Bhutadamara 1
Bhūtaḍāmara 1
- Language
- Sanskrit
Contents
- 1.11 — 1 part
1.1
prathamaṃ paṭalam
oṃ namaḥ krodhabhairavāya
vyomavaktraṃ mahākāyaṃ pralayāgnisamaprabham
abhedyabhedakaṃ staumi bhūtaḍāmaranāmakam
1.2
trailokyādhipatiṃ raudraṃ surasiddhanamaskṛtam
unmattabhairavaṃ natvā pṛcchatyunmattabhairavī
1.3
bhairavyuvāca
kathaṃ yakṣā narā nāgāḥ kinnarā pramathādayaḥ
jambūdvīpe kalau siddhiṃ yacchantyetā varāṅganāḥ
1.4
ye'nye pāparatāḥ mithyāvādinaḥ śīlavarjitāḥ
sālasyāḥ puruṣāsteṣāṃ sāhāyyaṃ kuru tvaṃ svayam
1.5
kenopāyena naśyanti kalau duṣṭāgharāśayaḥ
labhyante siddhayaḥ sarvā mokṣapaddhatayaḥ śubhāḥ
siddhayo'pyaṇimādyāśca mahāpātakanāśikā
1.6
anyānnāśanataḥ pāpamanyastrīgamanādijam
kathaṃ naśyanti deveśa ! helayā narakaṃ tamaḥ
1.7
candrasūryaprabho bhūtvā tiṣṭhedrudrapure ciram
surasiddhasarpabhūtayakṣaguhyakanāyikāḥ
1.8
dūrādāgatya kāmārtā balādāliṅgayanti kam
brahmeśajiṣṇupramukhā māritā vā kathaṃ prabho !
punaḥ kena prakāreṇa mṛtā jīvanti nirjarāḥ
1.9
śrutvaitadvallabhāvākyamunmattabhairavo'sakṛt
santuṣṭo bhairavīṃ prāha sarvaṃ vinayapūrvakam
1.10
unmattabhairava uvāca
krodhādhipaṃ vyomavaktraṃ vajrapāṇiṃ surāntakam
vakṣye natvā tatastatra bhūpati bhūtaḍāmaram
sarvāpāpakṣayakaraṃ duḥkhadāridryaghātakam
sarvarogakṣayakaraṃ sarvavighnavināśanam
mahāprabhāvajanamaṃ damanaṃ duṣṭacetasām
mahācamatkārakaraṃ siddhyaśyutpattilayātmakam
jñānamātreṇa deveśi ! bhuktimuktiphalapradam
1.11
tava snehānmahādeva ! kathyate'kathyamadbhutam
yat surairdurlabhaṃ svarge martye martyemumukṣubhiḥ
nāgaloke tathā nāgaistacchṛṇuṣva mama priye !
yasya jñānaṃ vinā kvāpi nārīṇāṃ nigraho bhavet
yakṣiṇyo naiva gacchanti siddhimiṣṭāṃ śrṛṇuṣva tat
1.11.p1
iti bhūtaḍāmare mahātantre prathamaṃ paṭalam
Linked texts (1)
- Ḍāmaratantra — Sanskrit