Pramāṇa · Search · About · API

Cinacara 5: atha pañcamaḥ paṭalaḥ

Cīnācāra 5

Language
Sanskrit

Contents

atha pañcamaḥ paṭalaḥ

5.1

śrī bhagavānuvāca
samayaṃ tatpravakṣyāmi śrṛṇuṣvaikāgrāmānasaḥ
yena vijñānamātreṇa siddho bhavati sādhakaḥ

5.2

ghātayed gopayettanna nindayenna vilokayaṃt
pūjayed bhāvayeccaiva varjayenna tu gopayet

5.3

kāmaṃ krodhaṃ tu mātsaryaṃ vikāraṃ cintanodbhavam
nidrāṃ lajjā daurmanasyaṃ ghātayedaṣṭakaṃ priye ya

5.4

mantraṃ mudrā'kṣasūtraṃ ca yoginīvarasaṅgamam
bhairavāgamanācārametat sarvaṃ pragopayet

5.5

kulaṃ guruṃ sudhāṃ vidyāṃ sādhakān śobhitaṃ tathā
śubhāśubhañca yat karma nindyaṃ naiva kadācana

5.6

kanyāyoniṃ paśukrīḍāṃ nagnāṃ strīṃ prakaṭastanīm
dyūtaviprahapāpārthān sarvathā na vilokayet

5.7

guruṃ devīṃ tathā sādhūn śaktiṃ cātmānamavyayam
bhaktitaḥ sādhakān sarvān pūjayecca prayatnataḥ

5.8

guruvākyopadeśañca sādhūktimiṣṭadevatām
svadharmañca kulācāraṃ sadātmānaṃ ca bhāvayet

5.9

agamyāgamanañcaiva dhūrtagoṣṭhīñca varjayet
anṛtaṃ pāpagoṣṭhīñca varjayet kulanāyakaḥ

5.10

viṇmūtraśoṇitakledahīnāṅgīṃ pibatīṃ surām
kapāharaṇañcaiva aṣṭāveva jugupsayet

5.11

ityevaṃ samayācāraṃ yaḥ karoti hi sādhakaḥ
samprāpya devīsambhāvaṃ jīvanmuktiñca gacchati

5.12

evaṃ tārāmataṃ proktaṃ sarvasiddhiranuṣṭhitā
anena cīnācāreṇa sādhakaḥ svayamīritaḥ

5.13

anena cīnācāreṇa tārāmārādhya sādhakaḥ
yadvā na labhate vastu tannāsti bhuvanatraye

5.14

śrīdevyuvāca
deva! deva! mahādeva! jagatpralayakāraka!
kulācāreṇa madyādyaiḥ kathaṃ siddhirbhavet prabho!

5.15

yadetanmadirāpānaṃ yat parastrīniṣevaṇam
adharmakāraṇaṃ sarvaṃ chindhi me saṃśayaṃ vibho

5.16

śrīśiva uvāca
sādhu pṛṣṭaṃ tvayā devi! kathayāmi śṛṇuṣva me
purā dārumaye ramye munayaḥ sādhanāparāḥ

5.17

madyapānaṃ cikīrṣanti parastrīgharṣaṇañca vai
tān dṛṣṭvā sūcitādharmān brahmā māṃ paryupasthitaḥ

5.18

deva! deva! mahādeva! sṛṣṭisthitilayātmaka!
ete dāruvane pāpā madyapānaratāstathā

5.19

parastriyaṃ gharṣayanti madyaṃ khādanti nityaśaḥ
digambarā muṇḍitāśca gatireṣāṃ kathaṃ bhavet

5.20

iti brahmavacaḥ śrutvā tamuvāca hyahaṃ priye
pitāmaha! na jānāsi cīnācārakramaṃ bhavān

5.21

ugratārāṃ mahāvidyāmete nityaṃ japanti hi
pūjayanti ca tāmeva cīnācāraparāyaṇāḥ

5.22

sādhakāḥ sarva evaite mahātmāno mahāśayāḥ
jīvanmuktigatāḥ sarve devībhaktiparāyaṇāḥ

5.23

parastrīdharṣaṇāccaiva madyapānācca nityaśaḥ
aśvamedhādapyadhikaṃ labhante phalamuttamam

5.24

etāṃstu nindayed yastu mahāpātakavān bhavet
ito dūraṃ prayāhi tvaṃ mā māṃ spṛśa pitāmaha

5.25

paraṃ vismayamāpannaḥ saṃśayāviṣṭamānasaḥ
kimidaṃ śambhunā proktaṃ vedavidyāvidhānakṛt

5.26

iti sañcintayan maunaṃ prāha paṅkajasambhavam
uvāca sādhakāste vai jīvanmuktā mahāśayāḥ

5.27

parastriyaṃ gharṣayanti madyaṃ khādanti nityaśaḥ
nirvāṇaṃ te ca yāsyanti bhagavatyāḥ prasādataḥ

5.28

cīnācāraṃ samāśritya munayaste mahāśayāḥ
tatvajñānamayāḥ sarve viharanti gahītale

5.29

tvaṃ śīghraṃ gaccha tatraiva tān prasādaya padmaja
teṣu ruṣṭeṣu bhavato brahmatvamapayāsyati

5.30

mahādevena yat proktaṃ satyametanna saṃśayaḥ
āvayoḥ sa na saṃspṛśet sādhakān yo vinindati

5.31

śrīśiva uvāca
tato hi māṃ praṇamyāsau parameṣṭhī pitāmahaḥ
gatvā dāruvanaṃ sarvān praṇanāma munīśvarān

5.32

tuṣṭāva parayā bhattyā stotrarbahuvidhairapi
teṣāṃ prasādamāsādya kṛtakṛtyo'bhavad vidhiḥ

5.33

śrīdevyuvāca
mahācīnakramācāraṃ tato buddhādavāpya ca
vaśiṣṭhaḥ sa kimakarot tanme būhi maheśvara

5.34

śrīśiva uvāca
mahācīnakramācāraṃ tato devādavāpya saḥ
nīlācalaṃ samāsādya kulācāraparāyaṇaḥ

5.35

tato'kṣamālāṃ yuvatīṃ cāṇḍālīṃ ramayanmuniḥ
japan sa sādhayāmāsa tārāṃ muktiparadāyikām

5.36

tārāmārādhayāmāsa kṛtakṛtyo'bhavat tadā
sākṣād bhūtā mahādevī tārā saṃsāratāriṇī

5.37

tārovāca vaśiṣṭha tvaṃ varān vṛṇu yathepsitān

5.38

śrīśiva uvāca
tārādevi! jaganmātarjñānavijñānadāyini!
varamekaṃ vṛṇomi tvaṃ prasannā yadi me śive

5.39

mahācīnakramācārairyastvāṃ sampūjayiṣyati
sarvadā tasya mātastvaṃ suprasannā bhaviṣyasi

5.40

cīnācāreṇa yaḥkaścit tārāṃ māṃ pūjayiṣyati
sa me putratvamāpannaḥ satyaṃ satyaṃ na saṃśayaḥ

5.41

iha bhogān varān bhuktvā bṛhaspatirivāparaḥ
ante yāsyati matpārśvaṃ yatra me gaṇanāyakaḥ

5.42

rūpayauvanasampannairdivyakanyāgaṇaiḥ saha
viharatyapyasau dhīro yāvaccandrārkatārakāḥ

5.43

tatrāpi bhavitā vatsa yogasiddhiranuttamā
aṇimādyāḥ siddhayastvāṃ seviṣyanti nirantaram

5.44

iti labdhvā varaṃ tasyā vaśiṣṭho'sau mahāmuniḥ
nakṣatralokamāsādya cādyāpi dyotate divi

5.45

eṣa te kathito devi! cīnācāraḥ sudurlabhaḥ
samācārāt sādhakendro bhuktiṃ muktiṃ labhed bhuvi

5.46

etat sarvaṃ prayatnena gopitavyaṃ tathā priye
yathā'nyo'nyena labhate tathā kāryaṃ maheśvari

5.47

svayonimiva deveśi gopayet paśusannidhau
yo bhaktaḥ sādhako jñānī tasmai vaktavyameva hi

5.48

āliṅganaṃ cumbanaṃ ca stanayormardanaṃ tathā
darśanaṃ sparśanaṃ yonervikāso liṅgagharṣaṇam

5.49

praveśaḥ sthāpanaṃ śakternavapuṣpāṇi pūjane
viṣaṃ pītvā surāṃ bhuktvā māṃsaṃ gatvā rajasvalām

5.50

yo japeccaṇḍikāṃ devīṃ tasya duḥkhaṃ pade pade
deyā vidyārthine vidyā vyādhitebhyaśca auṣadham
deyaṃ kṣudhārthine annaṃ trayaṃ svargasya lakṣaṇam

5.50.p1

iti mahācīnācārasāratantre sarvācārasārottamottame mahācīnācārakrame pañcamaḥ paṭalaḥ

5.50.p2

mahācīnācārakramaḥ samāptaḥ

Linked texts (6)