Devirahasya 14

Devīrahasya 14

caturdaśaḥ paṭalaḥ
śrīdevyuvāca
bhagavan śrotumicchāmi cchandomunivinirṇayam
tathā devīśvarādīnāṃ devatābījanirṇayam

śaktikīlakadigbandhanirṇayaṃ parameśvara
vaktumarhasi me deva yaccāsti mayi te dayā

śrībhairava uvāca
etad guhyatamaṃ devi devānāṃ sāramuttamam
devīnāmādidevānāṃ mantrāṇāṃ me rahasyakam

vakṣyāmi tava bhaktyāhamṛṣicchandovinirṇayam
devānāṃ mantrarājasya devīnāṃ vā tathaiva ca

ṣaṣṭikalpasahasrāṇi yenaiva vihito japaḥ
tathābdaṣaṣṭilakṣāṇi ṣaṣṭijanmāntareṣu ca

puraścaryāṃkaro devi sarpirityabhidhīyate
ṛṣihīno bhavenmantro japto janmāntareṣu ca

matyavāyakaro loke sādhakānāṃ maheśvari
yadā mantro mayā vaktrānmahādevi bahiṣkṛtaḥ

veṣṭito yena tejasvī tacchanda iti gīyate
chandāṃsi vividhānyeṣāṃ mantrāṇāṃ parameśvari

chandohīno bhavenmantro nagno martya iva priye
yadā japto manurdevi mayā paramabhaktitaḥ

prādurbabhūva me sadyo yā sā prokketi devatā
mantrarājasya devīnāṃ yenotpattirmayā kṛtā

tadbījamiti mantrāṇāṃ varṇyate parameśvari
bījahīno bhavenmantraḥ siddhihānikaraḥ śive

bījahīnaṃ jagaddhīnaṃ jalahīno nado yathā
japānte jagadutpattisthitisaṃhārikī matiḥ

jātā me yena deveśi sā śaktiriti gīyate
śaktihīno mahādevi mantro vighnakaro mataḥ

mahāmāṅgalyado mantro devīnāṃ śaktibījataḥ
japtvā stutvā mahādevi punaryena sa gopitaḥ

nistejaskaḥ punarjātaḥ kīlakaṃ tadudāhṛtam
niṣkīlitaṃ japānte ca manumabhraddhayā śive

tyaktvā sādhakarājasya siddhiṃ harati bhairavaḥ
japakāle mahādevi rākṣasā bhūtapretakāḥ

diśo daśa palāyante yena digbandhanaṃ ca tat
digbandhena vinā devi japaḥ pāṭho'pi vā tathā

niṣphalo vighnakṛnnityaṃ tena digbandhanaṃ caret
etairvihīno mantro'sti niṣphalo vighnakārakaḥ

mamāpi devi kiṃ vakṣye punaḥ kṣudreṣu jantuṣu
ityeṣa paṭalo guhyaśchandasāṃ parameśvari
gopanīyo mahāvīrairityājñā pārameśvarī

iti śrīrudrayāmale tantre śrīdevīrahasye ṛṣyādinirūpaṇaṃ caturdaśaḥ paṭalaḥ || 14

Linked texts (4)