Kamarata 6
Kāmarata 6
- Language
- Sanskrit
6.1
ityevaṃ sarvavidyānāṃ siddhaye kālanirṇayaḥ |
kathitaṃ cātra yatnena mūlikāgrahaṇādikam || 8 ||
6.2
atha vaśīkaraṇam
6.3
tatra sarvajana vaśīkaraṇam
6.4
varṇānāmuttamaṃ varṇaṃ mantrasthānaṃ tathaiva ca |
oṅkāraśirasaṃ cāpi oṅkāraśirasaṃ tataḥ || 1 ||
6.5
adhobhāge ca rephañca dattvā mantraṃ samuddharet |
nirāmiṣānnabhoktā ca japtavyo mantra eva ca || 2 ||
6.6
kroṃ proṃ vroṃ anena mantreṇa-
6.7
asādhyāścāpi rājānaḥ putramitrāśca bāndhavāḥ |
ye me gotrasamutpannāḥ paśavo ye ca sarvataḥ || 3 ||
6.8
te sarve vaśatāṃ yānti sahasrārddhasya jāpanāt |
pṛṣṭvā dṛṣṭvā ca ye sādhyā gṛhītvā nāma tatra vai || 4 ||
6.9
ityādikāḥ sarvamantrā grāhyā bhaktyā gurostadā |
siddhyanti sarvakāryāṇi nānyathā siddhibhāgbhavet || 5 ||
6.10
mantraḥ
6.11
oṃ namaḥ kaṭavikaṭaghorarūpiṇīsvāhā || anena mantreṇa saptābhimantritaṃ bhakta piḍaṃ yasya nāmnā saptāhaṃ khādyate sa dhruvameva vaśyo bhavati ||
6.12
oṃ namaḥ kaṭavikaṭaghorarūpiṇī svāhā |
6.13
mantraḥ
6.14
oṃ vaśyamukhī rājamukhī svāhā || anena mukhaprakṣālanātsarve vaśyā bhavanti ||
6.15
mantra śloka
6.16
oṃ rājamukhi vaśyamukhi svāhā || vāmahastetailaṃ saṃsthāpya anāmikayā tridhā āmantrya punarmūlamantraṃ tridhā paṭhitvā prātaḥkāle śayyāyāṃ sthitvā mukhakeśādau vilepayet | tadā sarvejanā vaśyā bhavanti vyāghropi na khādati ||
6.17
mantraḥ
6.18
oṃ cāmuṇḍe jaya jaya stambhaya stambhaya jaṃbhaya jaṃbhaya mohaya mohaya sarvasattvānnamaḥ svāhā anena puṣpāṇyabhimaṃtrya yasmai dīyate sa vaśyo bhavati ||
6.19
oṃ cāmuṇḍe jaya jaya stambhaya stambhaya jambhaya jambhaya mohaya mohaya sarva sattvānamah savāhā |
6.20
ekacittasthito mantrīmantra japtvāyutatrayam |
tataḥ kṣobhayate lokān darśanādeva sādhakaḥ || 6 ||
6.21
bhūtākhyavaṭamūlaṃ ca jalena saha gharṣayet |
vibhūtyā saṃyutaṃ mantraṃ tilakaṃ lokavaśyakṛt || 7 ||
6.22
puṣye punarnavāmūlaṃ kare saptābhimantritam || baddhvā sarvatra pūjyaḥ syānmantrastavatraiva kathyate || aiṃ rauṃ ḍaṃ kṣobhaya bhagavati tvaṃ svāhā | mantrabhimamuktayogasya pūrvamayutadvayaṃ japettataḥ || 8 ||
6.23
apāmārgasya mūlantu peṣayedrocanena ca |
lalāṭe tilakaṃ kuryādvaśī kuryājjagatrayam || 9 ||
6.24
oṃ aiṃ rauṃ ḍaṃ kṣobhaya bhagavati tvaṃ svāhā |
6.25
oṃ namaḥ kandarpaśaravijālinimālini sarvalokavaśaṃkari svāhā || iti mantrayuktayogasyāṣṭottarasahasraṃ japettataḥ siddhiḥ ||
6.26
oṃ namaḥ kandarpaśara vijālinimālini sarvalokavaśaṃkari svāhā |
6.27
kṛṣṇapakṣe caturdaśyāmaṣṭamyāṃ vāhyupoṣitaḥ |
baliṃ dattvā samuddhṛtya sahadevīṃ sacūrṇayet ||
6.28
tāmbūlena tu taccūrṇaṃ dattaṃ vaśyakaraṃ dhruvam |
snāne lepe ca taccūrṇaṃ yojyaṃ vaśyakaraṃ bhavet || 10 ||
6.29
rocanāsahadevībhyāṃ tilakaṃ lokavaśyakṛt |
śirasā dhārettacca cūrṇaṃ sarvatra vaśyakṛt || 11 ||
6.30
mukhe kṣiptvā ca tanmūlaṃ kaṭyāṃ baddhvā ca kāmayet |
yāṃ nārīṃ sā bhavedvaśyā mantrayogena kathyate ||
6.31
oṃ namo bhagavatimātaṅgeśvarī sarvamukharañjini sarveṣāṃ mahāmāye mātaṅgi kumārike lahalahajihve sarvalokavaśaṃkari svāhā || sahasraṃ japtvā uktayogānāṃ siddhiḥ || 12 ||
6.32
śvetaparājitāmūlaṃ candragraste samuddhṛtam |
rañjitākṣo narastena vaśīkuryājjagatrayam |
tanmūlaṃ rocanāyuktaṃ tilakena jagadvaśam || 13 ||
6.33
oṃ namo bhagavatimātaṅgeśvari sarvamukharañjini sarveṣāṃ mahāmāye mātaṅgi kumārike lahalahajihve sarvaloka vaśaṃkari svāhā
6.34
grāhyaṃ kṛṣṇatrayodaśyāṃ śvetaguñjīyamūlakam |
tāmbūlena pradātavyaṃ sarvalokavaśaṃkaram || 14 ||
6.35
śilārocanātāmbūlaṃ vāriṇā tilake kṛte |
saṃbhāṣaṇena sarveṣāṃ vaśīkaraṇamuttamam |
svarṇena veṣṭitaṃ kṛtvā tenaiva tilake kṛte || 15 ||
6.36
dṛṣṭamātre vaśaṃ yāti nārī vā puruṣo'pi vā |
6.37
oṃ vajrakiraṇeśiverakṣabhavemamādya amṛtaṃ kuru kuru svāhā |
imaṃ maṃtramuktayogena sahasraṃ japettataḥ siddhiḥ || 16 ||
6.38
oṃ vajrakiraṇe śive rakṣa bhavemamādya amṛtaṃ kuru kuru svāhā |
6.39
hṛtpādacakṣurnāsānāṃ malaṃ pūge pradāpayet |
tatpūgaṃ khādyate yena yāvajjīvaṃ vaśībhavet || 17 ||
6.40
maṃtrābhimaṃtritaṃ kṛtvā daṇḍendīvaramūlakam |
rocanābhistāmrapātre mṛṣṭvā netradvayāñjanāt ||
priyo bhavati sarveṣāṃ dṛṣṭamātre na saṃśayaḥ || 18 ||
6.41
tanmūlaṃ madhusaṃyuktaṃ lalāṭe tilake kṛte |
tāmbūle vā pradātavyaṃ vaśīkaraṇamuttamam || 19 ||
6.42
tanmūlaṃ rañjanotthaṃ vā mūlaṃ piṣṭvā prayojayet |
tāmbūlena tu tadbhukte dhruvaṃ vaśyaṃ samānayet |
oṃ piṅgalāyai namaḥ anena maṃtreṇābhimantryoktayogān sādhayet || 20 ||
6.43
oṃ piṅgalāyai namaḥ
6.44
raktagṛdhrobhayaṃ netraṃ netraṃ vā kṛṣṇapecakam |
kṛṣṇapecikamāhṛtya tattailena pradīpakam || 21 ||
6.45
kṛtvā ca madhunā liptvā varti kajjalapātane |
tena netrāñjanaṃ kṛtvā trailokyaṃ vaśamānayet || 22 ||
6.46
devadālī ca siddhārthaṃ guṭikāṃ kārayed budhaḥ |
mukhe niḥkṣipya sarveṣāṃ priyo bhavati nānyathā || 23 ||
6.47
bhṛṅgamūlaṃ mukhe kṣiptvā sarvaiḥ saṃpūjito bhavet |
rohiṇyāṃ vaṭavandākaṃ saṅgrāhya dhārayetkare |
vaśyaṃ karoti sakalaṃ viśvāmitreṇa bhāṣitam || 24 ||
6.48
kuṅkumaṃ tagaraṃ kuṣṭhaṃ haritālaṃ samaṃ trayam |
anāmikāyā raktena tilakaṃ lokavaśyakṛt || 25 ||
6.49
viṣṇukrāntā śubhā bhṛṅgī śvadraṃṣṭrā mūlarocanām |
piṣṭvā tu vaṭikāṃ kṛtvā tilakaṃ vaśyakṛtparam || 26 ||
6.50
puṣyoddhṛtaṃ śvetabhānumūlaṃ mūtrairajābhavaiḥ |
vaṭikāṃ kārayetprājñastilakena jagadvaśam || 27 ||
6.51
ajāraktena tanmūlaṃ puṣyārke peṣayed budhaḥ |
kajjalaṃ pātayitvā tu cakṣuṣī rañjayannaraḥ ||
trailokyaṃ vaśatāṃ yāṃti dṛṣṭamātre na saṃśayaḥ || 28 ||
6.52
mūlantu śravaṇā-ṛkṣe piṇḍītagarasaṃbhavam |
saṃgrāhya dhārayedvaśyaṃ kurute sakalaṃ jagat || 29 ||
6.53
kṛṣṇāparājitāmūlaṃ puṣyeṇoddhṛtya cūrṇayet |
goghṛtena samāloḍya kajjalaṃ dhārayed budhaḥ ||
tenaivāñjitamātreṇa vaśīkuryājjagattrayam || 30 ||
6.54
putrajīvakapatraṃ ca tilakaṃ rocanāyutam |
priyo bhavati sarveṣāṃ naraḥ kṛtvā lalāṭake || 31 ||
6.55
śvetāparājitāmūlaṃ tathā śvetajavāgrajā |
nāsāgre tilakaṃ kṛtvā vaśīkuryyānna saṃśayaḥ || 32 ||
6.56
mañjiṣṭhayadavacāśitasūryamūlaiḥ svīyāṅgaśoṇitayuttaiḥ samakuṣṭhakaiśca |
kṛtvā lalāṭaphalake tilakaṃ kṛtajño lokatrayaṃ vaśayati kṣaṇamātrakeṇa || 33 ||
6.57
śambhorjjalaṃ ca madhukaṃ ca kṛtāñjaliñca
havyaṃ samaṃ nijaśarīramalena miśram |
ālepabhakṣaṇavidhau tilake kṛte vā
yogo'yamevabhuvanāni vaśīkaroti || 34 ||
6.58
mūlaṃ jaṭā tagarameṣaviṣāṇikānāṃ
pañcāṅgajaṃ nijaśarīramalaṃ tathaiva |
ekīkṛtāni madhunā divase kujasya
kurvanti vakratilakena vaśaṃ jaganti || 35 ||
6.59
bhṛṅgasya pakṣayugalaṃ śukamāṃsayuktaṃ
svānāmikārudhirakarṇamalaṃ svabījam |
etāni lepavidhināpyatha bhakṣaṇādvā
kurvanti vaśyamakhilaṃ jagadapyakasmāt || 36 ||
6.60
tālīśakuṣṭhatagareḥ parilipya varti
siddhārthatailasahitāṃ dṛḍhapaṭṭavastrām |
puṃsaḥ kapālaphalake vinipātitena
tenāñjanena vaśatāṃ kila yāti lokaḥ || 37 ||
6.61
gorocanā padmapatraṃ priyaṅgu raktacandanam |
ekīkṛtyāñjayennetraṃ yaṃ paśyati vaśī bhavet || 38 ||
6.62
nāsānetramalaṃ pādamalaṃ guvākamiśritam |
maṃtritaṃ dīyate yasmai vaśībhavati niścitam || 39 ||
6.63
oṃ piṅgalāyai namaḥ
6.64
atha rājavaśīkaraṇam
6.65
kuṃkumaṃ candanañcaiva rocanaṃ śaśimiśritam |
gavāṃ kṣīreṇa tilakaṃ rājavaśyakaraṃ dhruvam || 1 ||
6.66
oṃ hrīṃ saḥ amukaṃ me vaśamānaya svāhā ||
pūrvameva sahasraṃ japtvā'nena maṃtreṇa saptābhimaṃtritatilakaṃ kāryam ||
6.67
oṃ hrīṃ saḥ amukaṃ me vaśamānaya svāhā |
6.68
caṃpakasya tu vandākaṃ kare baddhvā prayatnataḥ |
saṃgṛhya bharaṇī-ṛkṣe puṣyarkṣe vā vidhānataḥ || 2 ||
6.69
rājānaṃ tatkṣaṇādeva manuṣyo vaśamānayet |
kare sudarśanāmūlaṃ vaddhvā rājapriyo bhavet || 3 ||
6.70
iti rājavaśīkaraṇam |
6.71
atha strīvaśīkaraṇam
6.72
puṣye puṣpaṃ ca saṃgṛhya bharaṇyāṃ tu phalaṃ tathā |
śākhāṃ caiva viśākhāyāṃ haste patraṃ tathaiva ca || 1 ||
6.73
mūle mūlaṃ samuddhṛtya kṛṣṇonmattasya tatkramāt |
piṣṭvā karpūrasaṃyuktaṃ kuṃkumaṃ rocanāsamam ||
tilākāt strī vaśaṃ yāti yadi sākṣādarundhatī || 2 ||
6.74
kākajaṅghā vacā kuṣṭhaṃ śukraśoṇitamiśritam |
taddatte bhojane bālā śmaśāne roditi sadā |
oṃ namo bhagavate rudrāya cāmuṇḍe amukīṃ me vaśamānaya svāhā | uktayogānāmayameva maṃtraḥ || 3 ||
6.75
oṃ namo bhagavate rudrāya oṃ cāmuṇḍe amukīṃ me vaśamānaya svāhā |
6.76
prātarmukhantu prakṣālya saptāvārābhimaṃtritam |
yasyā nāmnā pibettoyaṃ sā strī vaśyā bhaved dhruvam || 4 ||
6.77
oṃ namaḥ kṣiprakāmini amukīṃ me vaśamānaya svāhā |
6.78
oṃ namaḥ kṣiprakāminī amukīṃ me vaśamānaya svāhā || 4 ||
6.79
kṛṣṇāparājitāmūlaṃ tāmbūlena samāyutam |
avaśyāyai striyai dadyādvaśyā bhavati nānyathā ||
oṃ hūṃ svāhā | anenābhimantrya dadyāt || 5 ||
6.80
sādhyasādhakanāmnā tu kṛtvā saptābhimantritam |
dīyate kusumaṃ yasyai sā vaśyā bhavati dhruvam || 6 ||
6.81
susādhito hyayaṃ mantraṃ avaśyaṃ phaladāyakaḥ |
tasmādimaṃ prayatnena sādhayemantramuttamam || 7 ||
6.82
oṃ hūṃ svāhā
6.83
viśākhāyāntu vandākaṃ maṅgale ca samāharet |
haste baddhvā tu kurute vaśagāṃ varayoṣitam || 8 ||
6.84
oṃ pāte vajrāya svāhā
6.85
kṛṣṇotpalaṃ madhukarasya ca pakṣayugmaṃ mūlaṃ tathā tagarajaṃ sitakākajaṅghā |
yasyāḥ śirogatamidaṃ vihitaṃ vicūrṇaṃ dāsī bhavejjhaṭiti sā taruṇī vicitram || 9 ||
6.86
savyena pāṇikamalena ratāvasāne yā retasā nijabhavena vilāsinīnām |
vāmaṃ vilimpati padaṃ sahasaiva yasyā vasyaiva sā bhavanti nātra vikalpabhāvaḥ || 10 ||
6.87
sindhūtthamākṣikapottamalāni piṣṭvā liṅgaṃ vilipya taruṇīṃ ramate navoḍhām |
sā'nyaṃ na yāti puruṣaṃ manasāpi nūnaṃ dāsī bhavediti manoharadivyamūrttiḥ || 11 ||
6.88
gorocanāśiśiradīdhitiśaṃbhubījaiḥ kāśmīracandanayutaiḥ kanakadravaiśca |
liptvā dhvajaṃ pariramatyabalāṃ naro yāṃ tasyā sa eva hṛdaye mukuṭatvameti || 12 ||
6.89
puṣye rudrajaṭāmūlaṃ mukhasthaṃ kārayed budhaḥ |
tāmbūlādau pradātavyaṃ vaśyā bhavati niścitam || 13 ||
6.90
tathaiva pāṭalāmūlaṃ tāmbūlena tu vaśyakṛt |
tripatrabhaṇṭikāmūlaṃ piṣṭvā gātre tu saṃkṣipet |
yasyāḥ sā vaśatāṃ yāti bindumātreṇa tatkṣaṇāt || 14 ||
6.91
svakīyakāmamādāya kāmadevaṃ smaretpunaḥ |
taruṇyā hṛdaye dattaṃ tatkṣaṇātstrī vaśā bhavet || 15 ||
6.92
gilitvā pāradaṃ kiṃcidramyate nāyikā yadi |
prāṇānte'pi ca sā nārī taṃ naraṃ na vimuñcati || 16 ||
6.93
kāmākrāntena cittena māsārddhaṃ japate niśi |
avaśyaṃ kurute vaśyaṃ prasanno viśvaceṭakaḥ ||
6.94
aiṃ piṃ sthāṃ klīṃ kāmapiśācinī śīghraṃ
amukīṃ grāhaya grāhaya kāmena mama rūpeṇa nakhairvidāraya
nakhairvidāraya vidrāvaya vidrāvaya snehena bandhaya bandhaya śrīṃ phaṭ |
ayuta dvayena siddhiḥ || 17 ||
6.95
nāgāpuṣpaṃ priyaṅguñca tagaraṃ padmakeśaram |
jaṭāmāṃsīṃ samaṃ nimbaṃ cūrṇayenmaṃtravittamaḥ || 18 ||
6.96
aiṃ piṃ sthāṃ klīṃ kāmapiśācinī śīghraṃ amukīṃ grāhaya grāhaya kāmena mama rūpeṇa nakhairvidāraya nakhairvidāraya vidrāvaya vidrāvaya snehena bandhaya bandhaya śrīṃ phaṭ |
6.97
svāṅgaṃ tu dhūpayettena bhajate kāmavatstriyaḥ |
6.98
dhūpamantraḥ
6.99
oṃ mūlī mūlī mahāmūlī sarva saṃkṣobhaya saṃkṣobhaya ebhya upadravebhyaḥ svāhā | iti ||
6.100
pānīyasyāñjalīn sapta kṛtvā vidyāmimāṃ japet |
sālaṅkārāṃ naraḥ kanyāṃ labhate māsamātrataḥ || 19 ||
6.101
oṃ viśvāvasurnāmagandharvaḥ kanyānāmadhipatissurūpāṃ
sālaṃkṛtāṃ kanyāṃ dehi namastasmai viśvāvasave svāhā
kanyā gṛhe śālakāṣṭhaṃ kṣipedekādaśāṃgulam |
ṛkṣe ca pūrvaphālgunyāṃ yastāṃ kanyāṃ prayacchati || 20 ||
6.102
atha pativaśīkaraṇam
6.103
khañjarīṭasya māṃsaṃ tu madhunā saha peṣayet |
anena yonilepena patirdāso bhaved dhruvam ||
6.104
pañcāṅgaṃ dāḍimaṃ piṣṭvā śveta sarṣapasaṃyutam |
yonilepātpatiṃ dāsaṃ karotyapi ca durbhagā || 1 ||
6.105
karpūraṃ devadāruṃ ca sakṣaudraṃ pūrvavatphalam |
oṃ kāmakāmamālini patiṃ me vaśamānaya ṭhaḥ ṭhaḥ |
ukta yogānāṃ saptābhimaṃtrite siddhiḥ || 2 ||
6.106
oṃ kāmakāmamālini patiṃ me vaśamānaya ṭhaḥ ṭhaḥ |
6.107
rocanāṃ matsyapittaṃ ca piṣṭvāpi tilake kṛte |
vāmahastakaniṣṭhāyāṃ patirdāso bhaved dhruvam |
svaśoṇitaṃ rocanayā tilakaṃ pativaśyakṛt || 3 ||
6.108
citrakasya tu puṣpāṇi madhuyuktāni kārayet |
khāne pāne pradātavyaṃ pativaśyakaraṃ bhavet |
bhūrjapatraṃ ca madhunā yonilepe patirvaśaḥ || 4 ||
6.109
jalaukasāṃ mukhe deyaṃ śambūśaṃkhādicūrṇakam |
taccūrṇaṃ tu samāgṛhya tāmbūlena samāyutam |
dātavyaṃ svāmine bhoktuṃ vaśyo bhavati nānyathā || 5 ||
6.110
gorocanānaladakuṃkumabhāvitāyāstasyāḥ sadaiva kurute tilakaṃ vaśitvam |
vātsyāyanena bahudhā pramadājanānāṃ saubhāgyakṛtyasamaye prakaṭīkṛto'sau || 6 ||
6.111
sambhogaśeṣasamaye nijakāntameḍhraṃ yā kāminī spṛśati vāmapadāmbujena |
tasyāḥ patissapadi vindati dāsabhāvaṃ goṇīsutena kathitaḥ kila yogarājaḥ || 7 ||
6.112
iti pativaśīkaraṇam
6.113
iti śrīnityanāthaviracite kāmaratne vaśīkaraṇaṃ nāma prathamopadeśaḥ || 1 ||
6.114
dvitīyopadeśaḥ
6.115
athākarṣaṇam
6.116
caturthavarṇamākṛṣya dvitīyavargasaṃsthitam |
kṛtvā trividhahāṃ hāṃtaṃ tadantaṃ he dvitīyakam || 1 ||
6.117
aṃkāraśirasaṃ kṛtvā pratyakṣaraprajāpanam |
6.118
mantram
6.119
jhāṃ jhāṃ jhāṃ hāṃ hāṃ hāṃ heṃ heṃ ||
sahasrārddhasya jāpena phalaṃ bhavati śāśvatam || 2 ||
6.120
mānuṣāsuradevāśca sayakṣoragarākṣasāḥ |
sthāvarā jaṅgamāścaiva ākṛṣṭāste varāṅgane || 3 ||
6.121
oṃ jhāṃ jhāṃ jhāṃ hāṃ hāṃ hāṃ heṃ heṃ |
6.122
hānte rephaṃ samādāya yakārastu viśeṣataḥ |
akṣaratritayaṃ tacca dvidhā kṛtvā prajāpayet |
bhakṣyaṃ dravyaṃ svahastena kṛtvā maṃtravibhāvanam || 4 ||
6.123
dīyate yasya bhakṣyaṃ tatsarveṣāṃ prāṇināṃ śubhe |
te sarve yatra nīyante tatra gacchanti tatkṣaṇāt || 5 ||
6.124
hrīṃkāre mantrayetpāśaṃ hūṃkāreṇāṅkuśaṃ tathā |
triphalaṃ vāmagaṃ pāśaṃ dakṣiṇe jvalitāṅkuśam |
saṃdhārya svakare maṃtrī tato mantramimaṃ japet || 6 ||
6.125
maṃtra
6.126
oṃ hrīṃ rakṣa rakṣa cāmuṇḍe turu turu amukīmākarṣaya amukīmākarṣaya hrī asya maṃtrasya pūrvamevāyutaṃ japettataḥ siddhiḥ | oṃ cāmuṇḍe jvala jvala prajvala prajvala svāhā | amuṃ maṃtraṃ striyaṃ dṛṣṭvā japettatkṣaṇāt sā strī pṛṣṭhataḥ samāgacchati pūrvamayutaṃ japettatassiddhiḥ || 7 ||
6.127
oṃ rakṣa rakṣa cāmuṇḍe turu turu amukīmākarṣaya amukīmākarṣaya hrī |
6.128
oṃ cāmuṇḍe jvala jvala prajvala prajvala svāhā |
6.129
āśleṣāyāṃ samādāya arjjunasya tu bṛndakam |
ajāmūtreṇa saṃpiṣya strīṇāṃ śirasi dāpayet |
puruṣasya paśūnāṃ vā kṣipedākarṣaṇaṃ bhavet || 8 ||
6.130
sādhyāvāmapadasthāṃ tāṃ mṛttikāmāharettataḥ |
kṛkalāsasya raktena pratimāṃ kārayettataḥ || 9 ||
6.131
sādhyānāmākṣaraṃ tasyāstadraktaivilikheddhṛdi || 10 ||
6.132
mūtrasthāne ca nikhanetsadā tatraiva mūtrayet |
ākarṣayettu tāṃ nārīṃ śatayojanasaṃsthitām || 11 ||
6.133
sūryāvartasya mūlaṃ tu pañcamyāṃ grāhayed budhaḥ |
tāmbūlena samaṃ dadyātsvayamāyāti tatkṣaṇāt || 12 ||
6.134
ratikarmmakarau grāhyau bhramarau yatnato budhaiḥ |
bhinnau kṛtvā dahettau tu citākāṣṭhaistayoḥ punaḥ || 13 ||
6.135
vastreṇa bandhayedbhasma pṛthagvai puṭṭalīdvayam |
tayorekāmajāśṛṅge dṛḍhaṃ baddhvā parīkṣayet || 14 ||
6.136
yāṃ yāṃ yāti ca sā meṣī sā pṛthaggṛhyate budhaiḥ |
tadbhasma śirasi nyastaṃ kṣaṇādākarṣayetstriyaḥ |
aparaṃ rakṣayedvastre nocennāyāti kāminī || 15 ||
6.137
oṃ kṛṣṇavarṇāya svāhā | imaṃ mantraṃ pūrvamekāyutaṃ japet | tataḥ uktayogamabhimantrya siddhiḥ || 16 ||
6.138
iti śrīnityanāthaviracite kāmaratne ākarṣaṇaṃ nāma dvitīyopadeśaḥ || 2 ||
6.139
tṛtīyopadeśaḥ
6.140
atha jayaḥ
6.141
hakāraṃ svarasaṃyuktamukāreṇa supūjitam |
oṃkāreṇa ca saṃpūjya agre phaṭ viniyojayet |
oṃ huṃ phaṭ jeyāgre śatajāpena jito bhavati nānyathā || 1 ||
6.142
jeyanāma hṛdi nyasya cakṣuṣā tannimīlya ca |
spṛṣṭvā ca mantrajāpena tatkṣaṇājjitavānasau || 2 ||
6.143
gojihvāśikhimūlī vā mukhe śirasi saṃsthitā |
kurute sarvavādeṣu jayaṃ puṣye samuddhṛtā || 3 ||
6.144
mārgaśīrṣasya pūrṇāyāṃ śikhimūlaṃ samuddharet |
bāhau śirasi vā dhāryaṃ vivāde vijayī bhavet || 4 ||
6.145
girikarṇīṃ śamīṃ guñjāṃ śvetavarṇāṃ samāharet |
candanenānvitaṃ sarvaṃ tilakena jayī bhavet || 5 ||
6.146
kanakārkavaṭo vahnirvidrumaḥ pañcamastathā |
tilakaṃ kurute yastu paśyettaṃ pañcadhā ripuḥ || 6 ||
6.147
kṛṣṇasarpakapāle tu vasāmṛttikayānvite |
sitaguñjāṃ vapettatra tasyā mūlaṃ samāharet || 7 ||
6.148
kṛtatilakaṃ tadā dṛṣṭyā paśyetsvaṃ sambhṛtaṃ ripuḥ || 8 ||
6.149
śvagaṇairbhakṣyamāṇaṃ ca patitaṃ ca tato bhuvi |
auṣadhī siṃhikānāma tayā ghṛṣṭo mahārasaḥ || 9 ||
6.150
siṃhīkaparddikāmadhye kṣepyastanmūlasaṃyutaḥ |
pidhāaya vadanaṃ tasyā sikthakena samanvitaḥ || 10 ||
6.151
tasyāṃ vakrasthitāyāṃ tu siṃhavajjñāyate naraḥ |
raṇe rājakule dyūte vivāde cāparājitaḥ |
madonmatto gajastasya darśanena parāṅmukhaḥ || 11 ||
6.152
vyāghrīrasena saṃghṛṣṭaḥ pārado mūlasaṃyutaḥ |
pūrvavatsādhayedvyāghrīphalaṃ caiva tathāvidham || 12 ||
6.153
kare sudarśanāmūlaṃ baddhvā rājakule jayī |
jayāmūlaṃ rājakule mukhe saṃsthaṃ jayapradam || 13 ||
6.154
ārdrāyāṃ vaṭavandākaṃ haste baddhvāparājitaḥ |
tadṛkṣe cūtavandākaṃ gṛhītvā dhārayetkare ||
saṃgrāme jayamāpnoti jayāṃ smṛtvā jayī bhavet || 14 ||
6.155
kokāyā nayanaṃ vāmaṃ guḍalohena veṣṭayet |
mukhe prakṣipya ca naraḥ sarvavāde jayī bhavet || 15 ||
6.156
kṛttikā ca viśākhā ca bhaumavāreṇa saṃyutā |
taddine ghaṭitaṃ śastraṃ saṃgrāme jayadāyakam || 16 ||
6.157
apāmārgarasenaiva yāni śastrāṇi lipyate |
jāyante tāni saṃgrāme vajrasārāṇi niścitam || 17 ||
6.158
pūrvoktamaṃtrarājena tāni sarvāṇi maṃtrayet |
sarveṣāmukta yogānāṃ siddhirbhavati te dhruvam || 18 ||
6.159
haste'rkalāṅgalīmūlaṃ mūlamantrābhimaṃtritam |
taccūrṇodvarttanānmallo mallānmohayate bahūn ||
6.160
mantaḥ
6.161
oṃ namo mahābalaparākrama śastravidyāviśārada śārada amukasya bhujabalaṃ bandhaya bandhaya dṛṣṭiṃ stambhaya stambhaya aṅgāni dhūnaya dhūnaya pātaya pātaya mahītale hūṃ || 19 ||
6.162
oṃ namo mahābalaparākrama śastravidyāviśārada śārada amukasya bhuja-balaṃ bandhaya bandhaya dṛṣṭiṃ stambhaya stambhaya aṅgāni dhūnaya dhūnaya pātaya pātaya mahītale hūṃ || 18-19 ||
6.163
iti jayaprakaraṇam |
Linked texts (8)
- Kāmaratna (Pārvatīputra Nityanātha) — Pārvatīputra Nityanātha, Sanskrit
- Kāmaratna (Nāgabhaṭṭa) — Nāgabhaṭṭa, Sanskrit
- Kāmaratnatantra — Sanskrit
- Indrajāla (Nityanātha) — Nityanātha, Sanskrit
- Ḍāmaratantra — Sanskrit
- Kakṣapuṭa — Siddha Nāgārjuna, Sanskrit
- Rasakalpadruma (Jagannātha Miśra) — Jagannātha Miśra 1600, Sanskrit
- Mantravidyā — Sanskrit