Pramāṇa · Search · About · API

Indrajala 63.1

Indrajāla 63.1

Language
Sanskrit

63.1.1

srak sugandhi gṛhasthāne candanena tu maṇḍalam
kṛtvā hastapramāṇena pūjayet tatra padminīm
dhūpaṃ sagugguluṃ dattvā japenmantrasahasrakam
māsamekaṃ tataḥ pūjāṃ kṛtvā rātrau punarjapet
arddharātre gate devī samāgatya prayacchati
nidhānaṃ divyayogañca tasmānmantrī sukhī bhavet
atha mantraḥ |–“oṃ krīṃ padmini svāhā”
atha rasaśodhanamāraṇañca
atha vīryyastambhanavājīkaraṇādiṣu proktarasayogādisiddhaye
rasādiśodhanamāraṇañca | tatrādau rasaśodhanam |–
palādūrddhaṃ na karttavyaṃ rasasaṃskāramuttamam
aghoreṇaiva mantreṇa rasasaṃskārapūjanam
atha mantraḥ |–“oṃ aghorebhyo'tha ghorebhyo ghoraghoratarebhyaśca
sarvataḥ sarvasarvebhyo namaste rudrarūpibhyaḥ namaḥ” | iti aghoramantraḥ
kumāryyā ca niśācūrṇaiḥ dinaṃ sūtaṃ vimardayet
pātayet pātanāyantre samyakśuddho bhavedrasaḥ
athavā hiṅgulāt sūtaṃ grāhayet tannigadyate
pāribhadrarasaiḥ peṣyaṃ hiṅgulaṃ yāmamātrakam
jambīrāṇāṃ dravairvātha pācyaṃ pātanayantrake
tatsataṃ yojayed yoge saptakañcukavarjitam
rasasya daśamāṃśantu gandhaṃ dattvā vimardayet
jambīrasya dravairyāmaṃ pācyaṃ pātanayantrake
punarmardyaṃ punaḥ pātyaṃ saptavāraṃ viśuddhaye
ityevaṃ śuddhirākhyātā yatheṣṭaikaprakārikā
atha rasamāraṇam
yuktaṃ sarvasya sūtasya taptakhalle vimardanam
ajāśakṛttuṣāgnintu bhūgarte tritayaṃ kṣipet
tasyopari sthitaṃ khallaṃ taptakhallamidaṃ bhavet
khallaṃ lohamayaṃ śastaṃ pāṣāṇotthamathāpi vā
ajīrṇaṃ cāpyabījañca yatsūtaṃ ghātayennaraḥ
brahmahā sa durācāro mantradrohī maheśvari !
rāmaṭhaṃ pañcalavaṇaṃ tathā kṣāracatuṣṭayam

63.1.2

trikaṭuṃ śṛṅgaverañca mātuluṅgarasāplutam
piṇḍamadhye rasaṃ dattvā svedayet saptavāsaram
māraṇālepamṛdbhāṇḍe grāsārthī jāyate dhruvam
etadeva rasaṃ yatnājjambīranīrasaṃyutam
dinaikaṃ dhārayeddharme mṛtpātre vā mṛto bhavet
tadā grāsaḥ pradātavyaḥ svarṇaśuddhiḥ śanaiḥ śanaiḥ
caturdaśadinānyantaḥ kramājjīrṇasya cālayet
sūtaṃ svarṇe vyomaśaṅkha-tulyaṃ rabhādravairdinam
mardayedbījasaṃyuktaṃ cārvācāraṇayantrake
sarvakairmūlikādrāvairdinamekantu mardayet
garbhayantragataṃ pācyaṃ mandayet pūrvavadrasam
brahmadaṇḍī meghanādā citrakaḥ kaṭutumbikā
vajravallī balā kanyā trikaṭurkasnuhīpayaḥ
kando rambhā ca nirguṇḍī lajjā jātī jayantikā
viṣṇukrāntā hastiśuṇḍī dadrughno bhṛṅgarāṭ paṭuḥ
guḍūcī lāṅgalī nīrakaṇākālomahoragāḥ
kākamācī ca dantī ca sarpākṣī cārddhacandrikā
etā samastā vyastā vā deyā hyaṣṭādaśādhikāḥ
uktasthāne prayoktavyā rasarājasya siddhaye
vālukāyantraḥ
hiṃgulaśuddhiḥ | meṣīkṣīrāmlavṛkṣāṇāṃ daradaṃ gharmabhāvitam
saptavāraṃ prayatnena śuddhimāyāti niścitam
gandhakaśuddhiḥ | śukapakṣasamacchāyo navanītasamaprabhaḥ
masṛṇaḥ kaṭhinaḥ snigdhaḥ śreṣṭho gandhaḥ sa ucyate
sājyabhāṇḍe payaḥ kṣiptvā mukhaṃ vastreṇa veṣṭayet
tatpūrvaṃ cūrṇitaṃ gandhaṃ srāveṇa bodhayet punaḥ
bhāṇḍaṃ nikṣipya bhūmyante ruddhā deyaṃ puṭaṃ laghu
tatkṣīreṇa drutaṃ gandhaṃ śuddhaṃ yogeṣu yojayet
gandhaṃ ghṛte vipaktavyaṃ yāvattailanibhaṃ bhavet
vastreṇāntaritaṃ kṛtvā cālayet triṃśadantaram
punarviṃśati saṃgrāhāṃ śuddhayaṣṭadvādaśa kramāt
aṣṭamāṣaṃ caturthaṃ vāpyarddhañcaiva samāṃśakam

63.1.3

pratigrāse taptakhalle dinamamlena mardayet
vinā yantre kṣipet tacca jambīrarasasaṃyutam
tadyantraṃ dhārayeddharme dinaṃ syājjārito rasaḥ
taṃ paṭukṣāragomūtraṃ snukkṣīrām
pratigrāsaṃ taptakhalle yathāśaktyā ca jārayet
taṃ jīrṇaṃ mārayet sūtaṃ māraṇaṃ kathyate dravaiḥ
aṅkolasya śiphāścādbhiḥ piṣṭvā khalle vimardayet
sūtaṃ gandhakasaṃyuktaṃ dinānte tadviśodhayet
puṭayedbhūdhare yantre dinānte tanmṛtaṃ bhavet
kṛṣṇadhustūratailena sūtaṃ mardyaṃ dviyāmakam
dinaikaṃ tatpaced yantre kaṭupāke na saṃśayaḥ
rasaṃ gandhaṃ samaṃ mardyaṃ dinaṃ nirguṇḍikādravaiḥ
vajramūṣānvitaṃ dhmātaṃ bhasma sūtaṃ bhavenmalam
sūtamūrṇāṃ rasaṃ guñjāṃ madhulākṣāñca ṭaṅgaṇam
mardayed bhṛṅgajadrāvairddinaikaṃ dhmāpayet punaḥ
dhmāte bhasmatvamāyāti śuddhasphaṭikasannibhaḥ
dvipalaṃ sūtarājasya palaikaṃ gandhakasya ca
kanyānīreṇa saṃmardya dinamekaṃ niruttaram
baddhvā tadbhūdhare yantre dinaikaṃ mārayet puṭāt
ityevaṃ jārite sūte māraṇaṃ parikīrttitam
athavā māsayogyantu hanyāggandhānvitaṃ rasam
sūtañca ghanasattvañca mardayet kaṅkalīdravaiḥ
dinaikaṃ golakañcaiva śoṣayedātape khare
garbhayantragataṃ pācyaṃ tridinantu mahāgninā
karīṣāgnau divārātrau pacitvā bhasmatāṃ nayet
dattātreyatantram
śrīdattātreya uvāca
kailāsaśikharāsīnaṃ devadevaṃ maheśvaram
dattātreyaśca papraccha śaṅkaraṃ lokaśaṅkaram

Linked texts (3)