Bhutadamara 7

Bhūtaḍāmara 7

Language: Sanskrit

7.15 — 1 part

7.1

saptamaṃ paṭalam
unmattabhairavyuvāca
trijagadvandyadeveśa ! sarvalokabhayaṅkara !
devatāmāraṇaṃ brūhi vīraṃ sidhyati sādhane

7.2

unmattabhairava uvāca
athātaḥ sampravakṣyāmi yena siddhirbhaveda dhruvam
devatā mriyate vāpi mūrdhini sphuṭite śuṣyati

7.3

sampūjya hyayutaṃ vāmapādenākramya sañjapet
svayamāyātyumā devī bhāryā bhavati yacchati
rasaṃ rasāyanaṃ divyaṃ divyakāmikabhojanam
siddhādyadānapakṣe tu lepayed vṛṣabhadhvajam

ākramya vāmapādena mantramuccārayedamum
ādibījaṃ jvalayugaṃ vajreṇeti padaṃ tataḥ
mārayadvayamābhāṣya sakarma sādhyamuddharet
tataḥ krodhadvayaṃ cāstraṃ japedaṣṭasahasrakam
japamātreṇa sidhyanti bhūtinyā mriyate tathā

7.5

śrīdevī vāmapādenākramya mantrāyutaṃ japet
śrīdevyāyāti dadyācca kusumāsanamuttamam
vaktavyaṃ svāgataṃ bhāryā kāmitā rājyadā bhavet

7.6

bhairavīṃ vāmapādenākramya mantrāyutaṃ japet
bhairavī śīghramāgatya ceṭīkarma karoti ca

7.7

cāmuṇḍāṃ vāmapādenākramya mantrāyutaṃ japet
śīghramāgatya cāmuṇḍā dāsīvadvaśyatāmiyāt

7.8

anenaiva vidhānena pūjayet sarvadevatām
gatvaikaliṅgaṃ sampūjya japedaṣṭasahasrakam
vāmapādena cākramyānvahaṃ saptadināni ca
mahādevaḥ samāgatya rājyaṃ yacchati kāmikam
yadi yacchati nāgatya mriyate śuṣyate dhruvam

7.9

japedaṣṭasahasrantu prāgvat saptadināni ca
nārāyaṇaṃ vāmapādenākramyāyāti yacchati
prārthitaṃ kiṅkaro bhūtvā mriyate śuṣyate'pi ca

7.10

brahmāṇaṃ vāmapādenākramya prāgvat japet sadā
āgatya kiṅkaraḥ sa syādanyathā mriyate dhruvam

7.11

ādityaṃ vāmapādenākramya saptadināni ca
japedaṣṭasahasraṃ vāgatya siddhiṃ prayacchati
anyathā mriyate japta evaṃ candraḥ prayacchati
śataṃ svarṇapalaṃ dadyādanyathā mriyate dhruvam

7.12

bhairavaṃ vāmapādenākramya saptadināni ca
japedaṣṭasahasrantu pūjayecca prayatnataḥ
dīpaṃ manuṣyatailena dhūpaṃ māsena dāpayet
āmiṣeṇaiva naivedyaṃ kṛtvā mantraṃ japet punaḥ
arddharātravyatīte tu mahānādaṃ vimuñcati
kurute'ṭṭāṭṭahāsaśca vadettaṃ bhakṣayāmyaham
bhayaṃ tatra na kartavyaṃ krodhabījamanuṃ smaret
mantroccāraṇamātreṇa susthaḥ sādhako'tra bhairavaḥ
dadyāttraidhātukaṃ rājyaṃ sarvāśāḥ pūrayatyapi
krodhabhītyā vinaśyanti sarvalaukikadevatāḥ

7.13

vāmapādena cākramya naṭeśaṃ pūrvavajjapet
āgatya kiṅkaraḥ sa syādanyathā mriyate dhruvam

7.14

mahākālaṃ vāmapādenākramyāṣṭasahasrakam
dināni sapta prajapedāgacchati gaṇānvitaḥ
ceṭako bhavati kṣipramanyathā mriyate kṣaṇāt

7.15

īśvarāyatanaṃ gatvā'yutaṃ sapta dināni ca
japeccaturmukhaṃ vāmapādenākramya sādhakaḥ
āgatya parivārāḍhyaḥ kiṃkuro bhavati kṣaṇāt
āropya pṛṣṭhe tridivaṃ darśayatyapi yacchati
samānīyorvaśīṃ devīṃ bhojyaṃ kāmyaṃ rasāyanam
anyathā mriyate prāha svayaṃ krodhādhipo'sakṛt
evaṃ saṃsādhayet siddhi kaiṃkurīṃ krodhabhaktiḥ

7.15.p1

iti bhūtaḍāmare mahātantre kaṃkurīsādhanaṃ nāma saptamaṃ paṭalam

Linked texts (1)

Puraścaryārṇava — Sanskrit