Devirahasya 29

Devīrahasya 29

Language: Sanskrit

29.21 — 1 part

29.1

mahāgaṇapaterguhyaṃ gopanīyaṃ svayonivat
śrīdevyuvāca
bhagavan parameśāna mahāgaṇapatervibhoḥ
stotramaṅgatamaṃ brūhi mūlamantrasya tattvataḥ

29.2

śrībhairava uvāca
mahāgaṇapatervakṣye stotraṃ tattvanirūpaṇam
jīvasyāṅge kalau śīghraṃ jīvanmuktipradāyakam

29.3

dvicaturdaśavarṇabhūṣitāṅgaṃ
śaśisūryāgnivilocanaṃ sureśam
ahibhūṣitakaṇṭhamattacakṣatraṃ
bhramayantaṃ hṛdaye smare gaṇeśam

tāraṃ nāradagītamādyamaniśaṃ yaḥ sādhakendro japedrātrāvadi niśāmukhe śavagṛhe śūnyālaye vā prabho
tasya smeramukhāmbujāḥ pratidinaṃ lāvaṇyadarpojjvalāḥ
svarveśyāśca vaśībhavanti tridive bhūmau samastā nṛpāḥ

29.5

sakalāṃ sakalāṃ japedyadā gaṇanāthapriyamantrameva yaḥ
sakalattvamāpatimūrdhasu sphuraccaraṇābjo bhuvi śobhate ca saḥ

29.6

kamalāṃ kamalāspṛhī ca yo hṛdaye dhyāyati devamadhyagām
tava mantraprabhāvatastadā kamalā sadmani tasya niścalā

29.7

kāmarājamaniśaṃ smarāturo yo japedgṛdi gaṇeśa tāvakam
urvaśīvadanapadmaṣaṭpado dhīyate'dharaparāgakāmṛtam

29.8

maṭhaṃ japedyo niśi śūnyagehe vimuktakeśo gaṇanātha bhaktyā
raṇe ripūnindrasamān vijitya prāpnoti rājyaṃ nṛpacakravartī

29.9

śivārdhamantaryadi sādhako japedaraṇyabhūmau śivasannidhau vibho
carācare vai vicaredvimāne jagatyaśeṣāmaracakravartī

29.10

gaṇapataya iti mūlamanuṃ yo japate bhajate śrṛṇute paṭhate
gaṇakinnarasiddhasurāsurairnamito labhate gāṇapatyaṃ saḥ

29.11

vara varadeti ca mantramimaṃ yo bhajate niśi vā divase'pyaniśam
vadane vasate sadane vasate hṛdi vāk kamalā tava bhaktirapi

29.12

sarve janaṃ me iti mantrarājaṃ japanti ye bhojanakāvasāne
bhajanti te nandanacandanādivṛkṣeṣu līlāṃ surasundarībhiḥ

29.13

vaśamānayeti bhagavan yadi japati smarataptahṛdayaśca
vaśameti kinnarasutāpyurvaśī satataṃ suratadattā

29.14

svāheti mantrākṣarayugmametajjaped dinānte'pyaśanādikāle
rogā aśeṣā vilayaṃ prayānti tamāṃsi sūrye'bhyudite yathāśu

29.15

padmahastamamṛtāṃśusannibhaṃ śaṅkhayugmamaparaṃ ca dadhānam
jyaccamagnisadṛśaṃ smaranti ye te prayānti tridivaṃ vimānagāḥ

29.16

binduñyaśradaśāravāsavakalāvedāśramadhye vibho
ye dhyāyanti bhavantamīḍyavapuṣaṃ trailokyarakṣāparam
jitvā bhūmimanalpakalpanivahān bhuktvā sahāyairyutāḥ
paścādyānti gaṇeśa tāvakapadaṃ devāsurairdurlabham

29.17

iti gaṇapateḥ stotraṃ mantrātmakaṃ paramaṃ japet
paṭhati śṛṇuyādvṛttyā nityaṃ samastarahasyakam
iha dhanapatirlakṣmīmāyuḥ sutānlabhate'cirād
vrajati tridivaṃ jīvanmuktaḥ paratra sa sādhakaḥ