Indrajalavidya 106

Indrajālavidyā 106

Language: Sanskrit

106.1 — 4 parts

106.1.1

aṭarūṣasya patreṇa parimārthya tathopari
stambhayet saptadivyāni kṛtvā doṣaviśuddhaye
uttarāvāruṇīmūlaṃ sapta vidyā'bhimantritam
mahākṛtyādidoṣasya kṛtadivyo viśuddhaye
athavā dīpamārge ca rātrau kṛtvā tu maṇḍalam
bhūrjapatre samālikhya pūrvoktadravyameva ca
dīpaṃ prajvālayed yatnāt kapilājyena pūritam
tāvaddīpo dahan doṣaṃ svayaṃ dagdhvā praśāmyati
samayāya sādhakāya putrikāṃ kunikāṃ ghaṭam
kanyābhiryoiganīnāntu yathāśakti ca tarpayet
evantu kathitaṃ bhadre ! kāmanāpratyayāvaham
iyantu paramā vidyā kimanyat paripṛcchasi ?
devyuvāca | sādhanaṃ kathitaṃ deva ! mahāścaryyapradāyakam
adhunā śrotumicchāmi arccanāṃ vidhipūrvvikām
bhairava uvāca | pūjanaṃ śṛṇu deveśi ! sādhake siddhidāyakam
nitye naimittike kāmye trividhaṃ pūjanaṃ smṛtam
bhūpradeśe manoramye puṣpāmodaprapūrite
gomayenātha saṃlipya puṣpaprakaraśobhitam
kāmāpekṣvāvadhiyryata āsanañca samācaret
sauvarṇaṃ rājataṃ tāmraṃ paittalaṃ bhūrjapatrakam
karpūrāgurukastūrī śrīkhaṇḍakuṅkumena ca
likhettatra prayatnena lekhyā haimayā tataḥ
madhye yoniṃ samālikhya tadbāhye tu ṣaḍasrakam
tadbāhye ṣor̤aśadalaṃ caturdvāropaśobhitam
pūrvvadvāre gaṇeśañca dakṣiṇe vaṭukaṃ yajet
paścime yoginī pūjyā kṣetrapālaṃ tathottare
īśānādiṣu somānte rudrapīṭhaṃ prapūjayet
vagalā pūrvvapatre ca stambhinyādyāstataḥparam
stambhinī mohinī vaśyā avanī kālikā tathā
adharā kampitā dhīrā kampanā kāyadarśinī
bhrāmikā mandagamanā bhoginī caiva bhogikā
bhogāḥ ṣoḍaśapatreṣu gandhapuṣpākṣatairyajet
ṣor̤aśasvarasaṃyuktāḥ sampradāya kulāgame

106.1.2

likhenmadhyepu pīṭheṣu kalpayet śvetapadmakam
brāhmayādyāścaiva pūrvādyau bhairavāṣṭakasaṃyutāḥ
sthiramāyādikāḥ sarvāḥ paripūjyāḥ kulodbhave
ādicchāntāḥ ṣaḍaṅgeṣu saptadhātuṣu mātṛkāḥ
yonimadhye mūlavidyāṃ tribhirañjalibhiryajet
puṣpadhūpādinaivedyairgandhatāmbūladīpakaiḥ
nīrājya vidhinā paścāt japasaṃkhyāṃ nivedayet
pavitrāropaṇaṃ devi ! vadaneṣu yathāvidhi
balitrayaṃ tato dadyāt pūjanādi mahotsavaḥ
evantu kathitaṃ bhadre ! gurorājñāñca pālayet
saṃsiddhirlaukikī tasya yathā nigamasārataḥ
aparā caiva śākteyī sā cābhayapradā bhavet
atha stutiḥ |—asya śrīvagalāmukhīstotramantrasya nāradaṛṣiḥ
śrīvagalāmukhī devatā mama sannihitānāṃ duṣṭānāṃ virodhināṃ
vāṅmukhapadajihvāvarṇānāṃ stambhanārthe viniyogaḥ
madhye sudhāmbimaṇimaṇḍaparatnavedīsiṃhāsanoparigatāṃ paripītavarṇām
pītāmbarābharaṇamālyavibhūṣitāṅgīm
devīṃ smarāmi dhṛtamudgaravairijivhām
jihvāgramādāya kareṇa devīṃ vāmena śatrūn paripīḍayantīm
gadā'bhighātena ca dakṣiṇena pītāmbarākhyāṃ dvibhujāṃ namāmi
triśūladhāriṇīmambāṃ sarvasaubhāgyadāyinīm
sarvābharaṇaveśāḍhyāṃ devīṃ dhyātvā prapūjayet
calatkanakakuṇḍalollasitacārugaṇḍasthalām
lasatkanakacampakadyutimadinduvimbānanām
gadāhatavipakṣakāṃ kalitalolajihvāñcalām
smarāmi bagalāmukhīṃ vimukhavāṅmukhastambhinīm
pīyūṣodadhicārumadhyavilasadratnojjvale maṇḍape
tatsiṃhāsanamaulipātitaripupretāsanādhyāsinīm
svarṇābhāṃ karapīḍitārirasanāṃ bhrāmyadgadāvibhramāmitthaṃ paśyati yānti tasya vilayaṃ sadyo'tha sarvāpadaḥ
devi ! tvaccaraṇāmbuje vitanute yaḥ pītapuṣpāñjalim

106.1.3

mudrāṃ vāmakare vidhāya ca punarmantrī manojñākṣaram
pīṭhadhyānaparo'pi kumbhakavaśādvījaṃ smaret pārthivam
tasyāmitramukhasya vāci hṛdaye stambho bhavettatkṣaṇāt
mantrastāvadalaṃ vipakṣadalane stotraṃ pavitrañca te
yantraṃ vādiniyamantraṇaṃ trijagatāṃ jaitraṃ na citraṃ bhavet
mātaḥ ! śrīvagaleti nāma lalitaṃ yasyāsti jantormukhe
tannāmagrahaṇepu saṃsadi mukhastambho bhavedvādinām
vādī mūkati raṅkati kṣitipatiyaiśvānaraḥ śītati
krodhī śāmyati durjanaḥ sujanati kṣiprānugaḥ khañjati
gava kharati sarvavicca jar̤ati tvanmantriṇā yantritaḥ
śrīnitye ! vagalāmukhi ! pratidinaṃ kalyāṇi ! tubhyaṃ namaḥ
duṣṭastambhanamugravighnaśamanaṃ dāridryavidrāvaṇaṃ
bhūbhṛtstambhanakāraṇaṃ mṛgadṛśāṃ cetaḥsamākarṣaṇam
saubhāgraikaniketanaṃ mama dṛśoḥ kāruṇyapūrṇāmṛtam
śatrormāraṇamāvirastu purato mātastvadīyaṃ vapuḥ
mātarbhañjaya me vipakṣavadanaṃ jihvāñcalāṃ kīlaya
brāhmīṃ mudraya nāśayāśu dhiṣaṇāmugrāṃ gatiṃ stambhaya
śatrūṃścūrṇaya devi ! tīkṣṇagadayā gaurāṅgi ! pītāmbare !
vighnaughaṃ vagale ! hara pratidinaṃ kāruṇyapūrṇekṣaṇe !
mātarbhairavi ! bhadrakāli ! vijaye ! vārāhi ! viśvāśraye !
śrīnitye ! samaye ! maheśi ! vagale ! kāmeśi ! rāme ! rame !
mātaṅgi ! tripure ! parātparatare ! svargāpavargaprade !
dāso'haṃ śaraṇāgataṃ karuṇayā viśveśvari ! trāhi mām
saṃrambhe caurasaṅge praharaṇasamaye bandhane vārimadhye
vahnau vāde vivāde prakupitanṛpatau divyakāle niśāyām
vaśye vā stambhane vā ripubadhasamaye nirjane vā bane vā
gacchaṃstiṣṭhaṃstrikālaṃ yadi paṭhati śivaṃ prāpnuyādāśu dhīraḥ

106.1.4

nityaṃ stotramidaṃ pavitramiha yo devyāḥ paṭhatyādarāt
dhṛtvā mantramimaṃ tathaiva samare bāhau kare vā gale
rājāno harayo madāndhakariṇaḥ sarpā mṛgendrādikā
ete yānti vimohitā ripugaṇā lakṣmīḥ sthirā siddhayaḥ
vidyā lakṣmīḥ sarvasaubhāgyabhājaḥ
putrāḥ sampadrājyamiṣṭārthasiddhiḥ
mānaṃ strīṇāṃ sarvasaubhāgyabhogam
prāptaṃ tattadbhūtale tatkṣaṇena
yat kṛtaṃ japasandhānaṃ cintitaṃ parameśvari !
ripūṇāṃ stambhanārthaṃ hi tadgṛhāṇa namo'stu te
brahmāstramiti vikhyātaṃ triṣu lokeṣu viśrutam
gurubhaktāya dātavyaṃ na deyaṃ yasya kasyacit
pītāmbarāṃ dvihastāñca trinetrāṃ gātrakojjvalām
śilāmudgarahastāñca smaret tāṃ bagalāmukhīm
siddhiṃ sādhye'vagantuṃ guruvaravacaneṣvāīviśvāsabhājām
svāntaḥ padmāsanasthāṃ vararucivagalāṃ dhyāyatāṃ tāratārām !
gāyatrīpūtavācāṃ hariharamanane tatparāṇāṃ narāṇām
prātarmadhyāhnakāle stavapaṭhanamidaṃ kāryasiddhipradaṃ syāt

106.1-2

athavānyaprakāreṇa stambhanaṃ kārayet sudhīḥ
sarvavighnapraśamanaṃ sarvaśāntikaraṃ param
devagandharvvayakṣāṇāṃ piśācānāṃ tathaiva ca
bhūtānāñca tathā nṛṇāṃ mṛgāṇāṃ pakṣiṇāṃ tathā
cittapramohanakaraṃ jīvākarṣaṇakārakam
sarveṣāṃ stambhanakaraṃ vṛṣṭimārutayostathā
senāyāḥ stambhanañcaiva vyavahāragaṇaistathā
agnistambhaṃ jalastambhaṃ vividhādhudhakasya ca
vākstambhaṃ sarvvavidyānāmahitānāñca sarvvaśaḥ
gavāmapyākhusarpāṇāṃ gatistambhanameva ca
ripūṇāṃ krodhasaṃstambhaṃ ratiśukramanantaram
yuvatīnāṃ manaḥstambhaṃ yūnāñca hṛdayaṃ tathā
stambhanaṃ rājakopasya amātyasya viśeṣataḥ
anyāṣāṃ jīvajātīnāṃ kṣipraṃ stambhanakārakam
ripūṇāṃ dveṣakaraṇaṃ viśliṣṭaṃ śliṣṭayorbhavet
uccāṭakaraṇaṃ teṣāmunmādakaraṇaṃ tathā
sarvvabhūtavaśīkāraṃ sarvvabhūtamanoharam
āyuṣkaraṃ dhanakaraṃ strīsaubhāgyakaraṃ param
tattatkarmoktamantrāṇāṃ bhedāṃśca vividhāṃstathā
prayogāṇi ca sarvāṇi śṛṇu saṃkṣepato mune !

106.3

mantroddhāraṃ pravakṣyāmi śṛṇuṣvāvahito mune !
vedādi prathamaṃ proktaṃ huṅkāraṃ tadanantaram
kāmāntaṃ bindusaṃyuktaṃ tṛtīyaṃ bījamuccaret
punaśca bījaṃ bhūbījaṃ dvisaptasvarabhūṣitam
evaṃ bījaṃ samuddhṛtya tadante munisattama !
haridrāgaṇaśabdānte pataye ca padaṃ smṛtam
varaśabdayugaṃ paścāddakāreṇa samanvitam
sarvvaśabdaṃ janapadaṃ hṛdayaṃ stambhayadvayam
svāhāntaṃ mantramevaṃ syāddvātriṃśadvarṇasaṃyutam
stambhayadvayaksthāne ākarṣayapadadvayam || ityādi
madano'sya ṛṣiḥ proktaśchando'nuṣṭub nigadyate
devo haridrāgaṇapaḥ sarvvalokavimohanaḥ
bījena dīrghayuktena jātiyuktena buddhimān
ṣaḍaṅgamācaredbhaktyā sarvvakāmārthasiddhaye

106.4

†
dhyānamasya pravakṣyāmi sarvvasiddhipradāyakam
ratnamaṇḍalamadhyasthaṃ ratnasiṃhāsanopari
pītavarṇāṃśukālepamālyābharaṇabhāsvaram
vīraṃ vā viditaṃ devaṃ gajavaktraṃ trilocanam
pāśāṅkuśakrodhamudrāṃ paraśuñcābhayaṃ varam
dadhānaṃ devadeveśaṃ dhyāyeddevamananyadhīḥ
caturthīṃ śuklapakṣe tu kanyakā peṣayenniśām
tāmālipya svayaṃ snātvā nijadehaṃ prasannadhīḥ
bhaktyā gurūn praṇamyātha pūjayitvā yathā balam
vastrahemāṅgurīyādyairbhūṣaṇādyairviśeṣataḥ
tatprasādādadhīyīta haridrānuṣṭubhaṃ manum
rūpeṇa pūjayeddevaṃ gandhapuṣpākṣatādibhiḥ
aṣṭādhikasahasrantu japtvā tasya daśāṃśataḥ
hunedguḍaghṛtābhyaktairapūpaiśca samāhitaḥ
tanmānaṃ tarpayedbhaktyā sadā''karṣati kanyakām
tataḥ kāmyāni karmāṇi kuryyādvai karmasiddhaye

106.5

atha cakraṃ pravakṣyāmi gaṇeśasya mahātmanaḥ
stambhanākarṣaṇañcaiva vaśyaṃ vidveṣaṇaṃ tathā
uccāṭanaṃ māraṇañca yantraḥ ṣaḍvidha ucyate
huṅkāraṃ vilikhet pūrvvaṃ gaṃ gaṇeśaṃ hṛdi sthitam
tadvahiḥ praṇavaṃ likhya tanmadhye nāma karma ca
tadvahiścandrabhūvṛttaṃ tasmādaṣṭadalaṃ likhet
caturdaleṣu huṅkāraṃ bhūbījasyodare likhet
catuṣkoṇadaleṣvante caturthabījamālikhet
bhūpūrasyāṣṭakoṇeṣu bhūbījāntastha huṃ likhet
koṇāgrādagraparyyantaṃ gajamastakamālikhet
dantakāṣṭakamadhyeṣu gaṇāntaṃ bījamālikhet
vilikhya bhūpurasyāgre varṇāntaṃ coccaret kramāt
bhūpureṇa ca saṃveṣṭya tasya koṇa catuṣṭaye
bhūbīje vilikhedetat stambhayāntamudāhṛtam
śukrasaumyadine somavāre vā'nyatame'pi ca
rātrau viviktadeśe tu gomayenopalipya ca
devamāropayet tatra dṛśadaṃ sthāpya yatnataḥ
yathā balaṃ tathā labdho haridrāṃ cālayet tataḥ
nistvag dṛśadi nikṣipya peṣayitvā'tha kanyakā
svarūpasya caturthāgamaṣṭavighnasamanvitam
mṛdā piṣṭvā'tha saṃyojya pañcaviṃśativārakam
manunā śodhayet tāntu sūkṣmavastre vilekhayet
stambhayantraṃ vilikhyā'tha kuryāt prāṇaniveśanam
hāridreṇa gaṇeśānaṃ sarvāvayavasaṃyutam
kṛtvā kukṣau niveśyātha yantraṃ samdhāya yatnataḥ
punaḥ prāṇān pratiṣṭhāpya gandhapuṣpopahārakaiḥ
yaśca bhaktyā gaṇeśānaṃ śarīrāntaḥ praṇiikṣipet
japedaṣṭasahasrantu hemapuṣpaiḥ samarcayet
siddhārthañca nivedyā'tha baliṃ tatraiva nikṣipet
sukṣālitataṇḍulaprasthaṃ tadarddhaṃ mudgatindukam
catuḥpalaṃ gur̤añcaiva tanmānaṃ nārikelakam
muṣṭimātraṃ marīcaṃ syāt tadarddhaṃ saindhavaṃ rajaḥ
tasyārddhaṃ jīrakaṃ dadyāt gur̤asyārddhaṃ ghṛtaṃ viduḥ
gokṣīreṇār̤hakenaiva śṛtaṃ mandāgninā yataḥ
siddhaudanamiti jñeyaṃ vighneśasya priyāvaham
etena haviṣā pūpamodakādyairviśeṣataḥ
candanā'gurukarpūratāmbūlaiḥ kṛśarādibhiḥ
prīṇayitvā gaṇeśānaṃ baliṃ dattvā samāhitaḥ
śarāveṇa pidhāyātra stotraiḥ stutvā gaṇeśvaram
evameva dinaikaṃ vā dvivāraṃ vā trivārakam
pañcāhaṃ vā'tha saptāhaṃ pūjayedvighnanāyakam
stambhayet sakalān lokān nātra kāryā vicāraṇā

106.6

athavā sthāpayedrātrau raṇabhūmau gaṇeśvaram
senāstambhanamāyāti caturaṅgabalānvitā
nagare nagarāntaḥsthāṃn rāṣṭre rāṣṭrāntarasthitān
catuṣpathe grāmyajanān sabhāmadhye'tha vādinaḥ
vṛkṣāgre dṛṣṭisaṃstambhaṃ jalamadhye jalasya ca
saumāyāñca mahārātre mārge cauraṃ gṛhe tathā
gajāśvayośca śālāyāṃ valmīke pannagādikān
vane siṃhavarāhāṇāṃ krodhe ca jalamadhyage
āyudhānāṃ śālamadhye vyavahāre tathaiva ca
agnau tu sarvvavidyānāṃ gautānāñca tathā smṛtam
khaṭvāyām‌ ṛtusaṃstambhaṃ bhakṣyabhojyeṣu yoṣitām
sthāneṣveteṣu saṃsthāpya baliṃ dadyāt samāhitaḥ
stambhayedacirādeva trailokyaṃ sacarācaram
amoghametat karma syāt rahasyaṃ na prakāśayet

106.7

athākarṣaṇamantrākhyaṃ pravakṣyāmi samāhitaḥ
yantre haridrāsaṃskāraṃ kuryyāt pūrvvoktavartmanā
pūrvvavacca samālikhya māyābījaṃ gaṇeśvaram
madhye vahniḥsthitān sarvvān māyābījena veṣṭayet
bhūpūradvayakoṇeṣu caturṣvevaṃ mahātmanā
vāgbījaṃ nyasenmūrdhni hrāṃ hrīṃ klīṃ vlūṃ saruttamaḥ
itarāṣṭasu koṇeṣu āṃ krīṃ varṇadvayaṃ likhet
mastakeṣu pratidinaṃ vakārañca ṭhakārakam
vilikhedbindunādāntaṃ mantrī saṃyatamānasaḥ
bhūkoṇāyeṣvaṣṭaśūlaṃ huṅkārāntasthamālikhet
maṇḍaladvitayenaiva vāruṇena puṭīkṛtam
māyābījaṃ likhet tatra koṇeṣvapi caturṣvapi
piṣṭasāre.likhenmantrī yantraṃ pūrvvoktavartmanā
prāṇasaṃsthāpanaṃ kṛtvā madhye vighneśamarcayet
hāridreṇa gaṇeśānaṃ kṛtvā tat kuttimamadhyagam
yantraṃ vidhāya saṃsthāpya punaḥ prāṇān pratiṣṭhayet
vighneśayantramuddhṛtya sukaulālakayā mṛdā
śarāvadvitayaṃ kṛtvā tayoranyatare śubhe
nidhāya vighnakarttāraṃ raktapuṣpaiḥ samarcayet
siddhaudanādyaiḥ pūrvvoktaprakāreṇa ca pūjayet
mantre sarvvajanasthāne sādhyanāma prayojayet
saṃstambhayadvayasthāne ākarṣayapadadvayam
yojayitvā'ṣṭasāhasraṃ japedvai sādhyadiṅmukhaḥ
baliṃ dadyādgaṇeśasya gandhapuṣpākṣatādibhiḥ
itareṇa śarāveṇa chādayet tadanantaram
ekatripāñcasaptāhaparyyantaṃ pūjayedvibhum
śīghraṃ sādhyaḥ samāyāti nātra kāryyā vicāraṇā
puruṣo'pyathavā nārī veśyā vāpsarasāṃ gaṇāḥ
acireṇa samāyāti hāridrasya prasādataḥ
rājā vā rājanārī vā rājaputro'thavā mune !

106.8

tālapatre vilikhyainaṃ yantramākarṣaṇādvayam
gur̤enaiva yathā pūrvaṃ prāṇān saṃsthāpya yatnataḥ
arcayitvā tvacākṣīre nikṣipya sādhyadiṅmukhaḥ
kvāthayenmantrajāpyena nārī puṃścāṅganā tathā
arcitā vaśamāyāti vivaśā madanāturā

106.6-2

taptāṅgāre śṛtaṃ havyaṃ lavaṇaṃ hiṅgusaṃyutam
svarūpeṇa ca saṃyuktaṃ madhūcchiṣṭena melayet
sādhyapratikṛtiṃ kṛtvā tasya prāṇān pratiṣṭhayet
śvetārkapatrayugmena puṭīkṛtya tanuṃ śubham
japeddīpaśikhāgre ca tathā cāṣṭasahasrakam
śīghramāyāti yuvatī madanākulacetanā

Linked texts (7)

Tantracintāmaṇi — Sanskrit
Indrajāla — Śivaśarman, Sanskrit
Indrajāla (Nityanātha) — Nityanātha, Sanskrit
Vidyārṇavatantra — Sanskrit
Āgamakalpalatā (Yadu Miśra) — Yadu Miśra, Sanskrit
Siṃhasiddhāntasindhu — Śivānanda Gosvāmin, Sanskrit
Divyatattva — Devanātha 1629, Sanskrit