana.vayu.2.39.98) sūta uvāca.. ### [2.39.99](https://indike.org/pramana/in.purana.vayu.2.39.99) śrṛṇudhvaṃ me parārddhañca parisaṃkhyāṃ parasya ca. evaṃ daśa śatañcaiva sahasrañcaiva saṅkhyayā .. 39.93 .. ### [2.39.100](https://indike.org/pramana/in.purana.vayu.2.39.100) vijñeyamāsahasrantu sahasrāṇi daśāyutam. ekaṃ śatasahasrantu niyutaṃ procyate budhaiḥ .. 39.94 .. ### [2.39.101](https://indike.org/pramana/in.purana.vayu.2.39.101) tathā śatasahasrāṇāmarbudaṃ koṭirucyate. arbudaṃ daśakoṭyastu hyabjaṃ koṭiśataṃ viduḥ .. 39.95 .. ### [2.39.102](https://indike.org/pramana/in.purana.vayu.2.39.102) sahasramapi koṭīnāṃ kharvamāhurmanīṣiṇaḥ. daśakoṭisahasrāṇi nikharvamiti taṃ viduḥ .. 39.96 .. ### [2.39.103](https://indike.org/pramana/in.purana.vayu.2.39.103) śataṃ koṭisahasrāṇāṃ saṅkurityabhidhīyate. koṭi sahasra srāṇāṃ koṭīnāṃ daśadhā punaḥ. guṇitāni samudraṃ vai prāhuḥ saṃkhyāvido janāḥ .. 39.97 .. ### [2.39.104](https://indike.org/pramana/in.purana.vayu.2.39.104) koṭīnāṃ sahasramayutamityayaṃ madhya ucyate. koṭi sahasra niyutā sa cānta iti saṃjñitaḥ .. 39.98 .. ### [2.39.105](https://indike.org/pramana/in.purana.vayu.2.39.105) koṭikoṭisahasrāṇiṃ parārddha iti kīrtyate . parārddhadviguṇañcāpi paramāhurmanīṣiṇaḥ .. 39.99 .. ### [2.39.106](https://indike.org/pramana/in.purana.vayu.2.39.106) śatamāhuḥ paridṛḍhaṃ sahasraṃ paripadmakam. vijñeyamayutaṃ tasmānniyutaṃ prayutaṃ tataḥ .. 39.100 .. ### [2.39.107](https://indike.org/pramana/in.purana.vayu.2.39.107) arbudaṃ nirbudañcaiva kharbudañca tataḥ smṛtam. kharvañcaiva nikharvañca śaṅkuḥ padmaṃ tathaiva ca .. 39.101 .. ### [2.39.108](https://indike.org/pramana/in.purana.vayu.2.39.108) samudraṃ madhyamañcaiva parārddhamaparaṃ tataḥ. evamaṣṭādaśaitāni sthānāni gaṇanāvidhau .. 39.102 .. ### [2.39.109](https://indike.org/pramana/in.purana.vayu.2.39.109) śatānīti vijānīyāt saṃjñitāni maharṣibhiḥ. kalpasaṃkhyā pravṛttasya parārddhaṃ brahmaṇaḥ smṛtam .. 39.103 .. ### [2.39.110](https://indike.org/pramana/in.purana.vayu.2.39.110) tāvaccheṣo'pi kālo'sya tasyānte pratisṛjyate. para eṣa parārddhañca saṃkhyātaḥ saṃkhyayā mayā .. 39.104 .. ### [2.39.111](https://indike.org/pramana/in.purana.vayu.2.39.111) yasmādasya paraṃ vīryaṃ paramāyuḥ parantapaḥ. parā śaktiḥ paro dharmmaḥ parā vidyā parā dhṛtiḥ .. 39.105 .. ### [2.39.112](https://indike.org/pramana/in.purana.vayu.2.39.112) paraṃ brahma paraṃ jñānaṃ paramaiśvaryameva ca. tasmātparataraṃ bhūtaṃ brahmaṇo'nyanna vidyate .. 39.106 .. ### [2.39.113](https://indike.org/pramana/in.purana.vayu.2.39.113) pare sthito hyeṣa paraḥ sarvārtheṣu tataḥ paraḥ. saṃkhyātastu paro brahmā tasyārddhaṃ tu parārddhatā .. 39.107 .. ### [2.39.114](https://indike.org/pramana/in.purana.vayu.2.39.114) saṃkhyeyaṃ cāpyasaṃkhyeyaṃ satataṃ cāpi taṃ trikam. saṃkhyeyaṃ saṃkhyayā dṛṣṭamapārārddhādvibhāṣyate .. 39.108 .. ### [2.39.115](https://indike.org/pramana/in.purana.vayu.2.39.115) rāśau dṛṣṭe na saṃkhyāsti tadasaṃkhyasya lakṣaṇam. ānantyaṃ sikatākhyeṣu dṛṣṭavān pañcalakṣaṇam .. 39.109 .. ### [2.39.116](https://indike.org/pramana/in.purana.vayu.2.39.116) īśvaraistatprasaṃkhyātaṃ śuddhatvāddivyadṛṣṭibhiḥ. evaṃ jñānapratiṣṭhatvāt sarvvaṃ brahmānupaśyati .. 39.110 .. ### [2.39.117](https://indike.org/pramana/in.purana.vayu.2.39.117) etacchrutvā tu te sarve naimiṣeyāstapasvinaḥ. bāṣpaparyyākulākṣāstu praharṣādghadghadasvarāḥ .. 39.111 .. ### [2.39.118](https://indike.org/pramana/in.purana.vayu.2.39.118) papracchurmātariśvānaṃ sarvve te brahmavādinaḥ. brahmalokastu bhagavan yāvanmātrāntaraḥ prabho .. 39.112 .. ### [2.39.119](https://indike.org/pramana/in.purana.vayu.2.39.119) yojanāgreṇa saṃkhyātaḥ sādhanaṃ yojanasya tu. krośasya ca parīmāṇaṃ śrotumicchāmi tattvataḥ .. 39.113 .. ### [2.39.120](https://indike.org/pramana/in.purana.vayu.2.39.120) teṣāṃ tadvacanaṃ śrutvā mātariśvā vinītavāk. uvāca madhuraṃ vākyaṃ yathādṛṣṭaṃ yathākramam .. 39.114 .. ### [2.39.121](https://indike.org/pramana/in.purana.vayu.2.39.121) vāyuruvāca.. ### [2.39.122](https://indike.org/pramana/in.purana.vayu.2.39.122) etadvo'haṃ pravakṣyāmi śrṛṇudhvaṃ me vivakṣitam. avyaktādvyaktabhāgo vai mahāsthūlo vibhāṣyate .. 39.115 .. ### [2.39.123](https://indike.org/pramana/in.purana.vayu.2.39.123) daśaiva mahatāṃ bhāgā bhūtādiḥ sthūla ucyate. daśabhāgādhikaṃ cāpi bhūtādiḥ paramāṇukaḥ .. 39.116 .. ### [2.39.124](https://indike.org/pramana/in.purana.vayu.2.39.124) paramāṇuḥ susūkṣmastu bāvagrāhyo na cakṣuṣā. yadabhedyatamaṃ loke vijñeyaṃ paramāṇu tat .. 39.117 .. ### [2.39.125](https://indike.org/pramana/in.purana.vayu.2.39.125) jālāntaragataṃ bhānoryatsūkṣmaṃ dṛśyate rajaḥ. prathamaṃ tatpramāṇānāṃ paramāṇuṃ pracakṣate .. 39.118 .. ### [2.39.126](https://indike.org/pramana/in.purana.vayu.2.39.126) aṣṭānāṃ paramāṇūnāṃ samavāyo yadā bhavet . trasareṇuḥ samākhyātastatpadmaraja ucyate .. 39.119 .. ### [2.39.127](https://indike.org/pramana/in.purana.vayu.2.39.127) trasareṇavaśca ye'pyaṣṭau rathareṇustu sa smṛtaḥ . te'pyaṣṭau samavāyasthā bālāgraṃ tatsmṛtaṃ budhaiḥ .. 39.120 .. ### [2.39.128](https://indike.org/pramana/in.purana.vayu.2.39.128) bālāgrāṇyaṣṭa likṣā syādyūkā taccāṣṭakaṃ bhavet. yūkāṣṭakaṃ yavaṃ prāhuraṅgulantu yavāṣṭakam .. 39.121 .. ### [2.39.129](https://indike.org/pramana/in.purana.vayu.2.39.129) dvādaśāṅgulaparvvāṇi vitastisthānamucyate. ratniścāṅgulaparvāṇi vijñeyo hyekaviṃśatiḥ .. 39.122 .. ### [2.39.130](https://indike.org/pramana/in.purana.vayu.2.39.130) catvāri viṃśatiścaiva hastaḥ syādaṅgulāni tu. kiṣkurdviratnirvijñeyo dvicatvāriṃśadaṅgulaḥ .. 39.123 .. ### [2.39.131](https://indike.org/pramana/in.purana.vayu.2.39.131) ṣaṇṇavatyaṅgulañcaiva dhanurāhurmanīṣiṇaḥ. etadgavyūtisaṃkhyāyāṃ pādānāṃ dhanuṣaḥ smṛtaḥ .. 39.124 .. ### [2.39.132](https://indike.org/pramana/in.purana.vayu.2.39.132) dhanurdaṇḍo yugaṃ nālī tulyānyetānyathāṅgulaiḥ. dhanuṣastriśataṃ nalvamāhuḥ saṃkhyāvido janāḥ .. 39.125 .. ### [2.39.133](https://indike.org/pramana/in.purana.vayu.2.39.133) dhanuḥsahasre dve cāpi gavyūtirupadiśyate. aṣṭau dhanuḥsahasrāṇi yojanantu vidhīyate .. 39.126 .. ### [2.39.134](https://indike.org/pramana/in.purana.vayu.2.39.134) etena dhanuṣā caiva yojanaṃ tu samāpyate. etatsahasraṃ vijñeyaṃ śakrakrośāntarantathā .. 39.127 .. ### [2.39.135](https://indike.org/pramana/in.purana.vayu.2.39.135) yojanānāntu saṃkhyātaṃ saṃkhyājñānaviśāradaiḥ. etena yojanāgreṇa śrṛṇudhvaṃ brahmaṇo'ntaram .. 39.128 .. ### [2.39.136](https://indike.org/pramana/in.purana.vayu.2.39.136) mahītalātsahasrāṇāṃ śatādūrddhvaṃ divākaraḥ. divākarātsahasreṇa tāvadūrddhvaṃ niśākaraḥ .. 39.129 .. ### [2.39.137](https://indike.org/pramana/in.purana.vayu.2.39.137) pūrṇaṃ śatasahasrantu yojanānāṃ niśākarāt. nakṣatramaṇḍalaṃ kṛtsnamupariṣṭātprakāśate .. 39.130 .. ### [2.39.138](https://indike.org/pramana/in.purana.vayu.2.39.138) śataṃ sahasraṃ saṃkhyāto merurdviguṇitaṃ punaḥ. grahāntaramathaikaikamūrddhvaṃ nakṣatramaṇḍalāt .. 39.131 .. ### [2.39.139](https://indike.org/pramana/in.purana.vayu.2.39.139) tārāgrahāṇāṃ sarvveṣāmadhastāccarate budhaḥ. tasyorddhvañcarate śukrastasmādūrddhvaṃ ca lohitaḥ .. 39.132 .. ### [2.39.140](https://indike.org/pramana/in.purana.vayu.2.39.140) tato bṛhaspatiścorddhvaṃ tasmādūrddhvaṃ śanaiścaraḥ. ūrddhvaṃ śatasahasrantu yojanānāṃ śanaiścarāt .. 39.133 .. ### [2.39.141](https://indike.org/pramana/in.purana.vayu.2.39.141) saptarṣimaṇḍalaṃ kṛtsnamupariṣṭātprakāśate. ṛṣibhistu sahasrāṇāṃ śatādūrddhvaṃ vibhāvyate .. 39.134 .. ### [2.39.142](https://indike.org/pramana/in.purana.vayu.2.39.142) yo'sau tārāmaye divye vimāne hrasvarūpake. uttānapādaputro'sau meḍhibhūto dhruvo divi .. 39.135 .. ### [2.39.143](https://indike.org/pramana/in.purana.vayu.2.39.143) trailokyasyaiṣa utsedho vyākhyāto yojanairmayā. manvantareṣu devānāmijyā yatraiva laukikī .. 39.136 .. ### [2.39.144](https://indike.org/pramana/in.purana.vayu.2.39.144) varṇāśramebhya ijyā tu loke'sminyā pravarttate. sarveṣāṃ devayonīnāṃ sthitihetuḥ savai smṛtaḥ .. 39.137 .. ### [2.39.145](https://indike.org/pramana/in.purana.vayu.2.39.145) trailokyametadvayākhyātamata ūrddhvaṃ nibodhata. dhruvā dūrddhvaṃ maharloko yasmiste kalpavāsinaḥ. ekayojanakoṭī sā ityevaṃ niścayaṃ gatam .. 39.138 .. ### [2.39.146](https://indike.org/pramana/in.purana.vayu.2.39.146) dve koṭyau tu maharlokādyasmiṃste kalpavāsinaḥ. yatra te brahmaṇaḥ putrā dakṣādyāḥ sādhakāḥ smṛtāḥ .. 39.139 .. ### [2.39.147](https://indike.org/pramana/in.purana.vayu.2.39.147) caturguṇottarādūrddhvaṃ janalokāttapaḥ smṛtam. vairājā yatra te devā bhūtadāhavivarjitāḥ .. 39.140 .. ### [2.39.148](https://indike.org/pramana/in.purana.vayu.2.39.148) ṣaḍguṇantu tapolokātsatyalokāntaraṃ smṛtam. apunarmārakāmānāṃ brahmalokaḥ sa ucyate .. 39.141 .. ### [2.39.149](https://indike.org/pramana/in.purana.vayu.2.39.149) yasmānna cyavate bhūyo brahmāṇaṃ sa upāsate . ekakoṭiryojanānāṃ pañcāśanniyutāni tu .. 39.142 .. ### [2.39.150](https://indike.org/pramana/in.purana.vayu.2.39.150) ūrddhvaṃ bhāgastato'ṇḍasya brahmalokātparaḥ smṛtaḥ. caturaścaiva koṭyastu niyutāḥ pañcaṣaṣṭi ca .. 39.143 .. ### [2.39.151](https://indike.org/pramana/in.purana.vayu.2.39.151) eṣo'rddhaṃśapracāro'sya gatyantaścāparaḥ smṛtaḥ. dhravāgrametadvayākhyātaṃ yojanāgrādyathāśrutam .. 39.144 .. ### [2.39.152](https://indike.org/pramana/in.purana.vayu.2.39.152) adhogatīnāṃ vakṣyāmi bhūtānāṃ sthānakalpanām. gacchanti ghorakarmmāṇaḥ prāṇino yatra karmmabhiḥ .. 39.145 .. ### [2.39.153](https://indike.org/pramana/in.purana.vayu.2.39.153) narako rauravo rodhaḥ sūkarastāla eva ca. taptakumbho mahājvālaḥ śabalo'tha vimocanaḥ .. 39.146 .. ### [2.39.154](https://indike.org/pramana/in.purana.vayu.2.39.154) kṛmī ca kṛmibhakṣaśca lālābhakṣo viśaṃsanaḥ . adhaḥśirāḥ pūyavaho rudhirāndhastathaiva ca .. 39.147 .. ### [2.39.155](https://indike.org/pramana/in.purana.vayu.2.39.155) tathā vaitaraṇaṃ kṛṣṇamasipatravanaṃ tathā. agnijvālo mahāghoraḥ saṃdaṃśo'tha śvabhojanaḥ ..39.148 .. ### [2.39.156](https://indike.org/pramana/in.purana.vayu.2.39.156) tamaśca kṛṣṇasūtraśca lohaścāpyasijastathā. apratiṣṭho'tha vīcyaśvanarakā hyevamādayaḥ .. 39.149 .. ### [2.39.157](https://indike.org/pramana/in.purana.vayu.2.39.157) tāmasā narakāḥ sarve yamasya viṣaye sthitāḥ. yeṣu duṣkṛtakarmāṇaḥ patantīha pṛthakpṛthak .. 39.150 bhūmeradhastātte sarve rauravādyāḥ prakīrttitāḥ. raurave kūṭasākṣī tu mithyā yaścābhiśaṃsati. krūragrahe pakṣavādī hyasatyaḥ patate naraḥ .. 39.151 .. ### [2.39.158](https://indike.org/pramana/in.purana.vayu.2.39.158) rodhe goghno brūṇahā ca hyagnidātā purasya ca. sūkare brahmahā majjetsurāpaḥ svarṇataskaraḥ .. 39.152 .. ### [2.39.159](https://indike.org/pramana/in.purana.vayu.2.39.159) tāle patetkṣatriyahā hatvā vaiśyañca durgatim. brahamahatyāñca yaḥ kuryādyaśca syādgurutalpagaḥ .. 39.153 .. ### [2.39.160](https://indike.org/pramana/in.purana.vayu.2.39.160) taptakumbhī svasāgāmī tathā rājabhaṭaśca yaḥ. taptalohe cāśvavaṇiktathā bandhanarakṣitā .. 39.154 .. ### [2.39.161](https://indike.org/pramana/in.purana.vayu.2.39.161) sādhvīvikrayakarttā ca yastu bhaktaṃ parityajet. mahājvāle duhitaraṃ snuṣāṃ gacchati yastu vai .. 39.155 .. ### [2.39.162](https://indike.org/pramana/in.purana.vayu.2.39.162) vedo vikrīyate yena vedaṃ dūṣayate ca yaḥ. gurūṃścaivāvamanyante vākkrośaistāḍayanti ca .. 39.156 .. ### [2.39.163](https://indike.org/pramana/in.purana.vayu.2.39.163) agamyagāmīca naro narakaṃ śabalaṃ vrajet. vimohe patite caure maryādāṃ yo bhinatti vai .. 39.157 .. ### [2.39.164](https://indike.org/pramana/in.purana.vayu.2.39.164) duradhvaṃ kurute yastu kīṭalohaṃ prapadyate. devabrāhmaṇavidveṣṭā gurūṇāñcāpyapūjakaḥ. ratnaṃ dūṣayate yastu kṛmibhakṣyaṃ prapadyate .. 39.158 .. ### [2.39.165](https://indike.org/pramana/in.purana.vayu.2.39.165) paryyaśnāti ya eko'nyo brāhmaṇīṃ suhṛdaḥ sutām. lālābhakṣe sa patati durgandhe narake gataḥ .. 39.159 .. ### [2.39.166](https://indike.org/pramana/in.purana.vayu.2.39.166) kāṇḍakarttā kulālaśca niṣkaharttā cikitsakaḥ. ārā meṣvagnidātā yaḥ patate sa viśaṃsane .. 39.160 .. ### [2.39.167](https://indike.org/pramana/in.purana.vayu.2.39.167) asatpratigrahī yaśca tathaivāyājyayājakaḥ. nakṣatrairjīvito yaśca naro gacchatyadhomukham .. 39.161 .. ### [2.39.168](https://indike.org/pramana/in.purana.vayu.2.39.168) kṣīraṃ surāṃ ca māṃsaṃ ca lākṣāṃ gandhaṃ rasantilān. evamādīni vikrīṇanghoro pūyavahe patet .. 39.162 .. ### [2.39.169](https://indike.org/pramana/in.purana.vayu.2.39.169) yaḥ kukkuṭāni badhnāti mārjārānsūkarāṃśca tān. pakṣiṇaśca mṛgāñchāgānso'pyenaṃ narakaṃ vrajet .. 39.163 .. ### [2.39.170](https://indike.org/pramana/in.purana.vayu.2.39.170) ājīviko māhiṣakastathā cakradhvajī ca yaḥ. raṅgopajīviko vipraḥ śākunigrāma yājakaḥ .. 39.164 .. ### [2.39.171](https://indike.org/pramana/in.purana.vayu.2.39.171) agāradāhī garadaḥ kuṇḍāśī somavikrayī. surāpo māṃsabhakṣaśca tathā ca paśughātakaḥ .. 39.165 .. ### [2.39.172](https://indike.org/pramana/in.purana.vayu.2.39.172) viśa(śva)stā mahiṣādīnāṃ mṛga hantā tathaiva ca. parvakāraśca sūcī ca yaśca syānmitraghātakaḥ. rudhirāndhe patantyete evamāhurmanīṣiṇaḥ .. 39.166 .. ### [2.39.173](https://indike.org/pramana/in.purana.vayu.2.39.173) upaviṣṭamekapaṅktyāṃ viṣamaṃ bhojayanti ye. patanti narake ghore viṅ‌bhuje nātra saṃśayaḥ .. 39.167 .. ### [2.39.174](https://indike.org/pramana/in.purana.vayu.2.39.174) mṛṣāvādī naro yaśca tathā prākrośako'śubhaḥ. patettu narake ghoro mūtrākīrṇe sa pāpakṛt .. 39.168 .. ### [2.39.175](https://indike.org/pramana/in.purana.vayu.2.39.175) madhugrāhābihantāro yanti vaitaraṇīṃ narāḥ. unmattāścittabhagnāśca śaucācāravivarjjitāḥ .. 39.169 .. ### [2.39.176](https://indike.org/pramana/in.purana.vayu.2.39.176) krodhanā duḥkhadāścaiva kuhakāḥ kṛṣṭagāminaḥ. asi patravane chedī tathā hyaurabhrikāśca ye. karttanaiśca nikṛṣyante mṛgavyādhāḥ sudāruṇaiḥ .. 39.170 .. ### [2.39.177](https://indike.org/pramana/in.purana.vayu.2.39.177) āśramapratyavasitā agnijvāle patanti vai. bhaujyante śyāma śabalairayastuṇḍaiśca vāyasaiḥ .. 39.171 .. ### [2.39.178](https://indike.org/pramana/in.purana.vayu.2.39.178) ijyāyāṃ vratamālopātsandaṃśe narake patet. skandante yadi vā svapne vratino brahmacāriṇaḥ .. 39.172 .. ### [2.39.179](https://indike.org/pramana/in.purana.vayu.2.39.179) putrairadhyāpitā ye ca putrairājñāpitāśca ye. tesarve narakaṃ yānti niyatantu śvabhojane .. 39.173 .. ### [2.39.180](https://indike.org/pramana/in.purana.vayu.2.39.180) varṇāśramavirūddhāni krodhaharṣasamanvitāḥ. karmāṇi ye tu kurvanti sarve nirayagāminaḥ .. 39.174 .. ### [2.39.181](https://indike.org/pramana/in.purana.vayu.2.39.181) upariṣṭātsito ghora uṣṇātmā rauravo mahān. sudāruṇastu śītātmā tasyādhastāttapaḥ smṛtaḥ .. 39.175 .. ### [2.39.182](https://indike.org/pramana/in.purana.vayu.2.39.182) evamādi krameṇaiva varṇyamānānnibodhata. bhūmeradhastātsaptaiva narakāḥ parikīrtitāḥ .. 39.176 .. ### [2.39.183](https://indike.org/pramana/in.purana.vayu.2.39.183) adharmasūnavaste syurandhatāmisrakādayaḥ. rauravaḥ prathamasteṣāṃ mahā raurava eva ca .. 39.177 .. ### [2.39.184](https://indike.org/pramana/in.purana.vayu.2.39.184) asyādhaḥ punarapyanyaḥ śītastapa iti smṛtaḥ. tṛtīyaḥ kālasūtraḥ syānmahāhavividhiḥ smṛtaḥ .. 39.178 .. ### [2.39.185](https://indike.org/pramana/in.purana.vayu.2.39.185) apratiṣṭha ścaturthaḥ syādavīcī pañcamaḥ smṛtaḥ. lohapṛṣṭhastamasteṣāmavidheyastu saptamaḥ .. 39.179 .. ### [2.39.186](https://indike.org/pramana/in.purana.vayu.2.39.186) ghoratvādrauravaḥ proktaḥ sāmbhako dahanaḥ smṛtaḥ. sudāruṇastu śītātmā tasyādhastāttapo'dhamaḥ .. 39.180 .. ### [2.39.187](https://indike.org/pramana/in.purana.vayu.2.39.187) sarpo nikṛntanaḥ proktaḥ kālasūtreti dāruṇaḥ. apratiṣṭhe sthitirnāsti bhramastasminsudāruṇaḥ .. 39.181 .. ### [2.39.188](https://indike.org/pramana/in.purana.vayu.2.39.188) avīcirdāruṇaḥ prokto yantrasaṃpīḍanācca saḥ. tasmātsudāruṇo lohaḥ karmmaṇāṃ kṣayaṇācca saḥ .. 39.182 .. ### [2.39.189](https://indike.org/pramana/in.purana.vayu.2.39.189) tathābhūto śarīratvādavidhibhyastu sa smṛtaḥ. pīḍabandhavadhāsaṅgādapratīkāralakṣaṇaḥ .. 39.183 .. ### [2.39.190](https://indike.org/pramana/in.purana.vayu.2.39.190) ūrddhvaṃ sailamitāste tu nirālokāśca te smṛtāḥ. duḥkhotkarṣastu sarveṣu hyadharmasya nimittataḥ .. 39.184 .. ### [2.39.191](https://indike.org/pramana/in.purana.vayu.2.39.191) ūrddhvaṃ lokaiḥ samāvetau nirālokau ca tāvubhau. kūṭāṅgārapramāṇaiśca śarīrī mūtranāyakaḥ .. 39.185 .. ### [2.39.192](https://indike.org/pramana/in.purana.vayu.2.39.192) upabhogasamarthaistu sadyo jāyanti karmabhiḥ. duḥkha prakarṣaścogratvaṃ teṣu sarveṣu vai smṛtaḥ .. 39.186 .. ### [2.39.193](https://indike.org/pramana/in.purana.vayu.2.39.193) yātanāścāpyasaṃkhyeyā nārakāṇāṃ tathā smṛtāḥ. duḥkhotkarṣastu sarveṣu hyadharmasya nimittataḥ .. 39.187 .. ### [2.39.194](https://indike.org/pramana/in.purana.vayu.2.39.194) tiryagyonau prasūyante karmaśeṣe gate tataḥ. devāśca nārakāścaiva hyūrddhvaṃ cādhaśca saṃsthitāḥ .. 39.188 .. ### [2.39.195](https://indike.org/pramana/in.purana.vayu.2.39.195) dharmādharmanimittena sadyo jāyanti mūrttayaḥ. upabhogārthamutpattiraupapattikakarmataḥ .. 39.189 .. ### [2.39.196](https://indike.org/pramana/in.purana.vayu.2.39.196) paśyanti nārakāndevā hyadhovakrān hyadhogatān. nārakāśca tathā devān sarvānpaśyantyadho mukhān .. 39.190 .. ### [2.39.197](https://indike.org/pramana/in.purana.vayu.2.39.197) anagramūlatā yasmāddhāraṇāśca svabhāvataḥ. tasmādūrddhvamadhobhāvo lokāloke na vidyate .. 39.191 .. ### [2.39.198](https://indike.org/pramana/in.purana.vayu.2.39.198) eṣā svābhāvikī saṃjñā lokāloke pravarttate. athābruvanpunarvāyuṃ brāhmaṇāḥ satriṇastadā .. 39.192 .. ### [2.39.199](https://indike.org/pramana/in.purana.vayu.2.39.199) ṛṣaya ūcuḥ.. ### [2.39.200](https://indike.org/pramana/in.purana.vayu.2.39.200) sarveṣāmeva bhūtānāṃ lokālokanivāsinām. saṃsāre saṃsarantīha yāvantaḥ prāṇinaśca tān .. 39.193 .. _First 200 of 370 passages. [Read on](https://indike.org/pramana/in.purana.vayu.2.39)_ ## Linked texts (2) - [Brahmāṇḍapurāṇa](https://indike.org/pramana/in.purana.brahmanda.3.2.2) — Vyāsa, Sanskrit - [Vaiṣṇava Dharmaśāstra](https://indike.org/pramana/in.niti.dharma.visnu.43.44) — Viṣṇu, Sanskrit --- Source: [https://indike.org/pramana/in.purana.vayu.2.39](https://indike.org/pramana/in.purana.vayu.2.39) · Pramāṇa