Dashamahavidya 9
Daśamahāvidyā 9
- Language
- Sanskrit
9.p1
navamaḥ paṭalaḥ vidyāphala vidhi
9.p2
bhairavovāca evaṃ samasta vidyānāṃ rājñī stotuṃ na śakyate| vaktrakoṭi sahastraistu jihvā koṭi śatairapi|| sarvasiddhi parābhūmira niruddha sarasvatī| tasmādasyā jñānamātrāt siddhayo 'ṣṭo bhavanti hi|| aniruddha sarasvatyā jñānamātreṇa sādhakaḥ| pāṇḍitye ca kavitve ca vāgīśa samatāṃ vrajet|| tasya pāṇḍitya vaidagdhya vicitrapada kalpanāt| devā api vilajjante kiṃ punarmānavādayaḥ|| asti cet tvatsamā nārī matsamaḥ puruṣo'sti cet| aniruddha sarasvatyāḥ samo maṃtro 'sti vai tadā|| asyājapo brahmajapo jñānamasyātma cintanaṃ| yogasandhāraṇā samyagdhyānamasyā na saṃśayaḥ|| mahāpadi mahāpāpe mahāgraha nivāraṇe| mahābhaye mahotpāte mahāśoke mahotsave|| mahāmohe mahā'saukhye mahādāridrya saṃkaṭe| mahāraṇye mahāśūnye mahāsthāne mahāraṇe|| durākhyāne durāvāse durbhikṣe durnimittake| samastakleśa saṃghāte smaraṇādeva nāśayet|| asyā jñānaṃ brahmajñānaṃ dhyānamasyātma cintanaṃ| tasmādasyāḥ samāvidyā nāsti taṃtre na saṃśayaḥ|| kulāmṛta niṣevī ca kālītaṃtrārtha cintakaḥ| brahmādi bhavane tasya samo nāsti kutaḥ paraḥ|| sa eva sukṛtī loke sa eva kulabhūṣaṇaḥ| dhanyā ca jananī tasya yena devī samarcitā
9.p3
vaktre sarasvatī tasya lakṣmīstasya sadāgṛhe| tīrthāni dehe tiṣṭhanti yena devī samarcitā|| dhanena dhananāthaśca tejasā bhāskaropamaḥ| balena pavano hyeṣa yena devī samarcitā|| gānena tumbaruḥ sākṣāddāne karṇasamastathā| dattātreyasamo jñānī yena devī samarcitā|| vahniriva riporhantā gaṅgeva malanāśakaḥ| śucauśucisamaḥ sākṣādindoriva sukhapradaḥ|| pitṛdevasamaḥ śāstā kālasyaiva durāsadaḥ| vāgīśa iva gambhīro nirdhati iva durddharaḥ|| vṛhaspatisamo vāgmī dhāraṇī sadṛśaḥ kṣamī| kandarpasadṛśaḥ strīṇāṃ yena devī samarcitā|| ahobhāgyamaho loke kulajñāna parāyaṇaḥ| teṣāṃ madhye 'pi yaḥ kopi kālī sādhana tatparaḥ|| tyajasi tvaṃ varaṃ caitat pumāṃsaṃ paramaṃ tathā| mādṛśaṃ tu kvacit kāle tyajasi tvaṃ kadācana|| kālī jñāninamāsādya na tyajasi kadācana| nahi kālī samā vidyā nahi kalīsabhaṃ phalaṃ|| nahi kālīsamaṃ jñānaṃ nahi kālī samaṃ tapaḥ| ye guṇāḥ parameśāsya pañcakṛtya vidhāyinaḥ|| te guṇāḥ santi sarvajñe kālītattvasya nānyathā| kālikā hṛdayajñānī latāsādhanatatparaḥ|| devavanmānavo bhūtvā labhenmuktiṃ ca śāśvatīṃ| iti te kathitaṃ samyak kālikātattvamuttamaṃ|| anena samyagāsthāya sarvadharma phalaṃ labhet
9.p4
iti śrīkālītaṃtre vidyāphala vidhi nāmnaḥ navamaḥ paṭalaḥ
Linked texts (2)
- Puraścaryārṇava — Sanskrit
- Pūrvārddhadevirahasya — Sanskrit