Pramāṇa · Search · About · API

Devirahasya 30

Devīrahasya 30

Language
Sanskrit

30.1

iti gaṇapatipaścāṅgaṃ samāptam
atha
ekatriṃśaḥ paṭalaḥ
atha sūryapaścāṅgam
śrībhairava uvāca
kailāsaśikharāsīnaṃ bhairavīpatimīśvaram
bhairavaṃ candramukuṭaṃ gaṇagandharvasevitam

30.2

pannagābharaṇopetaṃ jaṭāmukuṭamaṇḍitam
bhasmāṅgarāgadhavalaṃ sarpagonasakaṅkaṇam

30.3

siṃhacarmaparīdhānaṃ gajacarmottarīyakam
kapālakhaṭvāṅgadharaṃ ghaṇṭāḍamarudhāriṇam

30.4

triśūlabāṇāsikaraṃ varābhayakaraṃ śivam
muṇḍamālādharaṃ kāmakālāndhakabhayaṅkaram

30.5

brahmopendrendranamitaṃ candrakoṭisuśītalam
yakṣeśakinnaropetaṃ surāsuranamaskṛtam

30.6

rakṣomārīmahāpreta-bhūtavetālasaṃkulam
sādhyasiddhapiśācaugha-bhairavaprathataṃ prabhum

30.7

brahmarṣisevitaṃ devaṃ pārvatīsahitaṃ vibhum
gaṅgādharaṃ prasannāsyaṃ hasitānanapaṅkajam

30.8

nandirudrārcitaṃ śambhuṃ dṛṣṭvā provāca bhairavī
śrīdevyuvāca
bhagavan devadeveśa bhaktānāmabhayaprada
tvaṃ śivaḥ parameśānastvaṃ viṣṇustvaṃ prajāpatiḥ

30.9

sattvāśrito rajorūpastāmaso lokanāśanaḥ
nirguṇo bhairavādhyakṣaḥ kāraṇānāṃ ca kāraṇam

30.10

vedamūlo vedagamyo jagattrātā jagatpatiḥ
tvaṃ me prāṇādhiko deva krītāsmi tava kiṅkarī

30.11

purā pṛṣṭo'si bhagavan mayā tvaṃ bhaktipūrvakam
adya tadvada tattvaṃ me yadyahaṃ tava vallabhā

30.12

śrībhairavaḥ
kiṃ vakṣyāmi śive tattvaṃ yat tavāsti sudurlabham
vismṛtaṃ vada me śīghraṃ vakṣye prāṇādhikāsi me

30.13

śrīdevyuvāca
devadeva mahādeva daityanāyakapūjita
sakalāgamasārajña kaulikānāṃ hitecchayā

30.14

vada śīghraṃ dayāsindho paścāṅgaṃ pūrvasūcitam
devadevasya sūryasya sarvatattvottamottamam

30.15

śrībhairavaḥ
etad guhyatamaṃ devi paścāṅgaṃ dvādaśātmanaḥ
sarvāgamarahasyaṃ te vakṣye snehena pārvati

30.16

paṭalaṃ, nityapūjāyāḥ paddhatiṃ kavacaṃ param
mantranāmasahasraṃ ca stotraṃ mūlātmakaṃ priye

30.17

paścāṅgamidamīśāni devadevasya bhāsvataḥ
sarvasāramayaṃ divyaṃ rahasyaṃ mama durlabham

30.18

adātavyamabhaktebhyo bhaktebhyo bhogadāyakam
athāhaṃ paṭalaṃ vakṣye mūlamantramayaṃ priye

30.19

yasya śravaṇamātreṇa sarvarogaiḥ pramucyate
yo devadevo bhagavān bhāskarastejasāṃ nidhiḥ

30.20

pratyakṣadevo vedānāṃ kartā sākṣī ca karmaṇām
saviteti ca vedeṣu paramātmā jagatpatiḥ

30.21

gāyatrīvallabhaḥ sūryaḥ sṛṣṭisthitilayeśvaraḥ
kālātmā ca paraṃ dhāma paraṃ brahyeti gīyate

30.22

tasyādidevadevasya sūryasya savituḥ śive
mantroddhāraṃ paraṃ vakṣye sarvasiddhimayaṃ kalau

30.23

tāraṃ ḍimbaṃ bhūtiśaktī ca sūryaṃ
ḍentaṃ madhye viśvamante bhavāni
mantroddhāraḥ saviturvarṇitaste
durgācaro bhogamocaikahetuḥ

30.24

nāsya vighno na vā doṣo na sādhyāribhayaṃ śive
na śaucaniyamo vāpi viparyayabhayaṃ nahi

30.25

aṣṭasiddhiprado mantraḥ sarvarogaharaḥ paraḥ
sarvārthasādhako devi na deyo yasya kasyacit

30.26

varṇalakṣaṃ japenmantraṃ sādhakaḥ sāṅgamīśvari
kiṃ kiṃ na labhate mantrī vāñchitaṃ sūryamudraṇāt

30.27

lakṣamekaṃ japenmantraṃ daśāṃśaṃ sādhako hunet
tarpayet taddaśāṃśena mārjayet taddaśāṃśataḥ

30.28

bhojayet taddaśāṃśena mantraḥ kalpadrumo bhavet
vaṭo'raeye śamaśāne ca śūnyāgāre catuṣpathe

30.26-2

ardharātre'tha madhyāhne paraścaraṇamācaret
sūryoparāgasamaye grāsāvadhi vimuktitaḥ

30.30

yajjapet tadbhavet siddhaṃ bhogamokṣaikakāraṇam
mantrasyāsya mahādevi ṛṣirbrahmā samīritaḥ

30.31

gāyatryaṃ chanda ityuktaṃ savitā devatā smṛtaḥ
vyoṣaṃ bījaṃ parā śaktistāraṃ kīlakamīśvari

30.32

dharmārthakāmamokṣārthe viniyoga iti smṛtaḥ
māyābījena ṣaḍdīrghabhāginā nyāsamācaret

30.33

karanyāsaṣaḍaṅgāni yathāvadanupūrvaśaḥ
kolatrayaṃ paṭhed devi japādau sādhakottamaḥ

30.34

utkīlanaṃ bhaved devi mantrarājasya pārvati
śarattrayaṃ paṭhenmadhye mūlamantrasya sādhakaḥ

30.35

sañjīvanamanuḥ prokto mantrasyāsya maheśvari
mātṛkāśodhitaṃ mantraṃ kṛtvā pārvati sādhakaḥ

30.36

nistauṭilyo bhavenmantraḥ sarvasiddhipradāyakaḥ
vedādiḍimbakāntyacchaṃ śaktimadhye paṭhecchive

30.3-2

śivaśāpaṃ mocaya dviḥ punarjāyā vibhāvasoḥ
iyaṃ śāpaharī vidyā japyā sādhakasattamaiḥ

30.38

daśadhā saviturdevi yena mantrī śivaṃ bhajet
siddhaṃ mantraṃ japed devi yathāśaktyākṣamālayā

30.39

sarvarogairvimukto hi bhogamokṣaphalaṃ labhet
jagadante paṭhed devi śaradvāraṃ ca kaulikaḥ

30.40

saṃpuṭākhyo'styayaṃ mantro mantraratnamaṇiḥ paraḥ
gurūpadeśato jñeyaḥ sūryāstramanuruttamaḥ

30.41

yaṃ japtvā saviturmantro bhavet kalpadrumo'cirāt
tāraṃ vyoṣaṃ ca sūryāya vidmahe tadanantaram

30.42

māyāṃ śaktiṃ samuddhārya jyotīrūpāya dhīmahi
tannaḥ śivaśca śaktiśca paramātmā pracodayāt

30.43

varṇitā sūryagāyatrī sarvatantreṣu gopitā
daśadhā sādhakairjapyā saṃdhyāsvarcāsu tarpaṇe

30.44

dhyānamasya pravakṣyāmi sarvadevarahasyakam
sarvarogāpahaṃ devi bhogamokṣaphalapradam

30.45

kalpāntānalakoṭibhāsvaramukhaṃ sindūradhūlījapāvarṇaṃ ratnakirīṭinaṃ dvinayanaṃ śvetābjamadhyāsanam
nānābhūṣaṇabhūṣitaṃ smitamukhaṃ raktāmbaraṃ cinmayaṃ
sūryaṃ svarṇasarojaratnakalaśau dorbhyāṃ dadhānaṃ bhaje

30.46

yantroddhāraṃ pravakṣyāmi sarvāśāparipūrakam
sarvasaṃmohanaṃ divyaṃ sarvasiddhimayaṃ śive

30.47

bindutrikoṇavasukoṇasuvṛttarūpaṃ
divyāṣṭapatravilasaddahanāraṇāḍhyam
rekhātrayāśritadharāsadanaṃ ca devi
śrīcakrametaduditaṃ saviturvareṇyam

30.48

layāṅgamasya yantrasya vakṣye pārvati sādharam
yasya śravaṇamātreṇa koṭipūjāphalaṃ labhet

30.49

śakrāgniyamamāṃsāda-varuṇānilavittadāḥ
seśāḥ pūjyā bahirdvāre yantrarājasya sādhakaiḥ

30.50

gaṇeśaścaṇḍavetālo lolākṣo vikarālakaḥ
antardvāsthāḥ śive pūjyā vāmāvartena sādhakaiḥ

30.51

divyasiddhamanuṣyākhyaṃ gurupaṅktitrayaṃ śive
vṛttatraye'rcayenmantrī gandhapuṣpākṣatādibhiḥ

30.52

candraṃ bhaumaṃ budhaṃ jīvaṃ śukraṃ sauraṃ tamastathā
ketuṃ vasudale devi vāmāvṛttyārcayet sudhīḥ

30.53

dīptāṃ sūkṣmāṃ jayāṃ bhadrāṃ vimalāṃ nirmalāṃ tataḥ
vidyutāṃ sarvatovaktrāṃ grahairvasudale'rcayet

30.54

sūryaṃ divākaraṃ bhānuṃ bhāskaraṃ ravimīśvari
sraṣṭāraṃ tapanaṃ dharmaṃ vasukoṇe samarcayet

30.55

haṃsaṃ gṛhapatiṃ devi trikoṇe ca trayītanum
śrībindumaṇḍale devi savitāraṃ samarcayet

30.56

kalāḥ samarcayed devi vasukoṇe trikoṇake
tapinīṃ tāpinīṃ caiva bodhinīṃ caiva rodhinīm

30.57

kelinīṃ śoṣiṇīṃ caiva vareṇyākarṣiṇīyutām
etāḥ saṃpūjya vastraśre kaulikaḥ kulasiddhaye

30.58

māyāṃ viśvāvatīṃ hemaprabhāṃ tryaśre samarcayet
visphurāṃ savitāraṃ ca bindubimbe samarcayet

30.59

kamalaiḥ kevalaṃ devaṃ pūjayedāyudhāni ca
suvarṇapadmaṃ saṃpūjya ratnāḍhyakalaśaṃ śive

30.60

mūlena vidhivad devaṃ namet kaivalyasiddhaye
layāṅgametadākhyātaṃ sarvatantreṣu gopitam

30.61

mudrāṃ padmābhidhāṃ devi darśayedarcanāvidhau
aṅguṣṭhau vimukhau madhye saṃyojya tarjanīdvayam

30.62

kaniṣṭhike ca saṃyojya madhyamānāmikāḥ pṛthak
padmamudreyamākhyātā bimbamudrāṃ śṛṇu priye

30.63

aṅguṣṭhau saṃmukhau kṛtvā saṃmukhīraṅgulīścaret
ūrdhvaṃ karayugaṃ kṛtvā bimbamudreyamīritā

30.64

adhomerurvāmamadhyā tad‌rdhve savyamadhyamā
tathaiva kaulikaḥ kuryādvāmataḥ savyato'ṅgulīḥ

30.65

iyaṃ tu bhāskarīmudrā trailokyavaśakāriṇī
sarvarogāpahā khyātā darśanīyārcanāvidhau

30.66

aṅguṣṭhayośca candrārau jñejyāvanāmayostathā
sitāsitau ca tarjanyoḥ rāhuketū pralambayoḥ

30.67

madhye tu bhāskaraṃ devaṃ dhyātā mudrāṃ pradarśayet
āvāhane ca gandhādau naivedye ca visarjane

30.68

dhūpadīpādinaivedyaṃ deyaṃ sarvaṃ khaśolkayā
khaśolkākhyā mahāmudrā ( sarvarogāpahāriṇī

30.69

sarvārthasādhanakarī duḥkhadāridryanāśinī
baddhā muṣṭiyugaṃ devi parva parvaṇi yojayet

30.70

aṅguṣṭhayoniṃ baddhordhve sarvayonyuttamottamām
khaśolkākhyā mahāmudrā ) śatruvargavimardinī

30.71

raviṃ dṛṣṭvā praṇamyādau darśanīyā maheśvari
mahāmudrā mahāgopyā mahāmārtaṇḍavallabhā

30.72

imāṃ yo bhānavīṃ mudrāṃ darśayet pūjane sudhīḥ
śatavarṣasahasrāṇāṃ pūjāphalamavāpnuyāt

30.73

prayogānaṣṭa vakṣye'haṃ śṛṇu pārvati sādaram
yeṣāṃ sādhanamātreṇa mantraḥ siddhiprado bhavet

30.74

stambhanaṃ mohanaṃ caiva māraṇākarṣaṇau tataḥ
vaśīkaraṇavidveṣau śāntikī pauṣṭikī kriyā

30.75

eteṣāṃ sādhanaṃ vakṣye sādhakānāṃ hitecchayā
aprakāśyamadātavyaṃ kalau rogāpahaṃ śive

30.76

(1) ravau prabhāte śayanādutthāyāvaśyakaṃ caret
snātvā japenmahādevi sūryāgre sādhako'yutam

30.77

huned daśāṃśato devi padmapadmāccaśarkarāḥ
sarpiṣā stambhanaṃ sadyo vaiāditaskarapāthasām

30.78

(2) ravau madhyāhnavelāyāṃ japedayutasaṃkhyayā
huned daśāṃśamīśāni ghṛtapadmāccanāgarān

30.79

tarpayet payasā sadyo mohanaṃ dyusadāmapi
(3) ravau sāyaṃ japenmūlaṃ nadītīrasthito rahaḥ

30.80

ayutaṃ taddaśāṃśena hunet padmāccarpaṭān
ghṛtena dadhnā santarghya māraṇaṃ dviṣatāṃ bhavet

30.81

(4) ravau niśīthe saṃjapya mūlamantrāyutaṃ śive
huned daśāṃśamambhojaśaṭīghṛtakulatthakaiḥ

30.82

ākarṣaṇaṃ bhavet sadyo devi nākastriyāmapi
(5) ravau brāhme muhūrte tu snātvā tatra japejjale

30.83

ayutaṃ mūlavidyāyā daśāṃśaṃ juhuyāt sudhīḥ
ghṛtamatsyaeḍakarpūra-padmapadmāckesarān

30.84

indro'pi vaśatāṃ yāti kiṃ punaḥ kṣudrabhūmipaḥ
(6) sūryodaye japedvidyāṃ sādhako'yutasaṃkhyayā

30.85

juhuyāt sarpirambhoja-mustāparpaṭaśarkarāḥ
viṣeṇa tarpayed devaṃ bhavedvidveṣaṇaṃ dviṣām

30.86

(7) ravāvardhodite devi kūpabhūmau japenmanum
ayutaṃ taddaśāṃśena huned ghṛtayavākṣaṇāḥ

30.87

ambhojakesaraṃ śueṃṭhīṃ śāntirbhavati tatkṣaṇāt
ativṛṣṭeranāvṛṣṭeḥ rājabhītermaheśvari

30.88

(8) ravāvastaṅgate'pyardhe japedvānīramūlake
mantrāyutaṃ mahādevi juhuyād ghṛtagopayaḥ

30.86-2

padmapadmādyakiñjalka-matsyaeḍārkadattāni ca
daśāṃśaṃ tarpayed dadhnā kṣīreṇa sitayā sudhīḥ

30.60-2

mahāpuṣṭirbhavelloke devānāmapi durlabhā
ityeṣa paṭalo guhyaḥ savituścātivallabhaḥ

Linked texts (4)