Bhutadamara 6
Bhūtaḍāmara 6
- Language
- Sanskrit
Contents
- 6.50 — 1 part
6.1
ṣaṣṭhaṃ paṭalam
unmattabhairavyuvāca
surāsurajagadvandya ! jagatāmupakāraka !
śrīmahāmaṇḍalaṃ brūhi sarvasiddhipradāyakam
unmattabhairava uvāca
vidyādharo'psaroyakṣapretagandharvakinnaraiḥ
mahoragaiḥ parivṛto mahādevastrilocanaḥ
krodhaṃ pradakṣiṇīkṛtya namaskṛtya punaḥ punaḥ
pādau śiro vidhāyātha bhāṣate krodhabhūpatim
krodhīśa ! tvaṃ mahābhūtaduṣṭagrahavimardaka !
kaṭapūtanavetālakleśavighnavighātaka !
prasīda devadeveśa ! saṃsārārṇavatāraka !
paścime samaye prāpte jambūdvīpe kalau yuge
martyānāmupakārārthaṃ duṣṭadurjananigraham
bhūtinīyakṣiṇīnāgakanyakāsādhanaṃ vada
bodhisattvo mahādevaṃ sādhu sādhvīti pūjayan
mahāmaṇḍalamākhyātaṃ suvyaktaṃ surapādapam
6.2
athātaḥ sampravakṣyāmi mahāmaṇḍalamuttamam
caturasraṃ caturdvāraṃ catuṣkoṇavibhūṣitam
dalaiḥ ṣoḍaśabhiryuktaṃ vapraprākāraśobhitam
tatra madhye nyasedbhīmaṃ tato jvālāsamākulam
sāṭṭahāsaṃ mahāraudraṃ bhinnāñjanacayopamam
pratyālīḍhaṃ caturbāhuṃ dakṣiṇe vajradhāriṇam
tarjanīṃ vāmahastena tīkṣṇadaṃṣṭrāṃ karālinam
kapālaratnamukuṭaṃ trailokyasyārināśanam
ādityakoṭisaṅkāśamaṣṭanāgavibhūṣitam
aparājitapadākrāntaṃ mudrābandhena tiṣṭhati
anāmikādvayaṃ veṣṭya ākuñcya tarjanīdvayam
kaniṣṭhāṃ madhyamāñcaiva jyeṣṭhāṅguṣṭhena ca kramāt
evaṃ mudrādharaḥ śrīmān trailokyasādhyasādhakaḥ
umāpatiṃ likhet krodhapūrve viṣṇuñca dakṣiṇe
rakṣodevaṃ paścime tu kārttikeyaṃ tathottare
īśāne ca gaṇādhīśamādityaṃ vahnisaṃsthitam
nairṛte tu likhedrāhuṃ vāyukoṇe naṭeśvaram
candraṃ sampūjayedbhame krodharājasya bhūpateḥ
prabhādevīṃ suvarṇābhāṃ sarvālaṅkārabhaṣitam
īṣaddhasitavadanāṃ krodhavāme sadā likhet
krodhāgre puṣpahastāñca śrīdevīṃ paribhāvayet
sālaṅkārāṃ dhūpahastāṃ krodhadakṣe tilottamām
krodhasya pṛṣṭhabhāge ca dīpahastāmalaṅkṛtām
divyarūpāṃ śaśīṃ devīṃ dvijarājamukhīṃ tathā
āgneyyāñca nyasedbhadrāṃ divyakuṇḍalamaṇḍitām
gṛhītagandhahastāñca ratnabhūṣaṇabhūṣitam
vinyaseddakṣaḥ koṣṭhāyāṃ vīṇāyuktāṃ sarasvatīm
vāyavyāṃ yakṣiṇīṃ ratnamālāḍhacāṃ surasundarīm
īśāne ca viśālākṣīṃ sarvālaṅkārabhūṣitām
rūpayauvanasampannāṃ svarṇavarṇāṃ samālikhet
indro vahniyamo rakṣo varuṇo vāyureva ca
kuberaśca śaśīśānau bāhyaprācādimaṇḍale
6.3
atha dīkṣāvidhiṃ vakṣye prāṇināṃ duritāpaham
krodhamudrādharaṃ śiṣyaṃ nīlavastrayugena ca
chāditaṃ krodhagaṃ cittaṃ gururmantraṃ niśāmayet
6.4
atha krodhamanuṃ vakṣye hyasādhyaṃ yena sidhyati
bījaṃ hālāhalaṃ gṛhya kuṃ kroṃ bījamataḥ param
bhayaṅkarāraṇamābhāṣya sitāṅgaṃ kṣatajaṃ sthitam
pralayāgnimahājvālāmābhāṣya manumuddharet
evamuccārite krodhaḥ svayameva pravekṣyati
baddhvā tu krodhanīṃ mudrāṃ śirasyāsye ca vakṣasi
svayaṃ vajradharo bhūtvā tāvattiṣṭha dvayaṃ punaḥ
ābhāṣya pātayettoyaṃ vajradeho bhavennaraḥ
6.5
visargāt praviśa krodhakūrcayugamudīrayet
viśedanena mantreṇa krodhanābhyarcayet tridhā
nīlavastraṃ parityajya darśayet kuladevatām
tato'bhiṣecanārthañca mudrāmantraṃ jale kṣipet
tenābhiṣiñcitaḥ śiṣyo guruṃ santoṣayettataḥ
6.6
athātaḥ sampravakṣyāmi krodhamantrasya sādhanam
yena sādhitamātreṇa siddhiḥ sarvavidhā bhavet
dhūtvā hastadvayenāsau bhāvayeccandramaṇḍalam
viṣaṃ bhayaṅkaraṃ bījaṃ jvālāmālākulaṃ hṛdi
dhyātvā japedamuṃ mantraṃ vakṣyamāṇaṃ śṛṇuṣva tat
viṣaṃ hanayugaṃ gṛhya vidhvaṃsaya dvayānvitam
nāśayeti tataḥ pāpaṃ kālamantrānvito manuḥ
śūnyaṃ svamantaraṃ cintyaṃ hṛdayaṃ krodhamaṇḍitam
jvālāmālākulaṃ tasya madhye dhyāyennirañjanam
anena krodhamantreṇa cintayet krodhabhūpatim
tārāt krodhāveśayāveśaya kūrcānvitaṃ manum
sañcintya vajrapāṇiñca krodhādhīśaṃ smaredbudhaḥ
hālāhalālikhedvajraṃ krodhāveśaṃ praśāmaya
kālabījāntamuccārya cintayecca svadevatām
tatastu krodhamantreṇa ṣaḍaṅganyāsamācaret
viṣaṃ vajrayutaṃ bodhimahākālaṃ nyaseddhṛdi
viṣaṃ hanayugaṃ vajraṃ kūrcādhiṃ vinyaset śire
hālāhalaṃ dahayugaṃ vajraṃ kālaṃ nyaset śikhām
ṣaṣṭhaṃ paṭalam 35
viṣamantrayutaṃ vajramantraśca kavacaṃ nyaset
tāraṃ dīptayutaṃ vajraṃ mahākālaśca netrayoḥ
viṣaṃ hanayugaṃ gṛhya dahayugmapadānvitam
krodhavajrapadaṃ tadvat sarvaduṣṭānataḥ param
tato māraya varmāstraṃ digbandhāntaṃ ṣaḍaṅgakam
anyo'nyāntaritā muṣṭiḥ kuścayettarjanīyugam
vikhyātā krodhamudreyaṃ hṛdayāt krodhamāhvayet
viṣaṃ vajradharād gṛhya mahākrodhapadaṃ tataḥ
śamayeti padād gṛhya hyanupālayamuddharet
śīghramāgacchasi padaṃ varmāstraṃ jvalanapriyā
anena maṇḍale sthāpyaṃ tato'rghyamanumuddharet
viṣaṃ sarvapadāddevatāpadaṃ samudīrayet
prasīda kālabījāntāṃ savisargāntu caṇḍikām
anena dāpayedarghyaṃ pūjārthaṃ manumuddharet
viṣabījaṃ samuddhṛtya nāśayeti padaṃ tataḥ
sarvaduṣṭān hanayugaṃ paca bhasmī tataḥ kuru
mahākāladvayaṃ cāstraṃ śivo'ntamarcanīmanuḥ
tārādyaj samuddhṛtya mahācaṇḍipadaṃ tataḥ
bandhadvayaṃ tato dattvā daśadiśo nirūdhya
digbandhanamanuḥ prokto vakṣye māheśvaraṃ manum
śivo vyāhṛtayaḥ svāhā mahādevamanumataḥ
viṣaṃ vikālikāyuktāmuddharet kulabhairavīm
śrīcakrapāṇine svāhā dviḥstho'yaṃ vaiṣṇavo manuḥ
viṣaṃ viṣṇurdevagurupadamābhāṣya tatparam
devakāya śivo'nto'yaṃ prajāpatimanumataḥ
viṣaṃ raudraṃ krodhapadaṃ dhāriṇe ca tataḥ param
vahnikāntāstrayukto'yaṃ manuḥ kaumārarūpiṇaḥ
bījaṃ hālāhalaṃ procya gaṇapataye ca tataḥ
dviṭhānto'yaṃ manuḥ samyaggaṇapatyo'yamīritaḥ
śāntaṃ sānantamuddhṛtya nādabindusamanvitam
tataḥ prāthamikaṃ dhūmraṃ dhvajamādarasaṃyutam
sahasrakiraṇāyeti padājjvalanavallabhā
hālāhalādirukto'sau manurādityarūpiṇaḥ
sthitibījaṃ samuddhṛtya candrasūryapadaṃ tataḥ
parākramāya varmāstraṃ dviṭhorāhormanuḥ smṛtaḥ
viṣaṃ naṭeśvarapadaṃ naṭadvayamataḥ param
viṣaṃ bhūteśvaraṃ bījaṃ śivo'nto'sau naṭeśvaraḥ
hālāhalaṃ samuddhṛtya candrāya padamīrayet
vahnipriyāntamityukto manuścandramasaḥ smṛtaḥ
viṣaṃ saubhramanuṃ procya natyantāsau prabheśvarī
tāraṃ viṣṇupriyābījaṃ namo'ntaḥ śrīmanuḥ smṛtaḥ
viṣaṃ haripriyābījaṃ hāṃ namaḥ śrītilottamā
paścaraśmiramābījaṃ natyante ca śaśīmatā
viṣabījaṃ jaganmānyāṃ sanatyantaṃ samuddharet
rambhāmanurayaṃ prokto maṇḍale krodhabhūpateḥ
hālāhalaṃ samuddhṛtya sarasvatyai padaṃ tataḥ
gāhayadvayasarvāśca dviṭhaḥ sārasvato manuḥ
viṣaṃ yakṣeśvarībījaṃ dhūmrabhairavyalaṅkṛtam
vahnipriyāyuto'nto'yaṃ prokto yakṣeśvarīmanuḥ
hālāhalaṃ samuddhṛtya bhūtinīpadasaṃyutam
tataḥ prāthamikaṃ vahnipriyānto bhūtinīmanuḥ
bhūtinyaṣṭau mahādvārapālinyaḥ samudīritāḥ
viṣaṃ nirañjanaṃ gṛhya tiṣṭha suvāsinīpadam
śiro natiśca bhūtinyā mantro'yaṃ hṛdayāhvayaḥ
6.7
athātaḥ sampravakṣyāmi mudrāṃ paramadurlabhām
yayā vijñātayā krodhaḥ svayaṃ sidhyati nānyathā
anyo'nyamaṅgulīveṣṭaca dve tarjanyau prasārayet
tarjanīṃ kuṇḍalīṃ kṛtvā mudrā pāpapraṇāśinī
6.8
anyo'nyamuṣṭimāsthāya veṣṭayettarjanīdvayam
krodhasya khaḍgamudreyaṃ trailokyakṣayakāriṇī
6.9
kṛtvā muṣṭiṃ tato'nyo'nyaṃ madhyame dve prasārayet
proktā mahāśivā mudrā sadyaḥ siddhipradāyinī
6.10
asyā eva ca mudrāyā madhyāṅgulyau prasārayet
tarjanyau ca dṛḍhīkṛtya śikhāmudrā prakīrtitā
6.11
asyā eva ca mudrāyā: prasāryā tarjanīdvayam
tarjanyā madhyamāṃ spṛṣṭvā kaniṣṭhānāmike tathā
dhenvākhyeyaṃ mahāmudrā niyutkācāryakarmaṇi
6.12
muṣṭimanyo'nyamāsthāya hyaṅguṣṭhau ca prasārayet
dhūpākhyeyaṃ mahāmudrā niyuktā dhūpakarmaṇi
6.13
pṛthaganyo'nyamāsthāya prasāryaṃ vāmatarjanīm
pradhānāvāhanī mudrā yuktāvāhanakarmaṇi
6.14
svadakṣahastāṅguṣṭhena kaniṣṭhānakhamākramet
śeṣāṅgulīḥ prasāryātha bāhumūle pravinyaset
tasmāt kṣipediyaṃ mudrā digbandhanakarī smṛtā
6.15
uttānā aṅgulīḥ kāryā bhinnatarjanyanāmikā
iyaṃ mudrā mahāraudravajrakarmaṇi pūjitā
uttānā aṅgulīḥ kṛtvā tarjanīṃ veṣṭya kuñcayet
śaṅkhamudreti kathitā devadevasya cakriṇaḥ
6.16
anyo'nyamaṅgulīṃ veṣṭya kaniṣṭhāśca prasārayet
kamaṇḍaluvidhānākhyā mudreyaṃ parikīrtitā
6.17
vāmamuṣṭiṃ vidhāyātha tarjanīmadhyame tataḥ
prasārya tarjanīmudrā nirdiṣṭā brahmarūpiṇaḥ
6.18
vāmapāṇikṛtā muṣṭimadhyamāmapi tarjanīm
prasārya tarjanīṃ kuñcya madhyamāñcāpi veṣṭayet
kaniṣṭhāśca prasāryātha madhyaparvaṇi dhārayet
khyātā gaurīti mudreyaṃ viśuddhā śuddhakarmaṇi
6.19
uttānā aṅgulīḥ kṛtvā muṣṭiṃ tatra ca dhārayet
vāmāṃ kanīyasīṃ bharganāmaṅguṣṭhau muṣṭisaṃsthitau
vāmāṅguṣṭhaṃ parvagataṃ dakṣiṇena ca sañjatam
ādityarathamudreyaṃ proktā krodhādhipena ca
6.20
prasārya dakṣiṇaṃ pāṇiṃ bhagnaṃ tarjanyanāmikām
vidhāya rāhumudreyaṃ krodharājena bhāṣitā
6.21
naṭākāraṃ dakṣakaraṃ kṛtvā muṣṭiṃ vinikṣipet
tarjanīṃ dakṣiṇāṃ vāme muṣṭiścāpi prasārayet
jyeṣṭhāṅguṣṭhena ca tathā kaniṣṭhānakhamākramet
naṭeśvarasya mudreyaṃ nirdiṣṭā siddhidāyinī
6.22
kaniṣṭhānyo'nyamāveṣṭya muṣṭiṃ kṛtvā pṛthak pṛthak
umākhyeyaṃ mahāmudrā prabheśvaryā iha śṛṇu
karāvubhau bhagākārau kṣipenmūrdhani prabheśvari
aṅgulīsampuṭau mūrdhani kṣipenmudrā śriyaḥ smṛtā
6.23
anyo'nyamuṣṭimāsthāya kaniṣṭhāṃ tarjanīṃ tathā
veṣṭayecca śirodīpe śikhākāreṇa bhrāmayet
mudreyaṃ śrīśaśīdevyā darśanenaiva sidhyati
6.24
muṣṭimanyo'nyamāsthāya jyeṣṭhāṅgulyaḥ prasārayet
tarjanyāṃ sthāpayenmūle mudrā sārasvatī smṛtā
kṛtāñjali nyasenmūrdhani jñeyā mudrā tilottamā
6.25
hastānyo'nyaṃ puṭākāraṃ kṛtvā saṃsthāpayed yadi
iyaṃ mudrā mahādevyā rambhāyāḥ parikīrtitā
6.26
athātaḥ sampravakṣyāmi mahāmaṇḍalavarttinīm
indrādilokapālānāṃ manumiṣṭārthasādhanam
hālāhalaśca śakrāya śivaḥ śakramanurmataḥ
6.27
pañcaraśmiragnaya iti śiro'ntaḥ parikīrtitaḥ
tāroyamāyeti śiraḥ prokto yāmyo mahāmanuḥ
6.28
viṣabījaṃ samuddhṛtya rākṣasādhipatistataḥ
pataye jayayugamaśca dviṭhānto nairṛto manuḥ
6.29
ṅentaṃ varuṇamābhāṣya jalādhipataye tataḥ
haradvayaṃ śiro'nto'yaṃ tārādi varuṇo manuḥ
6.30
ādibījaṃ samuddhṛtya vāyave tārayugmakam
vahnijāyānta ukto'yaṃ manurvāyormahātmanaḥ
6.31
viṣabījaṃ samuddhṛtya kuberāya padaṃ tataḥ
yakṣādhipataye svāhā kuberasya manuḥ smṛtaḥ
6.32
tāraṃ candrāyeti śiraḥ saumya īśānago manuḥ
6.33
ādibījaṃ samuddhṛtya īśānāya dviṭhantataḥ
īśānasya manuḥ prokta īśānadiśi saṃsthitaḥ
6.34
mudrā sarveśvarīpūrvaṃ sundaryā api kathyate
yayā vijñātayā nūnaṃ siddhiḥ sarvavidhā bhavet
anyonyamuṣṭimāsthāya kaniṣṭhāñca prasārayet
kaniṣṭhā kuṇḍalākārā mudreyaṃ sundarī smṛtā
6.35
muṣṭimanyo'nyamāsthāya kaniṣṭhe veṣṭayedubhe
tarjanīṃ kuṇḍalīṃ kṛtvā mudreyaṃ bhūtanāyikā
6.36
anyonyaṃ muṣṭimāsthāya tarjanīṃ veṣṭayet pṛthak
mudreyaṃ dvārapālinyā aṣṭabhyaḥ parikīrttitā
indrasya pūjane vajramudreyaṃ parikīrttitā
6.37
kṛtvottānaṃ dakṣahastaṃ tarjanīntu prasārayet
āgneyīyaṃ mahāmudrā yāmyā nirdiśyate tataḥ
kṛtvā muṣṭiṃ dakṣahaste tarjanīñca prasārayet
yāmyākhyeyaṃ mahāmudrā proktāto nairṛtiṃ śṛṇu
kṛtvā muṣṭiṃ dakṣahaste khaḍgākhyeyantu rākṣasī
6.38
vāmamuṣṭiṃ vidhāyātha tarjanīntu prasārayet
tāmeva kuṇḍalākārā mudreyaṃ vāruṇī smṛtā
6.39
muṣṭiṃ vāmakare kṛtvā madhyamāmapi tarjanīm
prasāryeyaṃ patākākhyā vāyormudrā prakīrttitā
6.40
muṣṭiṃ dakṣakare kṛtvā aṅguṣṭhantu prasārayet
proktā vaiśravaṇī mudrā dhanādyākarṣaṇakṣamā
6.41
kṛtvānyo'nyakare muṣṭiṃ tarjanīścāpi veṣṭayet
saumyākhyeyaṃ mahāmudrā somasya parikīrtitā
6.42
vāmamuṣṭiṃ vidhāyātha jyeṣṭhāṅguṣṭhakanīyasā
nakhamākramya śeṣāśca prasāryeśī prakīrtitā
6.43
sṛṣṭibījaṃ siddhivajrapadādāpūrayadvayam
vajrabījaṃ natiścānte pūrṇākhyo'yaṃ mahāmanuḥ
6.44
sthitibījādvajrakrodhamahāmantrapadāttataḥ
siddhākarṣaṇamantro'yaṃ mahāmaṇḍalamadhyagaḥ
sampuṭāvañjaliṃ kṛtvā punarmudrāṃ prakīrtayet
6.45
muṣṭimanyo'nyamāsthāya kaniṣṭhe veṣṭayedyubhe
prasārya kuṇḍalākāraṃ vidhāya tarjanīdvayam
siddhākarṣaṇamudreyaṃ siddhamākarṣayed dhruvam
6.46
tāraśca krodhaśamayasādhane padamuddharet
sidhyatīti padāt sarvadevatānupadaṃ tataḥ
me śīghraṃ sidhyatu padaṃ manūttamapadaṃ tataḥ
baddhvā tu vajramudrākhyimimamuccārayenmanum
6.47
prāleyaṃ bījamuddhṛtya jayadvayamahāpadāt
krodhādhipa ityuktvā krodharājapadāttataḥ
idaṃ bhūtāsanaṃ proktvā darśayadvayamīrayet
marṣayadvayamābhāṣya pratigṛhṇupadādviṭhaḥ
mahāmaṇḍalamābhāṣya bhūtāśanamanuḥ smṛtaḥ
6.48
sampuṭāmañjaliṃ kṛtvāṅgulīnāṃ vidhṛtisthitiḥ
padmamuddeyamākhyātā visarjanamanuṃ śṛṇu
6.49
viṣāt padmodbhavapadaṃ nilayeti padaṃ tataḥ
sarvadevāsanāyeti śiro'nto manurīritaḥ
tāraṃ sarvasiddhipadaṃ siddhi dehi padaṃ tataḥ
gaccheti padamābhāṣya devadevaṃ visarjayet
bhūtādhipa ! mahākrodha ! sarvasiddhipradāyaka !
dattvābhilaṣitaṃ deva gaccha gaccha yathāsukham
mantreṇānena deveśaṃ yathāvidhi visarjayet
6.50
krodhamantrasya jāpena maṇḍalasya ca darśanāt
smaraṇāt krodharājasya rājyaṃ traidhātukaṃ bhavet
ceṭakāḥ sarvabhūtānāṃ yakṣagandharvakinnarāḥ
krodhamantreṇa naśyanti sarvalaukikadevatāḥ
krodhārṇoccāraṇāddevāḥ palāyante samantataḥ
prajapedātmarakṣārthamekalakṣaṃ mahāmanum
vajramantrasya jāpena bhavedvajrasamaṃ vapuḥ
siddhikāmo japet paurṇamāsyāmabhyarcya yatnataḥ
krodhamudrāṃ vidhāyātha prajapet sakalāṃ niśām
prabhātasamaye bhūtānukampā jāyate dhruvam
mudrā jvalati sarvatra tayā jvalitayā punaḥ
ajarāmararūpī ca bhavet krodhasamo naraḥ
evamārādhito vajro vāñchitārthapradāyakaḥ
6.50.p1
iti bhūtaḍāmare mahātantre pramathādhipakrodharājasādhanaṃ nāma ṣaṣṭhaṃ paṭalam
Linked texts (2)
- Puraścaryārṇava — Sanskrit
- Puraścaryārṇava (ed. Murali Dhara Jha) — Sanskrit