[Pramāṇa](https://indike.org/pramana/) › [Indian literature](https://indike.org/pramana/in) › [Religious Traditions](https://indike.org/pramana/in.sampradaya) › [Other cults, manuals and hymns](https://indike.org/pramana/in.sampradaya.general) › [Hymns to the Goddess](https://indike.org/pramana/in.sampradaya.general.devistotra) › [Laghustutiḥ (vṛttisametā)](https://indike.org/pramana/in.sampradaya.general.devistotra.laghustuti) › [Commentary on Laghustuti](https://indike.org/pramana/in.sampradaya.general.devistotra.laghustuti!laghustutivrtti) › 243 # Laghustutih (vrittisameta) 243 Laghustutivṛtti 243 - **Language:** Sanskrit ### [243](https://indike.org/pramana/in.sampradaya.general.devistotra.laghustuti!laghustutivrtti.243) rpaṇanagaranyāyenāvirbhavanti tirobhavanti ca | tadeva ca tattvaṃ sarvabhūtānāmantarahamasmīti sadā bhāsate | athāpi svena cidānandaghanarūpeṇa na bhāsate kintu śūnyabuddhiprāṇadehatayaiva | ajño'hamiti śūnyatayā sukhyahaṃ duḥkhyahamiti buddhitayā bubhukṣuḥ pipāsurahamiti prāṇatayā sthūlo'haṃ kṛśo'hamiti dehatayā | tattvaśūnyatayā bhāne heturmāyā svenātmanā bhāne hetuḥ śuddhavidyā | tābhyāmasya bandhamokṣau māyayā bandho vidyayā mokṣaḥ | tatra svarūpānandānubhavatṛpto'pi parameśvaro yadā svātmānameva śabdārthātmakaprapañcātmanā vivartayitumicchati tadā śivaḥ tadīyā sā icchā śaktiḥ apratihatecchatvāt | tadaiva svātmani pūrvameva sadiva sahasā bhāsamānaṃ viśvamahamidamiti śuddhavidyayā svātmatayaiva paśyan sadāśivaḥ sa evedamahamiti kūpodakamadhye svadehacchāyāmiva śuddhavidyayaiva svātmanaḥ pṛthagiva paśyan īśvaraḥ tenānayoḥ padayoḥ mokṣasukhānubhūtireva | māyayātmanaḥ pṛthageva yadāsau viśvaṃ viśveśvaraṃ ca paśyati tadā puruṣaḥ | tasyaiva nityasyāpyanityatābhānahetutvena tasminneva bhāsamānaḥ kālaḥ | sarvakarturapi kiñcitkartṛtve hetuḥ kalā | sarvajñasyāpi kiñcijjñatvakāraṇamavidyā | nirañjanasyāpi viṣayābhiṣaṅgahetū rāgaḥ | sarvagatasyāpi mamedaṃ na mamedamiti niyamaheturniyatiḥ | māyayā sahitametatkālādi niyatyantaṃ kañcukaṣaṭkamiti bhāṣyate saṅkocakatvāt puruṣasya | ayaṃ ca saṅkocakramaḥ - yadā punarīśvaraḥ svasmāt pṛthagiva bhāsamānaṃ viśvaṃ svamāyayaiva prakṛtisaṃjñayā rajoguṇamavalambya mahadādikrameṇa pṛthageva karoti tadā sraṣṭā hiraṇyagarbho bhavati | tatraivāntaryāmitvena prakṛteḥ sattvaguṇamavalambyā'nupraviśya yadā niyamayati tadā viṣṇuḥ | sa eva prakṛtestamoguṇamavalambya yadā saṃharati tadā rudraḥ | evaṃ guṇatrayātmikā prakṛtiḥ | saiveśaśaktyā parākhyayā kṣubhitaguṇā kālakarmānuguṇye mahāntaṃ sṛjati | tato'hantattvam | tataḥ śabdādipañcakamākāśādipañcakamindriyadaśakamantaḥkaraṇaṃ cāhaṅkāro bhūtvā sṛjati | tatra prathamamicchājñānakriyāśaktyātmakaṃ manobuddhyahaṅkārākhyamantaḥkaraṇaṃ tato jñānakriyāsādhanāni karaṇāni tato jñeyaṃ kāryaṃ ca - [Previous: 242](https://indike.org/pramana/in.sampradaya.general.devistotra.laghustuti!laghustutivrtti.242) - [Next: 244](https://indike.org/pramana/in.sampradaya.general.devistotra.laghustuti!laghustutivrtti.244) ## Linked texts (1) - [Laghustutiḥ (vṛttisametā)](https://indike.org/pramana/in.sampradaya.general.devistotra.laghustuti.252-255) — Sanskrit --- Source: [https://indike.org/pramana/in.sampradaya.general.devistotra.laghustuti!laghustutivrtti.243](https://indike.org/pramana/in.sampradaya.general.devistotra.laghustuti!laghustutivrtti.243) · Pramāṇa