Taravalistuti 2
Tārāvalīstuti 2
- Language
- Sanskrit
2.1
iti śrītattvāryāstavaḥ saṃpūrṇaḥ
aśvati nigamacatuṣke viśvasṛjākalitasārathyam
bhūrathamārūḍho yastripuraṃ bhasitaṃ cakāra hasitena
2.2
ābharaṇīkṛtabhujagaṃ sebhamukhaskandaśailarājasutam
tamahamajasraṃ kalaye himaruciśakalollasacchirasamantaḥ
2.3
gajakṛttikā paṭīyati bhujagapatiḥ kaṅkaṇāyate yasya
sa jalajabhavanapramukhaiḥ sṛjatādamaraiḥ stuto mama śreyaḥ
2.4
kalayāmi rohiṇīpatikalayā lasamānamastakaṃ hṛdaye
adhivaṭatarumūlataṭaṃ racitanivāsaṃ śivāsametaṃ tam
2.5
karajalaruhatala gaṅgāvilasanmṛgaśīrṣamakhilalokagurum
munijanamadhukaranikaraśrīparṇaṃ taṃ bhaje sahāparṇam
2.6
kopāddagdhasyāpi smarasya punaratanujīvitamadādyā
karuṇāmṛtalaharībhiḥ pāyādārdrā śivasya sā dṛṣṭiḥ
2.7
tanayaṃ punarvasuvato vidrāvayatā vyarāci munisūnoḥ
yenaiva bhītiśamanaṃ tatpadapaṅkeruhaṃ bhaje śaṃbhoḥ
2.8
śātakratavaśilābhāghaṭitatanurbhāti yadvapuṣyambā
kālī sārvadikakṣaṇarucicayayukteva taṃ smarāmi śivam
2.9
vakṣojabhāravijitakṣmādharaneturjaganmātuḥ
āśleṣānnāmānatavāmatanuḥ kāpi devatā pāyāt
2.10
saśatamakhaṃ nirjarasāṃ bṛndaṃ pādāravindaṣaṭpadatām
yasya darīdharti sadāśivaṃ tamantaścarīkarmi
2.11
śirasā gaṅgāpūraṃ pūrayituṃ bhaktavāñchitamadhādyaḥ
tāpasamānasasārasasavitā savitaiva me gatirjagatām
2.12
vittapatidattasakhyo'pyāttasumattadvipendrakṛttipaṭaḥ
līlānṛttapaṭurmama muttatilaharīṃ samuttaraṅgayatāt
2.13
mastakalsadindukalaṃ samastakamalāsanādivibudhanutam
cinmudrāñcitahastaṃ vastu kimapyāvirastu mama manasi
2.14
savyāpasavyatanujaṭābhimiśritā yadākṛtirbhāti
yamunāsarasvatībhyāṃ sahitā gaṅgeva māṃ śivaḥ so'vyāt
2.15
śaṃkara karuṇānidhe mama kṣamasvātimātramaparādhān
prīṇaya māmiti satataṃ vadatāṃ dhanyatvato bhaje tamaham
2.16
gajavadanaṃ ca viśākhaṃ pārśvayuge'gre ca nandinaṃ dadhatam
suravaiṇikopagītaṃ karavai smaravairiṇaṃ manasi sāmbam
2.17
tanurahitīkṛtamadano'pyanumanute smākhilasya kartā yaḥ
anuṣaṅgamaṅgake nagajanuṣastanutāṃ śivaḥ śivaṃ sa mama
2.18
prāpyānugrahamamarajyeṣṭhāmbhojākṣaśaṃkarā yasya
jananāvanasaṃhṛtiṣu prabhavanti śivākhyamastu vastu mude
2.19
yo'laṃkaroti vaṭatarumūlaṃ munivṛndavanditapadāmbjaḥ
ālambe caraṇāhatakālaṃ tamahaṃ sadāśivaṃ śaraṇam
2.20
āpū rāḍambujabhavamukhā makhāśā halāhalāt trastāḥ
śaraṇaṃ yameva caraṇaṃ tasya bhaje bhuktimuktikaraṇamaham
2.21
hṛdaya na samupāsyantāṃ dhanottarāḍambhaśālino bhavatā
kiṃ taiḥ samupāsyeta sa yadyekaḥ śaṃkaraḥ prabhurjagatām
2.22
śaṃkaraguṇagaṇavarṇanadhanyatamānāṃ purāṇavacanānām
tanutamabhaktestanutāṃ śravaṇe śravaṇe kṛtāghasaṃharaṇe
2.23
ayi mūtramiśraviṣṭhākulajananījaṭharapiṭharavāsantrīm
tvayi citta bhajati bhaktiṃ śaṃkaracaraṇe bhavet kathaṃ śokaḥ
2.24
śatabhiṣagadhipaparīto'pyantakavaśa eva hanta hi jano'nte
iti saṃcintya mano yadi bhavaṃ bhavaghnaṃ bhajerbhaved bhavikam
2.25
pūraṅgādibhirañcitasaudhāsau dhāturājñayātreti
dhāvaṃdhāvamalamalaṃ gacchatamaṅgrī varāṇasī [kṣetram ]
2.26
nyagrodhamūlabhavanaṃ samāśraye mugdhaśaśicūḍam
cinmudrayāñcitakaraṃ paramaṃ vācaḥ paraṃ vyoma