[Pramāṇa](https://indike.org/pramana/) › [Indian literature](https://indike.org/pramana/in) › [Purāṇas](https://indike.org/pramana/in.purana) › [Vayupurana](https://indike.org/pramana/in.purana.vayu) › 2.42 # Vayupurana 2.42: adhyāyaḥ 42 Vāyupurāṇa 2.42 - **Language:** Sanskrit ### adhyāyaḥ 42 ### [2.42.1](https://indike.org/pramana/in.purana.vayu.2.42.1) ..śaunakādiṛṣaya ūcuḥ.. ### [2.42.2](https://indike.org/pramana/in.purana.vayu.2.42.2) sūta sūta mahābhāga tvayā bhagavatā satā. vyāsaprasādādhigataśāstrasambodhanena ca .. 42.1 .. ### [2.42.3](https://indike.org/pramana/in.purana.vayu.2.42.3) aṣṭādaśapurāṇāni setihāsāni cānagha. upakramopasaṃhāra vidhinoktāni kṛtsnaśaḥ .. 42.2 .. ### [2.42.4](https://indike.org/pramana/in.purana.vayu.2.42.4) caturdaśasahasraṃ ca mātsyaṃ proktamatisphuṭam. tatsaṃkhyakaṃ bhaviṣyañca proktaṃ pañcaśatādhikam .. 42.3 .. ### [2.42.5](https://indike.org/pramana/in.purana.vayu.2.42.5) mārkaṇḍeyaṃ mahāramyaṃ proktaṃ navasahasrakam. kathitaṃ brahmavaivarttamaṣṭādaśasahasrakam .. 42.4 .. ### [2.42.6](https://indike.org/pramana/in.purana.vayu.2.42.6) śatottarañca brahmāṇḍaṃ sūryasaṃkhyāsahasrakam . atha bhāgavataṃ divyamaṣṭādaśasahasrakam .. 42.5 .. ### [2.42.7](https://indike.org/pramana/in.purana.vayu.2.42.7) sahasrāṇi daśaivoktaṃ purāṇaṃ brahmanāmakam. ayutaślokaghaṭitaṃ purāṇaṃ vāmanābhidham .. 42.6 .. ### [2.42.8](https://indike.org/pramana/in.purana.vayu.2.42.8) tathaivāyuta saṃkhyātaṃ ṣaṭśatādhikamādikam. trayoviṃśatisāhasramanilaṃ tadgataṃ śubham .. 42.7 .. ### [2.42.9](https://indike.org/pramana/in.purana.vayu.2.42.9) trayoviṃśatisāhasraṃ nāradīyamudāhṛtam . ekonaviṃśasāhasraṃ vainateyamudāhṛtam .. 42.8 .. ### [2.42.10](https://indike.org/pramana/in.purana.vayu.2.42.10) sahasrapañcapañcāśatproktaṃ pādmaṃ suvistaram. saptadaśasahasrantu kūrmaṃ proktaṃ manoharam .. 42.9 .. ### [2.42.11](https://indike.org/pramana/in.purana.vayu.2.42.11) caturviṃśati sāhasraṃ saukaraṃ paramādbhutam. ekāśītisahasrāṇi skāndamuktaṃ suvistṛtam .. 42.10 .. ### [2.42.12](https://indike.org/pramana/in.purana.vayu.2.42.12) evamaṣṭādaśoktāni purāṇāni bṛhanti ca. purāṇeṣveṣu bahavo dharmāste vinirūpitāḥ .. 42.11 .. ### [2.42.13](https://indike.org/pramana/in.purana.vayu.2.42.13) rāgiṇāñca virāgāṇāṃ yatīnāṃ brahmacāriṇām gṛhasthānāṃ vanasthānāṃ strīśūdrāṇāṃ viśeṣataḥ .. 42.12 .. ### [2.42.14](https://indike.org/pramana/in.purana.vayu.2.42.14) brāhmaṇakṣatriyaviśāṃ ye ca saṅkarajātayaḥ. gaṅgādyā yā mahānadyo yajñavratatapāṃsi ca .. 42.13 .. ### [2.42.15](https://indike.org/pramana/in.purana.vayu.2.42.15) anekavidhadānāni yamāśca niyamaiḥ saha. yogadharmā bahuvidhāḥ sāṃkhyā bhāgavatāstathā .. 42.14 .. ### [2.42.16](https://indike.org/pramana/in.purana.vayu.2.42.16) bhaktimārgā jñānamārgā vairāgyānilanīrajāḥ. upāsanavidhiścoktaḥ karmasaṃśuddhicetasām .. 42.15 .. ### [2.42.17](https://indike.org/pramana/in.purana.vayu.2.42.17) brāhmaṃ śaivaṃ vaiṣṇavaṃ ca sauraṃ śāktaṃ tathārhatam. ṣaḍdarśanāni coktāni svabhāvaniyatāni ca .. 42.16 .. ### [2.42.18](https://indike.org/pramana/in.purana.vayu.2.42.18) etadanyacca vividhaṃ purāṇeṣu nirupitam. ataḥ paraṃ kimapyasti na vā boddhavyamuttamam .. 42.17 .. ### [2.42.19](https://indike.org/pramana/in.purana.vayu.2.42.19) na jñāyeta yadi vyāso gopayedatha vā bhavān . atra naḥ saṃśayaṃ chindhi pūrṇaḥ paurāṇiko yataḥ .. 42.18 .. ### [2.42.20](https://indike.org/pramana/in.purana.vayu.2.42.20) sūta uvāca.. ### [2.42.21](https://indike.org/pramana/in.purana.vayu.2.42.21) śrṛṇu śaunaka vakṣyāmi praśramenaṃ sudurlabham. atigopyataraṃ divyamanākhyeyaṃ pracakṣate .. 42.19 .. ### [2.42.22](https://indike.org/pramana/in.purana.vayu.2.42.22) parāśarasuto vyāsaḥ kṛtvā paurāṇikīṃ kathām. sarvavedārthaghaṭitāṃ cintayāmāsa cetasi .. 42.20 .. ### [2.42.23](https://indike.org/pramana/in.purana.vayu.2.42.23) varṇāśramavatāṃ dharmo mayā samyagudāhṛtaḥ. muktimārgā bahuvidhā uktā vedāvirodhataḥ .. 42.21 .. ### [2.42.24](https://indike.org/pramana/in.purana.vayu.2.42.24) jīveśvarabrahmabhedo nirastaḥ sūtranirṇaye. nirūpitaṃ paraṃ brahma śrutiyuktavicārataḥ .. 42.22 .. ### [2.42.25](https://indike.org/pramana/in.purana.vayu.2.42.25) akṣaraṃ paramaṃ brahma paramātmā paraṃ padam. yadarthaṃ brahmacaryādivānaprasthayativratam .. 42.23 .. ### [2.42.26](https://indike.org/pramana/in.purana.vayu.2.42.26) ācaranti mahāprājñā dhāraṇāñca pṛthagvidhām. āsanaṃ prāṇarodhaśca pratyāhāraśca dhāraṇā .. 42.24 .. ### [2.42.27](https://indike.org/pramana/in.purana.vayu.2.42.27) dhyānaṃ samādhiretāni yamaiśca niyamaiḥ saha. aṣṭāṅgāni yadarthañca caranti munipuṅgavāḥ .. 42.25 .. ### [2.42.28](https://indike.org/pramana/in.purana.vayu.2.42.28) yadarthaṃ karma kurvanti vedājñāmātratatparāḥ. parārpaṇadhiyā samyag niṣkāmāḥ kalilojjhitāḥ .. 42.26 .. ### [2.42.29](https://indike.org/pramana/in.purana.vayu.2.42.29) yajjñaptaye nirākarttuṃ pāpācaraṇamātmanaḥ. gaṅgāditīrthacaryāṇi niṣevante śucivratāḥ .. 42.27 .. ### [2.42.30](https://indike.org/pramana/in.purana.vayu.2.42.30) tadbrahma paramaṃ śuddhamanādyantamanāmayam. nityaṃ sarvagataṃ sthāṇu kūṭasthaṃ kūṭavirjitam .. 42.28 .. ### [2.42.31](https://indike.org/pramana/in.purana.vayu.2.42.31) sarvendriyacarābhāsaṃ prākṛtendriyavarjitam. dikkālādyanavacchinnaṃ nityaṃ cinmātramavyayam .. 42.29 .. ### [2.42.32](https://indike.org/pramana/in.purana.vayu.2.42.32) adhyāstaṃ sarpavadyatra viśvametatprakāśate. viśvasminnapi cānveti nirvikāraśca rajjuvat .. 42.30 .. ### [2.42.33](https://indike.org/pramana/in.purana.vayu.2.42.33) samyagvicāritaṃ yadvatphenormibudbudodakam. tathā vicāritaṃ brahma viśvasmānna pṛthagbhavet .. 42.31 .. ### [2.42.34](https://indike.org/pramana/in.purana.vayu.2.42.34) sarvaṃ brahmaiva nānātvaṃ nāstīti nigamā jaguḥ. yasmādbhavanti brahmāṇḍa koṭayo na bhavanti ca .. 42.32 .. ### [2.42.35](https://indike.org/pramana/in.purana.vayu.2.42.35) yadunmeṣanimeṣābhyāṃ jagatāṃ pralayodayau. bhavetāṃ yā parā śaktiryadādhāratayā sthitā .. 42.33 .. ### [2.42.36](https://indike.org/pramana/in.purana.vayu.2.42.36) yasminnidaṃ yataścedaṃ yenedaṃ yadidaṃ smṛtam. yadajñānājjagadbhāti yasmin jñāte jaganna hi .. 42.34 .. ### [2.42.37](https://indike.org/pramana/in.purana.vayu.2.42.37) asatyaṃ yajjaḍaṃ duḥkhamavastviti nirūpitam. viparītamato yadvai saccidānandamūrttikam .. 42.35 .. ### [2.42.38](https://indike.org/pramana/in.purana.vayu.2.42.38) jīve jāgrati viśvākhyaṃ svapne yattaijasaṃ smṛtam . suṣuptau prājñasaṃjñaṃ tatsarvāvasthāsu saṃsmṛtam .. 42.36 .. ### [2.42.39](https://indike.org/pramana/in.purana.vayu.2.42.39) yaccakṣuṣāṃ cakṣuratha śrotrāṇāṃ śrotramasti ca. tvak tvacāṃ rasanaṃ tasya prāṇaṃ prāṇasya yadviduḥ .. 42.37 .. ### [2.42.40](https://indike.org/pramana/in.purana.vayu.2.42.40) buddhirjñānena ca prāṇāḥ kriyāśaktyā nirantaram. yanneśiri samabhyetuṃ jñātuṃ ca paramārthataḥ .. 42.38 .. ### [2.42.41](https://indike.org/pramana/in.purana.vayu.2.42.41) rajjāvahirmarau vāri nīlimā gagane yathā. asadviśvamidaṃ bhāti yasminnajñānakalpitam .. 42.39 .. ### [2.42.42](https://indike.org/pramana/in.purana.vayu.2.42.42) ghaṭāvacchinna evāyaṃ mahākāśo vibhidyate. kāryopādhiparicchinnaṃ tadvadyajjīvasaṃjñikam .. 42.40 .. ### [2.42.43](https://indike.org/pramana/in.purana.vayu.2.42.43) māyayā citrakāriṇyā vicitraguṇaśīlayā . brahmāṇḍaṃ citramatulaṃ yasmin bhittāvivārpitam .. 42.41 .. ### [2.42.44](https://indike.org/pramana/in.purana.vayu.2.42.44) dhāvato'nyānatikrāntaṃ vadato vāgagocaram . vedavedāntasiddhāntairvinirṇītaṃ tadakṣaram .. 42.42 .. ### [2.42.45](https://indike.org/pramana/in.purana.vayu.2.42.45) akṣarānna paraṃ kiñcitsā kāṣṭhā sā parā gatiḥ . ityevaṃ śrūyate vede bahudhāpi vicārite .. 42.43 .. ### [2.42.46](https://indike.org/pramana/in.purana.vayu.2.42.46) akṣarasyātmanaścāpi svātmarūpatayā sthitam. paramānandasandoharūpamānanda vigraham .. 42.44 .. ### [2.42.47](https://indike.org/pramana/in.purana.vayu.2.42.47) līlāvilāsarasikaṃ ballavīyūthamadhyagam. śikhipicchakirīṭena bāsvadratnacitena ca .. 42.45 .. ### [2.42.48](https://indike.org/pramana/in.purana.vayu.2.42.48) ullasadvidyudāṭopakuṇḍalābhyāṃ virājitam. karṇopāntacarannetrakhañjarīṭamanoharam .. 42.46 .. ### [2.42.49](https://indike.org/pramana/in.purana.vayu.2.42.49) kuñjakuñjapriyāvṛndavilāsaratilampaṭam. pītāmbaradharaṃ divyaṃ candanālepamaṇḍitam .. 42.47 .. ### [2.42.50](https://indike.org/pramana/in.purana.vayu.2.42.50) adharāmṛta saṃsiktaveṇunādena vallavīḥ. mohayantañcidānandamanaṅgamadabhañjanam .. 42.48 .. ### [2.42.51](https://indike.org/pramana/in.purana.vayu.2.42.51) koṭikāmakalāpūrṇaṃ koṭicandrāṃśunirmalam. trirekhakamṭhavilasadratnaguñjāmṛgā kulam .. 42.49 .. ### [2.42.52](https://indike.org/pramana/in.purana.vayu.2.42.52) yamunāpuline tuṅge tamālavanakānane. kadambacampakāśokapārijātamanohare .. 42.50 .. ### [2.42.53](https://indike.org/pramana/in.purana.vayu.2.42.53) śikhipārāvataśukapikakolāhalākule. nirodhārthaṃ gavāmeva dhāvamānamitastataḥ .. 42.51 .. ### [2.42.54](https://indike.org/pramana/in.purana.vayu.2.42.54) rādhāvilāsarasikaṃ kṛṣṇākhyaṃ puruṣaṃ param. śrutavānasmi vedebhyo yatastadgocaro'bhavat .. 42.52 .. ### [2.42.55](https://indike.org/pramana/in.purana.vayu.2.42.55) evaṃ brahmaṇi cinmātre nirguṇe bhedavarjite. golokasaṃjñike kṛṣṇo dīvyatīti śrutaṃ mayā .. 42.53 .. ### [2.42.56](https://indike.org/pramana/in.purana.vayu.2.42.56) nātaḥ parataraṃ kiñcinnigamāgamayorapi. tathāpi nigamo vakti hyakṣarāt parataḥ paraḥ .. 42.54 .. ### [2.42.57](https://indike.org/pramana/in.purana.vayu.2.42.57) golokavāsī bhagavānakṣarātpara ucyate. tasmādapi paraḥ ko'sau gīyate śrutibhiḥ sadā .. 42.55 .. ### [2.42.58](https://indike.org/pramana/in.purana.vayu.2.42.58) uddiṣṭo veda vacanairviśeṣo jñāyate katham. śrutervārtho'nyathā bodhyaḥ paratastvakṣarāditi .. 42.56 .. ### [2.42.59](https://indike.org/pramana/in.purana.vayu.2.42.59) śrutyarthe saṃśayāpanno vyāsaḥ satyavatīsutaḥ. vicārayāmāsa ciraṃ na prapede yathātatham .. 42.57 .. ### [2.42.60](https://indike.org/pramana/in.purana.vayu.2.42.60) sūta uvāca.. ### [2.42.61](https://indike.org/pramana/in.purana.vayu.2.42.61) vicārayannapi munirnāpa vedārthaniścayam. vedo nārāyaṇaḥ sākṣādyatra muhyanti sūrayaḥ .. 42.58 .. ### [2.42.62](https://indike.org/pramana/in.purana.vayu.2.42.62) tathāpi mahatīmārttiṃ satāṃ hṛdayatāpinīm. punarvicārayāmāsa kaṃ vrajāmi karomi kim .. 42.59 .. ### [2.42.63](https://indike.org/pramana/in.purana.vayu.2.42.63) paśyāmi na jagatyasminsarvajñaṃ sarvadarśanam. ajñātvā'nyatamaṃ loke sandehavinivarttakam .. 42.60 .. ### [2.42.64](https://indike.org/pramana/in.purana.vayu.2.42.64) meroḥ kuhariṇīṃ gatvā cacāra paramaṃ tapaḥ. yatra kārttasvarakphūrjajjyotsnājālairnirantaram .. 42.61 .. ### [2.42.65](https://indike.org/pramana/in.purana.vayu.2.42.65) sadā prabādhate viṣvaktamaḥstomaṃ dṛśantudam. cakāste yatra paramaṃ kāntāramatisundaram .. 42.62 .. ### [2.42.66](https://indike.org/pramana/in.purana.vayu.2.42.66) nānādrumalata ---tpakṣinināditam. kṣutpipāsābhayakrodhatāpaglānivivarjitam .. 42.63 .. ### [2.42.67](https://indike.org/pramana/in.purana.vayu.2.42.67) jalāśayairbahuvidhaiḥ padminīkhaṇḍamaṇḍitaiḥ . jātarūpaśilānaddhataṭasañcārapākṣa .. 42.64 .. ### [2.42.68](https://indike.org/pramana/in.purana.vayu.2.42.68) yuktamambhoja pavanaiḥ sevyamānaṃ samantataḥ. śivairadhyāsitambhāvairhiṃsraiḥ sattvaiḥ samujjhitam .. 42.65 .. ### [2.42.69](https://indike.org/pramana/in.purana.vayu.2.42.69) nirjanaṃ divyalatikāpriyakhaṇḍavarājitam. śūkaiḥ pārāvatai rhṛdyairunmadanmattakokilam .. 42.66 .. ### [2.42.70](https://indike.org/pramana/in.purana.vayu.2.42.70) utpatatpadmarajasāṃ paṭalāmodadiṅ‌mukham. tatrāpi kāñcinī divyā guhā paramaśobhanā .. 42.67 .. ### [2.42.71](https://indike.org/pramana/in.purana.vayu.2.42.71) tāṃ praviśya jitā hāro jitacitto jitāsanaḥ. sasmāra vedāṃścaturastadekāgramanā muniḥ .. 42.68 .. ### [2.42.72](https://indike.org/pramana/in.purana.vayu.2.42.72) trayī jagāma śaradāṃ śatasya smarato'sya hi . prādurāsaṃstato vedāścatvāraścārudarśanāḥ .. 42.69 .. ### [2.42.73](https://indike.org/pramana/in.purana.vayu.2.42.73) sphuratpadmapalāśākṣā jaṭāmukuṭadhāriṇaḥ. kuśamuṣṭikarāmbhojā mṛgatvaṅmaṇḍitāṃsakāḥ .. 42.70 .. ### [2.42.74](https://indike.org/pramana/in.purana.vayu.2.42.74) svaraiḥ ṣoḍaśabhiḥ klṛpta vadanāḥ praṇavāntarāḥ. kacavargodbhavairvarṇaiḥ pañcāvayavapāṇayaḥ .. 42.71 .. ### [2.42.75](https://indike.org/pramana/in.purana.vayu.2.42.75) pavargadakṣacaraṇā vāmapādāstavargataḥ. ātarantyantavarṇāśca yeṣāṃ kukṣidvayātmakau .. 42.72 .. ### [2.42.76](https://indike.org/pramana/in.purana.vayu.2.42.76) nābhinidrāḥ kāntapṛṣṭhā modarā yaralavotkacāḥ. agnidakṣāṃśarucirā dharāgrīvā bhṛtāsakāḥ .. 42.73 .. ### [2.42.77](https://indike.org/pramana/in.purana.vayu.2.42.77) antasthasandhisaṃsthānā vaikharīvāgvijṛmbhitāḥ. apaśyanmathurāmeṣāṃ hṛdayāmbhojakalpitām .. 42.74 .. ### [2.42.78](https://indike.org/pramana/in.purana.vayu.2.42.78) harerbhagavataḥ sākṣādāvirbhāvasthalī hi sā. kāśīmapaśyadbhrūmadhye māyāmādhārasaṃsthitām .. 42.75 .. ### [2.42.79](https://indike.org/pramana/in.purana.vayu.2.42.79) liṅgadeśe tataḥ kāñcīmavantīṃ nābhimaṇḍale . kaṇṭhasthāṃ dvārakāmeṣāṃ prayāgaṃ prāṇagaṃ tathā .. 42.76 .. ### [2.42.80](https://indike.org/pramana/in.purana.vayu.2.42.80) savyāpasavyayosteṣāṃ gaḍgā'pi yamunā nadī . madhye sarasvatī sākṣādgayākṣetraṃ tathānane .. 42.77 .. ### [2.42.81](https://indike.org/pramana/in.purana.vayu.2.42.81) hanugrīvāmadhyagataṃ prabhāsakṣetramuttamam. badaryyāśramameteṣāṃ brahmarandhre dadarśa ha .. 42.78 .. ### [2.42.82](https://indike.org/pramana/in.purana.vayu.2.42.82) pauṇḍravardhananepālapīṭhaṃ nayanayoryuge. pīṭhaṃ pūrṇagiriṃnāma lalāṭe samadṛśyata .. 42.79 .. ### [2.42.83](https://indike.org/pramana/in.purana.vayu.2.42.83) kaṇṭhe ca mathurāpīṭhaṃ kāñcīpīṭhaṃ kaṭisthitam. jālandharaṃ tathā pīṭhaṃ stanadeśeṣvadṛśyata .. 42.80 .. ### [2.42.84](https://indike.org/pramana/in.purana.vayu.2.42.84) bhṛgupīṭhaṃ karṇadeśe hyayodhyāṃ nāsikāpuṭe. brahmarandhre sthitaṃ brāhyaṃ śaivaṃ sīmantasīmani .. 42.81 .. ### [2.42.85](https://indike.org/pramana/in.purana.vayu.2.42.85) śāktaṃ jihvāgra dhiṣaṇaṃ vaiṣṇavaṃ hṛdayāmbuje. sauraṃ cakṣuḥpradeśasthaṃ bauddhañchāyāsu saṅgatam .. 42.82 .. ### [2.42.86](https://indike.org/pramana/in.purana.vayu.2.42.86) sautrāmaṇiṃ kaṇṭhadeśe paśubandhamathorasi. vājapeyaṃ kaṭitaṭe hyagnihotraṃ tathānane .. 42.83 .. ### [2.42.87](https://indike.org/pramana/in.purana.vayu.2.42.87) aśvamedhaṃ kaṭitaṭe naramedhamathodare. rājasūyaṃ śirodeśe āvasathyaṃ tathā'dhare .. 42.84 .. ### [2.42.88](https://indike.org/pramana/in.purana.vayu.2.42.88) ūrddhvoṣṭhe dakṣiṇāgniñca gārhapatyaṃ mukhāntare. havyaṃ śrutau mantrabhedāṃstathā romasvavasthitān. bhṛtyairiva mahārājaṃ purāṇairnyāyamiśritaiḥ .. 42.85 .. ### [2.42.89](https://indike.org/pramana/in.purana.vayu.2.42.89) saṃhitābhiśca tantraiśca pṛthakpṛthagupāsitān. karma jñānopāsanābhirjanānugrahakārakān .. 42.86 .. ### [2.42.90](https://indike.org/pramana/in.purana.vayu.2.42.90) dṛṣṭvā suvismitamanā muniḥ kṛṣṇo babhūva tān . brahmatejomayāndivyāṃstapato'rkānivacyutān. jlato'gnī nivodarkānkoṭīndusamadarśanān .. 42.87 .. ### [2.42.91](https://indike.org/pramana/in.purana.vayu.2.42.91) vavande sahasotthāya daṇḍavatpatito muniḥ. kṛtārtho'haṃ kṛtārtho'haṃ kṛtārtho'hamitīrayan .. 42.88 .. ### [2.42.92](https://indike.org/pramana/in.purana.vayu.2.42.92) adya me saphalaṃ janma adya me saphalaṃ manaḥ. adya me saphalañcāyuryadbhavanto'kṣigocarāḥ .. 42.89 .. ### [2.42.93](https://indike.org/pramana/in.purana.vayu.2.42.93) alaukikaṃlaukikañca yat kiñcidapi vidyate. na tadvo'viditaṃ vedyaṃ bhūta bhavyaṃ bhavacca yat .. 42.90 .. ### [2.42.94](https://indike.org/pramana/in.purana.vayu.2.42.94) na pravṛttiphalā yūyaṃ darśayanto'pi tānsadā. yadṛcchākarasaṅkocavidhānāyeha rāgiṇām .. 42.91 .. ### [2.42.95](https://indike.org/pramana/in.purana.vayu.2.42.95) prapañcasyāpi mithyātve brahmatve vā nidhītarau. na mṛṣārāgaviṣayau tatsaṅkocavidhikṣayau .. 42.92 .. ### [2.42.96](https://indike.org/pramana/in.purana.vayu.2.42.96) ato lokahitairnūnaṃ paramārthanirūpaṇe. svoktāḥ svargādiviṣayāḥ naśvarā iti ninditāḥ .. 42.93 .. ### [2.42.97](https://indike.org/pramana/in.purana.vayu.2.42.97) adhikārivibhedena karmajñānopadeśataḥ. trātaṃ sarvaṃ jagannūnaṃ śabdabrahmātmamūrttibhiḥ .. 42.94 .. ### [2.42.98](https://indike.org/pramana/in.purana.vayu.2.42.98) ato'haṃ praṣṭumicchami bhavantaścetkṛpālavaḥ . karmaṇāṃ phalamādiṣṭaṃ sargaḥ kāmaikacetasām .. 42.95 .. ### [2.42.99](https://indike.org/pramana/in.purana.vayu.2.42.99) īśārpitadhiyāṃ puṃsāṃ kṛtasyāpi ca karmaṇaḥ. cittaśuddhistato jñānaṃ mokṣaśca tadanantaram .. 42.96 .. ### [2.42.100](https://indike.org/pramana/in.purana.vayu.2.42.100) mokṣo brahmaikyamityevaṃ saccidānandameva yat. sarvaṃ samāpyate tasmiñjñāte yaddhi kṛtākṛtam .. 42.97 .. ### [2.42.101](https://indike.org/pramana/in.purana.vayu.2.42.101) yanniḥsaṅgaṃ cidākāśaṃ jñānarūpamasaṃvṛtam. nirīhamacalaṃ śuddhamaguṇaṃ vyāpakaṃ smṛtam .. 42.98 .. ### [2.42.102](https://indike.org/pramana/in.purana.vayu.2.42.102) vikāreṣu vinaśyatsu nirvikāraṃ na naśyati. yathāndhatamasā vyāptalokasya ravirojasā .. 42.99 .. ### [2.42.103](https://indike.org/pramana/in.purana.vayu.2.42.103) lohasyeva maṇistadvadaraṇiścānale yathā. yadābhāsena sā sattāṃ pratipadya vijṛmbhate .. 42.100 .. ### [2.42.104](https://indike.org/pramana/in.purana.vayu.2.42.104) jīveśvarādirūpeṇa viśvākāreṇa cāpyaho. tasyāmapi pralīnāyāṃ kūṭasthañca yadekalam .. 42.101 .. ### [2.42.105](https://indike.org/pramana/in.purana.vayu.2.42.105) bhavadbhirevaṃ nirṇītaṃ tattathaiva na saṃśayaḥ. tathāpi mama jijñāsā varttate kevalaṃ hṛdi .. 42.102 .. ### [2.42.106](https://indike.org/pramana/in.purana.vayu.2.42.106) ato'pi paramaṃ kiñcidvarttate kila vā na vā. tadvadantu mahābhāgā bhavantastattvadarśanāḥ .. 42.103 .. ### [2.42.107](https://indike.org/pramana/in.purana.vayu.2.42.107) yacchravaḥ phalameveha januṣo me kṛtārthatā. evaṃ bruvantamanaghaṃ vyāsaṃ satyavatīsutam. sādhu sādhviti saṅkīrtya pratyūcu rnigamā vacaḥ .. 42.104 .. ### [2.42.108](https://indike.org/pramana/in.purana.vayu.2.42.108) vedā ūcuḥ .. ### [2.42.109](https://indike.org/pramana/in.purana.vayu.2.42.109) sādhu sādhu mahāprājñā viṣṇurātmā śarīriṇām. ajo'pi janma sampadya lokānugrahamīhase .. 42.105 .. ### [2.42.110](https://indike.org/pramana/in.purana.vayu.2.42.110) anyathā te na ghaṭate saṃsārakarmmabandanam. aspṛṣṭo māyayā devyā kadācijjñānagūhayā .. 42.106 .. ### [2.42.111](https://indike.org/pramana/in.purana.vayu.2.42.111) bibharṣi svecchayā rūpaṃ svecchayaiva nigūhase. asmatsammata evārtho bhavatā sampradarśitaḥ .. 42.107 .. ### [2.42.112](https://indike.org/pramana/in.purana.vayu.2.42.112) purāṇeṣvitihāseṣu sūtreṣvapi ca naikadhā. akṣaraṃ brahma paramaṃ sarvakāraṇakāraṇam .. 42.108 .. ### [2.42.113](https://indike.org/pramana/in.purana.vayu.2.42.113) tasyātmano'pyātma bhāvatayā puṣpasya gandhavat. rasavadvā sthitaṃ rūpamavehi paramaṃ hi tat .. 42.109 .. ### [2.42.114](https://indike.org/pramana/in.purana.vayu.2.42.114) anubhūtaṃ tadasmābhirjāte prākṛtike laye. akṣarātparatastasmādyatparaṃ kevalo rasaḥ . na ca tatra vayaṃ śaktāḥ śabdātīte tadātmakāḥ .. 42.110 .. ### [2.42.115](https://indike.org/pramana/in.purana.vayu.2.42.115) iti śrīmahāpurāṇe vāyuprokte vyāsasaṃśayāpanodanaṃ nāma dvicatvāriṃśo'dhyāyaḥ .. 42 .. ## Linked texts (1) - [Purāṇasaṃhitā](https://indike.org/pramana/in.purana.puranasamhita.2.2) — Vyāsa, Sanskrit --- Source: [https://indike.org/pramana/in.purana.vayu.2.42](https://indike.org/pramana/in.purana.vayu.2.42) · Pramāṇa