Indrajalavidya 44
Indrajālavidyā 44
- Language
- Sanskrit
44.1
atha śrutidhara-kavitvādikaraṇam
pathyāghṛtam
pathyā vacā kaṇā śuṇṭhī saindhavaṃ maricaṃ vacā
śigruṃ pratipalaṃ cūrṇaṃ dvāviṃśatipalaṃ ghṛtam
ghṛtāccaturguṇaṃ kṣīraṃ dattvā sarvaṃ vipācayet
ghṛtaśeṣaṃ pibennityaṃ vāṅmedhāsmṛtibuddhidam
44.1-2
brāhmīghṛtam
vacā brāhmīphalaṃ kuṣṭhaṃ saindhavaṃ tilapuṣpikām
cūrṇayitvā dravairbhāvyaṃ brāhmīmaṇḍūkasambhavaiḥ
dinamekaṃ tataḥ pākyaṃ ghṛtaṃ kalkāccaturguṇam
ghṛtāccaturguṇaṃ deyaṃ kṣīraṃ brāhmīrasānvitam
ghṛtaśeṣaṃ samuttāryya lihèdvā buddhidāyakam
44.2
dve haridre vacā kuṣṭhaṃ pippalī viśvabheṣajam
ajājī ajamodā ca yaṣṭīmadhukasaindhavam
etāni samabhāgāni sūkṣmacūrṇāni kārayet
taccūrṇaṃ sarpiṣā lehyaṃ kārṣikaṃ vākyaśuddhikṛt
bhakṣayenmāsamekantu bṛhaspatisamo bhavet
44.3
brāhmī-muṇḍī-vacā-śuṇṭhī-pippalī-samacūrṇakam
madhunā bhakṣayet karṣaṃ naṣṭavāk śuddhavāgbhavet
44.4
vacā'sthi karavī gundrā muṣalī madhukaṃ balā
apāmārgasya pañcāṅgaṃ kṣaudreṇa pūrvavat phalam
44.5
apāmārgaḥ vacā śuṇṭhī viḍaṅgaḥ śaṅkhapuṣpikā
śatāvarī guḍūcī ca samaṃ cūrṇya harītakī
ghṛtena bhakṣayet sarvaṃ nityaṃ granthasahasradhṛk
44.6
aśvagandhā cājamodā pāṭhā kuṣṭhaṃ kaṭutrayam
śatapuṣpī viśvabījaṃ saindhavañca samaṃ samam
etadarddhaṃ vacā cūrṇaṃ melitaṃ madhusarpiṣā
bhakṣayet karṣamātrantu jīrṇānte kṣīrabhojanam
sahasragranthadhārī syād brahmacārī kavirbhavet
44.7
lihèjjyotiṣmatītailaṃ balayā vacayā saha
stokaṃ stokaṃ krameṇaiva yāvanniṣkacatuṣṭayam
nirvāte madhurāsī syād brahmacārī kavirbhavet
44.8
sūryyasya grahaṇe vendoḥ samantāmāharedvacām
cūrṇitāṃ saghṛtāṃ bhuktvā saptāhaṃ vākpatirbhavet
ityevamādiyogānāṃ mantrarājñī śivoditā
japtvā mantreṇa siddhiḥ syāt paścāt taireva bhakṣayet
mantrastu |—"oṃ hrīṃ hayaśīrṣavāgīśvarāya namaḥ” | sahasrajapaḥ
44.6-2
dhātrīphalarasairbhāvyaṃ vacācūrṇaṃ dināvadhi
ghṛtena lehayenniṣkāṃ vākśuddhismṛtibuddhikṛt
44.10
vacācūrṇaṃ pibet kṣīraiḥ punarmantreṇa mantrayet
bhojyakṣīrānnaśālyannaṃ saptāhād vākpatirbhavet
saptame aṣṭame caiva sākṣāt śrutidharo bhavet
44.11
vacācūrṇaṃ pibet kṣīrairghṛtaiḥ kṣaudraiśca yat punaḥ
saptāhakramayogena lehyaṃ syāt pūrvavat phalam
44.12
puṣyārkayoge saṃgṛhya śvetārkasya tu mūlakam
chāyāśuṣkantu taccūrṇaṃ mantreṇaivābhimantritam
karṣamarddhapalaṃ vāpi prātarutthāya yaḥ pibet
takreṇa sarpiṣā vāpi jīrṇānte kṣīrabhojanam
evaṃ saptāhamātreṇa kavirbhavati bālakaḥ
"oṃ maheśvarāya namaḥ” | anenābhimantrya pibet
Linked texts (8)
- Kāmaratna (Nityanātha) — Nityanātha, Sanskrit
- Indrajāla — Śivaśarman, Sanskrit
- Indrajāla (Nityanātha) — Nityanātha, Sanskrit
- Kāmarata — Nityanātha, Sanskrit
- Kāmaratna (Nāgabhaṭṭa) — Nāgabhaṭṭa, Sanskrit
- Kāmaratnatantra — Sanskrit
- Kāmaratna (Pārvatīputra Nityanātha) — Pārvatīputra Nityanātha, Sanskrit
- Nityanāthatantra — Sanskrit