[Pramāṇa](https://indike.org/pramana/) › [Indian literature](https://indike.org/pramana/in) › [Purāṇas](https://indike.org/pramana/in.purana) › [Varāhapurāṇa](https://indike.org/pramana/in.purana.varaha) › [Candikavaca](https://indike.org/pramana/in.purana.varaha.candikavaca) › 2 # Candikavaca 2 Caṇḍīkavaca 2 - **Language:** Sanskrit ### [2.1](https://indike.org/pramana/in.purana.varaha.candikavaca.2.1) iti śrīvāśāhnugrahāṣṭakaṃ saṃpūrṇam 233. caṇḍīkavacam śrīgaṇeśāya namaḥ || asya śrīcaṇḍīkavacasya brahmā ṛṣiḥ, anuṣṭup chaṃdaḥ, cāmuṇḍā devatā, aṃganyāsoktamātaro bījam, digbaṃdhadevatāstattvam, śrījagadaṃbāprītyarthe jape viniyogaḥ | oṃnamaścaṇḍikāyai| oṃ mārkaṇḍeya uvāca || oṃyadguhyaṃ paramaṃ loke sarvarakṣākaraṃ nṛṇām | yanna kasyacidākhyātaṃ tanme brūhi pitāmaha ### [2.2](https://indike.org/pramana/in.purana.varaha.candikavaca.2.2) brahmovāca || asti guhyatamaṃ vipra sarvabhūtopakārakam | devyāstu kavacaṃ puṇyaṃ tacchṛṇuṣva mahāmune ### [2.3](https://indike.org/pramana/in.purana.varaha.candikavaca.2.3) prathamaṃ śailaputrīti dvitīyaṃ brahmacāriṇī | tṛtīyaṃ candraghaṇṭeti kūṣmāṇḍeti caturthakam ### [2.4](https://indike.org/pramana/in.purana.varaha.candikavaca.2.4) paṃcamaṃ skandamāteti ṣaṣṭhaṃ kātyāyanīti ca | saptamaṃ kālarātriśca mahāgaurīti cāṣṭamam ### [2.5](https://indike.org/pramana/in.purana.varaha.candikavaca.2.5) navamaṃ siddhidātrī ca navadurgāḥ prakīrtitāḥ | uktānyetāni nāmāni brahmaṇaiva mahātmanā ### [2.6](https://indike.org/pramana/in.purana.varaha.candikavaca.2.6) agninā dahyamānastu śatrumadhye gato raṇe | viṣame durgame caiva bhayārtāḥ śaraṇaṃ gatāḥ ### [2.7](https://indike.org/pramana/in.purana.varaha.candikavaca.2.7) na teṣāṃ jāyate kiṃcidaśubhaṃ raṇasaṃkaṭe | nāpadaṃ tasya paśyāmi śokaduḥkhabhayaṃ nahi ### [2.8](https://indike.org/pramana/in.purana.varaha.candikavaca.2.8) yaistu bhaktyā smṛtā nūnaṃ teṣāṃ siddhiḥ prajāyate | pretasaṃsthā tu cāmuṇḍā vārāhī mahiṣāsanā ### [2.9](https://indike.org/pramana/in.purana.varaha.candikavaca.2.9) aindrī gajasamārūḍhā vaiṣṇavī garuḍāsanā māheśvarī vṛṣārūḍhā kaumārī śikhivāhanā ### [2.10](https://indike.org/pramana/in.purana.varaha.candikavaca.2.10) brāhmī haṃsasamārūḍhā sarvābharaṇabhūṣitā | nānābharaṇaśobhāḍhyā nānāratnopaśobhitā ### [2.11](https://indike.org/pramana/in.purana.varaha.candikavaca.2.11) dṛśyante rathamārūḍhā devyaḥ krodhasamākulāḥ | śaṃkhaṃ cakraṃ gadāṃ śaktiṃ halaṃ ca musalāyudham ### [2.12](https://indike.org/pramana/in.purana.varaha.candikavaca.2.12) kheṭakaṃ tomaraṃ caiva paraśuṃ pāśameva ca | kuntāyudhaṃ triśūlaṃ ca śārṅgamāyudhamuttamam ### [2.13](https://indike.org/pramana/in.purana.varaha.candikavaca.2.13) daityānāṃ dehanāśāya bhaktānāmabhayāya ca | dhārayantyāyudhānītthaṃ devānāṃ ca hitāya vai ### [2.14](https://indike.org/pramana/in.purana.varaha.candikavaca.2.14) mahābale mahotsāhe mahābhayavināśini | trāhi māṃ devi duṣprekṣye śatrūṇāṃ bhayavardhini ### [2.15](https://indike.org/pramana/in.purana.varaha.candikavaca.2.15) prācyāṃ rakṣatu māmaindrī āgneyyāmagnidevatā | dakṣiṇe'vatu vārāhī nairṛtyāṃ khaḍgadhāriṇī ### [2.16](https://indike.org/pramana/in.purana.varaha.candikavaca.2.16) pratīcyāṃ vāruṇī rakṣedvāyavyāṃ mṛgavāhinī | udīcyāṃ rakṣa kauberi īśānyāṃ śūladhāriṇi ### [2.17](https://indike.org/pramana/in.purana.varaha.candikavaca.2.17) ūrdhvaṃ brahmāṇī me rakṣedadhastādvaiṣṇavī tathā | evaṃ daśa diśo rakṣeccāmuṇḍā śava-vāhanā ### [2.18](https://indike.org/pramana/in.purana.varaha.candikavaca.2.18) jayā me agrataḥ sthātu vijayā sthātu pṛṣṭhataḥ | ajitā vāmapārśve tu dakṣiṇe cāparājitā ### [2.19](https://indike.org/pramana/in.purana.varaha.candikavaca.2.19) śikhāṃ me dyotinī rakṣedumā mūrdhni vyavasthitā | mālādharī lalāṭe ca bhruvau rakṣedyaśasvinī ### [2.20](https://indike.org/pramana/in.purana.varaha.candikavaca.2.20) trinetrā ca bhruvormadhye yamaghaṇṭā ca nāsike | śaṃkhinī cakṣuṣormadhye śrotrayordvāravāsinī ### [2.21](https://indike.org/pramana/in.purana.varaha.candikavaca.2.21) kapolau kālikā rakṣetkarṇamūle tu śāṃkarī | nāsikāyāṃ sugandhā ca uttaroṣṭhe ca carcikā ### [2.22](https://indike.org/pramana/in.purana.varaha.candikavaca.2.22) adhare cāmṛtakalā jihvāyāṃ ca sarasvatī | dantān rakṣatu kaumārī kaṇṭhamadhye tu caṇḍikā ### [2.23](https://indike.org/pramana/in.purana.varaha.candikavaca.2.23) ghaṇṭikāṃ citraghaṇṭā ca mahāmāyā ca tāluke | kāmākṣī cibukaṃ rakṣedvācaṃ me sarvamaṃgalā ### [2.24](https://indike.org/pramana/in.purana.varaha.candikavaca.2.24) grīvāyāṃ bhadrakālī ca pṛṣṭhavaṃśe dhanurdharī | nīlagrīvā bahiḥkaṇṭhe nalikāṃ nalakūbarī ### [2.25](https://indike.org/pramana/in.purana.varaha.candikavaca.2.25) khaḍgadhāriṇyubhau skaṃdhau vāhū me vajradhāriṇī | hastayordaṇḍinī rakṣedambikā cāṃgulīstathā ### [2.26](https://indike.org/pramana/in.purana.varaha.candikavaca.2.26) nakhāñchūleśvarī rakṣet kukṣau rakṣennaleśvarī stanau rakṣenmahālakṣmīrmanaḥśokavināśinī ### [2.27](https://indike.org/pramana/in.purana.varaha.candikavaca.2.27) hṛdaye lalitādevī udare śūladhāriṇī | nābhau ca kāminī rakṣedguhyaṃ guhyeśvarī tathā ### [2.28](https://indike.org/pramana/in.purana.varaha.candikavaca.2.28) kaṭyāṃ bhagavatī rakṣejjānunī vindhyavāsinī | bhūtanāthā ca meḍhraṃ me ūrū mahiṣavāhinī ### [2.29](https://indike.org/pramana/in.purana.varaha.candikavaca.2.29) jaṃghe mahābalā proktā sarvakāmapradāyinī | gulphayornārasiṃhī ca pādau cāmitatejasī ### [2.30](https://indike.org/pramana/in.purana.varaha.candikavaca.2.30) pādāṃgulīḥ śrīmaṃ rakṣetpādādhastalavāsinī | nakhāndaṃṣṭrākarālīṃ ca keśāṃścaivordhvakeśinī ### [2.31](https://indike.org/pramana/in.purana.varaha.candikavaca.2.31) romakūpeṣu kauberī tvacaṃ vāgīśvarī tathā | raktamajjāvasāmāṃsānyasthimedāṃsi pārvatī ### [2.32](https://indike.org/pramana/in.purana.varaha.candikavaca.2.32) antrāṇi kālarātriśca pittaṃ ca mukuṭeśvarī | padmāvatī padmakośe kaphe cūḍāmaṇistathā ### [2.33](https://indike.org/pramana/in.purana.varaha.candikavaca.2.33) jvālāmukhī nakhajvālā abhedyā sarvasaṃdhiṣu | śukraṃ brahmāṇī me rakṣecchāyāṃ chatreśvarī tathā ### [2.34](https://indike.org/pramana/in.purana.varaha.candikavaca.2.34) ahaṃkāraṃ mano buddhiṃ rakṣa me dharmacāriṇi | prāṇāpānau tathā vyānaṃ samānodānameva ca ### [2.35](https://indike.org/pramana/in.purana.varaha.candikavaca.2.35) yaśaḥ kīrtiṃ ca lakṣmīṃ ca sadā rakṣatu vaiṣṇavī | gotramindrāṇī me rakṣetpaśūnme rakṣa caṇḍike ### [2.36](https://indike.org/pramana/in.purana.varaha.candikavaca.2.36) putrān rakṣenmahālakṣmīrbhāryāṃ rakṣatu bhairavī | mārgaṃ kṣemakarī rakṣedvijayā sarvataḥ sthitā ### [2.37](https://indike.org/pramana/in.purana.varaha.candikavaca.2.37) rakṣāhīnaṃ tu yatsthānaṃ varjitaṃ kavacena tu | tatsarvaṃ rakṣa me devi jayantī pāpanāśinī ### [2.38](https://indike.org/pramana/in.purana.varaha.candikavaca.2.38) padamekaṃ na gacchettu yadīcchecchubhamātmanaḥ kavacenāvṛto nityaṃ yatra yatrādhigacchati ### [2.39](https://indike.org/pramana/in.purana.varaha.candikavaca.2.39) tatra tatrārthalābhaśca vijayaḥ sārvakāmikaḥ | yaṃ yaṃ kāmayate kāmaṃ taṃ taṃ prāpnoti niścitam ### [2.40](https://indike.org/pramana/in.purana.varaha.candikavaca.2.40) paramaiśvaryamatulaṃ prāpsyate bhūtale pumān | nirbhayo jāyate martyaḥ saṃgrāmeṣvaparājitaḥ ### [2.41](https://indike.org/pramana/in.purana.varaha.candikavaca.2.41) trailokye tu bhavetpūjyaḥ kavacenāvṛtaḥ pumān | idaṃ tu devyāḥ kavacaṃ devānāmapi durlabham ## Linked texts (4) - [Devīmāhātmya](https://indike.org/pramana/in.purana.markandeya.devimahatmya.0.8) — Sanskrit - [Saptaśatīmahāstotra](https://indike.org/pramana/in.sampradaya.general.devistotra.durga.saptasati.saptasatimahastotra.14.18) — Sanskrit - [Caṇḍīsaptasatī](https://indike.org/pramana/in.purana.upa.sakta.candisaptasati.14.18) — Sanskrit - [Devīkavacastotramantra](https://indike.org/pramana/in.sampradaya.general.devistotra.samanya.kavaca.devikavacastotramantra.18) — Sanskrit --- Source: [https://indike.org/pramana/in.purana.varaha.candikavaca.2](https://indike.org/pramana/in.purana.varaha.candikavaca.2) · Pramāṇa