Pramāṇa · Search · About · API

Indrajalavidya 95: atha kāryyaviśeṣe yojanapallavādinirṇayaḥ

Indrajālavidyā 95

Language
Sanskrit

atha kāryyaviśeṣe yojanapallavādinirṇayaḥ

95.38

pañcāśadvarṇarūpātmā mātṛkā parameśvarī
tatrotpannā mahākṛtyā trailokyabhayadāyinī
yathā kāmo japaḥ kāryyo mantrāṇāmapi me śṛṇu

95.36

mantrādau yojanaṃ nāmnaḥ pallavaḥ parikīrttitaḥ
māraṇe viśvasaṃhāre grahabhūtanivāraṇe
uccāṭane ca vidveṣe pallavaḥ parikīrttitaḥ
mantrānte nāmasaṃsthānaṃ yoga ityabhidhīyate
śāntike pauṣṭike vaśye prāyaścittaviśodhane
mohane dīpane yogān prayuñjanti manīṣiṇaḥ
stambhoccāṭanocchedavidveṣeṣu sa cocyate

95.40

nāmna ādyantamadhyeṣu mantraḥ syādrodha ucyate †
mantrābhimukhyakaraṇe sarvvavyādhinivāraṇe
jvaragrahaviṣādyārtti-śāntikeṣu sa cocyate
sammohane sa evātha mantrāṇāmakṣarāṇi ca

95.41

ekaikāntaritaṃ yattu grathanaṃ parikīrttitam
tacchāntika vidhātavyaṃ nāmādyante yathā manuḥ
tat sampuṭaṃ bhavettattu kolane paribhāṣitam
stambhe mṛtyuñjaye icchedrakṣādiṣu ca sampuṭam

95.43

mantramādau vadetsarvaṃ sādhyasaṃjñāmanantaram
viparītaṃ punaścānte sampuṭaṃ tatsmṛtaṃ budhaiḥ
mantrārṇadvandvamekaikaṃ sādhyanāmākṣaraṃ kramāt
kathyate savidarbhastu vaśyākarṣaṇapauṣṭike

95.44

bandhanoccāṭane dveṣe saṅkīrṇe huṃ padaṃ japet
phaṭkāraṃ chedane huṃ phaṭ riṣṭigrahanivāraṇe
puṣṭau cāpyāyane vauṣaṭ bodhane malinī kṛtau
agnikārye japet svāhāṃ namaḥ sarvatra cārcane

95.45

śāntipuṣṭivaśadveṣākṛṣyuccāṭanamāraṇe
svāhā svadhā vaṣaṭ huṃ ca vauṣaṭ phaṭ yojayet kramāt
vaśyākarṣaṇasantāpajvare svāhāṃ prakīrttayet
krodhopaśamane śāntau prītau yojyaṃ namo budhaiḥ
vauṣaṭ sammohanoddīpa-puṣṭimṛtyuñjayeṣu ca
huṃkāraṃ prītināśe ca chedane māraṇe tathā
uccāṭane ca vidveṣe vauṣaṭ cāmīkṛttau vaṣaṭ
mantroddīpanakāryyeṣu lābhālābhe vaṣaṭ smṛtam

95.46

strīpuṃnapuṃsakatvena tridhā syurmantrajātayaḥ
strīmantrā vahnijāyāntā namo'ntāśca napuṃsakāḥ
huṃ phaṭ pumāṃsa ityuktā vaśyaśāntyābhicārake
kṣudrakriyādyupadhvaṃse striyo'nyatra napuṃsakāḥ

95.47

atha āgneyasaumyādimantradharmaḥ
tārāntyāgniviṣaprāyo mantra āgneya ucyate
saumyāśca manavaḥ proktā bhūyiṣṭhendamṛtākṣarāḥ
āgneyamantrāḥ saumyāḥ syuḥ prāyaśo'nte namo'nvitāḥ
mantraḥ śānto'pi raudratvaṃ huṃ phaṭ pallavito yadi

95.48

atha mantrāṇāṃ suptaprabuddhakālāḥ
suptaḥ prabudhyamāno'pi mantraḥ siddhiṃ na gacchati
svāpakālo vāmavaho jāgaro dakṣiṇavahaḥ
svāpakāle tu mantrasya japo na ca phalapradaḥ
āgneyāḥ samprabudhyante prāṇe carati dakṣiṇe
vāme carati saumyāśca prabuddhā mantriṇāṃ sadā
nāḍīdvayagate prāṇe sarve bodhaṃ prayānti ca
prayacchanti phalaṃ sarve prabuddhā mantriṇāṃ sadā

95.46-2

atha āsanāni
āsanāni pravakṣyāmi karmaṇāṃ vihitānyapi
padmāsanaṃ pauṣṭike tu śāntike svastikāsanam
ākṛṣṭe pauṣṭike tadvadvidveṣe kukkuṭāsanam
arddhasvastikamuccāṭe arddhasthāpanapārṣṇikam
māraṇe stambhane tadvadikaṭaṃ parikīrttitam
vaśye bhadrāsanaṃ teṣāṃ kathyate cātha bhāvanā

95.50

atha vikaṭakukkuṭāsanayorlakṣaṇaṃ yathā
jānujaṅghāntarāleṣu bhujayugmaṃ praveśayet
vikaṭāsanametat syādupaviśyotkaṭāsane
kṛtvotkaṭāsanañcaiva samapādadvayaṃ tataḥ
vaśye meṣāsanaṃ proktam ākṛṣṭivryāghracarmaṇi
uṣṭrāsanaṃ tathoccāṭe vidveṣe turagāsanam
māraṇe māhiṣaṃ carma mokṣe hastyajinaṃ bhavet
athavā kambalaṃ raktaṃ sarvakarmasu kārayet

95.51

ṣaḍmudrāḥ kramaśo jñeyāḥ padmapāśagadāhvayāḥ
muṣalāśanikhaṅgākhyāḥ śāntikādiṣu karmasu

95.52

śāntipauṣṭikavaśyeṣu saundaryātiśayānvitāḥ
sarvābharaṇasandīptāḥ prāptakālamanorathāḥ
dhyātavyā devatāḥ samyak suprasannānanāmbujāḥ
ākarṣaṇe'pi tadvacca vaḍiśairiva matsyakān
sādhyamākarṣaṇe dveṣe bhartsyamānaṃ janairiva
badhyamāno janairdaṇḍairdāritastaskarā yathā
ulūko vā yathā riṣṭairmantavyoccāṭane ripuḥ
yatkiñcit śavamāruhya sandaṣṭauṣṭhapuṭaḥ krudhā
karma kuryāt tato mantrī yathā krūreṣu karmasu

Linked texts (7)