Pramāṇa · Search · About · API

Indrajalavidya 9

Indrajālavidyā 9

Language
Sanskrit

Contents

9.1

purīṣastambhanam
purīṣanāśanārthāya vir̤aṅgaṃ tolakadvayam
pippalītolakaṃ gṛhya śuṇṭhīñca tolakatrayam
tejapatrasya kṣīreṇa miśrayitvā japenmanum
śatamaṣṭottaraṃ japtvā miśrayedbahuyatnataḥ
mantraṃ tasya pravakṣyāmi śṛṇuṣvānandabhairava
śrīmayā vāgbhavañcaiva śaktibījatrayaṃ tathā
śivavāyujalaṃ pṛthvī vahnijāyā tataḥ param
mantrayitvā pived dravyaṃ purīṣaṃ nāśayed dhruvam
iti śivoktamindrajālam
yasyeśvarasya vimalaṃ caraṇāravindam
saṃsevyate vibudhasiddhamadhuvratena
nirmāṇaśātakaguṇāṣṭakavargapūrṇam
taṃ śaṅkaraṃ sakaladuḥkhaharaṃ namāmi

9.1-2

kāmaratnamidaṃ citraṃ nāma susrāvitaṃ mayā
vaśyādi-yakṣiṇīmantrasādhanāntaṃ samuddhṛtam
śāntivaśyastambhanāni dveṣaṇoccāṭanaṃ tathā
māraṇāntāni śaṃsanti ṣaṭ karmāṇi manīṣiṇaḥ

9.2

vaśyā''karṣaṇakarmāṇi vasante sādhayet priye !
grīṣme vidveṣaṇaṃ kuryāt prāvṛṣi stambhanaṃ tathā

9.3

śiśire māraṇañcaiva śāntikaṃ śaradi smṛtam
hemante pauṣṭikaṃ kuryāt catuḥkarmaviśāradaḥ

9.4

vasantamraiva pūrvāhne grīṣmo madhyāhna ucyate
varṣā jñeyā'parāhne tu pradoṣe śiśiraḥ smṛtaḥ

9.5

arddharātrau śaratkāla ūṣā hemanta ucyataṃ
ṛtavaḥ kathitā hyete sarve yena krameṇa tu

9.6

tadvihīnā na sidhyanti prayatnenāpi kurvataḥ
ananyakaraṇāt te hi dhruvaṃ sidhyanti nānyathā

9.7

vaśīkaraṇakarmāṇi saptamyāṃ sādhayedbudhaḥ
tṛtīyāyāṃ trayodaśyāṃ tathā''karṣaṇakarma vai

9.8

uccāṭanaṃ dvitīyāyāṃ ṣaṣṭhyāñcaiva prakārayet
stambhanañca caturdaśyāṃ caturthyāṃ pratipadyapi

9.9

mohanantu navamyāñca tathā'ṣṭamyāṃ prayojayet
dvādaśyāṃ māraṇaṃ śastamekādaśyāṃ tathaiva ca

9.10

pañcamyāṃ paurṇamāsyāñca yojayecchāntikādikam
sarvavidyāprasiddhyarthaṃ tithayaḥ kathitāḥ kramāt

9.11

stambhanaṃ mohanañcaiva vaśīkaraṇamuttamam
māhendre vāruṇe caiva karttavyamiha siddhidam

9.12

vidveṣoccāṭanaṃ vahni-vāyuyogena kārayet
jyeṣṭhā caivottarāṣār̤hā anurādhā ca rohiṇī
māhendramaṇḍalasthā ca proktakarmaprasiddhidāḥ

9.13

syāduttarapadā mūlā-ṛkṣe śatabhiṣā tathā
pūrvabhādrapadā'śleṣā jñeyā vāruṇamadhyagāḥ
pūrvāṣār̤hā tataḥ karma-siddhidā śambhunā smṛtāḥ

9.14

svātau hastā mṛgaśirā ārdrā cottaraphalgunī
puṣyā punarvasurvahni-maṇḍalasthā prakīrttitāḥ

9.15

aśvinau bharaṇī citrā dhaniṣṭhā śravaṇā maghā
viśākhā kṛttikā pūrva-phalgunī revatī tathā
vāyumaṇḍalamadhyasthā tattatkarmaprasiddhidāḥ

9.16

śāntike pauṣṭike caiva ābhicārikakarmaṇi
tarjanyādisamārūḍhaṃ kuryyād yatnāt kramaṃ sudhīḥ
tatrāṅguṣṭhasamārūḍhaḥ sarvakarmaśubhe rataḥ

9.17

viddhimantrasamāyuktamauṣadhaṃ saphalaṃ bhavet
vidhimantravihīnantu kāṣṭhavad bheṣajaṃ bhavet

9.18

ekānte tu śubhāraṇye tiṣṭhatyeva yadauṣadham
kāryyasiddhirbhavet tena vīryyamasti ca tatra vai

9.19

valmīkakūparakhyātarutaladevāyatanaśmaśāneṣu
jātā vidhinā vihitāṣyauṣadhayaḥ siddhidā na syuḥ

9.20

jalajīrṇamagnikavalitamakālakṛmibhakṣya bhūtalagraśīram
nyūnaṃ tathā'dhikatayā dravyamadravyaṃ jagurbhiṣajaḥ

9.21

bhūtādiyuktamabhyarcya girīśaṃ prātarutthitaiḥ
ārdrarupāsitairvāpi grāhyaṃ sarvamauṣadham

9.22

ityevaṃ sarvamūlānāṃ vidhimantraśca kathyate
ādau gatvā vṛkṣamūlaṃ tato vai abhimantrayet

9.23

“oṃ vetālāśca piśācāśca rākṣasāśca sarīsṛpāḥ
apasarpantu te sarve vṛkṣādasmācchivājñayā”

9.24

tato natiḥ | oṃ namaste'mṛtasambhūte balavīryyavivarddhini
balamāyuśca me dehi pāpānme trāhi dūrataḥ

9.25

tataḥ khananam | yena tvāṃ khanate brahmā yena tvāṃ khanate bhṛguḥ
yena indro'tha varuṇo yena tvāmupacakrame
tenāhaṃ khanayiṣyāmi mantrapūtena pāṇinā
mā te pāto mā nipāti mā te tejo'nyathā bhavet
atraiva tiṣṭha kalyāṇi ! mama kāryyakarī bhava
oṃ hrīṃ kṣauṃ phaṭ svāhā| anena mūlikāṃ chedayet

9.25.p1

ityevaṃ sarvavidyānāṃ siddhaye ṛtunirṇayaḥ

Linked texts (9)