Pramāṇa · Search · About · API

Dashamahavidya 7

Daśamahāvidyā 7

Language
Sanskrit

7.p1

rahasya puraścaraṇa vidhi devyuvāca jñātametanmayā deva tvatprasādān maheśvaraḥ, aśaktānāṃ tu me deva puraścaraṇamucyatāṃ| sidhyante ca yathā maṃtrā labhante siddhimūttamāṃ|| bhairavovāca śmaśāne ca puraścaryā kathitā bhuvi durlabhā| athavānya prakāreṇa puraścaraṇamiṣyate|| kuje vā tīvravāre vā naramuṇḍaṃ samāhṛtaṃ| pañcagavyena militaṃ candanādyairviśeṣataḥ|| nikṣipya bhūmau hastārddhamānataḥ kānane vane| tatra taddivase rātrau sahasra yadi mānavaḥ|| ekākī prajapenmaṃtraṃ sa bhavet kalpa pādapaḥ| athavānya prakāreṇa puraścaraṇamiṣyate|| śavamānīya tad dvāre tenaiva parikhanyate| taddināttaddinaṃ yāvattāvadaṣṭottaraṃ śataṃ|| sa bhavet sarvasiddhīśo nātra kāryā vicāraṇā| athavānya prakāreṇa puraścaraṇamucyate|| aṣṭamyāṃ ca caturdaśyāṃ pakṣayorubhayorapi| sūryodayāt samārabhya yāvat sūryodayāntaraṃ|| tāvajjaptvā nirātaḥ sarvasiddhīśvaro bhavet| athavānya prakāreṇa puraścaraṇamiṣyate|| candrasūryagrahe caiva grāsāvadhi vimuktitaḥ| yāvatsaṃkhyaṃ manuṃ japyāttāvaddhomādikaṃ caret|| sūryagrahaṇa kālāddhi nānyaḥ kālaḥ praśasyate| tatra yadyat kṛtaṃ karma tadanantaphalaṃ labhet

7.p2

athavānya prakāreṇa puraścaraṇamiṣyate| śaratkāle caturthyādi navamyantaṃ viśeṣataḥ|| bhaktitaḥ pūjayitvā tu rātrau tāvat sahastrakaṃ| japedekākī vijane kevalaṃ timirālaye|| aṣṭamyādi navamyantamupavāsaparo bhavet| anyatra gurumārgasya laṃghanaṃ naiva kārayet|| athavānya prakāreṇa puraścaraṇamiṣyate| aṣṭamī sandhivelāyāmaṣṭottara latāgṛhaṃ|| praviśya maṃtrī vidhivattaḥ samabhyarthya yatnataḥ| pūrvoktakalpamāsādya pūjādikaṃ samācaret|| kevalaṃ kāmadevo'sau japedaṣṭottaraṃ śataṃ| tāsāṃ tu patramūleṣu ulkāṃ saṃgṛhya mastake|| maṃtrasiddhirbhavet sadyo latādarśana pūjanāt| athavānya prakāreṇa puraścaraṇamiṣyate|| ākṛṣṭāyāḥ kulāgāre likhitvā maṃtrameva ca| sampūjya tatra saṃskāraṃ kṛtvā tasyai nivedya ca|| kiñcijjaptvā manuṃ nītvā devatābhāva tatparaḥ| tāṃ visṛjya namaskṛtya svayaṃ japtvā susaṃyataḥ|| prātaḥ strībhyo baliṃ datvā maṃtrasiddhirna saṃśayaḥ| athavānya prakāreṇa puraścaraṇamiṣyate|| gurumānīya saṃsthāpya devavat pūjanaṃ vibhoḥ| vastrālaṅkārahemādyaiḥ santoṣya gurumeva ca|| tatsutaṃ tatsutāṃ caiva tatpatnīṃ ca viśeṣataḥ| pūjayitvā manuṃ japtvā svayaṃ siddhīśvaro bhavet|| athavānya prakāreṇa puraścaraṇamiṣyate| sahastrāre guroḥ pādapadmaṃ dhyātvā prapūjya ca|| kevalaṃ devabhāvena japtvā siddhīśvaro bhavet| gurave dakṣiṇāṃ dadyād yathāvibhavamātmanaḥ|| guroranujñāmātreṇa duṣṭa maṃtro'pi sidhyati| guruṃ vilaṃghya śāstre'sminnādhikāraḥ surairapi|| eṣāṃ ca maṃtra taṃtrāṇāṃ prayogaḥ kriyate yadi| guruvaktraṃ vinā devi siddhihāniḥ prajāyate|| athavānya prakāreṇa puraścaraṇamiṣyate| svakīyāṃ parakīyāṃ vā striyamānīya sādhakaḥ

7.p3

śatamaṣṭottaraṃ japtvā yonimāmantrya tatvavit| gacchan paramatatvajñaḥ sahasraṃ japate yadi|| tadā maṃtro bhavet siddho duṣṭamaṃtro'pi pārvati| etatprayogaṃ deveśi na kasmai darśayet kvacit|| yadi vā darśayenmohāt kubuddhi kulanāśakaḥ| anyathā pretarājasya bhavanaṃ yāti niścitaṃ

7.p4

iti śrīkālītaṃtre rahasya puraścaraṇa vidhi nāmnaḥ saptamaḥ paṭalaḥ

Linked texts (4)