Bhutadamara 9
Bhūtaḍāmara 9
- Language
- Sanskrit
Contents
- 9.12 — 1 part
9.1
navamaṃ paṭalam
unmattabhairavyuvāca
vyomavaktra ! mahākāya ! sṛṣṭisthitilayātmaka !
bhūtinīsādhanaṃ brūhi kṛpā te yadi varttate
9.2
unmattabhairava uvāca
bhūtinīsādhanaṃ vakṣye krodharājena bhāṣitam
daridrāṇāṃ hitārthāya saṃsārārṇavatārakam
9.3
sā bhūtinī kuṇḍaladhāriṇī ca sindūriṇī cāpyatha hāriṇī ca
naṭī tathā cātinaṭī ca ceṭikā kāmeśvarī cāpi kumārikā ca
bhāryāmātṛbhaginyaśca svecchayaiva bhavanti hi
9.4
campāvṛkṣatale rātrau japedaṣṭasahasrakam
dināni trīṇi japānta udārārcanamācaret
dhūpaśca gugguluṃ datvā punarātrau japenmanum
ardharātrigate devī samāgacchati bhūtinī
dadyādṛgandhodakenārghyaṃ tuṣṭā mātrādikā bhavet
mātetyaṣṭaśatānāñca vastrālaṅkārabhojanam
bhaginī cettadā nārīṃ dūrādākṛṣya sundarīm
rasaṃ rasāñjanaṃ divyaṃ vidhānañca prayacchati
bhāryā ca pṛṣṭhamāropya svargaṃ nayati kāmitā
dīnārāṇāṃ sahasrāṇi nityaṃ rasarasāyanam
bhojanaṃ kāmitaṃ devī sādhakāya prayacchati
9.5
rātrau gatvā śmaśāne ca japedaṣṭasahasrakam
japānte kuṇḍalavatī samāgacchati sannidhim
rudhirārghyeṇa santuṣṭā mātṛvat pālayatyapi
pañcaviṃśatidīnāraṃ dadāti priyate'nyathā
9.6
śūnye devālaye rātrau japedaṣṭasahasrakam
sindūriṇī samāyāti bhāryākarma karoti ca
vastrādibhojanaṃ tuṣṭā dvādaśe'hni prayacchati
pañcaviṃśatidīnāraṃ bhojyaścāpi rasāyanam
9.7
gatvaikaliṅgaṃ yāminyāṃ japedaṣṭāyutaṃ tataḥ
hāriṇī śīghramāgatya bravīti kiṃ karomi ca
sādhakenāpi vaktavyaṃ bhāryā bhava suśobhane
kāmitāṣṭau dīnārāṇi bhojyaṃ yacchati kāminī
9.8
vajrapāṇigṛhaṃ gatvā sannidhau pratimāṃ likhet
karavīrasumaṃ dattvā japedaṣṭasahasrakam
naṭyārddharātra āyāti sādhakasyāntike vaśāt
saraktacandanenārghyaṃ dattvā''jñāpayasīti kim
vaktavyaṃ sādhakenāpi kiṅkarī me bhaveti ca
vastrālaṅkaraṇaṃ bhojyamanvahaṃ pratiyacchati
vyayaṃ sarvaṃ prakartavyaṃ na kiṃciddhārayed gṛhe
9.9
nīcagāsaṅgamaṃ gatvā japedaṣṭasahasrakam
saptadināvasāneṣu pūjāṃ kuryādanuttamām
tirobhāvaṃ gate sūrye dhūpayeccandanena ca
japed yāvadardharātraṃ samāyāti mahānaṭī
āgatā sā bhaved bhāryā nityaṃ svarṇapalaṃ śatam
prabhāte yāti santyajya sarvaśeṣaṃ vyayed budhaḥ
tadvyayābhāvato bhūyo na dadāti prakupyati
9.10
yāminyāṃ svagṛhadvāre japedaṣṭasahasrakam
hyahaṃ yāvajjapānte'sau samāyātyantike punaḥ
ceṭīkarma karotyevaṃ gṛhasaṃskārakarma ca
karoti kṣetrajaṃ karma vajrapāṇiprasādataḥ
9.11
gatvā mātṛgṛhaṃ rātrau matsyamāṃsaṃ pradāpayet
sahasrantu japet kāmeśvarīṃ saptadināvadhi
āgatā yadi cedbhaktyā'rghyeṇa santoṣitā satī
vadet kimājñāpayasi bhava bhāryā priyā mama
āśāśca pūrayatyevaṃ rājyaṃ yacchati kāmitā
9.12
rātrau devagṛhaṃ gatvā śubhāṃ śayyāṃ prakalpayet
jātīpuṣpeṇa vastreṇa sitagandhena pūjayet
dhūpañca gugguluṃ dattvā japedaṣṭasahasrakam
japānte śīghramāyāti cumbatyāliṅgyatyapi
sarvālaṅkārasaṃyuktā sambhogādisamanvitā
yacchatyaṣṭau dīnārāni bhāryā bhavati kāmitā
vāsasī bhojanaṃ divyaṃ kāmitaśca rasāyanam
kuberasya gṛhādeva dravyamākṛṣya yacchati
ityāha bhagavān krodhabhūpatiḥ svayameva hi
9.12.p1
iti bhūtaḍāmaramahātantre bhūtinīsādhanaṃ nāma navamaṃ paṭalam