Devirahasya 23
Devīrahasya 23
- Language
- Sanskrit
23.1
tava snehena nirṇītaṃ gopanīyaṃ mumukṣubhiḥ
śrībhairava uvāca
śṛṇuṣvāvahitā bhūtvā mālāśodhanamuttamam
yena śodhanamātreṇa mālā siddhyati satphalā
23.2
śrīdevyuvāca
mālā kīdṛgvidhā nātha kriyate kaulikottamaiḥ
kiyatphalā kiyatsaṃkhyā sarvaṃ me vaktumarhasi
23.3
śrībhairava uvāca
navāntā varṇitā saṃkhyā kālo'yaṃ dvādaśāvadhiḥ
mālā japasya deveśi rahasyamidamaiśvaram
23.4
kālātmā savitā prokto vallabhe japadevatā
dvādaśātmā sa savitā tadantāvṛttirīritā
23.5
mālā raviphalā proktā saṃkhyayā kaulikeśvari
āvartayecca navadhā tāmeva japasiddhye
23.6
athāntarguhyamācakṣve tava snehena pārvati
mālārahasyasarvasvaṃ nākhyeyaṃ yasya kasyacit
23.7
rudrāṇāṃ tu śataṃ caikaṃ bhairavāṣṭakayojitam
kṛtvā meruṃ mahārudraṃ japamālā vinirmitā
23.8
na hanyād bhairavān rudraiḥ rudrāṃśca bhairavaistathā
anyathā japahāniḥ syādrudrasya vacanaṃ yathā
23.9
aṣṭotkṛṣṭaśataṃ devi golakānāṃ mukhaṃ mukhe
pāyuṃ pāyau nibadhnīyāt sūtre mantramanusmaran
23.10
ūrdhve meruṃ mahāketuṃ nibadhya kulasundari
śaṅkhamuktāpravālārka-rudrākṣavaravīrudhām
23.11
maṇikāścanapadmākṣanṛdantānāṃ yathākramam
sarveṣāṃ golakānāṃ ca meruṃ rudrākṣamācaret
23.12
naradantavirodhānāṃ meruṃ vājiradaṃ careta
ṣaṇmāsenākṣasūtrāṇāṃ śodhanaṃ sādhakaścaret
23.13
tato japenmahāvidyāṃ kauliko japamālayā
gurustribhistrirāvartya paṭtriṃśattattvagolakān
23.14
tāraṃ meruṃ vidadhyāt tu tattvamālāsu kaulikaḥ
aṣṭotkṛṣṭaśate prauḍhā māleyaṃ devi durlabhā
23.15
praṇavāntaritā varṇā devi lomānulomataḥ
varṇitā mātṛkāmālā vedādihavirāśritā
23.16
tāradvayaṃ svarānte ca dadyāllomānulomataḥ
tāradvayaṃ ca vargānte varṇādyante ca taddvayam
23.17
vidhāya turagaṃ meruṃ japecchvatyarṇamālayā
tārakābhaiḥ saṃpuṭitā māleyaṃ guruvallabhā
23.18
devadevasya deveśi svatantrasya maheśituḥ
ṣaḍānanodbhavāstārāḥ ṣaṭ ṣaḍāmnāyasūcakāḥ
23.19
caturṇāmāśramāṇāṃ tu śaṅkhārkavaravīrudhām
rudrākṣāṇāṃ prakurvīta mālāṃ sarvārthasiddhidām
23.20
muktāpavālasadratna-hemapadmākṣaśālinām
pūrvāmnāyādibhedānāṃ mālāṃ kuryādyathākramam
23.21
lomānulomavarṇānāṃ dvayotkṛṣṭaśataṃ śive
tārakāmena saṃyojya brahmotkṛṣṭaśataṃ śive
23.22
ūḥ sumeruṃ niyojyādau varṇalomānulomakaiḥ
svaravargayaśām̐llāntān yojayet parameśvari
23.23
śrīśivācaramāleyaṃ varṇitā snehato mayā
śrīmahāṣoḍaśīvidyāgurūnādāya pārvati
23.24
ṣaṭtriṃśattattvamātrābhiryojayet saptabhirgrahaiḥ
śivāmāleyamākhyātā śivasāyujyasiddhaye
23.25
pañcaṣaṣṭyatcarīvarṇāścatvāriṃśātibhairavaiḥ
ṛdhikairyojayenmālā bhairavīyamudāhṛtā
23.26
anāmikādvayaṃ parva kaniṣṭhādikrameṇa tu
tarjanīmūlaparyantaṃ karamāleyamāhṛtā
23.27
daśāṃśaṃ sañjaped devi kevalaṃ karamālayā
anāmikādvayaṃ parva kaniṣṭhādikrameṇa tu
23.28
tarjanīmūlaparyantaṃ japed dvādaśaparvasu
kaniṣṭhikācatuṣparvānāmāparvatrayaṃ tathā
23.29
madhyamāparva devyekaṃ tarjanyāśca catuṣṭayam
saṃyojya saṃjaped vidyāṃ mantrī dvādaśaparvasu
23.30
śaktimāleyamākhyātā tyaktvā parvacatuṣṭayam
durgāṣṭamyā japed devi sahasrādyayutāvadhi
23.31
dikpālāśca gṛhāścāṣṭau santi ṣoḍaśaparvasu
pralambaparvatritaye trayo devāḥ samāhitāḥ
23.32
krūragrahau ca mandārau dikpālau yamanirṛtī
kulikaśceti vikhyāto japahānikaro mataḥ
23.33
kulikaṃ santyajed devi mantrī karajape sadā
kaniṣṭhāmūlaparvādikrameṇa karagāḥ surāḥ
23.34
tān śṛṇuṣva mahādevi yathāvadvarṇyate mayā
īśāno'gnirnirṛtiśca vāyurindro yamastathā
23.35
varuṇaśca kuberaśca sūryaḥ somo budho guruḥ
sitarāhurasaurāntau brahmaviṣṇumaheśvarāḥ
23.36
japasiddhikarā devi sakalāḥ karadevatāḥ
kulikaṃ santyajed devi japakāle svasiddhye
23.37
kuliko mudgaro jñeyo mudgare tu mahadbhayam
mudgarollaṅghane śaktirmahārudrasya kevalam
23.38
kulikaṃ ca mahāketuṃ merurūpaṃ na laṅghayet
anyathā devi mantrī ca devatāśāpamāpnuyāt
23.39
atha pāṇmāsikīṃ śuddhiṃ mālānāṃ te bravīmyaham
yayā siddhirbhaved devi devānāmapi durlabhā
23.40
mālāśodhanakāle tu gatvā pretālayaṃ sudhīḥ
vidhāya bhasmanā snānaṃ jalena mantritena vā
23.41
tatra snātvopaviśyātha kṛtvā viṣṭaraśodhanam
bhūtaśuddhikramopetaṃ prāṇārpaṇāvidhiṃ tataḥ
23.42
dehaśuddhiṃ vidhāyātha mantrasaṅkalpamācaret
mālāśodhanamantrasya ṛṣiḥ kālāgnirudrakaḥ
23.43
chando'nuṣṭup mahādevi devī śmaśānabhairavī
kālarātrīti vikhyātā muṇḍamālāvilāsinī
23.44
haritaṃ bījamākhyātaṃ nalinī śaktirīritā
sūryākhyaṃ kīlakaṃ mālāśuddhye viniyogakaḥ
23.45
ṛṣicchandodaivatādinyāsaṃ kuryāt kulārthavit
aṅganyāsaṃ vidhāyātha karanyāsādipūrvakam
23.46
vidhāyāsanaśuddhiṃ ca bhūtaśuddhikramaṃ caret
prāṇān devi pratiṣṭhāpya śrīcakrārcanamācaret
23.47
yogapīṭhārcanaṃ kṛtvā dravyādīni viśodhayet
cetreśa-yoginīvṛndaṃ santarpya kulasundari
23.48
layāṅgaṃ pūjayed devi pūjānte sañcapenmanum
mālāyā devadeveśi yathāmnāyaṃ yathāvidhi
23.49
śrīcakropari saṃsthāpya śodhayet kalaśāmṛtaiḥ
mālāmūlena deveśi mūlamantreṇa sādhakaḥ
23.50
mālāmantrān pravakṣye'haṃ śrṛṇuṣvāvahitā priye
(1) tāraṃ ramā ramā tāraṃ śaktinīti-padaṃ vadet
23.51
tāraṃ mā tāramante'po mantro'yaṃ śaktamālikaḥ
(2) tāraṃ lajjā-yugaṃ tāraṃ muktāmālini mā-yugam
23.52
ṭhadvayaṃ mantrarājo'yaṃ muktāmālāviśodhanaḥ
(3) tāraṃ vadhūṃ ca vedādyaṃ raudre ca rodhamālini
23.53
ambikabījaṃ ṭhadvayaṃ ca mantro'yaṃ raudramālikaḥ
(4) tāraṃ mātrādyamuccārya sūryākhyabīja-yugmakam
23.54
arkamāle haraṃ nīraṃ mantraḥ sphaṭikaśuddhikṛt
(5) tāramandhiramāmāyāḥ sindhuṃ rudrācamālini
23.55
śuddhā bhava vanaṃ mantro devi rudrācaśodhanaḥ
(6) tāraṃ tārātrayaṃ tāraṃ vadhūṃ tulasi vaiṣṇavi
23.56
vauṣaḍ vanaṃ mahāmantrastulasīśodhanābhidhaḥ
(7) tāraṃ tārāṃ ca mṛdvīkā maṇimāle manohare
23.57
ṭhadvayaṃ mantrarājo'yaṃ maṇimālāviśodhanaḥ
(8) bedādyaṃ kamalā kuntī vāgbījaṃ kāmaśaktikam
23.58
suvarṇamāle śaktyāpo mantro'yaṃ svarṇaśodhanaḥ
(9) tāraṃ ca vāyupūjyā ca tāraṃ padmācamālini
23.59
haritaṃ ṭhadvayaṃ mantro devi padmācaśodhanaḥ
(10) tāratrayaṃ mā-trayaṃ ca kāmarājatrayaṃ śive
23.60
śivaḥ śaktirdantamāle muṇḍamāle ca vāgurā
vadhūrvahniṃ vanaṃ mantro naradantaviśuddhikṛt
23.61
pṛthaṅpṛthaṅ mahāmantraiḥ śrīcakrasthāṃ maheśvari
mālāṃ saṃśodhya saṃpūjya mūlaṃ japtvā daśāṃśataḥ
23.62
gandhācataprasūnaiśca pūjayet kaulikottamaḥ
(11) ūm̐māle māle mahāmāle sarvatattvasvarūpiṇi
23.63
caturvargastvayi nyastastasmānme siddhidā bhava
svāhānto'yaṃ mahāmantraḥ sarvamālāviśodhanaḥ
23.64
(12) śivabījaṃ samuccārya tato'vighnaṃ kuru smaret
me ṭhadvayaṃ mahāmantraḥ sadā mālāviśodhanaḥ
23.65
evaṃ saṃśodhya saṃskṛtya saṃpūjya kulasundari
mālāmādāya deveśi sajjapeddharātrake
23.66
śrīdevyuvāca
karamālāstrayā proktā bahvyastāsāṃ ca śodhanam
vada deva kathaṃ kuryāt kaulikaḥ sarvasiddhaye
23.67
śrībhairava uvāca
kālī kāmaḥ kṛpā kuntī karamāle haraṃ vanam
mantro'yaṃ karamālāyāḥ śuddhirdaḥ sarvasiddhidaḥ
23.68
ṣaemāsenaiva mālānāṃ śodhanaṃ sādhakaścaret
tato japenmahāvidyāṃ sarvasiddhīśvaro bhavet
23.69
idaṃ tattvaṃ hi tattvānāṃ sarvasvaṃ pāradaivatam
tava bhaktyā mayākhyātaṃ nākhyeyaṃ brahmavādibhiḥ
Linked texts (4)
- Devīrahasya — Sanskrit
- Pūrvārddhadevirahasya — Sanskrit
- Devīrahasyatantra — Sanskrit
- Devīrahasyapurāṇa — Sanskrit