Pramāṇa · Search · About · API

Devirahasya 37

Devīrahasya 37

Language
Sanskrit

37.1

sarvadā sarvathā gopyaṃ gopanīyaṃ svayonivat
śrībhairava uvāca
kailāsottuṅgaśikhare ratnarājivirājite
kalpadrumavanākīrṇe svarṇapāṣāṇamaṇḍite

37.2

padmarāgaśilāmuktā-maṇimāṇikyabhūṣite
vasantakusumāmoda-gandhavāhaikavāhini

37.3

navaratnaśilābhadre-pīṭhasthaṃ parameśvaram
devadevaṃ jagannāthaṃ pārvatīsahitaṃ vibhum

37.4

vasantaṃ² ca japantaṃ ca dhyāyantaṃ brahma śāśvatam
pannagābharaṇopetaṃ jaṭāmukuṭamaṇḍitam

37.5

kapālakhaṭvāṅgakaraṃ varābhayadharaṃ haram
devadānavayakṣendra-piśācoragasevitam

37.6

gaṇagandharvasiddhaugha-nāradārcitamavyayam
prasannavadanaṃ devaṃ devī dṛṣṭvā maheśvaram

37.7

praṇamyotthāya sahasā baddhāñjalipuṭaṃ puraḥ
uvāca pārvatī devī³ śivaṃ trailokyanāyakam

37.8

śrīdevyuvāca
bhagavan devadeveśa devāsuranamaskṛta
tvaṃ śivaḥ sarvalokeśaḥ satyaḥ saccitsvarūpakaḥ

37.9

anantaḥ paramātmeti trijagatkāraṇaṃ prabhuḥ
udbhūtisthitisaṃhartrityaṃ layakṛd bhuvaneśvaraḥ

37.10

anādinidhano devastriguṇātmāpi nirguṇaḥ
kiṃ tava paraṃ mahattvaṃ yajjapyasya santatam

37.11

tattvaṃ śrotumicchāmi tvatto bhaktāsmi kiṃṅkarī
śrībhairava uvāca
lakṣavārasahasrāṇi vāritāsi punaḥ punaḥ
strīsvabhāvānmahādevi punarmāṃ paripṛcchasi

37.12

bhaktyānayā prasanno'haṃ tava pārvati tattvataḥ
etadrahasyaṃ paramaṃ vakṣye guhyaṃ divaukasām

37.13

avaktavyamidaṃ tattvamadātavyaṃ maheśvari
tava snehena vakṣyāmi nacākhyeyaṃ mahātmabhiḥ

37.14

yo devadevo varado lakṣmīnārāyaṇo vibhuḥ
sargasthitikaro loke pralayāntakaro laye

37.15

sa eva parameśāno devapannagarakṣasām
daityakinnarayakṣendra-manujānalapāthasām

37.16

brahmādikīṭaparyanta-jagattritayakāraṇam
adhyakṣaḥ sākṣikaḥ sarvabhūtātmā parameśvaraḥ

37.17

tasya devasya paścāṅgaṃ paṭalaṃ paddhatiṃ śive
kavacaṃ tattvabhūtaṃ ca mantranāmasahasrakam

37.18

stotraṃ japāmi deveśi smarāmi manasā sadā
paṭhāmyaharniśaṃ śāntaḥ paramānandakāraṇam

37.19

śrīdevyuvāca
paścāṅgaṃ devadevasya lakṣmīnārāyaṇasya vai
śrotumicchāmyahaṃ nātha vaktumarhasi sāṃpratam

37.20

śrībhairava uvāca
paramārthapradaṃ devi paścāṅgaṃ sarvasiddhidam
vakṣyāmi parameśasya lakṣmīnārāyaṇasya te

37.21

tatrādau paṭalaṃ vakṣye mūlavidyārahasyakam
mantroddhāraṃ pravakṣyāmi lakṣmīnārāyaṇasya te

37.22

aṣṭasiddhipradaṃ sadyaḥ sādhakānāṃ sudurlabham
tāraṃ parā ca haritaṃ parā lakṣmīstato'bhidham

37.23

lakṣmīnārāyaṇāyeti viśvamante manuḥ smṛtaḥ
nāsya vigno navā doṣo na bhītirna viparyayaḥ

37.24

sācānmokṣaprado mantraḥ sarvārthaphaladāyakaḥ
varṇalakṣapuraścaryāṃ trināyaṃ cāsti doṣabhāk

37.25

jīvahīno yathā dehaḥ sarvakarmasu na kṣamaḥ
puraścaraṇahīno'pi na mantraḥ phaladāyakaḥ

37.26

vaṭe'raṇye śmaśāne ca śūnyāgāre catuṣpathe
ardharātre ca madhyāhne puraścaraṇamācaret

37.27

varṇalakṣaṃ puraścaryāṃ tadardhaṃ vā maheśvari
ekalakṣāvadhiṃ kuryānnāto nyūnaṃ kadācana

37.28

prathamaṃ guruhastena sādhakasya kareṇa vā
tataḥ svayaṃ caredvahvīḥ puraścaryā vidhānataḥ

37.29

japād daśāṃśato homastaddaśāṃśena tarpaṇam
mārjanaṃ taddaśāṃśena taddaśāṃśena bhojanam

37.30

vinā daśāṃśahomena na tatphalamavāpnuyāt
paścaratneśvarīṃ vidyāṃ lakṣmīnārāyaṇasya hi

37.31

japet tāṃ pañcabhiḥ sārdhaṃ puraścaryāphalaṃ labhet
atha mantrasya deveśi saṃskāravidhimācaret

37.32

vidhinā yena sadyastu sādhakaḥ siddhibhāgbhavet
utkīlayenmanuṃ devi tataḥ sañjīvayet punaḥ

37.33

vidyāṃ śāpaharīṃ devi japeta sadguruvaktrataḥ
siddhaṃ matraṃ japedante punaḥ saṃpuṭitaṃ caret

37.34

eṣa yogavaro mantro yogināṃ durlabhaḥ kalau
athotkīlanamācakṣva mantrasyāsya maheśvari

37.35

parārṇaṃ haritaṃ bhūtiṃ māṃ nāma sakalāṃ paṭhet
viśvānte praṇavo devi sakṛduccārayet sudhīḥ

37.36

mantrotkīlanametat syāt sarvatattvamayaṃ śive
mantrasañjīvanaṃ vakṣye śṛṇu pārvati sādaram

37.37

parā vibhūtirmā tāraṃ nāmānte viśvamīritam
sañjīvanākhyo gādito mantrarājo maheśvari

37.38

śivena varṇitā vidyāṃ śive śāpaharīṃ japet
vakṣyāmi tava bhaktyāhaṃ guhyāṃ sarvārthadāyinīm

37.39

tāraṃ parā virdeveśi brahmaśāpaṃ tataḥ paṭhet
mocaya-dvayamuddhṛtya parā mā ṭhadvayaṃ japet

37.40

vidyeyaṃ durlabhā loke lakṣmīnārāyaṇapriyā
siddhaṃ matraṃ japenmantrī punaḥ saṃpuṭitaṃ caret

37.41

saṃpuṭasya manuṃ vakṣye sarvāgamasamuddhṛtam
viśvamādau manuṃ paścānnāma cānte japet priye

37.42

saṃpuṭākhyo manurdevi varṇito'yaṃ phalāpsaye
mantrasyāsya mahādevi varṇito'tra ṛṣiḥ śivaḥ

37.43

triṣṭup chando mayākhyātaṃ devatāpi samīritā
lakṣmīnārāyaṇo devi bījaṃ lakṣmīrudāhṛtā

37.44

śaktiḥ parā, tathā tāraṃ kīlakaṃ samudāhṛtam
bhogāpavargasiddhyarthaṃ viniyogaḥ prakīrtitaḥ

37.45

dhyānamasya pravakṣyāmi lakṣmīnārāyaṇasya te
yenaiva dhyānamātreṇa lakṣmīḥ sannidhimeṣyati

37.46

pūrṇenduvadanaṃ pītavasanaṃ kamalāsanam
lakṣmyāśritaṃ caturbāhuṃ lakṣmīnārāyaṇaṃ bhaje

37.47

tāramābhūtibījaistu ṣaḍdīrghāntairmaheśvari
nyāsaṃ kuryāt ṣaḍaṅgādi karaśuddhyādipūrvakam

37.48

yantroddhāraṃ pravakṣyāmi sarvāśāsiddhidaṃ param
sarvasaṃmohanaṃ yantraṃ vāñchitaikapradāyakam

37.49

bindutrikoṇaṃ vasvaśraṃ vṛttāṣṭadalamaṇḍitam
ṣoḍaśāraṃ vṛttaṃ ca bhūgṛheṇopaśobhitam

37.50

lakṣmīnārāyaṇasyaitacchrīcakraṃ paramārthadam
layāṅgaṃ devi vakṣyāmi bhogamokṣaphalapradam

37.51

vedāgamarahasyāḍhyaṃ pūjākoṭiphalapradam
vajraśaktidaṇḍakhaḍga-pāśayaṣṭidhvajāstataḥ

37.52

śūlaṃ pūjyāḥ śive caite bāhyadvāreṣu sarvadā
indrāgniyamamāṃsāda-varuṇānilavittadāḥ

37.53

seśvarāḥ sādhakaiḥ pūjyā brahmānantādayastataḥ
keśavaṃ mādhavaṃ kṛṣṇaṃ govindaṃ madhusūdanam

37.54

gadādharaṃ śārṅgadharaṃ cakrapāṇiṃ caturbhujam
padmāyudhaṃ kaiṭabhāriṃ ghoradaṃṣṭraṃ janārdanam

37.55

vaikuṇṭhaṃ vāmanaṃ caiva pūjayed garuḍadhvajam
ṣoḍaśāreṣu deveśi vāmāvartena sādhakaḥ

37.56

tatrārcayenmahādevi mantrī gurucatuṣṭayam
asitāṅgaṃ haṃsaketuṃ vaṃśīpāṇiṃ ca pūjayet

37.57

vṛttatrayeṣu deveśi sādhako gandhapuṣpakaiḥ
saṃhāraṃ rurukaṃ caṇḍaṃ bhūteśaṃ kālabhairavam

37.58

kapālaṃ bhīṣaṇaṃ caiva tathā śmaśānabhairavam
pūjayet sādhakaḥ siddhyai vasupatre maheśvari

37.59

viṣṇuṃ ca vāsudevaṃ ca devaṃ dāmodaraṃ tathā
nṛsiṃhaṃ ca mahādevi devaṃ saṅkarṣaṇaṃ tathā

37.60

trivikramaṃ cāniruddhaṃ viśvaksenaṃ ca sādhakaḥ
lakṣmīśabdāṅkitaṃ devi vasukoṇeṣu pūjayet

37.61

gaṅgāṃ ca yamunāṃ caiva tryaśre sarasvatīṃ tathā
pūjayedagravahnīśakramayogena pārvati

37.62

lakṣmīnārāyaṇaṃ devaṃ pūjayed bindumaṇḍale
mahālakṣmīṃ rājyalakṣmīṃ siddhalakṣmīṃ ca pūjayet

37.63

śaṅkhaṃ cakraṃ gadāṃ padmaṃ pūjayed bindumaṇḍale
gandhākṣataprasūnādi-gurumālyavibhūṣaṇaiḥ

37.64

saṃpūjyāmṛtakumbhamastyairbindubhirmantrapūjitaiḥ
tarpayet sādhako devaṃ makāraiḥ pañcabhiḥ param

37.65

layāṅgametadākhyātaṃ prayogānaṣṭa pārvati
vaśye yena bhavet siddhirmantrasyāśca viśeṣataḥ

37.66

stambhanaṃ mohanaṃ caiva māraṇākarṣaṇau tataḥ
vaśīkāraṃ tathoccāṭaṃ śāntikaṃ pauṣṭikaṃ tataḥ

37.67

eteṣāṃ sādhanaṃ vakṣye prayogāṇāṃ maheśvari
eṣāṃ sādhanamātreṇa mantrasiddhiḥ prajāyate

37.68

(1) ravau snātvā mahādevi gatvāśvatthatarostalam
japedayutamīśāni hunet tatra daśāṃśataḥ

37.66-2

ghṛtamatsyaeḍaguḍaiḥ puṣpairānandamiśritaiḥ
stambhanaṃ jāyate sadyo vādivātārkapāthasām

37.70

(2) candre'rdharātravelāyāṃ gatvā śṛṅgāṭakaṃ sudhīḥ
diśo baddhvāsanaṃ śodhya prāṇāyāmaṃ vidhāya ca

37.71

japenmūlaṃ hariṃ dhyātvā hutvā devi daśāṃśataḥ
ghṛtanāgarapunnāga-karañjakusumāni ca

37.72

tarpayitvā daśāṃśena mārjayitvā maheśvari
tadraktena cared bhāle tilakaṃ sādhakottamaḥ

37.73

trailokyaṃ sahasā dṛṣṭvā mohameṣyati tanmukham
(3) bhaume gatvā śmaśānaṃ ca japedayutasaṃkhyayā

37.74

huned daśāṃśato devi sarpirgodhūmapāyasam
dūrvāpatraṃ sāsavaṃ ca mṛtyuśca mriyate caṇāt

37.75

(4) budhe gatvāṭavīṃ dūraṃ japej-bhaṃbhātaṭe śive
ayutaṃ mūlamantraṃ ca hunet sarpiryavākaraṇān

37.76

dūrvāpūtāsapadmābjapatrāṇi kusumāni ca
rambhāpi puratastasya sadyaḥ prādurbhaviṣyati

37.77

(5) gurau gatvā nadītīraṃ japet tatra daśāṃśataḥ
hunedājyena madhunā śaṭīcandrakarīrakān

37.78

tadraktena sādhitena trailokyaṃ vaśyameṣyati
(6) śukre'śokataruṃ gatvā japedayutasaṃkhyayā

37.76-2

hunet sarpirnāgapaṭaṃ śālicūrṇaṃ tuṣākulam
tarpayedāsavājyecu-rasairbhuktvā daśāṃśataḥ

37.80

śatroḥ śambhusamānasya bhaveducāṭanaṃ dhruvam
(7) śanau gatvā nadītīraṃ japedayutasaṃkhyayā

37.81

homo daśāṃśataḥ kāryo ghṛtapāyasakuṅkumaiḥ
sāraṇālairjambuphalaiḥ śāntikaṃ jāyate caṇāt

37.82

(8) śubhacaiṃ śubhavāre vā gatvopavanamaṇḍalam
japedayutamīśāni hunedājyena paṅkajaiḥ

37.83

sotpalaṃ sakaṇaṃ sāmlaṃ mahāpuṣṭiḥ prajāyate
etadrahasyaṃ paramaṃ tava bhaktyā mayoditam

37.84

lakṣmīnārāyaṇasyedaṃ sarvasvaṃ paramārthadam
adātavyamabhaktebhyo duṣṭebhyo vīravandite

37.85

mahācīnapadasthebhyo bhogadaṃ mokṣadaṃ kalau
gopyaṃ guhyatamaṃ tattvaṃ guhyādguhyatamṃ śive
ānandakāraṇaṃ gopyaṃ gopanīyaṃ khayonivat

Linked texts (5)