Pramāṇa · Search · About · API

Devirahasya 13

Devīrahasya 13

Language
Sanskrit

13.1

śrībhairava uvāca
śrṛṇu devi pravakṣyāmi rahasyaṃ sarvakāmikam
yantradhāraṇapūjāyā vidhiṃ sādhāraṇaṃ param

13.2

vinā varma vinā nāmnāṃ sahasrakaṃ maheśvari
na siddhiḥ sādhakasyāsti bhairavasyāpi pārvati

13.3

yaḥ sādhako japed vidyāṃ yantradhāraṇavarjitaḥ
sā vidyā koṭijaptāpi tasya niṣphalatāṃ vrajet

13.4

śubhe'ddhi śubhanakṣatre śubhavāre maheśvari
brāhme muhūrte utthāya snātvā dhyātvā guruṃ nijam

13.5

saśivāṃ devatāṃ dhyātvā rahaḥsthāne sudhūpite
gandhāṣṭakena vilikhed yantraṃ mūlena veṣṭitam

13.6

tadbāhye kavacaṃ divyaṃ tathā nāmasahasrakam
likhet kanakalekhanyā bhūrjapatre suśobhane

13.7

gandhāṣṭakaṃ pravakṣyāmi rahasyaṃ paramaṃ priye
avācyaṃ devabhaktāya paraśiṣyāya sarvathā

13.8

svayaṃbhūkusumaṃ kueḍagolotthaṃ rocanāguru
karpūraṃ mṛganābhiśca madyaṃ ca malayodbhavam

13.9

aparaṃ te pravakṣyāmi siddhidaṃ gandhasādhanam
vaiṣṇavānāṃ ca śaivānāṃ śāktānāṃ ca śubhāvaham

13.10

kāśmīra-gorocana-pūgakādikuraṅganābhīja-sarudra-mūrvāḥ
pṛtāsakaṃ candanamiśrametadgandhāṣṭakaṃ bhairavabhairavīeṣṭam

13.11

gandhāṣṭakaṃ svamūlena niyojya kulasādhakaḥ
nyāsamṛṣyādikaṃ kṛtvā dhyāyed devīṃ śivāṅgagām

13.12

likhedyantraṃ nijaṃ divyaṃ tadvāhye mūlamantrataḥ
mātṛkāṃ vilikhenmantrī tadvāhye kavacaṃ likhet

13.13

tathā nāmasahasraṃ ca likhitvā bhūrjapatrake
veṣṭayet śvetasūtreṇa pītanīlakrameṇa ca

13.14

nijeṣṭadevīdhyānābha-varṇena parameśvari
tāmrayā pariveṣthātha suvarṇenātha veṣṭayet

13.15

tataḥ parāṃ guṭīṃ divyāṃ devīrūpāṃ vicintya ca
yantradhāraṇa-yantrasya bindau saṃsthāpayecchive

13.16

yantradhāraṇa-yantraṃ te vakṣye sādhakapūjite
kaulikānāṃ hitāththāya gopanīyaṃ viśeṣataḥ

13.17

bindutrikoṇaṃ ṣaṭkoṇaṃ ṣaḍasraṃ vasupatrakam
trivṛttaṃ ca dharāsabra yantradhāraṇa-yantrakam

13.18

sindūreṇa likhed devi layāṅgaṃ pūjayecchive
yasya pūjanamātreṇa mantrī bhairavatāṃ vrajet

13.16-2

gaṇeśaṃ dharmarājaṃ ca varuṇaṃ ca kuberakam
caturdvāreṣu saṃpūjyāścatvāro dvārapālakāḥ

13.20

asitāṅgaṃ ca kālāgniṃ saṃhāraṃ rurubhairavam
karālaṃ vikarālaṃ ca supraśonmattabhairavau

13.21

aṣṭapatreṣu saṃpūjya bhairavānaṣṭa pārvati
durgāṃ caṇḍīṃ ca sumukhīṃ śivādūtīṃ śivāṃ jayām

13.22

bahiḥ ṣaṭkoṇake pūjyāścaitā mūlena sādhakaiḥ
tārāṃ ca tāriṇīṃ turyāṃ bagalāṃ vijayāṃ tathā

13.23

chinnamastāṃ ṣaḍaśreṣu pūjayet sādhakottamaḥ
bhavānī kubjikā gaurī tryaśre pūjyā maheśvari

13.24

bindau svadevatāmiṣṭāṃ saśivāṃ kaulikottamaḥ
gandhākṣataprasūnaiśca dhūpadīpāditarpayeḥ

13.25

naivedyācamanīyādyaistāmbūlaiśca suvāsitaiḥ
tatra bindau mahādevi yathāvibhavamātmanaḥ

13.26

sauvarṇaṃ rājataṃ muktāmaṇitāmrādipūrvakam
devatāprītaye dadyād dakṣiṇāṃ gurave'pi ca

13.27

tatra svayaṃ guṭīṃ divyāṃ devīrūpāṃ kuleśvari
pañcāmṛtaiḥ pañcagavyaiḥ snāpayet sādhakottamaḥ

13.28

saṃsthāpya guṭikāṃ mantrī bindau saṃsthāpayet tataḥ
prāṇān dattvā''vāhanādimudrā mantrī pradarśayet

13.29

pādyārghyamadhuparkādi sarvaṃ tatra nivedayet
cintayed devatārūpāṃ pūjayed yantrarājavat

13.30

saṃpūjya guṭikāṃ divyāṃ tadagre sādhako japet
mūlamantraṃ yathāśaktyā mālayā karamālayā

13.31

paṭhet tatraiva kavacaṃ mantranāmasahasrakam
stotraṃ mantramayaṃ devi mantricakraṃ prapūjayet

13.32

taiḥ samaṃ sādhakaiḥ kuryāt pātravandanamīśvari
tān santarpya sudhībhaktyā dhārayed devatāṃ hṛdi

13.33

visṛjya saśivāṃ devīṃ namet saṃhāramudrayā
dhārayenmūrdhni vā bāhau guṭikāṃ varadāyinīm

13.34

ya evaṃ dhārayed yantraṃ japenmantraṃ sa sādhakaḥ
sākṣād bhavabhayonmukto bhaved bhairavasannibhaḥ

13.35

japasiddhirbhavet tasya ya evaṃ dhārayed guṭīm
bahunoktena kiṃ devi sa bhaved bhairavaḥ svayam

13.36

idaṃ tattvatamaṃ divyaṃ sarvasvaṃ paramārthadam
sārāt sārataraṃ gopyaṃ gopanīyaṃ mumukṣubhiḥ

Linked texts (4)