[Pramāṇa](https://indike.org/pramana/) › [Indian literature](https://indike.org/pramana/in) › [Purāṇas](https://indike.org/pramana/in.purana) › [Vayupurana](https://indike.org/pramana/in.purana.vayu) › 2.8 # Vayupurana 2.8: adhyāyaḥ 8 Vāyupurāṇa 2.8 - **Language:** Sanskrit ### adhyāyaḥ 8 ### [2.8.1](https://indike.org/pramana/in.purana.vayu.2.8.1) ..sūta uvāca.. gandharvāpsarasaḥ puṇyā mauneyāḥ parikīrttitāḥ. citrasenograsenaśca ūrṇāyuranaghastathā .. 8.1 .. ### [2.8.2](https://indike.org/pramana/in.purana.vayu.2.8.2) dhṛtarāṣṭraḥ pulomā ca sūryavarccāstathaiva ca. yugapattṛṇapatkālirditiścitraratha stathā .. 8.2 .. ### [2.8.3](https://indike.org/pramana/in.purana.vayu.2.8.3) trayodaśo bhramiśirāḥ parjanyaśca caturdaśaḥ. kaliḥ pañcadaśaśvaiva nāradaścaiva ṣoḍaśaḥ. ityete devagandharvā mauneyāḥ parikīrttitāḥ .. 8.3 .. ### [2.8.4](https://indike.org/pramana/in.purana.vayu.2.8.4) catustriṃśadyavīyasyasteṣāmapsarasaḥ śubhāḥ . antarā dāravatyā ca priyamukhyā surottamā .. 8.4 .. ### [2.8.5](https://indike.org/pramana/in.purana.vayu.2.8.5) miśrakeśī tathā śācī parṇinī vāpyalambuṣā. mārīcī putrikā caiva vidyudvarṇā tilottamā .. 8.5 .. ### [2.8.6](https://indike.org/pramana/in.purana.vayu.2.8.6) adrikā lakṣaṇā caiva devī rambhā manoramā. suvarā ca subāhuśca pūrṇitā supratiṣṭhitā .. 8.6 .. ### [2.8.7](https://indike.org/pramana/in.purana.vayu.2.8.7) puṇḍarīkā sugandhā ca sudantā surasā tathā. hemāsarā sutī caiva suvṛttā kamalā ca yā .. 8.7 .. ### [2.8.8](https://indike.org/pramana/in.purana.vayu.2.8.8) subhujā haṃsapādā ca laukikyo'psarasastathā. gandharvāpsaraso hyetā mauneyāḥ parikīrtitāḥ .. 8.8 .. ### [2.8.9](https://indike.org/pramana/in.purana.vayu.2.8.9) gandharvāṇāṃ duhitaro mayā yāḥ parikīrttitāḥ. tāsāṃ nāmāni sarvāsāṃ kīrttyamānāni me śrṛṇu .. 8.9 .. ### [2.8.10](https://indike.org/pramana/in.purana.vayu.2.8.10) suyaśā prathamā tāsāṃ gāndharvī tadanantaram . vidyāvatī cārumukhī sumukhī ca varānanā .. 8.10 .. ### [2.8.11](https://indike.org/pramana/in.purana.vayu.2.8.11) tatreme suyaśāputrā mahābalaparākramāḥ. pracetasaḥ sutā yakṣāsteṣāṃ nāmāni me śrṛṇu .. 8.11 .. ### [2.8.12](https://indike.org/pramana/in.purana.vayu.2.8.12) kambalo harikeśaśca kapilaḥ kāñcanastathā. meghamālītu yakṣāṇāṃ gaṇa eṣa udāhṛtaḥ .. 8.12 .. ### [2.8.13](https://indike.org/pramana/in.purana.vayu.2.8.13) suyaśāyā duhitaraścatasro'psarasaḥ smṛtāḥ. tāsāṃ nāmāni vai samyag bruvato me nibodhata .. 8.13 .. ### [2.8.14](https://indike.org/pramana/in.purana.vayu.2.8.14) loheyī tvabhavajjyeṣṭhā bharatā tadanantaram. kṛśāṅgī ca viśālā ca rūpeṇāpratimā tathā .. 8.14 .. ### [2.8.15](https://indike.org/pramana/in.purana.vayu.2.8.15) tābhyo'pare yakṣagaṇāścatvāraḥ parikīrttitāḥ. utpāditā viśālena vikrāntena mahātmanā .. 8.15 .. ### [2.8.16](https://indike.org/pramana/in.purana.vayu.2.8.16) loheyo bharateyaśca kṛśāṅgeyaśca viśrutaḥ . viśāleśca yakṣāṇāṃ purāṇe prathitā gaṇāḥ .. 8.16 .. ### [2.8.17](https://indike.org/pramana/in.purana.vayu.2.8.17) ityetairasurairghorairmahābalaparākramaiḥ. lokairyakṣagaṇairvyāptā lokāloka vidāṃvarāḥ .. 8.17 .. ### [2.8.18](https://indike.org/pramana/in.purana.vayu.2.8.18) gandharvāścātha vāleyā vikrāntena mahātmanā. utpāditā mahāvīryā mahāgandharvanāyakāḥ .. 8.18 .. ### [2.8.19](https://indike.org/pramana/in.purana.vayu.2.8.19) vikramaudāryasampannā mahābalaparākramāḥ. teṣāṃ nāmāni vakṣyāmi yathāvadanupūrvaśaḥ .. 8.19 .. ### [2.8.20](https://indike.org/pramana/in.purana.vayu.2.8.20) citrāṅgado mahāvīryaścitravarmā tathaiva ca. citraketurmahābhāgaḥ somadatto'tha vīryavān. tisro duhitaraścaiva tāsāṃ nāmāni vakṣyate .. 8.20 .. ### [2.8.21](https://indike.org/pramana/in.purana.vayu.2.8.21) prathamā tvagnikā nāma kambalā tadanantaram. tathā vasumatī nāma rūpeṇāpratimaujasaḥ .. 8.21 .. ### [2.8.22](https://indike.org/pramana/in.purana.vayu.2.8.22) tābhyaḥ pare kumāreṇa gaṇā utpāditāstvime. trayo gandharvamukhyānāṃ vikrāntā yuddhadurmadāḥ .. 8.22 .. ### [2.8.23](https://indike.org/pramana/in.purana.vayu.2.8.23) āgneyāḥ kāmbaleyāśca tathā vasumatīsutāḥ. tairgaṇairvividhairvyāptamidaṃ lokacarācaram .. 8.23 .. ### [2.8.24](https://indike.org/pramana/in.purana.vayu.2.8.24) vidyāvantaśca tenaiva vikrāntena mahātmanā. utpāditā mahābhāgā rūpavidyādhaneśvarāḥ .. 8.24 .. ### [2.8.25](https://indike.org/pramana/in.purana.vayu.2.8.25) teṣāmudīrṇa vīryāṇāṃ gandharvāṇāṃ mahātmanām. nāmāni kīrttyamānāni śrṛṇudhvaṃ me vivakṣataḥ .. 8.25 .. ### [2.8.26](https://indike.org/pramana/in.purana.vayu.2.8.26) hiraṇyaromā kapilaḥ sulomā māgadhastathā. candraketuśca vai gāṅgo godaścaiva mahābalaḥ .. 8.26 .. ### [2.8.27](https://indike.org/pramana/in.purana.vayu.2.8.27) mahāvidyāvadātānāṃ vikrāntānāṃ tapasvinām. ityevamādirhi gaṇo dve cānye ca sulocane .. 8.27 .. ### [2.8.28](https://indike.org/pramana/in.purana.vayu.2.8.28) śivā ca sumanāścaiva tābhyāmapi mahātmanā. utpāditā viśravasā vidyācaraṇagocarāḥ .. 8.28 .. ### [2.8.29](https://indike.org/pramana/in.purana.vayu.2.8.29) śaiveyāścaiva vikrāntāstathā saumanaso gaṇāḥ. etairvyāptamidaṃ lokaṃ vidyādharagaṇaistribhiḥ .. 8.29 .. ### [2.8.30](https://indike.org/pramana/in.purana.vayu.2.8.30) ebhyo'nekāni jātāni ambarāntaracāriṇām. loke gaṇaśatānyeva vidyāgharaviceṣṭitāt .. 8.30 .. ### [2.8.31](https://indike.org/pramana/in.purana.vayu.2.8.31) aśvamukhāśca tenaiva vikrāntena mahātmanā. utpāditā hyaśvamukhāḥ kinnarāṃstānnibodhata .. 8.31 .. ### [2.8.32](https://indike.org/pramana/in.purana.vayu.2.8.32) samudraḥ senaḥ kālindo mahānetro mahābalaḥ. suvarṇaghoṣaḥ sugrīvo mahāghoṣaśca vīryavān .. 8.32 .. ### [2.8.33](https://indike.org/pramana/in.purana.vayu.2.8.33) ityevamādirhi gaṇaḥ kinnarāṇāṃ mahātmanām. hayānanānāṃ vidvadbhirvistīrṇaḥ parikīrttyate .. 8.33 .. ### [2.8.34](https://indike.org/pramana/in.purana.vayu.2.8.34) tathāsamutthitenaiva vikrāntena mahātmanā. utpāditā naramukhāḥ kinnarāḥ śāṃśapāyanāḥ .. 8.34 .. ### [2.8.35](https://indike.org/pramana/in.purana.vayu.2.8.35) hariṣeṇaḥ suṣeṇaśca vāriṣeṇaśca vīryavān. rudradattendradattau ca candradruma mahādrumau .. 8.35 .. ### [2.8.36](https://indike.org/pramana/in.purana.vayu.2.8.36) binduśca bindusāraśca candravaṃśāśca kinnarāḥ. ityete kinnarāḥ śreṣṭhā loke khyātāḥ suśobhanāḥ .. 8.36 .. ### [2.8.37](https://indike.org/pramana/in.purana.vayu.2.8.37) nṛtyagītapragalbhānāmeteṣāṃ dvijasattamāḥ. loke gaṇaśatānyeva kinnarāṇāṃ mahātmanām .. 8.37 .. ### [2.8.38](https://indike.org/pramana/in.purana.vayu.2.8.38) yakṣā yakṣopaśāntaśca lauheyā rūpaśālinī. duhītā suravindeti prakāśā siddhasammatā .. 8.38 .. ### [2.8.39](https://indike.org/pramana/in.purana.vayu.2.8.39) upāyāketanasyāhi svayamutpādito gaṇaḥ . karālakena bhūtānāṃ teṣāṃ nāmāni me śrṛṇu .. 8.39 .. ### [2.8.40](https://indike.org/pramana/in.purana.vayu.2.8.40) bhūtā bhūtagaṇairjñeyā āveśakaniveśakāḥ. ityevamādirhi gaṇo bhūmigocarakaḥ smṛtaḥ .. 8.40 .. ### [2.8.41](https://indike.org/pramana/in.purana.vayu.2.8.41) vijñeya iha loke'smin bhūtānāṃ bhūtanāyakaḥ. ye utkṛṣṭā bhavantyeṣāmambarāntaracāriṇām. vṛkṣāgramātramākāśaṃ te caranti na saṃśayaḥ .. 8.41 .. ### [2.8.42](https://indike.org/pramana/in.purana.vayu.2.8.42) tatreme devagandharvāḥ prāyeṇa kathitā mayā. devopasthānaniratā vijñeyāste yaśasvinaḥ .. 8.42 .. ### [2.8.43](https://indike.org/pramana/in.purana.vayu.2.8.43) nārāyaṇaṃ suraguruṃ virajaṃ puṣkarekṣaṇam. hiraṇyagarbhañca tathā caturvaktraṃ svayambhuvam .. 8.43 .. ### [2.8.44](https://indike.org/pramana/in.purana.vayu.2.8.44) śaṅkarañca mahādevamīśānañca jagatprabhum. indrapūrvāṃstathā dityān rudrāṃśca vasubhiḥ saha .. 8.44 .. ### [2.8.45](https://indike.org/pramana/in.purana.vayu.2.8.45) upatasthuḥ sagandharvā nṛttyagītaviśāradāḥ. tridaśāḥ sarvalokasthā nipuṇā gītavādinaḥ .. 8.45 .. ### [2.8.46](https://indike.org/pramana/in.purana.vayu.2.8.46) haṃso jyeṣṭhaḥ kaniṣṭho'nyo madhyamau ca hahā huhūḥ. caturtho dhiṣaṇaścaiva tato vāsirucistathā .. 8.46 .. ### [2.8.47](https://indike.org/pramana/in.purana.vayu.2.8.47) ṣaṣṭhastu tumburusteṣāṃ tato viśvāvasuḥ smṛtaḥ. imāścāpsaraso divyā vihitāḥ puṇyalakṣaṇāḥ .. 8.47 .. ### [2.8.48](https://indike.org/pramana/in.purana.vayu.2.8.48) suṣuve'ṣṭau mahābhāgā variṣṭhā devapūjitāḥ. anavadyāmanavaśāmanvatāṃ madanapriyām. arūṣāṃ subhagāṃ bhāsī mariṣṭā'ṣṭau vyajāyata .. 8.48 .. ### [2.8.49](https://indike.org/pramana/in.purana.vayu.2.8.49) manovatī sukeśā ca tumburostu sute ubhe. pañcacūḍāstvimā divyā daivikyo'psaraso daśa .. 8.49 .. ### [2.8.50](https://indike.org/pramana/in.purana.vayu.2.8.50) menakā sahajanyā ca parṇinī puñjikasthalā. ghṛtasthalā ghṛtācī ca viśvācī pūrvacītyapi. pramlocetyabhivikhyātānumlocantī tathaiva ca .. 8.50 .. ### [2.8.51](https://indike.org/pramana/in.purana.vayu.2.8.51) anādinidhanasyātha jajñe nārāyaṇasya yā. ūroḥ sarvānavadyāṅgī urvaśyekādaśī smṛtā .. 8.51 .. ### [2.8.52](https://indike.org/pramana/in.purana.vayu.2.8.52) menasya menakā kanyā brahmaṇo hṛṣṭacetasaḥ . sarvāśca brahma vādinyo mahāyogāśca tāḥ smṛtāḥ .. 8.52 .. ### [2.8.53](https://indike.org/pramana/in.purana.vayu.2.8.53) gaṇā apsarasāṅkhyātāḥ puṇyāste vai caturddaśa. āhūtāḥ śobhayantaśca gaṇā hyete caturddaśa .. 8.53 .. ### [2.8.54](https://indike.org/pramana/in.purana.vayu.2.8.54) brahmaṇo mānasāḥ kanyāḥ śobhayantyo manoḥ sutāḥ. vegavantyastvariṣṭāyā ūrjjāyāścāgnisambhavāḥ .. 8.54 .. ### [2.8.55](https://indike.org/pramana/in.purana.vayu.2.8.55) āyuṣmantyaśca sūryasya raśmijātāḥ subhā svarāḥ. vārijā hyamṛtotpannā amṛtā nāmataḥ smṛtāḥ .. 8.55 .. ### [2.8.56](https://indike.org/pramana/in.purana.vayu.2.8.56) vāyūtpannā mudā nāma bhūmijātā bhavāstu vai . vidyutaśca ruco nāma mṛtyoḥ kanyāśca bhairavāḥ .. 8.56 .. ### [2.8.57](https://indike.org/pramana/in.purana.vayu.2.8.57) śobhayantyaḥ kāmaguṇā gaṇāḥ proktāścaturddaśa. sendropendraiḥ suragaṇaiḥ rūpātiśayanirmitāḥ .. 8.57 .. ### [2.8.58](https://indike.org/pramana/in.purana.vayu.2.8.58) śubharūpā mahābhāgā divyā nārī tilottamā. brahmaṇaścāgnikuṇḍācca devanārī prabhāvatī. rūpayauvanasampannā utpannā lokaviśrutā .. 8.58 .. ### [2.8.59](https://indike.org/pramana/in.purana.vayu.2.8.59) ve dītalasamutpannā caturvaktrasya dhīmataḥ. nāmnā vedavatī nāma suranārī mahāprabhā .. 8.59 .. ### [2.8.60](https://indike.org/pramana/in.purana.vayu.2.8.60) tathā yamasya duhitā rūpayauvanaśālinī. varahemavibhā hemā devanārī sulocanā .. 8.60 .. ### [2.8.61](https://indike.org/pramana/in.purana.vayu.2.8.61) ityete bahusāhasraṃ bhāsvarā hyapsarogaṇāḥ. devatānāmṛṣīṇāñca patnyastā mātaraśca ha .. 8.61 .. ### [2.8.62](https://indike.org/pramana/in.purana.vayu.2.8.62) sugandhāścampavarṇāśca sarvāścāpsarasaḥ samāḥ. samprayoge tu kāntena mādyanti madirāṃ vinā. tāsāmāpyāyate sparśādānandaśca vivarddhate .. 8.62 .. ### [2.8.62\_1](https://indike.org/pramana/in.purana.vayu.2.8.62_1) parvate nārade pūrvaṃ retaḥ skannaṃ prajāpateḥ. parvatastatra saṃbhūto nāradaścaiva tāvubhau.. tayoryavīyasī caiva tṛtīyārandhatī smṛtā. devarukhyo sūryajanma tasminnāradaparvatau..(pāṭhabhedaḥ) ### [2.8.63](https://indike.org/pramana/in.purana.vayu.2.8.63) vinatāyāstu putrau dvāvaruṇo garuḍaśca ha. ṣaṭ‌triṃśattu svasāraśca yavīyasyastu tāḥ smṛtāḥ .. 8.63 .. ### [2.8.64](https://indike.org/pramana/in.purana.vayu.2.8.64) gāyatryādīni cchandāṃsi sauparṇeyāśca pakṣiṇaḥ. ityevāhāni sarvāṇi dikṣu sannihitāni ca .. 8.64 .. ### [2.8.65](https://indike.org/pramana/in.purana.vayu.2.8.65) kadrūrnāgasahasraṃ vai carā caramajījanat . anekaśirasāṃ teṣāṃ khecarāṇāṃ mahātmanām. bahudhānāmadheyānāṃ prāyaśastu nibodhata .. 8.65 .. ### [2.8.66](https://indike.org/pramana/in.purana.vayu.2.8.66) teṣāṃ pradhānanāgāśca śeṣavāsukitakṣakāḥ. sakaṇīraśca jambhaśca añjano vāmanastathā .. 8.66 .. ### [2.8.67](https://indike.org/pramana/in.purana.vayu.2.8.67) airāvatamahāpajhau kambalāśvatarāvubhau. ailapatraśca śaṅkhaśca karkoṭakadhanañjayau .. 8.67 .. ### [2.8.68](https://indike.org/pramana/in.purana.vayu.2.8.68) mahākarṇo mahānīlo dhṛtarāṣṭrabalāhakau. kumāraḥ puṣpadantaśca sumukho durmukhastathā .. 8.68 .. ### [2.8.69](https://indike.org/pramana/in.purana.vayu.2.8.69) śilīmukho dadhimukhaḥ kālīyaḥ śālipiṇḍakaḥ . bindupādaḥ puṇḍarīko nāgaścāpūraṇastathā .. 8.69 .. ### [2.8.70](https://indike.org/pramana/in.purana.vayu.2.8.70) kapilaścāmbarīṣaśca dhṛtapādaśca kacchapaḥ . prahlādaḥ pajhacitraśca gandharvo'tha namasvikaḥ .. 8.70 .. ### [2.8.71](https://indike.org/pramana/in.purana.vayu.2.8.71) nahuṣaḥ khararomā ca maṇirityevamādayaḥ. kādraveyā mayā khyātāḥ khaśāyāṃstu nibodhata .. 8.71 .. ### [2.8.72](https://indike.org/pramana/in.purana.vayu.2.8.72) khaśā vijajñe putrau dvau viśrutau puruṣādakau. jyeṣṭhaṃ paścimasaṅkhyāyāṃ pūrvasyāṃ manujāstathā .. 8.72 .. ### [2.8.73](https://indike.org/pramana/in.purana.vayu.2.8.73) vilohitaṃ vikarṇañca pūrvaṃ sā'janayat sutam. caturbhujaṃ catuṣpādaṃ dvimūrddhānaṃ dvidhāgatim .. 8.73 .. ### [2.8.74](https://indike.org/pramana/in.purana.vayu.2.8.74) sarvāṅgakeśaṃ sthūlāṅgaṃ tuṅganāsaṃ mahodaram. sthūlaśīrṣaṃ mahākarṇaṃ muñjākeśaṃ manoratham .. 8.74 .. ### [2.8.75](https://indike.org/pramana/in.purana.vayu.2.8.75) hastyoṣṭhaṃ dīrghajaṅghañca aśvadaṃṣṭhraṃ mahāhanum. raktajihvaṃ jaṭākṣañca sthūlāsyaṃ dīrghanāsikam .. 8.75 .. ### [2.8.76](https://indike.org/pramana/in.purana.vayu.2.8.76) guhyakaṃ śitikarṇañca mahānandaṃ mahāmukham. evaṃvidhaṃ khaśāputraṃ vijajñe sā'tibhīṣaṇam .. 8.76 .. ### [2.8.77](https://indike.org/pramana/in.purana.vayu.2.8.77) tasyānujaṃ dvitīyantu khaśā caiva vyajāyata. triśīrṣañca tripādañca trihastaṃ kṛṣṇalocanam .. 8.77 .. ### [2.8.78](https://indike.org/pramana/in.purana.vayu.2.8.78) ūrddhvakeśaṃ haricchmaśruṃ śilāsaṃhananaṃ dṛḍham . hrasva kāyaṃ subāhuñca mahākāyaṃ mahābalam .. 8.78 .. ### [2.8.79](https://indike.org/pramana/in.purana.vayu.2.8.79) ākarṇadāritāsyañca lambabhrūṃ sthūlanāsikam. sthūloṣṭhamaṣṭadaṃṣṭrañca dvijihvaṃ śaṅkukarṇakam .. 8.79 .. ### [2.8.80](https://indike.org/pramana/in.purana.vayu.2.8.80) piṅgalodvṛttanayanaṃ jaṭilaṃ piṅgalaṃ tathā. mahākarṇaṃ mahoraskaṃ kaṭihīnaṃ kṛśodaram. nakhinaṃ lohitagrīvaṃ sā kaniṣṭhaṃ prasūyate .. 8.80 .. ### [2.8.81](https://indike.org/pramana/in.purana.vayu.2.8.81) sadyaḥ prasūyamātrau tu vivṛddhau ca pramāṇataḥ. upabhogasamarthābhyāṃ śarīrābhyāmupasthitau. sadyojātavivṛddhāṅgau mātaraṃ paryabhūṣyatām .. 8.81 .. ### [2.8.82](https://indike.org/pramana/in.purana.vayu.2.8.82) jyāyāṃstayostu yaḥ krūro mātaraṃ so'bhyakarṣata. abravīnmātarāyāhi bhakṣārthe kṣudhayārdditaḥ .. 8.82 .. ### [2.8.83](https://indike.org/pramana/in.purana.vayu.2.8.83) nyaṣedhayat punarhyenaṃ jyāyāṃsantu kaniṣṭhakaḥ. abravīt so'sakṛttaṃ vai rakṣemāṃ mātaraṃ khaśām. bāhubhyāṃ parigṛhyainaṃ mātaraṃ tāṃ vyamocayat .. 8.83 .. ### [2.8.84](https://indike.org/pramana/in.purana.vayu.2.8.84) etasminneva kāle tu prādurbhūtastayoḥ pitā . tau dṛṣṭvā vikṛtākārau vasatāṃ hītyabhāṣata .. 8.84 .. ### [2.8.85](https://indike.org/pramana/in.purana.vayu.2.8.85) tau tu taṃ pitaraṃ dṛṣṭvā balavantau tvarānvitau . mātureva punasvāṅke pralapetāṃ svamāyayā .. 8.85 .. ### [2.8.86](https://indike.org/pramana/in.purana.vayu.2.8.86) atho'bravīdṛṣirbhāryāmāvābhyāmuktavatyasi . pūrvamācakṣva tattvena tathaivābhyāṃ vyatikramam .. 8.86 .. ### [2.8.87](https://indike.org/pramana/in.purana.vayu.2.8.87) mātulaṃ bhajate putraḥ pitṝn bhajati kanyakā. yathāśīlā bhavenmātā tathāśīlo bhavet sutaḥ .. 8.87 .. ### [2.8.88](https://indike.org/pramana/in.purana.vayu.2.8.88) yadvarṇā tu bhavedbhūmistadvarṇaṃ salilaṃ dhruvam. mātṝṇāṃ śīladoṣeṇa tathā śīlaguṇaiḥ punaḥ. vibhinnāstu prajāḥ sarvāstathā khyātivaśena ca .. 8.88 .. ### [2.8.89](https://indike.org/pramana/in.purana.vayu.2.8.89) balaśīlādibhistāsāmaditirdharmatatparā. dharmaśīlādibhiścaiva prabodhabalaśālinī .. 8.89 .. ### [2.8.90](https://indike.org/pramana/in.purana.vayu.2.8.90) (gandhaśīlā ditiścaiva pravārdhyayanaśālinī.) gītaśīlā tathā'riṣṭā māyāśīlā danuḥ smṛtā. vinatā tu punarddevī vaihāyasagatipriyā .. 8.90 .. ### [2.8.91](https://indike.org/pramana/in.purana.vayu.2.8.91) tapomayena śīlena surabhiḥ samalaṃkṛtā. krodhaśīlā tathā kadrūḥ krodhenāsukhaśīlakā .. 8.91 .. ### [2.8.92](https://indike.org/pramana/in.purana.vayu.2.8.92) danāyuṣāyāḥ śīlaṃ vai vairanugraha lakṣaṇam. tvañca devi mahābhāge krodhaśīlā matāsi me .. 8.92 .. ### [2.8.93](https://indike.org/pramana/in.purana.vayu.2.8.93) ityetāni saśīlāni svabhāvāllokanānnṛṇām. karmato yatnato buddhyā rūpato balatastathā. kṣamātaścaiva bhinnāni bhāvitārthabalena ca .. 8.93 .. ### [2.8.94](https://indike.org/pramana/in.purana.vayu.2.8.94) rajaḥsattvatamovṛtterviśvarūpāḥ svabhāvataḥ. mātulantvanuyātāste putrakā guṇavṛttibhiḥ .. 8.94 .. ### [2.8.95](https://indike.org/pramana/in.purana.vayu.2.8.95) ityevamuktvā bhagavān khaśāmapratimāṃ tadā. putrāvāhūya sāmnā vai cakre somamabhītayaḥ .. 8.95 .. ### [2.8.96](https://indike.org/pramana/in.purana.vayu.2.8.96) tābhyāñca yat kṛtaṃ tasyāstadācaṣṭa tadā khaśā. mātrā yathā samākhyātaṃ karma tābhyāṃ pṛthak pṛthak. tena dhātvarthayogena tattvadarśī cakāra ha .. 8.96 .. ### [2.8.97](https://indike.org/pramana/in.purana.vayu.2.8.97) yakṣa ityeṣa dhāturvai khādane kṛṣaṇe ca saḥ. yakṣayetyuktavān yasmāt tasmādyakṣo bhavatyayam .. 8.97 .. ### [2.8.98](https://indike.org/pramana/in.purana.vayu.2.8.98) rakṣa ityeṣa dhāturyaḥ pālane sa vibhāvyate. uktavāṃścaiva yasmāttu rakṣa me mātaraṃ khaśām. nāmnā'yaṃ rākṣasastasmāt bhaviṣyati tavātmajaḥ .. 8.98 .. ### [2.8.99](https://indike.org/pramana/in.purana.vayu.2.8.99) sa tadā tadvidhān dṛṣṭvā vismitaḥ parimṛgya ca. tayoḥ prādiśadāhāraṃ prajāpatirasṛgvase .. 8.99 .. ### [2.8.100](https://indike.org/pramana/in.purana.vayu.2.8.100) pitā tau kṣudhitau dṛṣṭvā varañcemaṃ tayordadau. yuvayorhastasaṃsparśo naktamena tu sarvaśaḥ .. 8.100 .. ### [2.8.101](https://indike.org/pramana/in.purana.vayu.2.8.101) naktāhāravihārau ca divā svapnopabhoginau. naktañcaiva balīyāṃsau divā suptāvubhau yuvām .. 8.101 .. ### [2.8.102](https://indike.org/pramana/in.purana.vayu.2.8.102) mātaraṃ rakṣatañcaiva dharmaścaivānuśiṣyatām. ityuktvā kaśyapaḥ putrau tatraivāntaradhīyata .. 8.102 .. ### [2.8.103](https://indike.org/pramana/in.purana.vayu.2.8.103) gate pitari tau vīrau nisargādeva dāruṇau. viparyayeṇa varttantau kimbhakṣau prāṇihiṃsakau .. 8.103 .. ### [2.8.104](https://indike.org/pramana/in.purana.vayu.2.8.104) mahābalau mahāsattvau mahākāyau durāsadau. māyāvinau ca dṛśyau tāvantarddhānagatāvubhau .. 8.104 .. ### [2.8.105](https://indike.org/pramana/in.purana.vayu.2.8.105) tau kāmarūpiṇau ghorau vikṛtājñau svabhāvataḥ. rūpānurūpairāhāraiḥ prabhavetāmubhāvapi .. 8.105 .. ### [2.8.106](https://indike.org/pramana/in.purana.vayu.2.8.106) devā surānṛṣīṃścaiva gandharvān kinnarānapi. piśācāṃśca manuṣyāṃśca pannagān pakṣiṇaḥ paśūn .. 8.106 .. ### [2.8.107](https://indike.org/pramana/in.purana.vayu.2.8.107) bhakṣārthamapi lipsantau sarvatastau niśācarau. indreṇa tu varau caiva dhṛtau dattvā suvadhyatām .. 8.107 .. ### [2.8.108](https://indike.org/pramana/in.purana.vayu.2.8.108) yakṣastu na kadācidvai niśīthai hyekakaściram. āhāraṃ sa parīpsan vai śabdenānucacāra ha .. 8.108 .. ### [2.8.109](https://indike.org/pramana/in.purana.vayu.2.8.109) āsasāda piśācau dvau jantucaṇḍau ca tāvubhau. piṅgākṣāvūrddhvaromāṇau vṛttākṣau tu sudārūṇau .. 8.109 .. ### [2.8.110](https://indike.org/pramana/in.purana.vayu.2.8.110) asṛṅmāṃsavasāhārau puruṣādau mahābalau. kanyābhyāṃ sahitau tau tu tābhyāṃ priyacikīrṣayā .. 8.110 .. ### [2.8.111](https://indike.org/pramana/in.purana.vayu.2.8.111) dve kanye kāmarūpiṇyau tadācāre ca te śubhe. āhārārthamaṭantau tau kanyābhyāṃ sahitāvubhau .. 8.111 .. ### [2.8.112](https://indike.org/pramana/in.purana.vayu.2.8.112) te'paśyan rākṣasaṃ tatra kāmarūpaṃ mahābalam. sahasā sannipāte tu dṛṣṭvā caiva parasparam .. 8.112 .. ### [2.8.113](https://indike.org/pramana/in.purana.vayu.2.8.113) rakṣamāṇau tato'nyonyaṃ parasparajighṛkṣavaḥ. pitarāvūcatuḥ kanye yuvāmānayata drutam .. 8.113 .. ### [2.8.114](https://indike.org/pramana/in.purana.vayu.2.8.114) jīvagrāhaṃ vigṛhyainaṃ visphurantaṃ pade pade. tataḥ samabhisṛtyainaṃ kanye jagṛhatustadā. gṛhītvā hastayostābhyāmānīte pitṛsaṃsadi .. 8.114 .. ### [2.8.115](https://indike.org/pramana/in.purana.vayu.2.8.115) tābhyāṃ kare gṛhītaṃ taṃ piśācamatha rākṣasam. pṛcchatāṃ ko'si kasya tvaṃ sa ca sarvamabhāṣata .. 8.115 .. ### [2.8.116](https://indike.org/pramana/in.purana.vayu.2.8.116) tasya karmābhivijñātaṃ jñātvā tau rākṣasarṣabhau. ajañca śaṇḍaṃ tasyaite pratyapādayatāṃ sute. tau tuṣṭau karmaṇā tasya kanye dve dadatuḥ sute .. 8.116 .. ### [2.8.117](https://indike.org/pramana/in.purana.vayu.2.8.117) paiśāceva vivāhena sudatyā buddhavāhanaḥ. ajaḥ khaṇḍaśca tābhyāṃ tau tadāśrāvayatāṃ dhanam .. 8.117 .. ### [2.8.118](https://indike.org/pramana/in.purana.vayu.2.8.118) iyaṃ brahmadhanā nāma mama kanyā hyalomikā . brahmasattvadhanāhārā iti khaṇḍobhyabhāṣata .. 8.118 .. ### [2.8.119](https://indike.org/pramana/in.purana.vayu.2.8.119) iyaṃ jantudhanā nāma kanyā sarvāṅgasundarī. jantavo'syā dhanāhārāstāvaśrāvayatāṃ dhanam .. 8.119 .. ### [2.8.120](https://indike.org/pramana/in.purana.vayu.2.8.120) sarvāṅgakeśī nāmnā ca kanyā jantudhanā tathā. akarṇāntāpyaromā ca kanyā brahmadhanā tu yā .. 8.120 .. ### [2.8.121](https://indike.org/pramana/in.purana.vayu.2.8.121) brahmadhanaṃ prasūtā sā dhanānāccaiva kanyakā. evaṃ piśācakanye te mithune dve prasūyatām. tayoḥ prajāvisargañca bruvato me nibodhata .. 8.121 .. ### [2.8.122](https://indike.org/pramana/in.purana.vayu.2.8.122) hetiḥ prahetirugraśca pauruṣeyo vadhastathā. visphūrjiścaiva vātaśca āpo vyāghrastathaiva ca .. 8.122 .. ### [2.8.123](https://indike.org/pramana/in.purana.vayu.2.8.123) sarpaśca rākṣasā hyete yātudhānātmajā daśa. sūryasyānucarā hyete saha tena bhramanti ca .. 8.123 .. ### [2.8.124](https://indike.org/pramana/in.purana.vayu.2.8.124) hetiputrastathā laṅkurlaṅkordvāveva cātmajau. mālyavāṃśca sumālī ca prahetitanayān śrṛṇu. prahetitanayaḥ śrīmān pulomā nāma viśrutaḥ .. 8.124 .. ### [2.8.125](https://indike.org/pramana/in.purana.vayu.2.8.125) vadhaputro nikumbhaśca krūro vai brahmarākṣasaḥ. vātaputro virāgastu āpaputrastu jambukaḥ .. 8.125 .. ### [2.8.126](https://indike.org/pramana/in.purana.vayu.2.8.126) vyāghraputro nirānando jantūnāṃ vighnakārakaḥ. ityete vai parikrāntāḥ krūrāḥ sarve tu rākṣasāḥ .. 8.126 .. ### [2.8.127](https://indike.org/pramana/in.purana.vayu.2.8.127) kīrtitā yātudhānāstu brahmadhānān nibodhata. yajñaḥ pitā dhuniḥ kṣemo brahmā pāpo'tha yajñahā .. 8.127 .. ### [2.8.128](https://indike.org/pramana/in.purana.vayu.2.8.128) svākoṭakaḥ kaliḥ sarpo brahmadhānātmajā daśa. svasāro brahmarākṣasyasteṣāñcemāḥ sudāruṇāḥ .. 8.128 .. ### [2.8.129](https://indike.org/pramana/in.purana.vayu.2.8.129) raktakarṇā mahājihvā'kṣayā caivopahāriṇī. etāsāmanvaye jātāḥ pṛthivyāṃ brahmarākṣasāḥ .. 8.129 .. ### [2.8.130](https://indike.org/pramana/in.purana.vayu.2.8.130) śleṣmātakataruṣvete prāyaśastu kṛtālayāḥ. ityete rākṣasāḥ krāntā yakṣasyāpi nibodhata .. 8.130 .. ### [2.8.131](https://indike.org/pramana/in.purana.vayu.2.8.131) cakame'psarasaṃ yakṣa pañcasthūlāṃ kratusthalīm. tāṃ lipsuścintamānaśca nandanaṃ sa cacāra ha .. 8.131 .. ### [2.8.132](https://indike.org/pramana/in.purana.vayu.2.8.132) vaibhrājaṃ surabhiñcaiva tathā caitrarathañca yat. dṛṣṭavān nandane tasminnapsarobhiḥ sahāsatīm .. 8.132 .. ### [2.8.133](https://indike.org/pramana/in.purana.vayu.2.8.133) nopāyaṃ vindate tatra tasyā lābhāya cintayan. dūṣitaḥ svena rūpeṇa karmmaṇā tena dūṣitaḥ .. 8.133 .. ### [2.8.134](https://indike.org/pramana/in.purana.vayu.2.8.134) mamodvijante bhūtāni bhayāvṛttasya sarvaśaḥ. tatkathaṃ nāma cārvaṅgīṃ prāpnuyāmahamaṅganām .. 8.134 .. ### [2.8.135](https://indike.org/pramana/in.purana.vayu.2.8.135) dṛṣṭvopāyaṃ tataḥ so'tha śīghrakārī vyavarttata. kṛtvā rūpaṃ bahumataṃ gandharvasya tu guhyakaḥ. tataḥ so'psarasāṃ madhye tāṃ jagrāha kratusthalīm .. 8.135 .. ### [2.8.136](https://indike.org/pramana/in.purana.vayu.2.8.136) buddhvā ca suruciṃ taṃ sā bhāvenaivābhyavarttata. saṃvṛtaḥ sa tayā sārddhaṃ dṛśyamāno'psarogaṇaiḥ .. 8.136 .. ### [2.8.137](https://indike.org/pramana/in.purana.vayu.2.8.137) sa tatra siddhakaraṇaḥ sadyo jātaḥ suto'sya vai . pariṇāhocchrayairyuktaḥ sadyo vṛtto jvalan śriyā .. 8.137 .. ### [2.8.138](https://indike.org/pramana/in.purana.vayu.2.8.138) rājāhamiti nābhirhi pitaraṃ so'bhyabhāṣata. tavātra jāte na bhītiḥ pitā taṃ pratyuvāca ha .. 8.138 .. ### [2.8.139](https://indike.org/pramana/in.purana.vayu.2.8.139) mātrānurūpo rūpeṇa piturvīryeṇa jāyate. jāte sa tasmin harṣeṇa svarūpaṃ pratyapadyata .. 8.139 .. ### [2.8.140](https://indike.org/pramana/in.purana.vayu.2.8.140) svabhāvaṃ pratipadyante bṛhanto yakṣarākṣasāḥ . mriyamāṇāḥ prasuptāśca kruddhā bhītāḥ praharṣitāḥ .. 8.140 .. ### [2.8.141](https://indike.org/pramana/in.purana.vayu.2.8.141) tato'bravīdapsarasaḥ smayamānaḥ sa guhyakaḥ. gṛhaṃ me gaccha suśroṇi saputrā varavarṇinī .. 8.141 .. ### [2.8.142](https://indike.org/pramana/in.purana.vayu.2.8.142) ityuktvā sahasā tañca dṛṣṭvā svaṃ rūpamāsthitam. vibhrāntāḥ prādravan bhītāḥ krodhamānā'psarogaṇāḥ .. 8.142 .. ### [2.8.143](https://indike.org/pramana/in.purana.vayu.2.8.143) gacchantīranvagacchadyā putrastāṃ sāntvayan girā. gandharvāpsarasāṃ madhyetāṃ nītvā sa nyavarttata .. 8.143 .. ### [2.8.144](https://indike.org/pramana/in.purana.vayu.2.8.144) tāñca dṛṣṭvā samutpattiṃ yakṣasyāpsarasāṃ gaṇāḥ. yakṣāṇāṃ tvaṃ janitrīti procustāṃ vai kratusthalīm .. 8.144 .. ### [2.8.145](https://indike.org/pramana/in.purana.vayu.2.8.145) jagāma saha putreṇa tato yakṣaḥ svamālayam. nyagrodharohiṇaṃ nāma guhyakā yatra śerate. tasminnivāso yakṣāṇāṃ nyagrodhaḥ sarvataḥ priyaḥ .. 8.145 .. ### [2.8.146](https://indike.org/pramana/in.purana.vayu.2.8.146) yakṣo rajatanābhastu guhyakānāṃ pitāmahaḥ. anuhrādasya daityasya bhadrāmativarāṃ sutām. upayeme sa bhadrāyāṃ yasyāṃ maṇivaro vaśī .. 8.146 .. ### [2.8.147](https://indike.org/pramana/in.purana.vayu.2.8.147) jajñe sā maṇibhadrañca śakratulyaparākramam. tayoḥ patnyau bhaginyau tu kratusthalyātmaje śubhe .. 8.147 .. ### [2.8.148](https://indike.org/pramana/in.purana.vayu.2.8.148) nāmnā puṇyajanī caiva tathā devajanī ca yā. vijajñe maṇibhadrāttu putrān puṇyajanī śubhān .. 8.148 .. ### [2.8.149](https://indike.org/pramana/in.purana.vayu.2.8.149) siddhārthaṃ sūryatejañca sumantaṃ nandanaṃ tathā. kanyakaṃ yavikñcaiva maṇidattaṃ vasuṃ tathā .. 8.149 .. ### [2.8.150](https://indike.org/pramana/in.purana.vayu.2.8.150) sarvānubhūtaṃ śaṅkhañca piṅgākṣaṃ bhīrumeva ca. tathā mandaraśobhiñca pajhaṃ candraprabhaṃ tathā .. 8.150 .. ### [2.8.151](https://indike.org/pramana/in.purana.vayu.2.8.151) maghapūrṇaṃ subhadrañca pradyotañca mahaujasam. dyutimatketumantau ca mitraṃ maulisudarśanau .. 8.151 .. ### [2.8.152](https://indike.org/pramana/in.purana.vayu.2.8.152) catvāro viṃśatiścaiva putrāḥ puṇyajanāḥ śubhāḥ . jajñire maṇibhadrasya te sarve puṇyalakṣaṇāḥ . teṣāṃ putrāśca pautrāśca yakṣā puṇyajanāḥ śubhāḥ .. 8.152 .. ### [2.8.153](https://indike.org/pramana/in.purana.vayu.2.8.153) vijajñe devajananī putrān maṇivarātmajāt . pūrṇabhadraṃ hemarathaṃ maṇimannandivarddhanau .. 8.153 .. ### [2.8.154](https://indike.org/pramana/in.purana.vayu.2.8.154) kustumburuṃ piśaṅgābhaṃ sthūlakarṇaṃ mahājayam. śvetañca vipulañcaiva puṣpavantaṃ bhayāvaham .. 8.154 .. ### [2.8.155](https://indike.org/pramana/in.purana.vayu.2.8.155) padmavarṇaṃ sunetrañca yakṣaṃ bālaṃ bakaṃ tathā. kumudaṃ kṣemakañcaiva varddhamānaṃ tathā damam .. 8.155 .. ### [2.8.156](https://indike.org/pramana/in.purana.vayu.2.8.156) padmanābhaṃ varāṅgañca suvīraṃ vijayaṃ kṛtim. pūrṇamāsaṃ hiraṇyākṣaṃ surūpañcaivamādayaḥ .. 8.156 .. ### [2.8.157](https://indike.org/pramana/in.purana.vayu.2.8.157) putrā maṇivarasyaite yakṣā vai guhyakāḥ smṛtāḥ . surūpāśca virūpāśca sragviṇaḥ priyadarśanāḥ. teṣāṃ putrāśca pautrāśca śataśo'tha sahasraśaḥ .. 8.157 .. ### [2.8.158](https://indike.org/pramana/in.purana.vayu.2.8.158) khaśāyāstvapare putrā rākṣasāḥ kāmarūpiṇaḥ . teṣāṃ yathā pradhānān vai varṇyamānānnibodhata .. 8.158 .. ### [2.8.159](https://indike.org/pramana/in.purana.vayu.2.8.159) lālāviḥ kuthano bhīmaḥ sumālī madhureva ca. visphūrjjito vidyujjihvo mātaṅgo dhūmritastatā .. 8.159 .. ### [2.8.160](https://indike.org/pramana/in.purana.vayu.2.8.160) candrārkaḥ sukaro budhnaḥ kapilomā prahāsakaḥ. krīḍaḥ paraśunābhaśca cakrākṣaśca niśācaraḥ .. 8.160 .. ### [2.8.161](https://indike.org/pramana/in.purana.vayu.2.8.161) triśirāḥ śatadaṃṣṭraśca tuṇḍakeśaśca rākṣasaḥ. yakṣaścākampanaścaiva durmukhaśca śilīmukhaḥ .. 8.161 .. ### [2.8.162](https://indike.org/pramana/in.purana.vayu.2.8.162) ityete rākṣasavarā vikrāntā gaṇarūpiṇaḥ. sarvalokacarāste tu tridaśānāṃ samakramāḥ .. 8.162 .. ### [2.8.163](https://indike.org/pramana/in.purana.vayu.2.8.163) sapta cānyā duhitarastāḥ śrṛṇudhvaṃ yathākramam. tāsāñca yaḥ prajāsargo yena cotpāditā gaṇāḥ .. 8.163 .. ### [2.8.164](https://indike.org/pramana/in.purana.vayu.2.8.164) ālambā utkacā kṛṣṇā niṛto kapilā śivā. keśinī ca mahābhāgā bhaginyaḥ sapta yāḥ smṛtāḥ .. 8.164 .. ### [2.8.165](https://indike.org/pramana/in.purana.vayu.2.8.165) tābhyo lokāmiṣādaśca hantāro yuddhadurmadāḥ. udīrṇā rākṣasagaṇā ime utpāditāḥ śubhāḥ .. 8.165 .. ### [2.8.166](https://indike.org/pramana/in.purana.vayu.2.8.166) ālambeyo gaṇaḥ krūra utkaceyo gaṇastathā. tathā kārṣṇeyaśaiveyā rākṣasā hyuttamā gaṇāḥ .. 8.166 .. ### [2.8.167](https://indike.org/pramana/in.purana.vayu.2.8.167) tathaiva naiṛto nāma tryambakānucareṇa ha. utpāditaḥ prajāsargo gaṇeśvaracareṇa tu .. 8.167 .. ### [2.8.168](https://indike.org/pramana/in.purana.vayu.2.8.168) utpāditā balavatā udīrṇā yakṣarākṣasāḥ . vikrāntāḥ śauryasampannā naiṛtā devarākṣasāḥ. yeṣāmadhipatiryukto nāmnā khyāto virūpakaḥ .. 8.168 .. ### [2.8.169](https://indike.org/pramana/in.purana.vayu.2.8.169) teṣāṃ gaṇaśatānekā uddhṛtānāṃ mahātmanām. prāyeṇānucarantyete śaṅkaraṃ jagataḥ prabhum .. 8.169 .. ### [2.8.170](https://indike.org/pramana/in.purana.vayu.2.8.170) daityarājena kumbhena mahākāyā mahātmanā .. utpāditā mahāvīryā mahābalaparākramāḥ .. 8.170 .. ### [2.8.171](https://indike.org/pramana/in.purana.vayu.2.8.171) kapileyā mahāvīryā udīrṇā daityarākṣasāḥ. kampanena ca yakṣeṇa keśinyāste pare janāḥ .. 8.171 .. ### [2.8.172](https://indike.org/pramana/in.purana.vayu.2.8.172) utpāditā mahāvātā udīrṇā yakṣarākṣasāḥ. keśinīduhituścaiva nīlāyāḥ kṣudramānasāḥ .. 8.172 .. ### [2.8.173](https://indike.org/pramana/in.purana.vayu.2.8.173) ālambeyena janitā naikāḥ surasikena hi. nailā iti samākhyātā durjayā ghoravikramāḥ .. 8.173 .. ### [2.8.174](https://indike.org/pramana/in.purana.vayu.2.8.174) caranti pṛtivīṃ kṛtsnāṃ tatra te devalaukikāḥ. bahutvāccaiva sargasya teṣāṃ vaktuṃ na śakyate .. 8.174 .. ### [2.8.175](https://indike.org/pramana/in.purana.vayu.2.8.175) tasyāstvapi ca nīlāyā vikacā nāma rākṣasī. duhitā svabhāvavikacā mandasattvaparākramā .. 8.175 .. ### [2.8.176](https://indike.org/pramana/in.purana.vayu.2.8.176) tasyā api virūpeṇa naiṛteneha ca prajāḥ. utpāditāḥ surā ghorāḥ śrṛṇu tāstvanupūrvaśaḥ .. 8.176 .. ### [2.8.177](https://indike.org/pramana/in.purana.vayu.2.8.177) daṃṣṭrākarālavikṛtā mahākarṇā mahodarāḥ. hārakā bhīṣakāścaiva tathaiva krāmakāḥ pare .. 8.177 .. ### [2.8.178](https://indike.org/pramana/in.purana.vayu.2.8.178) vainakāśca piśācāśca vāhakāḥ prāśakāḥ pare. bhūmirākṣasakā hyete mandāḥ puruṣavikramāḥ .. 8.178 .. ### [2.8.179](https://indike.org/pramana/in.purana.vayu.2.8.179) carantyadṛṣṭapūrvāśca nānākārā hyanekaśaḥ. utkṛṣṭa balasattvā ye te ca vai khecarāḥ smṛtāḥ .. 8.179 .. ### [2.8.180](https://indike.org/pramana/in.purana.vayu.2.8.180) lakṣamātreṇa cākāśaṃ svalpāḥ svalpaṃ caranti vai . etairvyāptamimaṃ lokaṃ śataśo'tha sahasraśaḥ .. 8.180 .. ### [2.8.181](https://indike.org/pramana/in.purana.vayu.2.8.181) bhūmī rākṣasakaiḥ sarvairanekaiḥ kṣudrarākṣasaiḥ. nānāprakārairākrāntā nānādeśāḥ samantataḥ .. 8.181 .. ### [2.8.182](https://indike.org/pramana/in.purana.vayu.2.8.182) samāsābhihatāśvaiva hyaṣṭau rākṣasamātaraḥ. aṣṭau vibhāgā hyeṣāṃ hi vikhyātā anupūrvaśaḥ .. 8.182 .. ### [2.8.183](https://indike.org/pramana/in.purana.vayu.2.8.183) bhadrakā nikarāḥ kecidyajñaniṣpattihetukāḥ. sahasrasatasaṅkhyātā marttyalokavicāriṇaḥ .. 8.183 .. ### [2.8.184](https://indike.org/pramana/in.purana.vayu.2.8.184) pūtanā mātṛsāmānyāstathā bhūtabhayaṅkarāḥ. bālānāṃ mānuṣe loke grahā vaimānahetukāḥ .. 8.184 .. ### [2.8.185](https://indike.org/pramana/in.purana.vayu.2.8.185) skandagrahādayaścaiva āpakāstrāsakādayaḥ. kaumārāste tu vijñeyā bālānāṃ grahavṛttayaḥ .. 8.185 .. ### [2.8.186](https://indike.org/pramana/in.purana.vayu.2.8.186) skandagrahaviśeṣāṇāṃ māyikānāṃ tathaiva ca. pūtanānāmabhūtānāṃ ye ca lokavināyakāḥ .. 8.186 .. ### [2.8.187](https://indike.org/pramana/in.purana.vayu.2.8.187) sahasraśata saṅkhyānāṃ martyalokavicāriṇām. evaṃ gaṇaśatānyeva caranti pṛthivīmimām .. 8.187 .. ### [2.8.188](https://indike.org/pramana/in.purana.vayu.2.8.188) yakṣāḥ puṇyatamā nāma tathā ye ke'pi guhyakāḥ. yakṣā devajanā ścaiva tathā puṇyajanāśca ye .. 8.188 .. ### [2.8.189](https://indike.org/pramana/in.purana.vayu.2.8.189) guhyakānāñca sarveṣāmagastyā ye ca rākṣasāḥ . paulastyā rākṣasā ye ca viśvāmitrāśca ye smṛtāḥ .. 8.189 .. ### [2.8.190](https://indike.org/pramana/in.purana.vayu.2.8.190) yakṣāṇāṃ rākṣasānāñca paulastyāgastyayaśca ye . teṣāṃ rājā mahārājaḥ kubero hyalakādhipaḥ .. 8.190 .. ### [2.8.191](https://indike.org/pramana/in.purana.vayu.2.8.191) yakṣā dṛṣṭvā pibantīha nṛṇāṃ māṃsamasṛgvasām. rakṣāṃsyanupraveśena piśācāḥ paripīḍanaiḥ .. 8.191 .. ### [2.8.192](https://indike.org/pramana/in.purana.vayu.2.8.192) sarvalakṣaṇasampannāḥ samakṣetrāśca daivataiḥ. bhāsvarā balavantaśca īśvarāḥ karāmarūpiṇaḥ .. 8.192 .. ### [2.8.193](https://indike.org/pramana/in.purana.vayu.2.8.193) anābhibhakṣā vikrāntāḥ sarvalokanamaskṛtāḥ. sūkṣmāścaujasvino medhyā varadā yajñiyāśca ye .. 8.193 .. ### [2.8.194](https://indike.org/pramana/in.purana.vayu.2.8.194) devānāṃ tulyadharmāṇāṃ hyasurāḥ sarvaśaḥ smṛtāḥ. tribhiḥ pādhaistu gandharvā devai rhīnāḥ prabhāvataḥ .. 8.194 .. ### [2.8.195](https://indike.org/pramana/in.purana.vayu.2.8.195) gandharvebhyastribhiḥ pādairhīnā vai sarvaguhyakāḥ. prabhāvatulyā yakṣāṇāṃ vijñeyāḥ sarvarākṣasāḥ. aiśvaryahīnā yakṣebhyaḥ piśācāstri guṇaṃ punaḥ .. 8.195 .. ### [2.8.196](https://indike.org/pramana/in.purana.vayu.2.8.196) evaṃ dhanena rūpeṇa āyuṣā ca balena ca. dharmaiśvaryeṇa buddhyā ca tapaḥśrutaparākramaiḥ .. 8.196 .. ### [2.8.197](https://indike.org/pramana/in.purana.vayu.2.8.197) devāsurebhyo hīyante trīn pādān vai parasparam. gandharvādyāḥ piśācāntāścatasro devayonayaḥ .. 8.197 .. ### [2.8.198](https://indike.org/pramana/in.purana.vayu.2.8.198) ..sūta uvāca.. ataḥ śrṛṇuta bhadraṃ vaḥ prajāḥ krodhavaśatmakāḥ . krodhāyāṃ kanyakā jajñe dvādaśa hyātmasambhavāḥ. tā bhāryāḥ pulahasyāsannāmatastā nibodhata .. 8.198 .. ### [2.8.199](https://indike.org/pramana/in.purana.vayu.2.8.199) mṛgī ca mṛgamandā ca haribhadrā irāvatī. bhūtā ca kapiśā daṃṣṭrā niśā tiryā tathaiva ca. śvetā caiva svarā caiva surasā ceti viśrutāḥ .. 8.199 .. _First 200 of 350 passages. [Read on](https://indike.org/pramana/in.purana.vayu.2.8)_ ## Linked texts (5) - [Brahmāṇḍapurāṇa](https://indike.org/pramana/in.purana.brahmanda.2.7.14) — Vyāsa, Sanskrit - [Critical edition (BORI)](https://indike.org/pramana/in.lit.mahabharata.harivamsa*crit.3.88) — Sanskrit - [Agnipurāṇa](https://indike.org/pramana/in.purana.agni.219.9) — Vyāsa, Sanskrit - [Brahmapurāṇa](https://indike.org/pramana/in.purana.brahma.3.99) — Vyāsa, Sanskrit - [Ṭoḍarānanda](https://indike.org/pramana/in.niti.dharma.nibandha.mahanibandha.todarananda.2.166) — Ṭoḍaramalla 1564, Sanskrit --- Source: [https://indike.org/pramana/in.purana.vayu.2.8](https://indike.org/pramana/in.purana.vayu.2.8) · Pramāṇa