Narayanistotra (Nārāyaṇīstotra)
नारायणीस्तोत्र
- Language
- Sanskrit
- Extent
- 86 passages, 811 words
- Text
- partly digitised
- Source
- archiveorg · Markandeya Purana By Shri Panchanana Tarka Ratna Calcutta 1890 Poor Scan Jangamwadi Math Collection; ed.… · Scan of a printed edition hosted by the Internet Archive (archive.org); the ancient text is in the public…
Contents
Text
2.1
ekanavatitamo'dhyāyaḥ
ṛṣiruvāca
devyā hate tatra mahāsurendre
sendrāḥ surā vahnipurogamāstām
kātyāyanīṃ tuṣṭuvuriṣṭalambhādvikāśivaktrāstu vikāmitāśāḥ
2.2
devi prapannārttihare prasīda
prasīda mātarjagato'khilasya
prasīda viśveśvari pāhi viśvaṃ
tvamīśvarī devi carācarasya
2.3
ādhārabhūtā jagatastvamekā
mahīsvarūpeṇa yataḥ sthitāsi
apāṃ svarūpasthitayā tvayaitadāpyāyyate kṛtsnamalaṃṅghyavīryye
2.4
tvaṃ vaiṣṇavī śaktiranantavīryyā
viśvasya vījaṃ paramāsi māyā
sammohitaṃ devi samastametat
tvaṃ vai prasannā bhuvi muktihetuḥ
2.5
vidyāḥ samastāstava devi bhedāḥ
striyaḥ samastāḥ sakalā jagatsu
tvayaikayā pūritamambayaitat
kā te stutiḥ stavyaparā paroktiḥ
2.6
sarvvabhūtā yadā devī svargamuktipradāyinī !
tvaṃ stutā stutaye kā vā bhavantu paramoktayaḥ
2.7
sarvvasya buddhirūpeṇa janasya hṛdi saṃsthite
svargāpavargade devi nārāyaṇi namo'stu te
2.8
kalākāṣṭhādirūpeṇa pariṇāmapradāyinī
viśvasyoparatau śakte nārāyaṇi namo'stu te
2.9
sarvvamaṅgalamaṅgalye śive sarvvārthasādhike
śaraṇye tryambake gauri nārāyaṇi namo'stu te
2.10
sṛṣṭi-sthiti-vināśānāṃ śaktibhūte sanātani
guṇāśraye guṇamaye nārāyaṇi namo'stu te
2.12
śaraṇāgatadīnārtta-paritrāṇaparāyaṇe
sarvvasyārttihare devi nārāyaṇi namo'stu te ||11(ka)
haṃsayuktavimānasthe brahmāṇīrūpadhāriṇi
kauśāmbhaḥkṣarike devi nārāyaṇi namo'stu te
2.13
triśūlacandrāhidhare mahāvṛṣabhavāhini
māheśvarīsvarūpeṇa nārāyaṇi namo'stu te
2.14
mayūrakukkuṭavṛte mahāśaktidhare'naghe
kaumārīrūpasaṃsthāne nārāyaṇi namo'stu te
2.15
śaṅkha-cakra-gadā-śārṅga-gṛhītaparamāyudhe
prasīda vaiṣṇavīrūpe nārāyaṇi namo'stu te
2.16
gṛhītogramahācakre daṃṣṭroddhṛtavasundhare
varāharūpiṇi śive nārāyaṇi namo'stu te
2.17
nṛsiṃharūpeṇogreṇa hantuṃ daityān kṛtodyame
trailokyatrāṇasahite nārāyaṇi namo'stu te
2.18
kirīṭini mahāvajre sahasranayanojjvale
vṛtraprāṇahare cendri nārāyaṇi namo'stu te
2.16-2
śivadūtīsvarūpeṇa hatadaityamahābale
ghorarūpe mahārave nārāyaṇi namo'stu te
2.20
daṃṣṭrākarālavadane śiromālāvibhūṣaṇe
cāmuṇḍe muṇḍamathane nārāyaṇi namo'stu te
2.21
lakṣmi lajje mahāvidye śraddhe puṣṭi svadhe dhruve
mahārātri mahāvidye nārāyaṇi namo'stu te
2.22
medhe sarasvati vare bhūti bābhravi tāmasi
niyate tvaṃ prasīdeśe nārāyaṇi namo'stu te
2.23
sarvvasvarūpe sarvveśe sarvvaśaktisamanvite
bhayebhyastrāhi no devi durge devi namo'stu te
2.24
etat te vadanaṃ saumyaṃ locanatrayabhūṣitam
pātu naḥ sarvvabhūtebhyaḥ kātyāyani namo'stu te
2.25
jvālākarālamatyugramaśeṣāsurasūdanam
triśūlaṃ pātu no bhīterbhadrakāli namo'stu te
2.26
hinasti daityatejāṃsi svanenāpūryya yā jagat
sā ghaṇṭā pātu no devi pāpebhyo naḥ sutāniva
2.27
asurāsṛgvasāpaṅka-carcitaste karoñjvalaḥ
śubhāya khaṅgo bhavatu caṇḍike tvāṃ natā vayam
2.28
rogānaśeṣānapahaṃsi tuṣṭā
ruṣṭā tu kāmān sakalānabhīṣṭān
tvāmāśritānāṃ na vipannarāṇāṃ
tvāmāśritā hyāśrayatāṃ prayānti
2.29
etat kṛtaṃ yat kadanaṃ tvayādya
dharmadviṣāṃ devi mahāsurāṇām
rūpairanekairbahudhātmamūrttiṃ
kṛtvāmbike tat prakaroti kānyā
2.30
vidyāsu śāstreṣu vivekadīpeṣvādyeṣu vākyeṣu ca kā tvadanyā
mamatvagartte'timahāndhakāre
vibhrāmayatyetadatīva viśvam
2.31
rakṣāṃsi yatrograviṣāśca nāgā
yatrārayo dasyubalāni yatra
dāvānalo yatra tathābdhimadhye
tatra sthitā tvaṃ paripāsi viśvam
2.32
viśveśvari tvaṃ paripāsi viśvaṃ
viśvātmikā dhārayasīti viśvam
viśveśavandyā bhavatī bhavanti
viśvāśrayā ye tvayi bhaktinamrāḥ
2.33
devi prasīda paripālaya no'ribhīternityaṃ yathā'suravadhādadhunaiva sadyaḥ
pāpāni sarvvajagatāñca śamaṃ nayāśu
utpātapākajanitāṃśca mahopasargān
2.34
praṇatānāṃ prasīda tvaṃ devi viśvārttihāriṇi
trailokyavāsināmīḍye lokānāṃ varadā bhava
2.35
devyuvāca
varadā'haṃ suragaṇā varaṃ yaṃ manasecchatha
taṃ vṛṇudhvaṃ prayacchāmi jagatāmupakārakam
2.36
devā ūcuḥ
sarvvābādhāpraśamanaṃ trailokyasyākhileśvari
evameva tvayā kāryyamasmadvairivināśanam
2.37
devyuvāca
vaivasvate'ntare prāpte aṣṭāviṃśatime yuge
śumbho niśumbhaścaivānyāvutpatsyete mahāsurau
2.38
nandagopagṛhe jātā yaśodāgarbhasambhavā
tatastau nāśayiṣyāmi vindhyācalanivāsinī
2.39
punarapyatiraudreṇa rūpeṇa pṛthivītale
avatīryya haniṣyāmi vaipracittāṃstu dānavān
2.40
bhakṣayantyāśca tānugrān vaipracittān mahāsurān
raktā dantā bhaviṣyanti dāḍimīkusumopamāḥ
2.41
tato māṃ devatāḥ svarge martyaloke ca mānavāḥ
stuvanto vyāhariṣyanti satataṃ raktadantikām
2.42
bhūyaśca śatavārṣikyāmanāvṛṣṭyāmanambhasi
munibhiḥ saṃstutā bhūmau sambhaviṣyāmyayonilā
2.43
tataḥ śatena netrāṇāṃ nirīkṣiṣyāmi yanmunīn
kīrttayiṣyanti manujāḥ śatākṣīmiti māṃ tataḥ
2.44
tato'hamakhilaṃ lokamātmadehasamudbhavaiḥ
bhariṣyāmi surāḥ śākairāvṛṣṭeḥ prāṇadhārakaḥ
2.45
śākambharīti vikhyātiṃ tadā yāsyāmyahaṃ bhuvi
tatraiva ca vadhiṣyāmi durgamākhyaṃ mahāsuram
2.46
durgā devītivikhyātaṃ tanme nāma bhaviṣyati
punaścāhaṃ yadā bhīmaṃ rūpaṃ kṛtvā himācala
rakṣāṃsi kṣayayiṣyāmi munīnāṃ trāṇakāraṇāt
2.47
tadā māṃ munayaḥ sarvve stoṣyantyānamramūrttayaḥ
bhīmā devīti vikhyātaṃ tanme nāma bhaviṣyati
2.48
yadāruṇākhyastrailokye mahābādhāṃ kariṣyati
tadāhaṃ bhrāmaraṃ rūpaṃ kṛtvā saṅkhyeyaṣaṭpadam
2.49
trailokyasya hitārthāya vadhiṣyāmi mahāsuram
bhrāmarīti ca māṃ lokāstadā stoṣyanti sarvvataḥ
2.50
itthaṃ yadā yadā bādhā dānavotthā bhaviṣyati
tadā tadā'vatīryyāhaṃ kariṣyāmyarisaṃkṣayam
2.50.p1
iti mārkaṇḍeye mahāpurāṇe sāvarṇike manvantare devīmāhātmye devyāḥ stutirnāmrakanavatitamo'dhyāyaḥ
3.1
dvinavatitamo'dhyāyaḥ
devyuvāca
ebhistavaiśca māṃ nityaṃ stoṣyate yaḥ samāhitaḥ
tasyāhaṃ sakalāṃ bādhāṃ śamayiṣyāmyasaṃśayam
3.2
madhukaiṭabhanāśañca mahiṣāsuraghātanam
kīrttayiṣyanti ye tadvadvadhaṃ śumbha-niśumbhayoḥ
3.3
aṣṭamyāñca caturddaśyāṃ navamyāñcaikacetasaḥ
śroṣyanti caiva ye bhaktyā mama māhātmyamuttamam
3.4
na teṣāṃ duṣkṛtaṃ kiñcidduṣkṛtotthā na cāpadaḥ
bhaviṣyati na dāridryaṃ na caiveṣṭaviyojanam
3.5
śatruto na bhayaṃ tasya dasyuto vā na rājataḥ
na śastrāvalatoyaughāt kadācit sambhaviṣyati
3.6
tasmānmamaitanmāhātmyaṃ paṭhitavyaṃ samāhitaiḥ
śrotavyañca sadā bhaktyā paraṃ svastyayanaṃ hi tat
3.7
upasargānaśeṣāṃstu mahāmārīsamudbhavān
tathā trividhamutpātaṃ māhātmyaṃ śamayenmama
3.8
yatraitatpaṭhyate samyaṅnityamāyatane mama
sadā na tadvimokṣyāmi sannidhaṃ tatra me sthitam
3.9
balipradāne pūjāyāmagnikārye mahotsave
sarvvaṃ mamaitaccaritamuccāryyaṃ śrāvyameva ca
3.10
jānatā'jānatā vāpi balipūjāṃ tathā kṛtām
pratīcchiṣyāmyahaṃ prītyā vahnihomaṃ tathā kṛtam
3.11
śaratkāle mahāpūjā kriyate yā ca vārṣikī
tasyāṃ mamaitanmāhātmyaṃ śrutvā bhaktisamanvitaḥ
3.12
sarvvābādhāvinirmukto dhanadhānyasutānvitaḥ
manuṣyo matprasādena bhaviṣyati na saṃśayaḥ
3.13
śrutvā mamaitanmāhātmyaṃ tathācotpattayaḥ śubhāḥ
parākramañca yuddheṣu jāyate nirbhayaḥ pumān
3.14
ripavaḥ saṃkṣayaṃ yānti kalyāṇañcopapadyate
nandate ca kulaṃ puṃsāṃ māhātmyaṃ mama śṛṇvatām
3.15
śāntikarmaṇi sarvvatra tathā duḥsvapnadarśane
grahapīḍāsu cogrāsu māhātmyaṃ śṛṇuyānmama
3.16
upasargāḥ śamaṃ yānti grahapīḍāśca dāruṇāḥ
duḥsvapnañca nṛbhirdṛṣṭaṃ susvapnamupajāyate
3.17
bālagrahābhibhūtānāṃ bālānāṃ śāntikārakam
saṅghātabhede ca nṛṇāṃ maitrīkaraṇamuttamam
3.18
durvṛttānāmaśeṣāṇāṃ balahānikaraṃ param
rakṣo-bhūta-piśācānāṃ paṭhanādeva nāśanam
3.19
sarvvaṃ mamaitanmāhātmyaṃ mama sannidhikārakam
paśu-puṣpārghya-dhūpaiśca gandhadīpaistathottamaiḥ
3.20
viprāṇāṃ bhojanairhomaiḥ prokṣaṇīyairaharniśam
anyaiśca vividhairbhogaiḥ pradānairvatsareṇa yā
3.21
prītirme kriyate sāsmin sakṛt sucarite śrute
śrutaṃ harati pāpāni tathārogyaṃ prayacchati
3.22
rakṣāṃ karoti bhūtebhyo janmano kīrttanaṃ mama
3.23
yuddheṣu caritaṃ yanme duṣṭadaityanibarhaṇam
tasmin śrute vairikṛtaṃ bhayaṃ puṃsāṃ na jāyate
3.24
yuṣmābhiḥ stutayo yāśca yāśca brahmarṣibhiḥ kṛtāḥ
brahmaṇā ca kṛtāstāstu prayacchanti śubhāṃ matim
3.25
araṇye prāntare vāpi dāvāgniparivāritaḥ
dasyubhirvā vṛtaḥ śūnye gṛhīto vāpi śatrubhiḥ
3.26
siṃha-vyāghrānuyāto vā vane vā vanahastibhiḥ
rājñā kruddhena cājñāpto vadhyo bandhagato'pi vā
3.27
āghūrṇito vā vātena sthitaḥ pote mahārṇave
patatsu vāpi śastreṣu saṃgrāme bhṛśadāruṇe
3.28
sarvvābādhāsu ghorāsu vedanābhyardito'pi vā
smaran mamaitaccaritaṃ naro mucyeta saṅkaṭāt
3.29
mama prabhāvāt siṃhādyā dasyavo vairiṇastathā
dūrādeva palāyante smarataścaritaṃ mama
3.30
ṛṣiruvāca
ityuktvā sā bhagavatī caṇḍikā caṇḍavikramā
paśyatāmeva devānāṃ tatraivāntaradhīyata
3.31
te'pi devā nirātaṅkāḥ svādhikārān yathā purā
yajñabhāgabhujaḥ sarvve cakrurvinihatārayaḥ
3.32
daityāśca devyā nihate śumbhe devaripau yudhi
jagadvidhvaṃsini tasmin mahogre'tulavikrame
3.33
niśumbhe ca mahāvīryye śeṣāḥ pātālamāyayuḥ
3.34
evaṃ bhagavatī devī sā nityāpi punaḥ punaḥ
sambhūya kurute bhūpa jagataḥ paripālanam
3.35
tayaitanmohyate viśvaṃ saiva viśvaṃ prasūyate
sā yācitā ca vijñānaṃ tuṣṭā ṛddhiṃ prayacchati
3.36
vyāptaṃ tayaitat sakalaṃ brahmāṇḍaṃ manujeśvara
mahākālyā mahākāle mahāmārīsvarūpayā