Devirahasya 24
Devīrahasya 24
- Language
- Sanskrit
Contents
- 24.42 — 1 part
24.1
atha
pañcaviṃśaḥ paṭalaḥ
śrībhairava uvāca
adhunā devadeveśi yantraśodhanamuttamam
vakṣyāmi tava bhaktyāhaṃ kaulikānāṃ hitāya ca
24.2
sauvarṇaṃ rājataṃ tāmraṃ sphāṭikaṃ raudhiraṃ tathā
kāpālikaṃ ca pāśāsaṃ śrīcakraṃ vaiṣṇavārimakam
24.3
eteṣvaṣṭasu divyeṣu yogapīṭheṣu pārvati
vibhāvayenmahāyantraṃ daivaṃ bhaumaṃ ca bhāvikam
24.4
ūrdhvarekhamadhorekhaṃ tṛtīyaṃ gandhacitritam
trividhaṃ yantramīśāni susiddhaṃ siddhasādhyakam
24.5
sahasrābhaṃ ca pāśāsaṃ śodhayeduttarāyaṇe
pañcame pañcame devi tataḥ siddhipradaṃ bhavet
24.6
śarāṅkuśaṃ vaiṣṇavāśmaṃ śodhayed dakṣiṇāyane
caturthe ca caturthe ca tataḥ siddhimavāpnuyāt
24.7
sauvarṇaṃ sphāṭikaṃ yantraṃ varṣānte śodhayet sudhīḥ
rājataṃ tāmrikaṃ yantraṃ ṣaṇmāsānte ca śodhayet
24.8
evaṃ mayoktakāleṣu śodhayed yantramīśvari
siddhyai kauliko devi yathāvadvaryate mayā
24.6-2
yantraśodhanamantrasya ṛṣiḥ prokto mayā śivaḥ
triṣṭup chanda iti khyātaṃ parāśaktiśca devatā
24.10
ramā bījaṃ parā śaktiḥ kāmaḥ kīlakamīśvari
śrīcakraśuddhisiddhyarthaṃ viniyogaḥ prakīrtitaḥ
24.11
munyādinā carennyāsaṃ karanyāsaṃ ṣaḍaṅgakam
tato viṣṭaraśuddhiṃ ca prāṇārpaṇavidhiṃ caret
24.12
iṣṭarṣidevatānyāsaṃ karāṅganyāsamācaret
vidhāya mātṛkānyāsaṃ trayāṅganyāsaṃyutam
24.13
ardhanārīśvaranyāsaṃ poḍhānyāsamataḥ param
mūlatrikhaṇḍakaṃ nyāsaṃ kṛtvā prāṇacayaṃ śive
24.14
pīṭhapūjāṃ svahṛdaye kṛtvā ṣaṭcakradīpanam
svarṇasiṃhāsane sthāpya śrīcakraṃ sveṣṭadaivatam
24.15
śodhayenmadhunā devi kuṇḍagolodbhavena vā
aṣṭagandhena vā devi pauruṣeṇa rasena vā
24.16
ibhyājyena mahādevi saṃsthāpya kulapūjite
śrīcakraṃ mūlamantreṇa pūjayet tatra kaulikaḥ
24.17
(1) vāgbhavaṃ śaktibījaṃ vāk śaktiṃ cakreśvari priye
yantraṃ sauvarṇamuddhṛtya śodhaya-dvayamuddharet
24.18
ṭhadvayaṃ svarṇayantrasya mantraḥ śodhanakārakaḥ
(2) tāraṃ sindhuṃ ca tāraṃ ca rājataṃ yantramuddharet
24.19
śodhaya-dvayamāpaśca yantraśodhanako manuḥ
(3) tāraṃ tārā ca tāraṃ ca vadhūṃ tāraṃ ca tārakā
24.20
tāmreśvarīti yantraṃ me śodhayāpo mahāmanuḥ
(4) vedādyaṃ kamalāṃ māyāṃ tāraṃ yantraṃ kulāmbike
24.21
śodhaya-dvirvenaṃ mantraḥ sphāṭikāśmaviśodhanaḥ
(5) praṇavaṃ kūvarībījaṃ mā māyā vāyupūjitā
24.22
rudreśvari parā yantraṃ śodhayāpo manuḥ smṛtaḥ
(6) tāraṃ vāk kāmarājaśca śaktiḥ kapālamālini
24.23
yantraṃ śodhaya ṭhadvandvaṃ kapālaśodhano manuḥ
(7) tāraṃ gaurī ca tārtīyaṃ vāk kāmaśca citāsane
24.24
yantraṃ śodhaya ṭhadvandvaṃ manuḥ pāśāsaśodhanaḥ
(8) vedādyaṃ haritaṃ vāṇī śaktiḥ kāmo ramā ramā
24.25
nitye triṣṇuśilāyantraṃ śodhayāpo manuḥ smṛtaḥ
ityevaṃ yantramīśāni ratnasiṃhāsanasthitam
24.26
mūlamantreṇa saṃsthāpya pūrvoktauṣadhavāriṇā
mantrairebhiḥ prajaptvaiśca pūjayed gandhamālyakaiḥ
24.27
saṃpūjya devi saṃśodhya tataḥ pūjāṃ śivoditām
yathoktāṃ sādhakaḥ kuryād dravyaśodhanapūrvakam
24.28
aṣṭāṅgapūjāṃ nirmāya niśīthe japamācaret
śrībhairavyuvāca
bhagavan kulakauleśa bhairavāṣṭakamadhyaga
niśīthakālaṃ me brūhi saṃśayo'yaṃ mahān mama
24.29
śrībhairava uvāca
ardharātrastu trividho yanmuhūrtacatuṣṭayam
niśītho vārdharātraśca tṛtīyaiva mahāniśā
24.30
dvitīye ca tṛtīye ca yāme yāmalabhairavi
muhūrte dve samādāya tathā dve ca maheśvari
24.31
dve muhūrte niśīthastu parato dve muhūrtake
ardharātro muhūrte dve pūjārhaḥ parameśvari
24.32
muhūrtaikaṃ samādāya parataścaikamīśvari
yāmadvayādardharātro varṇitaḥ kaulasiddhaye
24.33
śive madhyamayoḥ sandhiryāmayoryā mahāniśā
tasyāṃ parāṃ japedyastu sa bhavecchivasannibhaḥ
24.34
niśīthe pūjayedyatramardharātre japenmanum
mahāniśāyāṃ prajapet parāṃ kaulikasattamaḥ
24.35
kiṃ kiṃ na sādhayelloke yanmamāpi hi durlabham
rajaḥ śukraṃ surāṃ devi māṃsaṃ mīnaṃ ca maithunam
24.36
sarvathā śodhayed devi mūlamantreṇa māntrikaḥ
pibenmadyaṃ bhajedrāmāṃ smared bhairavibhairavam
24.37
namedguruṃ japed vidyāmiti kaulamataṃ param
prātaḥkṛtyaṃ śive kṛtvā śrīcakraṃ pūjayet tataḥ
24.38
japenmantrī mahāvidyāṃ stotrapāṭhaṃ caret tataḥ
parāṃ japet sadā satyāṃ tato yāti paraṃ padam
24.39
mahāpadi mahotpāte mahāśoke mahābhaye
mahāmohe mahāsaukhye mahādāridryasaṅkaṭe
24.40
mahāraṇye mahāśūnye mahājñāne mahāraṇe
durāpadi durāśe ca durbhikṣe durnimittake
24.41
samastakleśasaṅghāte smared devi parāmbikām
vakke sarasvatī tasya lakṣmīstasya gṛhe sadā
24.42
dhanyā ca jananī tasya yena devī samarcitā
idaṃ sāraṃ hi tantrāṇāṃ mantrāṇāṃ tattvamuttamam
mayoditaṃ tava snehānnākhyeyaṃ brahmavādibhiḥ
24.42.p1
iti śrīrudrayāmale tantre śrīdevīrahasye bhairavabhairavīsaṃvāde paramārthapradīpikāyāṃ yantraśodhanādividhi-japa-pūjākālanirūpaṇaṃ pañcaviṃśaḥ paṭalaḥ
Linked texts (4)
- Devīrahasya — Sanskrit
- Pūrvārddhadevirahasya — Sanskrit
- Devīrahasyatantra — Sanskrit
- Devīrahasyapurāṇa — Sanskrit