Pramāṇa · Search · About · API

Indrajalavidya 55

Indrajālavidyā 55

Language
Sanskrit

55.1

atha mṛtasañjīvanī
mṛtasañjīvanīṃ vidyāṃ pravakṣyāmi samāsataḥ
liṅgamaṅkolavṛkṣādhaḥ sthāpayitvā prapūjayet
navaṃ ghaṭañca tatraiva pūjayelliṅgasannidhau
vṛkṣaṃ liṅgaṃ ghaṭañcaiva sūtreṇaikena veṣṭayet
caturbhiḥ sādhakairnityaṃ praṇipatya krameṇa tu
evaṃ dvitrīṇi yaḥ kuryyādaghoreṇa samarcayet
puṣpādiphalapākāntaṃ sādhanaṃ kārayed budhaḥ
phalāni pakvānyādāya pūrvoktaṃ pūrayed ghaṭam
tadghaṭaṃ pūjayennityaṃ gandhapuṣpā'kṣatādibhiḥ
oṣṭhavarjyaṃ tataḥ kuryyādvājināṃ gharṣayenmukham
tanmukhe vṛṃhaṇaṃ vṛttaṃ kiñcit kiñcit pralepayet
vistīrṇamukhabhāgāntaḥ kumbhakārakaroddhṛtām
mṛttikāṃ lepayet tatra tāni bījāni ropayet
kuṇḍalyākārayogena yatnādūrddhamukhairnaraiḥ
śuṣkaṃ tat tāmrapātrorddhaṃ bhāṇḍe deyamadhomukham
ātape dhārayet tailaṃ grāhayettacca rakṣayet
māsārddhañcaiva tattailaṃ māsārddhaṃ tilatailakam
nasyaṃ deyaṃ mṛtasyaitat samākṛṣya hi tena tu
tat kṛtvā jīvyate satyaṃ gatenāpi yamālayam
rogāpamṛtyusarpādimaṃto jīvati hi svayam

55.2

puṃśukraṃ pāradaṃ tulyaṃ tilatailena mardayed
nasyaṃ deyaṃ mṛtasyaiva kāladaṣṭasya vā kṣaṇāt
jīva āyāti no citraṃ mahādevena bhāṣitam

55.3

puṣyabhāskarayoge tu guḍūcīmūlamāharet
karṣamuṣṇājalaiḥ pīto mṛtamṛtyuharo bhavet
"oṃ aghorebhyo'tha ghorebhyo ghoramaghoratarebhyaḥ sarvataḥ sarvasarvebhyo namaste rudrarūpebhyaḥ” | uktaprayogānāmayaṃ mantraḥ

55.1-2

atha viṣanāmāni
śambhunoktaṃ samāsena viṣaṃ sthāvarajaṅgamam
yogañca kṛtrimañcaiva vṛścikādyaistu sambhavam
kramāllakṣaṇameteṣāṃ mantrayuktaṃ vadāmyaham
nāma vakṣye vidhānañca śambhunā kīrttitaṃ purā
bahvavo vatsanābhañca mustakaṃ puṣkaraṃ viṣam
krūraṃ śaṭhaṃ karmaṭhañca haridrā kālakūṭajam
indravajrañcaiva vīraṃ hāritaṃ gālavaṃ viṣam
śṛṅgī karkaṭaśṛṅgī ca meṣaśṛṅgī halāhalam
śākūṭaṃ vajraśṛṅgī ca añjanaṃ puṇḍarīkakam
saṅkocaṃ madhupākañca masūraṃ rohiṇaṃ tathā
pañcaviṃśatibhirbhedairvijñeyaṃ sthāvaraṃ viṣam
etanmadhye hyatikrūraṃ saṅkocaṃ kālakūṭakam
śṛṅgīṃ mustaṃ vatsanābhaṃ pañcamantu viṣāviṣam

55.2-2

eṣāṃ dehapraviṣṭānāṃ śṛṇu lakṣaṇamucyate
vāntirmūrcchā'tisārañca bhrāntiṃ śūlañca kampanam
kāsaśvāsau tīvradāhaṃ lakṣayeddaṃśane svayam

55.3-2

viṣacikitsā | putrajīvaphalāt majjāṃ śītatoyena peṣayet
bhojane cāñjane pāne lepaiḥ sarvaviṣāpahām
sthāvaraṃ jaṅgamaṃ krūraṃ kṛtrimaṃ yogajaṃ tathā
niṣkramātraṃ na sandehaḥ kāladaṣṭo hi jīvati

55.4

śādvalaṃ ṭaṅgaṇaṃ tutthaṃ kaṭphalaṃ rajanī vacā
naramūtreṇa saṃpiṣya ekaikantu viṣaṃ haret

55.5

samūlapatrāṃ sarpākṣīṃ tathaiva devadālikām
girikarṇyāśca vā mūlaṃ naramūtreṇa pūrvavat

55.6

trikaṭuṃ devadālīñca nasye sarvaviṣāpaham
ṭaṅgaṇaṃ devadālīñca jalapāne viṣāpahām

55.7

brahmadaṇḍīyamūlañca madhunā saha bhakṣayet
śvetāṅkolasya mūle ca mukhasthe tilake'thavā
mukhasthairaṇḍamūlaṃ vā chāyāśuṣkaṃ viṣāpaham

55.8

nīlasarpasya pucchantu kṛkalāsasya pucchakam
tāmreṇa veṣṭitaṃ kṛtvā mudrikāṃ tāñca dhārayet
tayā spṛṣṭajalaṃ pītaṃ sthāvaraṃ jaṅgamaṃ haret

55.6-2

bhūnāgasattvasañjātāṃ mudrikāṃ dhārayet kare
na tasyākramate satyaṃ viṣaṃ sthāvarajaṅgamam
tatspṛṣṭodakapānena viṣaṃ sarvaṃ vinaśyati

55.10

śirīṣabradhnakaṃ grāhyaṃ revatyāṃ candanānvitam
tadghṛṣṭaṃ marditaṃ gātre tasyāṅge viṣanāśanam

55.11

varāhagodhānakula-śaśakukkuṭapittakam
śvetāyā girikarṇyaśca phalaṃ mūlañca peṣayet
pāne sarvvaviṣaṃ hanti mṛto'pyuttiṣṭhate kṣaṇāt
nāmnā cāmṛtayogo'yaṃ svayaṃ rudreṇa bhāṣitaḥ

55.12

paṇavaṃ paṭahañcaiva hyanenaiva pralepayet
mṛto'pi viṣayogena śrutvā vādyaṃ prabudhyate

55.13

śvetāparājitāmūlaṃ pītvā dugdhe na mānavaḥ
sthāvarañca viṣaṃ hanti udarasthaṃ na saṃśayaḥ
sasimbukāñjikaṃ pītvā sthāvarādyaviṣaṃ haret

55.14

mantrastu |—“om̐ namo bhagavate uḍḍāmareśvarāya kuñcitāsatamarcitajaṭāya ṭhaḥ ṭhaḥ svāhā” | anena sarvvauṣadhamabhimantrayet

Linked texts (7)