Bhutadamara 5
Bhūtaḍāmara 5
- Language
- Sanskrit
Contents
- 5.23 — 1 part
5.1
unmattabhairavyuvāca
bhagavan ! sarvabhūteśa ! pramathādyairnamaskṛta !
yadi tuṣṭo'si deveśa ! caṇḍakātyāyinīṃ vada
caṇḍakātyāyanī raudrī bhūtinī yā prakīrtitā
manuṃ tasyāḥ pravakṣyāmi natvā krodhādhipaṃ punaḥ
bījaṃ hālāhalaṃ kūrcanetramantradvayaṃ śivaḥ
surakātyāyanīmantramīritaścātidurlabham
5.2
viṣaṃ kālaṃ vadedbījaṃ jvālāntaṃ kūrcasaṃjñitam
astrā'nto'yaṃ mayā prokto mahākātyāyanīmanuḥ
5.3
viṣādraudrayugaṃ kālayugmaṃ hālāhalastataḥ
cāmuṇḍāliṅgitaṃ vyomadvayaṃ mantradvayaṃ śivaḥ
raudrakātyāyanī proktā sarvasiddhipradāyinī
5.4
ādibījaṃ samuddhṛtya tato rudrabhayaṃkari
aṭṭāṭṭahāsini sādhakapriye padamuddharet
mahāvicitrarūpakari suvarṇahaste tataḥ
yamanikṛntani padaṃ sarveduḥkhapadantataḥ
praśamani padamuccārya trividhaṃ huṃ catuṣṭayam
tataḥ śīghraśca siddhi me prayaccheti padaṃ tataḥ
raudrabījaṃ visargāḍhyaṃ tataśca vahnisundarī
caṇḍakātyāyanī proktā mahābhūteśvarīmanuḥ
proktābhīṣṭapradā loke jambūdvīpe kalau yuge
5.5
hālāhalaṃ samuddhṛtya tato yamanikṛntani
akālamṛtyunāśinīti khaḍgatriśūlahaste
tataḥ śīghrapadaṃ procya siddhiṃ me dehi bhoḥ padam
sādhakaṃ samājñāpaya bījaṃ prāthamikaṃ tataḥ
dviṣṭhānto'yaṃ mayā prokto vajrakātyāyanīmanuḥ
5.6
pañcaraśmiṃ samuddhṛtya hemakuṇḍalinīpadam
dhīradvayaṃ jvalayugaṃ tato divyamahāpadam
kuṇḍalavibhūṣite padaṃ vāraṇamathinīti ca
bhagavannājñāpayasi ca śivo'ntamanumuddharet
iti kuṇḍalapūrveśca proktaḥ kātyāyanīmanuḥ
5.7
viṣamuddhṛtya dvikuṭīdviṭhaḥ kuṭyayugaṃ tataḥ
dhīrayugmaṃ jvalayugaṃ svāhā kulamukhī tataḥ
gaccha vetāla upari aniśampādataḥ punaḥ
kuṇḍaladvayamataḥ pāśadvayaṃ bhagavan padam
ājñāpaya tato raudraṃ savisargaṃ samuddharet
vahnipriyāntaḥ kathito jayakātyāyanīmanuḥ
5.8
viṣamuddhṛtyāpi suratapriye divyalocani
kāmeśvari jaganmohini tataśca subhage padam
tataḥ kāñcanamāleti bhūṣaṇīti padaṃ vadet
tato nūpuraśabdena praviśadvayamuddharet
tataḥ puradvayaṃ sādhakapriye padamuddharet
ādibījaṃ visargāḍhyaṃ śivo'nto bhūtinīmanuḥ
5.9
viṣaṃ mātṛpadād bhrātṛmadbhaginīpadaṃ kramāt
tataḥ kaṭudvayaṃ proktaṃ jayayugmaṃ samuddharet
sarvāsurapadāt pretapūjite samudīrayet
hālāhalaṃ vyomavaktraṃ savisargaṃ samuddharet
vahnijāyānta utko'o śubhakātyāyanīmanuḥ
5.10
iyaṃ kātyāyanī vidyā smṛtā siddhipradāyinī
asyā mudrāvidhiṃ vakṣye bhūtinīsiddhidāyakam
5.11
muṣṭimanyonyamāsthāyāṅgulīnāveṣṭya tatparam
prasāryākuśvayettatra tarjanīṃ siddhimāpnuyāt
dehe mantre ca siddhe ca manāvākarṣakarmaṇi
bhūtinīṃ karṣayet krodhamantrayogasahasrakam
juhuyādyaścatāṃ yāti bhūtinī nātra saṃśayaḥ
śraddhābhaktiyuto'nena mantreṇāvāhyedamum
surakātyāyanī mudrā hyasādhyārthapradāyinī
5.12
muṣṭiṃ vidhāya cānyonyaṃ kuñcayettarjanīdvayam
iyaṃ kātyāyanī mudrā bhūtinī sarvasiddhidā
5.13
asyā eva tu mudrāyā madhyame mukhasaṅgate
kaniṣṭhe dve niveśyātha nirdiṣṭā sādhakapriyā
kulabhūteśvarīmudrā bhūtinī kulavāsinī
anayā baddhayā śīghraṃ siddhi yacchati bhūtinī
5.14
muṣṭidvayaṃ pṛthakkṛtvā tarjanīśca prasārayet
bhadrakātyāyanīmudrā vāñchitārthapradāyinī
5.15
ubhe muṣṭī vidhāyātha veṣṭayettarjanīdvayam
kulakātyāyanī mudrā bhūtinīrakṣaṇakṣamā
khyāteyaṃ caṇḍapūrvāyā jayamukhyārthasādhinī
drāviṇī kulagotrāṇāṃ sarvabhūtabhayaṅkarī
5.16
baddhvā muṣṭiṃ tato'nyo'nyaṃ kaniṣṭhe veṣṭayedubhe
prasāryebhi ca tarjanyau prakuryāt kuṇḍalākṛtī
trailokyākarṣiṇī mudrā'javiṣṇurudrasādhinī
ki punaḥ sarvabhūtinyāḥ siddhirasyāḥ prasādataḥ
śubhakātyāyanī mudrā prokteyaṃ vajrapāṇinā
pūjitā gandhapuṣpādyairmatsyamāṃsādibhistathā
siddhi yāsyanti bhūtinyo dāsyatāṃ yānti tatkṣaṇāt
5.17
atha vakṣye daridrāṇāṃ hitāya krodhabhūpatim
bhūtakātyāyanīsiddhisādhanaṃ paramādbhutam
pitṛbhūmau śyahaṃ sthitvā japedaṣṭasahasrakam
bhūtakātyāyanī devī śīghramāyāti sannidhim
raktapūrṇakapālena bhaktito'rghyaṃ pradāpayet
kiṅkaromi vadettuṣṭā bhava māteti sādhakaḥ
rājyaṃ dadāti bhogyañca sarvāśāḥ pūrayatyapi
pālayenmātṛvat pañcasahasrābdāni jīvati
mṛte rājakule janma nānyathā krodhabhāṣitam
5.18
vajrapāṇigṛhaṃ gatvā japedaṣṭasahasrakam
krodharājaṃ namaskṛtya divā kuryāt puraskriyām
tato rātrāvekaliṅgaṃ gatvā sampūjya bhaktitaḥ
japedaṣṭasahasrantu divyapuṣpapradānataḥ
yacchati prārthitaṃ devī krodhabhūpaprasādataḥ
5.19
gatvaikaliṅgaṃ yāminyāṃ japedaṣṭasahasrakam
mañjīraśabditaṃ tatra śrūyate prathame dine
dṛśyate ca dvitīye'hni draṣṭavyā na ca bhāṣate
vakti tṛtīye sā vācaṃ kimicchasi vada sphuṭam
bhavopasthāpikā yāvajjīvamityāha sādhakaḥ
dhanānyānīya divyāṃ strīṃ kanyāṃ rājāṅganāmapi
sumeruśrṛṅgaṃ nayati pṛṣṭhamāropya jīvati
sahasrārddhañca varṣāṇāṃ janma rājakule punaḥ
5.20
nīcagāsaṅgamaṃ gatvā japedaṣṭasahasrakam
parivārānvitā divyaṃ bhūtinyāyāti saṃnidhim
āgatā mantritā tu strībhāvenāpi ca kāmitā
upasthāyī bhavennityaṃ dīnāradvayadāyinī
gatvodyānañca yāminyāṃ japedaṣṭasahasrakam
dināni trīṇi mañjīraśabdasya śravaṇaṃ bhavet
caturthe dṛśyate devī pañcame dṛśyate punaḥ
ṣaṣṭhasaṅkhyādine pañca dīnārāṇi prayacchati
saptame'hni śivasthāne vidhāya maṇḍalaṃ śubham
dhūpañca gugguluṃ dattvā japedaṣṭasahasrakam
bhūtinī kanyakāgatya gṛhaṃ svāgatamācaret
kāmitā sā bhavedbhāryā pratyahaṃ ratimācaret
muktāhāraṃ parityajya śayane yāti nityaśaḥ
gahītavyaṃ na taddhāraṃ grahaṇābhāvato'pi ca
pañcaviṃśatidīnāraṃ vastradvayamanuttamam
śatruṃ nāśayate śīghraṃ sahasrāyuḥ karoti ca
mṛte rājakule janma sādhakasya na saṃśayaḥ
5.21
vajrapāṇigṛhaṃ gatvā japedaṣṭasahasrakam
anyaṃ devālayaṃ gatvā japedaṣṭasahasrakam
punarātrau japedaṣṭasahasraṃ cyahameva ca
śatāṣṭaparivārāḍhyā śīghramāyāti bhūtinī
satoyacandanārghyeṇa tuṣṭā yacchati kāmikam
parivāraśatānyaṣṭavastrālaṅkārabhūṣaṇaiḥ
rasai rasāyanaṃ pañcasahasrābdāni jīvati
mṛte rājakule janma bhavet krodhaprasādataḥ
5.22
vajrapāṇigṛhaṃ gatvā japedaṣṭasahasrakam
pūrvasevā bhavedasyāḥ puraścaraṇapūrvikā
dvitīyāyāṃ samārabhya caturthyantu samāpayet
rātriyoge ca pañcamyāṃ hunedaṣṭasahasrakam
karavīrabhavairvaillau dadhikṣaudraghṛtānvitaiḥ
mālatīkusumairaṣṭasahasraikaṃ śatadvayam
sahasrārdhasahāyāḍhyā mahābhūteśvarī drutam
eti nūpuraśabdena deyo'rghyaḥ puṣpavāriṇā
jananī bhaginī bhāryā svecchayā kāmitā bhavet
mātā svarṇācalaḍkāraṃ bhojanañca prayacchati
bhaginī striyamānīya rājyaṃ yacchati kāmikam
divyarūpā bhavedbhāryā sarvāśāḥ pūrayatyapi
dadāti bhojanañcāyurdaśavarṣasahasrakam
mṛte rājakule janma vajrapāṇiprasādataḥ
ayutaṃ hi japenmantraṃ paurṇamāsyāṃ puraṣkriyā
rātrau devālayaṃ gatvā dvārapūjāṃ vidhāya ca
sakalāṃ prajapedrātriṃ prātarāgacchati dhruvam
dattvārghyaṃ rudhireṇaiva tuṣṭā bhavati kiṅkarī
pratyahaṃ bhojanaṃ pañca dīnārāṇi prayacchati
śatamekaṃ pañcavarṣaṃ jīvatīti na saṃśayaḥ
5.23
viṣabījaṃ tato varma toyaghnaśca samuddharet
māṃsaṃ me padamābhāṣya prayacchānalavallabhā
rātrau pitṛbhuvaṃ gatvā japedaṣṭasahasrakam
piśitākarṣiṇī devī siddhā bhavati niścitam
nītvā māṃsapalānyaṣṭau vilokya ca caturdiśam
yoṣidbrahmasvarūpeṇa purastiṣṭhati bhūtinī
tato māṃsaṃ pradātavyaṃ bhuktvā māṃsaṃ prayacchati
māṃsādānena mriyate akṣi-kukṣiḥ sphuṭatyapi
5.23.p1
iti bhūtaḍāmaramahātantre'ṣṭakātyāyanīsādhanaṃ nāma pañcamaṃ paṭalam