Devirahasya 18
Devīrahasya 18
- Language
- Sanskrit
18.1
śrībhairava uvāca
adhunā devi vakṣyāmi surotpattiṃ maheśvari
yasyāḥ śravaṇamātreṇa dīkṣāphalamavāpnuyāt
18.2
samudre madhyamāne tu kṣīrābdhau sāgarottame
tatrotpannā surādevī kumārīrūpadhāriṇī
18.3
nagnā kālāgnisadṛśī kṛtahāsollasanmukhī
aṣṭādaśabhujā divyā navakumbhadharā tathā
18.4
navapātradharā tadvanmadirāruṇalocanā
nānākusumabhūṣāḍhyā muktakeśī trilocanā
18.5
nānāratnāṅgadayutā muktāhāralatāñcitā
raktānāṅgulīyaśobhāḍhyā tuṅgāpīnastanāñcitā
18.6
vicitraratnakhacitakāñcīguṇanitambinī
ratnasiṃhāsanagatā paramānandadāyinī
18.7
tāṃ dṛṣṭvā tuṣṭuvurdevīṃ brahmaviṣṇumaheśvarāḥ
sasurāsuragandharvāḥ seśvarāḥ sasadāśivāḥ
18.8
tadā prasannavadanā varadānodyatā surā
ādau pātraṃ dadhau divyamānandarasapūritam
18.9
sadāśivāya deveśi sa natvā pātramagrahīt
pātrād binduḥ papātorvyāṃ jātā guḍalatāstataḥ
18.10
bindupātāt kaṇā jātāstebhyo jātāḥ sahasraśaḥ
ikṣubhedāśca khadirāstryūṣaṇādyāḥ sitādayaḥ
18.11
kramukā nāgavallī ca sravantīti maheśvari
gauḍī caitadyutā proktā sarvārthaphaladāyinī
18.12
tato dadau paraṃ pātramīśvarāya surā śive
pātrād binduḥ papātordhvāṃ tato jātādivallarī
18.13
bindupātakaṇebhyo'pi drākṣābhedāḥ sahasraśaḥ
mṛdvīkādyā mahādevi jātāḥ paramapāvanāḥ
18.14
mādhvī proktā mahāvidyāsādhane sarvasiddhidā
tato dadau paraṃ pātraṃ rudrāyāmṛtapūritam
18.15
pātrād binduḥ papātordhvāṃ jātā godhūmajātayaḥ
tatkaṇebhyo madantī ca jātā vai dhānyajātayaḥ
18.16
paiṣṭī proktā surā devi paramānandadāyinī
tato dadau paraṃ pātraṃ viṣṇave prabhaviṣṇave
18.17
pātrād binduḥ papātordhvāṃ saṃvijñātā tataḥ priye
tatkaṇebhyo'pi deveśi tajjñedāḥ kanakādayaḥ
18.18
anye ca bahavo jātā bhedā madanavardhakāḥ
vijayeti mayā proktā vaiṣṇavī paramārthadā
18.19
saṃvidāsavayormadhye saṃvideva garīyasī
tato dadau paraṃ pātraṃ śrīsurā parameṣṭhine
18.20
pātrād binduḥ papātordhvāṃ jātaḥ śīghraṃ parūṣakaḥ
tatkaṇebhyo'pi sañjātā bhedāḥ caudrarasādayaḥ
18.21
pānakaṃ proktamīśāni sarvasādhāraṇaṃ param
tato dadau paraṃ pātramindrāyāmṛtanirbharam
18.22
pātrād binduḥ papātorvyāṃ jātaṃ jātīphalaṃ tataḥ
tatkaṇebhyo'pi sañjātā bhedāśyāmalakādayaḥ
18.23
pānakaṃ nāma tad divyaṃ rasāyanamudāhṛtam
tato dadau paraṃ pātraṃ gurave girije surā
18.24
pātrād binduḥ papātorvyāṃ guḍapuṣpaṃ tataḥ śive
jātaṃ tatkaṇajā bhedā nārikelaphalādayaḥ
18.25
pānakaṃ nāma deveśi rasāyanamidaṃ param
tato dadau paraṃ pātraṃ śukrāyāmṛtapūritam
18.26
pātrād binduḥ papātorvyāṃ jātāḥ kharjūrapādapāḥ
tatkaṇebhyo'pi sañjātā bhedā bhādāmakādayaḥ
18.27
pānakaṃ tadapi proktaṃ divyaṃ santoṣakāraṇam
tato dadau paraṃ pātraṃ sūryācandramasoḥ sakṛt
18.28
pātrād binduḥ papātorvyāṃ jātā sañjīvanauṣadhiḥ
tatkaṇebhyo'pi sañjātā vividhauṣadhayaḥ śive
18.29
pānakaṃ tadapi proktaṃ sarvasādhāraṇaṃ param
sarvārthaphaladaṃ devi sarvasārasvatapradam
18.30
dattvā divyaṃ rasaṃ devī surā tatra tirodadhe
te sarve parameśāni surānandaikanirbharāḥ
18.31
sadāśivādayo devāḥ surāyai ca varaṃ daduḥ
ye pibanti paraṃ pānaṃ paramānandakāraṇam
18.32
te sarve yānti paramaṃ padaṃ śāśvatamavyayam
vinā gauḍīṃ tathā mādhvīṃ surāṃ yaḥ pūjayecchivām
18.33
śivaṃ nārāyaṇaṃ rudraṃ sa bhavennirayāspadam
adīkṣitaḥ paśurdevi dīkṣito'pyasuraḥ paśuḥ
18.34
tasmāt surāṃ śive'bhyarcya pūjāyāṃ vaiṣṇavottamaḥ
pivedgauḍīṃ tathā mādhvīṃ paiṣṭīmāsavamuttamam
18.35
pānakaṃ ca śubhāḥ sarve pūrvābhāve paraḥ paraḥ
itīdaṃ paramaṃ tattvaṃ kaulikānāṃ rahasyakam
ānandeśvarasarvasvaṃ gopanīyaṃ svayonivat
Linked texts (4)
- Devīrahasya — Sanskrit
- Pūrvārddhadevirahasya — Sanskrit
- Devīrahasyatantra — Sanskrit
- Devīrahasyapurāṇa — Sanskrit