[Pramāṇa](https://indike.org/pramana/) › [Indian literature](https://indike.org/pramana/in) › [Purāṇas](https://indike.org/pramana/in.purana) › [Vayupurana](https://indike.org/pramana/in.purana.vayu) › 2.46 # Vayupurana 2.46: adhyāyaḥ 46 Vāyupurāṇa 2.46 - **Language:** Sanskrit ### adhyāyaḥ 46 ### [2.46.1](https://indike.org/pramana/in.purana.vayu.2.46.1) ..sanatkumāra uvāca.. ### [2.46.2](https://indike.org/pramana/in.purana.vayu.2.46.2) vakṣye śilāyā māhātmyaṃ śrṛṇu nārada muktidam. yasyā gāyanti devāśca māhātmyaṃ munipuṅgavāḥ .. 46.1 .. ### [2.46.3](https://indike.org/pramana/in.purana.vayu.2.46.3) śilā sthitā pṛthivyāṃ sā devarūpātipāvanī. vicitrākhyaṃ śilātīrthaṃ triṣu lokeṣu viśrutam .. 46.2 .. ### [2.46.4](https://indike.org/pramana/in.purana.vayu.2.46.4) tasyāḥ saṃsparśanāllokāḥ sarve haripuraṃ yayuḥ. śūnye lokatraye jāte śūnyā yamapurī hyabhūt .. 46.3 .. ### [2.46.5](https://indike.org/pramana/in.purana.vayu.2.46.5) yama indrādibhirgatvā ūce brahmāṇamadbhutam. adhikāraṃ gṛhāṇātha yamadaṇḍaṃ pitāmaha .. 46.4 .. ### [2.46.6](https://indike.org/pramana/in.purana.vayu.2.46.6) yamamūce tato brahmā svagṛhe dhārayasva tām. brahmokto dharmarājastu gṛhe tāṃ samadhārayat .. 46.5 .. ### [2.46.7](https://indike.org/pramana/in.purana.vayu.2.46.7) yamo'dhikāraṃ svaṃ cakre pāpināṃ śāsanādikam. evaṃvidhā gurutarā śilā jagati viśrutā .. 46.6 .. ### [2.46.8](https://indike.org/pramana/in.purana.vayu.2.46.8) yathā brahnā yathā viṣṇuryathā devo maheśvaraḥ. brahmāṇḍe ca yathā meru statheyaṃ devarūpiṇī .. 46.7 .. ### [2.46.9](https://indike.org/pramana/in.purana.vayu.2.46.9) gayāsurasya śirasi gurutvāddhāritā yataḥ . ataḥ pavitrayoryogaḥ pitṝṇāṃ mokṣadāyakaḥ .. 46.8 .. ### [2.46.10](https://indike.org/pramana/in.purana.vayu.2.46.10) pavitrayordvayoryoge hayamedha majo'karot. bhāgārthamāgatāndṛṣṭvā viṣṇvādīnabravīcchilā .. 46.9 .. ### [2.46.11](https://indike.org/pramana/in.purana.vayu.2.46.11) śilāsthitipratijñāṃ tu kurvantu pitṛmuktaye. tathetyuktvā śilāyānte devā viṣṇvādayaḥ sthitāḥ .. 46.10 .. ### [2.46.12](https://indike.org/pramana/in.purana.vayu.2.46.12) śilārūpeṇa mūrttyā ca padarūpeṇa devatāḥ. mūrttāmūrtasvarūpeṇa sthitāḥ pūrvapratijñayā .. 46.11 .. ### [2.46.13](https://indike.org/pramana/in.purana.vayu.2.46.13) daityasya muṇḍa pṛṣṭhe tu yasmātsā saṃsthitā śilā. tasmātsa muṇḍapṛṣṭhādriḥ pitṝṇāṃ brahmalokadaḥ .. 46.12 .. ### [2.46.14](https://indike.org/pramana/in.purana.vayu.2.46.14) ācchāditaḥ śilāpādaḥ prabhāsenādriṇā yataḥ. bhāsito bhāskareṇeti prabhāsaḥ parikalpitaḥ .. 46.13 .. ### [2.46.15](https://indike.org/pramana/in.purana.vayu.2.46.15) prabhāsaṃ hi vinirbhidya śilāṅguṣṭho vinirgataḥ. aṅguṣṭhotthita īśo'pi prabhāseśaḥ prakīrttitaḥ .. 46.14 .. ### [2.46.16](https://indike.org/pramana/in.purana.vayu.2.46.16) śilāṅguṣṭhaikateśo yaḥ sā ca pretaśilā smṛtā. piṇḍadānādyatastasyāṃ pretatvānmucyate naraḥ .. 46.15 .. ### [2.46.17](https://indike.org/pramana/in.purana.vayu.2.46.17) mahānadīprabāsādyoḥ saṅgame snānakṛnnaraḥ. rāmo devyā saha snāto rāmatīrthaṃ tataḥ smṛtam .. 46.16 .. ### [2.46.18](https://indike.org/pramana/in.purana.vayu.2.46.18) prārthito'tra mahānadyā rāma snāto bhaveti ca. rāmatīrthaṃ tato bhūtvā triṣu lokeṣu viśrutam .. 46.17 .. ### [2.46.19](https://indike.org/pramana/in.purana.vayu.2.46.19) janmāntaraśataṃ sāgraṃ yatkṛtaṃ duṣkṛtaṃ mayā. tatsarvaṃ vilayaṃ yātu rāmatīrthābhiṣecanāt .. 46.18 .. ### [2.46.20](https://indike.org/pramana/in.purana.vayu.2.46.20) mantreṇānena yaḥ snātvā śrāddhaṃ kurvīta mānavaḥ. rāmatīrthe piṇḍadastu viṣṇulokaṃ prayātyasau. tathetyuktvā sthito rāmaḥ sītayā bharatāgrajaḥ .. 46.19 .. ### [2.46.21](https://indike.org/pramana/in.purana.vayu.2.46.21) rāma rāma mahābāho devānāmabhayaṅkara. tvāṃ namasye'tra deveśaṃ mama naśyatu pātakam .. 46.20 .. ### [2.46.22](https://indike.org/pramana/in.purana.vayu.2.46.22) mantreṇānena yaḥ snātvā śrāddhaṃ kuryātsapiṇḍakam . pretatvāttasya pitaro vimuktāḥ pitṛtāṃ yayuḥ .. 46.21 .. ### [2.46.23](https://indike.org/pramana/in.purana.vayu.2.46.23) āpastvamasi deveśa jyotiṣāṃ patireva ca. pāpa nāśaya me deva manovākkāyakarmajam .. 46.22 .. ### [2.46.24](https://indike.org/pramana/in.purana.vayu.2.46.24) namaskṛtya prabhāseśaṃ bhāsamānaṃ śivaṃ vrajet. tañca śambhuṃ namaskṛtya kuryādyamabaliṃ tataḥ .. 46.23 .. ### [2.46.25](https://indike.org/pramana/in.purana.vayu.2.46.25) rāme vanaṃ gate śailamāgatya bharataḥ sthitaḥ . pitṛpiṇḍādikaṃ kṛtvā rāmaṃ saṃsthāpya tatra ca .. 46.24 .. ### [2.46.26](https://indike.org/pramana/in.purana.vayu.2.46.26) rāmaṃ sītāṃ lakṣmaṇañca munīnsthāpitavānprabhuḥ. bharatasyāśrame puṇye nityaṃ puṇyatamairvṛtam. mataṅgasya padaṃ tatra dṛśyate sarvamānuṣaiḥ .. 46.25 .. ### [2.46.27](https://indike.org/pramana/in.purana.vayu.2.46.27) sthāpitaṃ dharmasarvasvaṃ lokasyāsya nidarśanāt. mataṅgasya pade śrāddhī sarvāṃstārayate pitṝn .. 46.26 .. ### [2.46.28](https://indike.org/pramana/in.purana.vayu.2.46.28) rāmatīrthe naraḥ snātvā rāmaṃ sītāṃ samarcya ca. rāmeśvaraṃ praṇamyātha na dehī jāyate punaḥ .. 46.27 .. ### [2.46.29](https://indike.org/pramana/in.purana.vayu.2.46.29) śilāyā jaghanaṃ bhūyaḥ samākrāntaṃ nagena tu. dharmarājena saṃprokto na gaccheti nagaḥ smṛtaḥ .. 46.28 .. ### [2.46.30](https://indike.org/pramana/in.purana.vayu.2.46.30) yamarājadharmarājau niścalārthaṃ vyavasthitau. tābhyāṃ baliṃ prayacchāmi pitṝṇāṃ mukti hetave .. 46.29 .. ### [2.46.31](https://indike.org/pramana/in.purana.vayu.2.46.31) dvau śvānau śyāmaśabalau vaivasvatakulodbhavau. tābhyāṃ baliṃ prayacchāmi syātāmetāvahiṃsakau .. 46.30 .. ### [2.46.32](https://indike.org/pramana/in.purana.vayu.2.46.32) aindravāruṇa vāyanyayāmyanaiṛtyasaṃsthitāḥ. vāyasāḥ pratigṛhṇantu bhūyo piṇḍaṃ mayā sthitam .. 46.31 .. ### [2.46.33](https://indike.org/pramana/in.purana.vayu.2.46.33) yamo'si yamadūto'si vāyaso'si mahābala. saptajanmakṛtaṃ pāpaṃ baliṃ bhuktvā vināśaya .. 46.32 .. ### [2.46.34](https://indike.org/pramana/in.purana.vayu.2.46.34) rāme vanaṃ gate śailamāgatya bharatena hi. pituḥ piṇḍādikaṃ kṛtvā rāmeśaḥ sthāpito'tra vai .. 46.33 .. ### [2.46.35](https://indike.org/pramana/in.purana.vayu.2.46.35) snātvā natvā ca rāmeśaṃ rāmasītā samanvitam. tatra śrāddhaṃ sapiṇḍañca kṛtvā viṣṇupuraṃ vrajet. pitṛbhiḥ saha dharmātmā kulānāñca śataiḥsaha .. 46.34 .. ### [2.46.36](https://indike.org/pramana/in.purana.vayu.2.46.36) rāmaṃ sītāṃ lakṣmaṇañca munīnsthāpitavānprabhuḥ. bharatasyāśrame puṇye nityaṃ puṇyatamairvṛtam. mataṅgasya padaṃ tatra dṛśyate sarvamānuṣaiḥ .. 46.35 .. ### [2.46.37](https://indike.org/pramana/in.purana.vayu.2.46.37) vahnirdvau varuṇau rudrāścatvāraḥ pitṛmokṣadāḥ. bharatāśramamāsādya tānnametpūjayennaraḥ .. 46.36 .. ### [2.46.38](https://indike.org/pramana/in.purana.vayu.2.46.38) pāpebhyaścopapāpebhyo mucyate pitṛbhiḥ saha. yatra kutrāpi devarṣe bharatasyāśrame naraḥ . snātaḥ śrāddhādikaṃ kuryāttatkalpe'pi na hīyate .. 46.37 .. ### [2.46.39](https://indike.org/pramana/in.purana.vayu.2.46.39) gayāyāṃ cākṣayaṃ śrāddhaṃ japahomatapāṃsi ca. sarvamānantyamāhurvai yaddattaṃ bharatāśrame .. 46.38 .. ### [2.46.40](https://indike.org/pramana/in.purana.vayu.2.46.40) caturyugasvarūpeṇa catasro ravimūrttayaḥ . dṛṣṭāḥ spṛṣṭāḥ pūjitāstāḥ pitṝṇāṃ muktidāyakāḥ .. 46.39 .. ### [2.46.41](https://indike.org/pramana/in.purana.vayu.2.46.41) muktirvāṃmana ityeva tārakākhyo vidhiḥ paraḥ. saṃsārārṇavataptānāṃ nāvāvetau sureśvarau. tārakaṃ brahma viśveṣāṃ mṛtānāṃ jīvatāmidam .. 46.40 .. ### [2.46.42](https://indike.org/pramana/in.purana.vayu.2.46.42) trivikramañca brahmāṇaṃ yaḥ paśyetpuruṣottamam. pitṛbhiḥ saha dharmātmā sa yāti paramāṃ gatim .. 46.41 .. ### [2.46.43](https://indike.org/pramana/in.purana.vayu.2.46.43) śilāyā vāmapāde'pi tathābhyudyantako giriḥ . sthāpitaḥ piṇḍadastatra pitṝnbrahmapuraṃ nayet .. 46.42 .. ### [2.46.44](https://indike.org/pramana/in.purana.vayu.2.46.44) naimiṣāraṇyapārśve tu īce brahmā suraiḥ saha. mukhyasaṃjñaṃ hi tattīrthaṃ devāstatra pade sthitāḥ .. 46.43 .. ### [2.46.45](https://indike.org/pramana/in.purana.vayu.2.46.45) triṣu teṣu padeṣveva tīrtheṣu munisattama. yatkiñcidaśubhaṃ karma tatpraṇaśyati nārada .. 46.44 .. ### [2.46.46](https://indike.org/pramana/in.purana.vayu.2.46.46) tannaimiṣavanaṃ puṇyaṃ sevitaṃ puṇyapūruṣaiḥ. tatra vyāsaḥ śukaḥ pailaḥ kaṇvo vedhāḥ śivo hariḥ .. 46.45 .. ### [2.46.47](https://indike.org/pramana/in.purana.vayu.2.46.47) teṣāṃ darśanamātreṇa mucyate pātakairnaraḥ. vāmahaste śilāyāstu tathā codyantako giriḥ .. 46.46 .. ### [2.46.48](https://indike.org/pramana/in.purana.vayu.2.46.48) sa parvataḥ samānīto hyagastyena mahātmanā. tatra brahmā haraścaiva tapaścograñca cakratuḥ .. 46.47 .. ### [2.46.49](https://indike.org/pramana/in.purana.vayu.2.46.49) tatrāgastyasya hi varaṃ kuṇḍaṃ trailokyadurlabham. yatra munyaṣṭakaṃ siddhaṃ tapastaptvā śivaṃ gatam. kuṇḍe munyaṣṭakaṃ natvā pitṝnbrahmapuraṃ nayet .. 46.48 .. ### [2.46.50](https://indike.org/pramana/in.purana.vayu.2.46.50) agastyenātha devarṣe hyudayādrermahātmanā. śilāyā vāmahaste'pi sthāpito girirāṭ śubhaḥ. vāditrādyairdivyagītairāḍhyo vāditrako giriḥ .. 46.49 .. ### [2.46.51](https://indike.org/pramana/in.purana.vayu.2.46.51) tatra vidyādharo nāma gandharvāpsarasāṅgaṇaiḥ. sameto'dyāpi kītāni divyāni saha gīyate .. 46.50 .. ### [2.46.52](https://indike.org/pramana/in.purana.vayu.2.46.52) mohanaśca sunīthaśca śailūjo mohanottamaḥ. parvato nāradadhyānī saṅgītī puṣpadantakaḥ. hāhā hūhūprabhṛtayo gītadānaṃ prajakrire .. 46.51 .. ### [2.46.53](https://indike.org/pramana/in.purana.vayu.2.46.53) tathā citraratho nāma sarvagandharvasaṃvṛtaḥ. gāyati madhurāṇyeva gītānyadrau mahotsavam .. 46.52 .. ### [2.46.54](https://indike.org/pramana/in.purana.vayu.2.46.54) ataḥ sa parvato devaiḥ sevyate'dyāpi nityaśaḥ. dharmajāstatra deveśo haro bhasmāṅgarāgavān .. 46.53 .. ### [2.46.55](https://indike.org/pramana/in.purana.vayu.2.46.55) pārvatyā sahito rudraḥ parvate gītanādite. modate pūjitodyeyaḥ pitṝṇāṃ paramāṃ gatim .. 46.54 .. ### [2.46.56](https://indike.org/pramana/in.purana.vayu.2.46.56) gayāyāṃ paramātmā hi gopatirvā gadādharaḥ. hīyate vaiṣṇavī māyā tathā rudrārccayā mune .. 46.55 .. ### [2.46.57](https://indike.org/pramana/in.purana.vayu.2.46.57) śilāyā dakṣiṇe haste bhasmakūṭo girirdhṛtaḥ. dharmmarājena tatrāste hyagastyaḥ saha bhāryyayā .. 46.56 .. ### [2.46.58](https://indike.org/pramana/in.purana.vayu.2.46.58) agastyasya pade snātaḥ piṇḍado brahmalokagaḥ. brahmaṇastu varaṃ lebhe māhātmyaṃ bhuvi durlabham .. 46.57 .. ### [2.46.59](https://indike.org/pramana/in.purana.vayu.2.46.59) lopāmudrāṃ tathā bhāryyāṃ pitṝṇāṃ paramāṃ gatim. tatrāgastyeśvaraṃ dṛṣṭvā mucyate brahmahatyayā .. 46.58 .. ### [2.46.60](https://indike.org/pramana/in.purana.vayu.2.46.60) agastyañca sabhāryyañca pitṝnbrahmapuraṃ nayet. daṇḍinātha tapastepe sītādrerdakṣiṇe girau .. 46.59 .. ### [2.46.61](https://indike.org/pramana/in.purana.vayu.2.46.61) vaṭo vaṭeśvarastatra sthitaśca prapitāmahaḥ. tadagre rukmiṇīkuṇḍaṃ paścime kapilā nadī. kapileśo nadītīre hyamāsomasamāgame .. 46.60 .. ### [2.46.62](https://indike.org/pramana/in.purana.vayu.2.46.62) kapilāyāṃ naraḥ snātvā kapileśaṃ samarcya ca. kṛte śrāddhe piṇḍadāne pitaro mokṣamāpnuyuḥ .. 46.61 .. ### [2.46.63](https://indike.org/pramana/in.purana.vayu.2.46.63) tatrāgnidhārā girivarādāgatodyantakādanu. tatra sārasvataṃ kuṇḍaṃ sarasvatyā prakalpitam .. 46.62 .. ### [2.46.64](https://indike.org/pramana/in.purana.vayu.2.46.64) śukrastatra sutaiḥ sārddhaṃ ṣaṇḍāmarkkādibhiḥ prabhuḥ. tatra tatra munīndrāṇāṃ padeṣu munisattama. śrāddhapiṇḍādikṛtsnātaḥ pitṝṃstārayate naraḥ .. 46.63 .. ### [2.46.65](https://indike.org/pramana/in.purana.vayu.2.46.65) śilāyā vāmahaste'pi gṛdrakūṭo girirdhṛtaḥ. gṛdhrarūpeṇa saṃsiddhāstapastaptvā maharṣayaḥ .. 46.64 .. ### [2.46.66](https://indike.org/pramana/in.purana.vayu.2.46.66) ato girirgṛdhrakūṭastatra gṛdhreśvaraḥ sthitaḥ. dṛṣṭvā gṛdhreśvaraṃ natvā yāyācchambhoḥ padaṃ naraḥ .. 46.65 .. ### [2.46.67](https://indike.org/pramana/in.purana.vayu.2.46.67) tatra gṛdhre guhāyāñca piṇḍadaḥ śivalokabhāk . tatra gṛdhre vaṭaṃ natvā prāptakāmo divaṃ vrajet .. 46.66 .. ### [2.46.68](https://indike.org/pramana/in.purana.vayu.2.46.68) ṛṇamokṣaṃ pāpamokṣaṃ śivaṃ dṛṣṭvā śivaṃ vrajet. śūrakṣetrañca tatrāste piṇḍadaḥ svarnayetpitṝn .. 46.67 .. ### [2.46.69](https://indike.org/pramana/in.purana.vayu.2.46.69) ādipālena giriṇā samākrāntaṃ śilodaram. tatrāste gajarūpeṇa vighreśo vignanāśanaḥ. taṃ dṛṣṭvā mucyate vighnaiḥ pitṝn brahmapuraṃ nayet .. 46.68 .. ### [2.46.70](https://indike.org/pramana/in.purana.vayu.2.46.70) nitambe muṇḍapṛṣṭhasya devadāruvanaṃ tvabhūt. muṇḍapṛṣṭhāravindrādrī dṛṣṭvā pāpaṃ vināśayet. gayānābhau suṣumnāyāṃ piṇḍadaḥ svarnayetpitṝn .. 46.69 .. ### [2.46.71](https://indike.org/pramana/in.purana.vayu.2.46.71) śilāyā vāmapāde tu sthāpitaḥ pretaparvataḥ. dharmarājena pāpebhyo giriḥ pretaśilāhvayaḥ .. 46.70 .. ### [2.46.72](https://indike.org/pramana/in.purana.vayu.2.46.72) pādena dūre nikṣiptaḥ śilāyāḥ pādabhārataḥ. gataḥ śilāyāḥ saṃsargātpretakūṭaḥ pavitratām .. 46.71 .. ### [2.46.73](https://indike.org/pramana/in.purana.vayu.2.46.73) pretakuṇḍañca tatrāste devāstatra pade sthitāḥ. tatra kuṇḍādikaṃ kṛtvā pretatvānmocayetpitṝn .. 46.72 .. ### [2.46.74](https://indike.org/pramana/in.purana.vayu.2.46.74) pṛthaksthitāśca bahavo vighnakāriṇa eva te. śrāddhādikāriṇāṃ nṝṇāṃ tīrthe pitṛvimuktaye. pretā dhānuṣkarūpeṇa karagrahaṇakārakāḥ .. 46.73 .. ### [2.46.75](https://indike.org/pramana/in.purana.vayu.2.46.75) pādāṅkitāṃ muṇḍapṛṣṭhāṃ mahādevanivāsinīm. tāṃ dṛṣṭvā sarvalokaśca muktaḥ pāpopapātakaiḥ .. 46.74 .. ### [2.46.76](https://indike.org/pramana/in.purana.vayu.2.46.76) gayāśirasi puṇye ca sarvapāpairvivarjite. gretādivarjitaṃ yasmāttato'tipāvanaṃ varam .. 46.75 .. ### [2.46.77](https://indike.org/pramana/in.purana.vayu.2.46.77) kīkaṭeṣu gayā puṇyā puṇyaṃ rājagṛhaṃ vanam. cyavanasyāśramaṃ puṇyaṃ nadī puṇyā punaḥpunā .. 46.76 .. ### [2.46.78](https://indike.org/pramana/in.purana.vayu.2.46.78) vaikuṇṭho lohadaṇḍaśca gṛdhrakūṭaśca śoṇakaḥ. atra śrāddhādinā sarvānpitṝnbrahmapuraṃ nayet .. 46.77 .. ### [2.46.79](https://indike.org/pramana/in.purana.vayu.2.46.79) krauñcarūpeṇa hi munirmuṇḍapṛṣṭhe tapo'karot. tasya pādāṅkito yasmātkrauñcapādastataḥ smṛtaḥ .. 46.78 .. ### [2.46.80](https://indike.org/pramana/in.purana.vayu.2.46.80) snāto jalāśaye tatra nayetsvargaṃ svakaṃ kulam. baliḥ kākaśilāyāñca kākebhya ṛṇamokṣadaḥ .. 46.79 .. ### [2.46.81](https://indike.org/pramana/in.purana.vayu.2.46.81) muṇḍapṛṣṭhasya sānau hi lomaśo lomaharṣaṇaḥ. dvāvetau paramaṃ taptvā tapaḥsiddhiṃ parāṃ gatau .. 46.80 .. ### [2.46.82](https://indike.org/pramana/in.purana.vayu.2.46.82) āhūtāstu saricchreṣṭhā lomaśena mahānadī. śarāvatī vetravatī candrabhāgā sarasvatī .. 46.81 .. ### [2.46.83](https://indike.org/pramana/in.purana.vayu.2.46.83) kāverī sindhurīrā ca candanā ca saridvarā. vāsiṣṭhī sarayūrgaṅgā yamunā gaṇḍakīndirā .. 46.82 .. ### [2.46.84](https://indike.org/pramana/in.purana.vayu.2.46.84) mahāvaitaraṇī nāmnā nikṣarā ca divaukasaḥ . sāvavyalakanandā ca hyudīcī kankāhvayā .. 46.83 .. ### [2.46.85](https://indike.org/pramana/in.purana.vayu.2.46.85) kauśikī brahmadā jyeṣṭhā sarvasyāghavimocinī. kṛṣṇavalvā carmmavatī dve nadyau muktidāyike .. 46.84 .. ### [2.46.86](https://indike.org/pramana/in.purana.vayu.2.46.86) āhūte saritāṃ śreṣṭhe lomahrarṣeṇa sāhasāt . tapasastu prabhāveṇa narmmadā munipuṅgava. tāsu sarvāsu yaḥ snātvā piṇḍadaḥ svarnayetpitṝn .. 46.85 .. ### [2.46.87](https://indike.org/pramana/in.purana.vayu.2.46.87) brahmayoniṃ praviśyātha nirgacchedyastu mānavaḥ. paraṃ brahma sa yātīha vimukto yonisaṅkaṭāt .. 46.86 .. ### [2.46.88](https://indike.org/pramana/in.purana.vayu.2.46.88) nikṣarāyāṃ puṣkariṇyāṃ snātaḥ śrāddhādikaṃ naraḥ. kuryyātkrauñcapade divye niyamādvāsaratrayam. sarvānpitṝnnayetsvargaṃ pañcapāpina eva ca .. 46.87 .. ### [2.46.89](https://indike.org/pramana/in.purana.vayu.2.46.89) janārdano bhasmakūṭe tasya haste tu piṇḍadaḥ. ātmano'pyathavānyeṣāṃ savyenāpi tilairvinā. jīvatāṃ dadhisaṃmiśraṃ sarve te viṣṇulokagāḥ .. 46.88 .. ### [2.46.90](https://indike.org/pramana/in.purana.vayu.2.46.90) yastu piṇḍo mayā dattastava haste janārdana. yaduddiśya tvayā deyastasminpiṇḍo mṛte prabho .. 46.89 .. ### [2.46.91](https://indike.org/pramana/in.purana.vayu.2.46.91) eṣa piṇḍo mayā dattastava haste janārdana. antakāle gate mahyaṃ tvayā deyo gayāśire .. 46.90 .. ### [2.46.92](https://indike.org/pramana/in.purana.vayu.2.46.92) janārdana namastubhyaṃ namaste pitṛmokṣada. pitṛpate namaste'stu namaste pitṛrūpiṇe .. 46.91 .. ### [2.46.93](https://indike.org/pramana/in.purana.vayu.2.46.93) gayāyāṃ pitṛrūpeṇa svayameva janārdanaḥ. taṃ dṛṣṭvā puṇḍarīkākṣaṃ mucyate ca ṛṇatrayāt .. 46.92 .. ### [2.46.94](https://indike.org/pramana/in.purana.vayu.2.46.94) namaste puṇḍarīkākṣa ṛṇatrayavimocaka. lakṣmīkānta namaste'stu pitṝṇāṃ mokṣado bhava .. 46.93 .. ### [2.46.95](https://indike.org/pramana/in.purana.vayu.2.46.95) vāmajānu susaṃpātya natvā bhīmo janārdanam. śrāddhaṃ sapiṇḍakaṃ kṛtvā bhrātṛbhirbrahmalokabhāk. pitṛbhiḥ saha dharmātmā kulānāñca śatena ca .. 46.94 .. ### [2.46.96](https://indike.org/pramana/in.purana.vayu.2.46.96) śilāyāṃ vyaktarūpeṇa vyaktāvyaktātmanā sthitaḥ. lakṣmīśo vibhudhaiḥ sārddhaṃ tasmāddevamayī śilā .. 46.95 .. ### [2.46.97](https://indike.org/pramana/in.purana.vayu.2.46.97) iti śrīmahāpurāṇe vāyuprokte gayāmāhātmyaṃ nāma ṣaṭcatvāriṃśo'dhyāya- .. 46 ..\* ## Linked texts (1) - [Tristhalīsetu (Nārāyaṇa)](https://indike.org/pramana/in.niti.dharma.tirtha.tristhali.tristhalisetu.14.p1.5) — Nārāyaṇa (Mahiṣamaṅgalam) 1513, Sanskrit --- Source: [https://indike.org/pramana/in.purana.vayu.2.46](https://indike.org/pramana/in.purana.vayu.2.46) · Pramāṇa