Pramāṇa · Search · About · API

Devirahasya 1

Devīrahasya 1

Language
Sanskrit

1.1

śrībhairava uvāca
adhunā devi vakṣyāmi rahasyaṃ paramādbhutam
yatra sarveṣu tantreṣu yāmalādiṣu bhāṣitam

1.2

parādevīrahasyākhyaṃ tattvaṃ mantroccavigraham
tattvaṃ śrīṣoḍaśāccaryāḥ sarvasvaṃ mama pārvati

1.3

aprakāśyamadātavyaṃ paramoccaphalapradam
bhogāpavargadaṃ loke sādhakānāṃ sukhāvaham¹

1.4

śrīdevyuvāca
bhagavan sarvatattvajña kaulikeśvara śaṅkara
tvatprasādānmayā jñātaṃ tattvaṃ devyāḥ sudurlabham

1.5

tattvaṃ mantrātmakaṃ guhyaṃ sūcitaṃ bhavatā svayam
parādevīrahasyākhyaṃ dīkṣāpūrvaṃ vadasva me

1.6

śrībhairava uvāca
devīrahasyamīśāni śṛṇu tvaṃ bhaktipūrvakam
yena śravaṇamātreṇa koṭipūjāphalaṃ labhet

1.7

athāhaṃ nirṇayaṃ vakṣye paramaṃ guruśiṣyayoḥ
vicārya vidhivaddhīmān dīkṣākarma samācaret

1.8

brahmādikīṭaparyantaṃ jagat sthāvarajaṅgamam
parāદevyā paśutvena mohitaṃ vigataspṛham

1.6-2

tathāpi tatprasādena sevayā tatpadābjayoḥ
kaulikaḥ paśubhāvena mukto jñānaṃ bhajet tataḥ

1.10

dīkṣāṃ tasyāḥ śive mantrī labdhvā gurupadārcanāt
dīkṣitaḥ sa bhavejjñānī dīkṣāhīno bhavet paśuḥ

1.11

yasya dīkṣā śive nāsti jīvanaṃ tasya niṣphalam
sa jātu nottared devi nirayāmbunidheḥ kvacit

1.12

dīkṣāhīnasya deveśi paśoḥ kutsitajanmanaḥ
pāpaugho'ntikamāyāti puruṣaṃ dūraṃ palāyate

1.13

tasmād yatnena dīkṣaiṣā grāhyā kṛtibhiruttamā
bālye vā yauvane vāpi vārdhakye'pi sureśvari

1.14

anyathā nirayī pāpī pitṝn svān nirayaṃ nayet
ataḥ paśurmanuṣyaḥ san paśuyoniṃ vrajecchive

1.15

pūrvajanmārjitāṃ prāpya vāsanāṃ paramārthadām
gurumanveṣayed devi kaulikācāradīkṣitam

1.16

guruṃ kulīnaṃ tantrajñaṃ sarvāṅgaiḥ sumanoharam
nirāmayaṃ ca nirlobhaṃ niḥśeṣāgamapāragam

1.17

labdhvā bhaktyā praṇamyādau toṣayitvā viśeṣataḥ
siddhasādhyārinirṇītāṃ dīkṣāṃ devyā yathāvidhi

1.18

gṛhṇīyāt parayā bhaktyā sādhako yena jāyate
guruśca śiṣyaṃ ramyāṅgaṃ kulīnaṃ garbhadīkṣitam

1.16-2

gurubhaktirataṃ bālaṃ yuvānaṃ dhiṣaṇāyutam
devībhaktirataṃ bhaktaṃ pāpabhītaṃ kṛtātmakam

1.20

dṛṣṭvā dīkṣāṃ parāṃ dadyāt kṛtabhāgī bhavet tataḥ
śrīdevyuvāca
bhagavan karuṇāmbhodhe saṃśayo'yaṃ mahān mama
yasya citte parā bhaktirgururnosti tathāvidhaḥ

1.21

kulīnaḥ sarvatattvajño mantrasādhanakatcamaḥ
bhaktyā paramayā yuktaḥ sa kiṃ deva kariṣyati

1.22

śrībhairava uvāca
adīkṣita upādhyāyavihīnaḥ śaktibhaktimān
gurorabhāve deveśi pustakaṃ gurumācaret

1.23

yadi kaścid bhaved devi gurustattvavicakṣaṇaḥ
dīkṣitaḥ śivamantreṇa vaiṣṇavaḥ śubhalakṣaṇaḥ

1.24

taṃ parityajya yo devi parābhakto'pi bhaktimān
pustakaṃ tu guruṃ kuryāt sa bhavecchivaghātakaḥ

1.25

guruṃ kulīnaṃ tattvajñaṃ bhajenmantrasya siddhye
mūrkhaṃ lobhātmakaṃ devi kulīnaṃ ca parityajet

1.26

piturdīkṣāṃ na gṛhṇīyāt tathā mātāmahasya ca
sodarasya kaniṣṭhasya mātulasya viśeṣataḥ

1.27

dambhaṃ vittecchayā laulyaṃ na kuryānmanasāpi vā
paralokecchayā kuryāt paralokabhayāya vā

1.28

śrīdevyuvāca
bhagavan parameśāna sādhakānāṃ hitecchayā
kadā dīkṣā parā grāhyā sādhakaistadvadasva me

1.26-2

śrībhairava uvāca
sudine śubhanakṣatre saṃkrāntāvayanadvaye
navarātridine pitroḥ śrāddhe khajanivāsare

1.30

navavarṣadine devi candrasūryoparāgake
tiṣye khajanmanakṣatre dīkṣāṃ dadyādvicakṣaṇaḥ

1.31

tatrādau śubhanakṣatre snātvā saṃpūjya bhairavam
gatvā nadītaṭaṃ divyaṃ latākusumasundaram

1.32

dvīpaṃ vā paramaṃ puṇyaṃ devānāmapi durlabham
devatāyatanaṃ vāpi prāpyāśu praṇameta tataḥ

1.33

vilikhya vidhivad devi guruḥ kuryāt kṛtāhnikaḥ
vedīmīśānadigbhāge catuṣkoṇāṃ manoharām

1.34

tatra devi parādevyāḥ śrīcakraṃ tu vibhāvayet
sindūreṇa śive yantraṃ mūlamantraṃ samuccaran

1.35

trikoṇaṃ bindusaṃyuktaṃ ṣaṭkoṇaṃ vṛttamaṣṭalam
vasupatraṃ trivṛttāṅkaṃ bhūgṛheṇopaśobhitam

1.36

dīkṣāyatramidaṃ devi dīkṣākāle prapūjayet
gaṇeśadharmavaruṇāḥ kuberasahitāḥ śive

1.37

vidikṣu vidigīśānāḥ pūjanīyā yathākramam
tāramāyāramābījairdhūpadīpaprasūnakaiḥ

1.38

māyā ca mohinīṃ menāṃ maṅgalāṃ sarvamaṅgalām
mahāvidyāṃ ca deveśi ṣaṭkoṇeṣu prapūjayet

1.39

tāramāyāramābījairgandhākṣataprasūnakaiḥ
gaṅgāṃ ca yamunāṃ devi tadagre'pi sarasvatīm

1.40

trikoṇe pūjayed dhīmānīśānāgneyapūrvakam
bindau śrīmūlamantreṇa parādevīṃ prapūjayet

1.41

sadāśivaṃ mahāraudraṃ kāmeśaṃ kāmaneśvaram
gandhādyataprasūnādyairdhūpadīpāditarpaṇaiḥ

1.42

naivedyācamanīyādyaistāmbūlaiśca suvāsitaiḥ
aṣṭapatreṣu deveśi saṃpūjyā aṣṭa mātaraḥ

1.43

brāhmyādyā devi mantreṇa aṣṭabhairavapūrvakam
brāhmī nārāyaṇī caiva kaumārī cāparājitā

1.44

māheśvarī ca cāmuṇḍā vārāhī nārasiṃhikā
vāmāvartakrameṇaivaṃ pūjanīyā viśeṣataḥ

1.45

tatraiva pūjayedaṣṭa bhairavān bhairaveśvari
mahākālaṃ ca kālāgniṃ karālaṃ vikarālakam

1.46

saṃhāraṃ rurumīśāni sumunmattabhairavam
saṃpūjya vidhivat tatra gandhādyataprasūnakaiḥ

1.47

yatramabhyarcya deveśi guruṃ saṃpūjayet tataḥ
pūrve tataḥ khanet kuṇḍaṃ yonirūpaṃ trikoṇakam

1.48

tatrāgniṃ prapūjyādau vahnimāvāhyecchive
tāraṃ vahnitrayaṃ cāgne vaiśvānarapadaṃ vadet

1.49

prajvaloti yugaṃ procyedihāgaccheti saṃvadet
iha sannidhimādhatsva varaṃ me dehi-yugmakam

1.50

phaḍvahnijāyāṃ procārya gandhenābhyarcayet tataḥ
parādevyāstu mantreṇa ghṛtamājyaṃ carecchive

1.51

mūlenāgnau śive dadyādāhutīnāṃ śataṃ param
ghṛtakhaṇḍādimṛdvīkākharjūrāmbujapāyasaiḥ

1.52

tatra devīṃ samāvāhya parāṃ dhyātvā viśeṣataḥ
prāṅmukho gururāsīna uttarābhimukhaṃ śiśum

1.53

saṃsthāpya vidhivad devi kṛtvā viṣṭaraśodhanam
bhūtaśuddhikramopetaṃ prāṇārpaṇavidhiṃ caret

1.54

prāṇāyāmatrayaṃ kṛtvā vidhāyācamanatrayam
tatra mūlena deveśi diśo baddhvā parāṃ smaret

1.55

guruḥ śiṣyāya śāntāya parāpītyai maheśvari
vahneḥ samatvaṃ yatrāgre dīkṣāṃ paramadurlabhām

1.56

karṇamūle mahāvidyāṃ śrīvidyāṃ sādhakeśvaraḥ
ānandāsaktahṛdayaḥ śanaistristriḥ samarpayet

1.57

prathamaṃ tu gaṇeśasya mantraṃ sāṅgaṃ samarpayet
tato devyāśca gāyatrīṃ tato mūlaṃ maheśvari

1.58

evaṃ samarghya deveśi kṛtvā homaṃ yathāvidhi
śiṣyo dīkṣāṃ tu saṃprāpya gurumabhyarcya śaktitaḥ

1.59

toṣayitvā praṇāmaiśca dakṣiṇābhiḥ śubhāmbaraiḥ
tadājñāṃ sahasādāya japāya parameśvari

1.60

yantraṃ mantraṃ ca mālāṃ ca tattvaṃ vaikāṅgamīśvari
punarjātu śive śiṣyo gurave'pi na darśayet

1.61

tato homaṃ ca saṃpādya baṭukaṃ yoginīgaṇam
bhūtān santarpya balinā devīṃ devaṃ visarjayet

1.62

śrīdevyuvāca
bhagavan devadeveśa bhaktānugrahakāraka
gaṇeśaṃ caiva gāyatrīṃ mūlavidyāṃ japet param

1.63

śaivaṃ mantraṃ japanvo vā vaiṣṇavaṃ sādhakeśvaraḥ
kāṃ kāṃ vidyāṃ sa gṛhṇīyācchindhyetat saṃśayaṃ mama

1.64

śrībhairava uvāca
prathame'hani deveśi sādhako gurubhaktitaḥ
gaṇeśaṃ devi gāyatrīṃ mūlavidyāṃ japet param

1.65

muhūrte śubhade devi śaivaṃ mantraṃ japet tataḥ
guroḥ pādaprasādena labdhvā katipayairdinaiḥ

1.66

tato guruṃ śive bhaktyā vandanaiḥ pūjanaiḥ sadā
prārthanābhiśca saṃtoṣya śrīvidyāṃ prārthayet tataḥ

1.67

vinā śrīvidyayā devi sādhako'dīkṣitaḥ smṛtaḥ
adīkṣitaḥ paśuḥ proktaḥ paśutvānnirayī bhavet

1.68

svajanmani śive tasmād gurumabhyarcya bhaktitaḥ
śrīvidyāṃ prārthayitvādau gṛhṇīyāt sarvasiddhye

1.69

mahātripurasundaryāḥ śrīvidyāṃ prāpya durlabhām
saśivāṃ girije sāṅgāṃ prārthayed dakṣiṇāṃ tataḥ

1.70

vinā śyāmāṃ na siddhiḥ syānmamāpi parameśvari
dvāviṃśatyakṣarīṃ vidyāṃ japet sādhakottamaḥ

1.71

śyāmāvidyājapenāśu śrīvidyā siddhimeṣyati
tāmasī kālikā proktā rājasī ṣoḍaśākṣarī

1.72

sāttvikī ca parādevī mahāśrīṣoḍaśākṣarī
rājyaṃ deyaṃ śiro deyaṃ deyā santatirarthine

1.73

vasupūrṇaṃ gṛhaṃ deyaṃ na deyā ṣoḍaśākṣarī
vidyāṃ tripurasundaryā labdhvā guruprasādataḥ

1.74

manasāpīti no brūyācchrīvidyopāsako'smyaham
śyāmāṃ bhajet parāvidyāṃ śrīvidyābhedarūpiṇīm

1.75

tena siddhirbhavedāśu devānāmapi durlabhā
yanna dṛṣṭyāpi vai brūyādgurustanna samācaret

1.76

gurureva parā devī gurureva parā gatiḥ
gurumullaṅghya yaḥ kuryāt kiścit sa nirayaṃ vrajet

1.77

evaṃ devi parābhakto dīkṣito gurupūjakaḥ
gurūpadeśataḥ kuryāj japaṃ pūjāmaharniśam

1.78

svayaṃ dīkṣāṃ gurorlabdhvā dīkṣitaḥ pueyabhājanam
gurumabhyarcya saṃprārthya śaktidīkṣārthamīśvari

1.79

dīkṣitā yasya no śaktistasya dīkṣā tu niṣphalā
janmakoṭiṣu japtāpi tasya vidyā na sidhyati

1.80

tataḥ śive guruḥ śiṣyaṃ saṃpūjya paramārthavit
śiṣyastriyaṃ parārūpāṃ devīrūpāṃ vicintayet

1.81

abhyarcya paramāṃ śaktiṃ parāvad vandanaiḥ stavaiḥ
ādṛtya mātṛvad devi kanyāvad dīkṣayet tadā

1.82

parāvat pūjayitvādau tato dīkṣāṃ samarpayet
upaviśya gurustatra paścimābhimukhaḥ śive

1.83

dīkṣāyai prāṅmukhīṃ kṛtvā pūjayed yantrarājavat
tataḥ saṃpūjya deveśi yantrāgre devatāgṛhe

1.84

śivo bhūtvā parāṃvidyāṃ karṇamūle samarpayet
saṃprāpya saśivāṃ vidyāṃ guruṃ pitṛvadarcayet

1.85

gandhākṣatapuṣpanādyairdivyāmbarapūrvakaiḥ
tadājñāṃ śirasādāya japaṃ kuryāttu sarvadā

1.86

śaktiśca dīkṣitā bhūtvā dīkṣito'pi svayaṃ śive
martyo'pi saśive devi janturamaratvamavāpnuyāt

1.87

guroḥ pādaprasādena śrīvidyā yadi labhyate
sa śyāmā sa śivā devi vaśyaṃ tasya jagat trayam

1.88

idaṃ rahasyaṃ paramaṃ tava bhaktyā mayeritam
dīkṣāvidhermahādevi gopanīyaṃ prayatnataḥ

Linked texts (4)