<!-- Pramāṇa, a library of Indian primary sources · https://indike.org/pramana/in.purana.vayu.2.44 -->

[Pramāṇa](https://indike.org/pramana/) › [Indian literature](https://indike.org/pramana/in) › [Purāṇas](https://indike.org/pramana/in.purana) › [Vayupurana](https://indike.org/pramana/in.purana.vayu) › 2.44

# Vayupurana 2.44: adhyāyaḥ 44

Vāyupurāṇa 2.44

- **Language:** Sanskrit

### adhyāyaḥ 44

### [2.44.1](https://indike.org/pramana/in.purana.vayu.2.44.1)

nārada uvāca..

### [2.44.2](https://indike.org/pramana/in.purana.vayu.2.44.2)

gayāsuraḥ kathaṃ jātaḥ kiṃprabhāvaḥ kimātmakaḥ .  
tapastaptaṃ kathaṃ tena kathaṃ dehapavitratā .. 44.1 ..

### [2.44.3](https://indike.org/pramana/in.purana.vayu.2.44.3)

sanatkumāra uvāca..

### [2.44.4](https://indike.org/pramana/in.purana.vayu.2.44.4)

viṣṇornābhyambujājjāto brahmā lokapitāmahaḥ.  
prajāḥ sasarja saṃproktaḥ pūrvvaṃ devena viṣṇunā .. 44.2 ..

### [2.44.5](https://indike.org/pramana/in.purana.vayu.2.44.5)

āsureṇaiva bhāvena hyasurānasṛjatpurā.  
saumanasyena bhāvena devānsumanaso'sṛjat .. 44.3 ..

### [2.44.6](https://indike.org/pramana/in.purana.vayu.2.44.6)

gayāsuro'surāṇāñca mahābalaparākramaḥ.  
yojanānāṃ sapādañca śataṃ tasyocchrayaḥ smṛtaḥ .. 44.4 ..

### [2.44.7](https://indike.org/pramana/in.purana.vayu.2.44.7)

sthūlaḥ ṣaṣṭiryojanānāṃ śreṣṭho'sau vaiṣṇavaḥ smṛtaḥ.  
kolāhalagirivare tapastepe sudāruṇam .. 44.5 ..

### [2.44.8](https://indike.org/pramana/in.purana.vayu.2.44.8)

bahuvarṣasahasrāṇi nirucchvāsaṃ sthiro'bhavat.  
tattapastāpitā devāḥ saṃkṣobhaṃ paramaṃ gatāḥ .. 44.6 ..

### [2.44.9](https://indike.org/pramana/in.purana.vayu.2.44.9)

brahmalokaṃ gatā devāḥ procuste'tha pitāmaham.  
gayāsurādrakṣa deva brahmā devāṃstato'bravīt .. 44.7 ..

### [2.44.10](https://indike.org/pramana/in.purana.vayu.2.44.10)

vrajāmaḥ śaṅkaraṃ devā brahmādyāśca gatāḥ śivam.  
kailāse cābruvannatvā rakṣa deva mahāsurāt .. 44.8 ..

### [2.44.11](https://indike.org/pramana/in.purana.vayu.2.44.11)

brahmādyānabravīcchambhurvrajāmaḥ śaraṇaṃ harim.  
kṣīrābdhau devadeveśaḥ sa naḥ śreyo vidhāsyati.  
brahmā maheśvaro devā viṣṇuṃ natvā pratuṣṭuvuḥ .. 44.9 ..

### [2.44.12](https://indike.org/pramana/in.purana.vayu.2.44.12)

devā ūcuḥ ..

### [2.44.13](https://indike.org/pramana/in.purana.vayu.2.44.13)

oṃ namo viṣṇavo bhartre sarvveṣāṃ prabhaviṣṇave.  
rociṣṇave jiṣṇave ca rākṣasādigrasiṣṇave .. 44.10 ..

### [2.44.14](https://indike.org/pramana/in.purana.vayu.2.44.14)

dhariṣṇave'khilasyāsya yogināṃ pārayiṣṇave .  
varddhiṣṇave hyanantāya namo bhrājṣṇive namaḥ .. 44.11 ..

### [2.44.15](https://indike.org/pramana/in.purana.vayu.2.44.15)

sanatkumāra uvāca..

### [2.44.16](https://indike.org/pramana/in.purana.vayu.2.44.16)

evaṃ stuto vāsudevaḥ surāṇāṃ darśanaṃ dadau.  
kimarthamāgatā devā viṣṇunoktāstamabruvan .. 44.12 ..

### [2.44.17](https://indike.org/pramana/in.purana.vayu.2.44.17)

gayāsurabhayāddeva rakṣāsmānabravīddharim.  
brahmādyā yāntu taṃ daityamāgamiṣyāmyahaṃ tataḥ .. 44.13 ..

### [2.44.18](https://indike.org/pramana/in.purana.vayu.2.44.18)

keśave garuḍārūḍho varaṃ dātuṃ gayāsure.  
sarvve svaṃ svaṃ samāsthāya yayurvāhanamuttamam .. 44.14 ..

### [2.44.19](https://indike.org/pramana/in.purana.vayu.2.44.19)

ūcustaṃ vāsudevādyāḥ kimarthaṃ tapyate tvayā.  
santuṣṭāḥ svāgatāḥ sarve varaṃ brūhi gayāsura .. 44.15 ..

### [2.44.20](https://indike.org/pramana/in.purana.vayu.2.44.20)

gayāsura uvāca..

### [2.44.21](https://indike.org/pramana/in.purana.vayu.2.44.21)

yadituṣṭāḥ stha me devā brahmaviṣṇumaheśvarāḥ.  
sarvvadevadvijātibhyo yajñatīrthaśiloccayāt .. 44.16 ..

### [2.44.22](https://indike.org/pramana/in.purana.vayu.2.44.22)

devebhyo'tipavitro'hamṛṣibhyo'pi śivāvyayāt.  
mantrebhyo devadevebhyo yogibhyaścāpi sarvvaśaḥ .. 44.17 ..

### [2.44.23](https://indike.org/pramana/in.purana.vayu.2.44.23)

nyāsibhyaścāpi karmmibhyo dharmmibhyaśca tathā punaḥ.  
jñātibhyo'tipavitrebhyaḥ pavitraḥ syāṃ sadā surāḥ .. 44.18 ..

### [2.44.24](https://indike.org/pramana/in.purana.vayu.2.44.24)

pavitramastu taṃ devā daityamuktvā yayurdivam.  
daityaṃ dṛṣṭvā ca spṛṣṭvā ca sarvve haripuraṃ yayuḥ .. 44.19 ..

### [2.44.25](https://indike.org/pramana/in.purana.vayu.2.44.25)

śūnyaṃ lokatrayaṃ jātaṃ śūnyā yamapurī hyabhūt.  
yama indrādibhiḥ sārddhaṃ brahmalokaṃ tato'gamat .. 44.20 ..

### [2.44.26](https://indike.org/pramana/in.purana.vayu.2.44.26)

brahmāṇamūcire devā gayāsuravilopitāḥ.  
tvayā datto'dhikāro vai gṛhāṇa tvaṃ pitāmaha .. 44.21 ..

### [2.44.27](https://indike.org/pramana/in.purana.vayu.2.44.27)

brahmābravīttato devānvrajāmo viṣṇumavyayam.  
brahmādayo'bruvanviṣṇuṃ tvayā dattavare'sure .. 44.22 ..

### [2.44.28](https://indike.org/pramana/in.purana.vayu.2.44.28)

taddarśanādyayuḥ svargaṃ śūnyaṃ loka trayaṃ hyabhūt.  
devairukto vāsudevo brahmāṇaṃ sa vaco'bravīt .. 44.23 ..

### [2.44.29](https://indike.org/pramana/in.purana.vayu.2.44.29)

gatvāsuraṃ prārthayasva yajñārthaṃ dehi dehakam.  
viṣṇūktaḥ sasuro brahmā gatvā'paśyanmahāsuram .. 44.24 ..

### [2.44.30](https://indike.org/pramana/in.purana.vayu.2.44.30)

gayāsuro'bravīddṛṣṭvā brahmāṇaṃ tridaśaiḥ sahaḥ.  
saṃpūjyotthāya vidhivatpraṇtaḥ śraddhayānvitaḥ .. 44.25 ..

### [2.44.31](https://indike.org/pramana/in.purana.vayu.2.44.31)

..gayāsura uvāca..

### [2.44.32](https://indike.org/pramana/in.purana.vayu.2.44.32)

adya me saphalaṃ janma adya me saphalaṃ tapaḥ.  
yadāgato'tithirbrahmā sarvvaṃ prāptaṃ mayādya vai .. 44.26 ..

### [2.44.33](https://indike.org/pramana/in.purana.vayu.2.44.33)

yoginyogāṅgavitsarvvalokasvāminpitarguro.  
yadarthamā gato brahmanstatkāryyaṃ karavāṇyaham .. 44.27 ..

### [2.44.34](https://indike.org/pramana/in.purana.vayu.2.44.34)

..brahmovāca..

### [2.44.35](https://indike.org/pramana/in.purana.vayu.2.44.35)

pṛthivyāṃ yāni tīrthāni dṛṣṭāni bhramatā mayā.  
yajñārthaṃ na tu te tāni pavitrāṇi śarīrataḥ .. 44.28 ..

### [2.44.36](https://indike.org/pramana/in.purana.vayu.2.44.36)

tvayā dehe pavitratvaṃ prāptaṃ viṣṇuprasādataḥ.  
ataḥ pavitraṃ dehaṃ tvaṃ yajñārthaṃ dehime'sura .. 44.29 ..

### [2.44.37](https://indike.org/pramana/in.purana.vayu.2.44.37)

..gayāsura uvāca..

### [2.44.38](https://indike.org/pramana/in.purana.vayu.2.44.38)

dhanyo'haṃ deva deveśa yaddehaṃ prārthyate tvayā.  
pitṛvaṃśaḥ kṛtārtho me dehe yāgaṃ karoṣi cet .. 44.30 ..

### [2.44.39](https://indike.org/pramana/in.purana.vayu.2.44.39)

tvayaivotpādito dehaḥ pavitrastu tvayā kṛtaḥ.  
sarvveṣāmupakārāya yāgo'vaśyaṃ bhavatviti .. 44.31 ..

### [2.44.40](https://indike.org/pramana/in.purana.vayu.2.44.40)

ityuktvā so'patadbhūmau śvetakalpe gayāsuraḥ.  
naiṛtīṃ diśamāśritya tadā kolāhale girau .. 44.32 ..

### [2.44.41](https://indike.org/pramana/in.purana.vayu.2.44.41)

śiraḥ kṛtvottare daityaḥ pādau kṛtvā tu dakṣiṇe.  
brahmā sambhṛtasambhāro mānasānṛtvijo'sṛjat .. 44.33 ..

### [2.44.42](https://indike.org/pramana/in.purana.vayu.2.44.42)

agniśarmāṇammṛtaṃ śaunakaṃ yāñjaliṃ mṛdum.  
kumuthiṃ veda kauṇḍilyaṃ hārītaṃ kāśyapaṃ kṛpam .. 44.34 ..

### [2.44.43](https://indike.org/pramana/in.purana.vayu.2.44.43)

gargaṃ kauśikavāsiṣṭhau muniṃ bhārgavamavyayam.  
vṛddhaṃ pārāśaraṃ kaṇvaṃ māṇḍavyaṃ śrutikevalam .. 44.35 ..

### [2.44.44](https://indike.org/pramana/in.purana.vayu.2.44.44)

śvetaṃ sutālaṃ damanaṃ suhotraṃ kaṅkameva ca.  
laukākṣiñca mahābāhuṃ jaigīṣavyaṃ tathaiva ca .. 44.36 ..

### [2.44.45](https://indike.org/pramana/in.purana.vayu.2.44.45)

dadhipañcamukhaṃ vipramṛṣabhaṃ karkameva ca.  
kātyāyanaṃ gobhilañca munimugramagāvratam .. 44.37 ..

### [2.44.46](https://indike.org/pramana/in.purana.vayu.2.44.46)

supālakaṃ gautamañca tathā vedaśirovratam.  
jaṭāmālinamavyagraṃ cāṭuhāsañca dāruṇam .. 44.38 ..

### [2.44.47](https://indike.org/pramana/in.purana.vayu.2.44.47)

ātreyaṃ cāpyaṅgirasamaupamanyuṃ mahā vratam.  
gokarṇañca guhāvāsaṃ śikhaṇḍinamumāvratam .. 44.39 ..

### [2.44.48](https://indike.org/pramana/in.purana.vayu.2.44.48)

etānanyāṃśca viprendrānvedhā lokapitāmahaḥ .  
parikalpyākarodyāgaṃ gayāsuraśarīrake .. 44.40 ..

### [2.44.49](https://indike.org/pramana/in.purana.vayu.2.44.49)

agniśarmāpi pañcāgnīnmukhādetānathāsṛjat.  
dakṣiṇāgniṃ gārhapatyāhavanīyau tapo'vyayaḥ .. 44.41 ..

### [2.44.50](https://indike.org/pramana/in.purana.vayu.2.44.50)

satyāvasathyau devarṣe yeṣu yajñāḥ pratiṣṭhitāḥ.  
yajñasya ca pratiṣṭhārthaṃ viprebhyo dakṣiṇāṃ dadau .. 44.42 ..

### [2.44.51](https://indike.org/pramana/in.purana.vayu.2.44.51)

hutvā pūrṇāhutiṃ brahnā snātvā cāvabhṛthena tu.  
yajñayūpaṃ suraiḥ sārddhaṃ samānīya vyaropayat .. 44.43 ..

### [2.44.52](https://indike.org/pramana/in.purana.vayu.2.44.52)

brahmaṇaḥ sahasā śreṣṭhe sarasyevāśritaṃ śubham.  
calitaścakito brahmā dharmmarājamabhāṣata .. 44.44 ..

### [2.44.53](https://indike.org/pramana/in.purana.vayu.2.44.53)

jātā gṛhe tava śilā samānīyāvicārayan.  
daityasya śīghraṃ śirasi tāṃ dhāraya mamājñayā .. 44.45 ..

### [2.44.54](https://indike.org/pramana/in.purana.vayu.2.44.54)

niścalārthaṃ yamaḥ śrutvā dhārayanmastake śilām.  
śilāyāṃ dhāritāyāntu saśilaścāsuro'calat .. 44.46 ..

### [2.44.55](https://indike.org/pramana/in.purana.vayu.2.44.55)

devānūce'tha rudrādīñchilāyāṃ niścalāḥ kila.  
tiṣṭhantu devāḥ sakalāstathetyuktvā ca te sthitāḥ .. 44.47 ..

### [2.44.56](https://indike.org/pramana/in.purana.vayu.2.44.56)

devāḥ pādairlakṣayitvā tathāpi calito'suraḥ.  
brahmātha vyākulo viṣṇuṃ gataḥ kṣīrābdhiśāyinam.  
tuṣṭāva praṇato bhūtvā natvā cādṛtya taṃ prabhum .. 44.48 ..

### [2.44.57](https://indike.org/pramana/in.purana.vayu.2.44.57)

..brahmovāca..

### [2.44.58](https://indike.org/pramana/in.purana.vayu.2.44.58)

brahmāṇḍasya pate nātha namāmi jagatāṃ patim.  
katiṃ kīrttimatāṃ nṝṇāṃ buktimuktipradāyakam .. 44.49 ..

### [2.44.59](https://indike.org/pramana/in.purana.vayu.2.44.59)

viṣvakseno'bravīdviṣṇuṃ deva tvāṃ stauti padmajaḥ.  
harirāhānaya tvaṃ taṃ viṣṇūktaḥ sa tamānayat.  
ajamūce hariḥ kasmādāgato'si vadasva tat .. 44.50 ..

### [2.44.60](https://indike.org/pramana/in.purana.vayu.2.44.60)

..brahmovāca..

### [2.44.61](https://indike.org/pramana/in.purana.vayu.2.44.61)

devadeva kṛte yoge pracacāla gayāsuraḥ.  
śilāyāṃ devarūpiṇyāṃ nyastāyāṃ tasya mastake .. 44.51 ..

### [2.44.62](https://indike.org/pramana/in.purana.vayu.2.44.62)

rudrādiṣu ca deveṣu saṃsthiteṣvasuro'calat.  
idānīṃ niścalārthaṃ hi prasādaṃ kuru mādhava .. 44.52 ..

### [2.44.63](https://indike.org/pramana/in.purana.vayu.2.44.63)

brahmaṇo vacanaṃ śrutvā hyākṛṣya svaśarīrataḥ .  
mūrttiṃ dadau niścalārthaṃ brahmaṇe bhagavānhariḥ .. 44.53 ..

### [2.44.64](https://indike.org/pramana/in.purana.vayu.2.44.64)

ānīya mūrttiṃ brahmāpi śilāyāṃ samadhārayat.  
tathāpi calitaṃ vīkṣya punardevamathāhvayat .. 44.54 ..

### [2.44.65](https://indike.org/pramana/in.purana.vayu.2.44.65)

āgatya viṣṇuḥ kṣīrābdheḥ śilāyāṃ saṃsthito'bhavat.  
janārddanābhidhānena puṇḍarīketi nāmataḥ.  
śilāyāṃniścalārthaṃ hi svayamādigadādharaḥ .. 44.55 ..

### [2.44.66](https://indike.org/pramana/in.purana.vayu.2.44.66)

niścalārthaṃ pañcadhāsīcchilāyāṃ prapitāpahaḥ.  
pitāmaho'tha phalgvīśaḥ kedāraḥ kanakeśvaraḥ .. 44.56 ..

### [2.44.67](https://indike.org/pramana/in.purana.vayu.2.44.67)

brahmā sthitaḥ svayaṃ tatra gajarūpī vināyakaḥ.  
gayādityaścottarārko dakṣiṇārkastridhā raviḥ .. 44.57 ..

### [2.44.68](https://indike.org/pramana/in.purana.vayu.2.44.68)

lakṣmīḥ sītābhidhānena gaurī ca maṅgalāhvayā.  
gāyatrī caiva sāvitrī trisandhyā ca sarasvatī .. 44.58 ..

### [2.44.69](https://indike.org/pramana/in.purana.vayu.2.44.69)

indro bṛhaspatiḥ pūṣā vasavo'ṣṭau mahābalāḥ.  
viśvedevāścāśvineyau māruto viśvanāyakaḥ.  
sayakṣoragagandharvvāstasthurdevāḥ svaśāktibhiḥ .. 44.59 ..

### [2.44.70](https://indike.org/pramana/in.purana.vayu.2.44.70)

ādyayā gadayā cāsau yasmāddaityaḥ sthirīkṛtaḥ.  
sthita ityeva hariṇā tasmādādigadādharaḥ .. 44.60 ..

### [2.44.71](https://indike.org/pramana/in.purana.vayu.2.44.71)

ūce gayāsuro devānkimarthaṃ vañcito hyaham.  
yajñārthaṃ brahmaṇe dattaṃ śarīramamalaṃ mayā.  
viṣṇorvacanamātreṇa kiṃ na syāṃ niścalo hyaham .. 44.61 ..

### [2.44.72](https://indike.org/pramana/in.purana.vayu.2.44.72)

yatsuraiḥ pīḍito'tyarthaṃ gadayā hariṇā tathā.  
pīḍito yadyahaṃ devāḥ prasannāḥ santu sarvadā .. 44.62 ..

### [2.44.73](https://indike.org/pramana/in.purana.vayu.2.44.73)

gadādharādayastuṣṭāḥ procuḥ sārddhaṃ gayāsuram.  
varaṃ brūhi prasannāḥ smo devānūce gayāsuraḥ .. 44.63 ..

### [2.44.74](https://indike.org/pramana/in.purana.vayu.2.44.74)

yāvatpṛthvī parvatāśca yāvaccandrārkatārakāḥ.  
tāvacchilāyāṃ tiṣṭhantu brahmaviṣṇumaheśvarāḥ.  
anye ca sakalā devā mannāmnā kṣetramastu vai .. 44.64 ..

### [2.44.75](https://indike.org/pramana/in.purana.vayu.2.44.75)

pañcakrośaṃ gayākṣetraṃ krośamekaṃ gayāśiraḥ .  
tanmadhye sarvatīrthāni prayacchantu hitaṃ nṛṇām .. 44.65 ..

### [2.44.76](https://indike.org/pramana/in.purana.vayu.2.44.76)

snānāditarpaṇaṃ kṛtvā piṇḍadānātphalādhikam.  
mahātmā vai sahasrañca kulānāṃ coddharennaraḥ .. 44.66 ..

### [2.44.77](https://indike.org/pramana/in.purana.vayu.2.44.77)

vyaktāvyaktasvarūpeṇa yūyaṃ tiṣṭhata sarvadā.  
gadādharaḥ svayaṃ lokādbhūyātsarvāghanāśanāt .. 44.67 ..

### [2.44.78](https://indike.org/pramana/in.purana.vayu.2.44.78)

śrāddhaṃ sapiṇḍakaṃ yeṣāṃ brahmalokaṃ prayāntu te.  
brahmahatyādikaṃ pāpaṃ vinaśyatu ca sevinām .. 44.68 ..

### [2.44.79](https://indike.org/pramana/in.purana.vayu.2.44.79)

naimiṣaṃ puṣkaraṃ gaṅgā prayāgaścāvimuktikam.  
etānyanyāni tīrthāni divi bhuvyantarikṣataḥ.  
samāyāntu sadā nṝṇāṃ prayacchantu hitaṃ surāḥ .. 44.69 ..

### [2.44.80](https://indike.org/pramana/in.purana.vayu.2.44.80)

kiṃ bahūktyā suragaṇā yuṣmāsvekāpi devatā.  
cenna tiṣṭhedahaṃ cāpi samayaḥ pratipālyatām .. 44.70 ..

### [2.44.81](https://indike.org/pramana/in.purana.vayu.2.44.81)

gayāsuravacaḥ śrutvā procurviṣṇvādayaḥsurāḥ.  
tvayā yatprārthitaṃ sarvvaṃ tadbhaviṣyatyasaṃśayam .. 44.71 ..

### [2.44.82](https://indike.org/pramana/in.purana.vayu.2.44.82)

asmatpādānarccayitvā yāsyanti paramāṃ gatim.  
devairdattavaro daityo harṣito niścalo'bhavat .. 44.72 ..

### [2.44.83](https://indike.org/pramana/in.purana.vayu.2.44.83)

sthiteṣu caiva deveṣu brāhmaṇebhyo dadāvajaḥ.  
grāmāṃśca pañcapañcāśatpañcakrośīṃ gayāṃ tathā.  
gṛhānkṛtvā dadau divyānsarvvopaskarasaṃyutān .. 44.73 ..

### [2.44.84](https://indike.org/pramana/in.purana.vayu.2.44.84)

kāmadhenuṃ kalpavṛkṣaṃ pārijātādikāṃstarūn.  
mahānadīṃ kṣīravahāṃ ghṛtakulyāstathaiva ca .. 44.74 ..

### [2.44.85](https://indike.org/pramana/in.purana.vayu.2.44.85)

madhuśravāṃ madhukulyāṃ dadhyādyāḍhyasarāṃsi ca.  
suvarṇadīrghikāṃ caiva bahūnannādiparvvatān .. 44.75 ..

### [2.44.86](https://indike.org/pramana/in.purana.vayu.2.44.86)

bhakṣyabhojyaphalādīṃśca sarvvaṃ brahmā sṛjandadau.  
na yācayadhvaṃ viprendrā anyānuktvā dadāvajaḥ .. 44.76 ..

### [2.44.87](https://indike.org/pramana/in.purana.vayu.2.44.87)

dattvā yayau brahmalokaṃ natvā hyādigadādharam .  
dharmmāraṇye tatra dharmmaṃ yājayitvā yayācire .. 44.77 ..

### [2.44.88](https://indike.org/pramana/in.purana.vayu.2.44.88)

dharmmayāge ca lobhādvai pratigṛhya dhanādikam.  
tato brahmā samāgatya brāhmaṇāṃstāñchaśāpa ha .. 44.78 ..

### [2.44.89](https://indike.org/pramana/in.purana.vayu.2.44.89)

kṛtavanto yato lobhaṃ maddatteṣvakhileṣvapi.  
tasmādṛṇādhikā yūyaṃ bhaviṣyanti sadā dvijaḥ .. 44.79 ..

### [2.44.90](https://indike.org/pramana/in.purana.vayu.2.44.90)

yuṣmākaṃ syādvārivahā nadī pāṣāṇaparvvatāḥ.  
nadyādayo vārivahā mṛnmayāśca yathā gṛhāḥ .. 44.80 ..

### [2.44.91](https://indike.org/pramana/in.purana.vayu.2.44.91)

kāmadhenuḥ kalpavṛkṣo mallokamupatiṣṭhatām.  
evaṃ śaptā brahmaṇā te prārthayanto'bruvannajam .. 44.81 ..

### [2.44.92](https://indike.org/pramana/in.purana.vayu.2.44.92)

tvayā yaddattamakhilaṃ tatsarvaṃ śāpato gatam.  
jīvanārthaṃ prasādaṃ no bhagavānkarttumarhasi .. 44.82 ..

### [2.44.93](https://indike.org/pramana/in.purana.vayu.2.44.93)

tacchrutvā brāhmaṇānbrahmā provācedaṃ dayānvitaḥ.  
tīrthopajīvikā yūyamācandrārkaṃ bhaviṣyatha .. 44.83 ..

### [2.44.94](https://indike.org/pramana/in.purana.vayu.2.44.94)

lokāḥ puṇyā gayāyāṃ ye śrāddhino brahmalokagāḥ.  
yuṣmānye pūjayiṣyanti tairahaṃ pūjitaḥ sadā .. 44.84 ..

### [2.44.95](https://indike.org/pramana/in.purana.vayu.2.44.95)

ākrāntaṃ daityajaṭharaṃ dharmmeṇa virajādriṇā.  
nābhikūpasamīpe tu devī yā virajā sthitā.  
tatra piṇḍādikaṃ kṛtvā triḥsaptakulamuddharet .. 44.85 ..

### [2.44.96](https://indike.org/pramana/in.purana.vayu.2.44.96)

mahendragiriṇā tasya kṛtau pādau suniścalau.  
itatra piṇḍādikṛtsapta kulānyuddharate naraḥ .. 44.86 ..

### [2.44.97](https://indike.org/pramana/in.purana.vayu.2.44.97)

iti śrīmahāpurāṇe vāyuprokte gayāmāhātmyaṃ nāma catuścatvāriṃśo'dhyāyaḥ .. 44 .. \* .. \*

## Linked texts (1)

- [Tristhalīsetu (Nārāyaṇa)](https://indike.org/pramana/in.niti.dharma.tirtha.tristhali.tristhalisetu.14.p1.1) — Nārāyaṇa (Mahiṣamaṅgalam) 1513, Sanskrit

---
Source: [https://indike.org/pramana/in.purana.vayu.2.44](https://indike.org/pramana/in.purana.vayu.2.44) · Pramāṇa