Indrajalavidya 98
Indrajālavidyā 98
- Language
- Sanskrit
98.1
atha śāntikarma
ṛṣaya ūcuḥ |—nāmatrayasya māhātmyaṃ śrotukāmā vayaṃ prabho !
bhagavan ! śrotumicchāmi vaktumarhasyaśeṣataḥ
98.2
brahmovāca |—atiguhyataraṃ mantraṃ varṣakoṭiśatairapi
na śakyaṃ vistaraṃ vaktuṃ saṃkṣepācchṛṇuta dvijāḥ !
98.3
acyutānantagovindaiścaturthyantaistribhiḥ padaiḥ
namo'ntairjapakāle tu mūlamantra itoritaḥ
athavā'pi samastaistu caturthyantaikamantratā
tadṛṣiḥ śaunako jñeyaḥ pṛthak pakṣe parāśaraḥ
vyāsaśca nāradaścaiva virāṭchanda udīritaḥ
paraṃ brahma tathā proktaṃ harirvā devatetyapi
japakāle tu pūjāyāṃ namaḥśabdaṃ prayojayet
tarpaṇe tarpayāmīti dvitīyāntaṃ prayojayet
svāhāntaṃ homakāle tu caturthyantaṃ tu yojayet
ṣaḍaṅga mantrairetaistu hṛdayādikrameṇa tu
netrāntāḥ svayamevaite prayojyā mantravittamaiḥ
aviditvā ṛṣiṃ chando devatāṅgānyapi dvijaḥ
kevalaṃ svayamevaitajjaptāraṃ rakṣati dhruvam
sāṅgañca yojayennityaṃ sapta sapta ca sapta ca
saptavāraṃ kṛte jāpe na sidhyati yadā punaḥ
saptavāraṃ saptavāraṃ tadā kuryāt prayogakam
98.4
atha haridhyānam
atha dhyānaṃ pravakṣyāmi sarvapāpapraṇāśanam
“śaṅkhacakradharaṃ devaṃ caturbāhuṃ kirīṭinam
sarvāyudhairupetañca garuḍopari saṃsthitam
śanakādimunīndraistu sarvadevairupāsitam
śrībhūmisahitaṃ devamudayādityasannibham
prātarudyatsahasrāṃśu maṇḍaloparisaṃsthitam
sarvalokasya rakṣārthamanantaṃ nityameva ca
abhayaṃ varadañcaiva prayacchantaṃ mudānvitam”
evaṃ dhyātvā hariṃ nityaṃ paraṃ brahmasvarūpiṇam
prātarmadhyāndine caiva sāyāhne ca viśeṣataḥ
arcayeddevadeveśaṃ ghṛtapuṣpajalādibhiḥ
haviṣāgnau jalaiḥ puṣpairmanasā hṛdaye harim
arcayantaṃ ca yo nityaṃ japena ravimaṇḍale
kiñcidaṅgānārcanaṃ kṛtvā japennityamatandritaḥ
aśuciśvātmanī vāpi manasā pāpamācaret
śucireva japennityaṃ nāmatrayajapādadvijāḥ !
viniyogān pravakṣyāmi yathāvadvijasattamāḥ !
nāmnāt paratarā rakṣā rogārttānāṃ vidhīyate
aṣṭottarasahasraṃ vā śataṃ vā japasaṃkhyayā
ravivāre tathā'ṣṭamyāṃ rogārttān mūrdhni mārjayet
nityameva pibet toyamaṣṭāviṃśatisaṃkhyayā
huned ghṛtaistilairdūūrvā-guḍūcībhiḥ pṛthak pṛthak
lakṣañcaiva japenmantraṃ mahārogapraśāntaye
prauvṛkṣāśvatthamūle vā rogiṇaṃ saṃspṛśan japet
spṛśan jahvā nirīkṣeta cādityaṃ manasā smaran
evaṃ kṛtavataḥ puṃso rogaśāntirbhaviṣyati
kanyāṃ vā lājahomena striyaṃ vā vilvapatrakaiḥ
putrārthī ghṛtahomena cārogyañca tilairghṛtaiḥ
guḍūcīghṛtadūrvābhistilairvilvaiḥ kuśaiḥ śaraiḥ
yathākāmī tu juhuyāt tattatkāmasya siddhaye
grahāpasmārakuṣmāṇḍāḥ piśācāḥ pretasaṃsthitāḥ
lakṣe hute ca dūrvābhisteṣāṃ śāntirbhaviṣyati
ravivāre jale sthitvā nābhimātre japennaraḥ
aṣṭottarasahasrantu jvaraśāntirbhaviṣyati
spṛṣṭvā'śvatthaṃ japedvarṣaṃ ravimaṇḍalamadhyagam
dhyāyan kṛṣṇaṃ labhet kāmamanurūpaṃ kuṭumbinām
acyutānantagovinda-nāmoccāraṇabhoṣitāḥ
naśyanti sakalā rogāḥ satyaṃ satyaṃ vadāmyaham
satyaṃ satyaṃ punaḥ satyamutkṣipya bhujamucyate
vedaśāstrāt paraṃ nānyat na devaḥ keśavāt paraḥ
jvaragrahādigrastastu spṛṣṭvā lakṣaṃ japejjale
asādhyo'pi bhavet sustho bhasmanā tār̤ayed budhaḥ
mūrdhni caiva lalāṭe ca nyasenmantratrayaṃ hṛdi
ārogyaṃ sarvajantūnāṃ yathecchaṃ gacchati svayam
mokṣakāmo japenmantramaṣṭottarasahasrakam
yāvajjīvaṃ kare tasya sthitā muktirna saṃśayaḥ
brāhmaṇāḥ kṣatriyā vaiśyāḥ śūdrāśca vividhāstathā
sarve bhavanti vai muktā nāmatrayajapād dvijāḥ !
dūrvābhavāśca samidho godugdhena samanvitāḥ
hotavyāḥ śāntike devi ! śāntiryena bhavet sphuṭam
98.1-2
iti sanatkumārasaṃhitāyāṃ śāntikalpo nāma kalpadvayaṃ sampūrṇam
atha ātharvaṇoktajvaraśāntiḥ
asya mantrasya agastya ṛṣiranuṣṭup chandaḥ kālikā devatā
jvarasya sadyaḥ śāntyarthe viniyogaḥ |—
"oṃ kuberante mukhaṃ raudraṃ nandimānandimāvahan
jvaraṃ mṛtyubhayaṃ ghoraṃ jvaraṃ nāśayate dhruvam
98.2-2
sahasramayutaṃ vāpi japet śāntirbhaved dhruvam
āmrapatrasya homena jvaraśāntirbhavennṛṇām
98.3-2
praṇavaṃ pūrvamuccāryya śānte yugmaṃ tathaiva ca
sarvvāriṣṭanāśinau tu tadante vahnivallabhā
"oṃ śānte śānte sarvvāriṣṭanāśini ! svāhā"
98.4-2
ekalakṣajapenāpi sarvvaśāntirbhaved dhruvam
98.5
samāhitamanā bhūtvā manasā cārthacintanāt
vijñeyā mānasī bhaktiḥ śāntikarmmaṇi yojayet
98.6
atha tantroktajvaraśāntiḥ
kathayāmyatha lokānāṃ hitāya sarvaśāntikam
vidhānaṃ yatsamāiṣṭaṃ tantrarāje mayottare
śuddhasphaṭikasaṅkāśaṃ devadevaṃ trilocanam
candramaṇḍalamadhyasthaṃ candracūḍaṃ jaṭādharam
caturbhujaṃ vṛṣārūḍhaṃ bhairavaṃ tumburuṃ vibhum
śūlamālādharaṃ dakṣe vāme pustaṃ sudhāghaṭam
sarvāvayavasaṃyuktaṃ sarvābharaṇabhūṣitam
sitavastraparīdhānaṃ nāgahāravirājitam
mānase bhāvayedevaṃ sarvaśāntikaraṃ śivam
98.8
atha tumburubhairavamantraḥ
asya mantraṃ pravakṣyāmi devānāmapi durlabham
yena vijñānamātreṇa jāyante sarvasiddhayaḥ
ādau tāraṃ samuddhṛtya tataḥ tumburubhairavapadaṃ dattvā śivaṃ bījam amukasya padaṃ vadet
sarvaśāntipadaṃ dattvā padaṃ deyaṃ kurudvayam
īśānaṃ vahnimārūḍhaṃ dvitīyasvarabhūṣitam
nādabindusamāyuktaṃ vahnimāyāmanantaram
anena balimādadyādannādikasamanvitam
pūjayet śvetadūrvābhirnānāpuṣpairviśeṣataḥ
dhūpadīpādisaṃyuktaiḥ sahasraṃ prajapenmanum
yasya nāmnā bhavet tasya sarvaśāntiruttamā
sādhyamaulau sudhādhāraṃ tasya mūrdhni pravarṣiṇam
aharniśaṃ smareddevaṃ śāntipuṣṭikaṃ śivam
homaṃ vā kārayedebhirdurvāpuṣpākṣatādibhiḥ
tilajīrasamāyuktairdravyaiśca ghṛtasaṃyutaiḥ
trikoṇeke tataḥ kuṇḍe vahniṃ prajvālya homayet
daśāṅgakasya homena tataḥ śāntirbhavediti
98.6-2
atha sañjīvanī vidyā
athavāpi mahādevyāḥ sañjīvantyāḥ kramādiha
japena kārayecchāntiṃ sarvopadravanāśinīm
“oṃ namo bhagavati mṛtasañjīvani ! amukasya śāntiṃ kuru
kuru svāhā”
98.10
anena manunā mantrī bhāvayitvā sucetasā
gokṣīraśaśimiśrābhāmarddhendukṛtaśekharām
trimukhīṃ ṣaḍbhujāṃ tryakṣīṃ nṛtyantīṃ yamapṛṣṭhagām
jaṭājūṭasamāyuktāṃ raktavastraparicchadām
khaṅgaṃ triśūlaṃ kartrīñca dakṣiṇe diśi vāmake
kheṭakaṃ ḍamaruṃ cakraṃ dhārayantīṃ śavāsanām
pratyālīḍhapadāmbhojāṃ muṇḍamālāvvalambinīm
kāñcīmañjīrahārādyairbhūṣaṇaiḥ paribhūṣitām
asyāśca dhyānamātreṇa tannāsti yanna sādhayet
Linked texts (3)
- Indrajāla — Śivaśarman, Sanskrit
- Indrajāla (Nityanātha) — Nityanātha, Sanskrit
- Mantravidyā — Sanskrit