Pramāṇa · Search · About · API

Indrajalavidya 96

Indrajālavidyā 96

Language
Sanskrit

96.1

atha rakṣārtham
grāme ca nirjane deśe vidadhyādabhicārakam
yatrābhicārahomantu kuryācca bhuvi sādhakaḥ
tatrābhito bhaṭaiḥ rakṣāṃ kārayedātmasiddhaye
na ceccānyaḥ kṣitipatiścārairjñātvā nihantyamum

96.2

atha kuṇḍam
vidveṣe cābhicāre ca trikoṇaṃ kuṇḍamiṣyate
dvimekhalaṃ koṇamukhaṃ hastamātrantu sarvataḥ
uccāṭanantu nairṛtyāṃ śatrupakṣasya kārayet
utsādanantu vāyavyāṃ devānāmapi kārayet
śatrūṇāṃ tāpane śastaṃ yonyākhyamagnikoṇagam
arddhacandrantu yāmyāyāṃ † śatrūṇāṃ māraṇe sthitam
trikoṇaṃ nairṛte kuṇḍaṃ ripūṇāṃ vyādhivarddhanam
dāhāyāgnau ca vidveṣe kuṇḍaṃ pūrṇendusannibham
caturasrañca karttavyaṃ dveṣādau tu vicakṣaṇaiḥ
kuṇḍaṃ sulakṣaṇaṃ kṛtvā tatra karmāṇi sādhayet
caturasre bhavedvaśyamākarṣaḥ syāt trikoṇake
karṣaṇastambhane devi ! vidveṣañca trikoṇake
athaivoccāṭanaṃ proktaṃ ṣaṭkoṇe māraṇaṃ smṛtam
udīcyāṃ ‡ pauṣṭike kuṇḍaṃ vāruṇyāṃ śāntikādiṣu
uccāṭe cānileja kuṇḍaṃ yāmye ca māraṇaṃ bhavet
mānahīnādikaṃ § doṣaṃ nāsti kuṇḍe'bhicārake
śubheṣu sarvvavivāhāntāḥ kriyāstāḥ krūrakarmaṇi
māraṇāntāḥ samuddiṣṭā vaṅgerāgamavedibhiḥ

96.3

tato rājñātividvāṃsamatharvvaśrutipāragam
bahubhirdraviṇairvastrairnānāratnairvibhūṣaṇaiḥ
pūjayitvā tataḥ paścād vidhinā vṛṇuyāddvijam
vṛto'pyutsāhasaṃyuktaḥ sarvarakṣāparāyaṇaḥ
yatnato māraṇaṃ karma kuryādrājño hitecchayā
vittaśāṭhyaṃ parityajya sarvakarmāṇi kārayet
vittaśāṭhyaṃ nihantyāśu putramāyuryaśodhanam
deśarakṣaṇadharmeṇa na svayaṃ pāpabhāg bhavet
tejonāśo bhavedādau balanāśastato bhavet
sapatnasya tato nāśastisraścāvṛttayastataḥ
cirāvṛttau phalālābhe trirāvṛttaṃ punaścaret

96.4

atha yathottaraṃ prayogotkarṣaḥ
vaśyāt stambhanamutkṛṣṭaṃ stambhanānmohanaṃ mahat
mohanādveṣaṇaṃ śreṣṭhaṃ dveṣāduccāṭanaṃ varam
uccāṭanādapi mahanmāraṇaṃ sarvatomahat
māraṇādadhikaṃ karma na bhūtaṃ na bhaviṣyati
tatraiva dakṣiṇe cittaṃ kṛtvā māraṇamārabhet
śāntipuṣṭī dinasyānte sandhyākāle tu māraṇam

96.5

atha kumbhasthāpanam
āṅgirase
śāntike svarṇakumbhañca navaratnairvibhūṣitam
tadabhāve raupyakumbhaṃ tāmraṃ vāpi sulakṣaṇam
abhicāre lauhakumbhaṃ sthāpayet susamāhitaḥ
utsāde kācakumbhañca mohane raityakumbhakam
uccāṭane ca mṛtkumbhaṃ kālamaṇḍalasaṃsthitam
sarvakarmaṇi vā kuryāt kumbhaṃ tāmramayaṃ tathā

96.6

tattatkumbhañca saṃsthāpya rudraṃ devīñca pūjayet
upacārakrameṇaiva devaṃ dhyāyed yathāvidhi
śūlahastaṃ mahāraudraṃ sarvavairinisūdanam
pūrṇacandrasamābhāsaṃ rudraṃ vṛṣabhavāhanam
athavānyaprakāreṇa dhyānaṃ kuryyāt samāhitaḥ

96.7

kāśmīrasphaṭikaprabhaṃ trinayanaṃ pañcānanaṃ śūlinam
khaṭvāṅgāsivaraprasādaḍamaruṃ cakrābjabījābhayam
bibhrāṇaṃ daśadorbhirakṣajaṭilaṃ vīrāsane saṃsthitam
gaurīśrosahitaṃ sadaivamakhilaṃ dhyāyecchivaṃ carmiṇam

96.8

rudramantreṇa kuryyācca upacārān pṛthagvidhān
bhadrakālīñca sampūjya naivedyaiśca pṛthagvidhaiḥ
paṭṭavastrairalaṅkārairbalidānaiḥ pṛthagvidhaiḥ
yatra na syādupāyo'nyaḥ śatrorbhayanivṛttaye
tadā'nanyagatitvena māraṇādīni kārayet

96.6-2

dīpādagniṃ samānīya dhūpādvā cāntyajādapi
vidveṣaṇābhicāre ca kravyādaṃśaṃ na santyajet
atra caiva vidhāyāgniṃ paristīryya śaraistṛṇaiḥ
vibhītakaparidhyā ca kalpayed yasya māraṇam
juhuyānnimbatelāktaiḥ kākolakīyapakṣakaiḥ
dārayainaṃ śoṣayainaṃ mārayetyabhidhāya ca
aṣṭottaraśatenaiva manasā juhuyādṛcā
homānte vidhivat kṛtyāmārādhyāgneśca sannidhau
yo me ca kaṇṭakaṃ dūrād dūraṃ vā cāntike'pi ca
piba hvayamasūk tasyetyuktvā sādhu nivedayet
saṃracyāgniṃ vidhānena navarātraṃ samāpayet
mṛtastiṣṭhati jñātvaivaṃ tāvadasya ripormṛtiḥ
vamanaṃ lohitaṃ proktam uṣṇīśaṃ lohitaṃ smṛtam
saṅkalpya japahomādau tadāvaraṇamārabhet

96.10

svāpakālo vāmavaho jāgaro dakṣiṇāvahaḥ
śāntikarmaṇi miśraṃ vā japenmantraṃ prasiddhaye

Linked texts (5)