Devirahasya 27
Devīrahasya 27
- Language
- Sanskrit
Contents
- 27.22 — 1 part
27.1
śrībhairava uvāca
mahādevi gaṇeśasya varadasya mahātmanaḥ
kavacaṃ te pravakṣyāmi vajrapañjarakābhidham
27.2
asya śrīmahāgaṇapativajrapañjarakavacasya śrībhairava ṛṣiḥ, gāyatryaṃ chandaḥ,
śrīmahāgaṇapatirdevatā, gaṃ bījaṃ, hīṃ śaktiḥ, kurukuru kīlakaṃ, vajravighnādisiddhyarthe mahāgaṇapativajrapañjarakavacapāṭhe viniyogaḥ | gāmityādinā ṣaḍaṅganyāsaṃ vidhāya dhyāyet | dhyānam—
vighneśaṃ viśvavandyaṃ suvipulayaśasaṃ lokarakṣāpradakṣaṃ
sākṣāt sarvāpadāsu praśamanasumatiṃ pārvatīprāṇasūnum
prāyaḥ sarvāsurendraiḥ sasuramunigaṇaiḥ sādhakaiḥ pūjyamānaṃ
kāruṇyenāntarāyāmitabhayaśamanaṃ vighnarājaṃ namāmi
27.3
oṃśrīṃdrīṃgaṃ śiraḥ pātu mahāgaṇapatiḥ prabhuḥ
vināyako lalāṭaṃ me vighnarājo bhruvau mama
27.4
pātu netre gaṇādhyakṣo nāsikāṃ me gajānanaḥ
śrutī me'vatu herambo gaṇḍau me modakāśanaḥ
27.5
dvaimāturo mukhaṃ pātu cādharau pāśarindamaḥ
dantān mamaikadanto'vyād vakratuṇḍo'vatād rasām
27.6
gāṅgeyo me galaṃ pātu skandhau siṃhāsano'vatu
vighnāntako bhujau pātu hastau mūṣakavāhanaḥ
27.7
ūrū mamāvatānnityaṃ devasiṃpuraghātanaḥ
hṛdayaṃ me kumāro'vyājjayantaḥ pārśvayugmakam
27.8
pradyumno me'vatāt pṛṣṭhaṃ nābhiṃ śaṅkaranandanaḥ
kaṭiṃ nandigaṇaḥ pātu śiśnaṃ vīreśvaro'vatu
27.9
meḍhre me'vatu saubhāgyo bhṛṅgirīṭī ca guhyakam
virāṭako'vatādūrū jānū me puṣpadantakaḥ
27.10
jaṅghe mama vikarto'vyād gulphāvantyagaṇo'vatu
pādau citragaṇaḥ pātu pādādho lohito'vatu
27.11
pādapṛṣṭhaṃ sundaro'vyād nūpurāḍhyo vapurmama
vicāro jaṭharaṃ pātu bhūtāni cograrūpakaḥ
27.12
śirasaḥ pādaparyantaṃ vapuḥ supragaṇo'vatu
pādādimūrdhaparyantaṃ vapuḥ pātu vinartakaḥ
27.13
trismāritaṃ tu yat sthānaṃ gaṇeśastat sadāvatu
pūrve māṃ hrīṃ karālo'vyādāgneye vikarālakaḥ
27.14
dakṣiṇe pātu saṃhāro nairṛte rurubhairavaḥ
paścime māṃ mahākālo vāyau kālāgnibhairavaḥ
27.15
uttare māṃ sitāsyo'vyādaiśānyāmasitātmakaḥ
prabhāte śatapatro'vyāt sahasrārastu madhyame
27.16
dantamālā dinānte'vyānniśi pātraṃ sadāvatu
kalaśo māṃ niśīthe'vyānniśānte paraśustathā
27.17
sarvatra sarvadā pātu śaṅkhayugmaṃ ca madbhapuḥ
oṃ oṃ rājakule hahauṃ raṇabhaye hrīṃ hrīṃ kucūte'vatāt
śrīṃ śrīṃ śatrugṛhe śaśauṃ jalabhaye klīṃ klīṃ vanānte'vatu
glauṃ gluṃ glaiṃ glaṃ glaṃ sarvabhītiṣu mahāvyādhārtiṣu glauṃ gagauṃ
nityaṃ yatra piśācabhūtaphaṇiṣu glauṃ gaṃ gaṇeśo'vatu
27.18
itīdaṃ kavacaṃ guhyaṃ sarvatantreṣu gopitam
vajrapañjaranāmānaṃ gaṇeśasya mahātmanaḥ
27.19
aṅgabhūtaṃ manumayaṃ sarvācāraikasādhanam
vinānena na siddhiḥ syāt pūjanasya japasya ca
27.20
tasmāt tu kavacaṃ pueyaṃ paṭhedvā dhārayet sadā
tasya siddhirmahādevi karasthā pāralaukikī
27.21
yaṃyaṃ kāmayate kāmaṃ taṃtaṃ prāpnoti pāṭhataḥ
ardharātre paṭhennityaṃ sarvābhīṣṭaphalaṃ labhet
27.22
iti guhyaṃ sukavacaṃ mahāgaṇapateḥ priyam
sarvasiddhimayaṃ divyaṃ gopayet parameśvari
27.22.p1
iti śrīrudrayāmale tantre śrīdevīrahasye mahāgaṇapatikavacanirūpaṇamaṣṭāviṃśaḥ paṭalaḥ || 28
Linked texts (5)
- Devīrahasya — Sanskrit
- Pūrvārddhadevirahasya — Sanskrit
- Devīrahasyatantra — Sanskrit
- Devīrahasyapurāṇa — Sanskrit
- Āgamakalpalatā (Yadu Miśra) — Yadu Miśra, Sanskrit