Pramāṇa · Search · About · API

Cinacara 2: atha dvitīyaḥ paṭalaḥ

Cīnācāra 2

Language
Sanskrit

Contents

atha dvitīyaḥ paṭalaḥ

2.1

tataḥ praṇamya tāṃ devīṃ vaśiṣṭho'sau mahāmuniḥ
jagāmācāravijñānavāñchayā buddharūpiṇam

2.2

tato gatvā mahācīne deśe sa munipuṅgavaḥ
dadarśa himavatpārśve sādhakeśvarasevitam

2.3

raṇajjaghanarāveṇa rūpayauvanaśālinā
madirāmattacittena vilāsollasitena ca

2.4

śṛṅgārapariveśena jaganmohanakāriṇā
bhayalajjāvihīnena devīdhyānapareṇa ca

2.5

kāminīnāṃ sahasreṇa parivāritamīśvaram
madirāpānasañjātaṃ raktamantharalocanam

2.6

dūrādeva vilokya taṃ vaśiṣṭho buddharūpiṇam
vismayena samāviṣṭaḥ smaran saṃsāratāriṇīm

2.7

kimidaṃ kriyate karma viṣṇunā buddharūpiṇā
vedavādaviruddho'yamācāraḥ sammato mama

2.8

iti cintayatastasya vaśiṣṭhasya mahātmanaḥ
ākāśavāṇī prāhāśu maivaṃ cintaya suvrata

2.9

ācāra paramārtho'yaṃ tāriṇīsādhane mune
etadviruddhācārasya matenāsau prasīdati

2.10

yadi tasyāḥ prasādaṃ tvamacireṇābhivāñchasi
etena cīnācāreṇa tadā tāṃ bhaja suvrata

2.11

ākāśavāṇīmākarṇya romāñcitakalevaraḥ
vaśiṣṭho daṇḍavadbhūmau papātātīva harṣitaḥ

2.12

tathotthāya praṇamyāsau kṛtāñjalipuṭo muniḥ
jagāma viṣṇoḥ sānnidhyaṃ buddharūpasya pārvati

2.13

athāsau taṃ samālokya madirāmodavihvalaḥ
prāha buddhaḥ prasannātmā kimarthaṃ tvamihāgataḥ

2.14

atha buddhaṃ praṇamyāha bhaktinamro mahāmuniḥ
yaduktaṃ tāriṇīdevyā nijārādhanahetave

2.15

tacchrutvā bhagavān buddhastattvajñānamayo hariḥ
vaśiṣṭhaṃ prāha saṃjñānaṃ cīnācārā'dhikāravān

2.16

aprakāśyo'yamācārastariṇyāḥ sarvadā mune
tava bhaktivaśādasmi prakāśayāmīha tatparaḥ

2.17

buddha uvāca
athācāravidhiṃ vakṣye tārādevyāḥ samṛddhidam
yasyānuṣṭhānamātreṇa bhavābdhau na nimajjati

2.18

samastaśokaśamanamānandābdhinipātanam
tattvajñānamayaṃ sākṣād vimuktiphaladāyakam

2.19

snānādi mānasaṃ śaucaṃ manasaśca japaḥ smṛtaḥ
pūjanaṃ mānasaṃ divyaṃ mānasaṃ tarpaṇādikam

2.20

sarva eva śubhaḥkālo nāśubho vidyate kvacit
na viśeṣo divārātrau na sandhyāyā mahāniśi

2.21

vastrāsanasthānagehadehasyarśādivāriṇaḥ
śuddhiṃ na kārayedeva nirvikalpamanāśca yaḥ

2.22

nātra śuddhyādyapekṣāsti na ca madyādidūṣaṇam
sarvathā pūjayed devīmasnātaḥ kṛtabhojanaḥ

2.23

mahāniśyaśucau deśe baliṃ mantreṇa dāpayet
strīdveṣo naiva karttavyo viśeṣāt pūjanaṃ striyaḥ

2.24

tāsāṃ prahāranindāśca kauṭilyamapriyantathā
sarvathā naiva karttavyamanyathā siddhirodhakṛt

2.25

striyo devāḥ striyaḥ prāṇāḥ striya eva vibhūṣaṇam
strīsaṅginā sadā bhāvyamanyathā svastriyā saha

2.26

taddhastāvacitaṃ puṣpaṃ taddhastāvacitaṃ jalam
taddhastāvacitaṃ dravyaṃ devatābhyo nivedayet

2.27

mahācīnadrumalatāveṣṭitaḥ sādhakottamaḥ
rātrau yadi japenmantraṃ durlabhaṃ tasya kiṃ bhavet

2.28

mahācīnadrumalatāveṣṭanena ca yat phalam
tasyāpi ṣoḍaśāṃśena kalāṃ nārhanti te śavāḥ

2.29

śavāsanādhikaphalaṃ latāgehapraveśanam
śmaśānālayamāgatya muktakeśo digambaraḥ

2.30

mahācīnadrumalalatāveṣṭito muktimāpnuyāt
japasthāne mahāśaṅkhaṃ niveśyordhvaṃ japañcaret

2.31

striyaṃ gacchan spṛśan paśyan yatra tatrāpi sādhakaḥ
bhakṣyaṃstāmbūlamanyāṃśca bhakṣyadravyān yathārucīn

2.32

muktvā'nyaśeṣadravyāṇi japtvā bhuktvā japaṃ caret
dikkālaniyamo nāsti sthityādiniyamo na ca

2.39

jape na kālaniyamo nārcādiṣu baliṣvapi
svecchācāro'tra gaditaḥ pracared ghṛṣṭamānasaḥ 33
kṛtārtha manyamānastu santuṣṭanijamānasaḥ
sugandhiśvetalauhityakusumairarcayet kulam 34
bilvairmarubakādyaiśca tulasīvarjitaiḥ śubhaiḥ
ekaliṅge śmaśāne vā śūnyāgāre catuṣpathe 35
taṭasthaḥ sādhayed yogī tārāṃ bhuvanatāriṇīm
tāriṇī dakṣiṇā kālī bhairavī sundarī tathā 36
mahācīnakrameṇaitāḥ siddhyantyeva na saṃśayaḥ
sundarībhairavīdevyaḥ prakāro'nyo'pi vidyate 37
tāriṇīdakṣiṇāsiddhirnaiva cīnakramaṃ vinā
mahācīnakramācāratatparaḥ sādhakottamaḥ 38
tāriṇīpūjanaṃ vidyākulakoṭiṃ samuddharet
nṛtyanti pitarastasya gāthāṃ gāyanti te mudā

2.40

api naḥ svakule kaścit kulajñānī bhaviṣyati
sa dhanyaḥ sa cirajñānī sa kaviḥ sa ca paṇḍitaḥ

2.41

sa kulīnaḥ sa sukṛtī sa balī sa ca sādhakaḥ
sa brāhmaṇaḥ sa vedajñaḥ so'gnihotrī sa dīkṣitaḥ

2.42

sa tīrthasevī pīṭheṣu nivāsī sa ca muktibhāk
sa vratī somapāyī sa sa yajvā sarvamantriṣu

2.43

sa vaiṣṇavaḥ sa śaivaśca sa sauraḥ sa ca gāṇapaḥ
mahācīnakramācāraistāriṇīṃ yaḥ sadā bhajet

2.43.p1

adhika pāṭhaḥ
buddha uvāca
strīsambhogena kaulānāṃ yadi mokṣo bhavediha
sarve'pi jantavo loke muktāḥ syuḥ strī niṣevaṇāt
ataḥ śṛṇvantaraṃ putra śarma (śra?) ca mahālaya
mokṣaṃ dadāmi bhūtānāmetaddharmapravartinām
vṛthā pānaṃ yatkriyate surāpānaṃ taducyate
tanmahāpātakāyaiva vedādiṣu nirūpitam
vaśiṣṭha uvāca
tvanmukhāt śrotumicchāmi kuladharmaṃ viśeṣataḥ
etasya hi viśeṣajñastatsamo nāsti kaścana
tasya dharmasya māhātmyaṃ sarvadharmottamasya ca
vada me parameśāna! yadi te'sti kṛpā mayi
śrī bhagavānuvāca
mune! śṛṇu pravakṣyāmi yanmāṃ tvaṃ paripṛcchasi
tasya śravaṇamātreṇa yogināṃ ca priyo bhavet
śivabrahmaguhādīnāṃ na mayā kathitaṃ purā
kathayāmi tava snehācchṛṇuṣvaikāgramānasaḥ
pāramparyakriyāyāśca atiguptaṃ mahādbhutam
akathyaṃ parameśānaṃ tathāpi kathayāmi te
sarvebhyaśrottamā vedā vedebhyo vaiṣṇavaḥ paraḥ
vaiṣṇavāt paramaṃ śaivaṃ śaivād dakṣiṇamuttamam
dakṣiṇāduttamaṃ kaulaṃ kaulāt parataraṃ na hi
guhyād guhyataraṃ devi sārātsāraṃ parātparam
mathitvā jñānamanthena vedāgamamahārṇavam
kulācārakrameṇaiva na siddhirjāyate kvacit

2.43.p2

iti cīnācāra tantre dvitīyaḥ paṭalaḥ

Linked texts (9)